Dutch Angle

Home
Dutch Angle

കാഴ്ചയുടെ കല. സിനിമയുടെ സൗന്ദര്യശാസ്ത്രം -

13/03/2024

The Message
(1976)

പ്രവാചകൻ മുഹമ്മദിൻ്റെ ജീവിതത്തെ കുറിച്ച് 1976 ൽ മുസ്തഫ അക്കാഡ് (Moutapha Akkad)
സംവിധാനം ചെയ്ത ചിത്രമാണ് The Message.

എ ഡി. 610 ലെ മക്കയിൽ നിന്നാണ് ചിത്രം ആരംഭിക്കുന്നത്. ക- അബ എന്ന ആരാധനാലയത്തിൽ 360 ഓളം ദൈവങ്ങൾ അന്നുണ്ടായിരുന്നു. നാല്പതാം വയസ്സിൽ മുഹമ്മദിന് ജിബ്രീലിൻ്റെ വെളിപാട് ലഭിക്കുകയും ഏക ദൈവമായ അള്ളാഹു മാത്രമാണ് ഉള്ളതെന്ന് പ്രബോധനം നടത്തുകയും ചെയ്യുന്നു. എന്നാൽ അധികാരിയായ അബു സുഫിയാനും കൂട്ടാളികൾക്കും ഇതംഗീകരിച്ചു കൊടുക്കാൻ കഴിയുന്നില്ല. അവർ മുഹമ്മദിനെയും അനുയായികളെയും പീഡിപ്പിക്കുന്നു. പിന്നീട് അവർ മദീനയിലേക്ക് പാലായനം ചെയ്യുകയും - ഇസ്ലാമിൻ്റെ ആദ്യ പള്ളി നിർമ്മിക്കുകയും - ഇസ്ലാമിന് ഒരു മത രൂപം നൽകുകയും ചെയ്യുന്നു. തുടർന്ന് ബദർ യുദ്ധം - ഉഹൂദ് യുദ്ധം ഒടുവിൽ മക്കയിലേക്കുള്ള മടക്കം വരെയാണ് ചിത്രത്തിലുള്ളത്.

മുഹമ്മദിൻ്റെ പ്രധാന വചനങ്ങൾ ചിത്രത്തിൽ പലയിടത്തും പറയുന്നുണ്ട്. യുദ്ധത്തിൽ സ്ത്രീകളെയും കുട്ടികളെയും വധിക്കരുത് എന്നും വികലാംഗരെയും പ്രായമായവരെയും ആക്രമിക്കരുതെന്നും അദ്ദേഹം പറയുന്നു.
അദ്ദേഹത്തിൻ്റെ പേഴ്സണൽ ജീവിതത്തിലേക്ക് ചിത്രം ഫോക്കസ് ചെയ്യുന്നില്ല -

മുഹമ്മദിൻ്റെ അമ്മാവൻ ഹംസയായി ആൻ്റണി ക്വിൻ വേഷമിടുന്നു. അബു സുഫിയാൻ്റെ ഭാര്യ ഹിന്ദ് Irene Papas ഉം അവതരിപ്പിക്കുന്നു. ഈ ചിത്രത്തിൽ എടുത്തു പറയേണ്ട ഘടകം Maurice Jarre ൻ്റെ സംഗീതവും - ക്യാമറാമാനായ Jack hidard ൻ്റെ ലോംങ്ങ് ഷോട്ടുകളുമാണ്.

കഥയുടെ ഏറെഭാഗവും മുഹമ്മദുമായി ബന്ധപ്പെട്ടിട്ടുള്ളവരുടെ (അമ്മാവനായ ഹംസാ ഇബിന്‍ അബ്ദുള്‍ മുത്തലിബ്,മെക്കാ പ്രമുഖനായ അബു സൂ ഫിയാന്‍,ഭാര്യ ഹിന്ദ് തുടങ്ങിയവര്‍)കാഴ്ച്ചപ്പാടിലൂ ടെയാണ് അവതരിക്കപ്പെട്ടിട്ടുള്ളത്.
അറബി ഉച്ചാരണവും അഭിനയശൈലിയും മറ്റുഭാഷകളില്‍ നിന്നു വ്യത്യസ്ഥമായതിനാല്‍ ഇംഗ്ലീഷിലും അറബിയിലുമായി രണ്ട് ചിത്രീകരണങ്ങള്‍ ഒരേ സമയം നടത്തുകയായിരുന്നു.
ഹോളിവുഡ്ഢില്‍ ഇത്തരം ഒരു സിനിമയുടെ നിര്‍മ്മാണം ശ്രമകരമായിരുന്നു.പ്രവാചകനോടും ഇസ്ലാം മതത്തോടുമുള്ള പൂ ര്‍ണ്ണബഹുമാനത്തോടെ ചിത്രമൊരുക്കുന്നതിനായി ലോകത്തിലെപ്രമുഖരായ മുസ്ലീം പുരോഹിതന്‍മാരുമായി അദ്ദേഹം നിരവധി കൂ ടിയാലോചനകള്‍ നടത്തി.അതുപ്രകാരം ഈജിപ്റ്റിലെ അല്‍ അസ്ഹറില്‍ നിന്നും അനുമതി നേടിയെങ്കിലും പിന്നീട് മെക്കയില്‍ ചേര്‍ന്ന മുസ്ലീം വേള്‍ഡ് ലീഗ് അതു നിരസിച്ചു.കുവൈറ്റും,ലിബിയയും,മൊറോക്കോയും സാമ്പത്തിക സഹായം വാഗ്ദാനം ചെയ്തുവെങ്കിലും മുസ്ലീം വേള്‍ഡ് ലീഗിനുശേഷം കുവൈറ്റ് പിന്‍മാറി.മൊറോക്കോയിലെ ഹസ്സന്‍ രണ്ടാമന്‍ പൂ ര്‍ണ്ണ പിന്തുണയുമായെത്തുകയും 6 മാസത്തെ ചിത്രീകരണം സുഗമമായി നടക്കുകയും ചെയ്തു.താമസിയാതെ സൗദി സര്‍ക്കാര്‍ മൊറോക്കോയ്ക്കുമേല്‍ സമ്മര്‍ദ്ദം ചെലുത്താന്‍ തുടങ്ങിയതോടെ അവരും പാതിവഴിയില്‍ പിന്‍മാറുകയായിരുന്നു.പിറകേ ലിബിയന്‍ ഭരണാധികാരി ഗദ്ധാഫി പിന്തുണയുമായെത്തി.ബാക്കിചിത്രീകരണം ലിബിയയില്‍ നിര്‍വ്വഹിച്ചു.പഴയ കാലഘട്ടത്തേതിലെന്ന നിലയില്‍ മക്കയും മദീനയും പുനര്‍ നിര്‍മ്മിക്കുകയായിരുന്നു.
ലിബിയന്‍ പട്ടാളക്കാരായിരുന്നു സഹാറയിലെ ബദര്‍യുദ്ധത്തില്‍ പോരാളികളായി അഭിനയിച്ചത്.ഇസ്ലാമിക രാഷ്ട്രങ്ങളും പടിഞ്ഞാറും തമ്മില്‍ സാസ്കാരികവും ആശയപരവുമായൊരു പാലം നിര്‍മ്മിക്കുകയായിരുന്നു സംവിധായകന്റെ ഉദ്ദ്യേശ്യം.

