College Editors Guild of the Philippines

17/06/2025

PALAYAIN SINA KA LINO AT KA W***Y!

Mariing kinukondena ng College Editors Guild of the Philippines – Laguna ang patuloy na pagkakapiit sa mga aktibistang sina Erlindo “Ka Lino” Baez at Wilfredo “Ka W***y” Capareño mga biktima ng iligal na pag-aresto, tanim-ebidensya, at kriminalisasyon ng gawaing aktibismo. , Noong Hunyo 16, 2025, muling prinisinta ang mga huwad na testigo sa Lucena RTC Branch 60. Isa na namang pagtatangka ito ng estado upang patagalin ang pagkakakulong ng mga progresibong lider at supilin ang rebolusyonaryong pakikibaka ng mamamayan!

Hindi krimen ang maglingkod sa sambayanan! Sina Ka Lino at Ka W***y ay hindi kriminal kundi mga tunay na lingkod-bayan, mga lider-masa na walang pagod sa pagsusulong ng lupa, sahod, at karapatan ng mga magsasaka, manggagawa, at maralita. Bilang dating tagapagsalita ng BAYAN-Batangas at Anakpawis-Batangas Coordinator, matagal nang pinuntirya ng estado ang dalawa dahil sa kanilang matapang na pagtuligsa sa mga neoliberal na patakaran ng estado at pagpapakabihag sa dikta ng imperyalistang Estados Unidos.

Ang pag-aresto sa kanila noong Oktubre 6, 2021 ay isa lamang sa maraming anyo ng sistematikong panunupil sa ilalim ng Rehimeng US-Duterte na ngayon ay ipinagpapatuloy ng Rehimeng US-Marcos. Mula sa Bloody Sunday Massacre kung saan si Ka Lino ay halos mapaslang, hanggang sa mga tanim-ebidensya sa kanilang pagpunta sa Sariaya, malinaw ang taktika ng estado: takutin, patahimikin, at durugin ang sinumang hahadlang sa interes ng mga panginoong maylupa, dayuhang korporasyon, at burukrata-kapitalistang naghahari sa bansa.

Gawa-gawa ang mga kasong isinampa laban sa kanila parehong script, parehong modus, parehong layunin ay ibilanggo ang pakikibaka. Ngunit kailanman ay hindi nakukulong ang adhikain ng tunay na paglaya! Sa kabila ng halos apat na taon ng pagkakapiit, nananatiling matatag ang paninindigan nina Ka Lino at Ka W***y. Subalit sa likod ng rehas, araw-araw nilang pasan ang bigat ng pasismo. Ang pagkakawalat sa pamilya, kakulangan ng medikal na atensyon, at pagbibilad sa kapabayaan ng sistemang pangkatarungan na matagal nang bulok at bayaran.

Kaya naman nananawagan kami kay Judge Portia A. Martinez-Panergo: Itigil ang pagluluto ng kasinungalingan! Walisin ang mga huwad na testigo! Ibasura ang mga kasong walang batayan! Palayain sina Ka Lino at Ka W***y ngayon din!

Kasabay nito, hinahamon namin ang kapwa kabataan at mga mamamahayag sa kampus, Manindigan at kumilos! Hindi panahon ang katahimikan sa panahong nilulunod sa karahasan at kasinungalingan ang ating lipunan. Habang may mga aktibistang ipinipiit, habang may mga magsasakang inaagawan ng lupa, habang may estado ng pasismo—walang neutralidad. Kailangang pumili ng panig.

Kami sa CEGP-Laguna, kasama ang libu-libong kabataang mamamahayag sa buong bansa, ay matatag na paninindigan:

Hindi krimen ang maglingkod sa masa!

Ang tunay na hustisya ay hindi makakamit sa katahimikan kundi sa militanteng pagkilos!

Palayain ang lahat ng bilanggong pulitikal!

***yCapareño

12/06/2025

Wakasan ang imperyalistang agresyon! Depensahan ang soberanya ng bayan!

