01/08/2021
ကနီတွင် ၁၄ နှစ်အရွယ် ကလေးအပါအဝင် ပြည်သူ ၁၂ ဦးကို စစ်ကောင်စီက သတ်ဖြတ်၊ ပထမအကြိမ် ပြည်သူ ၁၅ ဦး၊ ဒုတိယ ပြည်သူ ၁၁ ဦးနှင့် ယခုတတိယအကြိမ် ပြည်သူ ၁၂ ဦးကို စစ်တပ်ကသတ်ဖြတ်
ရန်ကုန်၊ ဩဂုတ် ၁
စစ်ကိုင်းတိုင်း ၊ ကနီမြို့နယ်တွင် အကြမ်းဖက်စစ်ကောင်စီတပ်များက ဇူလိုင်လ ၂၆ ရက်နေ့နှင့် ၂၇ ရက်နေ့ ကျေးရွာများမှ ဖမ်းဆီးသွားသော အသက် ၁၄ နှစ်အရွယ် ကလေးငယ် ၁ ဦးအပါအဝင် ပြည်သူ ၁၂ ဦးကို ကနီမြို့နယ် တောင်ပေါက်အရှေ့ရွာ အနီးရှိ တောထဲတွင်အစုအပြုံလိုက် သတ်ဖြတ်ခဲ့ပြီး ဇူလိုင်လ ၃၁ ရက်နေ့ အလောင်းများ ရှာဖွေတွေ့ရှိခဲ့ရကြောင်း ဒေသခံများထံမှ သိရှိရသည်။
အကြမ်းဖက်စစ်ကောင်စီက ဖမ်းဆီးသွားသော ပြည်သူ ၁၂ ဦးမှာ ကနီမြို့မှ အမျိုးသား ၃ ဦး ၊ ခိုတွင်းရွာမှ အမျိုးသား ၂ ဦး ၊ သရက်တောရွာမှ အမျိုး သား၇ ဦး ဖြစ်ကြောင်း၊ ကနီမြို့မှ အမျိုး သား ၃ ဦးမှာ ကိုအောင်မြင့်သူ (၃၂) နှစ်၊ ချင်းတွင်းမောင် (၂၅) နှစ်၊ ဖြိုးကျော်အောင် (၁၈) နှစ်တို့ဖြစ်ကြောင်း၊ သရက်တောရွာမှ အမျိုးသား ၇ ဦးတွင် အသက်(၁၄)နှစ်ခန့် ကလေးငယ်တစ်ဦး ပါဝင်ကြောင်း သိရှိပါသည်။
အလောင်းများကို စိစစ်ချက်အရ အမျိုးသား(၃)ဦးသည် ရိုက်နှက် သတ်ဖြတ် ပစ်သတ်ခံရခြင်းဖြစ်ပြီး မျက်နှာ နှင့် ခန္ဓာကိုယ် အနှံ့တွင် ညိုမဲဒဏ်ရာများ၊ ဦးခေါင်းနှင့် ရင်ဘတ်တွင် သေနတ် ဒဏ်ရာများနှင့် ပုပ်ပွ သေဆုံးလျက်ရှိကြောင်း သိရသည်။
အခြားအလောင်းများကိုလည်း မီးရှို့ထားသည့် ထန်းလက်တဲ ကြီးအတွင်း နှင့် ပတ်ချာလည် ပျဉ်ပုံများပတ်လည်တွင် တွေ့ရှိရသည့် အနေအထားဖြစ်ပြီး အလောင်းများကို ဇူလိုင်လ ၃၁ ရက်နေ့တွင် ရှာဖွေတွေ့ရှိရခြင်းဖြစ်ကြောင်း သိရှိရသည်။
ပထမအကြိမ် ပြည်သူ ၁၅ ဦးကို အစုလိုက် အပြုုံလိုက် သတ်ဖြတ်မှု
====================================================
စစ်ကိုင်းတိုင်း၊ ကနီမြို့နယ် ယင်းကျေးရွာအုပ်စု ၊ ယင်းကျေးရွာမှ စစ်ဘေးရှောင် ပြည်သူ ၁၄ ဦး၊ ကုန်းသာကျေးရွာမှ စစ်ဘေးရှောင် ပြည်သူ ၁ ဦး စုစုပေါင်း ၁၅ ဦးတို့ကို စစ်တပ်က အစုလိုက် အပြုံလိုက် တောနင်းရှာဖွေ သတ်ဖြတ်သွားခဲ့ပြီး ဇူလိုင်လ ၁၃ ရက်နေ့တွင် အလောင်းများ တွေ့ရှိခဲ့ရသည်။
ဇူလိုင် ၈ ရက်နေ့တွင် ကနီမြို့နယ်၊ ယင်းကျေးရွာအုပ်စုအတွင်း စစ်ကောင်စီတပ်အင်အား ၁၀၀ နှင့် ၂၀၀ အကြား အင်အားအလုံးအရင်းဖြင့် တောနင်းပြီး စစ်ဘေးရှောင်ပြည်သူများကို သတ်ဖြတ်သွားခြင်းဖြစ်ကြောင်း၊ သတ်ဖြတ်ခံရသူများသည် တောရွာများမှ ထွက်ပြေးလာခြင်းဖြစ်ပြီး ပြည်သူ့ကာကွယ်ရေးတပ်ဖွဲ့ဝင်များလည်း မဟုတ်ကြောင်း၊ ငွေနှင့် ရွှေများကိုလည်း လုယူသွာခဲ့ကြောင်း သိရှိရသည်။
ဒုတိယအကြိမ် ပြည်သူ ၁၁ ဦးကို စစ်တပ်က အစုလိုက်အပြုံလိုက် သတ်ဖြတ်မှု
===========================================================
စစ်ကိုင်းတိုင်း၊ကနီမြို့နယ် ဇီးပင်တွင်းရွာ အနောက်ဘက်ရှိ တောတိုက်တွင် စစ်ကောင်စီတပ်ဖွဲ့ဝင်များက စစ်ဘေးရှောင်ပြည်သူ ၁၁ ဦးထက်မနည်းကို အစုလိုက်အပြုံလိုက် သတ်ဖြတ်မှု မြေမြုပ်ထားကြောင်း ဇူလိုင်လ ၂၇ ရက်နေ့တွင် ဒေသခံများက တွေ့ရှိခဲ့ရသည်။
ဇူလိုင်လ ၂၇ ရက်နေ့တွင် ဒေသခံရွာသူ/ရွာသားများ၏ ရှာဖွေတွေ့ရှိမှုအရ ကျင်းများအတွင်းမြှုပ်ထားသော အမျိုးသား အလောင်း ၄ လောင်း၊ ဇီးပင်တွင် ကြိုးဆွဲ၍ အသတ်ခံရသော အသက်(၆၀)အရွယ် အမျိုးသားတစ်ဦး၏အလာင်းတို့ကို တွေ့ရှိထားပြီးဖြစ်ကြောင်း ၊ အလောင်းများမှာ လက်ပြန်ကြိုးတုပ်၍ ဖမ်းဆီးသတ်ဖြတ် ရိုက်နှက်ခြင်း ၊ သေနက်ဒဏ်ရာများဖြင့် သေဆုံးနေခြင်းများမှာ အများဆုံးဖြစ်ကြောင်း ၊အခြားမြေမြှုပ်ထားသော ကျင်းပေါင်း(၅)ကျင်းခန့်ရှိနေပြီး မိုင်းများလည်း ထောင်ထားခဲ့ကြောင်း သိရှိရသည်။