മുസ്ലീം വിശ്വാസപ്രകാരം മുഹമ്മദിനെ തിരശ്ശീലയില്‍ ആവിഷ്കരിക്കുന്നതോ ശബ്ദം കേള്‍പ്പിക്കുന്നതോ നിഷിദ്ധമാണ്.സിനിമയുടെ തുടക്കത്തില്‍ തന്നെ എഴുതികാണിക്കുന്നത് " The makers of this film honour the Islamic tradition which holds that the impersonation of the prophet offends against the spirutuality of his message.Therefore,the person of Muhammad will not be shown എന്നാണ്.പ്രവാചകനെയോ അദ്ദേഹത്തിന്റെ അടുത്ത ആളുകളേയോ അവതരിപ്പിക്കപ്പെടാതിരുന്നതും അമ്മാവന്‍ ഹംസയും ദത്തുപുത്രന്‍ സായിദും കേന്ദ്രകഥാപാത്രങ്ങളാവുന്നതും ഇതേ കാരണത്താലാണ്.ബദര്‍-ഉഹദ് യുദ്ധങ്ങളിലൊക്കെ മുഹമ്മദിനുപകരം ഹംസയാണ് നേതൃനിരയില്‍ വരുന്നത്.മുഹമ്മദിന്റെ സാന്നിദ്ധ്യം കാണിക്കുന്നത് അദ്ദേഹത്തിന്റെ വ്യൂ പോയിന്റ് ഷോട്ടിലൂ ടെയും പ്രത്യേക സംഗീതപഥത്തിലൂ ടെയുമാണ്.(ആദ്യം പ്രവാചകന്റെ നിഴല്‍ രൂ പം കാണിക്കാനായിരുന്നു പദ്ധതി.പക്ഷേ അതിനെതിര്‍പ്പുമായി ഒരു വിഭാഗം മുസ്ലീം തീവ്രവാദഗ്രൂ പ്പുകള്‍ രംഗത്തെത്തി.അതോടെ യഥാര്‍ത്ഥ നായകനെ അദൃശ്യനായി നിര്‍ത്താന്‍ തീരുമാനിക്കപ്പെടുകയായിരുന്നു.)ശബ്ദം നേരിട്ടു കേള്‍പ്പിക്കാതെ ഹംസയോ സായിദോ കേട്ടുപറയുന്ന വിധത്തിലുമാണ്.

കെയ്റോയിലെ അല്‍-അസ്ഹര്‍ യൂ ണിവേഴ്സിറ്റിയെയും ലെബനോനിലെ ഷിയാത്ത് ഹൈ ഇസ്ലാമിക് കോണ്‍ഗ്രസ്സിനെയുമാണ് ചിത്രത്തിന്റെ കൃത്യത നിര്‍ണ്ണയിക്കുവാനായി ചുമതലപ്പെടുത്തിയത്.
പ്രദര്‍ശനം ആരംഭിക്കാനിരിക്കേ നിരവധി മധ്യപൂ ര്‍വ്വേഷ്യന്‍ രാജ്യങ്ങള്‍ സിനിമയെ നിരോധിക്കുകയുണ്ടായി .അമേരിക്കന്‍ പ്രദര്‍ശനത്തിനെതിരേ മുസ്ലീം തീവ്രവാദസംഘടനകള്‍ ഉപരോധവുമായി രംഗത്തെത്തി.വിഖ്യാത ഹോളിവുഡ് നടന്‍ ആന്റണി ക്വീന്‍ മുഹമ്മദായി അഭിനയിക്കുന്നു എന്നവര്‍ തെറ്റിദ്ധരിച്ചിരുന്നു.(ഇംഗ്ലീഷ് വേര്‍ഷനില്‍ ഹംസയായിട്ടായിരുന്നു ക്വീന്‍ അഭിനയിച്ചത്.അറബിക് വേര്‍ഷനില്‍ അബ്ദുള്ള ഖ്വെയ്തും)

1977 മാര്‍ച്ച് 9-ന് ഹമാസ് അബുദുള്‍ ഖാലിസ്സിന്റെ നേതൃത്വത്തില്‍ ആഫ്രോ അമേരിക്കന്‍ ഹനഫി മുസ്ലീമുകള്‍ (നാഷണല്‍ ഓഫ് ഇസ്ലാം) വാഷിംഗ്ഡണ്‍ ഡി.സി യിലെ മൂ ന്നു കെട്ടിടങ്ങള്‍ കൈയ്യടക്കി അതിലെ 149 ആള്‍ക്കാരെ ബന്ദികളാക്കി.പ്രദര്‍ശന തീരുമാനം പിന്‍വലിച്ചില്ലെങ്കില്‍ വാഷിംഡണ്‍ കത്തിക്കുമെന്നവര്‍ ഭീഷണി മുഴക്കി.പിന്നീട് 39 മണിക്കൂ ര്‍ നേരത്തെ ഉദ്വേഗങ്ങള്‍ക്കൊടുവില്‍ അവര്‍ മോചിപ്പിക്കപ്പെടുകയായിരുന്നു.(രക്ഷാ ദൗത്യത്തില്‍ ഒരു പോലീസ് ഓഫീസറും വയര്‍ലസ് ഓഫീസറും കൊല്ലപ്പെട്ടു)

