Wayanad Vaarthapage

07/11/2024

🔘🔘🔘🔘🔘🔘🔘🔘🔘🔘

വാർത്തകൾ വിരൽത്തുമ്പിൽ

*പ്രഭാത വാർത്തകൾ*

2024 | നവംബർ 7 | വ്യാഴം
1200 | തുലാം 22 | പൂരാടം l 1446 l ജ: അവ്വൽ 04
➖➖➖➖➖➖➖➖

◾ അമേരിക്കയുടെ 47-ാമത് പ്രസിഡണ്ടായി ഡൊണാള്‍ഡ് ട്രംപ് അധികാരത്തിലെത്തുമ്പോള്‍ വ്യാപാര, നയതന്ത്ര മേഖലകളില്‍ കൂടുതല്‍ സഹകരണം പ്രതീക്ഷിച്ച് ഇന്ത്യ. ഇന്ത്യ അമേരിക്ക ബന്ധം കൂടുതല്‍ ദൃഢമാകുമെന്ന് പ്രതീക്ഷിക്കുന്നുവെന്നും, ആഗോള സമാധാനത്തിനായി ഒന്നിച്ച് നീങ്ങാമെന്നും ട്രംപിന് ആശംസകള്‍ നേര്‍ന്ന് പ്രധാനമന്ത്രി നരേന്ദ്രമോദി പറഞ്ഞു. ഒടുവില്‍ ലഭിക്കുന്ന വിവരമനുസരിച്ച് നിയുക്ത പ്രസിഡണ്ടും റിപ്പബ്ലിക്കന്‍ പാര്‍ട്ടി നേതാവുമായ ഡൊണാള്‍ഡ് ട്രംപ് 295 ഇലക്ട്രല്‍ വോട്ടുകള്‍ ഇതുവരെ നേടിയപ്പോള്‍ എതിര്‍ സ്ഥാനാര്‍ത്ഥിയും ഡെമോക്രാറ്റിക് പാര്‍ട്ടി നേതാവുമായ കമല ഹാരിസ് 226 ഇലക്ട്രല്‍ വോട്ടുകളാണ് ഇതുവരെ നേടിയിട്ടുള്ളത്.

◾ അമേരിക്കന്‍ പ്രസിഡന്റ് തിരഞ്ഞെടുപ്പില്‍ പരാജയപ്പെട്ടെങ്കിലും പോരാട്ടം തുടരുമെന്ന് ഡെമോക്രാറ്റിക് സ്ഥാനാര്‍ഥിയും യു.എസ്. വൈസ് പ്രസിഡന്റുമായ കമലാ ഹാരിസ്. ഇരുട്ടില്‍ മാത്രമേ നക്ഷത്രങ്ങള്‍ ശോഭിക്കൂവെന്നും തോല്‍വിയില്‍ നിരാശരാവരുതെന്നും പറഞ്ഞ കമല ഹാരിസ് സ്വാതന്ത്ര്യത്തിനും നീതിക്കും ജനങ്ങളുടെ അന്തസ്സിനുംവേണ്ടിയുള്ള പോരാട്ടത്തില്‍ താന്‍ ഉറച്ചുനില്‍ക്കുമെന്നും അറിയിച്ചു. റിപ്പബ്ലിക്കന്‍ സ്ഥാനാര്‍ഥിയും നിയുക്ത യു.എസ്. പ്രസിഡന്റുമായ ഡൊണാള്‍ഡ് ട്രംപിനെ കമലാ ഹാരിസ് ഫോണില്‍വിളിച്ച് അഭിനന്ദിച്ചിരുന്നു.

◾ കമല ഹാരിസിലൂടെ ഒരു ഇന്ത്യന്‍ വംശജ ഇതാദ്യമായി അമേരിക്കന്‍ പ്രസിഡന്റ് ആകുമോ എന്ന പ്രതീക്ഷകള്‍ അവസാനിച്ചെങ്കിലും അമേരിക്കയുടെ രാഷ്ട്രീയ ചരിത്രത്തില്‍ ഇതാദ്യമായി ഒരു ഇന്ത്യന്‍ വംശജ സെക്കന്‍ഡ് ലേഡിയായിരിക്കുകയാണ്. ആന്ധ്രാപ്രദേശ് സ്വദേശിനിയായ ഉഷ ചിലുകുരിയാണ് അമേരിക്കയുടെ സെക്കന്‍ഡ് ലേഡിയാകുന്നത്. അമേരിക്കന്‍ വൈസ് പ്രസിഡന്റ് സ്ഥാനം ഉറപ്പിച്ച ജെ ഡി വാന്‍സിന്റെ പത്‌നിയാണ് ഉഷ. ദേശീയ സ്ഥാപനത്തിലെ നിയമ വിദഗ്ധയായി ജോലി ചെയ്യുന്ന ഉഷ ചിലുകുരി യേല്‍ യൂണിവേഴ്സിറ്റിയില്‍ നിന്ന് ചരിത്രത്തില്‍ ബിരുദവും കേംബ്രിഡ്ജ് സര്‍വകലാശാലയില്‍ നിന്ന് തത്ത്വശാസ്ത്രത്തില്‍ ബിരുദാനന്തര ബിരുദവും നേടിയിട്ടുണ്ട്.

◾ ലൈംഗിക അതിക്രമങ്ങള്‍ക്ക് ഇരയാകുന്ന സ്ത്രീകള്‍ക്കും പ്രായപൂര്‍ത്തിയാകാത്ത കുട്ടികള്‍ക്കും നിയമപരമായ നഷ്ടപരിഹാരം ഉറപ്പാക്കണമെന്ന് സുപ്രീം കോടതി. പോക്‌സോ കേസുകളിലും ലൈംഗിക പീഡന കേസുകളിലും വിധികള്‍ പ്രസ്താവിക്കുന്ന രാജ്യത്തെ എല്ലാ സെഷന്‍സ് കോടതികളും ഇക്കാര്യം ഉറപ്പ് വരുത്തണമെന്നും സുപ്രീം കോടതി നിര്‍ദേശിച്ചു. ജസ്റ്റിസുമാരായ ബി വി നാഗരത്ന, പങ്കജ് മിത്തല്‍ എന്നിവരാണ് സുപ്രധാനമായ നിര്‍ദേശം നല്‍കിയത്.

◾ പാലക്കാട്ടെ കെപിഎം ഹോട്ടലില്‍ കോണ്‍ഗ്രസ് നേതാക്കള്‍ കള്ളപ്പണം കൊണ്ടുവന്നുവെന്ന ആരോപണം ബലപ്പെടുത്താന്‍ ഹോട്ടലിലെ സിസി ടിവി ദൃശ്യങ്ങള്‍ പുറത്തുവിട്ട് സിപിഎം. നീല ട്രോളി ബാഗുമായി കെഎസ്യു നേതാവ് ഫെനി നൈനാന്‍ നടന്നുപോവുന്ന ദൃശ്യങ്ങളാണ് പുറത്തുവന്നിട്ടുള്ളത്. പാലക്കാട്ടെ യുഡിഎഫ് സ്ഥാനാര്‍ത്ഥി രാഹുല്‍ മാങ്കൂട്ടത്തില്‍, ഷാഫി പറമ്പില്‍ എംപി, ശ്രീകണ്ഠന്‍ എംപി, ജ്യോതികുമാര്‍ ചാമക്കാല എന്നിവരേയും കെപിഎം ഹോട്ടലിലെ ദൃശ്യങ്ങളില്‍ കാണാം.

◾ സിപിഎം പുറത്ത് വിട്ട സിസിടിവി ദൃശ്യങ്ങളില്‍ പ്രതികരിച്ച് പാലക്കാട്ടെ യുഡിഎഫ് സ്ഥാനാര്‍ത്ഥി രാഹുല്‍ മാങ്കൂട്ടത്തില്‍. ബാഗില്‍ പണമാണെന്ന് ദൃശ്യങ്ങളിലുണ്ടോയെന്ന് ചോദിച്ച രാഹുല്‍ പൊലീസ് പിടിച്ചെടുത്ത സിസിടിവി ദൃശ്യങ്ങള്‍ സിപിഎമ്മിന് ലഭിച്ചതില്‍ പൊളിറ്റിക്കല്‍ അജണ്ടയില്ലേ എന്നും ചോദിച്ചു പെട്ടിയില്‍ വസ്ത്രങ്ങളാണെന്ന് ആവര്‍ത്തിച്ച രാഹുല്‍ മാങ്കൂട്ടത്തില്‍ പെട്ടിയില്‍ പണമുണ്ടായിരുന്നുവെന്ന് തെളിയിക്കാന്‍ ശാസ്ത്രീയ അന്വേഷണം നടക്കട്ടെ എന്നും പറഞ്ഞു. അതേസമയം തന്റെ വസ്ത്രങ്ങള്‍ അടങ്ങിയ നീല ട്രോളി ബാഗ് സിസിടിവി ദൃശ്യങ്ങള്‍ പുറത്തുവിടുന്നതിനു മുന്നേ രാഹുല്‍ പത്രസമ്മേളനത്തില്‍ പ്രദര്‍ശിപ്പിച്ചിരുന്നു.

◾ ഉപതെരഞ്ഞെടുപ്പ് നടക്കുന്ന പാലക്കാട്ടേക്ക് കോണ്‍ഗ്രസ് കള്ളപ്പണം കൊണ്ട് വന്നുവെന്ന ആരോപണം നിഷേധിച്ച് കെഎസ്യു നേതാവ് ഫെനി നൈനാന്‍. പാലക്കാട് ഉപതിരഞ്ഞെടുപ്പുമായി ബന്ധപ്പെട്ട് കഴിഞ്ഞ ദിവസങ്ങളില്‍ ഏറ്റവുമധികം താമസിച്ചത് കെപിഎം ഹോട്ടലിലാണെന്നും തിരഞ്ഞെടുപ്പ് ചുമതലയുളള കെഎസ്യു ഭാരവാഹിയാണ് താനെന്നും വിവാദങ്ങളില്‍ നിന്ന് ശ്രദ്ധ തിരിക്കാനുള്ള ശ്രമമാണ് നടക്കുന്നതെന്നും ഫെനി നൈനാന്‍ ഫേസ്ബുക്ക് കുറിപ്പില്‍ പറഞ്ഞു. വസ്ത്രങ്ങള്‍ സൂക്ഷിച്ച ബാഗിനെ വക്രീകരിച്ചാണ് ആരോപണമുന്നയിക്കുന്നതെന്നും തിരഞ്ഞെടുപ്പ് ഐഡി കേസില്‍ 10 മാസം കഴിഞ്ഞിട്ടും കുറ്റപത്രം നല്‍കാന്‍ കഴിഞ്ഞിട്ടില്ലെന്നും ഫെനി ചൂണ്ടിക്കാട്ടി.

◾ പാലക്കാട് കള്ളപ്പണം എത്തിയെന്ന ആരോപണത്തില്‍ പ്രതികരിച്ച് വി ഡി സതീശന്‍. ബാഗില്‍ പണമെന്ന് പറയുന്നത് എന്തടിസ്ഥാനത്തിലാണെന്നും റെയ്ഡിന് പിന്നില്‍ ബിജെപി സിപിഎം ഒത്തുകളിയെന്നും വി ഡി സതീശന്‍ ആരോപിച്ചു. സിപിഎം ജില്ലാ സെക്രട്ടറി പാലക്കാട് എസ്പിയാണോ എന്ന് ചോദിച്ച സതീശന്‍ കൊടകരക്കേസിന്റെ ജാള്യത മറയ്ക്കാനുള്ള തിരക്കഥയാണ് ഇതെന്നും കൂട്ടിച്ചേര്‍ത്തു.

◾ പാലക്കാട് കള്ളപ്പണം എത്തിയെന്ന ആരോപണത്തില്‍ സമഗ്ര അന്വേഷണം വേണമെന്ന് ആവശ്യപ്പെട്ട് പാലക്കാട് എസ്പിക്ക് പരാതി നല്‍കി സിപിഎം. കള്ളപ്പണം ഹോട്ടലില്‍ എത്തിച്ചുവെന്നും വിശദമായ അന്വേഷണം വേണമെന്നും ആവശ്യപ്പെട്ട് പാലക്കാട് ജില്ലാ സെക്രട്ടറി ഇ എന്‍ സുരേഷ് ബാബുവാണ് പരാതി നല്‍കിയത്.

