Ingwalo Ezingasoze Zabuna

02/02/2025

Umdlalo wethu weMfihlo Yomndeni ususemaphethelweni kusele ama Episodes amabili nje ukuthi siwugqibe.... Nxa ungawubukelanga wonke landela i link iyokubeka ku Youtube lapho otholakala khona wonke lumdlalo. Jabulela nanso ivideo encane echaza kuhle ngawo lumdlalo. Like and comment, ungakhohlwa loku share labanye phela babukele.....Link https://youtube.com/?si=VRtFJagQZg5wF43V

31/01/2025

IMFIHLO YOMNĎENI EP 13

A drama series film based on an isiNdebele novel entittled Imfihlo Yomndeni, written by Pascar Ncube and published by Ingwalo Ezingasoze Zabuna in 2023.Music...

27/01/2025

Namuhla sivuke singapha, ngena kuYoubute uzizwele konke ngathi ngeke uphinde ubuze ukuthi singobani senza ngani....Yonke indaba ilapha👉

Cayley Podcast traces Pascar Ncube's journey as an isiNdebele author, the making of Imfihlo Yomndeni...

23/01/2025

Ngolimi lwakini umuntu omude limbiza lisithi yini?

23/01/2025

Sizwe sakithi umdlalo wethu oyakhelwe phezu kogwalo Yomndeni utholakala ku Youtube. Ngicela lithi subscribe ku channel yethu ye Youtube ukuze sikhule lathi iphakame lento esiyenzayo. Siyabonga kibo bonke abayilandelayo Yomndeni, kunengi esisazokwenza ngenhloso yokulijabulisa. Landela ilink ukuze uyibukele yonke Imfihlo Yomndeni.

Subscribe to this channel
https://youtube.com/?si=cY4qBnWJsk8_g3Qe

Imfihlo Yomndeni Episode 1
https://youtu.be/17ySq6yYYWI?si=3jIvjVSqHfgDb6kA

Imfihlo Yomndeni Episode 2
https://youtu.be/3x7wi-BwzYk?si=q1EvSG3_IJ08EMZD

Imfihlo Yomndeni Episode 3
https://youtu.be/YDTYUzkE7Yc?si=bKfUXnR3suWYH3OZ

Imfihlo Yomndeni Episode 4
https://youtu.be/0m8TvG6H84w?si=Ps22xjaGMJMaYvxa

Imfihlo Yomndeni Episode 5
https://youtu.be/YIxakEIJYMc?si=fu-IhaPzutsRWCm6

Imfihlo Yomndeni Episode 6
https://youtu.be/ftKBpkJYe6s?si=h0WGQLMhWuaFWv0m

Imfihlo Yomndeni Episode 7
https://youtu.be/DU3Z_qTQLV4?si=mGCVEWjXvemrsxaq

Imfihlo Yomndeni Episode 8
https://youtu.be/DU3Z_qTQLV4?si=mGCVEWjXvemrsxaq

Imfihlo Yomndeni Episode 9
https://youtu.be/vEJ3RS0K6rU?si=XPU_njrsiSkxGLYh

Imfihlo Yomndeni Episode 10
https://youtu.be/EhA0Z7RG65Q?si=VECdxeXwmcZOch8a

Imfihlo Yomndeni Episode 11
https://youtu.be/jJTwT0uFtNc?si=ohpyQ6opUxSWaGze

Imfihlo Yomndeni Episode 12
https://youtu.be/SmD7_IcS8YA?si=3f2nNhdbYz7TkIde

Please subscribe to our channel to watch all full episodes.

Pascar Ncube is an established renowned isiNdebele author and publisher who had published 6 fiction isiNdebele Novels. Imfihlo Yomndeni is his 6th isiNdebele novel project which was published in 2023 and turned to a TV drama series in 2024. Check out his social media handles to have access to his no...

22/01/2025

Imfihlo Yomndeni Episode 12 isikhona laphana ku Youtube landela ilink uyobukela yonke

A drama series film based on an isiNdebele novel entittled Imfihlo Yomndeni, written by Pascar Ncube published by Ingwalo Ezingasoze Zabuna Publishers in 202...

21/01/2025

🎉 Facebook recognised me as a consistent reels creator this week!

20/01/2025

lomunye Alilandima

7

sothando

“Hawu Nomazulu! Ngubani-ke, lo ophuma laye lapha endlini engingamaziyo?” Wavele wangidina nje umbuzo kaJabulani. Ngezwa kuthi angimphendule kubi avele ayelala.
“Ukuthi ungubani wena Jabulani ozangibuza lowo mbuzo? Awusuye baba wami phela wena. Owami ubaba ngamtshiya eGomoza eLupane angilababa lapha eGoli ozabe engikhangela endlini yami engizibhadalela yona intela. Uhlutshwa yini wena ngalomuntu? Uthunukala ngaphi nxa ubona ngingena lomuntu lapha? Okokuqala wena wangibonisa ubuwula bakho ngokuba ungene engutsheni lomngane wami, pho osakudinga kimi yikuphi lokho uMonalisa angelakho? Ongangenzela khona njengamanje jaha yikuphuma uphele lapha uzongixabanisa lesithandwa sami.” Ngamphendula ngikhangelele eceleni, ngisendlula ingubo okokumhlabekisa ngamadla.

