የአማራ ብሔራዊ ንቅናቄ - /አብን/ - የኮምቦልቻ ማስ/ፅ/ቤት

  • Home
  • የአማራ ብሔራዊ ንቅናቄ - /አብን/ - የኮምቦልቻ ማስ/ፅ/ቤት

የአማራ ብሔራዊ ንቅናቄ - /አብን/ - የኮምቦልቻ ማስ/ፅ/ቤት አብን የሠፊው የአማራ ህዝብ የትግል ቤት ነው!!!

በወቅታዊ ጉዳይ ከአማራ ብሔራዊ ንቅናቄ (አብን) የተሰጠ መግለጫ!የአማራ ብሔራዊ ንቅናቄ የገዥው ብልጽግና ፓርቲ ሥራ አስፈጻሚ ኮሚቴ በክልል ልዩ ኃይል ፖሊስ አደረጃጀት ላይ ለውጥ ለማድረግ ...
11/04/2023

በወቅታዊ ጉዳይ ከአማራ ብሔራዊ ንቅናቄ (አብን) የተሰጠ መግለጫ!

የአማራ ብሔራዊ ንቅናቄ የገዥው ብልጽግና ፓርቲ ሥራ አስፈጻሚ ኮሚቴ በክልል ልዩ ኃይል ፖሊስ አደረጃጀት ላይ ለውጥ ለማድረግ ውሳኔ ማሳለፉን ከገለጸበት ካለፉት ሶስት ሳምንታት ወዲህ ተከታታይ መግለጫ ሲያወጣ መቆየቱ ይታወቃል፡፡ ድርጅታችን አብን ባወጣቸው ተከታታይ መግለጫዎች የገዥው ፓርቲ ሥራ አስፈጻሚ ኮሚቴ ውሳኔ በሁሉም ክልሎች ልዩ ኃይሎች ላይ በእኩል ደረጃ ተፈጻሚ የማይሆን እና የውሳኔው ዋነኛ የትኩረት አቅጣጫ የአማራ ልዩ ኃይልን ትጥቅ ማስፈታት መሆኑን ፤ የገዥው ፓርቲ ውሳኔ ከሕጋዊነት ፣ ከወቅታዊ ሀገራዊ ሁኔታዎች አንጻር ወቅቱን ያልጠበቀ ፣ ነባራዊ ሁኔታዎችን ግምት ውስጥ ያላስገባ እና ለጥቃት ተጋላጭ የሆኑ የአማራ አካባቢዎችን እና የኅብረተሰብ ክፍሎችን ተገማች እና ቀጥተኛ ለሆነ ጥቃት እና አደጋ የሚዳርግ ውሳኔ መሆኑን እና ክልሉን ለከፍተኛ አለመረጋጋት እና የጸጥታ መደፍረስ የሚዳርግ ጊዜውን ያልጠበቀ እና ኃላፊነት የጎደለው አደገኛ ውሳኔ መሆኑን በመግለጽ መንግስት ውሳኔውን እንዲያጥፍ ድርጅታችን ጥሪ ሲያደርግ መቆየቱ ይታወቃል፡፡

የገዥው ፓርቲ ሥራ አስፈጻሚ ኮሚቴ ውሳኔው እና ውሳኔውን ለማስፈጸም የወሰዳቸው እርምጃዎች በአማራ ክልል ላስከተሉት ከፍተኛ አለመረጋጋት ፣ የመደበኛ እንቅስቃሴዎች መስተጓጓል እና ለጸጥታ መደፍረስ ኃላፊነት ከመውሰድ እና መፍትሄ ከመስጠት ይልቅ የፓርቲው ሥራ አስፈጻሚ ኮሚቴ ከሕግ አግባብ ውጭ እና በሌለው ሥልጣን ያሳለፈው ውሳኔ ላስከተለው ከፍተኛ ቀውስ የጦስ ደሮ ማፈላለግ ላይ ተሰማርቷል፡፡

የብልጽግና ፓርቲ ትናንት ሚያዚያ 2 ቀን 2015 ዓ.ም ባወጣው መግለጫ የክልል ልዩ ኃይል ፖሊሶችን “መልሶ የማደራጀት” ውሳኔ በብዙ ጥናት፣ በጥልቅ ውይይት፣ በሰከነ ንግግር እና በጋራ መግባባት የተደረሰበት ውሳኔ መሆኑን ፣ ልዩ ኃይልን ትጥቅ የማስፈታት ሳይሆን የተሻለ የማስታጠቅ ፤ የመበተን ሳይሆን በጠንካራ መሰረት ላይ የማደራጀት ሥራ ላይ መሆኑን ፤ የልዩ ኃይል አባላት ላበረከቱት አስተዋጽኦ የተለየ አክብሮት እና ፍቅር እንዳለው፤ ውሳኔው በአማራ ክልል ላይ ብቻ ሳይሆን በሁሉም ክልሎች እና ከተማ አስተዳደሮች በተመሳሳይ የጊዜ መስመር የሚተገበር መሆኑን በመግለጽ መግለጫ አውጥቷል፡፡

የብልጽግና ፓርቲ ያወጣው መግለጫ እውነታን የካደ እና አሁንም ገዥው ፓርቲ ለመፍትሄው ዝግጁ አለመሆኑን የሚያሳይ ነው፡፡ ገዥው ፓርቲ ውሳኔው በአማራ ክልል ላይ ብቻ ሳይሆን በሁሉም ክልሎች እና ከተማ አስተዳደሮች በተመሳሳይ የጊዜ መስመር የሚተገበር ነው ቢልም ከአማራ ክልል በቀር በየትኛውም ክልል የልዩ ኃይል ፖሊስ አባላትን ትጥቅ የማስፈታት ወይም በገዥው ፓርቲ አነጋገር “መልሶ የማደራጀት” እንቅስቃሴ አልተደረገም፡፡ ገዥው ፓርቲ ሁሉም ክልሎች እና የከተማ አስተዳደሮች የተስማሙበት ውሳኔ ነው እያለ ቢሰነብትም ፣ የአማራ ክልልን ጨምሮ የየትኛውም ክልል ካቢኔ ወይም ምክር ቤት ጉዳዩን አስመክቶ ያደረገው ውይይትም ሆነ ያሳለፈው ሕጋዊ ውሳኔ የሌለ ሲሆን፤ ለዚህ ድርጅታዊ ቅጥፈት ቀላል ማስረጃዎች የሚሆኑን አብነቶች፦

1:- የማስፈጸሚያ እቅድ ነው የተባለው ሰነድ በፌዴራል መንግስት ባለስልጣናት ደረጃ ውይይት የተደረገበት በቀን 30/07/2015 ዓ.ም መሆኑ፣

2:- የሱማሌ ብሔራዊ ክልላዊ መንግስት ካቢኔ በጉዳዩ ላይ ተወያይቶ ውሳኔ ያሳለፈው በቀን 02/08/2015 ዓ.ም መሆኑ መገለጹ፣ ገዥው ፓርቲ ያወጣው መግለጫ እውነትነት የራቀው መሆኑን የሚያጸና ነው፡፡

