彩報 Win.on.cc

25/12/2024

聖誕節係普天同慶日子，即使英超球隊喺佳節都要「開快車」，唔少球會仍然會搞聖誕P畀職球員同家屬玩下。據《The Athletic》報道，過去1年進行緊縮政策嘅曼聯，為慳25萬鎊竟然取消今年聖誕派對，引嚟球隊上下不滿，隊長般奴費南迪斯曾提出自己出錢搞，仍被曼聯拒絕。

曼聯新老闆拉特克利夫上年平安夜入股，之後推行各項緊縮措施，搞到球會上下怨聲載道，原本曼聯每年都會舉行大型聖誕派對，畀所有球員、職員帶埋家人一齊歡聚，但行政總裁貝拉達早前喺大會入面宣布今年取消派對，據報引嚟極大反感，有員工即場「嘆氣」，報道指取消派對可為曼聯慳番25萬鎊。

每年一度嘅聖誕派對，被視為曼聯上下增強團結嘅節目之一，《The Athletic》透露隊長般奴費南迪斯曾「力挽狂瀾」，提出自掏腰包繼續搞聖誕派對，可惜曼聯仍然拒絕，理由係球會過去一年進行大裁員後，唔適合再花大錢高調狂歡同慶祝。

拉特克利夫上任後嘅縮骨政策引起唔少爭議，除上任後即進行250人大裁員外，又將傳奇費格遜嘅宣傳大使職務取消、終止員工在家工作政策、就連免費波飛、球場接送等福利都被削減，搞到曼聯內部士氣麻麻。

#英超 #曼聯 #般奴費南迪斯 #彩報

24/12/2024

葡萄牙勁旅士砵亭自從主帥魯賓艾摩廉轉投曼聯之後，成績急插水，接手領軍嘅祖奧彭利拿執教8場比賽，法定時間僅2勝，根據「轉會權威」記者羅曼諾(Fabrizio Romano)爆料，呢位40歲葡萄牙少帥即將被炒。

祖奧彭利拿原本係士砵亭B隊教練，魯賓艾摩廉上月成「魔」後，佢獲「升職」成為一隊主帥，首仗領軍係威係勢，喺葡萄牙盃大勝FC阿馬蘭迪6比0，但之後無以為繼，一度連輸4場，包括歐聯2連敗。

士砵亭上場葡超打和0比0基維辛迪，被賓菲加反超前搶走榜首之位，由原本爭標一片光明，到現時陷入劣勢，所以會方準備盡快換帥，希望挽回頹勢。

根據葡萄牙傳媒報道，士砵亭已經有新帥人選，就係甘馬雷斯教練雷波格斯，呢位43歲葡萄牙籍教頭今季加盟甘馬雷斯，率領球隊踢15場聯賽取得6勝5和4負排第6位。

#葡超 #士砵亭 #祖奧彭利拿

24/12/2024

曼聯近年成績差之外，主場奧脫福球場亦淪陷，唔只漏水，並且「鼠」輩橫行，根據英國《每日郵報》爆料，奧脫福出現鼠患，當局喺球場小食亭等地方發現老鼠屎，因而被「降級」，以5星為滿分嘅衞生評級之中，奧脫福只有2星，可見衞生情況惡劣，實在趕客。

據悉有關方面喺一次例行檢查之中，發現地面一層企業包廂及出售食物嘅小食亭，都有老鼠活動嘅證據，包括老鼠屎，結果衞生評級由4星降至2星。當地市政部門已經要求曼聯對問題作出整頓，有分析指奧脫福球場鄰近河邊及鐵路，容易出現鼠患問題。

曼聯管理層已經採取行動，聘請滅蟲公司幫手，每星期4至5次去奧脫福球場滅鼠，希望盡快令評級提升至最高5星，因為大部分英超球場衞生評級都達到5星，奧脫福僅有2星實在羞家。

