MyatMin Thuya Kyaw - Electrical Story (2026)

14/09/2024

ယနေ့ မီတာယူနစ်တွေ အတွက်ပျှမ်းမျှ နှုန်းထားလေးတွေပါ။

30/03/2024

Air-condition များ နွေရာသီ အအေး temperature setting
*******************************************************
ကျန်းမာရေး စွမ်းအင်ချွေတာရေး ကြာရှည် အသုံးပြုနိုင်ရေး
=====================================

အခုတော်တော် များများတွေ့နေရတာ သတိထားမိတာ ကတော့ air-condition ကို room temperature setting တွေ ကို တွေ မှာ တခါတလေ အနိမ့်ဆုံးတွေ ချထားပြီး အဲကွန်းကို အရမ်းအေးအောင် လုပ်ထားတာတွေ့ပါတယ် ။ အများအားဖြင့် ရုံးတွေ super market , စားသောက်ဆိုင်တွေ မှာပါ ။ setting ကို 16, 18 ကိုတွေ့နေရပါတယ်။ လူတွေ တနေကုန် အလုပ်လုပ် ၀င်ရတဲ့ တဲ့နေရာတွေ ဆို အပူ အအေးပြောင်းလဲ မှု အရမ်းခြား နားရင် ပြသနာရှိပါတယ် ။လေဖြတ်တယ်ဆိုတာ အဲဒါတွေ ကစတာပါ။ အရမ်းအေးနေတဲ့ နေရာကနေ ပူနေတဲ့နေရာ အရမ်းပူနေတဲ့ နေရာကနေ အရမ်းအေးတဲ့ နေရာ ကို ၀င်တဲ့ အခါတွေပေါ့ ။တချို့ကလဲ အရမ်းပူနေတာကနေ အရမ်းအေးတဲ့ နေရာကို ၀င်ရတာ သဘောကျတယ်။စိမ့်နေတာပဲ ဆိုပေမဲ့ ခန္တာကိုယ် မှာထိခိုက်သွားတာ မသိလိုက်ဖူး။
လူတွေ အတွက် ပြသနာ ရှိတော့ HVAC course တွေ မှာ summer တွေမှာ aircon setting ချိန်တဲ့ formula ရှိပါတယ်။
အခန်းရဲ့ ပြင်ပ အပူချိန် ထဲ ကနေ လေး နုတ် ရတာကို နှစ်နဲ့စား နောက် တစ်ဆယ်ပေါင်း ရင် setting လုပ်ရမဲ့ အခန်း temperature ကို ရပါမယ်။
ဥပမာ အပြင် အပူချိန်က ၃၆ ဒီဂရီ ရှိရင် 36-4 = 32 ကို ၂ နဲ့စား 16 အဲဒါကို ၁၀ ပေါင်း 26 ဒီဂရီ ရပါတယ်။ အဲတော့ အခန်း အပူချိန် ကို ၂၆ ဒီဂရီ setting ထား ရပါတယ်။ အဲတော့ ကျန်းမာရေး အတွက် ၂၅ ဒီဂရီ အောက်ကို မရှိသင့်ပါဖူး။ အပြင်မှာက အခုဆိုရင် ၄၀ ဒီဂရီ နီးပါးရှိနေပါတယ်။
နောက်ဆုံး ကတော့ အကြံပေးတာကမြန်မာပြည်မှာ လူနေ ခန်းများ အတွက် ပူတဲ့ အခါ ၂၅ ဒီဂရီထက် နိမ့် မထားဖို့ပါပဲ ။ အပြင်ထွက်တဲ့ အခါ ပြသနာရှိပါတယ်။
အခုတွေ့နေရတာ ပူရင် အဲကွန်းကို temperature ၁၈။ ၁၆ တွေ ချိန်ထားတာတွေ့တယ်။ မချိန်ရပါဖူး ။ တချိ့hotel တွေ မှာလဲတွေ့ပါတယ်။ လာတည်းတဲ့ ဧည့်သည်က ပြန်မချိန်တတ်ရင် ဒုက္ခ ရောက်နိုင်ပါတယ်။ မအေးတာ က aircondition နဲ့ပဲဆိုင်ပါတယ်။ ။ နောက်လိုတာထက်ပို အေးတာက ပိုက်ဆံလဲပိုကုန်တယ်။ စွမ်းအင် အတွက် ကမ္ဘာကြီး ကိုလဲ ဒုက္ခ ပေးတယ်။ ခန္တာ ကိုယ်ကိုလဲ ဒုက္ခပေးပါတယ်။

( မှတ်ချက် လူနေ အခန်းများအတွက် သက်သာသော room temperature setting ကို ရေးသားခြင်း ဖြစ်ပါသည်။ technical ခန်း များအတွက် မဟုတ်ပါ)

ကျေးဇူးတင်ပါသည် ။
Kyaw Oo
E & I engineering

07/03/2024

အဝေးကအနမ်း ရဲ့ video လေးပါ။

https://www.facebook.com/share/p/FbXPPiPXJpkZf4c6/?mibextid=Nif5oz

07/12/2023

အိမ်ရှင်မတွေကို ခဏ ခဏ ဒုက္ခပေးတဲ့ သုံးမိနစ် ရေ‌‌နွေးအိုး

ညီကိုမောင်နှမတွေ ကြုံဖူးကြမှာပါ။သုံးမိနစ်ရေနွေးအိုး တည်ပြီဆိုရင် မီးနီလေးမလင်းလို့ ရေနွေးအိုးတည်မရတာ။ တစ်ခါတစ်ခါဆိုလဲ ကောင်းလိုက် မကောင်းလိုက်နဲ့ ကိုယ့်ကိုပဲ သရဲခြောက်နေသလို ဘာလိုလိုနဲ့ ။ဒီvideo လေးကတော့ ဖြစ်တတ်တာလေးကို ကျနော်သိသလောက်လေး ပြန်လည်ဝေမျှထားတာပါ။

28/11/2023

ရှာပုံတော်
********

မီးအလုပ်စ စပြီးလုပ်တဲ့ကျ နော်ဟာ လုပ်ငန်း
သုံး ပစ္စည်း အခေါ် အဝေါ် တွေကိုတောင်
ကောင်းကောင်း နားမလည်သေးပါဘူး။
စီနီယာ အကိုတွေက screw driver star ယူပေး
စမ်း။ screw driver မိုင်းနပ် ယူပေးစမ်း။
Pipe cutter, cable cutter စတဲ့ အခေါ်အဝေါ်
တွေနဲ့ ပစ္စည်းနဲ့က တွဲပြီး မမြင်တတ်သေးပါဘူး။

ပစ္စည်းလိုအပ်လို့ ကျနော်ကိုယူခိုင်းရင် တလွဲတွေ
ချည်းပါပဲ။ လုပ်ငန်းကို နားမလည် မကျွမ်းကျင်
တဲ့ ကျ နော်နဲ့ဆို ဘယ်သူကမှ အလုပ်အတူ
မလုပ်ချင်ကြပါဘူး။

ကျ နော်တို့ လုပ်ငန်းသဘာဝကလည်း စက်ရုံ
တစ်ရုံမှာ အထိုင်ထားပြီး လုပ်နေစဉ် စက်ရုံ
သူဌေးကနေပြီး သူနဲ့ပတ်သတ်ရာ အိမ်တွေကို
မီးဆင်ခိုင်းတာတို့ ဟိုဘရေကာကျ လို့ ဟိုမီး
လုံးမလာလို့ စတဲ့ အလုပ်တွေအတွက် အခေါ်
ရှိပြီဆိုရင် ဆိုင်ရာ ဆိုင်ရာတွေကို လူတွေခွဲပြီး
သွားလေ့ရှိပါတယ်။

အဲဒီလို လူခွဲကြပြီဆိုရင် ကျနော့ကိုဘယ်သူမှ
မခေါ်ချင်ကြပါဘူး။ ဒီကောင့်ကို မင်းတို့ မခေါ်
ကြရင်လဲ ငါပဲ ခေါ်သွားတော့မယ်ဆိုပြီး ဆရာ
ကပဲ သူနဲ့အတူ ခေါ်သွားလေ့ရှိပါတယ်။
ဒီလိုနဲ့ ကျနော်ဟာ ဆရာနဲ့ အမြဲလိုလို တွဲလုပ်
ခဲ့ရပါတယ်။