ገዥው ፓርቲ የልዩ ኃይል ፖሊስ አባላት ላበረከቱት አስተዋጽኦ የተለየ አክብሮት እና ፍቅር እንዳለው ቢገልጽም በአማራ ክልል ልዩ ኃይል አባላት ላይ የተደረገው እና የሆነው ግን የመግለጫውን ቃል ከምጸት የሚያስቆጥረው ነው፡፡ በተጨባጭ የሆነው እና እየሆነ ያለው የአማራ ክልል የልዩ ኃይል አባላት ከፍተኛ አመራሮች ፣ የብርጌድ እና የክፍለጦር አዛዦች በድንገት ከሥራ ውጭ ተደርገው የልዩ ኃይሉ የእዝ ሰንሰለት እንዲፈርስ መደረጉ፤ የልዩ ኃይል ፖሊስ አባላት ስንቅ ፣ ሎጂስቲክ እና ደሞዝ ተነፍገው ለርሃብ እና ለከፍተኛ እንግልት መዳረጋቸው እና ከካምፕና ከግዳጅ ምድብ ቦታቸው እህል ውሃ ወደሚያገኙበት ቦታ ለመድረስ በርካታ መቶ ኪሎሜትሮችን በእግራቸው ለመጓዝ የተገደዱበት ልብ የሚሰብር እና ክብረ-ነክ ክስተት የተስተዋለበት ሲሆን፣ ለሀገር አንድነት እና ኅልውና በከፍተኛ መስዋዕትነት ጀብድ ለፈጸሙ የዘመናችን ጥቁር አንበሶች የማይመጥን፣ ገዥውን ፓርቲ እና የውሳኔው አካል የሆኑ ወገኖችን በሙሉ ዝንተ-ዓለም አንገታቸውን የሚደፉበት ታሪክ ሁኖ ተመዝግቧል፡፡

ገዥው ፓርቲ ያወጣው መግለጫ እውነታን የካደ ብቻ ሳይሆን የፓርቲው ሥራ አስፈጻሚ ኮሚቴ በሌለው ሥልጣን በወሰነው ውሳኔ እና ውሳኔውን ለማስፈጸም በወሰደው ኃላፊነት የጎደው እርምጃ አንጻራዊ ሰላም በነበረው አማራ ክልል ላይ ለፈጠረው ከፍተኛ አለመረጋጋት እና የጸጥታ መደፍረስ ኃላፊነት ያልወሰደበት እና በአስር ሽህዎች የሚቆጠሩ የአማራ ክልል ልዩ ኃይል አባላት ላይ ላስከተለው እንግልት እና መጎሳቆል እውቅና የነፈገበት ይልቁንም የተሳለቀበት በመሆኑ ፓርቲያችንን ፣ የአማራን ሕዝብ እና መላው ሀገር ወዳድ ኢትዮጵያውያንን አሳዝኗል፡፡ የገዥውን ፓርቲ ውሳኔ በመቃወም የክልሉ ሕዝብ ከጫፍ እስከ ጫፍ ተቃዉሞ እያሰማ ሲሆን ፣ በገዥው ፓርቲ የተሳሳተ ውሳኔ ምክንያት ላለፉት በርካታ ቀናት በአማራ ክልል መደበኛ እንቅስቃሴዎች ተስተጓጉለዋል ፣ በአንዳንድ አካባቢዎች በተፈጠረ የጸጥታ መደፍረስ የሰው ህይወት አልፏል ፣ የክልሉ ዋና ዋና ከተሞች የቀውስ አስተዳደር ውሳኔዎችን ለማሳለፍ ተገደዋል፡፡

ድርጅታችን አብን ሁልጊዜም እንደሚለው የሀገራችን ሕዝብ መልከ ብዙ ብዝሃነቶችን እውቅና የሚሰጥ እና የሚያከብር ፣ ለግለሰቦች መሰረታዊ መብቶች መከበር እና መጠበቅ ዋስትና የሚሰጥ ፣ የሀገር ሉዓላዊነትን ፣ ሀገራዊ አንድነትን እና የግዛት አንድነትን የሚያረጋግጥ እውነተኛ ፌዴራላዊ ሥርአት እንዲዋቀር እና በሥራ ላይ ያለው ሃሳዊ “ፌዴራሊዝም” በሃቀኛ ፌዴራላዊ ሥርአት እንዲተካ ትግል የሚያደርግ ድርጅት ነው፡፡ አብን ለበርካታ አስርት ዓመታት ሲዳከም የቆየው የማዕከላዊ መንግስት ስልጣን በእውነተኛ ፌዴራላዊ የመንግስት ሥርአት አወቃቅር አግባብ እንዲጠናከር እና መንግስት የመላ ኢትዮጵያውያን መብት እና ደኅንነት የማክበር ፣ የማስከበር እና የመጠበቅ ኃላፊነቱን እንዲወጣ የራሱን ሚና ለመወጣት ቁርጠኛ አቋም ያለው ድርጅት ነው፡፡ አሁን በሥራ ላይ ባለው የፌዴራል አወቃቀር ፣ ሕገ-መንግስት እና አስተዳደራዊ መዋቅር በርካታ ሕጎች እና ተቋማት መሰረታዊ ችግር እንዳለባቸው ድርጅታችን አብን ያምናል ፣ ይህንን ሁኔታ ለመቀየርም ይታገላል፡፡

ድርጅታችን አብን ከዚህ ቀደም አቋሙን ግልጽ እንዳደረገው በየክልሉ የተደራጁ ልዩ ኃይሎች አፈጣጠር እና አደረጃጀት የራሱ የሆነ ችግር የነበረበት ቢሆንም አሁን ባለው ተጨባጭ እና ነባራዊ ሁኔታ የአማራ ክልል ልዩ ኃይልን በድንገት እና ያለበቂ የጸጥታ ዋስትና ማፍረስ ለጥቃት ተጋላጭ የሆኑ የአማራ ክልል አካባቢዎችን ተገማች እና ቀጥተኛ ለሆነ ጥቃት ተጋላጭ የሚያደርግ በመሆኑ ውሳኔውን አብን አጥብቆ የሚቃወመው ነው፡፡ የጸጥታ ስጋት ካለባቸው የክልሉ አካባቢዎች አንዱ በሆነው አጣየ ከወዲሁ ጥቃት የተከፈተ ሲሆን ፣ ትሕነግ በወልቃይት እና ራያ ሕዝብ ላይ ጥቃት እንደሚከፍት እየዛተ ይገኛል፡፡

ስለሆነም ገዥው ፓርቲ የአማራ ክልል ልዩ ኃይልን ለማፍረስ ያሳለፈውን ውሳኔ እና ውሳኔውን ለማስፈጸም እየሄደበት ያለው መንገድ በአሁኑ ሰዓት በአማራ ክልል የተከሰተውን አለመረጋጋት እና የጸጥታ መደፍረስ ያስከተለ እና ሕዝባችንን ለጥቃት ፣ ክልሉን ለከፍተኛ አለመረጋጋት እና የሰላም እጦት የዳረገ መሆኑን እያሳሳብን ፣ የፌደራል መንግስት እና የአማራ ክልል መንግስት የክልሉ ሕዝብ አደባባይ ወጥቶ ያቀረበውን ጥያቄ እንዲያከብሩ እና ድርጅታችን አብን ከዚህ ቀደም በተደጋጋሚ ያቀረባቸውን ጥሪዎች እና የውሳኔ ሃሳቦች ተቀብለው ሥራ ላይ እንዲያውሉ በድጋሚ ጥሪያችንን እናስተላልፋለን፡፡


የአማራ ብሔራዊ ንቅናቄ (አብን)
አዲስ አበባ ፣ ሸዋ ፣ ኢትዮጵያ
ሚያዚያ 3 ቀን 2015 ዓ.ም

ከአማራ ብሔራዊ ንቅናቄ (አብን) የአማራ ክልል ምክር ቤት አባላት የተሠጠ መግለጫ!> // የአማራ ብሔራዊ ንቅናቄ (አብን) የአማራ ክልል ምክር ቤት አባላት// የአማራ ልዩ ኃይል ፖሊስ የአገ...
09/04/2023

ከአማራ ብሔራዊ ንቅናቄ (አብን) የአማራ ክልል ምክር ቤት አባላት የተሠጠ መግለጫ!

