Zephyr of Sylvalight (2024)

20/01/2024

ကမ္ဘာ့ အသက်အငယ်ဆုံးလူသတ်သမား
( Amarjeet Sada )

ရာဇဝတ်မှု သမိုင်းတလျှောက်အတွင်း ထိတ်လန့်တုန်လှုပ်ဖွယ်ရာ အမှုတခုရှိပါတယ်။ Amarjeet Sada ဆိုတဲ့ အိန္ဒိယ လူငယ်ကောင်လေးရဲ့ ကမ္ဘာ့အသက်အငယ်ဆုံး လူသတ်သမား ဆိုတဲ့ နာမည်ဆိုးရခဲ့တဲ့ အမှုတခုပါ။ ဒီကောင်လေးကို အိန္ဒိယ နိုင်ငံမှာ 1998 ခုနှစ်ကမွေးဖွားခဲ့ပြီး၊ လူမှန်းသိတတ်စ အသက် ရှစ်နှစ် အရွယ်မှာ လူသတ်မှုကို စတင်ကျူးလွန်ခဲ့ပါတယ်။ သေဆုံးသူတွေဟာ မွေးကင်းစ လသား ကလေးအရွယ်တွေ ဖြစ်တာကြောင့် ဒီအမှုဟာ နိုင်ငံတကာရဲ့ အာရုံစိုက်မှုကိုပါ ရခဲ့တာပါ။

2006 ခုနှစ်မှာ Sada ဟာ သူ့ရဲ့ ခြောက်လသားအရွယ် ဝမ်းကွဲ ကို ရက်ရက်စက်စက် သတ်ခြင်းနဲ့ သူ့ရဲ့ လူသတ်ခရီးစဉ်ကို စခဲ့ပါတယ်။ တနေ့မှာ သူ့ရဲ့ အဒေါ်ဖြစ်သူဟာ Sada တို့အိမ်လာလည်ခဲ့ပါတယ်။အဒေါ်ဖြစ်သူဟာ အလုပ်ကိစ္စတခုနဲ့ အပြင်ထွက်သွားခဲ့ပါတယ်။ Sada ရဲ့ အမေကလည်း တိုက်တိုက်ဆိုင်ဆိုင်ပဲ အစားအသောက်အတွက် ဈေးသွားဖို့ ပြင်နေပါတယ်။ Sada ကို အဒေါ့်ကလေး သူ့ဝမ်းကွဲ နဲ့ Sada ရဲ့ ညီမအငယ်လေးကို ဂရုစိုက်ဖို့ မှာပြီး ဈေးသွားခဲ့ပါတယ်။

အဲ့အချိန်မှာပဲ Sada ရဲ့ လုပ်ရပ်တွေ စတင်ပါတော့တယ်။ သူ့ရဲ့ ဝမ်းကွဲဖြစ်တဲ့ ခြောက်လသားကလေးကို စတင် ရိုက်နှက် ထိုးကြိတ် ကန်ကျောက် ပါတယ်။ ကလေးက အသည်းသန်ငိုတဲ့အခါ Sada က ရယ်မောရင်း ကလေးရဲ့ လည်ပင်းစတင် ညှစ်ပါတော့တယ်။ အချိန်အတန်ကြာတဲ့အခါ ကလေးဟာ အသက်ရှုရပ်ပြီး ဆုံးပါးသွားခဲ့ရပါတယ်။