အမှန်ပြောရရင် ကျနော်တို့ တစ်ဖွဲ့လုံးက ဆရာ့ကို ကြောက်ကြတယ်။ အလုပ်ထဲကို ဆရာမလာ
သေးတဲ့အချိန်ဆို လုပ်ကြကိုင်ကြတာ သူ့ဘာသာသူ အဆင်ကိုပြေနေတာပါပဲ။ အဲ ဆရာ များရောက်လာပြီဆိုလို့ကတော့ ပျာယာ
ခက်ပြီး ဘာလုပ်ကြရမှန်းမသိကြတော့ပါဘူး။
အဲဒီတော့ ဆရာနဲ့ဆိုရင် မလွတ်လပ်လို့ ဘယ်သူမှ တွဲမလုပ်ချင်ကြဘူး။ ကျနော်ဆို ပိုဆိုးတာ
ပေါ့ဗျာ၊ လုပ်ငန်းက နားမလည် ဆရာ့ကို
ကြောက်ကလဲကြောက်နဲ့ အလုပ်ကနေပြေး
ချင်စိတ်က ခဏခဏ ပေါ်တတ်ပါတယ်။
ဒီလိုမျိုးနဲ့ ဆရာနဲ့အတူတွဲပြီး အလုပ် လုပ်ချိန်တွေ
များခဲ့တယ်ပေါ့ဗျာ။

ဒီနေ့လည်း စက်ရုံတစ်ရုံက control တွေ မကပ်
လို့ လှမ်းခေါ်ပါတယ်။ ဟိုရောက်တော့ ဆရာ
လည်း pannel ကိုဖွင့်ပြီး စစ်တော့တာပေါ့။
Control မကပ်ဘူးဆိုမှတော့ ကိုယိ့ဆရာတို့လဲ
သိတာပဲဗျာ control power ကို အရင်စစ်မှာပေါ့
ဒါနဲ့ ဆရာက စစ်နေတုန်း ကျနော်က test lamp
လေးအမြန်လုပ်နေတာပေါ့။ ကျနော်တို့ Neutral
တွေရောက်မရောက်စစ်ဖို့က သူနဲ့စစ်ရတာလေ သူနဲ့ထောက်ကြည့်လို့ မီးလုံးလင်းရင် neutral
ရောက်တယ်ပေါ့ဗျာ။ သိတယ်မဟုတ်လား
ကျနော်ရဲ့ လုပ်ကွက်မြင်ပုံက။

မင်းဘာလုပ်နေတာလဲ လှမ်းမေးပါတယ်။
ဆရာ Neutral စမ်းရင် အဆင်သင့်ဖြစ်အောင်
လို့ပါဆရာ ဆိုတော့ မလိုဘူးဟေ့ကောင်
Neutral ကို multi metre နဲ့စမ်းလို့ရတယ်။
ဒီမှာကြည့်ဆိုပြီး မီတာကို ဗို့မှာလှည့်ထားပြီး
test pin တစ်ချောင်းကို phase မှာ ထောက်
လိုက်ပါတယ် နောက်တစ်ချောင်းကို သူ့လက်နဲ့
ကိုင်လိုက်ပါတယ်။
တွေ့လား ဗို့ ဘယ်လောက်ရှိလဲလို့ ကျနော့ကို
မေးပါတယ်။ 180v လောက်ရှိတယ်ဆရာ။
အေးအဲဒါဆို phase ရောက်တယ်။

နောက်တစ်ခါ neutral ပေါ်ထောက်ပြီး
နောက်တစ်ချောင်းကို အရင်လိုပဲ ဆရာက
သူ့လက်နဲ့ ကိုင်လိုက်ပါတယ်။ ပြီးတော့ကျနော်
ကိုမေးပါတယ်။ ဆရာဘာမှမပြဘူး ဇီးရိုး ပဲ
တွေ့တယ်။ အေးအဲဒါဆို neutral မရောက်ဘူး။
Neutral ရောက်တယ်ဆို အနည်းဆုံး 2v 3v ပြတယ်။ အေးအရေးကြီးတာတော့ မှတ်ထား
ဒီပုံစံကို အုမ်း နဲ့လှည့်ပြီးမစမ်းမိစေနဲ့။ သေလိမ့်
မယ် လို့မှာထားပါတယ်။

နောက်ဆို ကျနော်လည်း neutral စမ်းပြီဆိုရင်
Test lamp မလိုတော့ဘဲနဲ့ metre တစ်လုံးနဲ့ပဲအဆင်ပြေနေပါတော့တယ်။

MyatMin ThuyaKyaw

26/11/2023

"အဲကွန်းသုံးသူတိုင်း အဲကွန်းရီမုဒ် အသုံးပြုပုံကို
ဒီလို စနစ်တကျ သိထားဖို့ အရေးကြီးပါတယ်"

▶ အဲကွန်း သုံးသူ ၊ ပြုပြင်သူတိုင်း သိထားသင့်တဲ့ အဲကွန်းရီမုဒ်ရဲ့
လုပ်ဆောင်ချက် အသုံးပြုပုံကို ဝေမျှလိုက်ပါတယ်။ On / off ဆိုတဲ့
ခလုပ်ကတော့ အဲကွန်းကို အဖွင့်အပိတ်လုပ်တဲ့ခလုပ်ပါ။ တချက်နှိပ်ရင်
ဖွင့်၊ နောက်တချက်နှိပ်ရင် ပိတ်ပေးပါတယ်။ ဖွင့်လက်စအဲကွန်းကို ချိန်ပြီး
နှိပ်လိုက်ရင် ပိတ်သွားပြီး၊ ပိတ်နေတဲ့အဲကွန်းဆို ပွင့်သွားပါလိမ့်မယ်။

Mode ဆိုတဲ့ခလုပ်ရဲ့ လုပ်ဆောင်ချက်ကို ပြောပြပါမယ်။ တချက်နှိပ်ရင်
အဲကွန်းလုပ်ဆောင်ချက် အနေနဲ့ Auto-Cool – Dry-Heat – Fan ဆိုပြီး
တခုချင်းစီပြောင်းပါလိမ့်မယ်။

*Auto မှာထားရင် အခန်းအပူချိန်-ပန်ကာလည်နှုန်း- Outdoor unit
အဖွင့်အပိတ်နဲ့လည်ချိန်တွေကို အဲကွန်းထဲက Processor ကသူဟာသူ
အလုပ်ပေးပါလိမ့်မယ်။

*Cool မှာထားရင် အဲကွန်းက အေးနေပါလိမ်မယ်။

ဒီအချိန်မှာ Out door unit တခုလုံး အလုပ်လုပ်နေပါလိမ့်မယ်။
သုံးစွဲသူက နှိပ်ထားတဲ့ အခန်းအပူချိန် အောက် မရောက်မချင်း
အဲကွန်းက လည်နေပါလိမ့်မယ်။

*Dry mode မှာလည်းအဲကွန်းက အေးနေပါမယ်။ ဒီအချိန်မှာ အေးရုံသာ
မက အခန်းတွင်းက ရေငွေ့ပမာဏကိုလည်း Cool နှိပ်ထားချိန်ထက်
ပိုပြီး လျှော့ချပေးပါလိမ့်မယ်။

*Heat ဆိုတာကိုနှိပ်ထားပြီး ချိန်ထားမယ်ဆိုရင်တော့ အဲကွန်းက
အပူအအေးနှစ်မျိုး သုံးလို့ရတဲ့ ဟာဆိုရင်တော့ အခန်းတွင်းက Info or
က အပူကွိုင်ဖြစ်သွားပြီး Outdoor unit က အအေးကွိုင်အဖြစ်
ပြောင်းပြန်အလုပ်လုပ်ပေးပါလိမ့်မယ်။

*Fan ဆိုတဲ့ အနေအထားမှာနှိပ်ထားပြီး ချိန်ထားရင်တော့ အဲကွန်း
Outdoor ကအလုပ်မလုပ်ပဲ Indoor ပန်ကာပဲ အလုပ်လုပ်ပါလိမ့်မယ်။
အခန်းတွင်းမအေးတော့ပါ။ ပန်ကာချည်းသာ လည်နေလို့ဖြစ်ပါတယ်။