Wama wathi khwimilili uJabulani waswela ukuthi ayenzeni? Ngangimbona ukuthi wayesefuthelene kakhulu ngaphakathi. Ngangifuna laye azwe ubuhlungu abone angathi bengilele lalomuntu obephuma lapho. Ngangifuna ahlabeke ngamandla loba wayengabe ezigijigijimisa loMonalisa kodwa ngangisazi ukuba lami wayengifuna. Wayephethwe yibugwala; yikho phela okwakumenze wehluleka lokungikhombisa ngesikhathi esifaneleyo waze wangifaka esimeni esibi sokuthi kubengathi mina yimi engimlandelelayo. Ngambona ebuna, waqanda nje waswela ukuthi aphendule athini? Inkulumo yami yamthelela intolo emadolo. Ngangimbona ngimkhangela ngimtshontsha. Wayebukeka sengathi eyinye ingqondo yayimthuma ukuthi avuke ngolaka kodwa eyinye ibuye imkhuze. Wayeseqhuqha esengumhlanga kaTshangani engenisa, kanti lolaka lolu lwaselusentanyeni, wayesezonde! Ngasengimnyathele ikhonzi. Lokhu-ke, ayesekwenza yikho kanye engangifuna ukumbona ekwenza. Yayijabula inhliziyo yami lapho ngimbona ezonda kangaka ngoba ngangifuna lokhu lami engakuzwayo ngelanga nginanzelela ukuthi wayedlala umacatshelana loMonalisa laye akuzwe. Zasezitshintshile izinto, ikhuba seligaya ngomunye umhlathi.
“Angithi kumnandi imbuzi ihlaba inja, nxa inja isiluma imbuzi sekubuhlungu. Wangizwisa ubuhlungu Jabulani ngikuthanda ngenhliziyo yami yonke, kodwa wajika wangenza isilima. Wabona ngikuncenga wazitshela ukuthi umhlaba ucina ngawe. Ngephutha wakhohlwa ukuba bakhona abantu abakwazi ukuthanda lapha ngaphandle. Ususemuva bhudimadlisa mina sengithandana lendoda elothando ekwazi ukuthi umfazi uphathwa kanjani. Kuzokusiza ukusuka lapha ubuyele endlini yakho ngoba uzongiphaphisela inyoni yami, uyabuya umuntu wami.” Ngaqhubeka ngimklolodela ngingagqize qhakala.

