Salween Press

05/01/2025

ဘီးလင်းမြို့နယ်တွင်စစ်ကောင်စီလက်နက်ကြီးပစ်ခတ်မှုကြောင့် နတ်ကြီးရွာသား ၂ ဦးကျည်ထိမှန်သေဆုံး၊ ၄ ဦးဒဏ်ရာရ ၊ ဒေသခံများတိမ်းရှောင်နေ

အောင်လေး ၊ Salween Press
ဇန်နဝါရီ ၅ ရက်၊ ၂၀၂၅ ။

မွန်ပြည်နယ် ဘီးလင်းမြို့နယ် နတ်ကြီးအခြေစိုက်စစ်ကောင်စီတပ်မှ နတ်ကြီးရွာအတွင်းသို့ ဇန်နဝါရီလ ၃ရက်နေ့ည၇နာရီအချိန်တွင် လက်နတ်ကြီးပစ်ခတ်မှုကြောင့် အရပ်သားပြည်သူ၂ဦးပွဲချင်းပြီး သေဆုံးကာ ၄ ဦးဒဏ်ရာရရှိခဲ့တယ်လို့နယ်မြေခံစစ်ရေးသတင်းရင်းမြစ်ထံမှသိရသည်။

“နတ်ကြီးစခန်းကနေနတ်ကြီးရွာထဲကိုလက်နက်ကြီးတစ်လုံးထုချလိုက်တော့ လူနေအိမ်တစ်လုံး ထိမှန်ပျက်စီးပြီး အရပ်သားပြည်သူအမျိုးသားတစ်ယောက်နဲ့အမျိုးသမီးတစ်ယောက်သေတယ်။ နောက်ထပ် ၄ ယောက်လည်းဒဏ်ရာရတယ်။ ပြင်းထန်ဒဏ်ရာနဲ့ ၃ ယောက်ကိုတော့ ဘီးလင်းဆေးရုံကို ပို့လိုက်တယ်။ ကျန်တဲ့တစ်ယောက်ကတော့ခြေထောက်ထိမှန်တယ်။ သိပ်ပြီးဒဏ်ရာမပြင်းထန်ဘူး။ လမ်းလျှောက်လို့နိုင်ပါသေးတယ်” လို့ အဆိုပါသတင်းရင်းမြစ်က Salween Press ကိုပြောပါတယ်။

စစ်ကောင်စီတပ်သားများသည် တော်လှန်ရေးမဟာမိတ်ပူးပေါင်းတပ်များ လာရောက်တိုက်ခိုက် လာမည်ကိုစိုးရိမ်၍ နေ့ရောညပါလက်နက်ကြီး၊ လက်နက်ငယ်များ ရမ်းသမ်းပစ်ခတ်မှုများ ဆက်တိုက်လုပ်ဆောင်လျှက်ရှိနေပြီး ဇန်နဝါရီ၄ရက်နေ့တွင်လည်း လက်နက်ကြီးဆက်တိုက်ပစ်ခတ် တယ်လို့ သတင်းရင်းမြစ်ကဆိုပါတယ်။

တိုက်ပွဲများဖြစ်လာမည်နှင့်စစ်ကောင်စီလက်နက်ကြီးရမ်းသမ်းပစ်ခတ်မှုကြောင့်စိုးရိမ်၍ ရွှေလောင်အင်းကျေးရွာ၊နတ်ကြီးကျေးရွာနှင့်ပြင်သာကျေးရွာအသီးသီးမှဒေသခံများထွက်ပြေးတိမ်းရှောင်နေကြရပြီး ဘီးလင်မြို့၊တံတားခါးကျိုးနှင့်ကဇိုင်းဘက်သို့ထွက်ပြေးတိမ်းရှောင်နေသူများလည်းရှိနေသည်ဟု သတင်းရရှိသည်။

ငွေကြေးအခက်အခက်အခဲရှိသူများနှင့် ဆွေမျိုးမိတ်ဆွေမရှိသူများကတော့ တောတောင်ဒေသဘက်ကို ထွက်ပြေးတိမ်းရှောင်ပုန်းအောင်နေကြရတယ်လို့ဆိုပါတယ်။

ပုံဟောင်းများ

04/01/2025

တရုတ်သံရုံးရှေ့ဆန္ဒပြခဲ့တဲ့ အဆိုတော် ရန်ရန်ချန်း

မြန်မာ့နိုင်ငံရေးမှာ ဝင်ရောက်စွက်ဖက်နေပြီး စစ်ကောင်စီဖက်က ရပ်တည်လာတဲ့ တရုတ်အစိုးရကို အမေရိက ရောက်မြန်မာပြည်ဖွါး အနုပညာရှင်တွေဦးဆောင်ပြီး ဇန်နဝါရီလ ၃ ရက်နေ့က ဝါရှင်တန်ဒီစီ မြို့တရုတ်သံရုံးရှေ့မှာဆန္ဒပြခဲ့ကြပါ။

ဒီဆန္ဒပြ ပွဲမှာ ကိုယ်တိုင်လာရောက်ဝန်းရံတဲ့ အဆိုတော်ရန်ရန်ချန်းနဲ့ကျော်သီဟတို့ရဲ့ပြောဆိုသံများကို နားထောင်ကြည့်ရအောင်ပါ။

04/01/2025

ကော်သူးလေတပ်မတော် KTLA ခြုံခိုတိုက်ခိုက်လို့ KNLA တပ်မဟာ ၄ အရာရှိတစ်ဦးသေဆုံး

Salween Press
ဇန်နဝါရီ ၄ ရက်၊ ၂၀၂၅ ။

KNU တပ်မဟာ ၄ နယ်မြေ ဘိတ်-ထားဝယ်ခရိုင်တွင် ကော်သူးလေတပ်မတော် KTLA တပ်ဖွဲ့က KNLA တပ်မဟာ ၄ တပ်ရင်း ၁၀ မှအရာရှိနှင့်တပ်ဖွဲ့၀င်တချို့ပါရှိသည့်ယာဉ်ကို ခြုံခိုတိုက်ခိုက်ခဲ့လို့ တပ်ရင်း ၁၀ ၏ဒု-တပ်ခွဲမှူး ဗိုလ်စောလားဒို သေဆုံးပြီး တပ်သားတစ်ဦးဒဏ်ရာရရှိခဲ့ပါသည်။