◾ പൊലീസ് റെയ്ഡ് നടത്തിയ പാലക്കാട്ടെ കെപിഎം ഹോട്ടലിലെ സിസിടിവി ദൃശ്യങ്ങളുടെ ഹാര്‍ഡ് ഡിസ്‌ക് പിടിച്ചെടുത്ത് പൊലീസ്. പൊലീസിന് വിവരം കിട്ടിയത് മുതലുള്ള എല്ലാ ദൃശ്യങ്ങളും പരിശോധിക്കും. സൗത്ത് സി ഐയാണ് പരിശോധന നടത്തുന്നത്. സി ഐക്കൊപ്പം സൈബര്‍ വിദഗ്ധരും സ്പെഷ്യല്‍ ബ്രാഞ്ച് ഉദ്യോഗസ്ഥരും പരിശോധനയ്ക്കൊപ്പമുണ്ട്.

◾ കോണ്‍ഗ്രസിനായി കള്ളപ്പണം എത്തിയെന്ന് സിപിഎം സംസ്ഥാന സെക്രട്ടറി എം വി ഗോവിന്ദന്‍. പൊലീസ് എത്തും മുന്‍പ് പണം ഒളിപ്പിച്ചുവെന്നും ഹോട്ടലിലെ പരിശോധനയില്‍ അത്ഭുതമില്ലെന്നും എല്ലാ വിവരവും പൊലീസിനും കിട്ടിയിട്ടുണ്ടെന്നും എംവി ഗോവിന്ദന്‍ പറഞ്ഞു.

◾ കോണ്‍ഗ്രസിനെതിരെ ഉയരുന്ന കള്ളപ്പണ ആരോപണത്തില്‍ പ്രതികരിച്ച് കോണ്‍ഗ്രസ് നേതാവ് കെ മുരളീധരന്‍. പെട്ടിക്കുള്ളില്‍ പണം ആണെന്ന് ആര് പറഞ്ഞെന്നാണ് കെ മുരളീധരന്‍ ചോദിക്കുന്നത്. കോണ്‍ഗ്രസിനോട് സിപിഎം സ്വീകരിക്കുന്ന പുതിയ നയത്തിന്റെ പ്രവര്‍ത്തന ഉദ്ഘാടനമാണ് പാലക്കാട് നടന്നതെന്നും മുരളീധരന്‍ പറഞ്ഞു. സിപിഎമ്മിനും ബിജെപിക്കും ഒരേ സ്വരം, ഒരേ നിറം, ഒരേ താളമാണെന്നും തൃശൂര്‍ ഡീല്‍ വീണ്ടും പാലക്കാട് ആവര്‍ത്തിക്കുകയാണെന്നും കെ മുരളീധരന്‍ ആരോപിച്ചു.

◾ കള്ളപ്പണ ആരോപണത്തിന്റെ പേരില്‍ പാതിരാ റെയ്ഡ് നടന്ന കെപിഎം ഹോട്ടലിന്റെ പരാതിയില്‍ പാലക്കാട് സൗത്ത് പൊലീസ് കണ്ടാലറിയാവുന്ന 10 പേര്‍ക്കെതിരെ കേസെടുത്തു. അതിക്രമിച്ച് കയറി നാശനഷ്ടം ഉണ്ടാക്കുകയും ജീവനക്കാരെ മര്‍ദ്ദിക്കുകയും ചെയ്തതിനാണ് കേസെടുത്തിരിക്കുന്നത്.

◾ കേന്ദ്ര സഹമന്ത്രി സുരേഷ് ഗോപിയുടെ സിനിമാ ജീവിതത്തിന് താത്കാലിക ഇടവേളയെന്ന് റിപ്പോര്‍ട്ടുകള്‍. തൃശൂര്‍ എംപിയായി തെരഞ്ഞെടുക്കപ്പെട്ട സുരേഷ് ഗോപി, കേന്ദ്രമന്ത്രിയായി പ്രവര്‍ത്തിക്കുന്നതിനാല്‍ തത്കാലം സിനിമയില്‍ അഭിനയിക്കേണ്ടതില്ലെന്ന നിലപാടാണ് കേന്ദ്ര സര്‍ക്കാര്‍ എടുത്തിരിക്കുന്നതെന്നാണ് വിവരം. ജയിപ്പിച്ച മണ്ഡലത്തില്‍ ശ്രദ്ധിക്കാനും മന്ത്രി ഓഫീസില്‍ സജീവമാകാനും മന്ത്രി പദവിയില്‍ ശ്രദ്ധിക്കാന്‍ മോദിയും അമിത് ഷായും നിര്‍ദ്ദേശം നല്‍കിയെന്ന റിപ്പോര്‍ട്ടുകളാണ് പുറത്തുവന്നിരിക്കുന്നത്. ഇതോടെ ഏറ്റെടുത്ത സിനിമകള്‍ തുടരാനാകില്ലെന്ന പ്രതിസന്ധിയിലാണ് തൃശൂര്‍ എം പിയായ സുരേഷ് ഗോപി.

◾ വടകര ലോക്സഭ തെരഞ്ഞെടുപ്പ് പ്രചാരണത്തിനിടെ സിപിഎം വനിതാ നേതാവ് കെകെ ശൈലജക്കെതിരെ സോഷ്യല്‍ മീഡിയയില്‍ അശ്ലീല പരാമര്‍ശം നടത്തിയ കേസില്‍ ശിക്ഷ വിധിച്ച് കോടതി. യൂത്ത് കോണ്‍ഗ്രസ് പ്രവര്‍ത്തകനായ മെബിന്‍ തോമസിനെയാണ് നാദാപുരം ജുഡീഷ്യല്‍ ഫസ്റ്റ് ക്ലാസ് കോടതിയാണ് ശിക്ഷിച്ചത്. 15,000 രൂപയും കോടതി പിരിയും വരെ തടവുമാണ് ശിക്ഷ.

◾ നടന്‍ നിവിന്‍ പോളിക്ക് ബലാത്സംഗ കേസില്‍ ക്ലീന്‍ ചിറ്റ്. നിവിന്‍ പോളിയെ പ്രതിപട്ടികയില്‍ നിന്ന് പ്രത്യേക അന്വേഷണ സംഘം ഒഴിവാക്കി. കേസ് സംബന്ധിച്ച റിപ്പോര്‍ട്ട് പ്രത്യേക അന്വേഷണ സംഘം കോതമംഗലം കോടതിയില്‍ റിപ്പോര്‍ട്ട് നല്‍കി. നിവിന്‍ പോളിയ്ക്കെതിരെ തെളിവില്ലെന്നാണ് പൊലീസ് റിപ്പോര്‍ട്ടില്‍ വ്യക്തമാക്കുന്നത്.

◾ സംസ്ഥാനത്തെ 653 ആരോഗ്യ സ്ഥാപനങ്ങളില്‍ ഇ ഹെല്‍ത്ത് സംവിധാനം സജ്ജമായതായി ആരോഗ്യ വകുപ്പ് മന്ത്രി വീണാ ജോര്‍ജ്. മുഴുവന്‍ ആശുപത്രികളും ഇ ഹെല്‍ത്ത് സംവിധാനം നടപ്പിലാക്കുകയാണ് ലക്ഷ്യമെന്നും മന്ത്രി വ്യക്തമാക്കി. സംസ്ഥാനത്ത് ഇ ഹെല്‍ത്ത് സംവിധാനം വന്‍ വിജയമാണ്.

◾ മരടില്‍ പൊളിച്ച ഫ്ലാറ്റുകള്‍ നിലനിന്ന സ്ഥലത്ത് ഇനി എത്രത്തോളം നിര്‍മ്മാണം അനുവദിക്കാം എന്നതിനെ സംബന്ധിച്ച് റിപ്പോര്‍ട്ട് കൈമാറാന്‍ സുപ്രീംകോടതി നിര്‍ദേശം. മരട് കേസിലെ അമിക്കസ് ക്യൂറി ഗൗരവ് അഗര്‍വാളിന് ആണ് സുപ്രീംകോടതി നിര്‍ദേശം നല്‍കിയത്.

◾ ശോഭാ സുരേന്ദ്രനെതിരെ നല്‍കിയ മാനനഷ്ടക്കേസില്‍ നടപടി വൈകുന്നതിനെതിരെ ഇപി ജയരാജന്‍ ഹൈക്കോടതിയില്‍ ഹര്‍ജി നല്‍കി. ഇ പി ജയരാജന്‍ ബിജെപി യില്‍ ചേരാന്‍ താല്‍പര്യം പ്രകടിപ്പിച്ച് ദല്ലാളിനൊപ്പം തന്നെ വന്നു കണ്ടുവെന്ന ശോഭ സുരേന്ദ്രന്റെ വെളിപ്പെടുത്തലിലായിരുന്നു മാനനഷ്ട കേസ് ഫയല്‍ ചെയ്തത്. കേസിന്റെ തുടര്‍ നടപടികള്‍ സ്വീകരിക്കാന്‍ മജിസ്ട്രേട്ട് കോടതിയ്ക്ക് നിര്‍ദ്ദേശം നല്‍കണമെന്നാവശ്യപ്പെട്ടാണ് ഹര്‍ജി.

◾ സിറോ മലബാര്‍ സഭ കുര്‍ബാന തര്‍ക്കത്തില്‍ സഭാ തീരുമാനങ്ങള്‍ പാലിക്കാത്ത വൈദികര്‍ക്കെതിരെ നടപടിയെടുക്കാമെന്ന് വത്തിക്കാന്‍. വൈദികരെ പുറത്താക്കുന്നതടക്കമുള്ള നടപടികളുമായി മുന്നോട്ടുപോകാമെന്ന് വത്തിക്കാന്‍ അറിയിച്ചു. അപ്പസ്തോലിക് ന്യൂണ്‍സിയോയാണ് വത്തിക്കാന്‍ നിലപാട് അറിയിച്ചിരിക്കുന്നത്. സിറോ മലബാര്‍ സഭാ അധ്യക്ഷനാണ് കത്ത് നല്‍കിയിരിക്കുന്നത്.

◾ താല്ക്കാലിക മറവിരോഗം കാരണം പതുക്കെപ്പതുക്കെ പൊതുജീവിതം അവസാനിപ്പിക്കുകയാണ് എന്ന് മലയാളത്തിന്റെ പ്രിയപ്പെട്ട കവി കെ. സച്ചിദാനന്ദന്‍. ഫേസ്ബുക്ക് പോസ്റ്റിലാണ് പതുക്കെ താന്‍ പൊതുജീവിതം അവസാനിപ്പിക്കുകയാണ് എന്ന് എഴുത്തുകാരന്‍ വ്യക്തമാക്കിയിരിക്കുന്നത്.

◾ വഞ്ചനാക്കേസില്‍ പത്തനംതിട്ടയില്‍ അറസ്റ്റിലായ സിഐടിയു നേതാവ് അര്‍ജുന്‍ദാസിനെ രണ്ടു ദിവസത്തെ പൊലീസ് കസ്റ്റഡിയില്‍ വിട്ടു. പാറ പൊട്ടിക്കുന്ന യന്ത്രങ്ങള്‍ വാടക നല്‍കാതെ തട്ടിയെടുത്തെന്ന കേസിലാണ് പൊലീസ് അറസ്റ്റ് ചെയ്തത്. നിരന്തരം കുറ്റകൃത്യങ്ങളില്‍ ഏര്‍പ്പെടുന്ന അര്‍ജുന്‍ ദാസിനെ റൗഡി ലിസ്റ്റില്‍ ഉള്‍പ്പെടുത്തിയതായി ജില്ലാ പൊലീസ് മേധാവി അറിയിച്ചു.

◾ വിദേശത്ത് ജോലി വാഗ്ദാനം ചെയ്ത് ലക്ഷങ്ങള്‍ തട്ടിയ ആള്‍ പൊലീസിന്റെ പിടിയില്‍. തിരുവല്ല കടപ്ര സ്വദേശി അജിന്‍ ജോര്‍ജാണ് മാന്നാര്‍ പൊലീസിന്റെ പിടിയിലായത്. നഴ്സിംഗ് വിദ്യാര്‍ത്ഥികളെയും സ്ത്രീകളെയും ലക്ഷ്യമിട്ടായിരുന്നു തട്ടിപ്പ്.