တချို့ဆို ရီမုတ်ကွန်ထရိုးမှာ ဒီအခြေအနေကို နှိပ်ထားပြီး အဲကွန်း
မအေးလို့ဆိုပြီး ပြင်တဲ့သူတွေ လှမ်းခေါ်တော့ လမ်းစရိတ်ကုန်တာမျိုး
ရှိတတ်ပါတယ်။

Temp လို့ရေးထားတဲ့ အခန်းရဲ့လေထု အပူချိန်ကို ကိုယ်လိုသလိုချိန်ဖို့
ဘယ် ညာ မြှားနှစ်ခု နဲ့ရေးထားတဲ့ အပူချိန်ချိန်ညှိခလုပ်ပါ။ အခန်းရဲ့
အပူချိန်ကို ကိုယ့်အတွက် သက်သောင့်သက်သာဖြစ်စေမည့် အပူချိန်
အနည်းအများကို ချိန်ရာမှာ သုံးပါတယ်။ နှိပ်တဲ့အချိန်မှာ အဲကွန်း
Indoor ရဲ့ ဆင်ဆာနေရာ ကိုချိန်ပြီး နှိပ်ဖို့လိုပါတယ်။ လူတစ်ယောက်
အတွက် သက်သောင့်သက်သာဖြစ်တဲ့ အပူချိန်က ရာသီအလိုက်မှာရှိတဲ့
ပတ်ဝန်းကျင်အပူချိန်လိုက်လို့ နေ့ညလိုက်လို့ အပြောင်းအလဲရှိပါတယ်။
အဲကွန်းဖွင့်ထားပေမယ် သတိရမနေစေပဲ ကိုယ့်အတွက် ချမ်းမှန်း
ပူအိုက်မှန်း သိမနေစေတဲ့ အပူချိန်ကတော့ အကောင်းဆုံးပါပဲ။

ရန်ကုန်မှာနေသူသာမန် ပေါင် 120 လောက် လူတစ်ယောက်အတွက်
ကောင်းမွန်တဲ့အပူချိန်ကတော့ နေ့ခင်းဖက်ဆို 23’C ကနေ 26’Cအတွင်း
ဆိုအတော်ပါပဲ။ ညဖက်ဆိုရင်တော့..စောင်ခြုံအိပ်တတ်ရင် 19’C ကနေ
23’C အတွင်း အတော်ပါပဲ။

ရီမုတ်ကိုနှိပ်ပြီး 16’C ထိအပူချိန် ကို ချိန်ထားတာမျိုး မလုပ်သင့်ပါဘူး။
16’C ထိ အပူချိန်ကို နှိပ်ထားခြင်းဟာ အခန်းရဲ့အပူချိန် အဲဒီလောက်ထိ
ကျဆင်းသွားမှ စက်ကို ရပ်ပါလို့ပြောတာပါ။ အခန်းအပူချိန် 16’C ဟာ
လူအများစုအတွက် ကျန်းမာရေးအရ မကောင်းပါဘူး။ အေးလွန်းပါတယ်။

အဲဒီအပူချိန်ထိ ကျဆင်းသွားဖို့ ဆိုတာလည်း တော်တော်များများ
အခန်းတွေအတွက် စက်ကို ဆက်တိုက် ရက်ရှည်မောင်းထားတောင်
မရောက်ပါဘူး။ မီတာခလည်း ပိုကုန်ပါတယ်။ အဲဒီအပူချိန်ကို
ရောက်ခဲ့ရင်လည်း ကျန်းမာရေးအတွက် မကောင်းပါဘူး။ တချို့က
ဘာမှန်းမသိပဲ အဲဒီအပူချိန်ထိ ချထားတတ်ပါတယ်။ မလုပ်သင့်ပါ။

Fan လို့ရေးထားတဲ့ အဲကွန်း Indoor ရဲ့အထဲက ပန်ကာ အမြန်နှုန်းကို
ချိန်တဲ့ခလုပ်တခု ပါ ပါလိမ့်မယ်။ သူရဲ့အသုံးက..ပန်ကာ အမြန်နှုန်းကို
အမြန်(Hi)၊ အလည်အလတ်(M)၊ အနှေး(L) ချိန်ပေးရာမှာသုံးပါတယ်။
တစ်ချက်နှိပ်ရင် တမျိုးပြောင်းပါတယ် H-M-Lအစဉ်လိုက် ပြောင်းနေပါ
လိမ့်မယ်။ အများစု ရီမုတ်တွေမှာတော့ မှန်ပြင်ထဲမှာ အတုံးအကြီး ၊
အလတ်၊ အသေး ပြောင်းသွားတဲ့ပုံစံနဲ့ ပြပါလိမ့်မယ်။ ညအိပ်ချိန်တွေ
မှာတော့..အနှေး (L) မှာထားခြင်းဖြင့် ဆူညံမှုကို သက်သာစေနိုင်ပါတယ်။

Swing ဆိုတာကို တချက်ချင်းစီ နှိပ်ပြီး အဲကွန်း Indoor Unit ရဲ့ ရှေ့က
Louvre ကို အပေါ်အောက် ကစားတာနဲ့ ကိုယ်ကြိုက်တဲ့နေရာမှရပ်ဖို့
စောင့်ပြီး နှိပ်လိုက်တာနဲ့ အသေရပ်သွားဖို့ လုပ်နိုင်ပါတယ်။

Timer ဆိုတဲ့ ခလုပ်နဲ့ အပူချိန် အတိုးအလျော့ မြှားတွေနဲ့ ပေါင်းစပ်နှိပ်ပြီး
အဲကွန်း ကိုကြိုက်တဲ့အချိန်မှာ ပိတ်ဖို့ ကြိုက်တဲ့အချိန်မှာ ပြန်လည်စေဖို့
အချိန်သတ်မှတ် ပေးထားနိုင်ပါတယ်။ Turbo ဆိုတဲ့ ခလုပ်ပါခဲ့ရင်တော့
အဲကွန်း Indoor fan ကို အရှိမြန်မြန် နဲ့လည်ဖို့ ဖြစ်သွားပါလိမ့်မယ်။

အဲကွန်း ရီမုတ် ကိုနှိပ်တဲ့အခါ Indoor unit ရဲ့ ဆင်ဆာ ကို
သေချာချိန်ပြီး နှိပ်မှာသာ ကိုယ်လိုချင်တဲ့ ချိန်ဆမှုကို ရမယ်လို့
သတိပေးချင်ပါတယ်။ ရီမုတ်အလုပ်လုပ်ရင် အဲကွန်းကနေ ” တီ” ဆိုတဲ့
အသံလေးက နှိပ်လိုက်တိုင်း ကြားနေရတတ်ပါတယ်။

KO HTOO
Aircon sale & service
Ph-09454898704/09-403564190
သို့ဆက်သွယ်မေးမြန်းနိုင်ပါတယ်ခင်ဗျ။။