> // የአማራ ብሔራዊ ንቅናቄ (አብን) የአማራ ክልል ምክር ቤት አባላት//


የአማራ ልዩ ኃይል ፖሊስ የአገር ህልውና አደጋ ላይ በወደቀ ጊዜ ሁሉ ከፊት በመሰለፍ የጠላትን አከርካሪ በመስበር በደሙ የአገር ሉዓላዊነትን ለማጽናቱ የብልጽግና መራሹ መንግሥት ህያው ምስክር ነው። ሆኖም ይኼን ውለታ በካደ መልኩ ከሰሞኑ የብልጽግና ፓርቲ ሥራ አስፈጻሚ ኮሚቴ የአማራ ልዩ ኃይል ፖሊስን ትጥቅ ለማስፈታት ወስኖ ተግባራዊ እንቅስቃሴ በማድረግ ላይ ይገኛል። የብልጽግና ፓርቲ ሥራ አስፈጻሚ ያሳለፈው ውሳኔ ወቅቱን ያልጠበቀ፣ ነባራዊ ሁኔታዎችን ሆን ተብሎ ወደጎን በመተው የአማራን ሕዝብ ቀጣይነት ላለው ጥቃት የሚዳርግ ብሎም እገዛበታለሁ የሚለውን የአገሪቱን ሕገ መንግሥት የሚጥስ ውሳኔ ነው። በመሆኑም ውሳኔው በሚከተሉት መሠረታዊ ምክንያቶች ተቀባይነት የለውም።

1. የአማራ ልዩ ኃይል ፖሊስን ለማፍረስ ገዥው ፓርቲ አንዳችም ሕጋዊ ሥልጣን የሌለው በመሆኑ፦

በኢፌዴሪ ሕገ መንግሥት አንቀፅ 52/2/ሰ መሰረት፣ የፖሊስ ኃይል የማደራጀትና የራሳቸውን ሠላም ፀጥታ የማስጠበቅ ኃላፊነት የክልል መንግሥታት ሥልጣን ነው። የአማራ ልዩ ኃይል ፖሊስም በዚህ ሕገ መንግሥታዊ ድንጋጌ መሠረት ክልሉና የአማራ ህዝብ ያሉበትን ስጋቶች በማጤን በክልሉ መንግሥት የተደራጀ የፖሊስ ኃይል ነው።

የአማራ ልዩ ኃይል ፖሊስን እንደገና ማደራጀትም ይሁን ማፍረስ አስፈላጊ መሆኑ ከታመነበት መላው የአማራ ሕዝብና የክልሉ ምክር ቤት በጉዳዩ ላይ ሰፊ ውይይት አድርጎበት በአማራ ብሔራዊ ክልላዊ መንግስት ብቻ የሚተገበር እንጂ የአማራ ልዩ ኃይል ፖሊስን ለማፍረስና ትጥቅ ለማስፈታት ገዥው ፓርቲ አንዳችም ሕጋዊ ሥልጣን የለውም።

2. ውሳኔው ወቅቱን ያልጠበቀ፣ ነባራዊ ሁኔታዎችን ወደ ጎን ገሸሽ ያደረገ እና የሕዝብን ደኅንነትን አደጋ ላይ ለመጣል ያለመ በመሆኑ፦

2.1. ባለፉት 4 ዓመታት በአማራ ክልል በምስራቅ አማራ የምድረ ገኝ፣ በሰሜን ሸዋ ደራ፣ ምንጃር፣ ሸዋሮቢት፣ አጣዬ እና መሠል አጎራባች ወረዳዎች በኦነግ ሸኔ የሚፈፀሙ በከባድ መሣሪያ የታገዙ ጥቃቶች ሊቆሙ ባለመቻላቸው ከተሞች ወድመዋል፤ በርካታ ሕዝባችን ለሞት ብሎም ለስደት ተዳርጓል። ይኼ ጥቃትና ውድመት ዛሬም እንደቀጠለ ነው።

2.2. በዓባይ ሸለቆ ዙሪያ ሠርጎ ለመግባት የሚሞክረው የኦነግ ሸኔ የሽብር ቡድን አደጋ ያልተቀረፈ ችግር ነው።

2.3. በምዕራብ አማራ በሱዳን ሠራዊትና መነሻቸውን ሱዳን አድርገው በሚንቀሳቀሱ ውስጣዊና ውጫዊ ታጣቂ ቡድኖች የአገርን ሉዓላዊነት በመጣስ የአገሪቱን ግዛት ወርረው ይዘው የሚገኙ ሲሆን፣ በሕዝባችን ላይ ተጨማሪ ጥቃቶችን ለማድረስ የሚደረጉ ሙከራዎችን ለማስቆም ብልጽግና መራሹ መንግሥት ፍላጎት እንደሌለው ታይቷል።

2.4. በክልሉ የሚንቀሳቀሱ እና በተደጋጋሚ የሽብር ተልዕኮ በመውሰድ በሕዝባችን ላይ የማያባራ እልቂት በማድረስ የሚታወቁ የታጠቁ አሸባሪ ቡድኖች ወደ ተሟላ የሰላም አማራጭ የገቡ ባለመሆኑና በማንኛውም ጊዜ ጥቃት ሊያደርሱ የሚችሉባቸው ሁኔታዎች ክፍት ናቸው።

አማራን በጠላትነት ፈርጀው የሚታገሉ ኃይሎች፣ በተለይም ባለፉት አራት ዓመታት ቀጣይነት ባለው መልኩ በአማራ ሕዝብ ላይ የዘር ማጥፋት፣ የዘር ማሳሳት፣ የማንነት ገፈፋና ጅምላ ማፈናቀል ታይቶ በማይታወቅ ሀኔታ እየፈጸሙበት ይገኛሉ። እነዚህ ኃይሎች በትጥቅ የደረጁና የአገር ህልውና ሥጋት መሆናቸው በመንግሥት በተደጋጋሚ ሲገልጽ የቆየ ሲሆን መንግሥት በእነዚህን ኃይሎች ላይ የማያዳግም እርምጃ በመውሰድ ለሕዝባችን ዘላቂ የደኅንነት ዋስትና ዛሬም ድረስ መስጠት አልቻለም። በዚህም ከሞት የተረፉት ከቤት ንብረታቸው ተፈናቅለው ውሎ አዳራቸው በመጠለያ ካምፖችና በጎዳና ላይ መሆኑም የአደባባይ ሐቅ ነው።