သေသွားတဲ့ ကလေးရဲ့ ရုပ်အလောင်းကို ခြုံမြက်တွေရှိရာ နေရာတခုမှာ သွားမြုပ်ခဲ့ပါတယ်။ မယုံနိုင်စရာကောင်းအောင်ပဲ ဒီလုပ်ရပ်တွေဟာ ရှစ်နှစ်သား ကလေးတယောက်ဆီက ဖြစ်နေပါတယ်။ အမေဈေးက ပြန်ရောက်တဲ့အခါ ကလေးပျောက်နေတာကိုသိတော့ Sada ကိုမေးပါတယ်။ Sada ဟာ ဝေ့လည်ကြောင်ပတ်လုပ်မနေဘဲ သူသတ်ခဲ့တဲ့ အကြောင်းဝန်ခံလိုက်ပါတယ်။ ဒါကြောင့် သူ့မိဘတွေဟာ သူကို ရိုက်နှက် အပြစ်ပေးခဲ့ပါတယ်။ ဒါပေမဲ့ ရဲကို အကြောင်းမကြားခဲ့သလို အဒေါ်ပြန်ရောက်လာတဲ့အခါမှာလည်း မိဘတွေက လုပ်ကြံဇာတ်လမ်းမျိုးစုံနဲ့ ကလေးပျောက်ကြောင်း လိမ်ခဲ့ကြပါတယ်။ ဒါတွေဟာ Sada ရဲ့ စိတ်ကို ပိုဆွပေးခဲ့သလိုဖြစ်ပြီး လူသတ်မှုထပ် ကျူးလွန်ဖို့ တွန်းအားတွေ ဖြစ်ခဲ့ပါတယ်။

နောက်ထပ် နစ်နာသူကတော့ အခြားသူမဟုတ်ဘဲ Sada ရဲ့ ညီမအရင်းကိုယ်တိုင်ပါ။ မိဘတွေအိပ်နေတဲ့ ညတစ်ညမှာ သူ့ရဲ့ ရှစ်လသား ညီမအရင်းဖြစ်သူကို ထပ်ပြီး လည်ပင်းညှစ်သတ်ခဲ့ပြန်ပါတယ်။
ဒါတွေ ဖြစ်တဲ့အထိ မိဘတွေဟာ ရဲကို အကြောင်းမကြားခဲ့ပါဘူး။

2007 ခုနှစ်မှာ Sada ဟာ နောက်ဆုံးလူသတ်မှုနဲ့အတူ သူ့ခရီးစဉ် အဆုံးသတ်သွားခဲ့ပါတယ်။ တတိယမြောက် နစ်နာသူကတော့ သူ့ရဲ့ အိမ်နီးချင်းဖြစ်တဲ့ ခြောက်လသားအရွယ် Kushboo အမည်ရှိ ကလေးမလေး တစ်ဦးဖြစ်ပါတယ်။ ဒီတကြိမ်မှာလည်း လည်ပင်းညှစ်သတ် ရုံသာမက ခေါင်းကိုလည်း အုတ်ခဲ့နဲ့ သေတဲ့အထိ ထုရိုက်ခဲ့ပါတယ်။

ကလေးမိခင်ဟာ ကလေးပျောက်ကြောင်း ရဲစခန်းကို တိုင်ကြားပြီး နာရီ အနည်းငယ်အတွင်းမှာပဲ Sada ဟာ ကလေးကို သူသတ်ခဲ့ကြောင်း ကလေးမိခင်ကို ဝန်ခံခဲ့ပါတယ်။ ရဲတွေလည်း ဒီလောက်ရက်စက်တဲ့ အမှုမျိုး ကလေးတယောက်က မကျူးလွန်နိုင်လောက်ဘူးဆိုတဲ့ အထင်နဲ့ မယုံကြည်ကြခဲ့ပါဘူး။ Sada ရဲ့ ပြောပြချက်နဲ့ အလောင်းတွေ မြုပ်တဲ့နေရာတွေမှာ ကလေးကိုယ်ခန္ဓာတွေ တွေ့ရတော့မှာ အာဏာပိုင်တွေဟာ Sada ကိုဖမ်းဆီး ခဲ့ပါတယ်။

သူဟာ အချုပ်ကျစဉ် အတွင်းမှာ သူဟာ စကားတလုံးမှာ မပြောခဲ့သလို နောင်တရဟန် တစိုးတစိမှ မရှိဘဲ တချိန်လုံး ပြုံးရယ်နေတတ်ပါတယ်။ စိတ်ပညာရှင်တွေကတော့ သူဟာ လူသတ်မှုတွေကို ရည်ရွယ်ချက်ရှိရှိ ကျူးလွန်တာဖြစ်ပြီး လူတွေ နာကျင်မှုကနေ ပျော်ရွှင်မှုရနေတယ်လို့ ဆိုပါတယ်။ ပညာရှင် တယောက်ကလည်း ကောင်လေးဟာ အမှားအမှန်းကို မခွဲခြားမခံစားတတ်တဲ့ စိတ်ချို့ယွင်းမှု ဖြစ်နေတယ်လို့ ဆိုပါတယ်။