18/11/2023

Ring
~~~~

ဒီနေ့တော ကုမ္ပဏီ တစ်ခုမှာမီးဆင်တာပါ။
ကုမ္ပဏီ ဆိုတော့ ကိုယ့်ဆရာတို့သိတဲ့အတိုင်း
Power socket တွေဟာ နှစ်ပေခြားတစ်ခုလောက်ဆိုသလို နီးနီးကပ်ကပ်နဲ့ တွေ့ရတတ်ပါတယ်။ ဌာနတစ်ခုကို ကွန်ပြူတာသုံးဘာသုံးဆိုတော့ socket တွေ ဆယ်ခုလောက်ဟာ စုပြုံနေ
တတ်ပါတယ်။

ဆရာကကျနော့်ကိုမေးပါတယ်။ မင်းဒီsocket
တွေကို ဘယ်နှစ်ဆားကစ်ဆွဲမလဲလို့မေးပါတယ်။
ကျနော်ကြည့်လိုက်တော့ ဆော့ကပ် ကအားလုံး
ဆယ်နေရာ။ ဆော့ကပ်တွေက loopin လုပ်ရင်
နှစ်ခုပဲ လုပ်ခွင့်ရှိတာဆိုတော့။ အားလုးပေါင်း
ငါးဆားကစ်ပဲဆွဲမယ်လို့ဖြေလိုက်ပါတယ်။

မှတ်ထားကွ ဟေ့ကောင်ရ ဒီလိုမျိုးဆော့ကပ်တွေ
နီးနီးနားနားနဲ့စုပြုံနေတာကို ဥပမာ အင်တာနက်ဂိမ်းဆိုင်တွေ။ ဘဏ်တွေ။ ကောင်တာတွေမှာ အများဆုံးတွေ့ရတတ်တယ်။ သူတို့ကိုကြိုးဆွဲပြီဆိုရင် ring circuit နဲ့ဆွဲပေးရတယ်ကွ။ ring circuit ဆိုတာ 1p mcb ကနေ phase ကထွက်လာပြီး ဆိုင်ရာဆော့ကပ်တွေကို loopin လုပ်သွားမယ်။ ပြီးရင် နောက်ဆုံးဆော့ကပ်က phase ဟာ သူလာခဲ့တဲ့ 1p mcb ထဲကိုပဲပြန်ဝင်သွားမယ်။ဒါဆိုရင် အဲဒီ 1p
mcb မှာ ကြိုးဟာနှစ်ချောင်းဝင်နေရမယ်ပေါ့။
နောက်ပြီး ring circuit သုံးမယ့် 1p mcbဟာ
အနည်းဆုံး 25 ampထက်မငယ်ရဘူးကွ။
လို့ပြောပြပါတယ်။

တကယ်တော့ ကျနော့်အသိဥာဏ်ဟာ အမှောင်ခန်းထဲက ပိုးစုန်းကြူး လိုပါပဲ မှိတ်တုတ်မှိတ်တုတ်
နဲ့။

MyatMin Thuya Kyaw

28/10/2023

အခွ မခံ
~~~~~

တစ်ခါတစ်လေကျရင် ညနေအလုပ်သိမ်းပြီးပေမယ့် အိမ်ကိုတန်းပြန်လို့ မရပါဘူး။
တစ်ချို့ဆက်စပ်ရာအိမ်တွေက ဖုန်းဆက်ပြီး
ဟိုဟာဖြစ်လို့ ဒီဟာဖြစ်လို့ လာပါဦး။
ဟိုဟာလေး လုပ်ချင်လို့ ဒီဟာလေးလုပ်ချင်လို့
လာပါဦး ဆိုပြီး ခေါ်ထားတဲ့အိမ်တွေကို သွားလုပ်ပေးရပါတယ်။

လုပ်ပေးရမှာက အနည်းအကျဉ်းလောက်ပဲဆိုရင်
ဒီလိုမျိုး အလုပ်သိမ်းပြီး မှပဲ ဆိုင်ရာအိမ်ကို လွှတ်လေ့ရှိပါတယ်။ ဒီနေ့လည်း လုပ်ရမယ့်အလုပ်က
DB ဘေးမှာ မီးတစ်ပွင့်ကပ်ပေးရမှာပါ။ အိမ်ရှင်က
မီးလာမလာ သိချင်လို့ pilot lamp အဖြစ်သုံးချင်လို့ပါ။ လူတစ်ယောက်သွားရင်ရပြီပေါ့။

ဆရာက ကျနော်ကိုမင်းသွားဆင်လို့ဖြစ်မလား
မေးပါတယ်။ ကိုယ့်ဆရာတို့ သိတဲ့အတိုင်း ကျနော်က အိမ်လုံးချင်းတွေကိုတောင် မီးရိုက်နေတာ
ဒီမီးတစ်ပွင့်ကတော့ အေးဆေးပေါ့ဗျာ။
သွားကြားတောင်မညပ်ဘူး။ ဒါနဲ့ ကျနော်လည်း
Drill ပုံးလေးဆွဲပြီးထွက်ခဲ့တာပေါ့။

ဟိုရောက်တော့ ကိုယ့်ဆရာတို့သိတဲ့အတိုင်း
အိမ်ရှင်ကလည်းသဘောကောင်းတော့ ။
မီးဆရာလာပြီပေါ့။ မီးဆရာဆိုတဲ့ အသံကြားရရင်
နားဝင်က တယ်ချိုသကိုးဗျ။ ကော်ဖီတွေ မုန့်တွေ
လဲ ပါပေါ့ဗျာ။

ဒါနဲ့လုပ်စရာရှိတာလုပ်ပေါ့။ DB ဘေးမှာ 5wမီးတစ်ပွင့်ကို one gang တစ်ခုခံပြီးကပ်ပေးပေါ့။ ကျနော်လုပ်နေတာကို အိမ်ရှင်ကလည်းကြည့်နေတော့ စိတ်ထဲမြူးနေတာပေါ့ဗျာ။ ကိုယ့်
ဆရာတို့သိတဲ့အတိုင်း ဒါမျိုးကလဲ အိမ်ရှင်အရှေ့လုပ်ရပြီးဆို လုပ်လို့အရမ်းကောင်းပေါ့။
ပါးစပ်ကလည်း အငြိမ်မနေဘူး။ သမားဂုဏ် လဲထုတ်ရသေး။ ကျနော် ဒီ one gang လေးခံထားတာ အကိုမလိုအပ်ရင် ပိတ်ထားလို့ရတယ်။လိုရင်ဖွင့်ထား မီတာကိုချွေတာပြီးသား ဘာညာပေါ့။ ပြီးတာ့လဲမီးတွေ
ဘယ်လိုဆင်ခဲ့တာ။ညာလိုဆင်ခဲ့တာလဲကြွားပေါ့။
ပြောလိုက် လုပ်လိုက်
နဲ့ ပြီးရောဆိုပါတော့ဗျို့။

ဆင်လဲပြီးရော ဒီမှာကြည့်အကို ဆိုပြီး one gang ကိုဖွင့်လိုက်တာ ဂျောက် ဆိုတဲ့အသံကြား
လိုက်ရပြီး တစ်အိမ်လုံး မှောင်အတိကျသွားပါလေရောလား။ ကျနော်လည်း ထူပူထွက်သွားပါတယ်။
ခုနက အိမ်ရှင်ရှေ့မှာ လီဗာအကုန်တင်ခဲ့သမျှ
အမြင့်ကနေ ကုန်းဆင်းကို အရှိန်နဲ့ ထိုးကျသွားသလိုခံစားလိုက်ရပါတယ်။ DBတွေ
one gang တွေ ပြန်ဖွင့်ပြန်စစ်ကြည့်တော့လည်း short circuit မဟုတ်ဘူး။ ဒါပေမယ့် ကျနော့
one gang ကို ဖွင့်တာနဲ့ ELCB ကကျတော့တာပါပဲ။

short circuit ကြောင့်လဲမဟုတ်တော့ကျနော်
လဲမကြံတတ်တော့ဘူးလေ။ ထုံးစံအတိုင်းဆရာကို
ဖုန်းဆက်ပြီး အခြေအနေကိုပြောပြရတာပေါ့ဗျာ။
ဆရာက ကျနော်ပြောတာသေချာနားထောင်ပြီး။
ဒါဆိုရင် ELCB ကို ခွမိသွားပြီး။ သေချာပြန်စစ်လိုက်။ ELCB က phase ကို သူ့အောက်ကယူ
ပြီး Neutral ကို သူ့အပေါ်က ယူရင် လက်မခံသလို။ neutral ကိုသူ့အောက်ကယူပြီး
Phase ကို သူ့အပေါ်ကယူရင်လည်း လက်မခံဘူး။ phase ရော neutral ရောကို သူု့
အောက်က ယူရတယ်ကွ။လို့ပြောပါတယ်။

ကျနော်စစ်ကြည့်လိုက်တော့ဆရာပြောသလိုပဲ
ကျနော်က ELCB ကိုသွားပြီးခွမိတာကိုးဗျ။
အိမ်ရှင်က ကျနော်ဆရာစီ ဖုန်းဆက်နေသံကြားလိုက်ရပါတယ်။
အကိုတပည့်က ရီရတယ်တဲ့။