တိုက်ခိုက်မှုသည် ဇန်နဝါရီလ ၃ ရက်နေ့က ထားဝယ်-ထီးခီးလမ်းပိုင်းတွင်ဖြစ်ပွားခဲ့တာဖြစ်ပြီး KNLA တပ်မဟာ ၄ တပ်ဖွဲ့တို့၏ယာဉ်က ကမော်ဟောမှ ၀ါကလါးသို့ခရီးသွားစဉ် လမ်းခုလတ်တွင် ကော်လာဖိုး (ခေါ်) ဗိုလ်အယ်ခွီးဦးဆောင်သည့် KTLA တပ်ဖွဲ့က ချောင်းမြောင်းပစ်ခတ်တိုက်ခိုက်ခဲ့တာဖြစ်သည်ဟု တပ်မဟာ ၄ ဒေသအတွင်းသတင်းတွေအထူးပြုရေးသားသည့် ကွယ်ကလူသတင်းဌာနကရေးသား ဖော်ပြထားသည်။

အဆိုပါတိုက်ခိုက်မှုသည် နှစ်ဖက်တပ်အကြားမပြေလည်သေးသည့် ကရင်အမျိုးသားလွတ်မြောက်ရေး တပ်မတော် KNLA တပ်မဟာ ၄ နှင့် KTLA တပ်ဖွဲ့တို့အကြား ထပ်မံဖြစ်ပွားခဲ့သည့်စစ်ရေးပြဿနာ တစ်ခုဖြစ်သည်။

KTLA သည် KNDO ခေါင်းဆောင်ဟောင်း ဗိုလ်မှူးကြီးစောနယ်ဒါးမြ ဦးဆောင်ဖွဲ့စည်းတည်ထောင်ခဲ့သည့် ကရင်လက်နက်ကိုင်တပ်ဖွဲ့တစ်ခုဖြစ်ပြီး KNU တပ်မဟာ ၄ နယ်မြေတွင်လှုပ်ရှားလျှက်ရှိပြီး KNLA တပ်မဟာ ၄ နဲ့မကြာခဏအပြန်အလှန်ပစ်ခတ်မှုဖြစ်ပွားခဲ့တာရှိသည်။

KTLA ခေါင်းဆောင် ဗိုလ်မှူးကြီးစောနယ်ဒါးမြသည် KNU ခေါင်းဆောင်ဟောင်း ဗိုလ်ချုပ်ကြီးစောဘိုမြ၏ သားတစ်ဦးဖြစ်သည်။

ပုံ - ကော်လာဖိုး (ခေါ်) ဗိုလ်အယ်ခွီးဦးဆောင်သည့် KTLA တပ်ဖွဲ့ (Photo: KTLA)

04/01/2025

ဧရာဝတီတိုင်းထဲက မိတ်သလင်နှင့် မကျီးဇင်က စစ်ကောင်စီစခန်းများကို AA က ထပ်မံတိုက်ခိုက်၊
နှစ်ဖက်တိုက်ပွဲ ပြင်းထန်နေ

Salween Press
ဇန်နဝါရီလ ၄ ရက် ၊ ၂၀၂၅။

ရခိုင်ပြည်နှင့် ဧရာဝတီတိုင်း အစပ်တွင်ရှိသည့် စစ်ဆေးမှုအကြမ်းဆုံးသော ဗေဒါစစ်ဆေးရေးဂိတ်ကို အာရက္ခတပ်တော် AA က ဒေသခံ PDF များဖြင့် ပူးပေါင်းတိုက်ခိုက်ပြီးနောက် တစ်ပြိုင်တည်း ပုသိမ်မြို့နယ်ထဲက မကျီးဇင်က စခန်းနှင့် မိတ်သလင် ကာကင်းစခန်းကို ထိုးစစ်ဆင်တိုက်ခိုက်နေသည်။

ဗေဒါစစ်ဆေးရေးဂိတ်အနီးက မိတ်သလင် ကာကင်းစစ်စခန်းကို အာရက္ခတပ်တော် AA နှင့် ပူးပေါင်းအဖွဲ့သည် ယမန်နေ့ ဇန်နဝါရီလ ၃ ရက် ညနေ ၅ နာရီခန့်တွင် စတင်တိုက်ခိုက်နေပြီး စစ်ကောင်စီကလည်း လေကြောင်းပစ်ကူများဖြင့် ခုခံနေကြောင်း သတင်းရင်းမြစ်များက ပြောသည်။

ဗေဒါစစ်ဆေးရေးဂိတ်နှင့် မိတ်သလင် ကာကင်းစခန်းတို့သည် ရခိုင်းရိုးမတောင်တန်းပေါ်တွင်ရှိပြီး ဧရာဝတီနှင့်ရခိုင်နယ် အပိုင်းအခြားသတ်မှတ်သည့် နေရာနှင့် အနီးဆုံးတွင်ရှိကြသည်။

မိတ်သလင် ကာကင်းစစ်စခန်းသည် ဧရာဝတီတိုင်းထဲက စစ်ကောင်စီ၏ စခန်းတစ်ခုဖြစ်ပြီး အနီး ငါးသိုင်းချောင်းမြို့က ၃၄၄ အမြောက်တပ်ရင်းက လက်နက်ကြီးပစ်ခတ် ခုခံတိုက်ခိုက်နေကြောင်းလည်း ဒေသခံများထံမှ သိရသည်။

ယနေ့ နံနက်တွင်လည်း ပုသိမ်မြို့ခရိုင်ထဲက မကျီးဇင်ကျေးရွာအနီးရှိ စစ်ကောင်စီ ကင်းစခန်းများကို AA က ဝင်တိုက်ခိုက်ခဲ့ပြီး နှစ်ဖက်တိုက်ပွဲ ပြင်းထန်နေကြောင်း ဒေသခံများက ပြောဆိုကြသည်။

အာရက္ခတပ်တော် AA သည် ရခိုင်ပြည်၏ အဆုံးမြို့ ဂွမြို့ကိုသိမ်းပြီးနောက် ဧရာဝတီတိုင်းထဲက ဟိုင်းကြီးကျွန်းအထိ သိမ်းပိုက်နိုင်ကြောင်းလည်း သတင်းများထွက်ပေါ်နေသည်။

ဧရာဝတီတိုင်းထဲက ဂွကမ်းခြေ၊ ရွှေသောင်ယံကမ်းခြေနှင့် ငွေဆောင်ကမ်းခြေ စသည့် ပင်လယ်ကမ်းမြောင်နဲ့ ဟိုင်းကြီးကျွန်းအထိက သမိုင်းတွင် ရခိုင်တို့ပိုက်နက်ဖြစ်ခဲ့သည့်အတွက် AA က ယင်းနေရာအထိ ထိုးဖောက်ဝင်ရောက် သိမ်းပိုက်နိုင်ကြောင်းလည်း ပြောဆိုနေကြခြင်းဖြစ်သည်။

သို့သော်လည်း အာရက္ခတပ်တော် AA က တရားဝင်ထုတ်ပြန် ပြောဆိုထားခြင်းမရှိသည့်အတွက် ဟိုင်းကြီးကျွန်းအထိ သိမ်းပိုက်ယူမည်မှာ အတည်ပြု၍မရရှိသေးပေ။