ရဲတွေ စစ်မေးတဲ့ အချိန်မှာ သူဟာ တည်တည်ငြိမ်ငြိမ်နဲ့ နောင်တကင်းမဲ့စွာဖြေခဲ့ပါတယ်။
" သူမ က မူကြိုကျောင်းမှာ အိပ်နေတာ၊ နည်းနည်းဝေးရာကို ခေါ်သွားပြီး ကျောက်တုံးနဲ့ ထုသတ်ခဲ့တာ။ ပြီးမှ သဂြိုဟ်ခဲ့တာ။ "

သူဟာ ကလေးတယောက် ဖြစ်နေတဲ့အတွက် သေဒဏ်ပေးလို့မရသလို ထောင်ချလို့လဲမရခဲ့ပါဘူး။
ဒါကြောင့် Sada ဟာ တနှစ်အတွင်း ကလေးသုံးယောက် သတ်ဖြစ်မှုနဲ့ နေအိမ်အကျဉ်းကျခံခဲ့ရပါတယ်။

သူဟာ ဥပဒေအရ အသက် ၁၈ အထိ ချုပ်နှောင်ခံရနိုင်တယ်ဆိုပေမဲ့ အသက် ၁၆ မှာပဲ ပြန်လွတ်လာပါတယ်။ အခုတော့ ပျမ်းမျှ အသက် ၂၀ ကျော် ရှိနေပါပြီ။ တချို့ပြောစကားအရ Samarijit လို့ အမည်ပြောင်းပြီးနေထိုင်နေတယ်လို့ ဆိုကြပေမဲ့ သူအခု ဘယ်မှာ ရောက်နေလဲ ၊ ဘယ်မှာနေလဲဆိုတာ ဘယ်သူမှသေချာမသိကြပါဘူး။ သေချာတာကတော့ သူဟာ သူ့လုပ်ရပ်အတွက် ထိရောက်တဲ့ တရားဥပဒေ အပြစ်ပေးမှုကို မခံခဲ့ရပါဘူး။

This content is the intellectual property of Zephyr of Sylvalight. Copying and reproducing without proper credit is a violation of copyright.

15/01/2024

စတော်ဘယ်ရီ တလုံးထဲက အင်တာနက်

ကျွန်တော်တို့ နေ့စဉ်အသုံးပြုနေတဲ့ အင်တာနက် မှာ weight ( အလေးချိန် ) ရှိလား?
နည်းနည်းတော့ ကြောင်တောင်တောင်ဆန်ပေမဲ့ အဖြေကတော့ Yes ပါ။

ဒီလိုအလားတူ မေးခွန်းမျိုးကို University of California က Computer Science Professor ( ကွန်ပျူတာ သိပ္ပံ ပါမောက္ခ ) တစ်ဦးဖြစ်တဲ့ Dr. John Kubiatowiczm ကစဉ်းစားမေးခဲ့ဖူးပါတယ်။

သူဟာ Kindle ( e-reader ) တခုကို အသုံးပြုပြီး Information ( သတင်းအချက်လက် ) တွေမှာ Mass ( ထုထည် ) ရှိကြောင်းထုတ်ဖော်ပြသခဲ့ပါတယ်။ သူဟာ Kindle ရဲ့ transistor အတွင်းထဲမှာ ပိတ်မိနေတဲ့ electron ( အမ လျှပ်စစ်ဓာတ် ) တွေရဲ့ binary အခြေနေနှစ်ခု ( 0 and 1 ) ကို ဖော်ပြနိုင်ခြင်းကို အသုံးပြုပြီး Information နဲ့ Mass ကြားက ဆက်သွယ်ချက်ကို ဖော်ထုတ်နိုင်ခဲ့ပါတယ်။

