Kambro Kind

13/10/2024

Baie dankie Malherbe Uitgewers vir die vrystelling van my 2e Digbundel "Stemme uit die Hemel" . Alle eer aan ons Hemelse Vader vir Sy groot genade. Die boek is nou te koop. Volg die aanwysing onderaan na Malherbe Uitgewers se blad om dit aanlyn te koop.

New Release! Stemme uit die Hemel - Petrus JS Vermaak

Die nagedagtenis van ’n geliefde moet altyd voortleef in ons harte, glimlagte en dade. Met elke herinnering word opnuut ’n vuurtjie van liefde aangesteek in ons harte wat deurskemer na on glimlagte en sal uitloop op ons dade.

Ek is ‘n Karoo kind wat van kindsbeen af opgegroei het in sy stilte en natuurskoon. As kind het ek grootgeword tussen twee familie plase, Wilgerbos en Lammerkraal in die Prins Albert omgewing. My familie het ‘n groot rol gespeel in die vaslegging van die liefdesfondament vir die Karoo. Hul sterk geloof het ook vir my gehelp oor baie lewensberge.
https://www.malherbe-uitgewers.co.za/poesie-poetry/product/stemme-uit-die-hemel-petrus-js-vermaak

12/07/2024

Dit was op die 19e April wat ek die boodskap van Marsofine Krynauw ontvang om deel te wees van die Nuwe Era Groot Verseboek 2024 van Malherbe Uitgewers. 'n Groot voorreg om deel te kan wees van 46 gekose digters in 'n spogbundel. Dit was 'n groot uidaging in 'n geweldige uitdagende tyd.

Wie was die groot dryfveer agter die skryf van die gedigte wat ek ingestuur het? Toe sy hoor ek is uitgenooi om deel van die boek te wees, het sy voortdurend vir my aangemoedig om betyds my gedigte in te stuur. My vrou, my Karoo Engel, ek verstom my in jou geloof, krag en liefde.

Dit was 'n paar moeilike maande. Voor my oë het my vrou al hoe sieker geword. Elke dag het ek gesien hoe die grou en gru van 'n onverklaarbare siekte haar probeer kniehalter. Nog steeds het sy my bly aanmoedig. Dit was 'n dag voor die sluitingsdatum wat ek die gedigte ingestuur het.

OP die 11e Julie kry ek die boodskap van Marsofine dat my gedigte goedgekeur is en deel vorm van die spogbundel. Maureen, my vrou, baie dankie vir jou volgehoue aanmoediging. Marsofine Krynauw Skrywer & Digter en Malherbe Uitgewers baie dankie om deel te kan wees van 46 gekose digters wat 'n nalatenskap skep vir ons pragtige taal Afrikaans. My mede digters, baie geluk aan elk. Dit is 'n voorreg om saam met julle nuwe spore te trap vir ons taal, Afrikaans.

Met my vorige plasing oor Maureen. Die krag van gebed kan nooit onderskat word nie. Dit is gebed wat hoop gee, wat paaie wat genestel is in geloof oopmaak. Dit is die gebede van gelowiges wat berge kan versit. Baie dankie vir al die gebede en mooi boodskappe van bemoediging. Daar lê nog 'n moeilike pad voor, maar op die vleuels van gebed is die toekoms verseël in geloof en hoop.

24/06/2024

Wat 'n groot voorreg om deel te kan wees van Junie se prag uitgawe van Kaleidoskoop Tydskrif . Baie dankie Leonita Coutts . Dit is 'n groot voorreg. Leonita laat 'n vars en opwindende Afrikaanse taalbries waai oor die kuns en kultuur landskap in Suid-Afrika. Koop jou kopie en word deel van die hede en toekoms van ons pragtige taal Afrikaans. Trots Afrikaans.
---------------------------------------------
almal!

Junie se uitgawe van Kaleidoskoop Tydskrif is beskikbaar. Sjoe.. 31 bladsye! Hierdie is een van die bestes nog, vir die jaar.

Ons het gesels met Danie Marais en wow.. Hy is briljant. Ons het ook in geloer by Anzé Bezuidenhout, die hartklop van INK Skryf in Afrikaans, digter, Peet Vermaak, Luchen Cloete, Riëtte Bezuidenhout en Sandy Schoeman het gesels oor haar emosionele reistog in Rooiletterkind.

As jy wil saamlees:
Slegs R30 per kopie. Betaling kan gemaak word by: Kaleidoskoop: Bank - Absa; Takkode - 632005 ; Reknr - 4107684551; Tipe - Cheque ; Verwysing: JOU NAAM
Stuur bewys van betaling na: 082 407 9555

24/06/2024

03/03/2024

Sjoe dit is nou baie goeie nuus so op die Sondag oggend. Vlokkies van hoop en genade wat op 'n mens neerdaal uit die hand van ons Hemelse Vader.

Twee van my gedigte (Karoonag en Klein Karoo land) word vir die volgende 2 weke op 3 verskillende radiostasies uitgesaai.