ပုံဟောင်းများ - အာရက္ခတပ်တော် AA တပ်နှင့် စစ်ကောင်စီတပ်ပုံတချို့

04/01/2025

KNU နဲ့ပူးပေါင်းလိုက်သည့်ဗိုလ်လှကြိုင်BGFတပ်ဖွဲ့တွင် စစ်မတိုက်ချင်သည့်တပ်သားတချို့ကို မိခင်တပ်သို့ ပြန်ပို့

အောင်လေး ၊ Salween Press
ဇန်နဝါရီလ ၄ ရက် ၊ ၂၀၂၅။

KNLA တပ်ဖွဲ့ထံပူးပေါင်းသည့် အမှတ်၁၀၁၃တပ်ရင်း ဗိုလ်လှကြိုင်ဦးဆောင် BGF/KNA တပ်ဖွဲ့တွင် စစ်မတိုက်ချင်ဘဲ အေးအေးချမ်းချမ်းနေလိုသည့်တပ်သားတချို့ကို KNU တပ်မဟာ ၁ မှ မိခင်တပ် BGF/KNA အုပ်ချုပ်နယ်မြေရှိရာမြိုင်ကြီးငူသို့ ပြန်လည်ပို့ဆောင်လိုက်သည်ဟု တော်လှန်ရေးမဟာမိတ် ပူးပေါင်းတပ်၏သတင်းရင်းမြစ်ထံမှသိရသည်။

စစ်ကောင်စီတပ်ဖွဲ့နဲ့မပူးပေါင်းတော့သည့် မူတြော်ခရိုင် (ဖာပွန်ခရိုင်) ဒွဲ့လိုးမြို့နယ်အခြေစိုက် အမှတ် ၁၀၁၃ BGF ဗိုလ်လှကြိုင်တပ်ဖွဲ့ဝင်များသည် ဒီဇင်ဘာလ ၃၀ရက်နေ့တွင် KNUတပ်မဟာ၁နယ်မြေတစ်နေရာတွင် အင်အား၃၀၀နီးပါးပြန်လာပူးပေါင်းခဲ့သည်ဟုသိရသည်။

လာရောက်ပူးပေါင်းသည့် BGF/KNA တပ်ဖွဲ့ကိုလည်းကြိုဆိုပွဲပေးကြောင်း ဒီဇင်ဘာလ၃၀ရက်နေ့ ကြပ်သောင်းဆိပ်တွင်ကျင်းပသည့်ကရင်နှစ်သစ်ကူးစင်မြင့်ပေါ်၌တာဝန်ရှိသူက ပွဲတက်ရောက်သည့်ပြည် သူလူထုအား အသိပေးပြောကြားခဲ့တယ်လို့ပွဲတက်ရောက်သူထံမှသိရှိရသည်။

“BGF တပ်ဖွဲ့တွေပြန်လာမယ်ဆိုတာစစ်ကောင်စီဘက်ကသိပုံကတယ်။ အဲ့ရက်မတိုင်ခင်လေယာဉ်တွေ နေ့ရောညပါလာပတ်တယ်။ ရှိမဲ့နေရာထင်ပြီး ရွာဘေးတွေ၊ တောတွေထဲမှာ စက်သေနတ်နဲ့ပစ် ဗုံးသီး ပါကျဲချတယ်။ ကြပ်သောင်းဆိပ်ရွာ၊နို့ဘဲ့ဘော၊ဘောကျို့လယ်၊နို့ဖောထီးစတဲ့ရွာမှာပစ်ခတ်ပြီး ဗုံးသီးကျဲ တယ်။ နို့ဖောထီးရွာမှာတစ်ယောက်သေ၊တစ်ယောက်ဒဏ်ရာရခဲ့တာရှိတယ်။ လူနေအိမ်လည်း ထိခိုက်ပျက်စီးမှုရှိတယ်” ဟု BGF နဲ့နီးစပ်သူတစ်ဦးကပြောပါတယ်။

လက်ရှိ KNU တပ်မဟာ ၁ထဲမှာပြန်လည်ပူးပေါင်းလာသည့် BGF အမှတ်၁၀၁၃ဗိုလ်လှကြိုင်တပ်ဖွဲ့ဝင် များသည်စစ်ကောင်စီတပ်ဖွဲ့များကိုပြန်လည်တိုက်ခိုက်လိုသည့်တပ်ဖွဲ့၀င်များသာကျန်ခဲ့ပြီး တိုက်ခိုက်လိုစိတ် မရှိတော့သည့်တပ်ဖွဲ့ဝင်များကို BGF အုပ်ချုပ်နယ်မြေရှိရာမြိုင်ကြီးငူသို့ပြန်လည်ပို့ဆောင်ပေးခဲ့သည်ဟု သတင်းရင်းမြစ်ကဆိုသည်။

ဒီဇင်ဘာလ ၃၀ ရက်နေ့မှာလည်း အုန်းတောမှမြိုင်ကြီးငူသို့ BGFတပ်ဖွဲ့ဝင်တချို့လည်း ကား ၃ စီးဖြင့်ပြန်သွားကြသည်ဟု ပြန်သွားသည့်BGFတပ်မှူးနဲ့နီးစပ်သူတစ်ဦးထံမှသိရှိရသည်။

ပုံဟောင်းများ

04/01/2025

လွတ်လပ်ရေးနေ့တွင် အကျဉ်းသား ၅၈၀၀ ကျော်လွတ်လာ

ဇန်နဝါရီလ ၄ ရက်နေ့တွင်ကျရောက်သည့် ၇၇ နှစ်မြောက်လွတ်လပ်ရေးနေ့တွင် အကျဉ်းသား ၅၈၀၀ ကျော်ကို စစ်ကောင်စီက လွတ်ငြိမ်းချမ်းသာခွင့်ပေးခဲ့သည်။

ပုံများ - အင်းစိန်အကျဉ်းထောင်အတွင်းမှ အကျဉ်းသားများလွတ်မြောက်လာသည့်မြင်ကွင်း (Photos: AAMIJ)

04/01/2025

“ဗမာအကြီးအကဲအချင်းချင်းနေရာလုပြီးဖြစ်လာတဲ့ပြဿနာဟာ ကျနော်တို့တိုင်းရင်းသားအားလုံးဒုက္ခ ရောက်တယ်” ဗိုလ်ချုပ်စောချစ်သူ

လှိုင်းဘွဲမြို့နယ်မှ ကရင်အမျိုးသားတပ်မတော် (ယခင် BGF) အတွက် စစ်သား ၁၅၀၀ ရှိသင်တန်းဆင်းပွဲမှာ ဗိုလ်မှူးချုပ် စ....

