18/06/2023
UNC: Lumang Tukawan
Dekada 80' giromdom ining luma asin rapak na bench sa UNC.
Maski luma ining tukawan, naging paboritong pahingaluan kan mga Soltero Daraga na mga estudyante sa College of Commerce, Engineering, AS, Education, Nursing, asin iba pa, mayo pa kaidto an kurso sa Computer.
Kan panahon na idto an usong gadget iyo an Calculator asin T-Square. Mas dakul an estudyante kun bangui ta an mga nagtatrabaho sa aldao pwedeng mag escuela sa bangui. Sa premirong aldao popular an Class Card asin sa panahon nin periodical examination binabakal sa canteen an Test Booklet.
Mayong kapagalan an pag pila sa Treasurer's Office para magbayad nin tuition kasabay an pag kua nin examination permit.
Dai nanggad malilingawan an Intrams ta digdi parating naglalaban sa championship Basketball Men an Engineering asin Commerce. Minsan mabilib ka man sa tibay kan ibang team arog kan Education, AS, asin Law.
An ground kan UNC garong Luneta, magayon paayahayan ta ini alang malinig asin dai pig tutubig. An mga babae magayon sa uniform na palda pero an mga lalaki dai required an uniform.
An ROTC sarong kurso na tuyong aldao nin Domingo an pag klase. Mapagal an ROTC alagad maogma ta iguang parada kun fiesta. Sa ROTC tampok an magagayon na Lady Sponsor.
Saro sa maogma sa laog kan UNC, iyo an graduation ta magayonon an programa, naka kamada an mga tukawan sa atubangan kan Library. Mapapahibi ka sa gayon kan graduation lalo na kun kaiba an magurang sa pag paso hale sa may Administration pasiring sa graduation ground.
Nagsisilyab an mga kodak asin multicolor sa panahon nin graduation. Sa pagtapos kan ceremonia, may luha sa mga mata ninhuli ta magsusuruwayan an mga magkaklase. Solamente an Year Book an maserbing memorya kan pag escuela sa UNC.
An mga nag graduar nin College kan dekada 80, iguang yaon na sa harayong lugar nakapag trabaho asin nagka familia. Kita gabos naging parte kan maogmang buhay sa college kan UNC.
Pero maski yaon sain man kamo ngonian, ining luma asin rapak na tukawan magserbe man na memoria kan satuyang maogmahon na buhay kaidto sa UNC College.