Sa ika-126 anibersaryo ng pagdedeklara ng kalayaan ng Pilipinas, mariing iginigiit ng College Editors Guild of the Philippines – Laguna na hindi pa rin tunay na malaya ang sambayanang Pilipino. Sa kabila ng taon-taong selebrasyon ng tinatawag na “Araw ng Kalayaan,” nananatiling hawak sa leeg ang ating bayan ng imperyalismong Estados Unidos. Patuloy tayong naiipit sa lumalalang inter-imperyalistang tunggalian nito laban sa kapwa imperyalistang China.

Mahigit isang siglo ng pananatili ng Estados Unidos ang kontrol sa ating bansa mula sa ating pulitika, ekonomiya, kultura, hanggang sa usaping militar. Sa pamamagitan ng mga kasunduang tulad ng Mutual Defense Treaty (MDT), Visiting Forces Agreement (VFA), at Enhanced Defense Cooperation Agreement (EDCA), ginawang lunsaran ng mga tropang Amerikano ang ating mga komunidad, basehan ng kanilang kapangyarihan, at labanan sa rehiyon. Hindi ito pagkakapit-bisig kundi garapalang panghihimasok sa ating soberanya.

Kasabay nito, isinusubo ng gobyerno ang ekonomiya ng bansa sa dikta ng dayuhan. Patuloy nitong ipinatutupad ang mga patakarang neoliberal na deregulasyon, liberalisasyon, at pribatisasyon. Mga anti-mamamayang polisiya na sumasakal sa masa at nagsisilbi sa interes ng mga dayuhang monopolyong kapitalista. Habang nilulugmok sa utang, kahirapan, at kagutuman ang karaniwang Pilipino, walang humpay ang pandarambong sa ating likas-yaman, lakas-paggawa, at pambansang interes.

Sa kasalukuyan, ginagamit ng imperyalismong US ang Pilipinas bilang estratehikong pook-lunsaran ng mga ehersisyong militar tulad ng Balikatan, Kamandag, at Kasangga upang itulak ang hegemonya nito sa Asia-Pacific. Hindi kailanman ipinaglaban ang karapatan ng mga Pilipino sa West Philippine Sea—sa halip, lalo nitong pinapainit ang tensyon at isinusuong tayo sa isang digmaang imperyalismo na ganansya ng US. Isa itong gera ng mga imperyalista, gera ng mga naghaharing uri na tayo ang pangunahing pananggalang at sakripisyong alay.

Ang militarisasyon na ito ay hindi para sa kapakanan ng mamamayan. Ito ay tahasang pagpapakatuta ng estado sa dayuhang kapangyarihan. Isa itong desperadong pagtatangkang panatilihin ang huwad na kaayusan habang inaagnas ang tunay na diwa ng kalayaan.

Sa harap ng panunupil, pinatitingkad pa lalo ang kabulukan ng gobyernong Marcos-Duterte. Mariin naming kinokondena ang malalang katiwalian ni Sara Duterte, partikular ang maanomalyang paggamit ng pondo para sa confidential and intelligence funds (CIF). Habang naghihirap ang mamamayan, waldas at lihim ang paggastos ng bilyong pondo na dapat ay para sa edukasyon at serbisyong panlipunan. Hindi dapat palampasin ang ganitong klaseng pananabotahe sa pondo ng bayan.

Mariin din naming tinutuligsa ang lantad na pagmamaniobra ng Senado upang hadlangan at madeley ang impeachment trial laban kay Duterte. Isa itong malinaw na pagtatangka na iligtas ang kanilang kapwa nasa kapangyarihan at itago ang katotohanan mula sa publiko. Sa halip na managot, pilit siyang pinoprotektahan sa ngalan ng political convenience. Hindi ito hustisya. Isa itong insulto sa prinsipyo ng pananagutan at pampublikong serbisyo.

Sa harap ng ganitong kalagayan, buong tapang na naninindigan ang College Editors Guild of the Philippines – Laguna para sa pambansa-demokratikong adhikain. Nananawagan kami sa lahat ng mamamayang Pilipino, at lalong-lalo na sa hanay ng kabataan at mga estudyante. Ibasura ang lahat ng kasunduang militar sa pagitan ng Pilipinas at Estados Unidos, palayasin ang lahat ng tropang dayuhan sa ating bansa. Itigil ang militarisasyon sa West Philippine Sea. Igiit ang mapayapa at makatarungang resolusyon sa sigalot sa rehiyon!