其實奧脫福球場長年都有衞生問題，南北看台及辦公室曾於2015年出現嚴重鼠患，早前球場內舉行企業私人活動，竟然向賓客提供未煮熟雞肉，結果衞生評級被降至只有1星，直至11月經過檢查後，提升至4星，但現時因為發現老鼠屎，又被降至2星。

事實上，曼聯主場及訓練設施殘舊，一直為人詬病，今年5月對阿仙奴比賽期間，奧脫福球場東看台上蓋突然漏水，變成「水舞間」。此外，C曾經批評卡寧頓訓練基地嘅泳池，同佢2009年離隊時完全一樣，唔只殘舊，甚至有瓷磚損壞都冇修補。

曼聯計劃斥資20億鎊(約195億港元)興建可以容納10萬人嘅新球場，目標2030年落成，球迷未來6年去奧脫福睇波，真係唔好亂食嘢。

#英超 #曼聯 #鼠輩 #彩報

24/12/2024

拉舒福特「造反案」　艾摩廉稱有「幕後黑手」

曼聯前鋒拉舒福特早前接受訪問，公開表示準備接受「新挑戰」，暗示想離隊，令佢同領隊魯賓艾摩廉嘅關係跌至谷底。不過，呢位葡萄牙名帥似乎想為事件降溫，最新表示可能有人教唆「福仔」轉會，直指其經理人團隊係「幕後黑手」。

拉舒福特已連續第3場被踢出曼聯大軍名單，令人懷疑佢將於下月轉會市場重開後離隊，魯賓艾摩廉認為「福仔」未必真係想走人：「佢喺訪問中話想接受新挑戰，但你要明白，好似拉舒福特呢種級數嘅球星，經常被一大班人圍繞住，好多時球員作出選擇或者想法，並非來自佢本人，我一定會幫助拉舒福特及隊內任何球員解決困難，但佢哋都要做應該做嘅事，我知唔只拉舒福特1位球員接受類似訪問。我作為領隊，只會睇球員操練及比賽表現，其他問題交由球會處理。」

艾摩廉仲話已經忘記拉舒福特喺訪問中所講嘅內容，似乎想畀機會佢重新振作。據悉曼聯董事局全力支持艾摩廉「雪藏」拉舒福特嘅決定，佢幾時可以復出，由艾摩廉一人話事。

#英超 #曼聯 #拉舒福特 #魯賓艾摩廉 #彩報

24/12/2024

阿仙奴折雙翼　沙卡重傷長抖兩個月

英超豪門阿仙奴爭標之路，遭受重大打擊，鋒線主將布卡約沙卡上仗傷出，經過詳細檢查後，證實傷勢嚴重。根據領隊阿迪達透露，呢位23歲英格蘭國腳將缺陣「好多星期」，英國傳媒估計沙卡起碼要抖2個月，加上副選翼鋒史達寧都受傷，下月轉會市場重開後，阿仙奴可能需要增兵。

布卡約沙卡上場英超對水晶宮，踢到24分鐘，突然按住右腳大腿坐地不起，疑似拉傷肌肉，需要拎住枴杖步離球場，已知情況不妙。阿迪達最新表示，布卡約沙卡將休戰一段長時間：「沙卡好不幸將缺陣好多星期，實在係一次重大打擊，我哋需要更加努力去克服今次挑戰。」

屋漏偏逢連夜雨，兵工廠今季向車路士借用嘅史達寧，早前操練時整傷膝部，將會抖數星期，隊內現時只有李安度杜沙特1位右翼可用。

由於阿仙奴鋒線人腳緊張，主帥阿迪達有意下月簽入前鋒，曼聯射手拉舒福特早前透露有意離隊後，盛傳其中一個去處，就係轉投阿仙奴，如今兵工廠急需要簽入進攻球員，有可能促成「福仔」入「廠」。

