Shtëpia Botuese Neraida

22/11/2024

SHËRIMI - libër i ri, i sapodalë në librari.

Çfarë mund të na mësojnë njerëzit që shërohen papritur nga sëmundje të rënda për një jetë më të mirë?

Dr. Jeff Rediger, një mjek i mirënjohur nga Harvardi, ka kaluar pesëmbëdhjetë vitet e fundit duke studiuar mijëra individë nga e gjithë bota dhe duke analizuar historitë pas rasteve të jashtëzakonshme të shërimit spontan: nga Kleri, një pensioniste e diagnostikuar me një formë agresive të kancerit të pankreasit, së cilës i kishin mbetur vetëm disa javë jetë, te Meti, 23 vjeç, të cilit i dhanë vetëm 2 për qind shans për të mbijetuar nga një tumor vdekjeprurës në tru. Të dy refuzuan kimioterapinë dhe rrezatimin, duke u kthyer në shtëpi për t’u përgatitur për pranimin e një vdekjeje të qetë. Sot, më shumë se një dekadë më vonë, të dy janë gjallë dhe trupat e tyre janë pa asnjë tumor.

Dr. Rediger nuk i klasifikon njerëzit si Kleri apo Meti si ‘rastësi’ apo ‘jashtëzakonisht të veçantë’. Në vend të kësaj, ai analizon atë që ata – së bashku me mijëra të tjerë – kanë bërë për të shëruar veten dhe shqyrton faktorët e përbashkët të njerëzve që e kanë sfiduar probabilitetin. Cured zbulon sekretet e lidhjes midis mendjes dhe trupit dhe tregon fuqinë e jashtëzakonshme të sistemit imunitar.

12/11/2024

Shkrimtari i njohur grek Makis Citas do të jetë në Tiranë në ditët e Panairit të 27 të Librit.
Shtëpia Botuese Neraida ka botuar të përkthyer shqip 4 nga 32 librat për fëmijë të autorit.
Lexuesit e vegjël janë të mirëpritur në stendën e Neraida-s në datat 15,16 dhe 17 nëntor për të bashkëbiseduar me autorin dhe për të marrë librat me firmën e tij.

30/10/2024

13-17 NËNTOR: MES LIBRAVE DHE PËR LIBRAT

Në Pallatin e Kongreseve, i cili vetëm për pak ditë do jetë Pallati i Librave, ju presim në stendën e NERAIDA-s!

16/10/2024

DRITARE E VERBËR
Libri i ri me poezi i Varvara Xristias, poetes që jeton dhe punon në Patra, Greqi.
Pak shije nga poezia e Varvarës e përkthyer nga Dashamir Malo.

*

KUSHTIM

Poezive tona gjysmë të shkruara,
këngëve tona gjysmë të kënduara,
gjysmë të thënave “Të dua”,
vendimeve tona të marra me gjysmë zemre,
përqafimeve të lëna përgjysmë,
lotëve tanë gjysmë të mbytur,
gotave tona gjysmë të mbushura,
ëndrrave tona të mbetura gjysmëvarur.

Gjithë atyre gjysmave
që urrejmë
dhe ishin e gjithë jeta jonë.

12/10/2024

Mirela Karanxha-Koça, pedagoge në Departamentin e Gjuhës, Letërsisë dhe Qytetërimit Grek në Universitetin e Gjirokastrës vjen me një kënveshtrim më të gjerë e professional për librin "Lule e vjedhur", shkrim të cilin e gjeni sot në faqet e ExLibris.
Faleminderit Mirela, Falemoinderit ExLibris!
https://exlibris.al/ëp-content/uploads/2024/10/EXLIBRIS_305.pdf

11/10/2024

"LULE E VJEDHUR" NË GREQI

Është kënaqësi e veçantë kur sheh se Botimi i NERAIDA-s, vëllimi “Lule e vjedhur” një përmbledhje me prozë nga 23 autorë të Minoritetit Etnik Grek, vjedh vëmendjen edhe të Diastixo.gr ( sajtit informativ më të madh grek për librin, artet dhe kulturën).
Natyrisht, kjo nuk mund të arrihej pa syrin e vëmendshëm dhe dashamirësinë e përhershme të drejtuesit të DIASTIXO-s shkrimtarit dhe mikut të NERAIDA-s Makis Citas, të cilin e falënderojmë nga zemra.

10/10/2024

DASHNORË NË ÇMENDINË

Një roman nga Kostas Limburis që kombinon dashurinë dhe dramën politike të Qipros, i përkthyer nga Petro Çerkezi.