04/01/2025

PDF တောင်ပိုင်းတိုင်းစစ်ဒေသမှ တစ်ပတ်အတွင်းတိုက်ပွဲ ၁၄ ကြိမ်ဖြစ်၊ စစ်ကောင်စီ ၇၃ ဦးသေ

Salween Press
ဇန်နဝါရီလ ၄ ရက်၊၂၀၂၅။

PDFပြည်သူ့ကာကွယ်‌ရေးတပ်မတော်တောင်ပိုင်းတိုင်းစစ်ဒေသမှာ တစ်ပတ်အတွင်းဖြစ်ပွားခဲ့သည့် စစ်ရေးအကျဉ်းချုပ်အားပြည်သူလူထုများအားသိရှိစေရန်ဇန်နဝါရီလ ၄ရက်နေ့တွင် အသိပေးထုတ်ပြန် လိုက်သည်။

အဆိုပါတိုက်ပွဲတွင်ဒီဇင်ဘာလ၂၈ရက်နေ့မှဇန်နဝါရီလ၃ရက်နေ့အထိ တပတ်အတွင်ဖြစ်ပွားသော တိုက်ပွဲများဖြစ်ပြီးပြည်သူ့ကာကွယ်ရေးပူးပေါင်းတပ်ဖွဲ့နှင့်စစ်ကောင်စီတပ်ဖွဲ့တို့တိုက်ပွဲ၁၄ကြိမ်ဖြစ်ပွားခဲ့ပြီး စစ်ကောင်စီဘက်မှ၇၃ဦးသေဆုံးကာ၇၅ဦးနှင့်အထက်ဒဏ်ရာရရှိခဲ့တယ်လို့ထုတ်ပြန်ထားသည်။

မြဝတီ-ကော့ကရိတ် အာရှလမ်းမကြီးအား ပြန်လည်စိုးမိုးထိန်းချုပ်နိုင်ရန် အင်အားဖြည့်တင်းလာသည့် အောင်ဇေယျစစ်ကြောင်းနှင့်ပြည်သူ့ကာကွယ်ရေးတပ်မတော်ဗျူဟာ၃၂၊ဗိုလ်ဒါဘောဦးဆောင်သောKNLAတပ်ရင်း၂၈ပူးပေါင်းစစ်ကြောင်းတို့နေ့စဉ်နီးပါထိတွေ့မှုဖြစ်ပွားနေပြီးစစ်ကောင်စီအထိနာနေသည်ဟုဆိုသည်။

ဒါ့အပြင် တော်လှန်ရေးပူးပေါင်းတပ်ဖွဲ့များမှ စစ်ကောင်စီ၏ရိက္ခာနှင့်စစ်ကူလာရာလမ်းကြောင်းလည်း ဖြတ်တောက်ထားသည်ဟုဆိုသည်။

အနန်းကွင်းစခန်းသို့ဝင်ရောက်ရန်ကြိုးစားနေသည့်စစ်ကောင်စီတပ်ကူစစ်ကြောင်းအား ပြည်သူ့ကာကွယ် ရေးတပ်မတော်၊ တောင်ပိုင်းစစ်ဒေသအထူးစစ်ဆင်ရေးအဖွဲ့(SOF)၊ နဂါးနီစစ်ကြောင်း၊ KNLAတပ်ရင်းများ နှင့်ရောင်နီဒရုန်းအထူးတပ်ဖွဲ့၊ Dawna Dragon၊Cloud Wingsဒရုန်းပူးပေါင်းအဖွဲ့များ ကြားဖြတ်တိုက်ခိုက် တားဆီးပိတ်ဆို့ရာ စစ်ကောင်စစ်တပ်ဖွဲ့များကျဆုံးမှုများပြားသဖြင့် စစ်ကောင်စီဘက်မှလေယာဉ် လက်နက်ကြီးပစ်ကူများဖြင့်အပြင်းအထန်စစ်ကူပေးနေသည်ဟုထုတ်ပြန်ထားသည်။

တိုက်ပွဲအတွင်းတော်လှန်ရေးပူးပေါင်းတပ်ဖွဲ့မှ ရဲဘော်၃ဦးကျဆုံးကာ ၁၅ဦးထိခိုက်ဒဏ်ရာရရှိခဲ့တယ်လို့ ဆိုပါသည်။

ပုံဟောင်းများ - တောင်ပိုင်းစစ်ဒေသအထူးစစ်ဆင်ရေးအဖွဲ့ SOF Column-1

04/01/2025

နှင်းမိုးကြားက ဆန္ဒပြပွဲ

မြန်မာ့အရေးမှာ ဝင်ရောက်စွပ်ဖက်နေတဲ့ တရုတ်အစိုးရအား ရပ်တန်းကရပ်ဖို့အမေရိကန်ရောက် မြန်မာ့အနုပညာရှင်များဦးဆောင်ပြီး ဇန်နဝါရီလ ၃ ရက် နေ့လည် ၂ နာရီတွင် ဝါရှင်တန်ဒီစီမြို့တွင် တရုတ်သံရုံးရှေ့သွားရောက်ဆန္ဒပြခဲ့ကြသည်။

အဆိုပါဆန္ဒပြ ပွဲသို့အဆိုတော်ရန်ရန်ချမ်း အဆိုတော်လင်းနစ် လီရို ကျော်သီဟ ထက်အောင်ရှိုင်နှင့်တေးရေးတေးဆို ကိုလင်းထက်တို့လာရောက်ခဲ့ကြသည်။

04/01/2025

မြန်မာပြည်သူများအပေါ်ထားရှိသည့် မိမိတို့၏ ကတိကဝတ်ကို အမေရိကန်ပြည်ထောင်စုကိုယ်စား ထပ်လောင်းအတည်ပြုဟု နိုင်ငံခြားရေးဝန်ကြီး အန်တိုနီ ဂျေ ဘလင်ကန် ဆို

၂၀၂၅ ဇန်နဝါရီ ၃

ဇန်နဝါရီ ၄ တွင် ကျရောက်သော ၇၇ကြိမ်မြောက် မြန်မာနိုင်ငံ၏လွတ်လပ်ရေးနေ့အခါသမယတွင် မြန်မာပြည်သူများအပေါ်ထားရှိသည့် မိမိတို့၏ ကတိကဝတ်ကို အမေရိကန်ပြည်ထောင်စုကိုယ်စား ထပ်လောင်းအတည်ပြုအပ်ပါသည်။

အမေရိကန်ပြည်ထောင်စုသည် မြန်မာနိုင်ငံနှင့် မိမိတို့၏ အနာဂါတ်ကို ကိုယ်တိုင်ပုံဖော်လိုကြသည့် မြန်မာပြည်သူများ၏ အခွင့်အရေးကို အစောဆုံးအသိအမှတ်ပြုသည့် နိုင်ငံများထဲတွင် ပါဝင်ခဲ့ပါသည်။ ဒီမိုကရေစီ၊ တည်ငြိမ်အေးချမ်းမှု၊ စီးပွားရေးတိုးတက်ဖွံ့ဖြိုးမှုနှင့် လူ့အခွင့်အရေးများကို ခံစားခွင့်ရရှိရေးအတွက် ကြိုးပမ်းအားထုတ်ရာတွင် မြန်မာပြည်သူများနှင့်အတူ တသားတည်းမိမိတို့ ရပ်တည်ပါသည်။