◾ 558 കോടി രൂപയുടെ വസ്തുവകകള്‍ തെരഞ്ഞെടുപ്പ് നടക്കുന്ന സംസ്ഥാനങ്ങളില്‍ നിന്നായി പിടിച്ചെടുത്തെന്ന് തെരഞ്ഞെടുപ്പ് കമ്മീഷന്‍. മഹാരാഷ്ട്രയില്‍ നിന്ന് മാത്രം 280 കോടിയുടെ വസ്തുവകകള്‍ പിടിച്ചെടുത്തെന്ന് കമ്മീഷന്‍ വിവരിച്ചു. നിയമസഭാ തിരഞ്ഞെടുപ്പ് നടക്കുന്ന മറ്റൊരു സംസ്ഥാനമായ ജാര്‍ഖണ്ഡില്‍ നിന്ന് ഇതുവരെ 158 കോടി രൂപയുടെ വസ്തുവകകള്‍ പിടിച്ചെടുത്തെന്നും കമ്മീഷന്‍ വ്യക്തമാക്കി.

◾ മുഡ കേസുമായി ബന്ധപ്പെട്ട് കര്‍ണാടക മുഖ്യമന്ത്രി സിദ്ധരാമയ്യയെ ലോകായുക്ത പൊലീസ് ഇന്നലെ രണ്ട് മണിക്കൂറോളം ചോദ്യം ചെയ്തു. മൈസൂര്‍ ലോകായുക്ത സൂപ്രണ്ട് ടിജെ ഉദേഷിന്റെ ഓഫീസില്‍വെച്ചായിരുന്നു ചോദ്യം ചെയ്യല്‍. താന്‍ മുഖ്യമന്ത്രിയാണെന്ന കാര്യം പരിഗണിക്കാതെ, അന്വേഷണത്തിന് ആവശ്യമായ എല്ലാ ചോദ്യങ്ങളും തന്നോട് ചോദിക്കണമെന്നും അദ്ദേഹം ആവശ്യപ്പെട്ടതായാണ് വിവരം.

◾ ഭാരത് അരി വീണ്ടും വിപണിയിലെത്തുന്നു. ആട്ടയും അരിയും ഉള്‍പ്പെടെ സബ്‌സിഡി നിരക്കില്‍ അവശ്യസാധനങ്ങള്‍ ലഭ്യമാക്കാന്‍ ലക്ഷ്യമിട്ടുള്ള ഭാരത് ബ്രാന്‍ഡ് റീട്ടെയില്‍ പ്രോഗ്രാമിന്റെ രണ്ടാം ഘട്ടമാണ് ആരംഭിച്ചത്. രണ്ടാം ഘട്ടത്തില്‍, ഭാരത് ആട്ടയുടെ വില കിലോക്ക് 30 രൂപയായി ഉയര്‍ന്നു.

◾ അനധികൃതമായി വീടുകള്‍ പൊളിച്ച സംഭവത്തില്‍ സുപ്രീംകോടതിയില്‍ ഉത്തര്‍പ്രദേശ് സര്‍ക്കാരിന് കനത്ത തിരിച്ചടി. റോഡ് വികസനത്തിന്റെ പേരില്‍ അനധികൃതമായി വീടുകള്‍ പൊളിച്ച നടപടിയെ രൂക്ഷമായി വിമര്‍ശിക്കുകയായിരുന്നു ചീഫ് ജസ്റ്റിസ്. വീടുകള്‍ പൊളിക്കപ്പെട്ട പരാതിക്കാരന് 25 ലക്ഷം രൂപ നഷ്ടപരിഹാരം നല്‍കണമെന്ന് സുപ്രീംകോടതി ഉത്തരവിട്ടു

◾ ഹിമാചല്‍ പ്രദേശിലെ കോണ്‍ഗ്രസിന്റെ എല്ലാ കമ്മിറ്റികളും പിരിച്ചുവിട്ടു. സംസ്ഥാന കമ്മിറ്റിയുള്‍പ്പെടെയാണ് പിരിച്ചുവിട്ടത്. ജില്ലാ പ്രസിഡന്റുമാരെയും ബ്ലോക്ക് കോണ്‍ഗ്രസ് കമ്മിറ്റികളും പിരിച്ചുവിട്ടിട്ടുണ്ട്. കോണ്‍ഗ്രസ് അധ്യക്ഷന്‍ മല്ലികാര്‍ജുന്‍ ഖാര്‍ഗേ അനുമതി നല്‍കിയതിനെ തുടര്‍ന്നാണിത്. കമ്മിറ്റി മൊത്തത്തില്‍ ഉടച്ചുവാര്‍ക്കാനാണ് പിരിച്ചുവിട്ടതെന്നാണ് സൂചന.

◾ ബോളിവുഡ് നടനും ബി.ജെ.പി. നേതാവുമായ മിഥുന്‍ ചക്രവര്‍ത്തിക്കെതിരെ ബംഗാള്‍ പോലീസ് കേസെടുത്തു. പാര്‍ട്ടി യോഗത്തിനിടെ നടത്തിയ വിദ്വേഷ പ്രസംഗത്തിന്റെ പേരിലാണ് സെന്‍ട്രല്‍ കൊല്‍ക്കത്തയിലെ ബൗബസാര്‍ പോലീസ് സ്റ്റേഷനില്‍ എഫ്.ഐ.ആര്‍. രജിസ്റ്റര്‍ ചെയ്തത്. ഒക്ടോബര്‍ 27-ന് നടന്ന യോഗത്തില്‍ കേന്ദ്ര ആഭ്യന്തരമന്ത്രി അമിത് ഷായുടെ സാന്നിധ്യത്തിലായിരുന്നു അദ്ദേഹത്തിന്റെ വിദ്വേഷപ്രസംഗം.

◾ തൃശൂര്‍ ആസ്ഥാനമായ പ്രമുഖ ബാങ്കിതര ധനകാര്യ സ്ഥാപനമായ മണപ്പുറം ഫിനാന്‍സ് നടപ്പു സാമ്പത്തിക വര്‍ഷത്തെ (2024-25) രണ്ടാം പാദത്തില്‍ 572.08 കോടി രൂപയുടെ ലാഭം രേഖപ്പെടുത്തി. മുന്‍ സാമ്പത്തിക വര്‍ഷം ഇതേ പാദത്തിലെ 560.66 കോടി രൂപയേക്കാള്‍ 2 ശതമാനം വളര്‍ച്ചയാണ് ലാഭത്തിലുണ്ടായത്. ജൂണില്‍ അവസാനിച്ച ഒന്നാം പാദത്തിലെ 556.52 കോടി രൂപയുമായി നോക്കുമ്പള്‍ 2.8 ശതമാനം മാത്രമാണ് വളര്‍ച്ച. രണ്ടാം പാദത്തില്‍ വരുമാനം മുന്‍ സാമ്പത്തിക വര്‍ഷത്തെ 2,174.02 കോടി രൂപയില്‍ നിന്ന് 21.3 ശതമാനം വര്‍ധിച്ച് 2,637.14 കോടി രൂപയായി. ജൂണ്‍ പാദത്തിലെ 2,512 കോടി രൂപയില്‍ നിന്ന് വരുമാനം അഞ്ച് ശതമാനം ഉയര്‍ന്നു. ആശിര്‍വാദ് മൈക്രോഫിനാന്‍സ് ലിമിറ്റഡിന്റെ ആസ്തി മൂല്യം 10.95 ശതമാനം വര്‍ധനയോടെ 12,149 കോടി രൂപയിലും, അറ്റാദായം 75 കോടി രൂപയിലുമെത്തി. മണപ്പുറം ഹോം ഫിനാന്‍സ് ലിമിറ്റഡും മുന്‍ വര്‍ഷത്തെ അപേക്ഷിച്ച് 29.6 ശതമാനം വര്‍ധനയോടെ ആസ്തി മൂല്യം 1,587 കോടി രൂപയിലെത്തി. വെഹിക്കിള്‍ ആന്റ് എക്യുപ്മെന്റ് ഫിനാന്‍സ് വിഭാഗത്തിന്റെ ആസ്തി മൂല്യം 4,848.2 കോടി രൂപയിലെത്തി. മൊത്ത നിഷ്‌ക്രിയ ആസ്തി 2.42 ശതമാനവും അറ്റ നിഷ്‌ക്രിയ ആസ്തി 2.14 ശതമാനവുമാണ്. സെപ്റ്റംബര്‍ 30ന് അവസാനിച്ച രണ്ടാം പാദത്തില്‍ കമ്പനിയുടെ സംയോജിത അറ്റ മൂല്യം 12,528.5 കോടി രൂപയായി ഉയര്‍ന്നു.

◾ ആഷിഖ് അബുവിന്റെ പുതിയ ചിത്രമായ 'റൈഫിള്‍ ക്ലബ്' അണിയറപ്രവര്‍ത്തകര്‍ പുറത്തുവിട്ടിരിക്കുന്ന വാണി വിശ്വനാഥിന്റെ ക്യാരക്ടര്‍ പോസ്റ്റര്‍ ശ്രദ്ധനേടുന്നു. ഇട്ടിയാനം എന്നാണ് കഥാപാത്രത്തിന്റെ പേര്. ചുവന്ന ഗൗണില്‍ നിറ ചിരിയുമായാണ് വാണി വിശ്വനാഥ് പോസ്റ്ററില്‍ പ്രത്യക്ഷപ്പെട്ടത്. പ്രശസ്ത ബോളിവുഡ് സംവിധായകനും അഭിനേതാവുമായ അനുരാഗ് കശ്യപും ചിത്രത്തില്‍ പ്രധാന വേഷത്തിലുണ്ട്. ദയാനന്ദ് ബാരെ എന്ന കഥാപാത്രത്തെയാണ് അനുരാഗ് കശ്യപ് ചിത്രത്തില്‍ അവതരിപ്പിക്കുന്നത്. വിജയരാഘവന്‍, റാഫി, വിനീത് കുമാര്‍, സുരേഷ് കൃഷ്ണ, ഹനുമാന്‍കൈന്‍ഡ്, സെന്ന ഹെഗ്‌ഡെ, വിഷ്ണു അഗസ്ത്യ, ദര്‍ശന രാജേന്ദ്രന്‍, ഉണ്ണിമായ പ്രസാദ്, സുരഭി ലക്ഷ്മി, പ്രശാന്ത് മുരളി, നടേഷ് ഹെഗ്‌ഡെ, പൊന്നമ്മ ബാബു, രാമു, വൈശാഖ് ശങ്കര്‍, നിയാസ് മുസലിയാര്‍, റംസാന്‍ മുഹമ്മദ്, നവനി ദേവാനന്ദ്, പരിമള്‍ ഷായ്സ്, സജീവ് കുമാര്‍, കിരണ്‍ പീതാംബരന്‍, ഉണ്ണി മുട്ടത്ത്, ബിബിന്‍ പെരുമ്പിള്ളി, ചിലമ്പന്‍, ഇന്ത്യന്‍ എന്നിവരടക്കമുള്ള വന്‍ താരനിരയാണ് ഈ ചിത്രത്തില്‍ അണിനിരക്കുന്നത്.

◾ കപ്പേളക്ക് ശേഷം മുഹമ്മദ് മുസ്തഫ സംവിധാനം ചെയ്യുന്ന ചിത്രം 'മുറ' നവംബര്‍ 8ന് തിയേറ്ററുകളില്‍ എത്തും. തമിഴ്, ഹിന്ദി ചിത്രങ്ങളിലും ക്യാന്‍ ഫിലിം ഫെസ്റ്റിവലിലും തിളങ്ങിയ യുവ താരം ഹ്രിദ്ധു ഹാറൂണും സുരാജ് വെഞ്ഞാറമ്മൂടും മാലപാര്‍വതിയും കേന്ദ്ര കഥാപാത്രങ്ങളിലെത്തുന്ന ആക്ഷന്‍ ഡ്രാമയാണ് മുറ. കനി കുസൃതി, കണ്ണന്‍ നായര്‍, ജോബിന്‍ ദാസ്, അനുജിത് കണ്ണന്‍, യെദു കൃഷ്ണാ,വിഘ്‌നേശ്വര്‍ സുരേഷ്, കൃഷ് ഹസ്സന്‍, സിബി ജോസഫ് എന്നിവരാണ് മുറയിലെ മറ്റു പ്രധാന കഥാപാത്രങ്ങളെ അവതരിപ്പിക്കുന്നത്. മുറയുടെ രചന നിര്‍വഹിക്കുന്നത് ഉപ്പും മുളകും ഫെയിം സുരേഷ് ബാബുവാണ്.