09/10/2024

“14 NOVELA” RIVJEN PËR LEXUESIN

Maksim Gorki në vitin 1900 ka thënë për Çehovin:
“Tregimet tuaja janë si flakone elegante parfumesh, që kanë të gjitha aromat e jetës dhe, më besoni, një nuhatës i hollë gjithmonë do të ndjejë aromën e tyre të vërtetë, të lehtë, të mprehtë, jetëdhënëse dhe do të përcaktojë vlerë e mirëfilltë e të nevojshme që ka çdo flakon i juaji.”

08/10/2024

KËSHILLTARI I MBRETIT NGA MAKIS CITAS

Njëherë e një kohë u shfaq një njeri që kishte përgjigjen e duhur për çdo çështje e problem dhe prandaj mbreti i vendit e quajti i Urti, e emëroi këshilltarin e tij zyrtar dhe e mori në pallat. Në fillim punët shkuan mirë dhe të gjithë ishin të lumtur. Por nuk kaloi shumë dhe gjërat ndryshuan, këshilltari bëri gabim pas gabimi... Po çfarë ndodhi në të vërtetë?

Përgjigjen e pyetjes - jo vetëm lexuesit e vegjël por edhe te rriturit kurreshtarë - do e zbulojnë pasi të kenë lexuar librin.
Është libri i katërt i shkrimtarit grek Makis Citas i sjellë në shqip nga Jani Malo.

07/10/2024

NJË LIBËR I RI NGA KLEO LATI

Fëmijët do të njihen me Princeshën Sharlotte, përmes rrëfimit të ndjerë dhe plot dashuri të autorit, i cili i kthehet letërsisë për fëmijë pas disa dekadash dhe shumë romanesh e dhjetra përkthimesh për të riturit.
Libri është ilustruar nga Endri Beqo.

03/10/2024

LULE E VJEDHUR
Prozë nga autorë të Minoritetit Etnik Grek.
Përzgjedhur dhe përgatiur nga Vaggelis Zafiratis.
Një botim prej 476 faqesh ku përfshihen 23 prozatorë.

NESËR NË GJIROKASTËR

03/10/2024

NESËR NË GJIROKASTËR

21/09/2024

Nga poetja Natasha Lako, në EXLIBRIS 302, mund të lexoni: "Rreth vetmisë bashkuese të një poezie të sapombërritur në shqip." dhe të njihni më mirë poezinë e poetit turko-qipriot Mehmet Jasin.
Faleminderit Natasha dhe EXLIBRIS!

28/07/2024

LUTJE

E mbylle dashurinë pas hekurave të ftohtë të mendjes sate,
e ushqeve me dromca të errëta dyshimesh të vagullta,
gjersa u asfiksua në qilarin e boshatisur nga ndjenjat,
gjersa iu hidhëruan puplat e zunë t’i binin nga krahët,
gjersa i pikuan cicërima të dhimbsura nga sqepi që dridhej,
gjersa u përplas, më në fund, shpresëtretur mureve pa veshë.

Tani, që mbaroi gjithçka, është mirë dhe për ty
ta pastrosh kohën tënde, siç bëjmë me të vdekurin para përcjelljes,
ta pastrosh dhe atë qilar të rrëgjuar që kundërmon temjan,
sa kujtesa jote nuk është shndërruar në një merimangë të zezë,
që do të endë aty rrjetën për të mbajtur peng dhe të nesërmen.

Të lutem, hapja derën qilarit erërëndë se mbase nxjerrin flatra
e ikin të lira cicërimat që ende gulçojnë në dyshemenë shkretane!
Mos u merakos nëse mbeten pas ca rrathë shpërfillës nga zhgënjimi,
do treten si kujtime sapo një re harrese të t’i fshehë nga sytë.

Mos ki frikë, nuk urren kush fluturon
në qiell të hapur!

19/07/2024

PËR FATOS ARAPIN

Nuk mëdyshem aspak kur them se Fatos Arapi është liriku më i madh shqiptar i kohës sonë. Ky pohim, që natyrisht nuk artikulohet nga unë për herë të parë, mund të ngjallë diskutime, por zor se mund të kundërshtohet fakti se Arapi është zëri më i veçantë, që nuk ngjason me asnjë tjetër, më magjepsësi, me elitisti në poezinë bashkëkohore shqiptare.
Ai ka vite që hesht, është tërhequr në vetmi, si një muzg i thyer. Mbase ngaqë nuk u kuptua kur fliste, meriton të kuptohet tani që hesht. Dhe të respektohet për atë që shkroi, për atë që përjetoi dhe për atë kurrë nuk e tha.