သူဟာ နာမည်ကျော် Einstein ရဲ့ E = mc^2 ဖော်မျူလာကို သုံးပြီး အလွတ်ဖြစ်နေတဲ့ Kindle တလုံးနဲ့ 4GB ပမာဏ Information တွေအပြည့်ဖြစ်နေတဲ့ Kindle တလုံးကို နှိုင်းယှဉ်တွက်စပြီး၊ သူတို့ကြားထဲက အလေးချိန် ကွာခြားချက်ဟာ ခန့်မှန်းခြေ 10^(-18) ဂရမ် တနည်းအားဖြင့် တစ်ဂရမ်ရဲ့ ဘီလီယံတသန်း ( 0.000000000000000001 ) ရှိကြောင်းကို ဖော်ထုတ်နိုင်ခဲ့ပါတယ်။ ဒါဟာအလွန်သေးငယ်တဲ့ ပမာဏတခုပါ။ အရွယ်ရောက်ပြီး ပုရွက်ဆိတ်တကောင်တောင် 1-5 မီလီဂရမ် (0.001 - 0.005 ဂရမ်) အထိရှိနိုင်ပါတယ်။ ဒါ ပုရွက်ဆိတ်တကောင်ထက် အဆပေါင်းများစွာသေးငယ်တဲ့ ပမာဏပါ။

Dr. Kubi ရဲ့ ဒီရလဒ်ကို သုံးပြီး ရူပဗေဒ ပညာရှင် Russell Seitz က Server Network ( ဆာဗာကွန်ရက် ) တွေရဲ့ Energy ( စွမ်းအင် ) အသုံးချမှု ပမာဏကို တွက်ချက်ပြီး Internet ရဲ့ Weight ဟာ တော်ဘယ်ရီကြီးတလုံးအရွယ် အလေးချိန် 50 ဂရမ်မျှရှိတယ်လို့ ပြောကြားခဲ့ပါတယ်။

The Guardian ရဲ့ ဖော်ပြချက်အရ 2023 မှာ ကမ္ဘာ အင်တာနက်ရဲ့ အလေးချိန်ဟာ 60 ဂရမ် လောက်ရှိနိုင်ပါတယ်တဲ့။ ဒါဟာ စတော်ဘယ်ရီ တလုံး မဟုတ်တော့ဘဲ တင်းနစ်ဘောလုံး တလုံး အလေးချိန်ဖြစ်နေပါပြီ။

This content is the intellectual property of Zephyr of Sylvalight. Copying and reproducing without proper credit is a violation of copyright.

13/01/2024

Antimatter

စကြဝဠာ အတွင်း သက်ရှိသက်မဲ့ အရာအားလုံးကို matter ( ဒြပ်ထု ) တွေနဲ့ ဖွဲ့စည်းပါတယ်။ Antimatter ( ဆန့်ကျင်ဒြပ်ထု or ဒြပ်မဲ့ထည် ) တွေကတော့ matter ( ဒြပ်ထု ) တွေရဲ့ ဆန့်ကျင်ဘက်ဖြစ်ပါတယ်။

Matter ရဲ့ Atom ( အက်တမ် ) တွေအတွင်းမှာ Particle ဆိုတဲ့ အမှုန်လေးတွေရှိပါတယ်။ Atom တွေ ကို Electron , Neutron , Proton ဆိုတဲ့ ဒြပ်မှုန်လေးတွေနဲ့ ဖွဲ့စည်းထားပါတယ်။ Atom ရဲ့ အလယ်မှာ Nucleus ရှိပြီး ၊ ထို Nucleus ထဲမှာ Proton ( အဖိုလျှပ်စစ်ဓာတ် ) နဲ့ Neutron ( လျှပ်စစ်ဓာတ်ပြယ် ) တို့ရှိပါတယ်။ Proton နဲ့ Neutron ကို အလွန်သေးငယ်တဲ့ Quark လေးတွေနဲ့ ထပ်မံ ဖွဲ့စည်းထားပါတယ်။ Electron ( အမလျှပ်စစ်ဓာတ် ) ကတော့ Nucleus ကို Electron Orbits ဆိုတဲ့ ပတ်လမ်းနဲ့ လှည့်ပတ်နေပါတယ်။ ဒါကတော့ အခြေခံ Atom တလုံးရဲ့ ဖွဲ့စည်းတည်ဆောက်ပုံပါ။