Noma ngangimzwisa ubuhlungu obungaka ngangisazi ukuthi wayengeke lakancane alinge angifake isandla. Wayezongifaka isandla ngaliphi, wona ngawaphi amandla, esemadolonzima kwasekunzima emuva laphambili.
“Nomazulu into engiyilandileyo lapha, yikuthi ngizoxolisa okwenzakala phakathi kwethu...” Engakayingaphi ngenkulumo yakhe ngasengimbambe umlomo.
“Ake ngikuqondise izigwenxa zomlomo. Phakathi kwethu, akwenzakalanga lutho, khepha kwenzakala phakathi kwakho loMonalisa. Mina lawe asenzanga lutho. Asikho nje isidingo sokuba uxolise. Uxolisani phela mina lawe angikhumbuli sikhombana. Kanti sakhombana nini wawuvele ungikhombise nini? Akube yindoda Jabulani wenze okujabulisa umoya wakho. Uphume uphele lapha uyedinga umuntu othandwa yinhliziyo yakho. Kimi ufana lomkhaza uyangilandelela kanti utshaya indlovu ngempama ngoba inhliziyo yami kayisekho lakancane kuwe.” UJabulani wangenzela okunye engangingakulindelanga ngoba waguqa phansi ngamadolo, waxolisa ngendlela eyacina isingithinta.
“Noma ngiyaxolisa konke okubi engikwenzileyo ngaphambi kobuso bakho. Ngiyaxolisa ngokungadlali indima yami njengendoda empilweni yakho. Kade ngakubona ngangilokhu ngithi ngifisa mina lawe sibelobudlelwano obuhle kakhulu andubana ngikubonise uthando engilalo enhliziyweni yami. Kubuhlungu ngoba zonke izifiso zami zithanda ukutshabalala, kube kuyenzeka ungene enhliziyweni yami ubone ukuthi luphuphuma kanjani uthando lwakho, ubuzongixolela, kodwa ngoba lokho angeke kwenzeke mina ngizophila impilo ebuhlungu yokuzisola. Angenzanga okwakufanele ngikwenze ngesikhathi esifanele wazewawela kwezinye izandla zabanye. Bengizekuwe lapha ngithi ngizekubonisa.”
Ngaqala ukuvusa amehlo manje sengifuna ukubona lento ayethi uzongibonisa yona. Wangenisa isandla esikhwameni sebhulugwe, wakhupha okulibhokisi okuncane. Ngezwa kuthi angimeqele ngenjabulo, ngazikhuza. Lwangithi, tha! Uvalo, ngicabanga laba, uThandolwenkosi, uMonalisa kanye loCaro. Ngangizabalibala kanjani kambe? Ngazivala amehlo ngakhala, wasukuma wangesula inyembezi. Wakhupha indandatho yegolide, wangibuza wathi, “Nomazulu sithandwa sami, uyangivumela yini ukuba ngikwenze umakoti wangakithi?” Ngavele ngaphakamisa kanye isandla sami senxele ngamupha umunwe ukuthi ayifake.
“Yebo. Yebo, yebo Ndlovu, ngiyavuma, ngiyakuthanda.” Wamukela isandla sami, wangifaka indandatho yegolide, okwakuyinto engangileminyaka ngifisa ukuyibona isesandleni sami. Sangana, saqabulana saze sawela phezu kwethala. Inhliziyo yami yatshaya ngamandla. Ngalizwa igazi seligijima ngamandla emibilini yami, ngabalethemba lokuthi, lemizwa engangiyizwa laye wayeyizwa ngokufanayo. Ngempela indlu yami yaphenduka iKhenani, ngazizwa ngilesithunzi. Ngalubona uthando luvutha amalangabi. Kusenjalo, lwakhala ucingo lwami, ngangingafuni ukuludobha, lwakhala lwaze lwathula. Wangadeli lo ongitshayelayo, waphikelela. UJabulani wacina ethi ngilubambe. KwakunguThandolwenkosi Mahlangu, kwathi tha amazwi enhliziyweni yami athi, ‘Akukho nkunzi zabhonsa sibaya sinye.’ Ngabona ukuba lesisimo besizangitshiya phakathi kwexhaphozi, sekudalakale inkemenkeme yendaba.
“Sithandwa sami ngingabe ngikuphoxe ngani okukwenza ungabusafuna ukukhuluma lami? Bengithi ngikutshele ukuba ngiyakukhumbula akuvumi ukuthi ngehlukane lawe. Ngifisa ngabe siqeda isikhathi sethu sisonke.” Ngaswela lokuthi ngimphendule ngithini, kwazise uJabulani wayesizwa konke okwakukhulunywa. Wayesehlahle amehlo wena owabona inhloko yembuzi iphekwe lempondo ungafakaza ngcono. Wayesephelelwe. Nginjalo ucingo ngangilokhu ngilubambile, uThandolwenkosi ephethe encokola indaba zothando kodwa ngingaphenduli.
“Noma, Nomazulu! Usekhona yini? Kungani ungiphatha kabuhlungu kangaka. Uyazi uthando engilalo ngawe lukhulu! Lukhulu ngalendlela engingakwazi ukuba ngiyitsho kanjani. Ngiyakwazi ulaye umuntu othandana laye kodwa mina engifisa ukwazi yikuthi ngiyakuthanda njalo ngizotshada lawe.” Ngokutsho lawo, yahluthuka ngamandla inhliziyo kaJabulani, wangithathela umakhalekhukhwini, wawutshayelela phansi, wacacadeka.
“Wenzani? Ungenza isiphukuphuku sakho. Ngubani lumuntu okhuluma laye? Lalela lapha ngizokubonisa inhlaka yotshani namhlanje nxa ungangazi, ungizwa ngendaba njengohambo lukaLobhengula. Ngizakubonisa izibunu zenyoka, awudeleli uqhuba intwala ngewisa!” Watsho lawo uJabulani, lamehlo esebomvu gebhu! Wanginklinya.
Kusenjalo wathatha esinye sezigqoko zami wangihlohla sona emlonyeni ukuba ngingabengisakwazi ukuhlaba umkhosi kumbe ukubiza umuntu ukuze angisize. Wakhipha ibhanti lakhe ayeligqokile wangibopha izandla qede wangitshiya nginjalo. Wahluthulela lapha endlini wahamba lezihluthulelo, ngasala ngingazi lokuthi ngenze njani?
Ngangizama ukuhlaba umkhosi kodwa ilizwi lalingaphumi emlonyeni. Ngazama-ke, ukuthi ngigiqike ngize ngiyefika emnyango ukuze ngiwukhahlele ngenze umsindo ongabiza abantu bazongihlenga, ebunzimeni engasengiphakathi kwabo. Loba ngangizama ukugiqika kodwa kwakungehlula ngoba izandla zombili zazibotshaniswe emhlane. Wangibopha imbila zikawobo. Okwasekungizwisa ubuhlungu yikuthi lelanga lase lingomtsha wendoda, khona ukuthi uJabulani wayezaphinda abuye ngobusuku ngangingakwazi? Mhlawumbe wayezabuya esethwele umhedla wengqamu, avele angiqume intamo nje ngiyekogoqanyawo ngife njengegwala elifa lingazendlalelanga. Ngempela ngasengiphakathi kwelitshe lembokodo. Ngatshaya umthandazo wokuthula sengifisa ukuthi kungasake kuye ngasifudlana; kubekhona umuntu ongongivakatshela endlini ukuze angithole, angisize.
“Nkulunkulu wami ophezulu, wena owadala izulu lomhlaba. Nguwe owaziyo isiqalo lesiphetho sempilo yomuntu. Nguwe ozangihlenga kulobubunzima engiphakathi kwabo. Ngicela uzibonakalise Nkosi ngengilosi zakho, uwusize umphefumulo wami. Ithemba lami lonke likuwe baba. Nguwe owangiletha kulomhlaba nguwe ozangisa ezulwini, zibonakalise Jehova. USathani ungihleli idundulu manje angazi ngenze njani. Ngikhuleka ngilethemba lokuthi uzawuphendula umkhuleko wami ngokuphazima kweso. Awukaze wehlulwe yilutho empilweni zabantu bakho Nkosi, zibonakalise uthumele ingilosi zakho zizohlenga impilo yami, ngikubone ukukhanya igama lakho lidunyiswe. Amen.”
Ngathi ngiqeda ukutshaya umthandazo wami wokuthula ngezwa umuntu oqoqodayo emnyango. Waqoqoda waze wacina eseqoqoda ngamandla efuqa umnyango ukuze uvuleke. Ngabeka iphika phansi. Ngasengiginqe umzimba wonke usumanzi te! Waqhubeka eqoqoda lowomuntu kodwa lutho ukuthi awuvule umnyango.