Hangga’t pinaghaharian ng mga dayuhang imperyalista ang ating pulitika, ekonomiya, at kultura—mananatiling huwad ang ating kasarinlan. Walang saysay ang bawat selebrasyon ng Araw ng Kalayaan kung hindi natin kinikilala at nilalabanan ang patuloy na pagkubkob ng dayuhang kapangyarihan.

Dapat maging mulat ang kabataan sa mga usaping ito. Hindi puwedeng tahimik tayo habang pinakikialaman ng imperyalista ang ating kinabukasan. Tungkulin ng kabataan na magsalita, mag-organisa, at kumilos. Hindi tayo manonood lang sa gilid. Sa ating mga balikat nakasalalay ang panibagong yugto ng pakikibaka para sa tunay na kalayaan.

Ang kabataan ay lakas ng bayan. Sa panahon ng krisis at panunupil, kailangan ang ating tapang at pagkakaisa. Kailangan nating magmulat ng marami pang kabataan, ipalaganap ang makabayang kamalayan, at maging aktibong bahagi ng kilusang masa para sa pambansang paglaya.

12/06/2025

🏳️‍🌈✊ 𝐖𝐀𝐋𝐀𝐍𝐆 𝐏𝐑𝐈𝐃𝐄 𝐊𝐔𝐍𝐆 𝐖𝐀𝐋𝐀𝐍𝐆 𝐏𝐀𝐊𝐈𝐊𝐈𝐁𝐀𝐊𝐀! 🏳️‍🌈✊

Hindi lang girl, boy, bakla, at tomboy ang umiiral sa mundo! Ano man ang kulay mo sa bahaghari, may sarili kang pagkakakilanlan na sayo at sayo lamang at dapat ipaglaban!

Kaya, Pride man o hindi, patuloy na nakikibaka tayo para sa rekognisyon at karapatan araw-araw — para makilala ang ating SOGIE, para maging ligtas ang lahat sa diskriminasyon, at para sa tunay na pagkapantay-pantay!

Eh, ano nga ba ‘yang SOGIE na ‘yan? At ano nga ba ang lugar ng laban ng LGBTQ+ sa lipunan?

Kitakits sa ED Fest ng KPL Laguna ngayong weekend, at alamin natin ang mga ito.

- ⚧️ SOGIE 101 💟 | Sabado, 12:30 PM sa UPLB Student Union Building
- 🏳️‍🌈 LGBT and Society 🏢 | Linggo, 12:30 PM sa Banga, Calamba

SIGN UP NA
https://forms.gle/8zVc4yZQVw7Cf7F88

12/06/2025

TINGNAN: Nagtapos ang serye ng sunod-sunod na kilos-protesta ng mga progresibong organisasyon at grupo mula sa Timog Katagalugan at iba pang rehiyon sa kanilang pagtungo sa Monumento ng EDSA ngayong Huwebes, Hunyo 12.

Muling inilahad ng iba't ibang organisasyon tulad Kabataan Partylist(KPL), Anakbayan(AB), College Editors Guild of The Philippines(CEGP) Bagong Alyansang Makabayan(BAYAN), Kilusayang Mayo Uno(KMU), Gabriela Women’s Party(GWP), Panday Sining(PS), at iba pa mula sa mga sektor, rehiyon at nasyonal ang kanilang mga panawagan sa EDSA. Gayunpaman, napalibutan ng presensya ng kapulisan ang monumento, dahilan upang sa ibabang bahagi ng kalsada idaos ang programa.

"Convict Sara Now!" malakas na sigaw ng mga nagpoprotesta, bilang pagbatikos sa patuloy na pag-antala ng Senado sa paglilitis kay Bise Presidente Sara Duterte kaugnay ng Articles of Impeachment mula sa Kamara, bunsod ng isyu sa confidential funds.