အကြမ်းဖက်မှုများကို အဆုံးသတ်ရန်၊ မတရားဖမ်းဆီးထိန်းသိမ်းထားသူများကို လွှတ်ပေးရန်၊ လူသားချင်းစာနာထောက်ထားမှုအကူအညီများ အဟန့်အတားမရှိပေးအပ်ခွင့်ပြုရန်နှင့် တိုင်းပြည်ကို အားလုံးပါဝင်နိုင်သည့် ဒီမိုကရေစီလမ်းကြောင်းပေါ်သို့ ပြန်လည်ပို့ဆောင်ပါရန် စစ်အာဏာရှင်အဖွဲ့အစည်းကို မိမိတို့ ဆက်လက်တောင်းဆိုပါသည်။

03/01/2025

ရင်ကွဲတောင်နှင့်တံတားကျိုးကြားတွင် DKBA ဗိုလ်ဘိဦးဆောင်အဖွဲ့သည် စစ်ကောင်စီတပ်သားသစ်များနှင့် သွားလာလှုပ်ရှားနေ

Salween Press
ဇန်နဝါရီလ ၃ ရက် ၂၀၂၅

ကရင်ပြည်နယ် ၊ကော့ကရိတ်မြို့ နယ် ရင်ကွဲတောင်နှင့်တံတားကျိုးကြားတွင် DKBA ဗိုလ်ဘိ ဦးဆောင်အဖွဲ့သည် စစ်ကောင်စီတပ်သားသစ်များနှင့် သွားလာလှုပ်ရှားနေသည်ဟု နယ်မြေခံစစ်ရေး သတင်းရင်းမြစ်ထံမှသိရသည်။

ကွဲနေသည့်ကရင်လက်နက်ကိုင်အဖွဲ့အစည်းများ ပြန်လည်စုစည်းပြီး တစ်ညီတစ်ညွတ်ထဲ တစ်ခုတည်း ပေါင်းစည်းကြဖို့ကြိုးစားနေချိန်တွင် အခုလို DKBA ဗိုလ်ဘိအဖွဲ့သည် စစ်ကောင်စီတပ်သားသစ်များနှင့် အတူ ပူးပေါင်းတာနဲ့ပတ်သက်ပြီး ပြည်သူကလည်းစိတ်တိုင်းမကျဖြစ်နေသည်ဟု သတင်းရင်းမြစ် ကဆိုပါတယ်။

ပြည်သူရဲ့အသက်အိုးအိမ်စည်းစိမ်အပြင် ကိုယ့်ဒေသ၊ကိုယ့်လူမျိုး အသက်အိုးအိမ်စီးစိမ်များ ကိုကာကွယ်သွားမယ်လို့ကြွေးကျော်ခဲ့သည့်ခွဲထွက် DKBA ဗိုလ်ဘိဦးဆောင်အဖွဲ့သည် KNU တပ်မဟာ၆နယ်မြေတွင်စစ်ကောင်စီတပ်အတွက်လုံခြုံရေးယူနေသည်ဟု ဒေသခံထံမှသိရသည်။

“ဗိုလ်ဘိအဖွဲ့က စစ်ကောင်စီတပ်သားသစ်နဲ့ပေါင်းနေတာ။ သူတို့အဖွဲ့က စစ်ကောင်စီဆီကလည်း လစာရနေတယ်လေ။ စစ်ကောင်စီနဲ့ပေါင်းတော့ ပြည်သူတွေကတော့သိပ်မလိုလားဘူးပေါ့။ ကရင်မှာကွဲနေတဲ့အဖွဲ့များနေတာ့ ပြည်သူတွေမကြိုက်ဘူးပေ့ါ။ သူ (ဗိုလ်ဘိ) က ပြည်သူတွေ မထိခိုက်စေရဘူးပြောပေမဲ့ ကျောင်း၀င်းထဲစခန်းဆောက်ခဲ့တာလည်း ပြည်သူတွေမလိုလားဘူးလေ” ဟု ဒေသခံတစ်ဦးကပြောပါတယ်။

“အခုလည်း ရင်ကွဲတောင်နှင့်တံတားကျိုးကြားတွင် စစ်ကောင်စီတပ်သားသစ်များနဲ့ DKBA ဗိုလ်ဘိအဖွဲ့တို့ပူးပေါင်းပြီးသွားလာမှုများရှိနေတာကို ပြည်သူတွေမလိုလားဘူး။ လုံခြုံရေး အတွက်လှုပ်ရှားမှုရှိနေတယ်။ အတူတူရှေ့တန်းထွက်တာတော့မဟုတ်သေးဘူး” ဟု အဆိုပါဒေသခံကပြောပါတယ်။

DKBA ဗိုလ်ဘိအဖွဲ့သည် ဝင်းဒယိုင်ဂိတ်စခန်းကို အရပ်သားနေထိုင်သည့်ရွာရဲ့ ကျောင်း၀င်းထဲမှာ တိုးချဲ့ဆောက်လုပ်ခဲ့သည့်အတွက် ဒေသခံပြည်သူလူထုတွေစိတ်အနှောက်အယှက်ဖြစ်စေခဲ့သည်။

အဲ့ဒီလို ကျောင်းဝင်းထဲမှာ ဂိတ်စခန်းတိုးချဲ့ဆောက်လုပ်တဲ့အတွက် ကလေးသူငယ်များအတွက် ပညာရေးထိပါးနှေက်ယှက်အဟန့်အတားဖြစ်စေတယ်လို့ဒေသခံများပြောဆိုခဲ့ပါသည်။

ပုံဟောင်းများ - ဗိုလ်ဘိနှင့်သူဦးဆောင်သည့်အဖွဲ့များ (Photos: CJ)

03/01/2025

ရခိုင်နှင့် ဧရာဝတီကြားရှိ ဗေဒါစစ်ဆေးရေးကို AA ထိုးစစ်ဆင် တိုက်ခိုက်နေ
စစ်ကောင်စီက ဂျက်ဖိုက်တာတွေနဲ့ ဗုံးကြဲတိုက်ခိုက်တုံ့ပြန်

Salween Press
ဇန်နဝါရီလ ၃ ရက် ၂၀၂၅

ရခိုင်ပြည်နယ် ဂွမြို့နယ်နှင့် ဧရာဝတီတိုင်းဒေသ ငသိုင်းချောင်းမြို့နယ်တို့ကြားရှိ စစ်ကောင်စီ၏ ဗေဒါစစ်ဆေးရေးဂိတ်အား အာရက္ခတပ်တော် AA က ပူးပေါင်းတပ်ဖွဲ့များဖြင့် ထိုးစစ်ဆင်တိုက်ခိုက်နေကြောင်း သိရသည်။

