BNN (2024)

16/03/2024

ZAITHIAM PI LALRUOTMAWI TE FAPA MAFAKA CHANCHIN

Bangalore bialtu Pastor Rev. Rammawipuia Pachuau leh a nupui zaithiam lar Pi Lalruotmawi fa panga zinga a te ber, Vanlalfaka, k*m 7 chu CMC Vellore panpui niin, acute leukemia avangin admit a ni.

March 14, 2024 Ningani khan an fapa Mafaka hi Bangalore Baptist Hospital ah entir turin an kal a. Doctor ten a thisen an lo test aṭangin Acute Leukemia a ni tih an lo hre thei a. Doctor ten damdawiina admit a enkawl nghal an duh a. Rev. Rammawipuia te nupa hi haw leh phawtin, Vellore lam pan mai te hi a ṭha ang em tiin an ngaihtuah a. CMC Vellore lam pan mai chu ṭhain an hre ta a. Tichuan, a tuk Zirtawpni chuan an inentirna BBH ah hian doctor lam lehkha leh Vellore lam kal theihna tur te buaipuiin an kal leh a. A tuk March 16 Inrinni zing dar 6 ah Bangalore Cantonment Railway station aṭangin Vellore panin Pi Lalruotmawi chuan a fapa hi a kalpui ta a ni. A pasal hi Pastor a nih bakah, an fate hi exam nei lai an nih avangin an pa chu kal ve lovin inah an fate a lo awmpui a ni.

CMC Vellore an thlen hnu hian Chaplain Rev. Hminga Pachuau te nen ruahmanna siam a an lo tihfel sa angin Mafaka chu admit nghal a ni a. Doctor pahnihin an en nghal, a thisen pawh exam turin an la nghal a ni. March 18 Thawhṭanni hian a bone marrow pawh test tura ruahman a ni.

Mafaka hi October 10, 2023 khan Bowring Hospitalah a rilphir zai a ni a. An zai aṭanga ni reiloteah an chhuak a. A pum lam nawmlohna avangin January 8, 2024 khan BBH ah hian an inentir a. Hemi ṭum hian an lo admit a. Xray, scanning leh ultrasound te an ti a. January 16, 2024 khan damdawiin an chhuahsan.

A rilphir zaina hi doctor ten an enkawl a. Zai ngai ni a an hriat avangin February 9, 2024 zing lamah an zai a. Hemi hnu hi chuan a harh chhovin a ṭha chho viau a. School pawh a zawm leh thei thuai a ni. Mahse amah hi a chauh leh deuh ṭhin avangte, a diklo deuh ni a an hriat avang in BBH hi March 14 khan an pan leh ani.

Rawngbawltu an ni a, an buaiin hle ang, chutihlaiin an thla pawh a phang ve viau dawn a ni. Kan ṭawngṭaipui ṭheuh dawn nia.

14/03/2024

BANGALORE MIZO CHRISTIAN FELLOWSHIP
Annual general Body Meeting an hmang

Bangalore-a Mizote inkhawmna hmasa ber Bangalore Mizo Christian Fellowship chuan March 10, 2024 Pathianni khan an Biak inah Annual General Body Meeting an nei a. An k*m khat report te leh thurel tur awmte relin hun an hmang a. K*m 2024-2025 chhung atana an Office Bearers turte an thlang bawk. Chu'ng an OB thlan chhuahte chu hengte hi an ni -

Chairman : Upa Lawmna Kima
Vice Chairman : Upa Josiah L Ralte
Secretary : Upa Laldinfela Pachuau
Asst. Secretary : Tv. Lalhriatzuala Hlondo
Treasurer : Nl. Elsie Zomi
Finance Secretary : Nl. T. Lalhriatpuii

BMCF hi k*m 1975 a din a ni a. Denomination mal bik awm lo niin, kohhran zawmpui neilo, anmahnia inrelbawl an ni.

15/02/2024

Bangalore khawpuiin tui harsatna a tawng chho mek.
Karnataka state chhungah hian dam lian tak tak 14 emaw lai a awm a, hengah te hian an tui chim chin dan pangngai aiin 55% emaw vel laiin a hniam mek a. Tunah hian ruahtui rawn tlak leh hun June 2024 hmaa hman tur awm zat chu 500 tmcft vel chauh a ni mek a ni.
A bikin Bangalore khawpui hi a ṭhang hle a. Lei chhung verha tui lakchhuahna hi an zawng zel bawk nen, airport tih zauhna avang te, kawng tih zauhna avangte, metro line siam avangtein thing an kit nasa em em bawk a, hengte avang hian lei chhunga tui awm hi a tlem ta hle a ni.