12/06/2025

Araw ng Kalayaan 2025: Martsa Patungong US Embassy Hinarangan ng Pulisya

Kalaw Avenue, Maynila — Hinarangan ng puwersa ng kapulisan ang martsa ng iba't ibang progresibong organisasyon patungo sa Embahada ng Estados Unidos ngayong Araw ng Kalayaan, Hunyo 12, Huwebes. Layon ng protesta na igiit ang tunay na pambansang demokrasya sa gitna ng patuloy na dominasyon ng imperyalismong US at pamahalaang itinuturing na papet.

Mapayapang binabagtas ng mga progresibong grupo, kabilang ang mga lider-manggagawa, lider-estudyante, at mga aktibista, ang Kalaw Avenue nang bigla silang harangin ng mga pulis sa kalsada patungong embahada. Dahil dito, sa tapat ng National Library of the Philippines na lamang isinagawa ang programa ng protesta laban sa huwad na kalayaan ng bansa.

“Araw ng Kalayaan, pero hinarangan ng mga pulis ang protesta,” ani Mhing Gomez, Tagapangulo ng Anakbayan National.
“Hindi tunay na malaya ang Pilipinas hangga’t kontrolado ng imperyalismong US ang ating ekonomiya, pulitika, at kultura,” dagdag pa niya.

Mariing isinulong ng mga organisasyon ang panawagang "Imperyalismo, ibagsak!" at ipinahayag ang kahalagahan ng patuloy na pakikibaka sa kalsada man o sa kanayunan upang makamit ang tunay na pambansang demokrasya para sa sambayanang Pilipino.

Kasabay nito, sigaw din ng mga organisasyon ang iba't ibang panawagan mula sa mga batayang sektor ng lipunan, kabilang ang nakabubuhay na sahod para sa mga manggagawa, tunay na reporma sa lupa para sa mga magsasaka, pambansang soberanya sa harap ng dayuhang panghihimasok, at ang pagtigil sa malawakang militarisasyon sa Mindoro at sa West Philippine Sea.

Kinondena rin ng mga raliyista ang malawakang pambobomba at sigalot na isinasagawa ng sabwatang US-Israel laban sa mamamayang Palestino. "Free Palestine!" ang sigaw ng masa habang isinasagawa ang kilos-protesta.

“Ang mga bombang ginagamit ng Israel sa Palestina ay siya ring ginagamit ng PNP at AFP sa pambobomba sa mga komunidad sa kanayunan ng ating bansa,” muling pahayag ni Gomez

Dagdag pa rito, nananawagan ang mga organisasyon na panagutin si Vice President Sara Duterte sa umano'y pagnanakaw sa kaban ng bayan at pagtataksil sa mamamayang Pilipino. Kasabay rin ang paniningil sa Senado upang ibalik sa Kongreso ang mga Articles of Impeachment laban sa kanya.

Tutungo naman sa EDSA Monument ang mga progresibong organisasyon at grupo ngayong 2:00 ng hapon upang ipagpatuloy ang programa.

12/06/2025

TIGNAN: Sa pangunguna ng mga progresibong organisasyon sa Timog Katagalugan, naglunsad ng kilos-protesta upang igiit ang tunay na kalagayan ng mga masang Pilipino, partikular sa Rehiyon sa paggunita ng Huwad na Kalayaan (Hwd) ngayong ika-12 ng Hunyo, sa Kawit, Cavite.

Hawak-hawak ang mga placard, sigaw ng iba't-ibang sektor ang kanilang mga panawagan, at pagkondena sa patuloy na pagkontrol ng Impyeralistang US sa bansa at paggamit nito sa papet na estado upang malayagang kamkamin ang yaman ng Pilipinas.

Ayon sa Bayan Cavite, sunod-sunod ang pagpapalayas at panununog sa mga maralitang komunidad sa kanilang lalawigan para gawing malalaking proyekto ng pribadong sektor.

Namamayagpag ang kontraktwalisasyon sa loob ng Cavite, mga benipisyo at hindi pantay na pasahod.