ngu Pascar Ncube umlobi ongadumanga, olidumelandlini ungabuza abangakini bayamazi kodwa emphakathini bayamphika bathi amabamazi.

usuchothoza uphinde ungcome kucomments section nxa ungela mona.

lapha ucingo uthole olwakho ugwalo uyizwe kuhle indaba kaJB loNomazulu kwazise isibheke kwavuthwandaba.

INGWALO ZESINDEBELE +263 773 208 035

Ingwalo Ezingasoze Zabuna

19/01/2025

19/01/2025

I've just reached 27K followers! Thank you for continuing support. I could never have made it without each and every one of you. 🙏🤗🎉

19/01/2025

Ngizoba Live namhlanje ngo 7pm ntambama wozani lonke lizo kuthi gwaqa ngapha.0

17/01/2025

Big shout out to my newest top fans! 💎 Sithandazile Ncube, Pretty Moyo, Zhwane Boy Umfana Wezhwane, Mthunzi Anele, Nomvula Sibanda, Tshuma Thembelihle, Thembelani Dube, Progress Ncube, Alethah Moyo, Sibanda Siphilile, Cynthia Ndlovu, Nobukhosi Williams Ncube, Mercy Ndhlovu, Princess Ndlovu, Teck Mavuso Dlamini, Nokukhanya Nkomo, Doren Siwela, Inkunzi Yase Huwana, Linda Mpofue, Sibanda Pamela, Alice Ncube, Anele Golide, Brilliance M. Dube, Albert Gabbs Ncube, Mbalinhle Mabizela, Silungile Ncube, Hope Golide Tshuma, Nazareth Maseko, Jelina Hadebe, Thoe Moyo Sgabade, Rejoice Rosemary Mathema, Musawenkosi Ngezi, Dalo Mhlophe, Thobekile Ncube, Nothabo N Gumbo, Jenitor Nyathi, Sibonakaliso Moyo, Pretty Nkomo, Nobuhle Bhajila Ndlovu, Pinky Siwela, Charlene Ncube, Sindiso Moyo Gwayi, Menzi Dube, Thembelihle Nkazimulo, Ishan Khan, Mosheshe Mosheshe, Nonni Mncube, Alettoh Abie Sibanda, Thobelani Moyo, Cosmos Sibanda

16/01/2025

Lomunye Alilandima

6

uzakhela ubudlelwano obuhle loThandolwenkosi Mahlangu.

Lulotshwe ngu Pascar Ncube

Sathi sifika edolobheni lasePitoli, sangena kwenye iKFC. UThandolwenkosi wathenga esayidla lapho. Wathenga leyinye engangizahamba layo eTembisa. Wangitshengisa umusa lothando, ngaze ngatsho ngenhliziyo ukuthi igama lakhe liyamfanela mpela. Ngesikhatshana ngasengimkholiwe isibili, sengibona lokuthi yindoda ekwazi ukunakekela owesintwana. Iqiniso olwami uthando lwalukuJabulani, kodwa wayengakaze angibonise okunje, olwethu lwalugcwele inyembezi ukudlula injabulo.

Ngangithi ngikhumbula ukuthi ungene engutsheni lomngane wami engimethembayo kulabo bonke abantu, ivele iphuke inhliziyo yami. Bengingazikhohlwa zonke izinto ezimbi angenze zona kodwa bekunzima ukuba ngidlulise umpikitsha wokuba wembatha ngubonye loMonalisa. Sathi sisuka eKFC sengithi sesiphuma usesiyangitshiya emitshoveni wala umuntu wathi uzongihambisa yena ngeyakhe imota akajahanga lutho kanti akaliboni iphutha lokwenza lokho. Sasuka-ke, lapho sangena indlela, yithi labana sibhekise amabombo eTembisa.

Kwakunzima ukuba ngale ngithini, phela wayezangibuza ukuthi kungani ngisenqaba ukuhamba laye. Wayefuna ukuba mina laye sibelesikhathi eside sisonke. Ngazibuza ukuthi uJabulani engangibona ngihamba laye, kuzamphatha njani lokho? Lwakhela ngaphakathi kwami uvalo, ngakubona ukuthi okuzakwenza uJabulani acunuke kakhulu yisikhwele semota kaThandolwenkosi kwazise yayinhle kakhulu ukudlula eyakhe ngokuphindiweyo. Kwazibani mhlawumbe ukungibona kwakhe ngihamba lenye indoda, kwakuzamenza angihloniphe. Akwazi ukuthi nxa uke walenza iphutha wadlala ngenhliziyo yomuntu, uyasala usubambe isisila inyoni isihambile. Ayikho phela into ebuhlungu lethelela ulaka njengokubona umuntu obumthanda kakhulu esethandana lomunye umuntu, uze ufise lokuthi ngabe awuzange ubemazi empilweni yakho.