#英超 #阿仙奴 #布卡約沙卡 #史達寧 #彩報

23/12/2024

排英超包尾嘅修咸頓，周日(22日)作客0比0守和富咸，成功終止4連敗走勢。傷愈復出嘅門將蘭斯達爾居功至偉，而佢今場所用嘅特製「4指手套」，更成為球迷熱話。

蘭斯達爾今夏由阿仙奴轉投修咸頓，但上個月因為手指骨折，缺陣咗對上5場聯賽，而修咸頓喺呢5場波只得1分，合共失咗15球，連領隊羅素馬田都被炒魷。

今場對富咸，蘭斯達爾就提前復出，而佢左手嘅手套就經過特別設計，中指同無名指「二合為一」，變成一隻只得4隻手指位嘅手套。

蘭斯達爾表現未受影響，全場作出5次撲救，包括救出伊禾比嘅妙射，為修咸頓保住清白之身，搶到寶貴1分。

#英超 #修咸頓 #蘭斯達爾　 #彩報

23/12/2024

利物浦喺英超勢如破竹，埃及前鋒穆罕默德沙拿更有王者氣派，佢喺6比3贏熱刺一仗交出2個入波+2次助攻，今季累積15個入波同11次助攻「雙雙」，喺兩大榜都排名第1位。
沙拿今場狂創紀錄，15個入球拋甩艾寧夏蘭特(13球)獨佔射手榜榜首，11次助攻亦超越布卡約沙卡(10球)成為今季「助攻王」，更係英超史上第1個喺聖誕節前就實現「雙雙」數據嘅球員。

沙拿同利物浦嘅合約去到季尾完結，近期有傳雙方已接近達成續約協議，不過沙拿喺賽後被問題續約消息，佢就簡單回應：「冇、冇消息。」沙拿續約問題成為利物浦球迷心頭大石。

#英超 #利物浦 #沙拿 #彩報

23/12/2024

周一(23日)凌晨西甲，皇家馬德里主場4比2大勝西維爾，壓倒巴塞隆拿升上第2位，只落後榜首馬德里體育會1分。皇馬前鋒基利安麥巴比今場轟入世界波，連續4場比賽取得入球，佢賽後亦霸氣宣稱：「適應期已完結」，寓意自己將會大爆發！

拎完洲際盃冠軍嘅皇馬，今場表現相當勇猛，麥巴比10分鐘喺鵝眉月頂轟入世界波領先，10分鐘後輪到費達歷高華維迪離門30碼抽入，洛迪高高斯34分鐘射成3比0，西維爾隨即由艾錫羅美路追番1球。53分鐘麥巴比助攻巴謙戴亞斯建功，西維爾完場前追多球於事無補，皇馬輕鬆贏4比2。

麥巴比自從月初對畢爾包12碼宴客後，近4次上陣都有入波，呢位法國前鋒賽後表示：「我知道我可以有更多貢獻，近幾場我表現好咗，對畢包爾場波係谷底，嗰刻我知道要傾盡全力同展現更多個性，我嘅加盟令球隊出現好多轉變，但正如教練所講，我嘅適應期已經完結！」

#西甲 #安巴比 #皇家馬德里 #彩報

23/12/2024

利物浦6比3狂勝熱刺　榮登英超「聖誕冠軍」

周一(23日)凌晨英超上演「入球騷」，利物浦憑穆罕默德沙拿2射2傳獨造4球，作客以6比3狂勝熱刺，依家領先次席嘅車路士4分兼踢少1場，提前鎖定英超「聖誕冠軍」寶座。今季係利物浦第21次喺英格蘭頂級聯賽以「1哥」身份過聖誕，之前有11次能夠順利奪冠(55%)。

利物浦作客同熱刺鬥攻，23分鐘路易斯迪亞斯飛頂為客隊領先，36分鐘阿歷斯麥亞里士打近門頭槌頂成2比0，5分鐘後占士麥迪臣為熱刺追番1粒，隨後就係沙拿Show Time。呢位埃及前鋒先助攻蘇保斯拉爾入波，換邊後再連入2球，熱刺中後段靠古路施夫斯基同蘇蘭基追多2粒，但完場前沙拿再有靚助攻畀路易斯迪亞斯，為利物浦取得6比3大捷。