"Ang mga ganitong kalagayan ay nagpapakitang walang kalayaan ang mangagawa na magkaroon ng seguridad sa trabaho, nakakabuhay na sahod, at batayang ipaglaban ang kanilang mga karapatan at magtayo ng mga unyon na magpoprotekta sa kanila." Ani, tagapagsalita ng Pamantik-Kmu.

Kinondena rin ng mga progresibong organisasyon ang patuloy iligal na pang-aaresto at mga gawa-gawang kaso sa mga presyong pampolitikal.

"Kung tunay na malaya ang bansa ay libreng pinapamahagi ang lupa sa mga magsasaka. May pambansang industriyalisasyon para sa mga mangagawa, at walang imperyalistang US na naghahari." Ani, tagapagsalita ng Kasama-Tk.

10/06/2025

Walang Hustisya sa Senado! Convict Sara Duterte!

Mariing kinukundena ng College Editors Guild of the Philippines–Laguna ang desisyong ibalik ng Senado sa Kamara ang Articles of Impeachment laban kay Vice President Sara Duterte. Sa botong 18-5-0, pinayagan ng impeachment court, sa pamumuno ng mga senador-hukom na tagapagtanggol ng interes ng iilan, na ibalik ang mga artikulo pabalik sa Kongreso.

Ayon sa mosyon ni Senador Alan Cayetano, hindi raw tuluyang ibinasura ang kaso pero malinaw sa atin: ito ay maniobrang pampulitika para iligtas si Duterte mula sa pananagutan.

Ito ay hindi lamang pag-atras, ito ay tahasang pagtataksil. Sa halip na manindigan para sa taumbayan, pinili ng Senado na maging kasabwat sa pagtatakip sa mga krimen ni Duterte. Ginamit nila ang teknikalidad para patagalin at pahinain ang kaso, habang ang masa ay araw-araw na naghihirap sa epekto ng kainutilan at kurapsyon ng kasalukuyang rehimen.

Habang ninanakaw ni Duterte ang pondo ng bayan, habang nagtatampisaw siya sa kapangyarihan at karangyaan, milyong Pilipino ang walang trabaho, walang makain, at binubusalan ang bibig. Ang impeachment ay hindi laro ng mga pulitiko—ito ay panawagan ng mamamayang sawang-sawa na sa korapsyon, pasismo, at panlilinlang.

Hindi Senado ang huhusga, ang masa ang tunay na hukom!

Dahil dito, iniimbitahan namin kayo bukas. Dumalo at magpadalo! Kalampagin natin ang Senado na taksil sa mamamayang Pilipino!

8:00–9:00 AM – Department of Agriculture 11:00 AM–12:00 NN – COMELEC
2:30 PM – SENADO

10/06/2025

Pahayag ng College Editors Guild of the Philippines – Laguna
Hinggil sa Anibersaryo ng Comprehensive Agrarian Reform Program (CARP)
Hunyo 10, 2025

Ngayong ika-10 ng Hunyo, ginugunita ang ika-37 anibersaryo ng pagsasabatas ng Comprehensive Agrarian Reform Program (CARP) sa ilalim ng rehimeng Corazon Aquino noong 1988—isang programang ipinasa matapos ang pagbagsak ng diktadurang Marcos Sr., ngunit sa esensya’y isa lamang palpak na pagtatangka ng estado na iligaw ang landas ng makauring pakikibaka ng mga magsasaka.

Sa halos apat na dekada ng implementasyon, napatunayang ang CARP ay huwad, bulok, at kontra-magsasaka. Sa halip na ipamahagi ang lupa sa mga tunay na nagbubungkal, ito’y nagsilbing tabing sa patuloy na monopolyo ng mga panginoong maylupa at dambuhalang dayuhang korporasyon. Ginamit ito upang pahupain ang lumalakas na kilusang magsasaka, hindi upang tugunan ang ugat ng pyudal na kahirapan.

Ang kasalukuyang New Agrarian Emancipation Act ni Marcos Jr. ay hindi solusyon kundi isang “recycled” na panlilinlang. Sa ngalan ng “pagpapalaya sa utang,” ibinaba ito bilang peke’t hungkag na tagumpay, habang nananatiling hindi naipapamahagi ang lupa nang libre at hindi napapanagot ang mga nasa likod ng land grabbing, harassment, at militarisasyon sa kanayunan.

