31/05/2022
दीपस्तंभ मनोबलचे दिव्यांग व अनाथ विदयार्थी महाराष्ट्रात अव्वल
प्रतिनिधी I जळगाव
महाराष्ट्र लोकसेवा आयोगाच्या ( राजपत्रीत ) २०२० ला घेण्यात आलेल्या २०० जागांसाठीच्या परीक्षांचे अंतिम निकाल आज जाहीर झाले असून यात दीपस्तंभ फाऊंडेशन मनोबलच्या विविध वर्गांमध्ये प्रशिक्षण घेतलेल्या आठ विद्यार्थ्यांनी महाराष्ट्र लोकसेवा आयोगाच्या परीक्षेत यशाची पताका फडकावली आहे.
दिव्यांग आरक्षणातून महाराष्ट्रातून पहिला विनोद चौधरी यांची कक्षाधिकारी पदी तर , प्रज्ञाचक्षू असलेले अभिजित कुंभार यांची उपशिक्षणाधिकारी पदी निवड झाली आहे. अनाथ आरक्षणातून महाराष्ट्रातून पहिला आलेला संतोष मांडवे याची नायब तहसिलदार पदी निवड झाली आहे, इतर सवर्गातून नायब तहसिलदार पदी शशिकांत बाबर ,सोनाली पाटील, प्रांजल पवार, गोकुळ भरडिया, निकिता गद्रे यांची निवड झाली आहे.
दिव्यांग व अनाथ विदयार्थ्यानी मिळवलेले हे यश अत्यंत प्रेरणादायी व भविष्यासाठी अत्यंत दिशादर्शक आहे.दीपस्तंभ मनोबलच्या माध्यमातून गेली काही वर्ष जे प्रभोधन , प्रेरणा व मार्गदर्शनाची यंत्रणा उभारली गेली त्यातून विदयार्थ्यांनी घेतलेल्या प्रचंड कष्टाला हे फळ आलेले आहे.या प्रकल्पात मार्गदर्शन करणाऱ्या तसेच हितचिंतक व देणगीदारांचे मी मनापासून आभार मानतो.लागलेला निकाल राज्यातल्या दिव्यांग व अनाथ विद्यार्थ्यांसाठी अत्यंत उत्साहवर्धक आहे अश्या भावना दीपस्तंभ फाऊंडेशनचे संस्थापक यजुर्वेंद्र महाजन यांनी यावेळी व्यक्त केल्या.
या विदयार्थ्यांना माजी अप्पर राज्यकर आयुक्त चित्रा कुलकर्णी,सह आयुक्त राज्य वस्तू व सेवा कर रेशमा घाणेकर, उत्पादन शुक्ल अधीक्षक गणेश पाटील, जिल्हा पोलीस उप अधीक्षक अशोक बनकर, मुख्य लेखाधिकारी कपील पवार, गटविकास अधिकारी स्नेहा पवार आणि दीपस्तंभचे संस्थापक यजुर्वेंद्र महाजन यांनी अनमोल मार्गदर्शन केले आहे असे डॉ.हर्षल कुलकर्णी यांनी कळवले आहे.