በተጨማሪም በፕሪቶሪያው የሠላም ስምምነት መሠረት ትሕነግ ሙሉ ትጥቁን ያልፈታ መሀኑ የሚታወቅ ሲሆን ሂደቱም ግልጽነት የጎደለው መሆኑ እሙን ነው። የፌዴራሉ መንግሥት ከሚናገረው በተቃራኒ፣ የትሕነግ (የትግራይ ክልል ጊዜያዊ አስተዳደር) አመራሮችና ሚዲያዎች በአማራ ሕዝብ ላይ የተጠናከረ የጥላቻ ቅስቀሳ እያካሄዱ እና አጎራባች የአማራ አካባቢዎችን በኃይል ለመንጠቅ እየተዘጋጁ መሆናቸውን በአደባባይ እየተናገሩ ይገኛሉ።
የአማራ ሕዝብ ከውስጥና ከውጭ እነዚህና የመሳሰሉትን ግልጽና ቀጥተኛ የደኅንነት ስጋቶች ተደቅነውበት እያለ፣ የአማራ ልዩ ኃይል ፖሊስን ለማፍረስ የሚደረግ ሙከራ የኢፌዴሪ መንግሥት እና የብልጽግና ፓርቲ ለአማራ ሕዝብ ደኅንነት ደንታ ቢስ መሆናቸውን የሚያሳይ ነው።

ከላይ ከጠቀስናቸው መሠረታዊ ምክንያቶች በተጨማሪ ክልሉ የራሱን ሰላም የመጠበቅ ውስጣዊ ሉዓላዊ መብቶች ያሉት ከመሆኑ ባለፈ፣ ሕዝባችንን ከድኅረ-ጦርነት የሰላምና መረጋጋት ስጋቶች የመጠበቅ እና ሰላምና መረጋጋትን የማስጠበቅ ኃላፊነት ያለበት በመሆኑ፣ በክልሉ ያሉ ነባራዊ ሁኔታዎች ክልሉ የፀጥታ አቅሙን የማጠናከር እንጂ የማሳሳት ሁኔታን የሚፈቅዱ አይደሉም። በሌላም በኩል የክልሎችን የራስን ውስጣዊ ሰላም የማስጠበቅ ሉዓላዊ መብቶች የሚጋፋ እና ከዚህ ቀደም ክልሉን ለጥቃት ያጋለጡ አገራዊ እና ክልላዊ ክፍተቶችን ከግንዛቤ ያላስገባ፣ ከቀደመው የፀጥታ አቅም ጉድለት የተከሰተውን የሕዝብ ጥቃት የሚያቃልል እርምጃ በመሆኑ እኛ የአብን አማራ ምክር ቤት አባላት ውሳኔውን አጥብቀን እንቃወማለን።

ስለሆነም እኛ የአብን የአማራ ክልል ምክር ቤት አባላት፦

ሀ. የአማራ ልዩ ኃይል ፖሊስ የሕዝብ ደኅንነትና ሠላም ለማስከበር የተቋቋመ የሕዝብ ተቋም እንጂ የአንድ ፓርቲ የግል ንብረት አለመሆኑ በግልጽ ሊታወቅ ይገባል። ስለሆነም የብልፅግና ሥራ አስፈጻሚ በሌለው ሥልጣን በሕገ-ወጥ መንገድ በማናለብኝነት የአማራ ልዩ ኃይል ፖሊስን ትጥቅ ለማስፈታትና ለማፍረስ የሚያደርገው የጥድፊያ ሙከራ ከፍተኛ አገራዊ አደጋ የሚያስከትል መሆኑን በመገንዘብ ውሳኔውን እንዲቀለብስ በአጽንኦት እንጠይቃለን።

ለ. የአማራ ልዩ ኃይል ፖሊስን ትጥቅ ማስፈታት የአማራን ሕዝብ የህልውና አደጋ ላይ መጣል መሆኑን በመገንዘብ የአማራ ብሔራዊ ክልላዊ መንግስት እንዲህ ያለውን ኢ-ሕገ መንግሥታዊ፣ ወቅቱን እና ነባራዊ ሁኔታውን ያልጠበቀ ትጥቅ አስፈቺ ውሳኔ እንዳይተገበር እንዲያደርግ እናሳስባለን።
ሐ. የአማራ ብሔራዊ ክልላዊ ምክር ቤት የወከለው ሕዝብ ህልውና ከመቼውም ጊዜ በላይ አደጋ ውስጥ መሆኑን በመገንዘብ አስቸኳይ የምክር ቤት ስብሰባ በመጥራት በጉዳዩ ላይ ጥልቅ ውይይት እንዲደረግበት እንጠይቃለን።

በመጨረሻም፦

1. ለመላው የአማራ ሕዝብ፦

የአማራ ልዩ ኃይል ፖሊስ ሕዝባችን እና አገራችን ከፍተኛ ማጥ ውስጥ በገቡበት ወቅት ነፍሱን ሳይሰስት ጠላትን ተከላክሎ እንደ አባቶቹ አገር ያቀና ልጅህ መሆኑን አውቀህ እንደ አንድ ልብ መካሪ፣ እንደ አንድ አፍ ተናጋሪ ሆነህ ከጎኑ እንድትቆም ጥሪ እናስተላልፋለን። የብልጽግና ፓርቲ ሥራ አስፈጻሚ የወሰነው ውሣኔ ሕግን የጣሰ፣ የክለሉን መንግሥትና የአማራን ሕዝብ ሉዓላዊነት የደፈረ በመሆኑ ውሳኔው እንዲቀለበስ በጽናት እንድትታገል እንጠይቃለን።

ልዩ ልዩ የአማራ አደረጃጀቶች፣ ወጣቶችና ምሁራን ሕዝባችን የተጋረጠበትን የህልውና አደጋ እና ልዩ ኃይላችንን ትጥቅ የማስፈታት ዘመቻ ለመቀልበስ በአንድነት በመቆም ታሪካዊ አደራችሁን እንድትወጡ ጥሪያችንን እናቀርባለን።

2. ለአገር መከላከያ ሠራዊት፦

አገር ተወረረ፣ ሰሜን ዕዝ ተደፈረ ሲባል ከፊት ቀድሞ አብሮህ መስዋዕትነት የከፈለው የአማራ ልዩ ኃይል ፖሊስ መሆኑ ፀሐይ የሞቀው፣ አገር ያወቀው ጉዳይ ከመሆኑም ሌላ ከጀርባህ በተወጋህ ጊዜ ተወርውሮ የደረሰልህ ኃይል መሆኑን ራስህ ምሥክር ነህ። በዚህ ወሳኝ ሰዓት በልዩ ኃይሉ ላይ እየተደረገ ያለውን ከሴራ ያልተፋታ ትጥቅ የማስፈታት ፖለቲካዊ ውሳኔ እንድትፈጽም ትዕዛዝ ቢተላለፍልህ በወንድሞችህ ላይ አፈሙዝ በማዞር ሕዝብን እንዳታሳዝን እንጠይቃለን። የአማራ ልዩ ኃይል ፖሊስ ለአንተ ስጋት ሳይሆን ቀኝ ክንድሀ፣ የምትጠራጠረው ሳይሆን ከጀርባህ ልታቆመው የምትችል፣ አገር አፍራሽ ሳይሆን አገር የታደገ፣ ጠባብ ሳይሆን በአገራዊ ርዕይ የታነፀ መሆኑን ራስህ ፈትሸህ አረጋግጠሃል፤ መስክረሃልም።

3. ለመላው የኢትዮጵያ ሕዝብ፦

በአማራ ልዩ ኃይል ፖሊስ ላይ የሚደረገውን ሕገወጥ የማፍረስ ድርጊት መላው አገር ወዳድ ኢትዮጵያውያን እንድትቃወሙና ከአማራ ሕዝብ ጎን እንድትቆሙ እንጠይቃለን።

ልዩ ኃይላችን ህልውናችን!