利物浦近12場聯賽拎到9勝3和佳績，拋離車路士4分兼踢少1場，繼20/21球季後再次成為英超「聖誕冠軍」。雖然做「聖誕冠軍」唔代表可以捧盃，利物浦過去20次坐「1哥」過聖誕，只有55%奪冠成功率，喺英超年代過去6次做「聖誕冠軍」，更只有19/20球季成功奪冠。

利物浦領隊施洛表示：「做聖誕冠軍當然有意義，你永遠想喺我哋依家個位置(第1名)多於其他位置，最重要係繼續前進，每3、4日踢一場波唔係容易嘅事，一啲細小情況都足以影響結果，就好似我冇預期車路士今輪會失分(0比0和愛華頓)。」

#英超 #熱刺 #利物浦 #彩報

22/12/2024

上場英超明明好好地可以反勝曼城，但曼聯可以即刻輸返兩場畀你睇⋯⋯論今晚啲射門質素，曼聯真係衰到貼地！！！

#英超 #曼聯 #般尼茅夫 #彩報

22/12/2024

《女神Talk》英超：熱刺 vs 利物浦

Merry Christmas！聖誕快樂！英超聖誕快車第1 round嘅比賽，將會上演熱刺對利物浦大戰！人氣KOL、兼超級球迷 Nicole 同埋 Rifu 就有好多有用數據提供畀大家！想知佢有咩好介紹？睇吓段片就知啦👉🏻 https://youtu.be/FOKlso73-fM

【英超】熱刺 vs 利物浦
【FB5519】2024/12/23 - 00:30

Nicole IG
Rifu IG .w.rifu

#英超 #熱刺 #利物浦 .w.rifu #彩報

Merry Christmas！聖誕快樂！英超聖誕快車第1 round嘅比賽，將會上演熱刺對利物浦大戰！人氣KOL、兼超級球迷 Nicole 同埋 Rifu 就有好多有用數據提供畀大家！想知佢有咩好介紹？睇吓段片就知啦👉🏻 【英超】熱刺 vs 利物浦【FB5519.....

22/12/2024

「耶穌」再鬧水晶宮　阿仙奴大勝成倫敦之王

「耶穌」復活打救阿仙奴！周日(22日)凌晨英超「倫敦打吡」，阿仙奴繼周中英聯盃3比2淘汰水晶宮後，今場作客水晶宮再贏5比1。綽號「耶穌」嘅加比爾捷西斯又入2球，3日內5度攻陷水晶宮大門，為阿仙奴保住爭標希望。阿仙奴今年10場打吡戰不敗，加冕「倫敦之王」！

捷西斯周中對水晶宮連中三元，今場得以繼續擔正，腳風極順嘅佢6分鐘就近門抽入領先，雖然水晶宮5分鐘後就由伊斯美拿沙亞妙射追平，不過「耶穌」3分鐘後又發功，喺角球攻勢接應湯馬士柏迪回傳勁抽網頂，連續2場轟入水晶宮第5球，狀態勁弗。

阿仙奴38分鐘入波都有捷西斯功勞，佢頭槌頂中柱後由夏維斯「執雞」；下半場阿仙奴再有加比爾馬天尼利同迪格蘭賴斯入波，作客大勝5比1完場。Opta數據顯示，阿仙奴成為英格蘭頂級聯賽史上，首支單年度6次作客入5球或以上球隊，將近期對火力不足嘅疑慮一掃而空。

另外，阿仙奴喺2024年英超進行過10場「倫敦打吡」，一共拎到8勝2和不敗佳績，係自2005年嘅車路士後，首支喺全年「倫敦打吡」不敗球隊。領隊阿迪達賽後表示：「創造歷史係偉大成就，但我哋要將紀錄轉化為冠軍，3日內對同一對手兩次唔容易，但我哋表現好穩定，表現令人欣慰。」