MyatMin Thuya Kyaw

26/10/2023

ပြန်ဆွဲကြည့်
**********

အလုပ်ဝင်စ ကျနော်ဟာ မီးသမားသာပြောတာ။
ိမီးကြိုး မကိုင်ဘူးသေးပါဘူး။ အလုပ်ထဲ
ရောက်လို့ အလုပ်လုပ်ပြီဆိုရင် အများဆုံးလုပ်
နေရတာက တူနဲ့စို့ ကိုင်ပြီး ထွင်းတာထုတာ
ပါ။ နောက်နေ့လာလဲ တူနဲ့စို့၊ နောက်နေ့လာလဲ
တူနဲ့စ၊ို့ ကြာတော့ တူကို မျက်စိမှိတ်ထုမလား။
ဘယ်ညာပြောင်းထုမလား။ မုန်းလောက်အောင်
ကျွမ်းနေပါတော့တယ်။

စီနီယာအကိုတွေ DB မှာ connection ဝင်နေရင်
အားကျလှပါတယ်။ DB ရှေ့မှာဗျာ ခန့်ခန့်ကြီး
ကြိုးတွေနွှာလိုက် join လိုက်နဲ့။ တစ်ချို့ site
တွေမှာဆို တစ်ခြားအဖွဲ့က သူတွေ ဝိုင်းကြည့်ရင်
တောင် ဝိုင်းကြည့်နေတတ်ပါတယ်။ ကြည့်ပြီ
ကောလားဗျာ ကြိုးတွေရှုပ်ယှက်ခက်နေရာကနေ
မျက်လှည့်ပြလိုက်သလို လှပရှင်းလင်းသွားတော့
မြင်သူတွေသဘောကျလှသကိုး။

အလုပ်ဝင်စကျနော်ဟာ DB ထိုင်ချင်နေတာမှ
တစ်ပိုင်းကို သေနေတာပဲ။ DBဝင်ပြီဆိုရင်
Wire နွှာတာ ဖြတ်တာက အရေးပါတော့
Wire cutter ကို နိုင်နင်းဖို့ကလဲလိုပါတယ်။
အားတဲ့ အချိန်တွေဆိုလဲ wire cutter တစ်
ချောင်းနဲ့ လေ့ကျင့်နေတော့တာပဲဗျို့ ။

တစ်နေ့တော့ DB ဝင်ဖို့အခွင့်အရေးကရလာ
တယ်ဆိုပါတော့ဗျာ။ ကျနော်တို့ စီနီယာအကိုက
Loopin တွေအကုန်ဝင်ပြီးပါပြီ။ load ကြိုးတွေပဲ
ကျန်တော့တာပါ။ သူကဝင်နေရင်း အလုပ်တစ်
ခုပေါ်လာတော့ မင်းဝင်လို့အဆင်ပြေမလား
ဆိုတော့။ ပြေတယ်ပေါ့ဗျာ။ ကိုယ့်ဆရာတို့
လဲသိပြီပေါ့ဗျာ ဒီက DB ကိုင်ချင်နေတာ ရွပိုးကို
ထိုးနေတာကို။

ဘာပြောကောင်းမလဲဗျာ ကျနော်DB ကိုင်တော့
ကြည့်နေလိုက်ကြတာ။ စိတ်ထဲမှာ feel ပဲဗျာ။
ပြီးသွားမှာ စိုးလို့ ကျနော့မှာ ဖြည်းဖြည်းလေးကို
လုပ်နေတော့တာပဲဗျို့ ။ DB နားကဖြတ်သွားတဲ့
သူတွေကိုလဲ လုပ်နေရင်းတန်းလန်း သမတ်
ရိုးကျ ပုံစံမျိုးနဲ့ ရယ်ပြ၊ လှမ်းပြီးနှုတ်ဆက်ရတာလဲ
အမော။ ကျနော် DB ထိုင်နေတာ လူသိအောင်
လို့ပေါ့ဗျာ။

DB ဝင်ပြီးလို့ မီးလဲစမ်းရော မီးတွေတစ်ခုမှ
မလာဘူးဗျာ။ ဖြစ်မှဖြစ်တတ်ပါလေတယ်။ လူ
တွေအများကြီးရှေ့မှာမှဗျာ။
ဒါနဲ့ gang switch်တွေ လှန်ပြီး အထဲကို
စစ်ကြည့်တော့ phase ကို မရောက်တာဗျို့ ။
ဲ့ DBမှာ စစ်ကြည့်တော့ အဝင်အထွက်တွေ
အကုန်လုံး မီးရှိနေတယ်။ ခုနက မာန်တက်ခဲ့တဲ့
ကျားကြီး ကျနော် ခုတော့ နွားကြီး တစ်ကောင်လို
ကို ခံစားနေရပြီး မလုပ်တတ်မကိုင်တတ်ကို
ဖြစ်ရော။

ဆရာရောက်လာပြီး ဘရေကာတွေ အကုန်ပြန်
ပိတ၊် ပြီးရင် မင်းဝင်ထားတဲ့ load ကြိုးတွေ လိုက်
ဆွဲထုတ်ကြည့်လို့ပြောပါတယ်။ ဆွဲထုတ်ကြည့်
တော့ ကျနော်ဝင်ထားတာတွေအကုန်လုံး ချောင်
ချိနေပြီး လက်ထဲပါလာတော့တာပဲ။
ကြိုးဝင်ပြီးတိုင်း ကြိုးကို လက်နဲ့ပြန်ဆွဲထုတ်
ကြည့်ရတယ်ကွ၊ မင်းဝင်ထားတဲ့ကြိုးတွေအကုန်
လုံးက ကြိုးကိုဆွဲညှပ်သွားတဲ့ ဂွင်းထဲမရောက်ပဲ
ဂွင်းနောက်ကိုရောက်နေတော့ ဘရေကာစကူ
ကြပ်လို့ ဂွင်းလေးက သာအရှေ့ကိုဆွဲကပ်သွား
တယ်၊ မင်းကြိုးတွေက ပါမလာတော့ဘူး။
ဘရေကာထဲကို ကြိုးထည့်ဖို့ စကူလျော့ပြီ
ဆိုရင်လဲ စကူကိုလျော့ပြီးတာနဲ့ screw driver
ကိုမထုတ်သေးပဲ ဖင်ကို လက်ဖနှောင့်နဲ့ ဗြောင်း
ဆိုပြီး တစ်ချက်ရိုက်ပေးရတယ်။ ဒါမှ ကြိုးကို
ညစ်မယ့်ဂွင်းလေးက နောက်ကိုကပ်သွားမှာ။
အဲလိုမရိုက်ပေးရင် မင်းကစကူသာလျော့လိုက်
တယ်၊ စကူကအရှေ့ဘက်ကိုသာကြွလာတာ
ကွင်းက အနောက်ကိုမကပ်သေးဘူးကွ။

ပြီးရင်လဲ ကြိုးကိုလုံလောက်အောင်နွာထားရ
တယ် ။ နွှာထားတာတိုနေရင်လဲ ခုနကဂွင်းလေး
ထဲထည့်ကြပ်တဲ့အခါ ကြိုးကာဗာကိုပါ ကြပ်မိတော့ မီးမကူးတော့ဘူး၊ ကြိုးနွာတာ ရှည်သွားရင်လဲ ဘရေကာ ထိပ်မှာ ကြေးစကြီးတွေပေါ်နေ
ပြီးလှလဲမလှဘူး၊ အန္တရာယ်လဲ များတယ်။
DB တွေမီးထလောင်ရတာလဲ အဲ့ပြသ၁နာက
အများဆုံးပဲကွ။

ဆရာက ဆူလဲဆူ ရှင်းလဲရှင်းပြပေါ့ဗျာ။
ကျနော်ကလဲ မခုတ်တတ်တဲ့ ကြောင်လေးလို
ဆရာ့ရှေ့မှာ ဟုတ်ကဲ့ ဟုတ်ကဲ့ နဲ့ အမြှီးကုပ်
နေတော့တာပဲ။