Loba ngangingafuni lakancane ukubonisa uThandolwenkosi ukuthi wayesengena enhliziyweni yami kodwa wayezacina ekubonile lokho ngokuhamba kwesikhathi nxa sasizotshona sisonke.
“Awuzange usatsho phela Nomazulu, usebenzela ngaphi?”
“Ngisebenza eRandburg.” Yimi lowo ngiphendula ngenhliziyo emhlophe njalo ngimnika ilihlo lokuba kaqhubeke ngodaba lwakhe. Phela bathi ukuhamba kuzala induna lami ngangingeke ngivumele idlozi lobuyanga lingiholela ebunyameni ngikhahlele inhlanhla ngamazwane, lithuba okwakumele ngilisebenzise.
“Uyenzani lapho eRandburg?” Waqhubeka ebuza, inqola yomlilo ilokhu isidla ummango.
“Ngisebenza kwenye nje iRestuarent uyazi yiwo umsebenzi wethu thina abangaphandle.”
“Kuhle. Wona yiwo mpela. Yikho lapho sonke esiphephela khona. Ubukeka usemncane kodwa, ufikenini lapha eMzansi?” Ngahleka ngingakawuphenduli lowo mbuzo.
“Hahaha! Ngimncane mina? Sengileminyaka phose emibili egcweleyo ngilapha. Lowu esikuwo ngowesithathu. Khona ngisasemcinyane sibili kodwa hatshi kakhulu.” Ngangingafuni ukuba angibone angathi ngimncane kakhulu ukuthi angingeke ngamelana lomendo.
“Kambe utsho ukuthi lelikhanda lingawuthwala umgqomo wenkonxa ogcwele amanzi sibili? Mina ngibona angani ngeke nje, inkanda le iyahle iwele.” Wayekhuluma ephulula inwele zami uThandolwenkosi. Ngangizama ukuqinisela kodwa isandla sakhe sasingilolozela kamnandi. Ngabona sengathi leZulu singalingena ngenyawo, inhliziyo yami yajula ngothando. Ngangingasela ndaba lokuthi uJabulani uzasibona. Lapho loba wayengasibona sisobabili ngangizamtshela ukuthi kahambe ayedlalela kuMonalisa wakhe engadlaleli kimi.
“Hahaha! Ungithatha kancane ngiyakubona. Mina ngikhulele ekhaya. Kithi eLupane inkonxa besiyithwala sisafunda ugwalo lwesithathu emfundweni ephansi. Yini pho engangehlula sengimdala kangaka?”
“Hayi nxa kunjalo lami ngizozikhupha ngikhululekile inkomo zikababa. Kithi eMatshamhlophe, phela ivila kabalifuni njalo kuyasetshenzwa okwamagama.”
“Kanti uzozikhupha okwesingaki inkomo mina angifuni kuba yindlu yokugugela. Ungitshelile umzawami, kayikho into engingayaziyo.” Wavusa amehlo wangikhangela wamangala ngalento engangikhuluma ngayo.
“Hayi bo! Noma, uThandeka ubekutshela amanga aluhlaza tshoko, angilamfazi mina. Kulendandatho oyibonayo kodwa emunweni yami lapha?” Engibonisa iminwe yakhe.
“He-e! Itshoni indandatho? Ngiyalazi litshonjalo lonke. Kambe ukhona owake wathi ekhombisa intombi wathi ulomfazi endlini?”
“Hatshi, mina ngifisa ukukwenza umakoti, zinengi inkomo le ekhaya kanti lomama usekhulule, kuzomele uzovusa umuzi ka-
baba.”
“Hawu! Uyabona wena ufuna ngiyovusa umuzi kayihlo, mina ngifuna ukwakha owami. Angeke ngavusela omunye umfazi umuzi wakhe. Ikhanda elilamehlo liyazibonela.” Sahleka sonke wavumbuluka ngelithi,
“Kungani ufuna ukungihlekisa Nomazulu? Uthi kawuvusi muzi womunye umfazi, uzogugela ekhaya ungaba lalowo mqondo, uzoba ngumcaba owasala emasini.”
“Ulimi lwakho lujulile usazelaphi isiNdebele sonke lesi? Hatshi bengidlala kodwa ukhona umuntu esengambonayo. Kutsho mina lawe akukho esingakwenza, siyophelela khona ekubeni ngabangane. Ngilethemba manengi amantombazana laphana eSunnyside maduze nje uzoluthola ubambo lwakho.” Awazange ehle kahle amazwi ami kuye ngambona ebuna ebusweni. Wakhanya ukuba lokhu ubengakulindelanga ngitsho lakancane ukuthi kungaphuma emlonyeni wami, ngemva kokuxoxa kwethu okwakumnandi kangaka lohambo lwethu oluhle.
“Ayikho inkinga Noma. Ngikufisela inhlanhla empilweni kodwa umtshele akubambe ngazo zombili izandla ngoba uyathandwa ngaphandle lapha.”
Sahamba saze sayafika e-Ivory Park singazange sibelenkinga endleleni laleyondawo wayekhanya eyazi eyiqonda. Ngathi ngibona ukuthi sesisiyafika endlini ngathi akangitshiye lapho. Wala wathi uzongitshiya endlini lapho engihlala khona ngoba wayengithethe endlini kaThandeka. Sekusele isibanganyana ukuthi sifike endlini, uJabulani wangithumela umlayezo othi,
‘Hawu! Kanti wahamba waloba kuqhubekani? Sengithalaze ngazwela.’ Ngahle ngamphendula ngokuphazima kwelihlo ngempendulo eyayitshekile njalo ngisenza ngabomo. ‘Bengithi
ngikuphe ithuba uCaro njengoba ebuyile angithi ulande ukuzekubona. Awusuthiseki ngani?’ Wavele wathula kazange aphendule. Ngatshengisa uThandolwenkosi lapho esasisiya khona. Lakanye safika sehla emoteni, wayitshiya ngaphandle kwesango sangena endlini.
“Mina ngicatshise lapha ikhanda. Yilo ikhaya lami leli.” Yimi lowo ngisitsho ngimtshengisa ukuthi ahlale laphana ethaleni phela ngangingelazo izihlalo. Wabonga wahlala. Ngathatha umhluzi obandayo, oyangaphansi kwenkamanzi ngamenzela wanatha.
Wayebukeka engelandaba lokuhlupheka kwami engangilakho lapha endlini njalo indlu yami yayizicacela ukuthi yindlu yentombi engaganwanga. Engakunanzelelayo ngaye yikuthi wayegijimisa amehlo akhe okonwabu indlu yonke angazi ukuthi wayekhangelani. Wahlalahlala wasecela ukuthi ngimkhiphe besekumele ahambe. Langempela lami ngabonga isikhathi esihle kangaka engangisichithe ngilaye.
Ngasukuma wanganga, sangana kwabakuhle. Ngayizwa ithokoza inhliziyo yami. Wangikhangela ngamehlo ayekhuluma ukuthi kasuthisekanga. Ubesafuna okunye njalo okwedlula lokho? Ngenza sengathi angikuboni lokho ngakutshaya indiva. Saphuma-ke, endlini. Sathi siphuma lapho nango uJabulani esiza, ngenza sengathi ngubhudi engingamaziyo. Saphambana laye wangena emoteni uThandolwenkosi wayisusa wahamba. Esehambile ngabuyela njalo endlini sengilanda uJabulani owayesebukeka esemubi ebusweni ngentukuthelo.