ሚያዝያ 01 ቀን 2015 ዓ.ም

ባሕርዳር፣ ኢትዮጵያ

በወቅታዊ ጉዳይ ከአማራ ብሔራዊ ንቅናቄ (አብን) የተሰጠ መግለጫ!የአማራ ብሔራዊ ንቅናቄ (አብን) ሥራ አስፈጻሚ ኮሚቴ መጋቢት 26 ቀን 2015 ዓ.ም ባወጣው የአቋም መግለጫ የገዥው ፓርቲ ሥ...
09/04/2023

በወቅታዊ ጉዳይ ከአማራ ብሔራዊ ንቅናቄ (አብን) የተሰጠ መግለጫ!

የአማራ ብሔራዊ ንቅናቄ (አብን) ሥራ አስፈጻሚ ኮሚቴ መጋቢት 26 ቀን 2015 ዓ.ም ባወጣው የአቋም መግለጫ የገዥው ፓርቲ ሥራ አስፈጻሚ ኮሚቴ የክልል ልዩ ኃይሎችን ለማፍረስ ያሳለፈው ውሳኔ በሁሉም ክልሎች ልዩ ኃይሎች ላይ በእኩል ደረጃ ተፈጻሚ የማይሆን እና የውሳኔው ዋነኛ የትኩረት አቅጣጫ የአማራ ልዩ ኃይልን ትጥቅ ማስፈታት መሆኑን በመገምገም ፣ መንግስት የአማራ ልዩ ኃይልን ለማፍረስ ያሳለፈው ውሳኔ ወቅቱን ያልጠበቀ ፣ ነባራዊ ሁኔታዎችን ግምት ውስጥ ያላስገባ እና ለጥቃት ተጋላጭ የሆኑ የአማራ አካባቢዎችን እና የኅብረተሰብ ክፍሎችን ተገማች እና ቀጥተኛ ለሆነ ጥቃት እና አደጋ የሚዳርግ አደገኛ ውሳኔ መሆኑን በመግለጽ ውሳኔው ተፈጻሚ እንዳይሆን ማሳሳቡ ይታወቃል፡፡ ነገር ግን ድርጅታችን አብን ያቀረበውን ማሳሳቢያ ወደ ጎን በማለት የፌዴራሉ መንግስት የክልሉን ልዩ ሃይል ትጥቅ ለማስፈታት በመንቀሳቀሱ በአማራ ክልል የተለያዩ አካባቢዎች በክልሉ ልዩ ኃይል እና በፌዴራል የጸጥታ ተቋማት መካከል ከፍተኛ ውጥረት እንዲፈጠር ምክንያት ሁኗል፡፡

ውጥረቱን ተከትሎ ድርጅታችን መጋቢት 28 ቀን 2015 ዓ.ም ባወጣው መግለጫ ያለ በቂ ዝግጅት ፣ ውይይት ፣ የጋራ መግባባት እና መተማመን በድንገት እና ያለበቂ የጸጥታ ዋስትና የፌዴራል መንግስት የክልሉን ልዩ ኃይል ለማፍረስ ያሳለፈው ውሳኔ እና ውሳኔውን ለማስፈጸም እየሄደበት ያለው መንገድ ሃላፊነት የጎደለው እና ዳፋው በአማራ ክልል ብቻ ሳይወሰን በሃገር አቀፍ ደረጃ ከፍተኛ አለመረጋጋት የሚፈጥር ፣ ክልሉን እና ሀገራችን ኢትዮጵያን ወደ ሌላ የቀውስ አዙሪት የሚከት አደገኛ አካሄድ መሆኑን በማስጠንቀቅ ፣ የፌዴራሉ መንግስት ውሳኔውን በአፋጣኝ እንዲቀለብስ እና ከአማራ ክልል መንግስት እና ከክልሉ ሕዝብ ጋር በጉዳዩ ላይ ውይይት እና ምክክር እንዲደረግ እና የክልሉን እና የሀገራችንን ዘላቂ ሰላም በሚያረጋግጥ መልኩ ውሳኔው እንዲከለስ ፣ የልዩ ኃይሉ ቀጣይ እጣ ፈንታ ከአማራ ሕዝብ፣ ከክልሉ ልዩ ኃይል አመራሮች እና ከመላው የሠራዊቱ አባላት ጋር በሚደረግ ውይይት እና የጋራ መግባባት ብቻ ውሳኔ ላይ እንዲደረስበት ማሳሳባችን ይታወቃል፡፡

ይሁንና የፌዴራሉ መንግስት ከሕግ አግባብ ውጭ የገዥው ፓርቲን ውሳኔ ለማስፈጸም የገፋበት በመሆኑ ፣ በአማራ ክልል በርካታ አካባቢዎች ከፍተኛ የሆነ ሕዝባዊ ቁጣ ቀስቅሷል፡፡ ድርጅታችን አብን እስካሁን ድረስ ለሀገራዊ አንድነት እና ሰላም ሲባል ጉዳዩን በከፍተኛ የኃላፊነት ስሜት ሲከታተል ቆይቷል። ይሁንና መንግስት ችግሩን በሰከነ መንገድ ለመፍታት ከመሞከር ይልቅ ከዕለት ወደ ዕለት የለየለት የኃይል ፣ የአፈና እና የማደናገር አማራጭ እየገባ መሆኑን ፖርቲያችን ተረድቷል። መንግስት ችግሩን በሰከነ መንገድ ፣ በውይይት ፣ በጋራ መግባባት እና በመተማመን የመፍታት ኃላፊነት ያለበት ቢሆንም በስህተት ላይ ሌላ ስህተት እየደረበ እና ችግሩን በአፈና እና በጉልበት ለመፍታት ቆርጦ የተነሳ መሆኑን ከግምት ውስጥ በማስገባት ፖርቲያችን የአማራ ብሔራዊ ንቅናቄ ከዛሬ ጀምሮ ለችግሩ ዘላቂ እልባት እስከሚሰጥ ድረስ መንግስት እና ግብረ-አበሮቹ በአማራ ልዩ ኃይል ፣ በፋኖ እና በአጠቃላይ በአማራ ሕዝብ ላይ የሚነዟቸውን የሀሰት ፕሮፖጋንዳዎች በይፋና በተከታታይ የሚያጋልጥ መሆኑን ለማሳወቅ ይወዳል።