ယမန်နေ့ ဇန်နဝါရီလ ၂ ရက်နေ့ မွန်လွဲပိုင်းကစ၍ နှစ်ဖက်တိုက်ပွဲ ဖြစ်ပွားနေကြကြောင်း ဂွမြို့ခံတစ်ဦးက ပြောသည်။

ဂွမြို့ခံတစ်ဦးက "မနေ့က မွန်းလွဲပိုင်းမှာ ဗေဒါဂိတ်ကို AA က PDF တွေနဲ့ ဝင်ရောက်စီးနင်းတယ်လို့ သိရပါတယ်။ တိုက်ပွဲ ဒီနေ့အထိ နှစ်ဖက်တိုက်ပွဲ ပြင်းထန်နေကြပါတယ်။ စစ်ကောင်စီက ဂျက်ဖိုက်တာတွေနဲ့ ဗုံးကြဲတိုက်ခိုက်နေပါတယ်။ ရေကြည်နဲ့ ငါးသိုင်းချောင်းဘက်တွေက လက်နက်ကြီးတွေနဲ့လည်း ပစ်ခတ်တာတွေရှိတယ်” ဟု ပြောသည်။

ဗေဒါစစ်ဆေးရေးဂိတ်များအပါအဝင် ဧရာဝတီတိုင်းနှင့် ဂွမြို့နယ်တို့ကြားရှိ စစ်ကောင်စီ၏ စစ်စခန်းများကနေ စစ်ကောင်စီသည် ဂွမြို့သို့ ပြန်လည်စစ်မချီနိုင်စေရန် အာရက္ခတပ်တော် AA က တိုက်ခိုက်နေခြင်းဖြစ်ကြောင်း စစ်ရေးသုံးသပ်သူတစ်ဦးက ပြောသည်။

"AA က ဒီဗေဒါစစ်ဆေးရေးဂိတ်တစ်ခုတည်းမဟုတ်ဘဲ တခြားသော ဂိတ်တွေ၊ စစ်စခန်းတွေကို တိုက်ခိုက်နိုင်ပါတယ်။ မဟုတ်ဘူးဆိုရင် စစ်ကောင်စီဟာ ဧရာဝတီတိုင်း မြို့နယ်တွေကတစ်ဆင့် နယ်စပ်မြို့တွေ အဲကတစ်ဆင့် ဂွမြို့ကို ရောက်လာနိုင်ပါတယ်။ ဒီလိုမဖြစ်အောင် ဧရာဝတီတိုင်းက PDF တွေနဲ့ ရှင်းစရာရှိတာ ရှင်းထားတဲ့ သဘောပေါ့” ဟု ပြောသည်။

ဗေဒါစစ်ဆေးရေးဂိတ်သည် ဧရာဝတီတိုင်း-ရခိုင် ရိုးပေါ်က အစစ်အဆေးအကြမ်းဆုံးသော စစ်ကောင်စီ၏ ဂိတ်တစ်ခုဖြစ်ပြီး ရခိုင်လူငယ်ရာနှင့်ချီကို ဖမ်းဆီးခဲ့သည့် ဂိတ်လည်းဖြစ်သည်။

အာရက္ခတပ်တော် AA သည် ရခိုင်နှင့်ပဲခူးအစပ်ရှိ တောင်ပုံကြီးစစ်ဆေးရေးဂိတ်ကိုလည်း ဇန်နဝါရီလ ၁ ရက်နေ့က ထိုးစစ်ဆင်တိုက်ခိုက်ခဲ့ပြီး နှစ်ဖက်တိုက်ပွဲ ယနေ့အထိ ပြင်းထန်နေဆဲဖြစ်သည်။

ပုံဟောင်း - စစ်ကောင်စီတပ်နှင့် ဂျက်ဖိုက်တာများ

03/01/2025

လူငယ်များ၏အနာဂတ်ကို ရိုက်ချိုးလိုက်သည့် စစ်မှုထမ်းဉပဒေ

စစ်မှုထမ်းဉပဒေအောက်က အိမ်ပြေးများ Salween Press ဇန်န၀ါရီ ၃ ရက်၊ ၂၀၂၅အာဏာသိမ်းစစ်တပ်က စစ်မှုထမ်းဉပဒေပြဌာန်းလိုက်ပြ....

03/01/2025

အာရှလမ်းပိုင်းတွင် စစ်ကောင်စီစစ်ကြောင်းအတွက်ဒရုန်းဖြင့်ရိက္ခာပို့နေရ၊
ကျုံဒိုးက ဇိနမာရ်ဘုန်းကြီးကျောင်းတွင် အငြိမ်းစားအရာရှီ ၈ ဦးခိုလုံပြီး လုံခြုံရေးအတွက် စနိုက်ပါသမားတစ်ဦးထားရှိ

အောင်လေး ၊ Salween Press
ဇန်နဝါရီလ ၃ ရက် ၊ ၂၀၂၅

ကော့ကရိတ်အာရှလမ်းပိုင်းတွင် တိုက်ပွဲနေ့စဉ်ပြင်းထန်နေပြီး တော်လှန်ရေးပူးပေါင်းတပ်များဘက်မှ ရိက္ခာလာရာလမ်းကြောင်းများအားပိတ်ဆို့ဖြတ်တောက်ထားမှုကြောင့် စစ်ကောင်စီတပ်သားများအတွက် ထမင်းထုပ်နှင့်ရိက္ခာများကို ‌စစ်ကောင်စီဘက်မှဒရုန်းဖြင့်ပို့ဆောင်ပေးနေရတယ်လို့ နယ်မြေခံစစ်ရေး သတင်းရင်းမြစ်ထံမှသိရသည်။

“တိုက်ပွဲတော့နေ့စဉ်ဆက်လက်ပြင်းထန်နေဆဲဘဲ။ ထိုးစစ်ဆင်လာတဲ့စစ်ကြောင်းအတွက်ရိက္ခာပြတ်လပ်နေ တော့ ထမင်းထုပ်နှင့်အခြားရိက္ခာခြောက်တွေကို ဒရုန်းဖြင့်ပို့ဆောင်နေရတယ်။ တော်လှန်ရေးပူးပေါင်းတပ် ဖွဲ့က လမ်းကြောင်းပိတ်ဆို့ဖြတ်တောက်ထားလို့ သူတို့ပို့ဖို့ကလည်းခက်နေတယ်” ဟု အဆိုပါသတင်းရင်း မြစ်ကပြောပါတယ်။