Tui harsatna avang hian state leh state, ram leh ram hi kan la intibuaiin kan la indo hial mai thei a ni.

28/09/2023

KARNATAKA BANDH

Tunkar Thawhlehni khan Bangalore khawpui chhungah bandh huaihawt a ni a. Cauvery lui tui, Karnataka state in Tamil Nadu an pek duh loh vanga neih a ni. Hemi avang tho hian naktuk September 29 Zirtawpni hian Bangalore chauh nilovin, Karnataka state pum ah bandh huaihawt leh a ni dawn.

He bandh hi zing dar 6 aṭanga tlai dar 6 thleng a ni dawn a. Bandh a ni dawn na a, hengte hi an kal pangngaiin an kal ang -
BANK
HOSPITAL & PHARMACY
METRO
SAWRKAR OFFICE

Heng bak sawi lan loh te hi chu function lo tura ngaih an ni.

27/09/2023

BANGALORE BANDH

September 26, 2023 Nimin Thawhlehni khan Bangalore khawpui chhungah bandh huaihawt a ni a. Buaina awm lova neih niin a hriat.

Hun engemaw chen ata tawh Tamil Nadu leh Karnataka state te hian Kaveri (Cauvery) lui chungchangah hian inrem hleih theih lohna an nei a. Central sawrkar lama Ministry of Jal Shakti hnuaiah Cauvery Water Management Authority (CWMA) an awm a, chu chuan Tamil Nadu leh Karnataka state te hi thu a rel sak ṭhin a ni. Tichuan thla hmasa August thla khan CWMA hian Karnataka state chu Tamil Nadu tan hian ni 15 chhung chu tui 5000 cusecs chhuahsak turin a hrilh a. Hei hi Karnataka state sawrkar chuan a tihsak a. CWMA hian Tamil Nadu state in tui 12000 cusecs chhuahsak an phut chu hnawlsakin 5000 cusecs hi chhuahsak turin Karnataka state an hriattir a ni.

Bandh neih ni September 26, 2023 hian CWMA chuan ngaihtuahin Karnataka state chuan October 15, 2023 thleng chu tui 3000 cusecs pe turin thu a ti tlu a ni.

source: DH

25/09/2023

BENGALURU BANDH

Naktuk Thawhlehni Sept.26 hian Bangalore chhungah 'complete bandh' neih a ni dawn a. Sumdawnna hmun te, school te, college te leh veivahna chi te chu khar vek tura rin a ni.

He bandh hi loneitu pawl hrang hrang leh Pro Kannada pawl hrang hrangte bakah Cauvery Jala Samrakshana Samiti leh Bengaluru Resident Welfare Association organization ten Karnataka sawrkarin Tamil Nadu state tana cauvery tui chu a khuahna aṭanga 5000 cusecs an pek duhlohna entirna atana an huaihawt a ni.

Bandh neih ni Thawhlehni hian damdawiin, sawrkar office leh metro te bakah damdawi zawrhna dawr te chu in hawng tura ngaih a ni a. Tin, school pawh exam neih lai a nih avangin hawn a ni anga, school union te chuan an bana puan dum hrengin an thlawp tih an lantir ang.

Cauvery lui chungchanga buaina hi a in ṭanna a rei tawh a. He lui hi Karnataka aṭanga Tamil Nadu a luang lut a ni. Karnataka state chhungah erawh khuah a ni thung. K*m 1990 a Cauvery Water Disputes Tribunal siam a nih khan Karnataka hian Tamil Nadu tan thla tin tui 205 million cubic feet a pe chhuak tur a ni tih a ni.

24/07/2023

MANIPUR-A REMNA A LO THLEN NAN ṬAWNGṬAIRUAL HUAIHAWT A NI

Nimin Pathianni July 23, 2023 zan dar 7:00 khan Bangalore Mizo Association chuan Ziegenbalg Chapel, UTC ah Manipur state a remna a lo thlen theih nan ṭawngṭai rual neiin hun a hmang a. Hemi hunah hian Mizo unau dangte pawh sawm an ni a, lo tel an awm nual.

He kalkhawm hi BMA President Pu Laldingliana Tlai Vantawl in a kaihruai a. Bangalore bialtu Pastor Rev. Rammawipuia Pachuau in hunserh a hmang a. Kuki lam aṭangin thusawi ngaihthlak a ni. He hun hmanga tel Mizo an ṭhahnem a, Arunachal aṭang leh he huna telve duh vai tel an awm bawk a ni.

Hun tluang taka hman niin, zan dar 9:30pm velah ban a ni.