ngizwe, chothoza ngizwe, ubusuthenga ugwalo ngoba zasala ulenga emoyeni.

lapha ucingo +263 773 208 035

INGWALO ZESINDEBELE
Ingwalo Ezingasoze Zabuna

16/01/2025

Uma ungayazi Imfihlo Yomndeni uyakhutheka, ngena lapha ubukele ubize labanye.

A_ TV series film based on a novel entittled Imfihlo Yomndeni written by Pascar Ncube, an isiNdebele author and publisher of Ingwalo Ezingasoze Zabuna Publis...

15/01/2025

I want to take this opportunity to welcome all our new members who recently joined us.This page is owned and managed by Pascar Ncube an isiNdebele novelist, author and director of Imfihlo Yomndeni, a drama series film which is currently published on Youtube. I hope you will enjoy the novels posted on this page. Please make your presence felt by religiously commenting and liking every post. Remember also to share our posts with your freinds. Enjoy....

NgesiNtu ngithi salibonani lina bendlu ensundu lina bakaTshaka kaSenzangakhona, lina bakaMzilikazi kaMatshobane, ngibingelela bonke abatsha labadala ngiyalamukela lapha ekhaya lizizwe lisekhaya lamukelekile kukhasi lengwalo. Asikhuphukeni sindawonye ukuze kube mnandi nsukuzonke....Ngingaphosela isahluko sonke asifakeni ama comments siphinde sithi like singakhohlwa loku pressa ibutton lika share ihambe iyebonwa langabanye abangane bethi.... Asijabuleni sonke sizwe😊

Nanso indaba okukade liyilindele

LOMUNYE ALILANDIMA

Ncube

5

luyelapha.

Ngalala ngikhukhuza amathambo engqondo. Okwakungipha imibuzo eminengi engelampendulo yikuthi, izwi kwakungathi nguJabulani? Ngiphinde ngizilandulele phela ngangisazi ukuthi akalayo inombolo yami yocingo. Lapho engangihlala khona eTembisa wayekwazi loba nje wayengakaze angene. Ngazibuza njalo ukuthi uzangitshayela njani ucingo yena esazi ukuthi sasingahlukananga kuhle ngolweSihlanu?

Ngazithembisa ukuthi nxa kunguye uzaphinda njalo angithinte engathola endlini kutshaya ibhungane. Amazwi kaThandeka angivalelisa ngawo ayelokhu enkenteza kimi, ngicabanga ukuthi umtshelile uThandolwenkosi ukuba ngisele ngedwa endlini. Ngezwa ngisesaba, ngangahlaliseki sengilomhedehede phezukwalokho ngisendaweni engingayijwayelanga. Njengoba loThandolwenkosi ngangimbone kanye, ngingazi lokuthi nxa kunguye uzafika engiphatha njani?