ဒါ့အပြင်စစ်ကောင်စီတပ်သားအချို့လည်း တော်လှန်ရေးတပ်ဖွဲ့ထံတွင် လာရောက်ပူးပေါင်းတာရှိသလို ထွက်ပြေးသူတချို့လည်းရှိနေတယ်လို့ဆိုပါတယ်။ အောင်ဇေယျ စစ်ကြောင်းမှ လက်နက်ခဲယမ်းနှင့်အတူ လာရောက်ပူးပေါင်းလာသော စစ်ကောင်စီတပ်သားများကိုလည်း သည် တော်လှန်ရေးတပ်ဖွဲ့က ကြိုဆို ထောက်ခံပြီး ထောက်ပံ့ငွေများလည်းပေးအပ်သည်ဟု ကေအဲန်ယူ−ဗဟိုကသတင်းထုတ်ပြန်ထားသည်။

လက်ရှိတွင် စစ်ကောင်စီတပ်သည် လက်နက်များပြောင်းရွေ့မှုလုပ်ဆောင်နေပြီး ကော့ကရိတ် ၉၇တပ်မှ လှိုင်ဝဘက်သို့လက်နက်ခဲယမ်းများပြောင်းရွေ့ထားသလို ကော့ကရိတ်မှကျုံဒိုး ၅၄၅ တပ်တွင်းသို့ လက်နက်များပြောင်းရွေ့ထားသည်ကိုထပ်မံသိရှိရသည်။

ဒါ့အပြင် ကျုံဒိုး ၅၄၅ တပ်နှင့်ကပ်လျှက်ရှိသည့် ဇိနမာရ်ဘုန်းကြီးကျောင်းတွင် စစ်ကောင်စီအငြိမ်းစား ဆေးဗိုလ်ကြီး ၆ ဦးနှင့် အခြားအဆင့်အငြိမ်းစား ၂ ဦး စုစုပေါင်း ၈ ဦးခိုလုံနေထိုင်ပြီး ဘုန်းကြီးကျောင်း ဝင်ပေါက် ၂ ထပ်ကျောင်းဆောင်တွင် ၄င်းတို့လုံခြုံရေးအတွက် စနိုက်ပါသမားတစ်ဦးထားရှိသည် ဟု သတင်းရင်းမြစ်ကဆိုပါတယ်။

ဒါ့အပြင် ရင်ကွဲတောင်နှင့်တံတားကျိုးကြားတွင်လည်း စစ်ကောင်စီတပ်သားသစ်များနှင့်အတူ DKBA ဗိုလ်ဘိဦးဆောင်အဖွဲ့တို့ လှုပ်ရှားသွားလာမှုများရှိသည်ဟုဆိုပါသည်။

တော်လှန်ရေးပူးပေါင်းတပ်ဖွဲ့များကလည်း စစ်ကောင်စီတပ်စခန်းများနှင့် တပ်စွဲထားသောနေရာများအား ဒရုန်းများဖြင့်တိုက်ခိုက်လာ၍ စစ်ကောင်စီတပ်များ တပ်ဖြန့်ထားမှုများလုပ်ဆောင်နေတာဖြစ်သည်ဟု သတင်းရင်းမြစ်ကဆိုသည်။

ပုံဟောင်းများ

02/01/2025

မြန်မာအနုပညာရှင်များ တရုတ်အစိုးရကို ဆန္ဒပြမည်

အမေရိကရောက် မြန်မာ့အနုပညာရှင်များဦးဆောင်ကာ တရုတ်အစိုးရအား ဆန့်ကျင့်ဆန္ဒပြပွဲအား ဇန်နဝါရီလ ၃ ရက်နေ့ ဒေသစံတော်ချိန် နေ့လည် ၂ နာရီတွင် ဝါရှင်တန်ဒီစီမြို့ တရုတ်သံရုံးရှေ့တွင်ပြုလုပ်မည်ဖြစ်ကြောင်း သတင်းရရှိသည်။

Video Credit: Yan Yan Chan FB

02/01/2025

NUG အစိုးရအဖွဲ့မှ ဝန်ကြီးချုပ် မန်းဝင်းခိုင်သန်း သည် KNU တပ်မဟာ ၆ နယ်မြေတွင် တိုက်ပွဲဝင်နေသော ဗျူဟာ ၃၂ မှ စစ်ဆင်ရေးမှူး ဗိုလ် ဒါဘော အား ဇန်နဝါရီ ၂ ရက်နေ့က သွားရောက် တွေ့ဆုံခဲ့သည့်မြင်ကွင်းများ။

02/01/2025

ငြိမ်းချမ်းရေးကမ်းလှမ်းနေကြသော်လည်း စစ်တွေ၊ ကျောက်ဖြူ၊ အမ်းနှင့် တောင်ကုတ်မြို့တို့တွင်ပစ်ခတ်တိုက်ခိုက်မှုဆက်ရှိနေ

Salween Press
ဇန်နဝါရီလ ၂ ရက် ၊ ၂၀၂၅ ခုနှစ်

အာရက္ခတပ်တော် AA နှင့် အာဏာသိမ်း စစ်ကောင်စီတို့မှာ အပြန်အလှန် ငြိမ်းချမ်းရေးကမ်းလှမ်း နေကြသော်လည်း ရခိုင်ပြည်အတွင်း ပစ်ခတ်တိုက်ခိုက်မှုက ဆက်လက်ရှိနေသေးကြောင်းသိရသည်။

စစ်ကောင်စီနှင့် AA တို့မှာ စစ်ရေးပဋိပက္ခကိုချုပ်ငြိမ်းပြီး နိုင်ငံရေးနည်းလမ်းဖြင့် ဖြေရှင်းဆောင် ရွက်ရန် နှစ်ဖက်စလုံးက အသီးသီးထုတ်ပြန်ထားကြသည်။

သို့သော်လည်း စစ်တွေ၊ ကျောက်ဖြူ၊ အမ်းနှင့် တောင်ကုတ်မြို့တို့တွင် ပစ်ခတ်တိုက်ခိုက်မှုက ဆက်လက်ရှိနေသေးကြောင်းနှင့် နှစ်ဖက်စလုံးက ထုတ်ပြန်ချက်အတိုင်းသာ ထားရှိကြကြောင်း သိရသည်။

စစ်တွေဒေသခံတစ်ဦးက "အပေါ်မှာတော့ ဘယ်လိုဖြစ်နေလဲတော့ မသိဘူး။ ငြိမ်းချမ်းရေးယူလား မယူဘူးလားတော့ မသိဘူး။ ဒီမှာ‌ မြေပြင်မှာတော့ နှစ်ဖက်အပြန်အလှန် ပစ်ခတ်နေကြတာပဲ။ ပါဒလိတ်၊ တောကန်၊ အမြင့်ကျွန်း စတဲ့ ရွာတွေဘက်မှာ နှစ်ဖက် လက်နက်သံတွေ ကြားနေရတယ်။ အေအေက ကျောက်တန်းဂိတ်ကို စတင်တိုက်ခိုက်ကတည်းက နာရီပိုင်းခြားတိုက်ပွဲတွေ ဒီနေ့လည်း ဖြစ်ကြပါတယ်" ဟု ပြောသည်။