1977-ലെ ഓസ്കാറിന് സംഗീതവിഭാഗത്തില്‍ ചിത്രം നോമിനേറ്റ് ചെയ്യപ്പെട്ടിരുന്നു.
സ്വന്തം മതത്തിന്റെ സാഹോദര്യമാര്‍ന്ന മുഖം ലോകത്തിനു മുന്നില്‍ അവതരിപ്പിക്കാനാണ് ചിത്രത്തിന്റെ സംവിധായകന്‍ മൗസ്തഫ അക്കാദ് ശ്രമിച്ചത്.നിര്‍ഭാഗ്യവശാല്‍ രണ്ടു ജീവനുകളാണ് അതിനുവേണ്ടി അദ്ധേഹം ബലി നല്‍കിയത്.ഒന്ന് അദ്ദേഹത്തിന്റെ മകളുടേതും പിന്നെ മൗസ്തഫയുടെ തന്നെയും.താന്‍ ആരുടെ നന്‍മയാണോ ലോകത്തിനു മുന്നില്‍ അവതരിപ്പിക്കാന്‍ ശ്രമിച്ചത് അതേ സമുദായം തന്നെ അദ്ദേഹത്തെ കൊലപ്പെടുത്തി.2005 നവംബര്‍ 11-ന് ജോര്‍ദ്ദാനിലെ അമ്മാനില്‍ വച്ച് മൗസ്തഫ അക്കാദും 34 വയസ്സുള്ള മകള്‍ റിമ മോണ്‍ലായെയും ഒരു ഇസ്ലാം തീവ്രവാദി ചാവേറിനാല്‍ കൊല്ലപ്പെട്ടു.ഗ്രാന്റ് ഹിയാത്തിലെ ലോബിയില്‍ വച്ചായിരുന്നു ആ ദുരന്തം ഉണ്ടായത്.അല്‍-ക്വയ്ദ/ അബു മുസബ് സര്‍ഖാവിയുടെ മോണോത്തിസം ആന്റ് ഹോളി വാര്‍ ഓര്‍ഗനൈസേഷന്‍ അയച്ച ഇറാഖി ആത്മഹത്യബോംബ് സ്ക്വാഡിലെ ഒരംഗമായിരുന്നു സംഭവത്തിനു പിന്നില്‍.മകള്‍ റിമ സംഭവസ്ഥലത്തുവച്ചും അക്കാദ് ആശുപത്രിയില്‍വച്ചുംമരണപ്പെട്ടു.ആദ്യഭാര്യയായ പട്രീഷയും മക്കളും രണ്ടാം ഭാര്യയായ സുഹ ആഷയും മക്കളും ചേര്‍ന്നാണ് അദ്ദേഹത്തിന്റെ ഹല്ലോവിന്‍ സിനിമകള്‍ പിന്നീട് നിര്‍മ്മിച്ചത്.

Lion of the Desert അദ്ദേഹത്തിൻ്റെ പ്രശസ്തമായ സിനിമകളിലൊന്നാണ്.

27/12/2023

നേര്.
______

നേരിനെ കുറിച്ച് നേരു പറഞ്ഞാൽ ചിലർക്കെങ്കിലും മനോവിഷമം ഉണ്ടാവാൻ സാധ്യതയുണ്ട്. എന്നാലും പറയാതിരിക്കുന്നത് ബൗദ്ധികമായ ഒരു സത്യസന്ധത ആണെന്ന് തോന്നുന്നില്ല.

കോർട്ട് റൂം ഇമോഷണൽ ഡ്രാമ എന്ന തലവാചകത്തിൽ പുറത്തിറങ്ങിയ ജിത്തു ജോസഫിന്റെ നേര് ഇമോഷന്റെ കാര്യത്തിലാണ് കൂടുതൽ ശ്രദ്ധിച്ചതെന്നു തോന്നുന്നു.

നേരേ കോർട്ടു റൂമിലേക്ക് കഥയെ പറിച്ച് നടനുള്ള വ്യഗ്രതയിൽ കുറ്റകൃത്യം നടന്ന സാഹചര്യത്തെ കുറിച്ചുള്ള പല വിശദീകരണവും ദഹിക്കാതെ കിടക്കുന്നു. ഫിക്ഷനിൽ ചോദ്യമില്ല. ചെരിപ്പിനനുസരിച്ച് പാദം മുറിക്കുക എന്നതാണ് നല്ലൊരു തിരക്കഥയുടെ ലക്ഷണം. പക്ഷേ പാദം മുറിച്ചതിന്റെ മുറിപ്പാടോ രക്തമോ പ്രേക്ഷകൻ തിരിച്ചറിയരുത്. കഥ നടക്കുന്ന കാലവും അതു സംഭവിക്കുന്ന ലോകവും പ്രധാനമാണ്. ഇതൊരു റിയൽ വേൾഡിൽ - നമ്മുടെ കാലത്ത് നടക്കുന്ന സംഭവമാണ്. തന്റെ കഥ കോടതിയിൽ നിഗൂഢത പരത്താൻ തിരക്കഥാകൃത്ത് സൃഷ്ടിക്കുന്ന സാഹചര്യങ്ങൾ പ്രത്യേകം പ്രത്യേകം എടുത്തു വച്ചതായാണ് ഫീൽ ചെയ്തത്. വഴി ചോദിക്കാൻ വരുന്ന അപരിചിതൻ- നാലു പേരുടെ സംഭാഷണം - അന്ധയായ പെൺകുട്ടി. പിറ്റേന്ന് കല്യാണത്തിനു പോകുന്ന വീട്ടുകാർ - ബാങ്കിൽ പോകണം എന്ന് പറയുന്ന വേലക്കാരി - തൊട്ടടുത്തു തന്നെയുള്ള സുഹൃത്തിന്റെ വീട്ടിൽ തങ്ങുന്ന വില്ലൻ - പിറ്റേന്ന് സുഹൃത്തിന്റെ വീട്ടുകാർ പുറത്തേക്കു പോകുമ്പോൾ - കൃത്യം സമയത്തിനുള്ളിൽ വിരലടയാളം പോലും പതിയാതെ റേപ്പ് നടത്തുന്ന വില്ലൻ - വില്ലന്റെ മുഖത്തു അളവ് പിടിച്ച് ശിൽപം നിർമ്മിക്കുന്ന അന്ധയായ നായിക - അതു കൂടാതെ കമ്പനി ഡ്രൈവറെ വിളിച്ച് തന്റെ ഫോണും കൊടുത്ത് യാത്ര അയക്കുന്ന കൂർമ്മ ബുദ്ധിമാനായ വില്ലൻ -
എന്നിട്ട് സിനിമയുടെ ഒത്ത നടുക്ക് ഇരയായ പെൺകുട്ടിയുടെ വീട്ടിൽ ഗുണ്ടകളുമായി നേരിട്ടെത്തി ഭീഷണി മുഴക്കുന്ന കൂർമ്മ ബുദ്ധിക്കാരൻ .

ആകെ കൺഫ്യൂഷനായല്ലോ - CCTV ക്യാമറ മെക്കാനിക്കിനെ നേരിട്ട് വിളിച്ചു വരുത്തി ദൃശ്യങ്ങൾ മാറ്റാൻ ഭീഷണിപ്പെടുത്തുന്ന സുപ്രീം കോർട്ട് വക്കീൽ -

ഒരു ഫിക്ഷനിൽ നൈസർഗികമായി വന്നു ചേരുന്നതു പോലെ ഉണ്ടാവേണ്ട പല സീനുകളിലും ഒരു കൃതൃമത്വം അനുഭവപ്പെട്ടിരുന്നു.