19/07/2023

PHAI RAMA COLLEGE KAL TE HRIATTUR
(Nu leh pa te tan pawha hriat ngei ngei chi)
------------------------------------------------------------
Ruihtheih thil tih leh zawrh hi a hluar hle zel a. College zirlaite an zirna hmuna ṭhian neih leh kawm kawngah fimkhur a ṭul hle.

College leh University a zirlaite zingah damdawi ruihhlo zuar ṭhin ten an sumdawnna a zauh zel nan ṭhian an siam a, chung zirlai zinga an ṭhian siamte chu a thlawnin an ruihhlo zawrh te chu an pe hmasa ṭhin. Reiloteah an lo addict a, chuta ṭang chuan sumdawnna atan an hmang ta ṭhin a ni.

India ram khawpui hrang hranga college leh university ah hetianga inbumna leh thil ṭhalo tak tawn theihna hi a hluar hle a. College leh university a zirlaite fimkhur a ṭha hle. A bikin hmundang aṭanga kal te an target an ni ṭhin.

College leh university a zirlaiten ṭhian siam kawngah leh nun hman kawngah fimkhur hle zel tur a ni a. Awmna khawpuia Mizo inkhawmna leh Mizo society ah te, zirna tibuai lova in hman tum hram hram tur a ni bawk.

06/07/2023

STATE PAWNA CHHUAH
--------------------------
Mizoram chhunga hnathawhna leh zirna te hi, kawng tam takin an ṭha ve tawk viau a tih theih. Hna phei chu mi taima leh ngaihtuah thiam tan phei chuan, hna ṭha tak tak thawh tur a awm niin, state pawna thawk ṭhin Mizorama haw ta ten an sawi bawk.

State pawna lehkha zir tur leh hna thawk tura ṭhalai chhuah tam hi kawng tam takin a ṭha a, a pawimawh bawk. Nu leh pa te tan erawh fate ngaihtuahna nen, rilru hahna tur tam tak chu a awm phah theih awm e. A dik chiah a, mi ṭhenkhat chuan zu leh ruihtheih thil an tih nasat phah a, chumi avang chuan nunna hial an chan a, tawhsual tawh avang te leh ṭhian sual kawm avangte in beisei loh leh rinphak loh nun an tawn phah fo bawk e. Heng hi ven theih leh ven theih loh erawh a awm thei ang.

Mizote hian hnamdang leh midangte khawsak phung hi social media leh TV vel chauh aṭanga kan hmuh hi chu a fel tawk lo. Ram inrelbawlna leh ramdanga zirlai leh hna thawkte hna thawh dan leh zir dan te, eizawn dan te kan hmuh a kan hriat tam te, an nundan kan hmuh te hi a va pawimawh em!

Khaw hawi a zim lutuk chuan rilru a te duh a, ram dang hmuh chin a tlem chuan kan ngaihtuahna a zau thei lo.

23/05/2023

MOBILE PHONE TIHBO CHHUI THEIHNA
--------------------------------------------
Sawrkar chuan portal a siam hmangin mobile phone tihbo emaw in ruksak emaw te chu a chhui chhuah theih niin businesstoday chuan a ziak.
Mobile phone tihbo emaw in ruksak emaw hi a uihawm duh hle mai a. Thil pawimawh tak tak kan dah tawh ṭhin avangin. I mobile phone chu IMEI te, a siamtu te, i leina bill te i neih ṭhat chuan zawn chhuah mai theih a ni dawn ta.
Hetianga chhui i mamawh chuan CEIR portal hawng la, chutah chuan fill up tur a awm a fill up tawh mai tur a ni. I phone chu he portal hmang hian a bo tirhin i block thei a, SIM thlak daih pawh nise a chhui theih dawn tho a. I block tawh pawh a unblock leh theih dawn a ni.
He CEIR portal hi mobile phone IMEI hmanga chhui chhuah theihna tura duan a ni.
https://www.ceir.gov.in
(Ka la ti chhin bik lova, phone bo i neih chuan han ti chhin teh le)

(Source: businesstoday)

04/05/2023

KARNATAKA ASSEMBLY ELECTION 2023
-----------------------------------------------------------------
May 10 Nilaini hian Karnataka State Assembly inthlan vote thlak a ni anga. May 13 Inrinni aṭangin vote chhiar ṭan a ni ang.

Karnataka state ah hian assembly constituency 224 a awm a. Heng zinga seat 36 chu SC tan hauh a ni a, seat 15 chu ST tan hauh a ni thung.