◾ കോംപാക്ട് എസ് യുവി ശ്രേണിയില്‍ വരുന്ന കൈലാഖ് അവതരിപ്പിച്ച് പ്രമുഖ വാഹന നിര്‍മ്മാതാക്കളായ സ്‌കോഡ ഇന്ത്യ. ഡിസംബര്‍ രണ്ടിന് ഔദ്യോഗികമായി ഇന്ത്യന്‍ വിപണിയില്‍ അവതരിപ്പിക്കും. ബേസ് വേരിയന്റിന് 7.89 ലക്ഷം രൂപയാണ് വില. ഡിസംബര്‍ രണ്ടുമുതല്‍ കൈലാഖിന്റെ ബുക്കിങ് ആരംഭിക്കുമെന്നും കമ്പനി വ്യക്തമാക്കി. ആറ് കളര്‍ ഓപ്ഷനുകളിലാണ് കാര്‍ വിപണിയിലെത്തുക. ലാവ ബ്ലൂ, ടൊര്‍ണാഡോ റെഡ്, കാര്‍ബണ്‍ സ്റ്റീല്‍, ബ്രില്യന്റ് സില്‍വര്‍, കാന്‍ഡി വൈറ്റ് എന്നിവയ്ക്കൊപ്പം പുതിയ ഒലിവ് ഗോള്‍ഡും ഡെലിവറിയും കളര്‍ ഓപ്ഷനായി വരും. ഒറ്റ നോട്ടത്തില്‍ ഒരു മിനി കുഷാഖ് പോലെയാണ് ഇതിന്റെ രൂപഭംഗി. സബ്-ഫോര്‍ എസ്യുവിയായ കൈലാഖിന് കുഷാഖിന്റെ അത്രയും നീളമില്ല. 230 എംഎം നീളം കുറവാണ്. 17 ഇഞ്ച് അലോയ് വീലുകളാണ് നല്‍കിയിരിക്കുന്നത്. ത്രീ സിലിണ്ടര്‍ 1.0 ടിഎസ്ഐ എന്‍ജിനാണ് കൈലാഖില്‍. 999 സിസി എന്‍ജിന്‍ 115 എച്ച്പി കരുത്തും 178എന്‍എം പരമാവധി ടോര്‍ക്കും പുറത്തെടുക്കും. 6 സ്പീഡ് മാനുവല്‍/6 സ്പീഡ് ടോര്‍ക്ക് കണ്‍വെര്‍ട്ടര്‍ ഓട്ടോമാറ്റിക് ഗിയര്‍ബോക്സ് ഓപ്ഷനുകളിലാണ് വാഹനം വിപണിയിലെത്തുക. പൂജ്യത്തില്‍ നിന്നും മണിക്കൂറില്‍ 100 കീലോമീറ്റര്‍ വേഗതയിലേക്ക് 10.5 സെക്കന്‍ഡില്‍ കുതിച്ചെത്തും.

◾ കോടതി വ്യവഹാരങ്ങളുടെ അകത്തളങ്ങളിലേക്ക് വായനാലോകത്തെ പരിചയപ്പെടുത്തുന്ന അപൂര്‍വ കൃതിയാണ് തീക്കടിഞ്ഞാണ്‍. സത്യം മാത്രമേ ബോധിപ്പിക്കുകയുള്ളൂ എന്ന് വിശുദ്ധഗ്രന്ഥങ്ങളെ സാക്ഷിയാക്കി സാക്ഷികള്‍ പറയുമ്പോഴും നുണകള്‍ മാത്രം പറയാന്‍ പഠിപ്പിക്കുന്ന കലഹോപജീവികള്‍ പാര്‍ക്കുമിടമാണത്. അവിടെയാണ് സുഖ്‌ദേവ് എന്ന വക്കീല്‍ തന്റെ സത്യസന്ധതകൊണ്ടും ആത്മാര്‍ത്ഥതകൊണ്ടും കരുക്കള്‍ നീക്കി വിജയപീഠം കയറുന്നത് ഉള്ളിലെ ചിരി കെടുത്താന്‍ ദൈവം എപ്പോഴും മുകളിലുണ്ടെന്ന വാക്യം ഈ നോവലിന്റെ അന്തസ്സത്തയാണ്. തോല്‍ക്കാതെ പോരാടാനുള്ള ഇച്ഛാശക്തിയാണ് കോടതിമുറികളിലെ വ്യാഖ്യാന-അതിവ്യാഖ്യാനങ്ങളില്‍ നിന്ന് ലഭ്യമാകന്നത്. അമ്മയുടെ തണലും അച്ഛന്റെ ജീവിതപാതകളും സുഖ്‌ദേവിന് കൂട്ടുണ്ട്. സ്വാതന്ത്ര്യസമരചരിത്രവും ഗാന്ധിയന്‍ ചിന്തകളും ആദര്‍ശാത്മകജീവിതത്തിന്റെ നെടുംതൂണുകളാകുന്ന ബൃഹദാഖ്യാനം. ഒരു വക്കീല്‍ജീവിതത്തിന്റെ ആത്മാന്വേഷണമായ നോവല്‍. 'തീക്കടിഞ്ഞാണ്‍'. ഹംസക്കുട്ടി. ഗ്രീന്‍ ബുക്സ്. വില 425 രൂപ.

◾ ലോകത്ത് ഏറ്റവും കൂടുതല്‍ ഉറക്കക്കുറവ് നേരിടുന്ന ആളുകള്‍ ഉള്ള രാജ്യമാണ് ഇന്ത്യ. 93 ശതമാനം ഇന്ത്യക്കാരും ഉറക്കക്കുറവ് നേരിടുന്നുണ്ടെന്നാണ് സര്‍വെ ഫലങ്ങള്‍ സൂചിപ്പിക്കുന്നത്. ഇതിന് ഒരു പ്രധാന കാരണം ആസിഡ് റിഫ്ലക്സ് ആണ്. ഗ്യാസ്‌ട്രോ ഈസോഫേഷ്യല്‍ റിഫ്ലക്‌സ് രോഗം അഥവാ ക്രോണിക് ആസിഡ് റിഫ്‌ലക്‌സ് ഏകദേശം എട്ട് ശതമാനം മുതല്‍ 30 ശതമാനം വരെ ഇന്ത്യക്കാരെ ബാധിക്കുന്നു. ഇത് മോശം ഉറക്കത്തിലേക്ക് നയിക്കും. ആസിഡ് റിഫ്ലക്സ് കാലക്രമേണ ആവര്‍ത്തിച്ച് സംഭവിക്കുമ്പോള്‍ ഉണ്ടാകുന്ന ഒരു അവസ്ഥയാണ് ഗ്യാസ്‌ട്രോ ഈസോഫേഷ്യല്‍ റിഫ്ലക്‌സ്. ഇത് ഉറക്കക്കുറവ്, ക്ഷീണം, ശ്രദ്ധക്കുറവ് തുടങ്ങിയ ദൈനംദിന ജീവിതത്തെ വരെ ബാധിക്കാം. ഗ്യാസ്‌ട്രോ ഈസോഫേഷ്യല്‍ റിഫ്ലക്‌സ് രോഗം ഇന്ത്യക്കാര്‍ക്കിടയില്‍ ഒരു സാധാരണ പ്രശ്‌നമാണ്. ജീവിതശൈലിയില്‍ മാറ്റം വരുത്തുക, സമ്മര്‍ദം നിയന്ത്രിക്കുക എന്നിവയാണ് ഇത് നിയന്ത്രിക്കാനുള്ള മാര്‍ഗങ്ങള്‍. ദിവസവും ഒരേ സമയം ഉറങ്ങുകയും ഉണരുകയും ചെയ്യാന്‍ ശീലിക്കുക. ഇത് ശരീരത്തിന്റെ ആന്തരിക ഘടികാരത്തെ നിയന്ത്രിക്കാന്‍ സഹായിക്കും. നല്ല ഉറക്കത്തിനും ഇത് പ്രയോജനപ്പെടും. ശരിയായ ദഹനം നടക്കാനും ആസിഡ് റിഫ്‌ലക്സ് അപകടസാധ്യത കുറയ്ക്കുന്നതിനും ഉറങ്ങുന്നതിന് മൂന്ന് മണിക്കൂര്‍ മുമ്പെങ്കിലും അത്താഴം കഴിക്കാന്‍ ശ്രദ്ധിക്കുക.

*ശുഭദിനം*
*കവിത കണ്ണന്‍*
അയാള്‍ രണ്ടുപശുക്കളെ വാങ്ങി. അമ്മയും മകളുമായിരുന്നെങ്കിലും വലുപ്പത്തില്‍ അത് തിരിച്ചറിയാന്‍ സാധിക്കുമായിരുന്നില്ല. പലരോടും ചോദിച്ചെങ്കിലും ആര്‍ക്കും ഇതിനുത്തരം കൊടുക്കാന്‍ സാധിച്ചില്ല. അങ്ങനെ അയാള്‍ രാജാവിനുമുമ്പിലും എത്തി. രാജാവ് ഈ ജോലി തന്റെ മന്ത്രിയെ ഏല്‍പ്പിച്ചു. രണ്ടുപശുക്കളുടേയും മുമ്പില്‍ പാത്രത്തില്‍ തീറ്റകൊണ്ടുവെക്കാന്‍ മന്ത്രി ആവശ്യപ്പെട്ടു. പശുക്കളുടെ തീറ്റകഴിഞ്ഞപ്പോഴേക്കും മന്ത്രി അമ്മയേയും മകളേയും തിരിച്ചറിഞ്ഞു. അത്ഭുതത്തോടെ നിന്നവരോട് മന്ത്രി പറഞ്ഞു: രണ്ടുപശുക്കളുടേയും മുമ്പില്‍ തീറ്റ വെച്ചപ്പോള്‍ ആദ്യപശു തന്റെ തീറ്റ വേഗത്തില്‍ കഴിച്ച് രണ്ടാമത്തെ പശുവിന്റെ പാത്രത്തില്‍ നിന്നും കഴിക്കാന്‍ തുടങ്ങി. രണ്ടാമത്തെ പശുവാകട്ടെ ആദ്യപശുവിന് വേണ്ടി തന്റെ പാത്രം നീക്കിവെച്ചുകൊടുക്കുകയും ചെയ്തു. ഒരമ്മയ്ക്ക് മാത്രമേ അങ്ങിനെ ചെയ്യാന്‍ സാധിക്കൂ.. ഒരാള്‍ ആരെന്നറിയാന്‍ അയാളുടെ അനുദിന കര്‍മ്മങ്ങള്‍ വീക്ഷിച്ചാല്‍ മതി. യഥാര്‍ത്ഥ സ്വഭാവം ആര്‍ക്കും അധികകാലം പുറത്തുകാണിക്കാതിരിക്കാനാവില്ല. അസ്ഥിത്വത്തില്‍ നന്മയുളളവരും നന്മ ഒരു അലങ്കാരമായി കൊണ്ടുനടക്കുന്നവരുമുണ്ട്. ആദ്യകൂട്ടരുടെ രക്തത്തിലും തലച്ചോറിലും നന്മയുണ്ടാകും. പ്രതിഫലം കിട്ടിയാലും ഇല്ലെങ്കിലും അവരില്‍ നിന്നും നന്മമാത്രമേ പുറപ്പെടൂ. എന്നാല്‍ നന്മയെ അലങ്കാരമാക്കുന്നവര്‍ക്ക് ആകര്‍ഷണീയത മാത്രമാണ് പ്രധാനം. വേരുകളിലുളളവ മാത്രമേ ഇലകളിലേക്ക് വ്യാപിക്കൂ.. അടിസ്ഥാന സ്വഭാവം നിര്‍മ്മലമാക്കണം.. തെറ്റുകള്‍ തിരുത്തണം.. കുറവുകള്‍ പരിഹരിക്കപ്പെടണം.. ആവശ്യമായത് കൂട്ടിച്ചേര്‍ക്കണം..അശുദ്ധമായത് ഒഴിവാക്കണം.. തുടര്‍ച്ചയായ പുനരുദ്ധാരണ പ്രവര്‍ത്തനങ്ങളിലൂടെ നമുക്ക് നമ്മെ പുനരുദ്ധരിക്കാം... നന്മയുടെ ഉറവിടമാക്കാം - ശുഭദിനം.
➖➖➖➖➖➖➖➖