Habang nilulunod sa utang at dislokasyon ang mga magsasaka, milyon-milyong piso naman ang walang-awang ibinubulsa ni Sara Duterte sa anyo ng confidential funds. Tahimik siya sa harap ng krisis sa lupa—ngunit agresibo sa panunupil sa mga makabayan at progresibong sektor. Dapat siyang panagutin at agad na tanggalin sa puwesto.

Ang mga batas gaya ng CARP, SPLIT, at NaLUA ay bunga ng imperyalistang dikta—hindi makabayan, kundi maka-dayuhan. Sa Timog Katagalugan pa lamang, lantad ang kabulukan ng huwad na reporma sa patuloy na laban sa Hacienda Yulo, Tartaria, Belt, Lupang Ramos, at Hacienda Roxas. Sa halip na resolbahin, lalo pang sinasaklaw ng estado ang pandarahas, panlilinlang, at legal na pagbebenta ng lupa sa pribadong interes.

Habang papalapit ang tinaguriang Araw ng Kalayaan sa Hunyo 12, nararapat lamang na igiit ng mamamayan: walang tunay na kalayaan sa ilalim ng pyudalismo at imperyalismo. Walang saysay ang mga selebrasyon habang nananatiling alipin ang mga magsasaka sa lupaing dapat ay kanila. Ang tunay na kalayaan ay makakamit lamang sa libreng pamamahagi ng lupa, pagbuwag sa monopolyo ng pag-aari, at pagpapatalsik sa imperyalismo.

Kaisa ng masang magsasaka, ang College Editors Guild of the Philippines-Laguna ay mariing nananawagan ng tunay na reporma sa lupa. Hindi CARP. Hindi SPLIT. Hindi pekeng kalayaan.

Tunay na reporma sa lupa, ipaglaban!
Ibagsak ang huwad na reporma!
Duterte Panagutin, Marcos Singilin!
Convict Sara Duterte
Kalayaan, hindi ilusyon—laban ng mamamayan!

Sumulong, Sumulat, Manindigan, at Magmulat!

30/05/2025

Flores De ENDO 2025: Mga mangagawa ng timog Katagalugan, naglunsad ng kilos-protesta sa maynila

Upang gunitain ang taunang Flores De ENDO, lumuwas patungong Maynila ang iba’t ibang organisasyon at unyon ng mga manggagawa mula sa Timog Katagalugan ngayong Biyernes, ika-30 ng Mayo, upang magsagawa ng mga kilos-protesta sa harap ng mga ahensiya ng pamahalaan. Layon ng pagkilos na kondenahin ang patuloy na pagpapatupad ng kontraktwalisasyon sa bansa.

Pinangunahan ang protesta ng Pagkakaisa ng Manggagawa sa Timog Katagalugan – Kilusang Mayo Uno (PAMANTIK-KMU), Liga ng mga Manggagawa para sa Regular na Trabaho (Liga), Organized Labor Association in Line Industries and Agriculture (OLALIA-KMU Federation), at mga lokal na unyon gaya ng sa NK, DAIWA, at HKR.

Nagkasa ng sunod-sunod na pagkilos ang mga grupo sa harapan ng Supreme Court, Department of Justice, Court of Appeals, at Department of Labor and Employment (DOLE) upang ipanawagan ang pagtatapos ng kontraktwalisasyon, pagtaas ng sahod, pagkakaloob ng benepisyo, at pagtigil sa red-tagging at harassment sa mga unyonista sa loob ng mga pagawaan.

Kasama rin sa panawagan ng mga manggagawa ang pagpapalaya sa lahat ng bilanggong pulitikal, tulad nina Pangulong Steve Mendoza at Marites David ng OLALIA. Patuloy din nilang isinusulong ang katarungan para sa mga pinaslang na lider-manggagawa gaya nina Pangulong Manny Asuncion, Dandy Miguel, at iba pang biktima ng madugong Bloody Sunday Massacre noong 2021.