ဆရာဆူနေတဲ့အချိန်
ခုန DB ဝင်နေတုန်းက ကျနော် ပြုံးပြ နှုတ်ဆက်
ခဲ့တဲ့သူတွေက ကျနော့ကိုပြန်ပြီးရယ်ပြနေကြ
တယ်ဗျို့ ။

MyatMin ThuyaKyaw

24/10/2023

အိမ်မက်မြစ်ဖျား
~~~~~~~~~~~~

ပွင့်ပွင့်လင်းလင်း ဝန်ခံရရင် ကျနော်အခု မီးအလုပ် လုပ်နေတယ်ဆိုတာ
ဝါသနာပါလို့မဟုတ်ဘူး ကိုယ့်ဆရာတို့ရေ။ ပိုက်ဆံ လိုချင်လို့ပေါ့ ဗျာ ရှင်း
နေတာပဲကို။ ကျနော်က လုပ်သာလုပ်နေရတယ် စိတ်ကအလုပ်ထဲမှာ
မရှိဘူးဗျို့ ။ အချိန်မြန်မြန်ကုန်ဖို့ပဲ စဉ်းစားနေတာပါ။

ကျနော့စီနီယာတွေက ခိုင်းရင် ခိုင်းတာကိုလုပ်လိုက်တာပဲ။ တတ်ချင်စိတ်
သိချင်စိတ်က လုံးလုံးကို မရှိတာ ကိုယ့်ဆရာရေ။ သူတို့တွေ ဘာတွေလုပ်
နေမှန်းလဲ မသိပါဘူးဗျာ။

တစ်နေ့ အိမ်တစ်လုံး မီးဆင်ပြီးသွားတော့ ခလုတ်တွေကို ချောက်ဂျက်
ချောက်ဂျက်နဲ့ နှိပ်ပြီး မီးလင်းမလင်း လိုက်စမ်းကြတာဗျာ လှေကားမှာ
ဆင်ထားတဲ့ မီးတစ်ပွင့်က မိုက်တယ်ဗျာ။ အပေါ်ထပ်က ခလုတ်ကို နှိပ်နှိပ်
အောက်ထပ်က ခလုတ်ကို နှိပ်နှိပ် အဖွင့်အပိတ်လုပ်လို့ရတယ်ဗျို့ ။

ကျနော်တော်တော်ကို သဘောကျသွားတယ်။ စိတ်ထဲမှာလဲ ထူးဆန်းမှုတွေ
ပါခံစားလိုက်ရပါတယ်။ အဲဒီလိုမျိုးကို လုပ်တတ်ချင်စိတ်လဲ အရမ်းဖြစ်
လာပါတယ်။ ဘာဖြစ်လို့လဲ ဆိုတော့ ကျနော့အိမ်မှာဆင်ပြီး အမေတို့
အဖေတို့ကို ကြွားချင်လို့ပါ။

ညနေအလုပ်သိမ်းပြီဆို အိမ်မပြန်ကြခင် လက်ဘက်ရည်ဆိုင် ထိုင်ကြတာ
ကျနော် တို့အဖွဲ့ရဲ့ ထုံးစံလိုဖြစ်နေပါပြီ။ လက်ဘက်ရည်ဆိုင် မှာကအလုပ်
ထဲက အခက်အခဲ တွေ မသိတာတွေကို ဆရာ့ကိုမေးရင် ဆရာကပြောပြ
နေကြဆိုတော့ လက်ဘက်ရည်ဆိုင် ဟာကျနော်တို့ အတွက် စာသင်ကျောင်း
လိုဖြစ်နေတာပေါ့ကိုယ့်ဆရာတို့ရာ။

အခုလဲ ထုံးစံအတိုင်းပေါ့။ နေ့ခင်းက လှေကားမီးအကြောင်း ဆရာ့ကိုမေး
ရတာပေါ့ဗျာ။ အေးကွ ဟေ့ကောင်ရ အဲဒါ two way ဆင်တယ်လို့ခေါ်တယ်ကွ။
မီးပွင့်ကို နေရာနှစ်ခုကနေ ထိန်းချုပ်တယ်လို့ခေါ်တယ်။ အဲဒီလို နေရာနှစ်ခုကနေ
အပိတ်အဖွင့် လုပ်ချင်တယ်ဆိုရင် two way ခလုပ်နှစ်ခုလိုတယ်ကွ။ two way
ခလုတ်ဆိုတာ ရိုးရိုး ခလုတ်လို ငုတ်နှစ်ငုတ်မဟုတ်ပဲ။ သုံးငုတ်ပါတယ်ကွ။

အဲဒီသုံးငုတ်ကို A.B.C လို့ နာမည်ပေးထားတယ်ဆိုပါတော့။ အနေအထား
တစ်ခုမှာ B က Aနဲ့ ထိနေတယ်။ နှိပ်လိုက်ရင် B က Aနဲ့ မထိတော့ပဲ C နဲ့
ပြောင်းထိတယ်။ ပြန်နှိပ်လိုက်ရင် B က C နဲ့မထိတော့ပဲ A နဲ့ ပြန်ထိတယ်။
အဲဒီပုံစံမျိုး two way ခလုတ်က အလုပ်လုပ်တယ်။ သူ့ကို ဒီလိုဆင်ရတယ်
ဆိုပြီး ပုံဆွဲပြပါတယ်။

နောက်တစ်ခါ မီးပွင့်ကို နှစ်နေရာမဟုတ်တော့ဘူး။ နေရာနှစ်ခုထက်ပိုပြီး
နေရာပေါင်းများစွာကနေ အဖွင့်အပိတ်လုပ်ချင်တယ်ဆိုရင်တော့
INTERMEDIATE SWITCH ( အင်တာမိဒိယက် ခလုတ် ) တွေ သုံးဖို့
လိုလာပြီကွ။

အင်တာမိဒိယက် ခလုတ် ကြတော့ လေးငုတ်ပါတယ်။ အဲဒီလေးငုတ်ကို
A.B.C.D လို့ နာမည်ပေးထားတယ်ဆိုရင် အနေအထားတစ်ခုမှာ
A က C ကို ထိနေပြီး B က D ကို ထိနေတယ်။ ခလုတ်နှိပ်လိုက်ရင်
A က D ဘက်ကိုပြောင်းထိပြီး B ကလဲ C ဘက်ကို ပြောင်းထိတယ်။
ပြန်နှိပ်လိုက်ရင် အရင်အတိုင်း ပြန်ထိနေမယ်။ ဒါက လေးငုတ်ပါတဲ့
အင်တာမိဒိယက် ခလုတ် ရဲ့ အလုပ်လုပ်ပုံပဲ။

နေရာပေါင်းများစွာကနေ မီးပွင့်ကို ထိန်းချုပ်ချင်တယ်ဆိုရင်တော့
ထိပ်ပိတ်နောက်ပိတ်ကို two way ခလုပ်တွေထားပြီး အလယ်မှာ
INTERMEDIATE SWITCH တွေကို ကိုယ်လိုသလောက် ထည့်ပြီး
သုံးပေးရမယ် ဆိုပြီး ဆရာက ပုံထပ်ဆွဲပြပေးပါတယ်။

အရေးကြီးတာက two way ဆင်တုန်းက two way နှစ်ခုကြားကကြိုးတွေ
ဘယ်ညာလွဲပြီး cross ဖြစ်လို့ရပေမယ့်၊ အင်တာမိဒိယက် နှစ်ခုကြားက
ကြိုးတွေက ဘယ်ညာလွဲပြီး cross ဖြစ်လို့မရဘူး။ တကယ်တော့ ငါတို့ မီးအလုပ်
ဆိုတာလွယ်လွယ်လေးကွ။ မီးခလုတ်တွေ ပစ္စည်းတွေကို ငါတို့က တီထွင်ပေး
ရတာမဟုတ်ဘူး။ ဒီခလုတ် ဒီပစ္စည်းတွေမှာပါတဲ့ အပေါက်တွေ ငုတ်တွေမှာ
ဘယ်ကြိုးကို ဘယ်လိုထည့်ရမယ်လို့ သိရင် အားလုံးကိုဆင်လို့ရတယ်ကွလို့
ရှင်းပြပါတယ်။

မီးဆင်တာကို လုံးဝစိတ်မဝင်စားခဲ့တဲ့ကျနော်ဟာ two way တစ်ခုရဲ့ ဆင်ပုံ