የአማራ ክልል ልዩ ኃይል እና ፋኖ የሀገር እና የሕዝብ የሰላም ዘብና ዋስትና እንጂ የፀጥታ ስጋት ምንጭ ሆነው አያውቁም። ሀገር የማዳን ተልዕኮዎችን በከፍተኛ ብቃት የፈጸሙ፣ የሀገር መከላከያ ሠራዊት አስተማማኝ ጋሻ እና ደጀን ሆነውና ከፍተኛ መስዋእትነት ከፍለው ሀገር የመታደግ ጉልኅ ታሪክ የሰሩ የሀገር መከታዎች ናቸው፡፡ ለዚህ መላው የሀገር መከላከያ ሠራዊት አመራሮችና አባላት ህያው ምስክሮች ናቸው። መላው ሀገር ወዳድ ኢትዮጵያውያንም በክብር የሚያወሱት ወገናዊ የታሪክ ሃቅ ነው። ይሁንና የፌዴራሉ መንግስት ለልዩ ኃይሉ ክብር እና ውለታ በማይመጥን እና ፍጹም ክብረ-ነክ በሆነ ሁኔታ የልዩ ኃይሉን አመራር ከሠራዊቱ በመነጠል እና ስንቅ ፣ ሎጂስቲክ እና ደሞዝ በመከልከል ጭምር ልዩ ኃይሉን ለመበተን ጥረት እያደረገ ይገኛል፡፡ ይህም የክልሉ መንግስት የሚቆጣጠረውን እና የሚመራውን ኃይል በመበተን ፣ በእዝ የማይመራ እና መንግስት የማይቆጣጠረውን ኃይል ለመፍጠር እና ክልሉን ወደ ቀውስ እና ትርምስ ለመውሰድ የሚደረግ ጥረት ሆኖ የሚቆጠር ነው፡፡

የአማራ ሕዝብ ከመላው ሀገር ወዳድ ኢትዮጵያውያን ጋር በመተባበርና ከፍተኛ መስዋዕትነት በመክፈል የትሕነግ-ኢሕአዴግን አገዛዝ ከስልጣን አስወግዶ ያመጣውን ለውጥ ለሀገራዊ አንድነት ፣ ነፃነት ፣ ፍትኅ እና ለዴሞክራሲ ገቢራዊ ቀናኢነት በሌላቸው የፖለቲካ እጆች ተነጥቋል። በዚህ ምክንያት ኢትዮጵያ እንደ ሀገር ፣ የኢትዮጵያ ሕዝብ እንደ ሕዝብ ወደማያባራ የነውጥ እና የግጭት፣ የአፈና እና የዘር ፍጂት ምዕራፍ እየተሸጋገሩ ይገኛሉ። መንግስት ዝቅተኛ የሆነውን ለሕይወት እና ንብረት ከለላ የመስጠት ግዴታውን ለመወጣት አቅም ወይም ፍላጎት እንደሌለው ከበቂ በላይ ማሳያዎች ተከስተዋል። በተለይም የአማራ ሕዝብ ከየትኛውም ዘመን በላይ ሰላሙን ፣ ሕይወቱን፣ ማንነቱን እና ንብረቱን በገፍና በይፋ እየተነጠቀ ያለበት ወቅት ነው። ሕዝባችን ይሄን ዘግናኝ ግፍ እና መስዋእትነት ተሸክሞ የቀጠለው ምናልባት ወደፊት እውነተኛ ፍትኅ ፣ እኩልነት እና ዴሞክራሲ የሰፈነበት ሥርአት ይፈጠራል የሚል ተስፋ ሰንቆ ነበር።

ድርጅታችን አብን መዋቅራዊ እና ሕገ-መንግስታዊ ሽግግር እንዲደረግ እና በሥራ ላይ ያለው ሃሳዊ የፌዴራል አወቃቀር በእውነተኛ ፌዴራላዊ የአስተዳደር ሥርአት እንዲተካ እና የሀገራችን አንድነት እና ሉአላዊነት ፣ የዜጎች እና የሕዝብ መብትና ነፃነት እንዲከበር ለማስቻል የበኩሉን ኃላፊነት ለመወጣት ያለመታከት ጥረት ሲያደርግ ቆይቷል። ነገር ግን ይህ ተስፋና ግምት በየቅጣጫው እና በየደረጃው ተሸርሽሮ በአሁኑ ሰዓት የመጨረሻው ዝቅታ (rock bottom) ላይ የደረሰ መሆኑ አይካድም።

ሀገራዊ በጎ ቱርፋት ያጎናፅፋል የተባለለት "የለውጥ ምዕራፍ" ሰቆቃና ስጋት የነገሰበት ሆኗል። የኢትዮጵያን ሕዝብ ከጥላቻ አዙሪት በማስወጣት በነፃነትና በእኩልነት ለማስተዳደር በአደባባይ ቃል ገብተው የነበሩ "የለውጥ አመራሮችም" የዘር አንጓዎችን ተከትለው ከነጎዱ ሰንብተዋል። የአማራ ሕዝብም ራሱን የትግራይ ሕዝብ ነጻ አውጭ ግንባር (ትሕነግ) እያለ የሚጠራው ቡድን በከፈተበት መጠነ ሰፊ ባለ ሶስት ዙር የወረራ ጦርነት ከፍተኛ ሰብዓዊና ቁሳዊ ውድመት ደርሶበታል። በሀገራችን የተለያዩ አካባቢዎች የሚኖረው የአማራ ሕዝብ ተደጋጋሚ የዘር ማጥፋት እና የዘር ማፅዳት ወንጀሎች ተፈፅመውበታል ፤ አሁንም ቢሆን በከፍተኛ የደኅንነት ስጋት ውስጥ ይገኛል። እነዚህ መጠነ-ሰፊ እና ተደጋጋሚ የሆኑ የዘር ጥቃቶች በዋናነት የሚፈፀሙት በሽብር ኃይሎች ቢሆንም በመንግስታዊው መዋቅር እና ባለስልጣናት ቸልተኝነት ፣ ይሁንታ ፣ ፈቃድ እና እገዛ ጭምር እንደሚፈፀሙ በግልፅ ይታወቃል።

በሌላ በኩልና በዋናነት የአማራ ሕዝብ ወደ ሀገሩ መዲና አዲስ አበባ በነፃነት መግባትና መውጣት የማይችልበት ሁኔታ ተፈጥሯል። በአጠቃላይ በአዲስ አበባና አጎራባች አካባቢዎች፣ በተለይም ሸገር ከተማ ተብሎ በተዋቀረው አካባቢ በሚኖረው ሕዝብ ላይ የመንግስት አካላት በማንነት እየለዩ መኖሪያ ቤቶችን በማፍረስና ንብረቶችን በመዝረፍ በርካታ ቤተሰቦችን ሜዳ ላይ እየበተኑት ይገኛል። ሕዝባችን ሀገር አልባና መንግስት አልባ የሆነበት ሁኔታ ተፈጥሯል። የአማራ ሕዝብ በዋናነት በትሕነግ እና በኦነግ-ሸኔ ከተከፈቱበት የጥፋት ዘመቻዎች በተጨማሪ በትሕነግ የተሰማራውና ድጋፍ በሚደረግልላቸው የውስጥ ሽብርተኞች ከፍተኛ ጉዳት ደርሶበታል። በአሁኑ ወቅት የአማራ ሕዝብ ከላይ በተጠቀሱት የሽብር ኃይሎች በኩል የሚፈፀሙበት ጥቃቶች የቀጠሉ ሲሆን ወደፊትም ተጨባጭ ስጋቱ እንደሚቀጥል መገመት አያዳግትም። የአማራ ሕዝብ በጦርነቱ ምክንያት ከደረሰበት ጉዳት ገና አላገገመም። ለኅልውና ዘመቻ በነፍስወከፍ ሀገራዊ ጥሪ የተደረገለት ሕዝብ ድህረ ጦርነት ይህ ነው የሚባል የመልሶ ማቋቋም ድጋፍ አልተደረገለትም። የአማራን ሕዝብ መልሶ ማቋቋም የችሮታ እና የግብረሰናይ ጉዳይ ተደርጎ ተወስዷል።

