01/12/2023
ဒဒိုက်သၞာဂကူပိုယ်ဍောတ်မံၚ်ဟွံသာ
လ္တူအကာဲအရာဂကူပိုယ်က္တဵုဒှ်မံၚ်လၟုဟ်ဂှ် ဟိုတ်နူကဵုမၞိဟ်တေံ၊ ဟိုတ်နူကဵုဂကောံတေံ၊ ဂကောံဏံ၊ ဗော်တေံ၊ ဗော်ဏံသက်သက်ဟေၚ်ဟွံသေၚ်ဂှ် ဗွဲကိုပ်ကၠာ ညံၚ်သ္ဂောံစှ်ေစိုတ်၊ ညံၚ်ဂွံနွံပ္ဍဲစိုတ် အလုံဂကူပိုယ်ဂှ် ဒးပခိုၚ်စွံလဝ် ရောၚ်။
ကမၠောန်ဂကူဟီုဂှ် ဆေၚ်စပ်ကဵုအလုံဂကူတုဲ ပိုယ်ဒှ်မၞိဟ်ဂကူဂှ်မ္ဂး သွက်ကောန်ဂကူဂှ် မွဲနဲမွဲဗီု ဒးဘိုၚ်ရီုဗၚ်၊ ဒးမၚ်မွဲ စိုတ်ဓာတ်ဗီုဏံနွံမှ ထေက်ကဵုစၟတ်သမ္တီ ညးတီဂကူရ။
ပ္ဍဲအရာထ္ၜလဘာ်ရီုဗၚ်ဂကူဝွံ စိုတ်ထတ်ဇြဟတ်ဇၞော် လတူဂကူမန်ဂှ် ဒးဟီုမ္ဂး ဒးဆဵုအာ စေတနာအသဝ်ဂုဏ်သၚ်မန် တအ်ရ။ တၠဳပိုန်သၚ်တအ်ဝွံ လပါ်ညးတအ်ကၠောန်မာန်မ္ဂး ညးမွဲဟွံဒးဆဝ်မ္ၚုဟ် နကဵုတီလျိုၚ်နွံနွံ ဟွံဟီုဒဟ် ဟွံထ္ၜးဒုဟ် ကုညးတေံ ကုညးဏံမွဲသာ် ကၠောန်ပတုဲဏာ ပြဟ်ဟ်ပြေဟ်ဟ်ဂှ် ဒှ်လက်သဏ်ခိုဟ်မွဲ ဟီုမာန်ရ။
ဂကူမန်ဝွံ လပါ်ပညာရံၚ်ရံၚ် လပါ်ပရေၚ်ဍုၚ်ကွာန်ဟီုဟီု ဍိုန်လျတဴမံၚ်ကွေံကွေံဏီရ။ လတူသဘဴဓရ်ဂှ် ညးမတီကၠိုဟ်တအ် စၞးဒးထံက်ထ္ၜးမံၚ်ဒုဟ် ပါ်ပါ်မပတ၀်ဏာ လပါ်ပရေံဂှ် ဒေါအ်ဇူမွဲလစုတ်တုဲ နဲညးတအ်ထ္ၜလဘာ်မာန် ဘိုၚ်ပတိုန်စိုတ်ဓာတ် ပူဗိုၚ်ကၠောန်အာ သွက်ကောန်ဂကူစိုအ်ဂှ် ဆဝ်မ္ၚုဟ်ဏာရ။
ဒဒိုက်သၞာမန်ဂှ် မန်ဟေၚ်ရ ရီုဗၚ်မာန်၊ ပြသၞာဂကူပိုယ်ဂှ် ဂကူပိုယ်ကုပိုယ်ဟေၚ် သှ်ကလးမာန်တုဲ လတူနူမလာပ်ပထုဲဂှ် ကဵုဇြဟတ်ပတဝ်ဂၠံၚ်လပါ်ခိုဟ်အိုတ်စိုအ်။