Antimatter မှာလည်း Matter လို Particle လေးတွေရှိပါတယ်။ သူတို့ကိုတော့ Antiparticle တွေလို့ခေါ်တယ်။ Antimatter အတွင်း ထဲက Particle တွေက Matter အတွင်းထဲက Particle တွေနဲ့ ဆန့်ကျင်ဘက် လျှပ်စစ်ဓာတ်တွေ ဖြစ်နေပါတယ်။ Antimatter အတွင်းမှာလဲ Electron ရှိသလို Proton နဲ့ Neutron လည်းရှိပါတယ်။ Antimatter အတွင်းက Electron က Matter နဲ့ဆန့်ကျင်ဘက် အဖိုလျှပ်စစ်ဓာတ်ကို ဆောင်ပါတယ်။ ဒါကြောင့် သူ့ကို Positron တနည်းအားဖြင့် Antielectron လို့ခေါ်ပါတယ်။ ထိုနည်းတူ Proton နဲ့ Neutron တွေကလည်း Matter နဲ့ဆန့်ကျင်ဘက် လျှပ်စစ်ဓာတ်ကို ဆောင်ကြပြီး Antiproton နဲ့ Antineutron လို့ခေါ်ကြပါတယ်။

Antimatter ကိုတော့ 1928 မှာ ရူပဗေဒပညာရှင် Paul Dirac က စတင်တွေ့ရှိခဲ့ပါတယ်။
သူဟာ special reactivity နဲ့ quantum theory အီကွေးရှင်း နှစ်ခုကို ပေါင်းစပ်ဖို့ကြိုးစားရင်း Electron ရဲ့ အဖိုလျှပ်စစ်ဓာတ်ကော အမလျှပ်စစ်ဓာတ်ကော အသုံးပြုလို့ရတဲ့ အီကွေးရှင်းတခုကို တွေ့ရှိခဲ့ပါတယ် ။ x^2 = 4 ဆိုတဲ့ အီကွေးရှင်းမှာ x အတွက် အဖြေက နှစ်မျိုးဖြစ်နိုင်ပါတယ်။ ( x = 2 ) ဒါမှမဟုတ် ( x = -2 ) ။ ဒါကြောင့် Dirac ရဲ့ အီကွေးရှင်းမှာလဲ Electron အတွက် နှစ်ခု ဖြစ်နိုင်ပါတယ်။ အဖိုလျှပ်စစ်ဓာတ် ဒါမှမဟုတ် အမ လျှပ်စစ်ဓာတ် ။ ဒါကြောင့် Paul Dirac က စကြဝဠာ အတွင်းရှိ Particle တွေမှာ ဆန်ကျင်ဘက် Particle တွေရှိနိုင်ကြောင်း ပြောဆိုခဲ့ပါတယ်။ သူ့ရဲ့ရှာဖွေတွေ့ရှိမှုကြောင့် Nobel ဆုကို ရရှိခဲ့သလို Electron ရဲ့ဆန့်ကျင်ဘက် Positron ကိုတွေ့ရှိခဲ့သူ ရူပဗေဒပညာရှင် Carl D.Anderson ကလည်း Nobel ဆုကို ရရှိခဲ့ပါတယ်။

Big Bang အပြီး စကြဝဠာ အတွင်းမှာ matter နဲ့ antimatter တွေက ညီတူညီမျှ ပမာဏ နဲ့ ဖြစ်တည်လာကြပါတယ်။ အဲ့နှစ်ခု အချင်းချင်းထိတွေ့တဲ့ အခါ နှစ်ခုလုံးပျက်စီး သွားကြပြီး Gamma Ray လို့ခေါ်တဲ့ စွမ်းအင်တွေကိုဘဲ ချန်ခဲ့ပါတယ်။ matter နဲ့ antimatter တွေဟာ ညီတူညီမျှရှိခဲ့ကြပေမဲ့ ယနေ့ စကြဝဠာ ထဲမှာတော့ matter တွေကိုသာ တွေ့နိုင်ပြီး antimatter တွေဟာ မတွေ့ရလောက်အောင်ကို အရမ်းရှားပါးသွားခဲ့ပါတယ်။ ပညာရှင်တွေလည်း ဒီကိစ္စနဲ့ပတ်သတ်ပြီး ဘာလို့ matter တွေဘဲ စကြဝဠာ အတွင်းကျန်ခဲ့ရလည်း ဆိုတာ အဖြေ သေချာ ရေရာ အောင် မပေးနိုင်သေးပါဘူး ။

This content is the intellectual property of Zephyr of Sylvalight. Copying and reproducing without proper credit is a violation of copyright.