ስለሆነም ከላይ በዝርዝር የገለፅናቸውን ተጨባጭ የሆኑ ነባራዊ ሁኔታዎች ከግምት ውስጥ በማስገባት ፖርቲያችን የአማራ ብሄራዊ ንቅናቄ የገዥው ፓርቲ ሥራ አስፈጻሚ የአማራ ልዩ ኃይልን ለማፍረስ እና ትጥቅ ለማስፈታት ያሳለፈው ውሳኔ እና የሚያደርገው እንቅስቃሴ ኃላፊነት የጎደለውና ተቀባይነት የሌለው መሆኑን ድጋሜ ማሳወቅ ይፈልጋል። ቀደም ሲል በዝርዝር እንደገለፅነው የብልፅግና ፖርቲ ሥራ አስፈፃሚ የአማራ ልዩ ኃይልን ለማፍረስና ትጥቅ ለማስፈታት ያሳለፈው ውሳኔ መሬት ላይ ያለውን ሃቅ ያላገናዘበ ፣ መርኅ አልባ ፣ አድሏዊ እና አምባገነናዊ ነው፡፡ ውሳኔውና የአፈፃፀም ሂደቱ በሕግ አግባብ የተመራ ፣ መርኅ ተኮር እንደሆነ ፣ ውይይት እንደተደረገበት እና መግባባት የተደረሰበት እንደሆነ ለማስመሰል የሚቀርቡ አስተያየቶች በአጠቃላይ ሃሰት ናቸው።

1. የአማራ ልዩ ኃይል አመራሮች፣ አባላት እና በአጠቃላይ የአማራ ሕዝብ አልተወያየም፣ ፍፁም የሚያውቀው ነገር አልነበረም።

2. በየአካባቢው ተመድበው ስምሪት ላይ የነበሩ የአማራ ልዩ ኃይል አደረጃጀቶችና አባላት ስለጉዳዩ ምንም አይነት መረጃ አልነበራቸውም። በስምሪት እና በካምፖች ውስጥ ባሉበት ወቅት እንደጠላት ተቆጥረው በኃይል እና በከበባ ትጥቃቸውን የመቀማትና የመበተን ሙከራ ተደርጓል። ሰሞኑን በአማራ ልዩ ኃይል ላይ የተፈፀመው ድርጊት ጥቅምት 24 ቀን 2013 ዓ.ም ትሕነግ በሀገር መከላከያ ሠራዊት ሰሜን እዝ ላይ ከፈፀመው ከበባና ጥቃት ጋር ተመሳሳይነት ያለው ክብረ ነክ አዋራጅ ድርጊት ነው።

3. የአማራን ሕዝብ ተወቃሽ የማድረጉ ጥረት በየመድረኩ ቀጥሏል። በሕዝብ እንደራሴ ምክር ቤት ፊት ሳየቀር ለትሕነግ ጠበቃ ሆነው የአማራን ህዝብ ለመዝለፍ የሚዳዳቸው የመንግስት ባለስልጣናትን ተመልክተናል።

4. ሌሎች ክልሎች ነባራዊ የሰላም ሁኔታቸውን ታሳቢ እያደረጉ መወሰን ይችላሉ። ሆኖም የአማራ ልዩ ኃይል አሁን ትጥቁን የማይፈታባቸው የራሱ በቂ ምክንያቶች እንዳሉት ከላይ በዝርዝር አስረድተናል። ከአውድ ውጭ ለማነፃፀር መሞከር በራሱ ሚዛን አልባነት ነው።

5. ከላይ የተገለፀው እንደተጠበቀ ሆኖ የትሕነግ ኃይል በፕሪቶሪያው የሰላም ስምምነት መሰረት ትጥቁን አልፈታም፤ እንዲያውም ተጨማሪ ኃይል እየመለመለ እና እያሰለጠነ፣ እያስታጠቀ እና የውጊያ ልምምዶችን እያደረገ አዲስ የጦርነት ዝግጅት ላይ መሆኑን መንግስት ጠንቅቆ ያውቃል። ዝግጅቱ የሚደረገው በትግራይ ውስጥ እና ከትግራይ ውጭ በጎረቤት አገር ሱዳን ጭምር ነው። ስለሆነም በመንግስት በኩል ከዚህ በተቃራኒ ትሕነግ ትጥቅ እንደፈታና በአካባቢው የሰላም ድባብ እንደሰፈነ የሚወራው ሀሰት ነው።

6. በፌዴራል መንግስቱ ይሁንታ የተቋቋመው የትግራይ ክልል ጊዚያዊ አስተዳደር የፌዴራል መንግስቱ የራያና የወልቃይት የአማራ አካባቢዎችን ክረምት ሳይገባ እንደሚያስረክባቸው በትግርኛ ቋንቋ በሰጡት ቃለ መጠይቅ በይፋ ገልፀዋል። በርካታ የትግራይ ፖለቲከኞች አጋጣሚውን በመጠቀም ድጋሜ ወረራ ለመክፈት የሚታወቅ ውይይትና ዝግጅት እያደረጉ ይገኛሉ። በመጨረሻ ይህ ጉዳይ ከፍተኛ አለመረጋጋት የሚፈጥር እና ሌላ የቀውስ አዙሪት ውስጥ የሚያስገባን አደገኛ አካሄድ በመሆኑ የአማራ ብሔራዊ ንቅናቄ ለገዥው የብልፅግና ፓርቲ ፣ ለፌዴራሉ መንግስት ፣ ለአማራ ብሔራዊ ክልላዊ መንግስት እንዲሁም ለሁሉም የክልል መስተዳደሮች በጥብቅ ለማሳሳብ ይወዳል፡፡

በመሆኑም የአማራ ብሄራዊ ንቅናቄ የሚከተሉትን ጥሪዎች ያስተላልፋል:-

ሀ. የፌዴራሉ መንግስት ውሳኔውን እንደሰረዘ በአደባባይ እንዲገልጽ እና የአማራ ልዩ ኃይል አባላት እና የሀገር መከላከያ ሠራዊት አባላት ወደ ካምፓቻቸው እና ወደ ግዳጅ ቦታቸው እንዲመለሱ በይፋ ጥሪ እንዲያደርግ፤

ለ. በፌዴራል መንግስቱ ውሳኔ እና ትዕዛዝ ከሥራ ውጭ የሆኑት የአማራ ልዩ ኃይል የብርጌድ እና የክፍለ ጦር አዛዞዦች ወደምድብ ቦታቸው እንዲመለሱ እንዲደረግ፤

ሐ. የአማራ ክልል መንግስት ለልዩ ኃይሉ አስፈላጊ የሆኑ ስንቅ እና ሎጂስቲክ እንዲያቀርብ እና ደሞዝ እንዲከፍል፤

መ. በካምፕ እና በግዳጅ ቦታችሁ ላይ የምትገኙ ውድ የአማራ ክልል የልዩ ኃይል ፖሊስ አመራሮች እና አባላት ሠራዊቱ እንዲበተን የሚደረጉ ጥረቶችን እና የፕሮፖጋንዳ ጥቃቶችን በመቋቋም በተለመደው ሥነ-ምግባር ፣ ዲስፕሊን እና ጨዋነት ከህዝባችሁ ጎን እንድትቆሙ፤