06/06/2024

06/06/2024

📡 *പ്രഭാത വാർത്തകൾ*

✍️ Published -
6/ജൂൺ/24 -വ്യാഴം-ഇടവം- 23

◾ ഉപാധികളുടെ അടിസ്ഥാനത്തിൽ ബിജെപി നേതാവ് നരേന്ദ്ര മോദിയെ വീണ്ടും പ്രധാനമന്ത്രിയാക്കാന്‍ തീരുമാനിച്ചു. നരേന്ദ്ര മോദി സര്‍ക്കാര്‍ രൂപികരിക്കുന്നതിനെ നിതീഷ് കുമാറും ചന്ദ്രബാബു നായിഡുവും പിന്തുണച്ചു. ജെ ഡി യുവും ടി ഡി പിയും പിന്തുണ കത്ത് നല്‍കുകയും ചെയ്തു. എന്തൊക്കെ ഉപാധികളാണ് തങ്ങള്‍ക്കുള്ളതെന്ന കാര്യത്തില്‍ ജെ ഡി യുവും ടി ഡി പിയും തീരുമാനം അറിയിച്ചതായും വിവരമുണ്ട്.

◾പ്രതിപക്ഷ തിരിച്ചുവരവിൽ ഞെട്ടിയ പ്രധാനമന്ത്രി നരേന്ദ്ര മോദി രാഷ്ട്രപതി ദ്രൗപദി മുര്‍മുവിന് രാജിക്കത്ത് നല്‍കി. രാഷ്ട്രപതി പ്രധാനമന്ത്രിയുടെ രാജി സ്വീകരിച്ചു. തുടര്‍ന്ന് കാവല്‍ മന്ത്രിസഭ തുടരാന്‍ രാഷ്ട്രപതി നിര്‍ദ്ദേശം നല്‍കി. രാഷ്ട്രപതിയുമായുള്ള കൂടിക്കാഴ്ചയ്ക്ക് ശേഷം പ്രധാനമന്ത്രി തന്റെ ഔദ്യോഗിക വസതിയിലേക്ക് മടങ്ങി. കേന്ദ്ര മന്ത്രിസഭയുടെ അവസാന യോഗത്തിന് ശേഷമാണ് പ്രധാനമന്ത്രി രാജിക്കത്ത് നല്‍കാനായി രാഷ്ട്രപതി ഭവനിലേക്ക് പോയത്.

◾ മൂന്നാം മോദി സര്‍ക്കാരിനെതിരെ ശക്തമായ പ്രതിപക്ഷമാകാന്‍ തീരുമാനിച്ച് ഇന്ത്യ സഖ്യം. ദില്ലിയില്‍ ചേര്‍ന്ന സഖ്യ കക്ഷികളുടെ യോഗം സര്‍ക്കാര്‍ രൂപീകരണ ചര്‍ച്ചകള്‍ വേണ്ടെന്നു വെക്കുകയായിരുന്നു. കേന്ദ്രത്തില്‍ സര്‍ക്കാരുണ്ടാക്കാന്‍ തല്‍ക്കാലം ശ്രമിക്കേണ്ടെന്നും ഉചിതമായ സമയത്ത് ഉചിതമായ നടപടി സ്വീകരിക്കാനും ഇന്ത്യാ സഖ്യം തീരുമാനിച്ചു. ഭരണഘടന സംരക്ഷണത്തിനൊപ്പം നില്‍ക്കാന്‍ താല്‍പര്യമുള്ള കക്ഷികള്‍ക്ക് സഖ്യത്തിലേക്ക് വരാമെന്ന് കോണ്‍ഗ്രസ് അധ്യക്ഷന്‍ മല്ലികാര്‍ജ്ജുന്‍ ഖര്‍ഗെ പറഞ്ഞു.

◾ ഡല്‍ഹിയില്‍ചേര്‍ന്ന എന്‍.ഡി.എ. യോഗത്തില്‍ ഘടകകക്ഷികള്‍ ആവശ്യപ്പെട്ടത് സ്പീക്കര്‍ സ്ഥാനം മുതല്‍ പ്രധാനപ്പെട്ട വകുപ്പുകള്‍ വരെയെന്ന് റിപ്പോര്‍ട്ടുകള്‍. ലോക്‌സഭാ അധ്യക്ഷസ്ഥാനത്തിന് പുറമേ ടി.ഡി.പി. അധ്യക്ഷന്‍ ചന്ദ്രബാബു നായിഡു ആവശ്യപ്പെട്ടത് എട്ട് ക്യാബിനറ്റ് മന്ത്രിസ്ഥാനവും ഒരു സഹമന്ത്രിസ്ഥാനവും. സ്പീക്കര്‍ സ്ഥാനവും മൂന്ന് ക്യാബിനറ്റ് പദവികളുമാണ് ജെ.ഡി.യു. ആവശ്യപ്പെട്ടതെന്നാണ് സൂചന. ക്യാബിനറ്റ് പദവിയുള്ള ഒരുമന്ത്രിസ്ഥാനം എല്‍.ജെ.പി. നേതാവ് ചിരാഗും ഹിന്ദുസ്ഥാനി അവാം മോര്‍ച്ച നേതാവ് ജിതന്‍ റാം മഞ്ചിയും ജെ.ഡി.എസ്. നേതാവ് എച്ച്.ഡി. കുമാരസ്വാമിയും ആവശ്യപ്പെട്ടുവെന്നാണ് വിവരം. ഒരു ക്യാബിനറ്റ് പദവിയും രണ്ട് സഹമന്ത്രിസ്ഥാനവും ശിവസേന നേതാവും മഹാരാഷ്ട്ര മുഖ്യമന്ത്രിയുമായ ഏക്‌നാഥ് ഷിന്ദേയും യോഗത്തില്‍ ചോദിച്ചുവെന്ന വിവരവുമുണ്ട്.

◾ കഴിഞ്ഞ മാസം അവസാനം കൊച്ചി നഗരത്തെ വെള്ളത്തില്‍ മുക്കിയ കനത്തമഴ മേഘവിസ്ഫോടനം തന്നെയെന്ന് സ്ഥിരീകരിച്ച് കാലാവസ്ഥ നിരീക്ഷണ കേന്ദ്രം. കളമശ്ശേരിയിലെ മഴ മാപിനിയില്‍ അന്ന് ഒരു മണിക്കൂറില്‍ രേഖപ്പെടുത്തിയത് 100 മി.മീ മഴയായിരുന്നു. 28നായിരുന്നു കൊച്ചി നഗരത്തില്‍ ശക്തമായ മഴയും വെള്ളക്കെട്ടും രൂപപ്പെട്ടത്. കേരളത്തില്‍ റിപ്പോര്‍ട്ട് ചെയ്ത രണ്ടാമത്തെ മേഘവിസ്ഫോടനമാണിത്.

◾ യു.ഡി.എഫിന് അനുകൂലമായ ജനവിധി ജനവിരുദ്ധ സര്‍ക്കാരിന്റെ മുഖത്തേറ്റ പ്രഹരമാണെന്ന് പ്രതിപക്ഷ നേതാവ് വിഡി സതീശന്‍. സംസ്ഥാന സര്‍ക്കാരിനെ ജനങ്ങള്‍ എത്രമാത്രം വെറുക്കുന്നു എന്നതിന്റെ പ്രതിഫലനം തെരഞ്ഞെടുപ്പ് ഫലത്തില്‍ കണ്ടു . സര്‍ക്കാരിന്റെ വീഴ്ചകളും ജനദ്രോഹ നടപടികളും തുറന്നു കാട്ടുന്നതില്‍ യു.ഡി.എഫ് വിജയിച്ചു. കേരളത്തില്‍ എല്‍.ഡി.എഫിന് പ്രതീക്ഷിച്ച വിജയം നേടാനായില്ലെന്ന് സമ്മതിക്കുന്ന മുഖ്യമന്ത്രി അതിന്റെ കാരണങ്ങളെ കുറിച്ച് മിണ്ടുന്നില്ല. മാധ്യമങ്ങളുടെ മുന്നില്‍ വരാനോ ചോദ്യങ്ങളെ നേരിടാനോ മുഖ്യമന്ത്രി തയാറല്ല എന്നും അദ്ദേഹം കുറ്റപ്പെടുത്തി .

◾ തിരഞ്ഞെടുപ്പ് പരാജയം വിശദമായി വിലയിരുത്താന്‍ സി.പി.എം അഞ്ചുദിവസത്തെ സംസ്ഥാന നേതൃയോഗങ്ങള്‍ വിളിച്ചു. ഇടതുമുന്നണിയുടെ അടിത്തറ ഭദ്രമെന്നും യു.ഡി.എഫിന്റെ വോട്ടാണ് കൂടുതല്‍ പോയതെന്നും എം.വി.ഗോവിന്ദന്‍ ന്യായീകരിച്ചു. സംസ്ഥാനഭരണം വിലയിരുത്തിയിട്ടില്ല എന്ന് പറയാനാവില്ലെന്ന് സി.പി.ഐ തുറന്നടിച്ചു.

◾ തൃശൂര്‍ ലോക്സഭാ മണ്ഡലത്തില്‍ തിളക്കമുള്ള വിജയം സ്വന്തമാക്കിയ ബിജെപി നേതാവ് സുരേഷ് ഗോപിക്ക് വന്‍ സ്വീകരണം നല്‍കി തൃശൂര്‍. വിദ്യാര്‍ഥി കോര്‍ണറില്‍ നിന്ന് ആരംഭിച്ച റോഡ് ഷോയില്‍ നിരവധി പ്രവര്‍ത്തകരാണ് അണിനിരന്നത്. റോഡിന്റെ ഇരുവശങ്ങളിലും തിങ്ങിനിറഞ്ഞ ജനത്തെ അഭിവാദ്യം ചെയ്തു കൊണ്ടാണ് സുരേഷ് ഗോപിയുടെ റോഡ് ഷോ കടന്നു പോയത്. തൃശൂരിനെ ഹൃദയത്തില്‍ വെച്ച് പ്രവര്‍ത്തിക്കുമെന്ന് സുരേഷ് ഗോപി പറഞ്ഞു.

◾ കൊല്ലത്ത് നേടിയത് രാഷ്ട്രീയ വിജയമെന്ന് എന്‍കെ പ്രേമചന്ദ്രന്‍. അപകീര്‍ത്തികരമായ ആരോപണം തന്നെയാണ് കൊല്ലത്ത് തനിക്കെതിരെ ഇത്തവണ നടന്നത്. താന്‍ ബിജെപിയില്‍ പോകുമെന്ന് സിപിഎം വ്യാജപ്രചാരണം നടത്തി. അതെല്ലാം പൊളിഞ്ഞുവെന്നും കൊല്ലത്ത് നല്ല ഭൂരിപക്ഷത്തില്‍ വിജയിപ്പിച്ച എല്ലാ വോട്ടര്‍മാര്‍ക്കും നന്ദി പറയുന്നുവെന്നും അദ്ദേഹം പറഞ്ഞു. ഭൂരിപക്ഷ - ന്യൂനപക്ഷ സമൂഹം ഒന്നാകെ യുഡിഎഫിനെ പിന്തുണച്ചു. കൊല്ലത്ത് ഉള്‍പ്പടെ എല്‍ഡിഎഫില്‍ നിന്നും യുഡിഎഫില്‍ നിന്നും ബിജെപിയിലേക്ക് വോട്ട് ചോര്‍ച്ച ഉണ്ടായി. ഇത് ഗൗരവതരണമാണെന്നും കര്‍ശനമായി പരിശോധിക്കേണ്ടതുണ്ടെന്നും അദ്ദേഹം പറഞ്ഞു.