അസാധാരണമായ അവകാശ വാദങ്ങൾക്ക് അസാധാരണമായ തെളിവ് വേണമെന്ന് കാൾ സാഗൻ പറഞ്ഞത് ഓർക്കുന്നു. ഫിക്ഷനാണല്ലോ. ആന ചവുട്ടിയാൽ ചാവാത്തവരും ഉണ്ടാകാം.

ചിത്രത്തിലെ ക്ലൈമാക്സ് എന്തായിരിക്കാം എന്ന് ഒരു മണിക്കൂർ മുമ്പ് തന്നെ നല്ലൊരു പ്രേക്ഷകനു തിരിച്ചറിയാൻ കഴിയും.

വിഷ്വലി പറയുകയാണെങ്കിൽ മനസ്സിൽ തങ്ങി നിൽക്കുന്ന ഒരേയൊരു ഷോട്ട് നീതിദേവതയെ ഫോക്കസ് ഔട്ടാക്കി കാണിക്കുന്ന സീനാണ്.

മോഹൻലാലിനെ പോലൊരു നടന് ഈ ചിത്രത്തിൽ അപാരമായി ഒന്നും ചെയ്യാനുണ്ടായിരുന്നില്ല. പക്ഷേ മോഹൻലാൽ എന്ന താരത്തിന് ഇതിൽ കാര്യം ഉണ്ട് താനും. അതാണ് ചിത്രത്തിന്റെ പ്രാധാന്യവും. ഒരുമാതിരി ഭേദപ്പെട്ട ഏതൊരു ആക്ടറിനും ചെയ്യാൻ കഴിയുന്ന വേഷമാണ് വിജയ് മോഹൻ എന്ന കഥാപാത്രം. സിദ്ധിക്കിന്റെ കഥാപാത്രവും അദ്ദേഹം പലപ്പോഴായി ചെയ്ത പല കഥാപാത്രങ്ങളുടെയും ഒരു തുടർച്ച മാത്രമാണ്. ഗുമസ്തയായ പ്രധാന നായിക ഒരു പാട് എക്സ്പ്രഷനിട്ട് മരിക്കുകയാണ്. മോഹൻലാലിന്റെ അസിസ്റ്റന്റെ വക്കീലായി അഭിനയിച്ച നടി സ്കൂൾ നാടകത്തിൽ നിന്ന് നേരിട്ട് സിനിമയിൽ കയറിയതാണെന്ന് തോന്നുന്നു.

അനശ്വര രാജൻ മാത്രമാണ് നിരാശപ്പെടുത്താതിരുന്നത്. അവൾ ഒരിക്കലും ഓവർ ആക്ടിംങ്ങ് ചെയ്യുന്നില്ല.

പല മികച്ച കോർട്ട് ഡ്രാമാ മൂവികളും കണ്ടതു കൊണ്ടാവാം എനിക്കീ ചിത്രത്തോടു അത്ര യോജിക്കാൻ കഴിയാഞ്ഞത്.

1957 ൽ പുറത്തിറങ്ങിയ 12 Angry man. കോർട്ട് റും ഡ്രാമയുടെ റഫറൻസ് ബുക്കാണ്. ബ്ലാക്ക് ആൻഡ് വൈറ്റിൽ ചിത്രീകരിച്ച ഈ സിനിമ മൊത്തം ഒരു റൂമിലാണ് 99 ശതമാനവും. 12 ജൂറികൾ ചേർന്ന് ഒരു പയ്യന്റെ വധശിക്ഷയുടെ അവസാന വിധി നിർണ്ണയിക്കുന്ന ദിവസം. ഇപ്പോൾ കണ്ടാലും ശ്വാസമടക്കി പിടിച്ചിരുന്നേ കാണാൻ കഴിയൂ- നിയമഞ്ജർ പോലും റഫർ ചെയ്ത സിനിമയാണിത്.

1959 ൽ പുറത്തിറങ്ങിയ മറ്റൊരു ബ്ലാക്ക് ആൻഡ് വൈറ്റ് ചിത്രമാണ്. Anatomy of a Murder. ബലാത്സംഗവും കൊലപാതകവും നടന്ന കേസിലെ വാദം സിനിമ ചരിത്രത്തിലെ തന്നെ ഇതിഹാസമാണ്. അതിലെ നായകനായ അഭിഭാഷകനും ഒരു പരാജയപ്പെട്ട ആളാണ്.
ഫിലിം രജിസ്ട്രിയിൽ ചേർക്കപ്പെട്ട സിനിമയാണിത്.

അതു പോലെ മറ്റൊരു മികച്ച കോർട്ട് റും ഡ്രാമയാണ് Judgement at Nuremberg.
ജർമ്മൻ നാസി ഭരണകാലത്ത് നിരവധി ജൂതൻമാരെ ഗ്യാസ് ചേംബറിലേക്ക് അയക്കാൻ അനുമതി നൽകിയ നാല് ജഡ്ജിമാരെയാണ് ഇവിടെ വിചാരണ ചെയ്യുന്നത്. വിധി പറയാനായി 4 ന്യായാധിപൻമാർ. ഇതൊക്കെ അത്രയും കാലത്തിനു മുന്നേ പെർഫക്ടായി ചിത്രീകരിച്ചിരിക്കുന്നത് കാണുമ്പോൾ , സസ്പെൻസും തെളിവുകൾ പുറത്തു കൊണ്ടുവരുന്ന രീതിയും കാണുമ്പോൾ രോമാഞ്ചി ഫിക്കേഷൻ ഉണ്ടാവുക സ്വഭാവികം.

മലയാളത്തിൽ തന്നെ മികച്ച മറ്റൊരു കോർട്ട് റും ഡ്രാമയുണ്ട്. മാധവ് രാമകൃഷ്ണന്റെ സംവിധാനത്തിൽ പുറത്തു വന്ന " മേൽ വിലാസം " ഒരു മിലിട്ടറി കോടതിയാണ് പശ്ച്ചാത്തലം. ഒമ്പതു ദിവസം കൊണ്ടാണ് ഈ സിനിമ ചിത്രീകരിച്ചിരിക്കുന്നത്.

To Kill a Mockingbird 1962 ൽ പുറത്തിറങ്ങിയ ഒരു ബ്ലാക്ക് ആൻഡ് വൈറ്റ് ലീഗൽ ഡ്രാമയാണ്. ഇന്നും ഏറ്റവും മികച്ച നൂറ് സിനിമകളുടെ ലിസ്റ്റിൽ ഈ ചിത്രമുണ്ട്. ഈ ചിത്രത്തെ പല രാജ്യങ്ങളും അവരുടെ രജിസ്ട്രിയിൽ അടയാളപ്പെടുത്തിയിട്ടുണ്ട്.