ሠ. የአማራ ሕዝብ በያካባቢው ላሉት የልዩ ኃይል አባላት አስፈላጊውን ድጋፍ እንዲያደርግላቸው ድርጅታችን ጥሪውን ያቀርባል።

አብን ጉዳዩን በቅርበት እና በንቃት እየተከታተለው መሆኑን እና በቀጣይም ሁኔታዎችን እየገመገመ ተከታታይ አቅጣጫዎችን የሚያስቀምጥ መሆኑን እየገለጸ መላው የአማራ ሕዝብ እና ሀገር ወዳድ ኢትዮጵያውያን በሙሉ ከሀገር ወዳዱ የአማራ ልዩ ኃይል ጎን እንድትቆሙ የከበረ ጥሪውን ያቀርብላችኋል።

የአማራ ብሔራዊ ንቅናቄ (አብን)
አዲስ አበባ ፣ ሸዋ ፣ ኢትዮጵያ
ሚያዚያ 1 ቀን 2015 ዓ.ም

ከአማራ ብሔራዊ ንቅናቄ (አብን) ጠቅላላ ጉባኤ አመቻች ኮሚቴ የተሰጠ መግለጫ፣________ድርጅታችን የአማራ ብሔራዊ ንቅናቄ (አብን) ከተመሰረተ ጊዜ ጀምሮ ከፍተኛ ህዝባዊና ማህበራዊ ንቅናቄ...
30/07/2022

ከአማራ ብሔራዊ ንቅናቄ (አብን) ጠቅላላ ጉባኤ አመቻች ኮሚቴ የተሰጠ መግለጫ፣
________

ድርጅታችን የአማራ ብሔራዊ ንቅናቄ (አብን) ከተመሰረተ ጊዜ ጀምሮ ከፍተኛ ህዝባዊና ማህበራዊ ንቅናቄዎችን ከመፍጠሩ ባሻገር ህዝባችን ነገን በተስፋ እንዲጠብቅ አዎንታዊ ኃይል የሆነና፤ የአማራ ህዝብ በተለይም የወጣቱ ፖለቲካዊ ተሳትፎ ከመቸውም ጊዜ በተሻለ ሁኔታ እንዲጎለብት ያደረገ፤ በተለያዩ ጊዜያት በያዛቸው ፖለቲካዊ አቋሞቹ ሀገርንና ህዝብን መታደግ የቻለ ፓርቲ ነው፡፡

ሆኖም ግን ድርጅታችን አሁን ላይ የገጠሙትን ፈተናወች ለማለፍ ማዕከላዊ ኮሚቴው ችግሮችን በጥልቀት በመገምገም የሀሳብ እና የተግባር አንድነት ያለው ጠንካራ አደረጃጀት ለመፍጠር እና ጊዜውን እና የፖለቲካ ሁኔታውን የሚመጥን ተራማጅ የፖለቲካ ትግል ለማድረግ የሚያስችል አቅም ለመገንባት ይረዳ ዘንድ የአሰራርና የአደረጃጀት እንዲሁም የአመራር ሪፎርም እንዲደረግ ውሳኔ አሳልፎ የሪፎርም ጉባኤ አመቻች ኮሚቴ አቋቁሞ ተጨባጭ ስራዎችን እያከናወነ ይገኛል፡፡ ኮሚቴውም የተሰጠውን ሃላፊነት በተገቢው መንገድ የተወጣና ስራውን ያጠናቀቀ ሲሆን ድርጅታችን ያጋጠመው የፋይናንስና ሎጀስቲክ ውስንነቶች እንደተስተካከሉ ጉባኤውን በአጭር ጊዜ ውስጥ የምናካሂድ መሆኑን እየገለጽን:-

መላው የድርጅታችን አባላት:

የአማራ ህዝብ መሰረታዊ ጥያቄዎችና የሀገራችን ችግሮች የተራዘመና የተጠናከረ ትግል የሚጠይቁና ጥያቄዎችን ለመድረክ በማብቃት እልባት እንዲያገኙ የሚያስችል መነሻ አማራዊ የፖለቲካ ሀይል ማፅናት መሰረታዊ ትኩረት ተደርጎ ሊከናወን እንደሚገባ በመረዳት ከምንም በላይ መሪ ድርጅታችን አብንን በመጠበቅና በማፅናት እንድትረባረቡ፤ አሁን ያለንበት ነባራዊ ሁኔታ ከመቸውም ጊዜ በላይ አንድነታችን ጠብቀን ህብረታችንን አጠንክረን ለህዝባችን የፍትህና የእኩልነት ጥያቄ በአብሮነት መንፈስ በፅናት የምንታገልበት ታሪካዊ ወቅት ላይ መሆናችንን በመገንዘብ የተለመደ ድርጅታዊ አንድነታችሁን ጠብቃችሁ እንድትሰሩ እናሳስባለን፡፡

በተለያየ ደረጃ ላላችሁ የድርጅታችን አመራሮች፡-

የጠቅላላ ጉባኤውን ዝግጅት በተመለከተ በማዕከላዊ ኮሚቴው በኩል ለአመቻች ኮሚቴው የተሰጠ ስልጣን መሆኑን በመገንዘብ ማህበራዊ ሚዲያን ጨምሮ ጉባኤውን የተመለከተና አብን በአጭር ጊዜ በኢትዮጵያ ፖለቲካ ውስጥ በሳልና ገንቢ ሚና በመጫወት ያገኘውን ህዝባዊ ድጋፍና አመኔታ የሚያሳጣ፤ የህዝባችን ድምፅና ተገቢ የፖለቲካ ሀይል ሆኖ እንዲቀጥል ከተሰጣችሁ አብናዊ ሃላፊነት አባላችንን እና ደጋፊያችንን አላስፈላጊ ጫና ውስጥ ከሚከቱ እና እምነት ከሚያሳጡ እንቅስቃሴዎች እንድትቆጠቡ፤ በተቻለ መጠን ለምንወደውና ቀድመን መስዋዕትነት ልንከፍልለት ለተዘጋጀንለት የህዝባችን አንድነትና ፖለቲካዊ ህልውና አዎንታዊ ሚና እንድትጫወቱ እናሳስባለን፡፡

ለደጋፊዎቻችንና ለመላው የአማራ ህዝብ፡-

ምንም እንኳን ከህዝባችን ውስብስብና ሰፊ ችግሮች አንፃር መሰረታዊ የሚባል ለውጥ ባይመጣም ለነበሩን ወሳኝ አቋሞቻችንና የትግል እንቅስቃሴዎች ጉልህ ሚና የነበራችሁ መሆኑን እየገለፅን ካለፈው ይልቅ አሁን አብን የእናንተን ሁለንተናዊ ድጋፍ የሚሻበት ወቅት በመሆኑ ድጋፋችሁን አጠናክራችሁ እንድትቀጥሉ ጥሪያችንን እናስተላልፋለን።

በአማራ ብሔራዊ ንቅናቄ (አብን) የጠቅላላ ጉባኤ አመቻች ኮሚቴ

አዲስ አበባ፣ ሸዋ፣ ኢትዮጵያ

ሐምሌ 23 ቀን 2014 ዓ.ም.

Address


Website

Alerts

Be the first to know and let us send you an email when የአማራ ብሔራዊ ንቅናቄ - /አብን/ - የኮምቦልቻ ማስ/ፅ/ቤት posts news and promotions. Your email address will not be used for any other purpose, and you can unsubscribe at any time.

Shortcuts

  • Address
  • Alerts
  • Claim ownership or report listing

  • Want your business to be the top-listed Media Company?

Share