◾ കാറഡുക്ക സൊസെറ്റി തട്ടിപ്പില്‍ മുഖ്യ പ്രതി കെ രതീശന്‍, ഇയാളുടെ റിയല്‍ എസ്റ്റേറ്റ് പങ്കാളി മഞ്ഞക്കണ്ടി ജബ്ബാര്‍ എന്നിവര്‍ പിടിയിലായി. തമിഴ്നാട്ടിലെ നാമക്കല്ലില്‍ നിന്നാണ് ഇരുവരും പിടിയിലായതെന്നാണ് വിവരം. നേരത്തെ കേസില്‍ മൂന്ന് പേര്‍ അറസ്റ്റിലായിരുന്നു.സിപിഎം നിയന്ത്രണത്തിലുള്ള കാസര്‍കോട് കാറഡുക്ക അഗ്രിക്കള്‍ച്ചറിസ്റ്റ് വെല്‍ഫയര്‍ കോപ്പറേറ്റീവ് സൊസൈറ്റിയിലെ തട്ടിപ്പില്‍ കഴിഞ്ഞ മാസം 13 നായിരുന്നു പൊലീസ് കേസെടുത്തത് .മൂന്ന് പങ്കാളികളെ ആദൂര്‍ പൊലീസ് നേരത്തെ അറസ്റ്റ് ചെയ്തിരുന്നു.

◾ സമസ്തയിലെ ലീഗ് വിരുദ്ധ ചേരി മുസ്ലിംലീഗിനെതിരായ നീക്കം മയപ്പെടുത്തി . ഇടത് അനുകൂല നിലപാട് സ്വീകരിച്ചിട്ടും തെരഞ്ഞെടുപ്പില്‍ ലീഗ് സ്ഥാനാര്‍ത്ഥികള്‍ക്ക് മികച്ച ഭൂരിപക്ഷം ലഭിച്ച സാഹചര്യത്തിലാണ് പിന്മാറ്റം. തിരഞ്ഞെടുപ്പില്‍ സിപിഎമ്മിന് വോട്ടുചെയ്യാന്‍ പറഞ്ഞിട്ടില്ലെന്ന് സമസ്ത സെക്രട്ടറി ഉമര്‍ ഫൈസി മുക്കം പ്രതികരിച്ചു.

◾ പത്തനംതിട്ട സിപിഎമ്മില്‍ പരസ്യ പ്രതിഷേധം. സ്ഥാനാര്‍ഥി നിര്‍ണയം പാളിയെന്ന സൂചന നല്‍കി ഏരിയ കമ്മിറ്റി അംഗത്തിന്റെ ഫേസ്ബുക്ക് പോസ്റ്റ് . സംസ്ഥാന കമ്മിറ്റി അംഗം രാജു എബ്രഹാമിന്റെ ചിത്രം വെച്ചാണ് ഏരിയ കമ്മിറ്റി അംഗമായ അന്‍സാരി അസീസിന്റെ ഫേസ്ബുക്ക് പോസ്റ്റ്. 'വീട്ടില്‍ സ്വര്‍ണ്ണം വെച്ചിട്ട് എന്തിന് നാട്ടില്‍ തേടി നടപ്പൂ'- എന്നായിരുന്നു പോസ്റ്റ്. എന്നാല്‍ തോല്‍വിക്ക് പിന്നാലെ ഇട്ട പോസ്റ്റ് വിവാദമായതോടെ ഡിലീറ്റ് ചെയ്യുകയായിരുന്നു. പത്തനംതിട്ടയില്‍ 66,119 വോട്ടിനാണ് എല്‍ഡിഎഫ് സ്ഥാനാര്‍ത്ഥി ഡോ. തോമസ് ഐസകിനെ യുഡിഎഫ് സ്ഥാനാര്‍ത്ഥി ആന്റോ ആന്റണി തോല്‍പിച്ചത്.

◾ രാഹുല്‍ ഗാന്ധി റായ്ബറേലി നിലനിര്‍ത്തി, വയനാട്ടില്‍ പ്രിയങ്ക ഗാന്ധിയെ മത്സരിപ്പിക്കണമെന്നാണ് തന്റെ വ്യക്തിപരമായ അഭിപ്രായമെന്ന് രാജ് മോഹന്‍ ഉണ്ണിത്താന്‍ എംപി. അതേസമയം തൃശൂരില്‍ കെ മുരളീധരന്‍ ഉന്നയിച്ച കാര്യങ്ങള്‍ പാര്‍ട്ടി സമഗ്രമായി പഠിക്കണമെന്നും രാജ്മോഹന്‍ ഉണ്ണിത്താന്‍ ആവശ്യപ്പെട്ടു.

◾ തിരെഞ്ഞെടുപ്പില്‍ തിരിച്ചടിയായത് സംസ്ഥാന സര്‍ക്കാരിന്റെ സാമ്പത്തിക പ്രതിസന്ധിയാണെന്ന് എന്‍.സി.പി സംസ്ഥാന പ്രസിഡന്റ് പി.സി ചാക്കോ. കേന്ദ്ര സര്‍ക്കാര്‍ സംസ്ഥാനത്ത് സാമ്പത്തിക ഉപരോധം ഏര്‍പെടുത്തിയത് തിരഞ്ഞെടുപ്പ് തോല്‍ക്കാന്‍ വേണ്ടിയായിരുന്നുവെന്ന് അദ്ദേഹം വിമര്‍ശിച്ചു. പ്രതിപക്ഷത്തിന്റെ റോള്‍ മാധ്യമങ്ങള്‍ എടുത്തു. മാധ്യമങ്ങള്‍ക്ക് ഇടതുപക്ഷവിരുദ്ധ നിലപാടുണ്ടെന്നും അദ്ദേഹം കുറ്റപ്പെടുത്തി. അതിന്റെ കാരണം എന്താണെന്ന് സര്‍ക്കാര്‍ ആലോചിക്കണമെന്നും അദ്ദേഹം പറഞ്ഞു.

◾ പുതുപ്പള്ളിയിലെ ഉമ്മന്‍ചാണ്ടിയുടെ കല്ലറയില്‍ എത്തി പ്രാര്‍ത്ഥിച്ച് ഷാഫി പറമ്പില്‍. തന്നെ ഉമ്മന്‍ചാണ്ടിയുമായി താരതമ്യം ചെയ്തുള്ള വിലയിരുത്തലുകള്‍ വിവരക്കേടാണെന്ന് ഷാഫി പറഞ്ഞു.സ്ഥാനാര്‍ത്ഥി പ്രഖ്യാപനത്തിന് പിന്നാലെ ഉമ്മന്‍ചാണ്ടിയുടെ കല്ലറയില്‍ പ്രാര്‍ത്ഥിച്ചു തുടങ്ങിയ ഷാഫി, വിജയത്തിന് ശേഷവും ആദ്യമെത്തിയത് അവിടേക്കുതന്നെ. പാലക്കാട് ഉപതെരഞ്ഞെടുപ്പില്‍ യുഡിഎഫ് ജയിക്കുമെന്ന് അവകാശപ്പെട്ട ഷാഫി, സ്ഥാനാര്‍ഥിയെ പാര്‍ട്ടി തീരുമാനിക്കുമെന്നും പറഞ്ഞു.

◾ കെഎസ്ആര്‍ടിസി സ്റ്റുഡന്‍സ് കണ്‍സഷന്‍ ആപ്പ് ഇനി ഗൂഗിള്‍ പ്ലേ സ്റ്റോറിലും, ആപ്പിള്‍ സ്റ്റോറിലും. സര്‍ക്കാര്‍, അര്‍ദ്ധസര്‍ക്കാര്‍ വിദ്യാഭ്യാസ സ്ഥാപനങ്ങളുടെ പട്ടിക കഴിഞ്ഞ ദിവസം കെഎസ്ആര്‍ടിസി പ്രസിദ്ധീകരിച്ചിരുന്നു. വിദ്യാര്‍ത്ഥി കണ്‍സഷന്‍ ഓണ്‍ലൈനാക്കുന്നതിന്റെ ഭാഗമായാണ് ഇത്. സ്ഥാപനങ്ങളുടെ ലോഗിന്‍ ക്രിയേറ്റ് ചെയ്ത പട്ടിക പ്രസിദ്ധീകരിച്ചെന്ന് കെഎസ്ആര്‍ടിസി അറിയിച്ചു.

◾ തമിഴ്നാട്ടില്‍ ഒരു സീറ്റ് പോലും നേടാനാവാതെയുണ്ടായ തിരിച്ചടി ബിജെപിയുടെ പരാജയമായി കാണുന്നില്ലെന്നും ഇപ്പോള്‍ ആത്മവിശ്വാസം വര്‍ദ്ധിച്ചെന്നും കെ അണ്ണാമലൈ. ഒഡിഷയില്‍ നേടിയ ജയം തമിഴ്നാട്ടിലും ബിജെപി ആവര്‍ത്തിക്കുമെന്നും എന്റെ അച്ഛന്‍ കരുണാനിധി ആയിരുന്നെങ്കില്‍ ഞാനും ജയിച്ചേനെയെന്നും അണ്ണാമലൈ പറഞ്ഞു. എന്റെ അച്ഛന്‍ ഒരു സാധാരണ കര്‍ഷകനാണെന്നും സമയമെടുത്ത് കാര്യങ്ങള്‍ ചെയ്യണമെന്നാണ് അച്ഛന്‍ പഠിപ്പിച്ചതെന്നും അണ്ണാമലൈ കൂട്ടിച്ചേര്‍ത്തു.

◾ മഹാരാഷ്ട്രയിലെ ലോക് സഭ തിരഞ്ഞെടുപ്പില്‍ എന്‍ ഡി എ സഖ്യത്തിനേറ്റ തിരിച്ചടിയില്‍ അമ്പരിപ്പിക്കുന്ന പ്രഖ്യാപനവുമായി ഉപമുഖ്യമന്ത്രി ദേവേന്ദ്ര ഫഡ്നാവിസ്. തിരഞ്ഞെടുപ്പ് തോല്‍വിയുടെ ഉത്തരവാദിത്വം ഏറ്റെടുത്ത് താന്‍ ഉപമുഖ്യമന്ത്രി സ്ഥാനം രാജിവയ്ക്കുമെന്നാണ് ഫഡ്നാവിസ് പ്രഖ്യാപിച്ചത്. മഹാവികാസ് അഘാഡിയ്ക്ക് സഹതാപ വോട്ടുകള്‍ ലഭിച്ചെന്നും അതാണ് ബി ജെ പി സഖ്യത്തിന് തിരിച്ചടിയായതെന്നും അദ്ദേഹം വ്യക്തമാക്കി. ഫഡ്നാവിസ് രാജിവയ്ക്കില്ലെന്ന് ബി ജെ പി നേതാവും മന്ത്രിയുമായ ഗിരീഷ് മഹാജന്‍ വ്യക്തമാക്കി.

◾ സ്വയം പ്രഖ്യാപിത ചാണക്യന്‍ സ്വയം വിരിച്ച വലയില്‍ കുടുങ്ങിയെന്നും ഇപ്പോള്‍ സഖ്യത്തിനായി പിച്ചച്ചട്ടിയുമായി ഇരക്കുകയാണെന്നും പരിഹസിച്ച് കോണ്‍ഗ്രസ് നേതാവ് ജയറാം രമേശ്. ടിഡിപി അധ്യക്ഷന്‍ ചന്ദ്രബാബു നായിഡുവിനെയും ജെഡിയുവിന്റെ നിതീഷ് കുമാറിനെയും പഴയ ചില കാര്യങ്ങള്‍ ഓര്‍മ്മിപ്പിച്ച് ശിവ സേന ഉദ്ദവ് താക്കറെ പക്ഷവും രംഗത്ത് വന്നിരുന്നു. ബിജെപി എങ്ങനെയാണ് നിങ്ങളോട് പെരുമാറിയതെന്ന് ഓര്‍ക്കണമെന്നാണ് ഓര്‍മ്മപ്പെടുത്തല്‍.