ഈ ചിത്രങ്ങൾ ഒക്കെ കണ്ട് കിളി പോയിരിക്കുന്നതു കൊണ്ടാവാം നേര് നമുക്ക് രുചിക്കാഞ്ഞത്.

നേര് ഒരു മോശം സിനിമയൊന്നുമല്ല. എന്നാൽ തള്ളി മറിക്കുന്നതിൽ വലിയ കഥയില്ല. ഈ വർഷം ഇറങ്ങിയ 99 % ചിത്രങ്ങളും പരാജയപ്പെട്ടപ്പോൾ ആശ്വാസമായത് ഇതു പോലെ മൂന്നാല് സിനിമകളാണ്.

ആ അർത്ഥത്തിൽ നേരിനെ ലളിതമായി വിശദീകരിച്ചാൽ - നല്ല അരി കിട്ടാത്ത സ്ഥലത്ത് റേഷനരി രാജാവ്. -

30/05/2023

CALIPHATE
Swedish Thriller Drama.

ഒരോ നിമിഷവും ഭയം വേട്ടയാടുന്ന മനസ്സുമായി മാത്രമേ " ഖാലിഫേറ്റ് " കണ്ടു തീർക്കാൻ കഴിയുകയുള്ളൂ. അത് വെറും കഥമാത്രമല്ല ..... ചരിത്രത്തിന്റെ അംശം കൂടി ചേരുന്നതാണെന്നറിയുമ്പോൾ പ്രത്യേകിച്ചും ,

സാധാരണ ഒരു സീരീസോ, സിനിമയോ ഒക്കെ കാണുമ്പോൾ അതിന്റെ ഷോട്ടുകൾ - ആംഗിളുകൾ - കളർ ഗ്രേഡിംങ്ങ് ഒക്കെ ശ്രദ്ധിക്കാൻ ഞാൻ ശ്രമിക്കാറുണ്ട്. " ഖാലി ഫേറ്റിന്റെ കാര്യത്തിൽ അതെല്ലാം അപ്രസക്തമാണ്. പൂർണ്ണമായും ആ കഥ പറച്ചിലിന്റെ ഉള്ളിൽ നിന്ന് പുറത്തു കടക്കാൻ കഴിയില്ല. എപ്പോഴും ലൈവ് ഫീലാണ് നമുക്കു കിട്ടുന്നത്. അടുത്ത നിമിഷം എന്തും സംഭവിക്കാം . ഒരു ഹൊറർ ചിത്രത്തോടുള്ള ഭയമല്ല റിയാലിറ്റിയോടുള്ള ഭയം. അത് നമുക്കു ചുറ്റും നിലനിൽക്കുന്നതാണ്.

സിറിയയിലെ ISIS ഭരണത്തിൻ കീഴിലുള്ള Raqqa എന്ന നഗരത്തിൽ ജീവിക്കുന്ന പർവീൺ എന്ന യുവതിയുടെ ജീവിതത്തിൽ നിന്നാണ് ഖാലി ഫേറ്റ് " ആരംഭിക്കുന്നത്. സ്വീഡനിൽ ജീവിച്ചിരുന്ന അവൾ ഭർത്താവായ "ഹുസാം " മിനൊപ്പം ഇസ്ലാമിക് സ്റ്റേറ്റ് ഭരിക്കുന്ന സിറിയയിൽ എത്തി ചേർന്നത് "ജിഹാദിൽ " പങ്കെടുക്കാനായിരുന്നു. എന്നാൽ സ്വപ്ന തുല്യമായ ഭൂമിക അവർ വിചാരിച്ചതു പോലെയായിരുന്നില്ല. ഒരു മകളുടെ ജനനത്തിനു ശേഷം എങ്ങിനെയും അവിടെ നിന്നും രക്ഷപ്പെട്ട് തിരികെ സ്വീഡനിൽ എത്തിച്ചേരണം എന്ന് പർവീൺ അതിയായി ആഗ്രഹിച്ചിരുന്നു. മതം തലക്ക് പിടിച്ച ഭർത്താവ് ഹുസാമിനും ചിലപ്പോഴൊക്കെ അടി പതറിയിരുന്നു. മുഖം മൂടുന്ന വസ്ത്രം ധരിച്ചായിരുന്നു സ്ത്രീകൾ പുറത്തിറങ്ങിയിരുന്നത്. അതും ഭർത്താവിനൊപ്പമോ ബന്ധുവായ പുരുഷനൊപ്പമോ മാത്രം. നഗരത്തിൽ ആയുധധാരികളായ ഇസ്ലാമിക് സ്റ്റേറ്റ് പോരാളികൾ റോന്തുചുറ്റിയിരുന്നു. ഇടക്കിടെ പൊട്ടുന്ന വെടിയൊച്ചകൾ, ബോംബു സ്ഫോടനങ്ങൾ .... ജിഹാദികളുടെ തക്ബീറുകൾ ....

അങ്ങിനെ എല്ലാ വഴികളും അടഞ്ഞ പർവീണിന്റെ മുന്നിലേക്ക് പൊടുന്നനെ ഒരു വാതിൽ തുറക്കുന്നു. തന്റെ അയൽവാസിയായ ഒരു സ്ത്രീ രഹസ്യമായി സൂക്ഷിച്ച മൊബൈൽ ഫോൺ ഒരു പ്രത്യേക സാഹചര്യത്തിൽ പർവീണിന്റെ കൈകളിൽ എത്തിച്ചേരുന്നു. ആ സ്ത്രീ സ്വീഡനു വേണ്ടി ചാരപണി നടത്തിക്കൊണ്ടിരിക്കുകയായിരുന്നു. അവൾക്കും സ്വീഡനിലേക്ക് പോകണമായിരുന്നു. എന്നാൽ ജിഹാദികളാൽ പിടിക്കപ്പെടുമ്പോൾ ഫോൺ പർവീണിനെ ഏൽപിച്ച് കീഴടങ്ങാൻ മാത്രമേ അവർക്കു കഴിയുമായിരുന്നുള്ളൂ. തുടർന്ന് പർവീൺ അവിടെ നിന്നും രക്ഷപെടാനായി നടത്തുന്ന ശ്രമങ്ങളാണ് സീരീസിന്റെ ഒരു ഭാഗം. അവൾ റേപ്പു ചെയ്യപ്പെടുന്നുണ്ട്. അവൾക്ക് ഒരാളെ കൊല്ലേണ്ടി വരുന്നുണ്ട്. പർവീണായി അഭിനയിച്ച നടിയുടെ പെർഫോമൻസ് - അന്യായം എന്നാണ് പറയേണ്ടത്. നിസ്സഹായമായ കരച്ചിൽ എന്നൊക്കെ പറഞ്ഞാൽ .... അതൊന്നും എഴുതി വിവരിക്കാൻ കഴിയില്ല.