ဆင်နည်းလေးကို စပြီးသိလိုက်ရကတည်းက မီးဆင်တဲ့ ပညာကို စိတ်ဝင်စား
တတ်ချင်စိတ်ကို ကြီးထွားလာစေတော့တာပဲဗျာ။

အိမ်ရောက်တော့ အိမ်မှာ two way ခလုတ်လေးဆင်ပြီး မိဘတွေကို ဖွင့်ပြပိတ်ပြပြီး
ကျနော်ဆင်တတ်ကြောင်းကို ကြွားတော့တာပေါ့ ကိုယ့်ဆရာတို့ရာ။

MyatMin Thuya Kyaw

20/10/2023

စီ အေ တီ ကတ် ကြောင်
===============

ကျနော် မီးလုပ်နေရင်း လုပ်သက်လေးတွေ ရလာတာနဲ့ အမျှ ပိုးတွေက တစ်မျိုးပြီးတစ်မျိုး
မရိုးရအောင် ဝင်လို့လာပါတော့တယ်။
ပထမ ပိုး တုန်းက screw driver ကောင်းကောင်း လေးတွေ လိုချင်တဲ့ ပိုးပါပဲ။

အခုဝင်လာတဲ့ ဒုတိယပိုးကတော့ မီတာလိုလျင်တဲ့ ပိုးပါပဲ ကိုယ့်ဆရာတို့ရေ။ ပုံမှန်ဆိုရင်တော့ ဆရာက သူ့တပည့်တွေကို မီတာတွေ ထုတ် ပေးလေ့ရှိပါတယ်။ ကျနော်ကိုတော့
ခုထိ မီတာထုတ်မပေးသေးပါဘူး။ အာဗျာ
ကိုယ့်ဆရာတို့ကလဲ ကျနော့ဆို သိပ်အထင်
သေးတာပဲ။ ဆရာထုတ်မပေးလို့သာ ကိုယ်
ပိုင်မီတာ မရှိသေးပေမယ့်၊ အလုပ်ထဲမှာ စီနီယာ အကိုတွေရဲ့ မီတာတွေကို ယူကိုင်ပြီး
တိုင်းနေကြပါဗျ ။ ဟင်း ဟင်း ဒီလောက်ဆို
ကိုယ့်ဆရာတို့လဲ ကျနော့ကို အထင်မသေးရဲ
လောက်တော့ဘူးထင်ပါတယ်နော့။

ပိုးက မရတော့ဘူးဗျို့ ။ ဟုတ်ဟုတ် မဟုတ်ဟုတ် လူရှေ့ သူရှေ့ မှာ မီတာကြီးထုတ်ထုတ်ပြီး ဟိုတိုင်းဒီးတိုင်းလုပ်ရတာ feel သိပ်လာတာပေါ့ဗျာ။ ဒီ feel ကို ကိုယ့်ဆရာတွေက တိုင်းနေကြဆိုတော့ ကျနော့ထက်ပိုသိကြမှာပါဗျာ။ ကိုယ်လုပ်နေတဲ့ အလုပ်မှာ ကံကောင်း
ထောက်မစွာနဲ့ စာရေးမချောချော လေးတွေများ ရှိလို့ကတော့ ဘာပြောကောင်းမတုန်း။
အလုပ်မရှိ အလုပ်ရှာပြီး သူတို့နားအားအားရှိ
မီတာပဲ သွားတိုင်းနေကြတော့တာပဲကိုးဗျ။
ရှူ း တိုး တိုးဗျ ။ ကြုံ တုန်းအတင်းတုပ်ရဦးမယ်။ အဲ့လို့တိုင်းတဲ့ အထဲမှာ ကျနော်တို့ရဲ့ စီနီယာ အကိုတွေလဲပါတယ်ဗျ။

ကျနော်ပြောခဲ့သလိုပေါ့ မီတာကိုင်ချင်တဲ့ပိုးက
ဘယ်လိုမှနေလို့မရတော့လို့ ဆရာထုတ်ပေးတဲ့အထိ မစောင့်တော့ပဲ ကိုယ့်ဘာသာကိုယ်
လခထဲကနေ မီတာဝယ်လိုက်ပါရောလား။
တစ်ဖွဲ့လုံးကလဲ digital မီတာကိုင်တော့ ကျနော်ကလဲ digital မီတာ ဝယ်တာပေါ့ဗျာ။

ဟာ ဟ ခုတော့ဘာရမလဲ မီတာနဲ့ ကြွားချင်ရင် သူများမီတာကို အောက်ကျခံပြီး ငှါးစရာ မလိုတော့ဘူး။ ကျနော့ရဲ့ မီတာတစ်ကိုင်ကိုင်
လုပ်နေတဲ့ပုံစံကို ကိုယ့်ဆရာတွေ မြင်မိပြီပေါ့။

မကြာဘူးထင်မယ် မီတာဝယ်ပြီး တစ်ရက်နှစ်
လောက်ပဲရှိဦးမယ်။ စက်ရုံတစ်ရုံမှာ ဆရာနဲ့
အတူတူ အလုပ်လုပ်ဖို့ဖြစ်လာပါတယ်။
လုပ်ကြတဲ့နေရာကတော့ သူတို့အခေါ် power house ပေါ့ဗျာ။ မထူးဆန်းပါဘူး ထရမ်စဖော်မှာ ခြံထဲကလာတဲ့ ပါဝါကို မိန်းတွေ ချိန်းတွေ ATS တွေနဲ့ စက်ရုံထဲကို မီးလွှတ်ပေးတဲ့ ရုံလေးပါ။

ဒါနဲ့လုပ်ကိုင်ပြီးလို့ မီးမလွှတ်ခင် မက်ရိုက်၊
မက်ရိုက်ပြီး မီတာနဲ့ စမ်းမယ်လုပ်တော့၊ ကျနော်က ဘာရမလဲ ကျနော်လဲ မီတာကိုင်နေပြီဆိုတာ ဆရာ့ကို သိစေချင်လို့ ခပ်တည်တည်နဲ့ ဆရာ့ကို ကျနော့်မီတာထုတ်ပေးလိုက်တာပေါ့။

ဆရာက ဟေ့ကောင် ဒါဘာလဲလို့ ကျနော်ကို
မေးပါတယ်။ ကျနော်က ဟာ ဆရာ အဲဒါ ကျနော် ဝယ်ထားတဲ့ မီတာလေ လို့ပြောတော့။
ဆရာက ဟေ့ကောင်ရ မီတာဝယ်ရင် မီတာမှာ
CAT l, CAT ll, CAT lll, CAT lV ဆိုပြီးတော့ပါတယ်ကွ။ ငါတို့လို မီးသမားတွေက
အနည်းဆုံး CAT lll မီတာလောက်တော့ဝယ်ရတယ်။ ခုကြည့်စမ်း မင်းဝယ်ထားတာ CAT l
တဲ့ အဲဒါက V 150 အောက်ပဲ သုံးလို့ကောင်း
တယ်လို့ ဆူပါတယ်။

သွားရောပေါ့ ကိုယ့်ဆရာတို့ရာ မြွေပါလဲဆုံး
သားလဲဆုံး မဟုတ်ဘူး။ ကျနော်က မီတာလဲဆုံး ငွေလဲဆုံးဖြစ်ပြီ။ နောက်နေ့ကျတော့ ဆရာက ကျနော့ကို CAT lll မီတာအသစ်တစ်လုံး ထုတ်ပေးတယ်ပါတယ်။

တော်သေးတာပေါ့ ဗျာ ဆရာထုတ်ပေးတဲ့
ဒီမီတာနဲ့ဆို ကျနော်ဆက်ကြွားလို့ ရသွားပြီ။

MyatMin ThuyaKyaw

09/10/2023

A.B.C.D မတတ်ဘဲနဲ့ အရပ်ထဲကိုဝင်
=====================

ခုဆိုရင် ကျနော်က lighting ပိုင်းတင်မကတော့ဘူး ။ motor တွေကိုလည်း မဂ္ဂနပ် တွေ
နဲ့ပါ ဆင်တတ်လာပြီ ကိုယ့်ဆရာတို့ရေ။
တစ်ခြားသူတွေ တော့ မသိဘူး။ ကျနော်ကတော့ ဗဟုသုတတွေ တိုးတိုးပြီးသိလာလေ