Photo Credit to bigthink.com

13/01/2024

Algorithm : Heart of Computer Science
( IGCSE CS )

Algorithm များဟာ ယနေ့ခတ် Digital World အတွက် အဓိက ကျောရိုးတခုပါ။ နေ့စဉ်အသုံးပြုနေတဲ့ နည်းပညာများ ၊ ဒေတာများကို ကြိုးကိုင် ချယ်လျယ်ထားတဲ့ နောက်ကွယ်က အဓိက ဇာတ်ကောင်တခုပါ။ ဆိုတော့ ဒီနေ့ Computer Science ရဲ့ Topic တခုဖြစ်တဲ့ Algorithm တွေအကြောင်းကို
လေ့လာကြည့်ကြရအောင်။

What are Algorithms ?

Algorithm တွေဟာ ပြဿနာတွေကို ဖြေရှင်းဖို့ အဆင့်ဆင့်လုပ်ထုံးလုပ်နည်း ( step-by-step procedure or formula ) တွေပါ။ ဟင်းတခွက်ကို ဖန်တီးဖို့ အသုံးပြုတဲ့ ဟင်းချက်နည်း ( recipe ) တခုနဲ့ အလားတူပါတယ်။ Algorithm တွေ Computer တလုံးရဲ့ လုပ်ဆောင်ချက်တွေကို လမ်းပြပေးတဲ့ လမ်းညွှန်တယောက်ပါ။

Why are Algorithms important ?

အဓိကကတော့ Efficiency ( စွမ်းဆောင်နိုင်စွမ်း ) ပါ။ Computer ရဲ့ resource တွေကို သုံးပြီးတော့ တွက်ချက်ခြင်းဆိုင်ရာ လုပ်ငန်းစဉ် ( calculation ) နဲ့ အခြား လုပ်ဆောင်ချက်များကို မြန်မြန်နဲ့ ပိုစွမ်းဆောင်နိုင်အောင် Algorithm တွေက ကူညီ ထောက်ပံ့ပေးပါတယ်။

ဥပမာ အားဖြင့် Bubble Sort နဲ့ Merge Sort ကဲ့သို့ Sorting ( အစီစဉ်တကျ စီခြင်း ) လုပ်ခြင်းမျိုးတွေဟာ ပိုမို ထိရောက် မြန်ဆန်ပြီး အလုပ်ကို ပိုတွင်ကျယ်စေပါတယ်။

Software System တွေတည်ဆောက်တာက အစ၊ နေ့စဉ်သုံး နည်းပညာတွေမှာပါ Algorithm တွေဟာ အသုံးတွင်ကျယ်ပါတယ်။ AI Technology တွေမှာလည်း Algorithm ဟာမရှိမဖြစ်ပါ။
Social Media တွေဟာလည်း Algorithm ကို အခြေပြု တည်ဆောက်ထားတာပါ။ Youtube ပေါ်မှာ Video တပုဒ် ကြည့်မိလိုက်ပြီး တောက်လျောက် အဲ့ Video နဲ့ အလားတူ အမျိုးအစားတွေ တောက်လျှောက်ပေါ်လာတာ၊ Facebook ပေါ်က Friend Suggestion တွေဟာ အများသိမြင်နေကြ Algorithm တွေပါ။

Algorithm Success Criteria ?