കഥയുടെ മറ്റൊരു ഭാഗം നടക്കുന്നത് സ്വീഡനിലാണ്. സ്വീഡനിലെ രാജ്യ സുരക്ഷാ വിഭാഗത്തിലെ ഓഫീസറായ ഫാത്തിമയാണ് പർവീണുമായി ഫോണിൽ കോൺടാക്റ്റ് ചെയ്യുന്നത്. ഒരു ഗതിയും പരഗതിയുമില്ലാത്ത പർവീണിനോട് സ്വീഡന് വേണ്ടി ചാര പണി ചെയ്യാനാണ് അവർ ആവശ്യപ്പെടുന്നത്. ഇസ്ലാമിക സ്റ്റേറ്റ് അടുത്തു തന്നെ സ്വീഡനിൽ ഒരു സ്ഫോടന പരമ്പര പ്ലാൻ ചെയ്യുന്നുണ്ടെന്ന് പർവീൺ -ഫാത്തിമയെ അറിയിക്കുന്നു. അതിനു നിയോഗിക്കപ്പെട്ട ആളിന്റെ പേര് - മുസാഫിർ - എന്നാണന്നും അവൾ വിവരം കൊടുക്കുന്നു. ആരാണ് മുസാഫിർ എന്ന് തുടർന്ന് ഫാത്തിമ അന്വേക്ഷിക്കുന്നു. ഓരോരോ കണ്ണികളായി കുരുക്കഴിച്ച് ചെല്ലുമ്പോൾ പിന്നെയും കുരുക്കുകൾ ...

ഇതേ സമയം മുസാഫിർ " എന്ന രഹസ്യ നാമമുള്ള "ഇബ്ബ " എന്ന ജിഹാദി സ്വീഡനിൽ ഒരു സ്കൂളിൽ അധ്യാപകനായി ജോലി ചെയ്യുകയായിരുന്നു. ആർക്കും പിടി കൊടുക്കാതെ . അയാൾ ആന്റി ടെററിസ്റ്റ് യോഗങ്ങളിൽ വരെ പങ്കെടുക്കുകയും അങ്ങേയറ്റം മാന്യനായി ജീവിക്കുകയും ചെയ്തു പോന്നു. അതേ സ്കൂളിൽ വച്ചാണ് അയാൾ "സുല്ലേ " എന്ന വിദ്യാർത്ഥിനിയേയും അവളുടെ കൂട്ടുകാരി " കെരിമയെയും പരിചയപ്പെടുത്തുന്നത് .

" സുല്ലേ " സ്വീഡനിലെ അത്ര മതബോധം ഒന്നും തലക്കു പിടിക്കാത്ത മുസ്ലീം കുടുംബത്തിലെ അംഗമാണ്. അമ്മയും അച്ഛനും അനിയത്തിയും അടങ്ങുന്ന കുടുംബം. അവിടെയാരും തലയിൽ തട്ടം പോലും ഇടാതെയാണ് ജീവിച്ചിരുന്നത്. അവളുടെ പിതാവ് ഒരിക്കൽ ടി വി യിൽ എന്തോ പൊളിറ്റിക്കൽ ന്യൂസ് കണ്ടു കൊണ്ടിരുന്നപ്പോൾ വീട്ടിൽ പൊളിറ്റിക്സ് വേണ്ട എന്നു പറഞ്ഞ് ടി വി ഓഫ് ചെയ്ത അതേ മകൾ അച്ഛന്റെ മുഖത്തു നോക്കി പറയുകയാണ് " നിങ്ങൾ ഒരു കാഫിറാണ് "
ജിഹാദിയായ ഇബ്ബയായിരുന്നു അതിനു പിന്നിൽ. അയാൾ അവളെ ബ്രയിൻ വാഷ് ചെയ്യുകയും - നിരവധി ജിഹാദി ലിങ്കുകൾ ഓൺ ലൈനിൽ അയച്ചു കൊടുക്കുകയും ചെയ്യുന്നു.

കെരിമ എന്ന പെൺകുട്ടിയുടെ പിതാവ് ഒരു തികഞ്ഞ മദ്യപാനിയായിരുന്നു. പിതാവിന്റെ ഉപദ്രവം സഹിക്കവയ്യാതെ നിന്ന കെരിമയുടെ ജീവിതത്തിലേക്ക് രക്ഷകനായി അവതാരം എടുത്ത് ഇബ്ബ എത്തുന്നതോടെ ഗെയിം മാറുന്നു.

കഥ മാറി മറിഞ്ഞ് ഈ രണ്ടു പെൺകുട്ടികളും ജിഹാദ് സ്വപ്നം കണ്ട് സിറിയയിലെ സ്വപ്ന ഭൂമീയിലേക്ക് പോകാനായി തയ്യാറാകുന്നു. ആ യാത്രയിൽ "സുല്ലേ ക്ക് അപ്രതീക്ഷിതമായ ഒരനുഭവം കൂടി ഉണ്ടാകുന്നു.

Whilhem Behrman രചനയും ക്രിയേഷനും നിർവ്വഹിച്ച " ഖാലിഫേറ്റ് : സംവിധാനം ചെയ്തിരിക്കുന്നത് Goran Kapetanovic ആണ്. സ്വീഡനിൽ ഏറ്റവും കൂടുതൽ ആളുകൾ കണ്ട സീരീസാണ് ഖാലിഫേറ്റ്.
8 എപിസോഡുള്ള ഖാലിഫേറ്റ് നെറ്റ് ഫ്ലിക്സിൽ കാണാൻ കഴിയും -

ജിഹാദി താവളത്തിൽപ്പെട്ടു പോയിട്ടും, നരകത്തിലാണ് താൻ അകപ്പെട്ടതെന്നറിഞ്ഞിട്ടും - തിരിച്ച് പോകാൻ അവസരം കിട്ടിയിട്ടും - താൻ വരുന്നില്ല. - ഇതാണ് എന്റെ വിശുദ്ധ ഭൂമി എന്നൊരു പെൺകുട്ടി പറയുന്നുണ്ട്. തീവ്ര മതത്തിന്റെ സോഫ്റ്റ് വയർ എങ്ങിനെയാണ് വർക്ക് ചെയ്യുന്നതെന്ന് അപ്പോഴാണ് നാം തിരിച്ചറിയുക. -

2015 ൽ Bethnal Green trio എന്ന സംഭവമാണ് സീരീസിന് ആധാരമായത്. ലണ്ടനിൽ നിന്നും മൂന്ന് പെൺകുട്ടികൾ ഇസ്ലാമിക് സ്റ്റേറ്റിൽ ജിഹാദിനായി പുറപ്പെട്ടത് .western രാജ്യങ്ങളിൽ നിന്ന് 550 സ്ത്രീകൾ ജിഹാദിനായി പോയിട്ടുണ്ടെന്ന് അന്വേക്ഷണ ഏജൻസികൾ കണ്ടെത്തുകയുണ്ടായി.