ယမန်နေ့ ဇန်နဝါရီလ ၁ ရက်နေ့က ကျောက်ဖြူမြို့နှင့် တောင်ကုတ် ရိုးတောင်ပေါ်တွင် စစ်ကောင်စီနှင့် AA တို့ တိုက်ပွဲဖြစ်ပွားကြကြောင်း ရခိုင်ဒေသခံတစ်ဦးက ပြောသည်။

"မနေ့က ကျောက်ဖြူ အမှတ် ၃၂ ရဲတပ်ရင်းက ပစ်ခတ်သံတွေကြားရတယ်။ အေအေ က လက်နက်ကြီးနဲ့ပစ်ခတ်လို့ စစ်ကောင်စီဘက်ကလည်း ပြန်ပစ်ခတ်တာလို့ ပြောကြတယ်။ ထိခိုက်မှုတွေကတော့ အတည်ပြုဖို့ နည်းနည်းခက်နေတယ်။ ဒေသခံတွေကတော့ စိုးရိမ်နေကြတာပေါ့။ တိုက်ပွဲမဖြစ်ဘဲ ပြီးသွားစေချင်ကြတာ" ဟု ပြောသည်။

ရခိုင်ရိုးမတောင်ပေါ် တောင်ကုတ်-ဥသျှစ်ပင်လမ်းရှိ ရခိုင်ဧရိယာထဲက စစ်ကောင်စီ၏ တောင်ပုံကြီး စစ်စခန်းကို အာရက္ခတပ်တော် AA က ထိုးစစ်ဆင်တိုက်ခိုက်နေ၍ နှစ်ဖက်တိုက်ပွဲမှာ ပြင်းထန်နေကြသည်။

ယင်းအပြင် အာရက္ခတပ်တော် AA က ၂၀၂၄ ခုနှစ်၊ ဒီဇင်ဘာလ ၂၉ ရက်နေ့က စစ်ကောင်စီကို ငြိမ်းချမ်းရေးကမ်းလှမ်းခဲ့ပြီးနောက် ဒီဇင်ဘာလ ၃၁ ရက်နေ့တွင် စစ်ကောင်စီလေကြောင်းက ပုဏ္ဏားကျွန်းမြို့နယ်ကို ဗုံးကြဲတိုက်ခိုက်ခဲ့သည်။

စစ်ကောင်စီ ဗုံးကြဲတိုက်ခိုက်မှုကြောင့် သေဆုံးသူ ၅ ဦးအထိရှိခဲ့ပြီး ဒဏ်ရာရရှိသူ ၁၀ ဦးထက်မနည်းရရှိခဲ့ကြသည်။ ထိုအခြေအနေသည် စစ်ခေါင်းဆောင်မင်းအောင်လှိုင်၏ အပြောသက်သက်သာဖြစ်ပြီး လက်တွေ့မဆန်သော လုပ်ရပ်ဟု အမည်မဖော်လိုသည့် ရခိုင်နိုင်ငံရေးသမားတစ်ဦးက ပြောသည်။

"စစ်ခေါင်းဆောင် မင်းအောင်လှိုင်ကတော့ အပြောတမျိုး အလုပ်တမျိုးပါပဲ။ သူလည်း နိုင်ငံရေးနည်းနဲ့ ဖြေရှင်းဖို့ ခေါ်နေတာပဲ။ ဒီဘက်ကလည်း တော်လှန်ရေးဘက်ကလည်း နိုင်ငံရေးနည်းနဲ့ ဆွေးနွေးဖို့ အသင့်ပဲလို့ ပြောထားတာပဲလေ။ အဲဒါကို လာပြီးဗုံးကြဲတော့ စစ်ရေးနည်းနဲ့ ဖြေရှင်းရအောင် ပြောလိုက်တာပဲလေ။ ဆိုတော့ ဘယ်တော့မှ ယုံကြည်မှုတည်ဆောက်လို့ရမယ့် အဖွဲ့အစည်း လူပုဂ္ဂိုလ်မဟုတ်တော့ဘူးဆိုတာကို သက်သေပြလိုက်တာပဲ။ အပြောတမျိုးအလုပ်တမျိုးနဲ့ ဘယ်လိုမှ နိုင်ငံက ငြိမ်းရေးတည်ဆောက်လို့ ရမှာမဟုတ်ဘူး" ဟုဆိုသည်။

အာရက္ခတပ်တော် AA သည် ပလက်ဝမြို့အပါအဝင် ရခိုင်ပြည်နယ်ထဲက မြို့ ၁၅ ခုကို အာဏာသိမ်း စစ်ကောင်စီထံမှ သိမ်းပိုက်ထားပြီး ရခိုင်ပြည်နယ်တွင် စစ်တွေ၊ ကျောက်ဖြူနှင့် မာန်အောင်မြို့တို့သာ ကျန်ရရှိတော့သည်။

အာဏာသိမ်း စစ်ကောင်စီက ကျောက်ဖြူရေတပ်နှင့် စစ်တွေရေတပ်တို့တွင် စစ်အင်အား၊ လက်နက်အင်အားများကို ပိုမိုဖြည့်တင်းထားကာ စစ်ရေးပြင်ဆင်မှုများ ပြုလုပ်လျှက်ရှိကြောင်း သတင်းရင်းမြစ်များက ပြောဆိုကြသည်။

ပုံဟောင်းများ (Photos: AA Info Desk)

02/01/2025

စစ်မှုထမ်းဉပဒေအောက်က အိမ်ပြေးများ

Salween Press
ဇန်န၀ါရီ ၂ ရက်၊ ၂၀၂၅

အာဏာသိမ်းစစ်တပ်က စစ်မှုထမ်းဉပဒေပြဌာန်းလိုက်ပြီးနောက်ပိုင်း ပြည်ပကို ရရာနည်းလမ်းပေါင်းစုံနဲ့ ထွက်ပြေးတိမ်းရှောင်ကြတဲ့ မြန်မာလူငယ်တွေနဲ့ သူတို့ရဲ့ ကိုယ်စီကိုယ်စီ အခက်အခဲတွေ၊ အဆင်မပြေမှု တွေကပဲ သူတို့ကို ဝိုင်းရံပိတ်ဆို့နေပေမယ့် ဒီလမ်းကိုပဲ တခုတည်းသော ရွေးချယ်စရာအနေနဲ့ လျှောက်လှမ်းနေရတဲ့ အကြောင်းအရာတွေ၊ ဒါတွေကို အခုရုပ်သံဗီဒီယိုအထဲမှာ ကြည့်ရှုရမှာဖြစ်ပါတယ်။