05/05/2024
【 #孖八生活 加拿大生活之 好多人問：做咩咁睇唔開？】
是咁的，三個月無見，孖八已經離開咗是非之地，去咗加拿大落地生根。
其實，well，搵工嚟講都幾感恩，我哋兩個比好多人好彩，半個月已經搵到工，一個月我哋兩個都轉咗一次工，雖然我哋兩個都係西工、西腦細，但都總算叫託賴。
嚟到最得意嘅係好多同事、甚至係早過我去嘅人都問我：「做咩咁睇唔開嚟呢度啊？」😂
問嘅大多係過咗嚟五、六年嘅中年人，以及一個同孖八一樣年達三十歲嘅中年女子，我諗咗一諗，我就掉返轉頭問佢哋：「你覺得香港好好咩？」然後，佢哋就羅列咗好多香港好方便啊、落街有超市有嘢食、夜晚唔怕無地方去、搵錢多啲同輕啲稅之類嘅原因。
然後，我再問佢哋：「咁點解你哋嗰時要過嚟嘅？」佢哋靜默咗一陣，然後不約而同地話：「中伏囉！」咁中伏嘅原因就當然係樓上羅列原因嘅相反。我思考咗一思考，發現呢個係心理準備嘅問題，譬如你去到一個國家，我都預咗要重新嚟過，無可能可以做返完全一樣嘅工作（我算託賴係差不多但都差十幾個Grade），所以人工差距喺我眼中好似無咁大問題，甚至乎我覺得當比次機會自己向外發展都不錯。
至於其他，可能因為喺其他地方習慣晒，甚至乎最為人詬病嘅係加拿大嘅慢節奏，我都已經喺LA同墨西哥俾人Train慣咗，暫時嚟講我係覺得舒服過香港添。講真，你能夠習慣墨西哥人同你講「Ahorita（轉頭先）」，習慣返一、兩年，你真係唔會再覺得任何地方慢😂 😂。
不過說到底，都係心理準備有冇做好嘅問題，阿中年女子朋友E上年到埗，已經喊晒口話要返香港，話呢度太落後，老老豆豆，我都覺得係嘅，我甚至可以話加拿大仲落後個墨西哥。不過，既來之，則安之啦，揀得呢度落地生根，吃盡奶力、咬到出牙血都要忍落去，呢個係我嘅睇法。
嚟緊過嚟嘅朋友，共勉之！
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
喜歡嘅，幫手撳完 Like，記得要撳埋 See First，唔要你一毫子，只需你小小嘅支持，謝謝。
