08/09/2022
Uit inligting wat nou aan die lig kom, blyk dit dat die plaasaanval gister op Martiens (68) en Elsa Richter van die plaas Vygeboompoort by Dwaalboom naby Thabazimbi een van die wreedste en grusaamste nog in SA was. Maroela Media berig dat wat gebeur het, is dat die plaashuis se krag afgelope Maandag tussen 20:00 en 21:00 herhaaldelik uitgeskop het. Martiens het besluit om na die kragpompe by die rivier elders op die plaas te ry en die pompe af te skakel voordat dit uitbrand. Twee aanvallers het hom egter daar ingewag en met ‘n yster oor die kop geslaan. Later is Martiens se lyk ná ‘n soektog binne die rivier gevind, met sy hande en voete vasgebind. Dit is nie seker of hy dood is aan die wond aan sy kop en of hy verdrink het nie.
Ná die aanval het die verdagtes in Martiens se bakkie na die plaashuis gery. Elsa het gedink dit is Martiens wat terugkeer en is na die kombuis, waar die twee aanvallers haar ingewag het. Hulle het haar kamer toe gevat, haar klere uitgetrek en haar onder die stort ingedruk, met die doel om haar met warm water te brand. Die geiser was egter afgeskakel om elektrisiteit te bespaar, waarop die aanvallers Elsa met ‘n strykyster op haar bobeen en skouer gebrand het.
Haar hande en voete is later vasgebind, sy is geskop en geslaan en met ‘n pistool deur haar gesig geslaan. Die aanvallers het in ‘n stadium die sleutel van die kluis gevind en Martiens se .308-jaggeweer uitgehaal en gelaai. Hulle het die geweer teen Elsa se kop gedruk en gesê: “Ons gaan jou nou doodskiet”. Sy het hard begin bid in Afrikaans en die hulp van die Here aangeroep. Die aanvallers het toe ‘n kombers oor haar gegooi en haar in die bakkie geboender.
Sy is sowat 4 km verder in die veld afgelaai en een van die aanvallers het haar gevra: “Do you want to see your husband?” Sy het gesê ja, asseblief. Hulle het haar daar gelos en vir haar gesê indien sy nie oor ‘n uur steeds daar is wanneer hulle terugkom nie, gaan hulle Martiens doodmaak. Laasgenoemde was egter toe reeds dood en het hulle dit net vir haar gesê sodat sy op die plek moes bly. Elsa het ongeveer ‘n uur lank daar gesit en toe sy besef hulle kom nie terug nie, het sy die kombers gevat en haar weg gevind terug huistoe, waar sy om ongeveer 02:00 oor die vierrigtingradio hulp ontbied het.
Later het die polisie die aanvallers in Warmbad in die gesteelde bakkie gewaar, maar laasgenoemde het op die polisie losgebrand, wat teruggeskiet het en een valler noodlottig getref en die tweede gewond het. Albei aanvallers was vermoedelik werknemers op die plaas. Elsa word tans in die Mediclinic van Thabazimbi behandel.
Die egpaar het vier kinders waarvan die oudste seun in Nieu-Seeland is.
Woorde ontbreek om hierdie barbarisme behoorlik te veroordeel. Wat sê die ANC-regering en die MRK hieroor? Gaan laasgenoemde dit as ‘n saak opneem? Gaan Minister van Polisie Bheki Cele vir Elsa besoek en meegevoel betuig? Wat is die reaksie van die Boerevolk op hierdie wekroep?