21/04/2023

Salo,or the 120 Days of Sodom.(1975)

1875 ൽ Marqis de Sade എഴുതിയ 120 Days of s***m എന്ന നോവലിന്റെ വളരെ അയഞ്ഞ ഒരു പ്രമേയമാണ് ചിത്രത്തിനായി സംവിധായകൻ Pier Paolo Pasolini തിരഞ്ഞെടുത്തിരിക്കുന്നത്.

പസ്റ്റോളിനി എന്ന സംവിധായകന്റെ അവസാന ചിത്രമായിരുന്നു സാലോ,
ചിത്രം ഇറങ്ങുന്നതിന് മൂന്നാഴ്ച്ച മുമ്പ് അദ്ദേഹം വധിക്കപ്പെട്ടു.

രണ്ടാം ലോക മഹായുദ്ധകാലത്തേക്ക് കഥയെ പറിച്ചു നടുകയാണ് പസ്റ്റോളിനി ചെയ്തത്. ഫാസിസ്റ്റ് ഇറ്റലിയിലാണ് കഥ നടക്കുന്നത്. ഡ്യൂക്കും, പ്രസിഡന്റും, ജഡ്ജിയും, ബിഷപ്പും അധികാരത്തിന്റെ മധുരം ആവോളം നുണയുകയും - അവർക്കിടയിൽ അന്തർലീനമായ ഒരു ബന്ധം ഉണ്ടാവുകയും - അവരുടെ പെൺ മക്കളെ പരസ്പരം വിവാഹം കഴിക്കുകയും ചെയ്യുന്നു.

രാജ്യത്ത് നിന്ന് തിരഞ്ഞെടുക്കുന്ന 18 കൗമാരക്കാരേയും ഏതാനും വേശ്യകളെയും അവർ ഒരു തടങ്കൽ പാളയത്തിൽ പാർപ്പിക്കുന്നു. 9 യുവതികളും 9 യുവാക്കളും അവരിൽ ഉണ്ടായിരുന്നു. 120 ദിവസങ്ങൾ അവർ അവിടെ വിവിധ പീഢനങ്ങൾക്ക് വിധേയരാവുന്നു.

"ദാന്തെയുടെ " Divine comedy യിൽ നിന്നും പ്രചോദനം ഉൾക്കൊണ്ട് ചിത്രത്തെ നാലു ഭാഗങ്ങളായി വിഭജിച്ചിരിക്കുന്നു.
The Anteinferno,The circle of Manias,The circle of sh*t,And the Circle of murder

അടിമകളെ പോലെ തിരഞ്ഞെടുക്കപ്പെട്ട യുവതീ യുവാക്കൾ സമാനതകളില്ലാത്ത ശാരീരികവും മാനസികവുമായ പീഢനങ്ങൾക്ക് വിധേയമാകുന്നു. സാഡിസം, ലൈംഗീകം, ദണ്ഡനമുറകൾ.... അവസാനം കൊലപാതകം.

മനുഷ്യമലം തീറ്റിക്കുന്ന അങ്ങേയറ്റം ക്രൂരവും പൈശാചികവുമായ സീനുകൾ വരെ ചിത്രത്തിലുണ്ട്. നഗ്നതയുടെ കുത്തൊഴുക്ക് യാതൊരു മറയുമില്ലാതെ ചിത്രത്തിൽ തുടക്കം മുതൽ അവസാനം വരെയുണ്ട്.

രാഷ്ട്രീയ അഴിമതി, നിഹിലിസം, മൊറാലിറ്റി, ഫാസിസം എന്നിവയാണ് ചിത്രത്തിന്റെ ഉള്ളിൽ പറയുന്ന ആശയങ്ങൾ. ഫ്രെഡറിക് നീഷേയുടെ 1887 ലെ Onthe Genealogy of Morality എന്ന പുസ്തകത്തിലെ ഉദ്ധരണികളെ കുറിച്ചൊക്കെ ചിത്രത്തിൽ പരാമർശമുണ്ട്.

റിലീസ് ചെയ്ത് ഏതാനും ആഴ്ച്ചകൾക്കുള്ളിൽ ലോകമെമ്പാടും നിരോധിച്ച ചിത്രം കുടിയാണ് സാലോ -

മനുഷത്വരഹിതമയായ ഹീനവും നിന്ദ്യവുമായ പീഢനങ്ങളുടെ തുറന്ന അദ്ധ്യായമാണ് സാലോ -

Ennio Morricone ആണ് ചിത്രത്തിന്റെ സംഗീത സംവിധാനം നിർവ്വഹിച്ചിരിക്കുന്നത്.

🔵🟣🔵🟣🔵🟣🔵🟣🔵🟣🔵🟣🔵🟣🔵

19/03/2023

Better call Saul.

ബ്രേക്കിംങ്ങ് ബാഡിനു ശേഷം ലോക സീരീസ് ചരിത്രത്തെ ബെറ്റർ കോൾ സോളിനു മുൻപെന്നും ശേഷമെന്നും രണ്ടായി തിരിക്കാം ,

ബ്രേക്കിംങ്ങ് ബാഡിന്റെ prequel എന്നും sequel എന്നും ബെറ്റർ കോൾ സോളിനെ വിളിക്കാം.

എന്താണ് അതിന് മറ്റു സീരിസുകളിൽ നിന്നുള്ള വ്യത്യാസം ....?

1. ഏറ്റവും മികച്ച രചന
2. കഥാപാത്രങ്ങളിലെ വ്യതിരക്തതയും, സൂഷ്മതയും .
3. ഏറ്റവും മികച്ച വിഷ്വൽ സ്റ്റോറി ടെല്ലിംങ്ങ് രീതി.
4. ക്ലാസിക്കൽ ഛായാഗ്രാഹണം, ലൈറ്റിംങ്ങ്
5. കഥയുമായി ഇണങ്ങിച്ചേരുന്ന എഡിറ്റിംങ്ങ് .

ഏറ്റവും നന്നായി കൃത്യമായി പണിതുയർത്തിയ ഒരു നഗരം പോലെയാണ് ബെറ്റർ കോൾ സോൾ . ബ്ലു പ്രിന്റ് പോലെ ഭദ്രമായ സ്ക്രിപ്റ്റാണ് അതിന്റെ അടിത്തറ.