Karnataka state chhungah hian party hrang engemaw zat a awm a. A lian deuh deuh te chu BJP, INC, JD(S) te an ni a. Heng bakah hian party dang - Aam Aadmi Party, Bahujan Samaj Party, Nationalist Congress Party, Janata Dal(U), Communist Party of India, Communist Party of India(M), All India Majlij-e-Ittehadul Muslimeen, National People's Party tihte an awm ve bawk.

KARNATAKA STATE CHHUNGA ISSUE AWM ṬHENKHATTE

RAMRI: Karnataka state leh Maharastra state inrina lai thilah hian tun hma aṭang tawhin buaina hi a awm ve reng a. Karnataka state chhungah hian maharastrian awmna deuh khua te pawh a awm nual a, chutiang bawkin lehlamah pawh. Hetiang anih avang hian state awmna tur zawk ngaihtuaha buaina neuh neuh hi a awm ve a. Henglai ramria awm khua ṭhenkhat hi sawikhawm emaw siam rem emaw duhna a lian ta hle a ni.

EIRUKNA: State chhungah hian zirbingna hna leh hna hrang hrang avangin sawrkar hnathawkteah te pawh eirukna a tam em em mai a. Eirukna kaihhnawiha nunna chan phah hial te pawh an awm a ni. Sawrkar hnuaiah hetiang eirukna leh eirukna avanga thihna hi a hluar ni a ngaih a ni.

HNAM, SAKHUA LEH CHI INTHLIARNA: Karnataka sawrkar hnuaiah hian hindutva hmalakna a zual niin a lang a. Sakhaw dang betute nun a chep hle ni a hriat a ni.

Issue awmte hi sawisen a ni lovang a. Party hotute laka report thehluh te, hek leh chona tam tak te pawh a awm fo mai.

Engpawhnise, inthlanah reng reng hian mipuiten mawhphurhna kan nei a, chu chu - vote thlak a ni. India khua leh tui ni a, vote nei thei chin chuan ram tana ṭha tur mi ṭha leh dik, rintlak mi huaisen thlang turin vote thlak ngei hi kan tihtur a ni.

14/01/2023

BANGALORE AIRPORT AH TERMINAL THAR
----------------------------------------------------------------------
Bangalore-a Kempegowda International Airport (KIA) a Terminal 2 an siam chu naktuk 15th January aṭangin hman ṭan tura ruahman a ni.

He terminal hi nik*m November ni 11 khan PM Narendra Modi chuan a hawng tawh a. K*m khatah mihring maktaduai 25 lai he terminal hian a enkawl zo tura ngaih a ni.

He terminal hian hengte hi a nei dawn - automated biometric gates, self-baggage drop service, full body scanner te leh tunlaia zin mite tana thil ṭul leh awlsamna dah vek a ni. Garden city tih takah thlai chi hrang nuai 6 aia tam chin/khawi a ni bawk.

Terminal 1 leh 2 te inkalpawhna tur Terminal Boulevard siam a ni a. Zin mite tan a awlsam phah hle dawn a ni.

23/12/2022

TRAFFIC RULE THAR

Helmet khum reng chung si, BIS pawm thlap khum reng chung bawk siin pawisa tam tak a la chawi theih tlat mai.

Motor Vehicle Act 194D MVA chuan motorcycle, scooter khalhtu ten helmet ṭawn behna ṭawn bet lo (phelh) chunga an khalh chuan Rs.1000 chawi theih a ni a ti a. Tin, BIS pawm loh helmet khum chuan Rs.1000 a chawi thei bawk tih tarlan a ni.

(BusinessLeague)

04/12/2022

𝐔𝐏𝐀 𝐍𝐄𝐌𝐍𝐆𝐇𝐄𝐇 𝐈𝐍𝐊𝐇𝐀𝐖𝐌 𝐓𝐋𝐔𝐀𝐍𝐆 𝐓𝐀𝐊𝐀 𝐙𝐀𝐖𝐇 𝐀 𝐍𝐈
𝑍𝑜𝑟𝑎𝑚𝑝𝑎𝑤𝑛 𝑀𝑖𝑧𝑜 𝐼𝑛𝑘ℎ𝑎̂𝑤𝑚 (𝑛𝑜𝑛-𝑑𝑒𝑛𝑜𝑚𝑖𝑛𝑎𝑡𝑖𝑜𝑛𝑎𝑙 𝐶ℎ𝑢𝑟𝑐ℎ) 𝑎 𝑣𝑎𝑤𝑖 𝑘ℎ𝑎𝑡𝑛𝑎 𝑎𝑡𝑎𝑛 𝑈𝑝𝑎 𝑝𝑎𝑙𝑖 𝑛𝑒𝑚𝑛𝑔ℎ𝑒ℎ 𝑎𝑛 𝑛𝑖.