Ngakubona ukulahlekelwa yibuntombi bami ngingazimiselanga phela ngangizitshela ukuba, umuntu ongithandayo kuzomele aqale angifake indandatho yegolide emunweni, angenzele umtshado omhlophe. Ngasengilele ngitshotshobele ngilokhu ngithi ngizezwa sekulomuntu oqoqodayo emnyango lakhona ngangingasoze ngimvulele ngendlela ebesengisesaba ngayo. Eyinye inhliziyo yami yathi angitshayele uThandeka ucingo, ngimbuze ukuba kambe ukwenze njani ukuthi angithengise kuThandolwenkosi ngalendlela embi kangaka! Ngazikhuza belo ngangingafuni kwenza izinto ngewala, fune ngiziphaphisele inyoni. Ngisatshotshobele, lwaphinda lwakhala ucingo lwami. Ngalusabela lovalo luzenzela umathanda, ngilikhasi ngiphethe amaphaphu ngezandla.

“Nomazulu, vula umnyango sikhulume ngiyakucela, ngiyafa ngomqando lapha phandle. Kambe kunini ngiqoqoda, vula bo.” Kwathi kla kimi, kwangicacela ukuthi nguJabulani. Yaqala ukuncibilika inhliziyo yami, lovalo lwehla ngakwazi ukuthi ukhuluma nje use - Ivory Park. Ngaphendula ngimqophile,
“Ufunani kimi? UMonalisa usumtshiye lobani? Yena uCaro njengoba ebuyile nje ekhaya usumtshiye lobani? Ngicela ungiyeke phansi, uzongixabanisa lejaha lami. Khithika mkhaza idibha likhatshana.”
“Ijaha lakho liphi? Noma ngicela uvule lapho.”
“Ngicela usuke lapho Jabulani, uzongixega lomnikazi wendlu. Uzabulala umnyango, angikho ngithe ngisejaheni lami kanti uzwa ngani?” Ngalubeka phansi ngisazi ukuba sengimnyathele ikhonzi. Ngangivele ngihlose ukumvusa ulaka, phela bengifuna laye abuzwe ubuhlungu lobu ayengizwisa bona nxa entela loMonalisa. Ngemva kwemizuzwana wangithumela umlayezo othi,
“Ngifuna ukukuchazela ngokwenzakala ngaleliyana ilanga. ULisa umuntu ayemuthi ngumfazi wami wayesitsho wena Nomazulu. ULisa uyakwazi okwenzakala phakathi kwami lawe ngakho uhleli ekubiza ngokuthi wena ungumfazi wami. Okwenzakalayo phakathi kwami laye kwabaliphutha yinto engeke yenzeka futhi noma sekunjani. UCaro lowana owambona engitshayela ucingo ngumzawami osekhaya wayengitshela ukuthi uzafika ngapha eMzansi. Kasikho lokho okucabangayo. Ngicela wehlise umoya, Noma ngiyazi uzama ukungizwisa ubuhlungu ngokuthi usejaheni lakho. Engicela ukwazi yikuthi mina ngizohlala ngikuthanda kuze kube naphakade, mina lawe sohlukaniswa yikufa. Ngilapha inhliziyo yami ibuhlungu ngokwenzakala phakathi kwami lawe ngoba kayisikho ebekusezifisweni zami. Ngicela uxole ubuye kimi ngizokwamukela ngezandla ezimhlophe. Ngicela ungixolele ngokungazibonisi ubudoda bami lothando lwami ngesikhathi lapho obuludinga khona. Ukuthatha kwami isikhathi eside ekuthini ngikutshele okusenhliziyweni yami bengisenza ngabomo ngifuna ukuba mina lawe ubudlelwano bethu bukhule singakathandani.”

Ngathi ngingakaqedi lokuwubala lowo mlayezo kaJabulani, inyembezi zami zothando zasezisehla ngombombo. Ngazizwa ngifuna ukumxolela, yavuka khwatshu imizwa yothando kimi. Ngadideka kakhulu manje, sengicabanga ukuthi ngihlangane loThandolwenkosi laye obebukeka efuna ukungipha uthando lweqiniso nango loJabulani esevuma izono. Yiphi insizwa okwasokumele ngiyikhethe pho phakathi kwalezi ezimbili? Ayethontela kancane amazwi kaJabulani, ngaludobha ucingo ngabhala umlayezo,
“Uyazi ungifaka kusimo esibuhlungu kanjani? Ngiyazama ukuba sithandane mina lawe kodwa umbaxa mbili okolimi lwenyoka. Uyayilimaza inhliziyo yami, ungenza ngibeyisiwula sentombazane esithandana lendoda engasithandiyo. Uyazi angifuni ungibhanqe lomunye umfazi Jabulani ikhuba lomunye kalilandima. Angifuni kuba yinhlekisa sengithandane lendoda yomnikazi.
Kubuhlungu kabi ukuba ungumfazi uzitshele ukuthi indoda ngeyakho wedwa kanti ikuhlanganisa lomunye kumbe labanye abafazi. Ngicela ubonise ubudoda bakho, ucace ukuba umi ngaphi phakathi kwami, uLisa, loCaro ngoba ngiyazi nje lokhu okokuba ngumzawakho ngamanga aluhlaza tshoko. Iba yindoda ubonise ubudoda bakho mina ngiyakuthanda njalo ngizimisele ukuba ngumakoti wakho woqobo.” Ngasengivuke ngahlala ngikhuluma loJabulani, sesiphendulana ngemilayezo.
“Ngiyakuzwa Nomazulu. Ngicela sibuyise uthando lwethu singavumeli uSathani esehlukanisa.”
Saxoxa kwaze kwabaphakathi kwamabili. Inhliziyo zasezihlezi, ngacina ngimtshela iqiniso ukuthi bengivakatshele umzawami ePretoria, ngacela lokuthi angitshayele ucingo.
“Akungitshele-ke, inombolo zami zocingo uzithathe ngaphi phela sonke lesikhathi ubungelazo nje?” Ngambuza ngifuna ukwazi ukuba wayeziphiwe ngubani, ngangimcine engelazo impendulo engangingayifuni yikuthi athi uzithethe kuMonalisa.
“Ungabe usabuza Noma, wena bonga ukuthi ngilazo kuphela, nanku sesixoxe kangaka!”
“Hahaha! Usile wena. Uyinthethe yebusika ngempela.” Saxoxa ngaze ngajumeka. Sasesivumelene ukuthi ngizavuka ngibuyela eTembisa siyebonana khona. Ekuseni kwaze kwatshaya ihola letshumi uThandeka engakabuyi. Ngaqala ukuzisola ukuba umzawami kangiphathanga kuhle bengingeke ngithi ngimvakatshele angitshiye ngedwa ngilele endlini yakhe. Lakhona kwakuyimisebenzi kaJabulani. UThandeka, wathola sengigezile, ngivele sengimi ngenyawo sengifuna ukuhamba.
“Ngiyaxolisa Noma ukukutshiya wedwa uyazi amadoda lawa siyawancenga, phela yiwo asiphetheyo nginje mina endlini lapha uPrince nguye ongibhadalela intela ngakho kunzima ukuthi ngingavumi lapho engifuna. Njengoba usulungile, ungazihluphi ngokuya emtshoveni uThando uzakuhambisa.” Watsho lawo uThandeka engikhangele emehlweni.
“M-m-hh! Mzawami kodwa bengizagada nje, bengingaluboni uhlupho.” Sisakhuluma nje wabesethelekile uThandolwenkosi esezongithatha ukuthi sihambe. Ngezwa ngitshaya luvalo phela bengingasazi ukuthi iyozala nkomoni nanko besengilamajaha amabili. Kwakungasekho esikulindileyo, wayisusa salubangisa eTembisa.