Martie Elizabeth Bezuidenhout Benita Stander Lenel Oosthuizen Margaret Bennett en almal betrokke by Afrikaans in sy oortreffende trap . My opregte dank en waardering vir alles wat julle vir ons digters doen en beteken. Julle almal lê my na aan die hart. Aan Al my mede digters dit is 'n groot voorreg om saam met julle te kan wees . Baie geluk aan almal. Mooi en geseënde dag vir almal en vriendelike Klein Karoo groete

Ek sal later meer besonderhede verskaf oor die radiostasies en uitsaaitye.

05/02/2024

8 Mei 1925 - Die datum wat ons pragtige taal, Afrikaans, sy amptelike status en erkenning ontvang het as amptelike taal in Suid-Afrila. Dit is volgende jaar die 100 jarige bestaansjaar van Afrikaans as amptelike taal.

Elke dag word ons omhels met sy liefde, geloof en hoop. Ons lag in ons taal, ons huil in ons taal, ons skryf, dig en sing in ons taal, ons sien die verlede, hede en toekoms in ons taal.

'n Taal gebore uit Nederlandse herkoms, maar gevorm en gesmee in liefde en stryd uit Afrika en Oosterse herkoms.

Ek is 'n groot en besonderse unieke uitdaging aangebied om in 2024 die geskiedenis van ons taal, met die oog op haar 100e bestaansjaar, 100 gedigte te skryf om haar viering te beklemtoon. Dit is groot, maar ek gaan dit doen.

Voor my lê honderde boeke en geskrifte uit die herkoms van ons taal. Ek gaan begin delf, ontdek en ontgin. Stap saam met my deur 2024 en kom ons begin ons pragtige taal te vier.

AFRIKAANS
100 jaar - 8 Mei 2025
1e gedig

Die volgende gedig is 'n ode aan ons taal Afrikaans. Ek is bevoorreg om in haar spore te kan loop. Lank leef ons pragtige taal.

---------------------
Taal Tapisserie
---------------------
Woord vir woord
was sy aanmekaargeweef
elke draad
noukeurig, nougeset
deur die hand van tyd
geborduur

Khoi-Khoi
Maleis- Portugees en
Wes-Germaans
‘n Smeltkroes van
kulture
‘n Kreolisering van
tale

Op Afrikastrande gefundeer
Om kombuistafels voorberei
Op wapaaie geslyp
Op strydvelde gepynig

In haar
hoor ek die stem van Afrika
In haar
vloei daar geure
gekrui en gespesery
in heterogeniteit

Standaardafrikaans
Kaapsafrikaans
Oranjerivierafrikaans
Gariep-Afrikaans
Griekwa-Afrikaans
Nama-Afrikaans
Afrikaans van die karretjiemense

‘n Taal
so buigbaar en plooibaar
uniek verweef
in diversiteit

Afrikaans
agter elke traan van wanhoop en pyn
bly jou woorde
in die skerm van ons denke verskyn
In ‘n mensdom se lyding
vloei ink van hoop
wat elke letter van jou skilder

Afrikaans
‘n Taal Tapisserie
‘n Woorderlike meesterstuk
vir almal om te bemeester

- Petrus JS Vermaak
̈sie

30/01/2024

Ons almal het al situasies van hopeloosheid beleef. Hetsy dit siekte was, verhoudinge wat op die rotse geloop het, teleurstellings of enige persoonlike of finansiële uitdagings,
daagliks word ons gekonfronteer met die uitdagings wat die lewe ons bied.

Ek het die voorreg om elke dag tussen die mooiste plase te ry oppad na my werk. Soos ek ry sien ek hoe boere en hul werkers hoopvol plant, saai en hul landerye bewerk. Dan besef ek weereens dat almal hul daagse arbeid verrig met hoop in hul oë. Hoop, die halmpies wat hul geloof elke dag voed.

Daar sal uitdagings van droogte, vloede en nog meer wees waarteen hul moet staar. Maar, elke dag, elke oggend staan hulle op met hoop in hul oë.

Met dit in gedagte het ek die volgende gedig geskryf "Halmpies van hoop". Al is die omstandighede hoe uitdagend op die oomblik, bly gryp na die halmpies van Hoop. Die genade, die liefde en geloof in ons Hemelse Vader. Staan op en staar jou uitdagings vierkantig in die oë en leef met hoop.

Die bekende gesegde " Daar is altyd LiG aan die einde van die tonnel. Verloor nie moed nie". Maak nie saak hoeveel keer ons val nie, staan op want elke tree wat ons vorentoe beur is 'n tree nader aan die Oorwinning.
--------------------------------------
Halmpies van Hoop
--------------------------------------
Ek het gesoek, maar kon nie vind
geluister, maar kon nie hoor
die ewige gefluister
van hoop se aardse wyster

die nagwaak wat vir my loer
oor die skrefies van die oggendstond
se goudgeel daeraad
wil my denke voed met
'n kransduif se morgenkoer

Op God se landery
van grond, klip en stof
sien ek 'n saaier
gekleed in genade

Hy, landbouer
wat met liefde en vrede saai
bring halmpies van hoop
in 'n kleed van genade
toegedraai

Ek het gesoek, maar kon wel vind
geluister, maar kon wel hoor
die ewige gefluister
van Hoop se Ewige wyster

- Petrus JS Vermaak