#英超 #水晶宮 #阿仙奴 #加比爾捷西斯 #彩報

21/12/2024

英超曼城又輸一場　作客不敵維拉

英超周六（21日）早場，阿士東維拉主場迎戰曼城。「藍月亮」頹勢持續，早段已經失守，最終以1比2落敗全失3分，近8場聯賽輸6場，同維拉互換位置，維拉升上第5，曼城跌落第6。

曼城後防繼續失魂，開賽半分鐘就輸單刀，只係祖漢杜蘭射得衰，之後角球攻勢又有柏奧托利斯頭槌攻門，好在曼城門將史堤芬奧迪加白界線前救出先至保住不失。

不過踢到16分鐘曼城終於失守，今次祖漢杜蘭單刀冇甩拖，近門輕鬆射入成1比0。曼城輸緊波都冇乜攻勢，倒戈嘅基亞利殊一掂波就被噓爆，只有菲爾科頓一腳射門，但過唔到維拉門將達米安馬天尼斯十指關，半場維拉領先1球。

易邊後曼城仍然冇起色，戰至65分鐘，摩根羅渣士接應約翰麥甘尼傳送，近門射入成2比0奠定勝局。曼城末段終於憑菲爾科頓破蛋，輸1比2完場。

#英超 #阿士東維拉 #曼城 #彩報

21/12/2024

拜仁慕尼黑門將紐亞將於明夏約滿，根據球會總監艾伯尼最新透露，已經接近同呢位38歲德國國腳續約至2026年6月，意味佢起碼會繼續披甲至40歲。

雖然紐亞已年屆退役年紀，加上被批評近年水準下滑，但拜仁管理層仍然對佢投下信心一票，艾伯尼話：「我哋談判進展良好，只剩下些少細節未傾好，雙方都好期待達成協議，但仲未知幾時會正式簽新合約。」

紐亞2011年由史浩克04加盟拜仁慕尼黑，一直效力至今，上陣多達540場，並擔任隊長。紐亞曾於2022年12月受重傷，導致缺陣近1年，當時一度傳出拜仁計劃收購1位具級數門將接替佢，但並未成事，紐亞復出後，繼續擔任正選，而且未有退休打算。

#德甲 #拜仁慕尼黑 #紐亞 #彩報

21/12/2024

曼城今季成績急速下滑，普遍輿論認為中場洛迪卡斯簡迪受傷長抖係主因，但英國傳媒近期發現，2位主力菲爾科頓、基爾獲加表現嚴重走樣，先至係「藍月亮」隕落致命傷。
菲爾科頓上季英超上陣35場合共創造27球，包括射入19球及8次助攻，換言之曼城上季聯賽96個入波有近28%同佢有關。不過，呢位24歲英格蘭國腳今季英超11次披甲都食白果，根據《whoscore》統計，今季英超射門超過20次嘅球員之中，菲爾科頓只有12.5%射中目標，屬於各人之中最低，難怪一直未開齋，令曼城攻力受削。

至於34歲防線老將基爾獲加狀態亦大不如前，佢擔任正選嘅比賽，曼城只有20%勝出率，反觀佢做後備，勝出率達69%，被指係球隊最大負累。加上基爾獲加不時爆出私生活負面消息，令人質疑佢冇資格擔任隊長。
由於菲爾科頓、基爾獲加都係領隊哥迪奧拿嘅愛將，相信唔會棄用兩人，但若然繼續重用呢兩位英格蘭國腳，恐怕「藍月亮」難以翻身。