Ngangihamba ngibindana lemicabango endleleni nanko kwakunzima ukuthi ngithi angitshiye endleleni, ngisazi njalo ukuthi uJabulani ngizamthola engilindele endlini yakhe. Ngenhliziyo ngasengiphongukuthi, ‘Yingxabangxoza yendaba le, soyicela isivuthiwe, sizobona lapho okuzawela khona induku loxakuxaku.’

Endleleni uThandolwenkosi wahamba ezibika. Ngathenjiswa ikusasa eliqhakazekile, ngathenjiswa umtshado omhlophe. Lami ngazibona ngiphuma ngendlela elesizotha emzini kababa eGomoza. Ngazibona sengiphila impilo ekwelinye izinga. Konke lokho kwangidida ngamandla, sengizibuza ngiswele impendulo ukuthi inhliziyo yami ngiyiphe bani phakathi kwalezinsizwa. UJabulani uthando lwakhe belungavimbeki loba wayeseke wangiphoxa ngaphambilini. Nguye umuntu owayefike wahlala wazinza enhliziyweni yami. UThandolwenkosi laye bekunzima ukuthi ngikhahlele inhlanhla ngamazwani ngiyibona. Okuhle ngaye yikuthi wayesiza kakhulu ngendibilitshi.

Kambe ngensuku zanamhlanje ikhona intombi eyake yayala ijaha elilemali? Ekadeni, izolo intombi ibiqakathekisa umnotho wenkomo ezisesibayeni kodwa namhlanje izinto zijikile, imali yiyo esihamba phambili uthando luze emuva. Labadala babekwazi ukuyitshela intombi ukuthi ikhangele emzini yakobani ngoba inkomo zidlana uboya, iphekwa ngomhluzi wenye kulowomuzi. Ijaha lalo babelikhombisa indlela ukuthi lihambele emzini yakobani, lapho bekhangelele ukuthi intombi zakhona zilenhlonipho njalo zilobuntu.

Namhlanje akusekho konke lokho, isimanjemanje sesabulala amasiko, abazali labo sebeqakathekisa imali kakhulu. Isimanjemanje sesenza kwafika umkhuba wokuthathelana lezinye izizwe okuyinto eyayingekho ezolo. Ekadeni babethi ukhuni olungaziwayo aluthezwa khepha namhlanje beyame kwelithi induku enhle iganyulwa ezizweni. Lawo mazwi ayelokhu enkenteza embilini yami ngenkathi umfokaMahlangu engibonisa ubunsizwa bakhe. Ngangizibona ngelihlo lengqondo ezamalobolo zitshaya amanqina zilubhobo zibhekise amabombo emzini kababa eGomoza. Ngiyibona lengcebethu igcwele phamu inkulungwane zamaRandi mhla ngilotsholwa isesula inyembezi zikamama.

***Last episode on Facebook.****

Bahlali lapha ngiliphe izahluko ezinhlanu ugwalo ugwalo luphela kusahluko 23. Abalothando asithengeni ugwalo silubale lonke luze luphele. Kunengi ozakufunda ngothando lwalezinsuku kulolugwalo. Ngiyabonga ithuba, ngibonga ukuthi lithathe isikhathi senu esibaluleke kangaka lifunde lindatshana yami.

Follow us here : INGWALO ZESINDEBELE

Ingwalo Ezingasoze Zabuna