02/05/2024
အားလုံးပဲမင်္ဂလာ ညချမ်းပါ။
သတင်းဦး သတင်းထူးတွေထဲမှာတော့ အစ္စရေးနဲ့ ဟားမတ်စ်တို့အကြားက အပစ်အခတ်ရပ်ဆဲရေး ကိစ္စက ထိပ်ဆုံးက ရှိနေဦးပါမယ်။ အစ္စရေးပြည်တွင်းက လက်ယာစွန်းတချို့ကတော့ နေတန်ယာဟုကို အပစ်အခတ်ရပ်ဆဲရေး မလုပ်ဖို့ တိုက်တွန်းနေကြလေရဲ့။ အစ္စရေးပြည်တွင်း မှာလည်း အစွန်းရောက် အမျိုးသားရေးဝါဒီတွေရှိသလို အစ္စသမိုင်းမှာ ငြိမ်းချမ်းရေးနဲ့ နှစ်ပြည်ထောင်မူ ကို လိုလားခဲ့တဲ့ ခေါင်းဆောင်တစ်ဦး လုပ်ကြံသတ်ဖြတ်ခံရ ဖူးပါတယ်။ ဒီတစ်ခေါက် အပစ်အခတ်ရပ် ဆဲရေးကတော့ အမေရိကန်ရဲ့ ဖိအားကြောင့်လို့ ယူဆလို့ ရပါတယ်။ အစ္စရေးရဲ့ ဂါဇာဒေသတွင်းက လုပ်ဆောင်ချက်တွေကြောင့် နိုင်ငံတကာ မျက်နှာစာမှာ အစ္စရေးကို အကာအကွယ်ပေးနေတဲ့ အမေရိကန်အနေနဲ့ အတော်လေးကို ဖိအားများနေခဲ့တာ ဖြစ်ပါတယ်။ အမေရိကန် နိုင်ငံခြားရေး ဝန်ကြီး ဘလင်ကန်ကတော့ အပစ်အခတ်ရပ်ဆဲနိုင်ရေးအတွက် အရှေ့အလယ်ပိုင်းဒေသတလျောက် ခရီးစဉ်တွေ ဆက်နေခဲ့တာပါ။ ဆော်ဒီ၊ ဂါဇာနဲ့ အစ္စရေးတို့ကိုပါ။ ဟိုတစ်ရက်က ဟားမတ်စ်တွေ ဓားစာခံတွေ ထုတ်ပြလာတဲ့ သတင်းမှာလည်း ကျွန်တော်ပြောခဲ့ပါတယ်။ နိုင်ငံရေးမှာ တိုက်ဆိုင် တယ်ဆိုတာမရှိပါ။ Ref : BBC
ဒေသတွင်းမှာတော့ မိမိတို့ရဲ့ အာဆီယံမိတ်ဖက် အင်ဒိုနီးရှားဘက်မှာတော့ မြောက်ပိုင်း ဆူလာဝေဆီဒေသဘက်မှာ ပြီးခဲ့တဲ့ အင်္ဂါနေ့က မီးတောင်ပေါက်ကွဲမှုဖြစ်လို့ လူပေါင်း ၁၂,၀၀၀ ကျော်ကို ဘေးလွတ်ရာသို့ ပြောင်းရွှေ့ပေးခဲ့ရပါတယ်။ Ref: CNN
ထူးခြားဖြစ်စဉ်တစ်ရပ်အနေနဲ့ အမေရိကန်သမ္မတ ဂျိုးဘိုင်ဒင်က ၎င်းတို့ရဲ့ အာရှဒေသတွင် မဟာဗျူဟာမြောက် မိတ်ဖက် ဂျပန်နိုင်ငံဟာ နိုင်ငံခြားသား ကြောက်ရွံ့မှုတွေကြောင့် စီးပွားရေး ကျဆင်းနေရတာ ဖြစ်တယ်ဆိုပြီး တရုတ်၊ ရုရှားတို့နဲ့တန်းတူထား ဝေဖန်ခဲ့ပါတယ်။ ဘာလို့ အဲ့လိုထိပြောလဲဆိုတာ မသိနိုင်သေးပေးမယ့် ဂျပန်ငွေစျေးကတော့ အမှန်တကယ်ကျဆင်းနေခဲ့တာ ဖြစ်ပါတယ်။ ခုဆိုတစ်ဒေါ်လာကို ဂျပန်ယန်း ၁၅၀ ကျော်သွားခဲ့ပါပြီ။ ယန်းစျေးဆက်ကျဖို့လည်း အလားအလာရှိနိုင်ပါတယ်။ အဓိကကတော့ အမေရိကန်ဗဟိုဘဏ်က ငွေကြေးဖောင်းပွတာတွေကို ကာကွယ်ဖို့ အတိုးနှုန်းကို မြှင့်လိုက်တဲ့အနေအထားမှာ ဂျပန်က အတိုးနှုန်းလိုက်မြှင့်တာမျိုး မရှိတော့ ကြားထဲမှာ ကွာဟချက်တွေများပြီး ငွေစျေးကျတာ ဖြစ်ပါတယ်။ အတိုးနှုန်းလိုက်မြှင့်ရင်လည်း ပြည်တွင်းစီးပွားရေးနဲ့ ချေးငွေကိစ္စတွေကို ရိုက်ခတ်မှုများနိုင်ပါတယ်။ Ref: CNN
ဒီနေ့တော့ ဒီလောက်ပါပဲ။
#တော်လှန်ရေးတွင်ပါဝင်ပါ။ #လူ့အခွင့်အရေးကိုလေးစားလိုက်နာပါ။
၂-၅-၂၀၂၄