Sa gitna ng pagkilos, kapansin-pansin ang presensya ng mga militar, kapulisan, at mga elemento ng intel sa paligid ng lugar. Mayroon ding drone na lumilipad sa itaas ng mga nagpoprotesta.

Nagkaroon din ng tangkang panghaharang sa mga grupo sa may Intramuros upang pigilan silang makapagprotesta sa mismong tanggapan ng DOLE. Gayunpaman, makalipas ang ilang minuto ay pinayagang makapasok ang mga manggagawa at matagumpay na naisagawa ang kanilang programa sa harap ng ahensiya. Nakapagdiyalogo rin sila sa Office of the Secretary ng DOLE upang iparating ang kanilang mga panawagan.

23/05/2025

TO WRITE IS ALREADY TO CHOOSE!✊🏻

Do you want to be a voice and a defender of free and independent journalism?

In our country’s current democratic situation, it is more important than ever to amplify the voice of the campus press to fight for press freedom within schools.

The College Editors Guild of the Philippines—Laguna (CEGP—Laguna) is the oldest and broadest alliance of student publications in the Asia-Pacific, with a long history of standing up for campus press freedom.

Right now, CEGP-Laguna is looking for new volunteers who are ready to carry on this advocacy.

Be a defender of campus press freedom! Sign up now to schedule an orientation:
https://forms.gle/eo1zzU4rFhPbKvek8

19/05/2025

Pahayag ng College Editors Guild of the Philippines (CEGP)

Sa Pagkakapanalo ng Kabataan Partylist at sa mga Anomalya ng Eleksyon 2025

Ipinapaabot ng College Editors Guild of the Philippines ang mariing pagpupugay sa tagumpay ng Kabataan Partylist na muling nakapasok sa Kongreso, sa kabila ng siksik, marumi, at mapanupil na labanan sa halalan. Isa itong patunay na sa gitna ng red-tagging, pananakot, at disimpormasyon, nananatiling buhay at lumalakas ang panawagan para sa tunay na representasyon ng kabataan sa loob mismo ng reaksyunaryong gobyerno.

Ngunit kasabay ng tagumpay na ito ay ang mariing pagkondena sa malawakang anomalya ng Eleksyon 2025 mula sa talamak na vote-buying, disimpormasyon sa social media, hanggang sa muling pag-upo ng mga huwad at makinaryang partylist gaya ng Duterte Youth na walang ibang layunin kundi protektahan ang interes ng naghaharing-uri at ipuslit ang pasistang agenda sa Kongreso gamit ang pekeng representasyon.

Ang pagkakapanalo ng Kabataan Partylist ay bunga ng kolektibong pagkilos ng mga estudyante, kabataan, at mamamayang hindi kailanman tumiklop sa panunupil. Hindi ito regalong ipinagkaloob ito’y tagumpay na inani mula sa mahabang paninindigan, pagkilos, at walang humpay na paglaban.

Ngunit ito ay simula pa lamang. Hindi sapat ang pagkakaroon ng upuan sa Kongreso kung hindi ito magiging tunay na sandata para sa militanteng adbokasiya para sa libreng edukasyon, academic freedom, campus press freedom, disenteng trabaho, serbisyong panlipunan, karapatang pantao, at pambansang kasarinlan. Sa bawat panukala, privilege speech, at pagboto sa plenaryo, kailangang dalhin ang boses ng mga estudyante’t kabataang patuloy na pinatatahimik, pinararatangan, at pinapaalis sa kanilang mga paaralan.

Sa harap ng mga banta sa mga campus publications kabilang ang red-tagging, censorship, at sapilitang pagsasara mas lalong kinakailangang palakasin ang panawagan para sa demokratikong espasyo sa mga pamantasan at paaralan. Ang midya-estudyante ay hindi lamang tagapag-ulat; ito'y sandata ng katotohanan, paniningil, at pagbabagong panlipunan. Sa mga publikasyong patuloy na nilalansag, ang panulat ay nananatiling panangga ng mga estudyante laban sa panunupil.

