02/09/2024
Balatkayong Progreso: Ang Banta ng Kaliwa Dam sa Katutubo, Kalikasan, at Karapatan
|| RV Balbuena
“Build, Build, Build”. Nakakubli sa tatlong salitang iyan ang nakaambang panganib para sa Kaliwa Watershed Forest Reserve, bahagi ng kabundukan ng Sierra Madre, at sa 11,000 na katutubong Dumagat-Remontado na naninirahan at nangangalaga sa berdeng yaman sa paligid nito. Taong 2022, sa ilalim ng termino ni dating Pangulong Rodrigo Duterte, nang simulan ang pagpapatayo ng New Centennial Water Source-Kaliwa Dam Project (NCWS-KDP) o Kaliwa Dam. Ayon sa Metropolitan Waterworks and Sewerage System (MWSS), tatlumpung porsyento (30%) na ang natatapos sa proyekto ngayong taong 2024. Sa halagang P12.2 billion na inutang mula sa Export-Import Bank of China at bukod na pondo mula sa taunang pondo ng nasyonal na pamahalaan, inaasahan na matatapos ang pagpapatayo sa dam sa taong 2026 at magiging operasyonal sa taong 2027.
Ang Kaliwa Dam reservoir ay may taas na 63 metro o halos katumbas ng 21 na palapag na gusali, kung saan kayang mag-imbak ng 600 milyon na litro ng tubig bawat araw (MLD). Bukod pa rito ang 27.7 kilometrong Water Conveyance Tunnel, na may kapasidad na 2,400 MLD na sinasabi ng gobyerno na solusyon sa kakulangan sa tubig ng 17.46 milyon na tao sa kalakhang Maynila, Rizal, at Quezon. Hindi maiwawaglit ang katotohanan na sa pag-usad ng panahon at pagtaas ng bilang ng populasyon, gayundin ang pagtaas ng pisyolohikal na pangangailangan ng mga tao tulad ng tubig. Subalit kahit kailan ay hindi naging tama na ipagkibit-balikat ang libo-libong buhay na masasakripisyo para lamang sa kaginhawaan at kapakanan ng iilan.
Ang Sierra Madre ay ang pinakamalaki at natitirang maulang gubat o rainforest sa Pilipinas. Tahanan ito ng libo-libong saribuhay ng mga halaman tulad ng Dendrobium aclinia, Milletia longipes, at Swinglea glutinosa. Ang Kaliwa Watershed ay protektado bilang Forest Reserve ayon sa proklamasyon bilang 573 noong taong 1969 dahil sa 172 na sanghalamanan na makikita rito, kung saan 39 ang endemic at 17 ang nanganganib nang maubos. Ang libo-libong pinagsamang puno at halaman sa kabundukan ng Sierra Madre ay ang nagsisilbing tagasalo ng hagupit ng mga bagyong dumaraan sa Kamaynilaan taon-taon.
“Just by the sheer size of Kaliwa, it can be considered an environmentally critical project (ECP). Yet, they push for this project and disregard its glaring environmental impacts.” Ito ang nakapanlulumo na mga salita ni Lia Alonzo ng Center for Environmental Concern-Philippines (CEC), sa panayam niya sa Mongabay Media Organization. Ang Kaliwa Dam ay itatayo sa lugar na bahagi ng National and Park Wildlife Sanctuary (NPWS) sa ilalim ng proklamasyon ng Pangulo bilang 1636. Ang mga hayop tulad ng Philippine Crocodile, Dugong, Green Sea Turtle, at Philippine Eagle ay ilan sa libo-libong mga buhay na nanganganib dahil sa kawalang balanse sa kanilang tirahan.
Kaakibat ng pagpapatayo ng Kaliwa Dam ang pwersahang pagpapalayas sa mga katutubong tao o IPs (Indigenous Peoples) na ilang libong taon nang naninirahan at nag-aalaga sa kagubatan ng Putyokan, isang sagradong bundok na bahagi ng Sierra Madre. Ayon sa mga nakasaad sa saklaw ng Republic Act 8371 o The Indigenous Peoples Rights Act of 1997, malinaw na ang proyekto ng Kaliwa Dam ay isang marahas at tahasang paglabag sa karapatan ng mga katutubong Dumagat-Remontado. Nabahiran ng panlilinlang at pagsasamantala sa mga katutubo ang proyekto na puno ng pangakong progreso para sa mga Pilipino.
Ang Kaliwa Dam ay magiging banta para sa mga lugar sa paligid ng Sierra Madre tulad ng Tanay; Antipolo; Teresa, Rizal; Gen. Nakar at Infanta, Quezon Province. Ayon kay Kapitan, pinuno ng mga Dumagat-Remontado, hindi isina-publiko ng mga nasa likod ng proyekto ang tunay na sakop at nakabinbin na panganib sa pagpapatayo ng kabuuan ng Kaliwa Dam. Dagdag naman ni Joan Jaime ng Kalipunan ng mga Katutubong Mamamayan ng Pilipinas o Katribu, “The government wants this project to appear small because it becomes easier for the community to accept this. If we allow Kaliwa, what’s stopping the government from building the rest?”.
Taong 2019 nang pagbotohan ng anim na tribo ang desisyon sa pagpapatayo ng dam, kung saan lima ang tutol at isa ang sumang-ayon. Kahit na pansamantalang ipinatigil ang proseso sa pagkuha ng permiso noong mga panahong iyon, pinasimulan noon ni dating Pangulong Rodrigo Duterte ang pagpapatayo ng daan patungo sa dam at ang pagpapadala ng mga militar upang bantayan ang mga makinarya na gagamitin sa pagpapatayo ng Kaliwa Dam. “While we recognize that Metro Manila has legitimate concerns on water security, these should not be addressed at the expense of human rights, our environment, Philippine laws and sovereignty,” Ito ang sentimyento ng STOP Kaliwa Dam, ang samahan ng mga grupo tulad ng Haribon Foundation at mga nagsusulong ng karapatan ng mga katutubong Pilipino.
“We all know building that dam has environmental repercussions, but why does the government insist despite having alternatives?”, ayon ito sa panayam ng Mongabay Media Organization kay Pete Montellana, isang aktibistang pari na kasapi ng STOP Kaliwa Dam. Ang alternatibong solusyon sa kakulangan ng tubig sa Kamaynilaan ay ang malawakang paggamit ng rainwater harvesting at recycled wastewater na pinangunahan ng Singapore sa kanilang bansa noong taong 2010. Ang Green Machine ay gumagamit ng tubig mula sa mga sewer system at ulan, pagkatapos ay dadaan sa matinding proseso ng pagtanggal ng mga dumi at kontaminante. Ang nalinis na tubig ay maaaring gamitin muli para sa milyon-milyong kabahayan at komersyal na pangangailangan sa Metro Manila at mga karatig na probinsya.
Ang kaginhawaan at pangakong progreso ay para sa lahat ng Pilipino. Kahit pilit na tinatago ang masamang epekto ng pagpapatayo ng Kaliwa Dam, darating ang araw na lalabas ang tunay nitong pinsala. Ang bawat buhay na mawawala sa pagpapatayo ng Kaliwa Dam ay repleksyon ng sistemang lunod sa korapsyon na mayroon ang bansa. Ang mga makatao at makakalikasan na alternatibong solusyon ay isinasantabi upang magbigay-daan sa mga proyektong maaaring magbigay-yaman sa bulsa ng mga nasa itaas. Ang Kaliwa Dam ay banta hindi lamang sa katutubo, kalikasan, at karapatan, kundi pati na rin sa konsensya ng mga kumpanya at politiko na naghahari-harian sa bansa.