03/06/2024
رتن پورے بِہتھ دؤبھی داتھرس پیٹھ
محی الدینس کرکھ کتھٕ تارٕہ یِکھنا....
نواز صأبُن یہ کلامہ پوو میہ یژکالی نذیر آزاد صآٔبن اوترٕ تمہِ وزِ ژِیتس ییلہِ تمس صحت یابی پتہٕ کوئیل کھسنس تہ پننہ سرسبز وارِ منز تلمتس فوٹوس پیٹھ کمنٹ کران آسی... تہ میانس اکس کمنٹس درجواب لیوکھ تمو نواز صابن یوہی شعر. رتن پورے بہتھ دوبھی داتھرس پیٹھ.............. ولیو خوشباش صأبن، نواز صآٔبن تہ باقی بزرگن ہند رتن پور چھو آلو دِوان....
نزیر صآٔبنہ امہ کتھِ دِژ میہ تتھ یادٕ وترِس زیر تہ بلکہ ونہ بہ، مژراوُن گنڈ یوس بہ واریاہ کالہ پیٹھ چیرہ بند کرنچ کوشش کران چھس.. بہرحال ڈاکٹر صآٔبن شکریہ یس میہ کُنہ کنہِ لول ژلراون چھ.. مگر یس تمو دٔوبھی داتھرک زکر کر... امہ سیتی چھ لوکچادچن تمن خوش یونین تہ نہ مشونین کتھن تہ یادن ہند داتھر وہراونہ یوَان. یم یتھ موقعس پیٹھ ویژھ ناونی مشکل بلکہ ناممکن چھ..... رتن پورس تہ کوئیلس چھ کھاہ نے تہ کولہ ملہٕ ون ضرور... دوبھی داتھر آوس رتن پورکس مرکزس منز آکھ تژھ خوبصورت جاے.. یتھ دچھن کھاور لوکچن لوکچن کولن.. (گڑمِہ تہ ینن) ہندِ صاف تہ شیشہ ہشہ آبہ کولو تہ ویرِ وارو نال تہ زال ولمت اوس. تہ ہارِ ژرِ، بلبل تہ پوشہ نول ویرن پیٹھ صبح شام بول بوش کران آسی.. تہ ووستہ قادر (دھوب) اکس بجہ پاترہ کنہ پیٹھ رنگہ رنگہ پلو تہ سفید کپر ژادرہ چھلتھ سرسبز گھاسس پیٹھ وہراوتھ پلون نپہ نپہ کرناوان اوس... دھوبی داتھرس بِہن والی بزرگ تہ نوجوان تہ نژن گند والی شُری اسی پننہ پننہ مزاجہ مطابق برونہہ کنہ سرسبز دان ڈلن سیتی دور قوئیلہ پیٹھ پوژھل تانی وڈر ہند نظارہ تہ کران. ریتہ کالہ کِس نمبلہ منز تھج کادن ہند لولہ ہُری تہ علی محمد میر نہ خوش لحن رونہ ہٹہ چہ آوازہ منز نیندرن سیتی رلتھ محمود گامین تہ رسل میرن لولہ بأتھ بوزان تہٕ شاعر ادیب تہ صوفی بزرگ دُور وستوری ونس کن مُدے گنڈتھ وہاب صابس تہ یاد کران... نواز صأب، خوش باش صأب، غمگین صأب. ماہر صاب، غیورصأب، پرواز صأب. اعجاز صأب تہ قرار صأبس سان آسہِ پریتھ کانسہ رتنپورکی شاعرن تہ ادیب تہ سوخن ورن.. دوھبی داتھرس پیٹھ بہتھ پنن تریش ہمہ رأومژ..عاجز صابن بنوو اتھی سیتی پپنن مسکن تہِ... (اتھ جایہ چھ وونی آکھ خوبصورت جامع مسجد تہ درس گاہ تعمیر کرنہ آمژ.... نواز صابنہ کتھ تارہ کرنہ برونہی تہ یہ داتھر وہراونس سیتی پیو میہ فوراًیہ تمہ وزہ وٹن یلہ امیہ پینجہ ہنز آکھ آخری نشانی نواز صابن برادر اصغر نامور شاعر محترم شریف الدین پرواز صابنہ روحکہ پرواز کرنچ خبر بوز.
اناللہ واناالیہ راجعون.. آکھ شفیق تہ لولہ برتہ مدرِ لہجک نامدار شاعر. گو آسہ نشہ ژھنہ.