Ang College Editors Guild of the Philippines-Laguna, bilang pinakamatandang alyansa ng mga publikasyong pangmag-aaral sa Asya-Pasipiko, ay mananatiling kaakibat sa pagsusulong ng tunay, makabayan, at militanteng edukasyon at midya-estudyante. Patuloy kaming magbabantay, maninindigan, at maniningil. Hindi kami bulag sa sabwatan ng Commission on Elections, papet na pamahalaan, at militarisadong estado na pilit pinipipi ang tinig ng kabataan.

Kaya’t sa bawat patak ng tinta ng panulat, naroroon ang paglaban. Sa bawat pahina ng aming publikasyon, naroroon ang panawagan:

Ipaglaban ang karapatan sa edukasyon! Ipaglaban ang kalayaan sa pamamahayag! Ipaglaban ang karapatan ng kabataan!

18/05/2025

MANUAL COUNTING, ISAGAWA!!

Opisyal na Pahayag ng College Editors Guild of the Philippines – Laguna hingil sa Panawagang Manwal na Pagbilang ng Boto ngayong Halalan 2025

Ang eleksyon ay hindi lamang simpleng proseso ng pagboto—ito ay pagkakataon ng mamamayan na pumili ng mga lider na tunay na maglilingkod at magtataguyod ng makabuluhang pagbabago. Ngunit sa halip na bigyang halaga ang boto ng mamamayan, ang halalan ngayong 2025 ay nilamon ng kapalpakan, kaduda-dudang sistema, at lantarang pandaraya.

Ayon sa mga ulat ng Vote Report PH at iba pang watchdog, mahigit 42% ng automated counting machines (ACMs) ang pumalpak: may mga makina na hindi gumagana, maling binilang ang balota, at may mga boto na hindi naipasok sa sistema. Ilang botante ang napilitang iwan ang kanilang balota sa loob ng makina, habang may iba namang hindi nakaboto dahil sa aberya. Kasabay nito, sunod-sunod rin ang mga kaso ng red-tagging at paninira sa mga progresibong kandidato—isa na namang taktika para pigilan ang mga tunay na tinig ng mamamayan.

Pinakamatindi, may mga ulat ng palihim na pagpapalit ng software ng mga makina sa mismong araw ng halalan. Kinumpirma ito ng mga independent IT experts na nagsabing iba ang hash code o bersyon ng software na ginamit. Hanggang ngayon, tikom ang bibig ng COMELEC. Walang malinaw na paliwanag, walang pagtanggap ng pagkakamali, at lalong walang agarang aksyon.

Ang mga problemang ito ay hindi basta mga “teknikal” na isyu. Ito ay malinaw na indikasyon ng malalim na problema sa ating electoral system—isang sistemang pinapaboran ang mga makapangyarihan at ginagamit ang teknolohiya para kontrolin at manipulahin ang resulta ng halalan.

Dahil dito, mariin ang panawagan ng College Editors Guild of the Philippines – Laguna: MANWAL NA PAGBIBILANG, IPATUPAD! Dapat magsagawa ng manual counting sa presensya ng taumbayan upang matiyak ang integridad ng boto. Dapat tiyakin na bawat balota ay tunay na mabibilang, makikita, at mapanghahawakan.

Kasabay nito, dapat rin papanagutin ang COMELEC sa kapabayaan at kakulangan sa transparency. Hindi sapat ang tahimik na pagtanggap ng reklamo; kailangan ng malinaw na aksyon at pagbibigay linaw sa taumbayan.

Ang boto ng mamamayan ay sagrado. Hindi ito dapat sinasayang, inaabuso, o binabalewala. Sa harap ng halalang puno ng kaduda-dudang pangyayari, tungkulin nating mag-ingay, manindigan, at ipaglaban ang tunay na demokrasya.

College Editors Guild of the Philippines - Laguna

17/06/2025

12/06/2025

12/06/2025

12/06/2025

12/06/2025

12/06/2025

10/06/2025

10/06/2025

30/05/2025

23/05/2025

19/05/2025

18/05/2025

Address

Website

Alerts

Contact The Business

Shortcuts

Share