◾ അസമിലെ ദുബ്രി ലോക്സഭ മണ്ഡലത്തില്‍ മത്സരിച്ച കോണ്‍ഗ്രസ് സ്ഥാനാര്‍ത്ഥി രാഖിബുള്‍ ഹുസൈന് ലോക്‌സഭാ തിരഞ്ഞെടുപ്പിലെ ഏറ്റവും ഉയര്‍ന്ന ജയം . എഐയുഡിഎഫ് നേതാവ് ബദ്ദാറുദ്ദീന്‍ അജ്മലിനെ 10,12,476 വോട്ടുകളുടെ ഭൂരിപക്ഷത്തിലാണ് കോണ്‍ഗ്രസ് സ്ഥാനാര്‍ത്ഥി പരാജയപ്പെടുത്തിയത്. ബദ്ദാറുദ്ദീന്‍ അജ്മലിന് 4,59,409 വോട്ടുകള്‍ ലഭിച്ചപ്പോള്‍ കോണ്‍ഗ്രസ് സ്ഥാനാര്‍ത്ഥി രാഖിബുള്‍ ഹുസൈന് 14,71,885 വോട്ടുകളാണ് ലഭിച്ചത്.

◾ ഡല്‍ഹിയിലേക്കുള്ള വിമാന യാത്രയില്‍ നിതീഷ് കുമാറിനൊപ്പം ഇരിക്കുന്ന ചിത്രം പുറത്ത് വന്നതില്‍ വിശദീകരണവുമായി തേജസ്വി യാദവ്. നിതീഷ് കുമാര്‍ വിളിച്ച് അടുത്തിരുത്തിയതാണ് എന്നാണ് തേജസ്വിയുടെ പ്രതികരണം. വ്യാഖ്യാനങ്ങള്‍ വേണ്ടെന്നും തേജസ്വി വ്യക്തമാക്കി. എന്‍ ഡി എ യോഗത്തിനായാണ് നിതീഷ് വിമാനത്തില്‍ കയറിയത്. തേജസ്വി ഇന്ത്യ മുന്നണിയുടെ യോഗത്തില്‍ പങ്കെടുക്കാനായാണ് ഡല്‍ഹിയിലേക്ക് പോയത്.

◾ ജനാധിപത്യത്തേയും ഭരണഘടനയേയും അപകടത്തിലാക്കുന്നവരെ പിന്തുണയ്ക്കാന്‍ ടി.ഡി.പി. നേതാവ് എന്‍. ചന്ദ്രബാബു നായിഡുവും ജെ.ഡി.യു. നേതാവ് നിതീഷ് കുമാറും തയ്യാറാവുമെന്ന് കരുതുന്നില്ലെന്ന് ശിവസേന വക്താവ് സഞ്ജയ് റാവുത്ത്. നായിഡുവും നിതീഷും എല്ലാവരുടേയും സുഹൃത്തുക്കളാണെന്നും അദ്ദേഹം പറഞ്ഞു.

◾ ഇടക്കാല ജാമ്യം നീട്ടിനല്‍കണമെന്നാവശ്യപ്പെട്ട് മുഖ്യമന്ത്രി അരവിന്ദ് കെജ്രിവാള്‍ സമര്‍പ്പിച്ച ഹര്‍ജി ഡല്‍ഹി റൗസ് അവന്യൂ കോടതി തള്ളി. ആരോഗ്യ പ്രശ്നങ്ങള്‍ ഉള്ളതിനാല്‍ ഏഴുദിവസത്തേക്ക് ജാമ്യം നീട്ടണമെന്നായിരുന്നു കെജ്രിവാളിന്റെ ആവശ്യം. എന്നാല്‍ ഇത് അംഗീകരിക്കാഞ്ഞ കോടതി, കെജ്രിവാളിന് വൈദ്യപരിശോധന നടത്താന്‍ അധികൃതരോട് നിര്‍ദേശിക്കുകയും ജുഡീഷ്യല്‍ കസ്റ്റഡി കാലാവധി ജൂണ്‍ 19 വരെ നീട്ടുകയും ചെയ്തു.

◾ ടി20 ലോകകപ്പില്‍ അയര്‍ലന്‍ഡിനെ എട്ടു വിക്കറ്റിന് തകര്‍ത്ത് ഇന്ത്യ. ആദ്യം ബാറ്റ് ചെയ്ത അയര്‍ലന്‍ഡിനെ 16 ഓവറില്‍ 96 റണ്‍സിന് പുറത്താക്കിയ ഇന്ത്യ 12.2 ഓവറില്‍ രണ്ടു വിക്കറ്റ് മാത്രം നഷ്ടപ്പെടുത്തി ലക്ഷ്യം കണ്ടു. 37 പന്തില്‍ 52 റണ്‍സെടുത്ത ക്യാപ്റ്റന്‍ രോഹിത് ശര്‍മയുടെ പ്രകടനമാണ് ഇന്ത്യയുടെ ജയം എളുപ്പമാക്കിയത്.

◾ പ്രമുഖ ബാങ്കിതര ധനകാര്യസ്ഥാപനങ്ങളിലൊന്നായ മുത്തൂറ്റ് മിനി ഫിനാന്‍സിയേഴ്സ് 2024 മാര്‍ച്ച് 31ന് അവസാനിച്ച സാമ്പത്തിക വര്‍ഷം വരുമാന വളര്‍ച്ച, ലാഭവിഹിതം, കൈകാര്യം ചെയ്യുന്ന ആസ്തികള്‍ എന്നിവയുള്‍പ്പെടെ എല്ലാ പ്രധാന മേഖലകളിലും മികച്ച വളര്‍ച്ച കൈവരിച്ചു. കമ്പനിയുടെ വരുമാനം തൊട്ടു മുന്‍ സാമ്പത്തിക വര്‍ഷത്തെ 544 കോടി രൂപയില്‍ നിന്ന് 23.4 ശതമാനം വളര്‍ച്ചയോടെ 672 കോടി രൂപയില്‍ എത്തി. ഇക്കാലയളവില്‍ ലാഭം മുന്‍ സാമ്പത്തിക വര്‍ഷത്തെ 81.77 കോടിയെ അപേക്ഷിച്ച് 35.20 ശതമാനം വളര്‍ച്ചയോടെ 110.56 കോടി രൂപയുമായി. 2020 സാമ്പത്തിക വര്‍ഷം 1.34 ശതമാനമായിരുന്ന നിഷ്‌ക്രിയ ആസ്തി 2024 സാമ്പത്തിക വര്‍ഷം 0.72 ശതമാനമായി കുറച്ച് കമ്പനിയുടെ ആസ്തി നിലവാരത്തില്‍ മികച്ച പ്രകടനം നിലനിര്‍ത്തി. കഴിഞ്ഞ നാല് സാമ്പത്തിക വര്‍ഷങ്ങളില്‍ 3 ലെവല്‍ അപ്ഗ്രേഡ് ചെയ്ത് കമ്പനിക്ക് എ-സ്റ്റേബിള്‍ റേറ്റിംഗും ഉണ്ട്. എല്ലാ പ്രധാന മേഖലകളിലും ഇരട്ട അക്ക വളര്‍ച്ചയോടെ മികച്ച വളര്‍ച്ച കൈവരിച്ചതില്‍ സന്തോഷമുണ്ടെന്നും മികച്ച സ്വര്‍ണ്ണ വായ്പ സേവനങ്ങള്‍ക്കൊപ്പം ഉപഭോക്താക്കളുടെ വൈവിധ്യമാര്‍ന്ന വായ്പ ആവശ്യകതകള്‍ നിറവേറ്റുന്നതിനായി പുതിയ പദ്ധതികള്‍ അവതരിപ്പിക്കാനും ലക്ഷ്യമിടുന്നുവെന്ന് മുത്തൂറ്റ് മിനി ഫിനാന്‍സിയേഴ്സ് മാനേജിംഗ് ഡയറക്ടര്‍ മാത്യു മുത്തൂറ്റ് പറഞ്ഞു. 2027ഓടെ കൈകാര്യം ചെയ്യുന്ന ആസ്തികള്‍ 7,500 കോടിയാക്കാനാണ് കമ്പനി ലക്ഷ്യമിടുന്നത്. പുതിയ വിപണികളില്‍ പ്രവര്‍ത്തനങ്ങള്‍ ശക്തിപ്പെടുത്തുന്നതിന്റെ ഭാഗമായി അടുത്ത മൂന്ന് വര്‍ഷത്തിനുള്ളില്‍ 3,500 പുതിയ ജീവനക്കാരെ ഉള്‍പ്പെടുത്താന്‍ ലക്ഷ്യമിടുന്നു. കഴിഞ്ഞ ഒരു വര്‍ഷത്തിനിടയില്‍ പുതിയ 61 ശാഖകള്‍ തുറന്ന കമ്പനി 2 ലക്ഷം പുതിയ ഉപഭോക്താക്കളെയും നേടി.

◾ ജൂണില്‍ ഹ്യുണ്ടായിയുടെ മുന്‍നിര എസ്യുവി ട്യൂസണില്‍ രണ്ടുലക്ഷം രൂപ വരെ ക്യാഷ് ഡിസ്‌കൗണ്ട് ലഭിക്കും. 2023 മോഡല്‍ വര്‍ഷത്തിനും 2024 മോഡല്‍ വര്‍ഷത്തിനും കമ്പനി ട്യൂസണില്‍ വ്യത്യസ്ത കിഴിവുകള്‍ വാഗ്ദാനം ചെയ്യുന്നു. 2023 മോഡല്‍ വര്‍ഷത്തിലുള്ള ട്യൂസണിന്റെ ഡീസല്‍ വേരിയന്റിന് രണ്ടുലക്ഷം രൂപ ക്യാഷ് കിഴിവ് ലഭ്യമാണ്. അതേ സമയം, പെട്രോള്‍ വേരിയന്റ് മോഡല്‍ 2024-ലും ഡീസല്‍ വേരിയന്റിന് 2024-ല്‍ 50,000 രൂപയും ക്യാഷ് ഡിസ്‌കൗണ്ട് ലഭിക്കും. ഹ്യൂണ്ടായ് ട്യൂസണില്‍ ഉപഭോക്താക്കള്‍ക്ക് രണ്ട് എഞ്ചിനുകളുടെ ഓപ്ഷന്‍ ലഭിക്കും. 2.0 ലിറ്റര്‍ ഡീസല്‍ എഞ്ചിന്‍ ആണ് ഒരെണ്ണം. ഈ എഞ്ചിന്‍ പരമാവധി 186 ബിഎച്ച്പി കരുത്തും 416 എന്‍എം പീക്ക് ടോര്‍ക്കും സൃഷ്ടിക്കാന്‍ പ്രാപ്തമാണ്. 2.0 ലിറ്റര്‍ പെട്രോള്‍ എഞ്ചിനാണ് രണ്ടാമത്തേത്. ഈ എഞ്ചിന്‍ പരമാവധി 156 യവു കരുത്തും 192 ചാ ന്റെ പീക്ക് ടോര്‍ക്കും സൃഷ്ടിക്കാന്‍ പ്രാപ്തമാണ്. കാറിന്റെ രണ്ട് എഞ്ചിനുകളും ടോര്‍ക്ക് കണ്‍വെര്‍ട്ടര്‍ ഓട്ടോമാറ്റിക് ഗിയര്‍ബോക്‌സുമായി ജോടിയാക്കിയിരിക്കുന്നു. 29.02 ലക്ഷം മുതല്‍ 35.94 ലക്ഷം രൂപ വരെയാണ് ഹ്യൂണ്ടായ് ട്യൂസണിന്റെ എക്സ് ഷോറൂം വില. രാജ്യത്തെ വിവിധ ഭൂപ്രദശങ്ങള്‍, ഡീലര്‍ഷിപ്പുകള്‍, സ്റ്റോക്ക്, വേരിയന്റ്, നിറം തുടങ്ങിയവയെ അടിസ്ഥാനമാക്കി ഇത് വ്യത്യാസപ്പെടാം. അത്തരമൊരു സാഹചര്യത്തില്‍, ഒരു കാര്‍ വാങ്ങുന്നതിന് മുമ്പ്, ഡിസ്‌കൗണ്ടുമായി ബന്ധപ്പെട്ട എല്ലാ വിശദാംശങ്ങള്‍ക്കായി നിങ്ങളുടെ തൊട്ടടുത്ത ഡീലര്‍ഷിപ്പിനെ സമീപിക്കുക.