Algorithm တွေကို အောင်မြင်စေနိုင်တဲ့ အချက် သုံးချက်ရှိပါတယ်။
ဒါတွေကတော့ Accuracy , Consistency , Efficiency တွေပါ။

လိုချင်တဲ့ အချက်လက် result တိကျ သေသေချာချာ ထွက်လာခြင်းကို accuracy လို့ခေါ်ပါတယ်။ လိုချင်တဲ့ result ကို ထပ်ခါထပ်ခါ run နေရင်တောင် ဒီ result ပဲထွက်လာတာမျိုးကို consistency လို့ခေါ်ပါတယ်။ efficiency က တော့ အပေါ်က ပြောခဲ့သလို အချိန်တိုအတွင်း ပြီးစီးနိုင်တာလို့ အကြမ်းဖျမ်း သိထားလို့ရပါတယ်။

ဥပမာ:

4 + 5 ဟာ 9 ရပါတယ်။ ဒါဟာ တိကျသေချာတဲ့ result တခုပါ ၊ ဒါကို accuracy ( တိကျသေချာခြင်း ) လို့ခေါ်ပါတယ်။ 4 နဲ့ 5 ကို ဘယ်အချိန် ထ ပေါင်းပေါင်း 9 ပဲထွက်နေမှာပါ၊ ဒီနေ့တော့ 9 ထွက် နောက်နေ့တော့ 6 ထွက်ဖြစ်မနေပါဘူး၊ ဒါကို consistency လို့ခေါ်ပါတယ်။

Algorithm ရဲ့ အခြေခံ သဘောကို Sandwich တခုပြုလုပ်ရင်း လေ့လာကြည့်ရအောင်။

ပါဝင်ပစ္စည်းတွေကတော့:

- ပေါင်မုန့်
- ထောပတ်
- ဂျယ်လီ

အဆင့်တွေတော့:

- လိုအပ်တဲ့ ပါဝင်ပစ္စည်းတွေ၊ ပန်းကန်၊ ဓားကဲ့သို့ ကိရိယာများအပါအဝင်တို့ကိုစုဆောင်းတာ
- ပေါင်မုန့် နှစ်ချပ်ကို ပန်းကန်ပေါ် တင်ထားပါမယ်
- ပြီးတော့ ပေါင်မုန့်ကို ထောပတ် သုတ်ပါမယ်
- အလားတူပဲ ပေါင်မုန့် အခြားတဖက်ကို ဂျယ်လီသုတ်ပါမယ်
- ပြီးတော့ ပေါင်မုန့် အခြမ်းနှစ်ခုကို ထပ်ပြီး လိုအပ်သလို လှီးစားပါမယ်

ဒီ Algorithm မှာ တိကျတဲ့ လုပ်ဆောင်ချက်တွေနဲ့ ရှင်းလင်းတဲ့ အဆင့်များပါပါတယ်။
Algorithm ကို လေ့လာကြည့်ရင် Input , Process နဲ့ Output ဆိုပြီး သုံးချက်ကို တွေ့ရပါလိမ့်မယ်။
ပါဝင်ပစ္စည်းတွေ ဖြစ်တဲ့ ပေါင်မုန့်၊ ထောပတ်၊ ဂျယ်လီ စတာတွေဟာ Input ( သွင်းကုန် ) တွေဖြစ်ပြီး Sandwich ဖြစ်ဖို့ လုပ်ဆောင်နေတဲ့ အချက်တွေကတော့ Process တွေပါ။ နောက်ဆုံး ရလာတဲ့ result ဖြစ်တဲ့ Sandwich ကတော့ စားလို့ရတဲ့ အဆင့်ဖြစ်နေတဲ့ Output ( ထုတ်ကုန် ) ပါ။

တနည်းအားဖြင့် ဒီလိုမြင်ကြည့်လို့ရပါတယ်။

Input --> Process --> Output
4 and 5 --> addiction --> 9
coffe and warm water --> mix together --> cup of coffe

Algorithm can be displayed through ?

Algorithm တွေကို အဓိက အားဖြင့် Flowcharts , Written Description , Pseudo Code ဆိုပြီး သုံးမျိုးနဲ့ ဖော်ပြလို့ရပါတယ်။

ဒါတွေကို နောက် article တခုမှာ အသေးစိတ် ဥပမာတွေနဲ့အတူ လေ့လာကြရအောင်။

This content is the intellectual property of Zephyr of Sylvalight. Copying and reproducing without proper credit is a violation of copyright.

Zephyr of Sylvalight

20/01/2024

15/01/2024

13/01/2024

13/01/2024

Address

Website

Alerts

Shortcuts

Share