سید شریف الدین پرواز صاب آسی
1930 ہس منز اتھی رتن پورکس ماری مندس گامس منز تھنہ پیمتی تہ ابتدائ تعلیم وترپیت تہ کرکھ آتی حاصل.. پیشہ کن أسی سکول ٹیچر.. شاعری سیتی اوسکھ لوکچار پیٹھی اوب ژوپ.محی الدین نواز صاب اوس ینہد زیٹھ بوے.. نامور مبلغ،ادیب تہ شاعر سید جلال الدین اندرابی چھ پرواز صابنی لوکٹ برادر.. کاشر مزاح نگاری منز میجکھ سیٹھا مقبولیت... عفو پروردگاراہ.... چھ یہند مشہور شعری مجموعہ... یس 1982 منز شایع سپدمت چھہ.. 1985 منز کر تمو شش کلمہ ناوہ بیاکھ مجموعہ چھاپ...امام و خطیب درگاہ عالیہ آثار شریف حضرت بل سرینگر بشیر احمد فاروقی صاب چھ امیہ کتابہ ہندس تعارفس منز لیکھان.... کاشر زبانی منز چھ گوڈنیچہ لٹہ شش کلمہ، نماز جنازہ، ایمان مفصل و مجمل بیہ نماز متعلق اہم مسلن ہند کاشر ترجمہ تہ منظوم ترجمہ سپدان یہ چھ نہ صرف کاشر زبانی ہنز ترقی کن آکھ اہم قدم بلکہ چھ یہ دینچ تہ آکھ بڈ بارہ خدمت"امہ پتہ تہ آسہِ پرواز صابن واریاہ کینہ شایع سپدمت مگر بہ چھس تمہ نشہ بے خبر.. معروف شاعر تہ قلمکار عبدالغنی مدہوش چھ پرواز صابنی زانکاری دوان لیکھان..... شریف صاب چھنہ ٹیپہ گور، ٹسنہ گور یا جٹہ گور.. امی سنز مثال چھ تس مصور سنز یس ماڈرن آرٹ تخلیق کری کری پنن رتہ داوی سینہ تہ منہ گجہ ہند الاو دزٕ ونی حیس ژورِ تھاون کوشش چھ کران. یوہی وجہ چھ یلہ شریف صاب لکن آسہ ناونچ کوشش چھ کران تمن چھ أشی ٹاری برنہ یوان..
عفو پروردگارا... کس تعارف منز چھ مدہوش صاب لیکھان.....شریف صابنہ شاعری یدوے خاندانی ڈوکھ اوس مگر گرس منز شایری ہندسلسلہ چھنہ تمن خاندانی بجرس منز گم کران بلکہ چھ انفرادی طور پننہ خاندنک بجر بنان. بقول میر غلام رسول نازکی صأب........ " نواز س سیتی کتھ تارہ کرتھ چھ شریف صابن پننہ کتھ کرنک اندازہ الگ نیومت کڈتھ... پروفیسر محی الدین حاجنی تہ چھ پرواز صابنہ انفرادی رنگکی قائل......"
" پرواز چھ ماملن ہندس ژکس سام ہیوان تہ مشک ژھٹہ ونہ بدصورت کھونکھنہ پیٹھ ظاہر داری ہند پردہ عام زبانی منز تھود نیوان تلتھ"..
عفو پروردگارا مجموعس منز یمن نظمن تہ وژنن عوامی سوتھرس پیٹھ مقبولیت میج تمن منز چھ... لچہ مبارک،شکس مژ،ہوتہِ گریسی بایی یتہِ گریسی بائی، ڈانبل ووستاد، ڈانبل زنانہ، شاند گنڈی طوطہ، ہے ہے بُجر آم، متی آب ہسہ، چھکھ تہ پانس، یاربل کاکنی، بانہ ہجی بال، ژرِ رأچھ، مکایہ ژور،وندکی کار، ہلہ پاری مدنو، بُہک لوس ہشہ رباعی تہ نظمہ شامل........ شریف الدین پرواز صآب رودی سأرسی وأنس درس و تریسس سیتی مصروف... سرکاری ملازمت سیتی رودی تم مختلف جاین اسلامی درسگاہن منز تہ یہ سلسلہ جاری تھاوِتھ. ...... کاشرین آسہ ناون تہ لَسہ ناو وول ہر دلعزیز ووستاد، شاعر، قلمکار تہ ہمدرد شریف النفس شریف الدین سپد پنن شوبہ ون تہ لوبہ کردار ادا کرتھ
بریسہ وا ر پننہ آخری منزل کن محوِ پرواز.. خداے کرنس جنتس منز جاے آمین..
پرواز صاحب أسی رتنپورس نکھ پوہو... تکیہ سیف اللہ (سدلاباغ) روزان تہ آتی دیتک امانت تہِ...تمن ایصال ثوابہ خاطرہ سپز قرآن خوانی تہ خصوصی دعائیہ تقریب... معروف خطیب، مفسرِ قرآن شاعر تہ ادیب مولانا سید جلال الدین اعجاز صآٔبنس صدارتس منز سپد اتھ موقعس پیٹھ آکھ تعزیتی اجلاس یتھ منز شریف الدین پرواز صابنین دینی، سماجی، ادبی تہ ثقافتی خدماتن پیٹھ تمن زبردست خراج عقیدت پیش کرنہ.. معروف ادیب تہ شاعر مفید کشمیری صابن کر مرحوم پرواز صابنہ دینی تہ ادبی کردارچ باوتھ ...