◾ എന്നും വ്യത്യസ്തത നിറഞ്ഞ കഥാപാത്രങ്ങളിലൂടെ എത്തി പ്രേക്ഷകരെ അമ്പരപ്പിക്കുന്ന ആളാണ് നടന്‍ ഇന്ദ്രന്‍സ്. കോമഡി താരമായി എത്തി ഇന്ന് ക്യാരക്ടര്‍ റോളുകളില്‍ മറ്റാരാലും പകര്‍ന്നാടാനാകാത്ത വിധം അദ്ദേഹം അമ്പരപ്പിച്ചു കൊണ്ടിരിക്കയാണ്. അക്കൂട്ടത്തിലേക്കെത്തുന്ന ചിത്രമാണ് 'ജമാലിന്റെ പുഞ്ചിരി'. ഇന്ദ്രന്‍സ് സവിശേഷതകള്‍ ഏറെയുള്ള ജമാല്‍ എന്ന കേന്ദ്ര കഥാപാത്രത്തെ അവതരിപ്പിക്കുന്ന സോഷ്യല്‍ ക്രൈം ത്രില്ലറാണ് 'ജമാലിന്റെ പുഞ്ചിരി'. പ്രതികരണ ശേഷി നഷ്ടപ്പെട്ട ഇന്നത്തെ സമൂഹത്തില്‍ അനീതിക്കും നീതി നിഷേധത്തിനുമെതിരെ ഒറ്റയാള്‍ പോരാട്ടം നടത്തുന്ന ജമാല്‍, ഇന്ദ്രന്‍സ് എന്ന അതുല്യ നടന്റെ മറ്റൊരു വിസ്മയ പ്രകടനത്തിന് സാക്ഷ്യം വഹിക്കുമെന്നാണ് പ്രതീക്ഷ. ഇന്ദ്രന്‍സിനൊപ്പം പ്രയാഗ മാര്‍ട്ടിന്‍, സിദ്ദിഖ്, മിഥുന്‍ രമേഷ്, ജോയ് മാത്യൂ, അശോകന്‍, സോനാ നായര്‍, മല്ലിക സുകുമാരന്‍, ശിവദാസന്‍, ജസ്‌ന , ദിനേശ് പണിക്കര്‍, രാജ് മോഹന്‍. യദുകൃഷ്ണന്‍, സുനില്‍ തുടങ്ങിയ വലിയ ഒരു താരനിര തന്നെ അണിനിരക്കുന്നുണ്ട്. ചിത്രം ക്രിയേഷന്‍സിന്റെ ബാനറില്‍ ശ്രീജാസുരേഷും വി.എസ്.സുരേഷും ചേര്‍ന്ന് നിര്‍മ്മിക്കുന്ന ജമാലിന്റെ പുഞ്ചിരി ജൂണ്‍ 7 ന് തിയേറ്റുകളിലെത്തും. ചിത്രത്തിന്റെ കഥയും തിരക്കഥയും ഒരുക്കിയിരിക്കുന്നത് വി. എസ്. സുഭാഷാണ്.

◾ ഓസ്‌കാര്‍ ജേതാവ് സിലിയന്‍ കിലിയന്‍ മര്‍ഫിയുടെ 'പീക്കി ബ്ലൈന്‍ഡേഴ്സ്' സീരിസിലെ ക്യാരക്ടറായ ബര്‍മിംഗ്ഹാം ഗ്യാങ്‌സ്റ്റെര്‍ ടോമി ഷെല്‍ബി തിരിച്ചുവരുന്നു. 'പീക്കി ബ്ലൈന്‍ഡേഴ്സ്' സ്ട്രീം ചെയ്ത പ്ലാറ്റ്ഫോമായ നെറ്റ്ഫ്‌ലിക്‌സ് തന്നെയാണ് ഇത് സ്ഥിരീകരിച്ചത്. ഇത്തവണ ചലച്ചിത്രമായാണ് 'പീക്കി ബ്ലൈന്‍ഡേഴ്സ്' എത്തുന്നത്. നെറ്റ്ഫ്‌ലിക്‌സില്‍ തന്നെയാണ് ബിബിസിയുമായി സഹകരിച്ച് ചിത്രം എത്തുന്നത്. ടോം ഹാര്‍പ്പര്‍ സംവിധാനം ചെയ്യുന്ന ചിത്രത്തിന്റെ രചന സ്റ്റീവന്‍ നൈറ്റ് ആണ്. 'ഓപ്പണ്‍ഹൈമര്‍' എന്ന ചിത്രത്തിന് ഈ വര്‍ഷം ആദ്യം മികച്ച നടന്‍ ഓസ്‌കാര്‍ നേടിയ മര്‍ഫിയും ചിത്രത്തിന്റെ പ്രഖ്യാപനം സ്ഥിരീകരിച്ചിരുന്നു. ഒന്നാം ലോകമഹായുദ്ധത്തിനു ശേഷം ലണ്ടനില്‍ ഉടലെടുത്ത അധോലോക സംഘത്തിന്റെ കഥയാണ് പീക്കി ബ്ലൈന്‍ഡേഴ്സ് പരമ്പര പറഞ്ഞത്. ഈ വര്‍ഷം അവസാനം ചിത്രത്തിന്റെ ഷൂട്ടിംഗ് ആരംഭിക്കും. 1914 മുതല്‍ 1934 വരെയുള്ള ലണ്ടന്‍ കേന്ദ്രീകരിച്ചായിരിക്കും ചിത്രത്തിന്റെ കഥ എന്നാണ് വിവരം.
(KROMA)

◾ ജീവിതത്തിന്റെ മഹാപഥങ്ങളിലേക്ക് യാത്ര തിരിച്ചൊരു സഞ്ചാരി ഒരു കനല്‍ക്കാറ്റിന്റെ ഓര്‍മ്മകളിലേക്ക് കടന്നു ചെന്ന് സ്വയമാളുമ്പോള്‍ അഗ്നിച്ചിറകുള്ള ശലഭമായി പൊട്ടിവിരിഞ്ഞ് ആകാശത്തേക്കുയരുന്നു. കാത്തിരുന്നാല്‍ തെളിയാത്ത ഒരു കലക്കവും ജീവിതത്തിനില്ലെന്ന് അപ്പോഴയാള്‍ തിരിച്ചറിയുന്നു. അനന്തരങ്ങളുടെ കാലം ഇന്ദ്രിയാനുഭവങ്ങളില്‍ ലയിക്കുന്ന കാഴ്ച. ആകാശം കളിക്കളമാക്കിയ അപ്പൂപ്പന്‍താടിക്കും ഒരു നാള്‍ മണ്ണില്‍ വീഴേണ്ടതുണ്ട്. മണ്ണിന്റെ ഗര്‍ഭത്തില്‍ ചെടിയായി ഉരുവാകാന്‍ പറക്കലും പതനവും ജീവിതത്തിന്റെ അനിവാര്യദശകളാണ്. ജീവിതവ്യഥകള്‍ മഴയില്‍ അലിയുന്ന മണ്‍പുറ്റുകള്‍ പോലെയെന്നും പുലരിയില്‍ കളകൂജനം മുഴക്കി വിണ്ണിലേക്ക് പറന്നുയരുന്ന പക്ഷികള്‍ വിരുന്നെത്തുമെന്നും കെട്ടുപിണഞ്ഞു പോകുന്ന ജീവിതപ്പാതകളില്‍ ഇരുളും വെളിച്ചവും നിറഞ്ഞു നില്‍പ്പുണ്ടെന്നും ഈ പുസ്തകം ഓര്‍മ്മിപ്പിക്കുന്നു. 'വെളിച്ചത്തിന്റെ സഞ്ചാരം'. സലാം എലിക്കോട്ടില്‍. നിയതം ബുക്‌സ്. വില 142 രൂപ.

◾ ഹോര്‍മോണ്‍ സന്തുലനം നിലനിര്‍ത്തേണ്ടതിനും കോശങ്ങളുടെ വളര്‍ച്ചയ്ക്കും പേശികളുടെ ബലത്തിനും ശരീരത്തില്‍ പ്രോട്ടീന്‍ കൂടിയേ തീരൂ. എന്നാല്‍ പ്രോട്ടീന്റെ അളവു കൂടിയാല്‍ വൃക്കയുടെ പ്രവര്‍ത്തനത്തെ ബാധിക്കുക, തുടങ്ങി നിരവധി ആരോഗ്യ പ്രശ്‌നങ്ങള്‍ക്കും കാരണമാകും. അതുകൊണ്ട് പ്രോട്ടീന്റെ അളവു കൃത്യമായി ശരീരത്തില്‍ നിലനിര്‍ത്തേണ്ടത് പ്രധാനമാണ്. പ്രായം, ലിംഗഭേദം, ശാരീരിക പ്രവര്‍ത്തനങ്ങള്‍ എന്നിവയെല്ലാം അടിസ്ഥാനപ്പെടുത്തിയാണ് ശരീരത്തില്‍ എത്രട്ടോളം പ്രോട്ടീന്‍ ആവശ്യമാണെന്ന് തീരുമാനിക്കുന്നത്. മുതിര്‍ന്ന ഒരാള്‍ക്ക് ഒരു കിലോഗ്രാം ശരീരഭാരത്തിന് ഏകദേശം 0.8 ഗ്രാം പ്രോട്ടീന്‍ ആണ് ഡയറ്ററി അലവന്‍സ് ശുപാര്‍ശ ചെയ്യുന്നത്. ഒന്ന് മുതല്‍ മൂന്ന് വരെ പ്രായമായ കുട്ടികള്‍ക്ക് ദിവസവും 13 ഗ്രാം പ്രോട്ടീന്‍ ആവശ്യമാണ്. കൗമാരക്കാരായ പെണ്‍കുട്ടികള്‍ക്ക് 46 ഗ്രാമും ആണ്‍കുട്ടികള്‍ക്ക് 52 ഗ്രാം പ്രോട്ടീനുമാണ് ദിവസവും നല്‍കേണ്ടത്. കൂടാതെ ശാരീരിക പ്രവര്‍ത്തനങ്ങള്‍ ചെയ്യുന്നതനുസരിച്ചും പ്രോട്ടീന്‍ അകത്തേക്ക് എടുക്കേണ്ട അളവില്‍ വ്യത്യാസം വരും. കായിക രംഗത്തുള്ളവര്‍ തങ്ങളുടെ ഒരു കിലോഗ്രാം ശരീരഭാരത്തിന് ഏകദേശം 1.2 മുതല്‍ 2.0 ഗ്രാം വരെ പ്രോട്ടീന്‍ സ്വീകരിക്കേണ്ടതുണ്ട്. ഗര്‍ഭിണികള്‍, കുട്ടിയുടെ വളര്‍ച്ച അനുസരിച്ച് 25 ഗ്രാം അധിക പ്രോട്ടീന്‍ കഴിക്കണമെന്നും ന്യൂട്രീഷന്‍ വിദഗ്ധര്‍ അഭിപ്രായപ്പെടുന്നു. മാംസം, മീന്‍, മുട്ട, പാല്‍, ബീന്‍സ്, നട്സ്, വിത്തുകള്‍ എന്നിവയിലെല്ലാം പ്രോട്ടീന്‍ അടങ്ങിയിട്ടുണ്ട്. പേശികളുടെ കരുത്തിനും വളര്‍ച്ചയ്ക്കും വ്യായാമം ചെയ്ത ശേഷം 30 മിനിറ്റ് മുതല്‍ രണ്ട് മണിക്കൂര്‍ വരെ പ്രോട്ടീന്‍ കഴിക്കുന്നത് ആരോഗ്യകരമാണ്. കായകരംഗത്തുള്ളവര്‍ക്കും ശാരീരിക പ്രവര്‍ത്തനങ്ങളില്‍ ഏര്‍പ്പെട്ടിരിക്കുന്നവര്‍ക്കും ഈ രീതി ഗുണം ചെയ്യും.

*ശുഭദിനം*