#曼城 #翟頓 #獲加 #英超 #彩報

21/12/2024

曼城戰績嚴重下滑引發連鎖反應，已經影響到王牌前鋒艾寧夏蘭特續約進程，據報艾蘭特叫停續約談判，重新評估自己前路，不排除加盟一支有力爭奪金球獎嘅西甲球隊。
夏蘭特過去在曼城取得成功，全因曼城嘅中場組織及傳送能力，不過今季曼城中場控制能力明顯大不如前，夏蘭特嘅發揮亦大受影響。今季累積13球，同穆罕默德沙拿並列射手榜首位，再唔能夠好似上兩季咁一放絕塵。

曼城前季奪得歐聯冠軍，並成為三冠王，係夏蘭特最接近取得金球獎一次，但最終輸畀美斯，之後曼城不但未有補充人腳，近兩季更先後出售高爾彭馬及祖利安艾華利斯，而今季陣容老化及傷病影響，球隊表現一落千丈。

夏蘭特同曼城合約2027年6月到期，現時身價為2億歐元(約16.4億港元)，雙方近日展開續約談判，以避免遭其他歐洲豪門挖角。

24歲嘅夏蘭特被譽為當今最佳射手之一，效力曼城之前，已經踢過拜尼、莫迪、薩爾斯堡同多蒙特，佢嘅目光並唔單止喺英超，分析指佢遲早都會去西甲征戰，問鼎世界最佳榮銜。

#英超 #曼城 #夏蘭特 #彩報

21/12/2024

曼聯中場美臣蒙特上輪英超對曼城，踢咗13分鐘就受傷退下火線，領隊魯賓艾摩廉現時確認，呢位25歲英格蘭國腳將休息數星期。美臣蒙特加盟紅魔鬼1年半以來，已經因傷缺陣37場比賽，仲多過佢效力車路士4年總缺陣場數1倍。

魯賓艾摩廉接手執教曼聯後，曾經表示會重用美臣蒙特，對於呢位愛將受傷，感到無奈：「蒙特將會缺陣數星期，我哋會全力協助佢康復，1位球員長期養傷，一定面臨好多困難，佢已經好努力去克服傷患。」

美臣蒙特喺社交網發文抒發鬱悶心情：「現時無法用言語表達沮喪心情，大家見到我受傷嘅表情，應該都知咩事，曼聯球迷可能唔太了解我，但我可以保證一件事，我永遠唔會放棄或失去信心，而係會奉獻一切，度過呢一段困難時期，實現目標前永不止步。」

美臣蒙特2023年7月以6,000萬鎊(約5.9億港元)轉會費由車路士加盟曼聯，並獲得「傳奇7號」球衣，一度被寄予厚望，但卻經常受傷，至今因傷缺陣曼聯37場比賽，反觀佢效力車路士4年，僅因傷缺陣18場。難怪網民認為美臣蒙特中咗「7號魔咒」，如果想事業翻生，最好更換球衣號碼。

#英超 #曼聯 #美臣蒙特 #彩報

21/12/2024

《女神Talk》西甲：巴塞隆拿 vs 馬德里體育會

嚟到西甲第18輪比賽，亦都係歇冬前嘅最後一輪比賽，將會上演西甲前列大戰！巴塞隆拿坐鎮魯營主場對馬德里體育會！呢個12月意甲都會有連場大戰，包括今週有拉素主場對國際米蘭！人氣KOL、兼超級球迷 Nicole 同埋 Rifu 就有好多有用數據提供畀大家！想知佢有咩好介紹？睇吓段片就知啦👉🏻 https://youtu.be/C6dg-m3_R0k

【西甲】巴塞隆拿 vs 馬德里體育會
【FB5516】2024/12/22 - 04:00

Nicole IG
Rifu IG .w.rifu

#西甲 #巴塞隆拿 #馬德里體育會 .w.rifu #彩報

嚟到西甲第18輪比賽，亦都係歇冬前嘅最後一輪比賽，將會上演西甲前列大戰！巴塞隆拿坐鎮魯營主場對馬德里體育會！呢個12月意甲都會有連場大戰，包括今週有拉素主場對國際米蘭！人氣KOL、兼超級球迷 Nicole 同埋 Rifu 就有好...