ပိုပိုပြီးကြွားလို့ကောင်းလေပဲ။ ကျနော်နည်းနည်း ပါးပါးပဲ သိတုန်းက နည်းနည်းပါးပါးပဲ ကြွားတတ်တယ်။ များများသိလာတော့ ကြွားရတာ များများကြွားလို့ကောင်းလာတယ်။

ခုလည်း ကျနော်ဟာ အင်ယာ ကျောင်းဆင်းတစ်ယောက်မဟုတ်ပါပဲနဲ့ မော်တာ control
တွေကို ဆင်တတ်လာတဲ့အခါမှာတော့ ဘာပြောကောင်းတော့မတုန်း ကိုယ့်ဆရာတို့ရာ ကိုယ့်ကိုယ်ကို အင်ယာကျောင်းမတက်ဘဲနဲ့ ဒါတွေကို ဆင်နိုင်တဲ့ ငါကွလို့ မာန်ထဂုဏ်ပုဒ်ကို
နေရာတကာ ကြွားလုံးထုတ်လို့ ကောင်းနေတော့တာပေါ့။

ရှေးလူကြီးသူမတွေ ပြောပြဆုံးမကြတဲ့ စကားတွေ ထဲကလို ချဉ်ပေါင်ဟင်း စားတဲ့သူကလည်း ငါက ချဉ်ပေါင်ဟင်း စားတဲ့ကောင်ကွလို့ဆိုပြီး မာန်တက်သတဲ့၊ ငါးပိရည် စားတဲ့သူကလည်း ငါးပိရည် စားတဲ့ကောင်ကွဆိုပြီး မာန်တက်သတဲ့၊ တစ်ခါ ဝက်သားဟင်း စားတဲ့သူကလည်း ငါကဝက်သားဟင်းစားတဲ့ကောင်
ကွဆိုပြီး မာန်တက်ကြပြန်သတဲ့။ ဆိုတဲ့ စကားတွေကို ကိုယ့်ဆရာတွေ ကြားဖူးကြပြီးသားပါ။

ခုလည်း ကျနော့အဖြစ်က socket တွေ gang
switch တွေ ဂျွိုင်းတတ်ခါစတုန်းကလဲ ငါကွ ဆိုပြီး မာန်တက်ခဲ့တာပဲ၊ two way switch တွေဆင်တတ်လာတော့လဲ ငါကွဆိုပြီးမာန်တက်ခဲ့တော့ပဲ၊ intermediate switch တွေ DB
တွေဆင်တတ် လုပ်တတ်လာပြန်တော့လဲ ငါဆိုတဲ့ မာန်က ထပ်ကာထပ်ကာ တက်လာပြန်တာပါပဲ။ motor control တွေဆင်တတ်လာတော့ ဘာပြောကောင်းမလဲ ကိုယ့်ဆရာတို့ရာ ဒီငါဆိုတာကြီးက ပြန်ကိုမကျတော့ဘဲ
ထိပ်ဘက်မှာ ပိတ်ကပ်နေတော့တာပေါ့။
ပညာဆိုတာ ကျနော့အတွက်တော့ မာန်တက်ဖို့ချည်းသက်သက်ဖြစ်နေပါတော့တယ်။

ဒီနေ့လည်း ကျနော်စက်ရုံတစ်ခုမှာ ကျနော်ကိုယ်တိုင် ပစ္စည်းမှာ ကျနော်ကိုယ်တိုင်ဆင်ထားတဲ့ မော်တာအသေးသုံးလေးလုံးလောက်အတွက် pannel ကဆင်ပြီးပါပြီ။ ဒါလေးဆင်ရ၊ လုပ်ရ ကိုင်ရတာကနည်းနည်းကိုယ့်ဆရာတို့ရေ ကျနော်ဘာတွေဆင်တတ်တယ်၊ ညာတွေလုပ်တတ်တယ်ဆိုပြီးဘေးကကြည့်နေတဲ့ဆရာတွေကို ကြွားတာတွေက ခပ်
များများရယ်။

ဒီလိုနဲ့ဆင်ပြီးတော့ မော်တာတွေ လည်းစမ်းလည်တဲ့အခါ၊ မောင်းပြီဆိုတာနဲ့ MCB 3POLE BREAKER ကဖြုတ်ဆိုကျတော့တာပဲ။
ပြန်တင်ပြန်မောင်း ပြန်ကျနဲ့ ရွာလည်နေတော့တာပဲ။ စစ်ကြည့်တော့လည်း ကြိုးမှားတာတို့
Short circuit တို့မဟုတ်ပြန်ဘူး။ဘယ် လိုပင်ကြိုးစားပမ်းစားရှာဖွေပေမယ့် ဖြစ်ရတဲ့အကြောင်းကိုရှာမတွေ့တော့ခုနက ကြွားလုံး တွေနဲ့မောင်းတင်ထားခဲ့သမျှဟာ ခုတော့ လူကြားသူကြားမှာကျနော်ဟာ ဟားလုံးတွေနဲ့ခေါင်းပင်ပြားခဲ့ရပြီပေါ့ကိုယ့် ဆရာတို့ရာ။

ထုံးစံအတိုင်း ပေါ့။ ဘာရမလဲ နော် ဗျာ။
ကျနော့ဆရာကို ဖုန်းဆက်မေးရတော့တာပေါ့။ ကျနော်က ကျနော်ဖြစ်ပြီးသမျှ အဖြစ်စုံကိုပြောပြတော့ အေး အဲဒါဆို မင်းဆင်ထားတဲ့
Pannel ကိုဓာတ်ပုံရိုက်ပို့လိုက်လို့ပြောပါတယ်။ ကျနော်လည်း ပုံပို့ပေးလိုက်ရော ဆရာက
ဟေ့ကောင် မင်းပုံကို သေချာကြည့်စမ်း မင်းပုံမှာတင် အမှားကိုတွေ့နေရတယ်ဆိုတော့ ကျနောလည်းပြူးပြဲရှာကြည့်တာ ဘာမှမတွေ့ဘူး။ ဆရာ ကျနော်တော့ မှားတာကို မတွေ့ဘူး ဆရာလို့ ပြောလိုက်တော့။ အေး မင်းဆင်ထားတဲ့ 3pole mcb breaker ကိုကြည့်ကွ။ မော်တာအသေးအတွက်ဆိုရင် အနည်းဆုံး C Type လောက်ဆင်ရမှာ ခုမင်းဟာက
ံ B Type ကိုတပ်ထားတော့ မင်းbreakerက
ကျပြီပေါ့ကွ။ ဒီ B Type က lighting အတွက်ပဲ ကောင်းတယ်။ မော်တာပါဝါ ကြီးလာခဲ့ရင်လည်းC Type နဲ့ မရတော့ပဲ D Type နဲ့မှ အဆင်ပြေနိုင်မယ်။ B type ထက် C type က starting မှာ စောင့်တက်တဲ့ current ကို အဆများများပိုခံနိုင်တယ်။ တစ်ခါ C type ထက်
D typeက ပိုပြီး အဆများများ ခံနိုင်တယ်ကွလို့ ရှင်းပြပါတယ်။

ဟုတ်တယ်ကိုယ့်ဆရာတို့ရေ B type တွေကို
C type နဲ့လဲ ပေးလိုက်တာ စမောင်းတိုင်း breaker ကျကျနေတဲ့ပြသ၁နာ အေးသွားပါတယ်။ ကျနော့အဖြစ်က ဘာနဲ့တူသလဲဆိုတော့ A.B.C.D မတတ်ဘဲနဲ့ အရပ်ထဲကိုဝင် ဆိုတဲ့ သီချင်းလိုပဲ B type. C type မသိဘဲနဲ့ မော်တာ ခလုတ်ကိုဆင် ဖြစ်နေပြီ ကိုယ့်ဆရာတို့ရေ။

MyatMin ThuyaKyaw

MyatMin Thuya Kyaw - Electrical Story