Vawiin, 4th Dec 2022 khan Bangalore Mizo Christian Fellowship (BMCF) chuan Kohhran Upa atan mi pali a nemnghet.

BMCF hi k*m 1975 ah Bangalore khawpui a Mizo awmte tana Kohhran din a ni a, k*m 2020 a BMCF Danbu in ruahmanna a lo siam tawh Upa neih chu ruahmanna hrang hrang siam a nih hnuah vawiin khan Upa nemnghehna tluang taka neih zawh a ni a, BMCF hian Upa pali an nei ta a ni.

14th August 2022 khan UPA inthlanna neih a ni a, 27th Nov 2022 khan Upa exam buatsaih a nih leh hnuah heng mi pali te hi Rev. Khiangnunfima, Chaplain in Upa atan a nemnghet (ordained) tan a ni.
1. Pu B. Kapthuama (IAS Retd)
2. Pu Josiah L. Ralte
3. Pu Laldinfela Pachuau
4. Pu Lawmna Kima

𝐃𝐞𝐧𝐨𝐦𝐢𝐧𝐚𝐭𝐢𝐨𝐧 𝐡𝐫𝐚𝐧𝐠 𝐡𝐫𝐚𝐧𝐠-𝐭𝐞 𝐭𝐚𝐧𝐚 𝐔𝐩𝐚 𝐧𝐞𝐦𝐧𝐠𝐡𝐞𝐡𝐧𝐚
Upa nemngheh inkhawmah hian mi 250 vel an tel a, Rev. Khiangnumfima, BMCF Chaplain (Tripura Baptist Christian Union) chu Presiding Minister a ni a, Rev. C. Vanlalhruaia (BCM), Rev. PC Lalnunzira (BCM), Rev. Zadingluaia Chinzah (LIKBK) leh Rev. VBH Sathei (ECM) ten Presiding Minister hi an pui bawk.

Tin, Bangalore a Zohnahthlak hnam hrang hrang– Kuki Worship Service, Zomi Christian Fellowship leh Hmar Christian Fellowship atangin Pastor leh memberten an telpui bawk.

Mizo huangchhungah chuan non-denominational church UPA ordained-na hmasa ber niin a lang a, Kohhran hrang hrang te lungrual taka thawhhona atana rahbi pawimawh tak a nih ngei kan beisei.

(Source: Facebook)

27/11/2022

BANGALORE KHAWPUI CHHUNGA IN LUAH TUR ZAWN

Hnathawk leh zirna avanga khawpuia lo lut an tam tial tial a. Veng a zirin inluah man pawh a to ta hle. Chumai nilovin in neituten an duh khirh ve viau ta bawk.

Bangalore khawpuia inluah tur i zawnin in neitute hnenah i chanchin chipchiar tak i sawi pawh a ngai nual ang. Khawi aṭanga zirchhuak nge i nih tih te, eng sakhua nge i nih, sa i ei em, nupui pasal i nei em,... IIT emaw IIM emaw a zirchhuak te chu an duh deuh riau bik.

Bangalore-a in i luah dawnin hengte hi hrechiangin tih tum la a ṭha hle.

Ei leh in thilah duh bik an nei em? Mizo tan chawhmeh rim nei kan uar a, in neitute tan rimchhia a ni thei.

Ṭhian in leng a neih theih em? In lenpawh nuai nuai ṭhin kan nih avangin hei hi hriat chian hmasak a ṭha fo.

Bill ahrangin a awm em? Tui bill leh electric bill in ṭawm hi buaina awm duhna pakhat a ni fo. Bill te chu an fixe tawp a nih loha in share a nih chuan buaina a tam duh.

K*mtin inluah man hi % engemaw zatin an ti pung ṭhin. A tlem lam zelin tihpun tir tur a ni (eg. 5%)

Inluah dawna pawimawh ber chu in neitute nena Stamp paper hmanga agreement siam a ni a (Hei hi an ti deuh vek bawk). Mahse hei hi in neitute duhdana ziah mai a ni thei a. Hming ziah hnan hmain uluk leh chiang taka chhiar chhuah a, hriatthiamloh lai awm te zawhfiah ngei ngei tur a ni. Advance deposit pek ngai chin pawh mumal leh felfai taka ruahman pui hmasak a ṭha hle. Insawn dawn huna in pek theih hun te pawh sawilan a ṭha lehzual.

17/11/2022

APPLE FACTORY
Iphone siamna hmun lian tak chu Bangalore khawpui bula Hosur hmunah din a ni dawn. He iphone siamna hmunpuiah hian hnathawktu tur pawh mi 60,000 vel rawih an ni dawn a ni.

BNN