BCS (Better call Saul) ന്റെ ജോണർ 5 രീതിയിൽ വിശേഷിപ്പിക്കപ്പെടുന്നുണ്ട്.
1. Crime Drama
2. Leagal Drama
3. Black Comedy
4. Tragedy
5. Neo-noir

Vines Gilligan ഉം Peter Gould ഉം ചേർന്നാണ് BC S അണിയിച്ചൊരുക്കിയിരിക്കുന്നത്. 6 സീസണുകളിലായി , 63 എ പി സോഡുകളിലായി 3 കാലഘട്ടത്തിന്റെ കഥയാണ് BCS പറയുന്നത്. ജിമ്മി മഗ് ഗിൽ എന്ന വക്കീൽ സോൾ ഗുഡ് മാൻ എന്ന ക്രിമിനൽ ലോയറായി മാറി തീരുന്നതും - ബ്രേക്കിംങ്ങ് ബാഡിലെ വാൾട്ടർ വൈറ്റിനും ജസി പിങ്ക് മാനും വേണ്ടപ്പെട്ട ആളാകുന്നതും , അതിനു ശേഷം അയാൾ ഒരു ക്രിമിനലായി മാറുന്നതും അയാളുടെ പതനവുമാണ് സീരീസിന്റെ മുഖ്യ കഥാ തന്തു.

25 പേരോളം സംവിധാന മേഖലയിൽ പ്രവൃത്തി ച്ചിച്ചിട്ടുണ്ട്. Vince Gilligan ഉം Peter Gould ഉം ഉൾപ്പടെ കിം വെക്സ്ലറെ അവതരിപ്പിച്ച Reha seehorn ഉം മുഖ്യ വില്ലനായ ഗുസ്താവോയെ അവതരിപ്പിച്ച Giancarlo Esposito യും വരെ ചില എപിസോഡുകൾ സംവിധാനം ചെയ്തവരിലുണ്ട്.

ഛായാഗ്രാഹണം നിർവ്വഹിച്ചിരിക്കുന്നത് 4 പേരാണ്.
1.Arthur Albert
2.Marshall Adoms
3.Poal Donachie

എഡിറ്റിംങ്ങിൽ 4 പേരുണ്ട്.

1. Kelley Dixon
2. Skip MacDonald
3. Chris McCaleb
4. Curtis Thuber

Wide Angle shot കൾ സീരീസിന്റെ മനോഹാരിതയെ അതിന്റെ മൂർദ്ധന്യത്തിൽ പ്രതിഷ്ഠിച്ചിരിക്കുന്നു. രാത്രി ചിത്രീകരണങ്ങളിൽ നാച്ചുറൽ ലൈറ്റിംങ്ങിന്റെ രീതി പ്രത്യേകം പരാമർശിക്കേണ്ട വസ്തുതയാണ്. പലപ്പോഴും ക്യാമറ തന്നെ ഏറ്റവും ഡേഞ്ചർ സോണിലായിരിക്കും - ഫ്രിഡ്ജിന്റെ ഉള്ളിൽ നിന്ന് , കത്തുന്ന തീ വീപ്പയുടെ ഉള്ളിൽ നിന്ന് , വേസ്റ്റ് ബാസ്ക്കറ്റിനുള്ളിൽ നിന്ന് .....
കഥ പറയാനായി ക്യാമറയെ ഉപയോഗിക്കുന്നതിന്റെ ഉത്തമ ഉദാഹരണമാണ് ഓരോ ഷോട്ടും .....

മുഖ്യ കഥാപാത്ര സൃഷ്ടിയും പ്രത്യേകതകളും -

1.Chuck McGill.
(Michael McKean.)

BCS ലെ ഏറ്റവും മികച്ച കഥാപാത്രങ്ങളിലൊന്നായി വ്യക്തിപരമായി എനിക്ക് തോന്നിയത്. ചാൾസ് മക്ഗിൽ ആണ്. കേന്ദ്ര കഥാപാത്രമായ ജിമ്മി മഗ് ഗില്ലിന്റെ മുത്തസഹോദരനാണ് ചക്.
എഴുത്തുകാരന് മുകളിൽ പോയ കഥാപാത്രമാണ് ചക്. കാരണം അയാൾ ഉള്ളു കൊണ്ട് എന്തെന്ന് പ്രേക്ഷകനോ എഴുത്തുകാരനോ അറിയില്ല. അയാൾ സഹോദരനെ ഇഷ്ടപ്പെടുന്നുണ്ട് എന്നാ വർത്തിച്ചു പറയുമ്പോഴും അവൻ തന്റെയൊപ്പം അല്ലെന്ന് സ്ഥാപിക്കാൻ കൂടി ശ്രമിക്കുന്നുണ്ട്. ഇലക്ട്രിക്കൽ ഡി വൈസിസിനോടുള്ള തന്റെ അകാരണമായ ഭീതിയെ മാനസിക രോഗമാണെന്ന് അംഗീകരിക്കാൻ പോലും അയാൾ തയ്യാറല്ല. അതിനിയും വൈദ്യശാസ്ത്രം കണ്ടുപിടിക്കേണ്ട ഒന്നായാണ് ചക് വിലയിരുത്തുന്നത്. ജിമ്മിയെ യഥാർത്ഥത്തിൽ തിരിച്ചറിഞ്ഞ ഒരാൾ താൻ മാത്രമാണെന്ന് ചക് പറയുന്നുണ്ട്. അമ്മയുടെ മരണ കിടക്കയിൽ അവസാന നിമിഷം വരെയും ചക് കാത്തിരിക്കുമ്പോൾ , ജിമ്മി ഭക്ഷണം കഴിക്കാൻ പോയിരിക്കുകയായിരുന്നു. ഒരു നിമിഷം ബോധം തെളിഞ്ഞ അമ്മ അന്വേക്ഷിക്കുന്നത് നാണക്കേട് വരുത്തിവയ്ക്കുന്ന ഇളയ മകനായ ജിമ്മിയെയാണ്. ആ ഷോക്ക് ചക്കിന്റെ മുഖത്ത് നമുക്ക് കാണാം.

കോടതിയിൽ വച്ച് ചക് പൊട്ടിത്തെറിച്ച് അയാൾ സ്വയം അനാവൃതമാകുന്നുണ്ട്.

ആത്മഹൂതിയിലേക്ക് അയാൾ എത്തിച്ചേരുമ്പോഴും ആർക്കും പിടി കൊടുക്കാതെ ചാൾസ് മക് ഗിൽ വേറിട്ടു നിൽക്കുന്നു. Michael McKean ന്റെ ചക്കായുള്ള പരകായ പ്രവേശം ആ കഥാപാത്രത്തെ അനശ്വരമാക്കിയിരിക്കുന്നു.

2.Mike Ehramantraout.
(Jonathan Banks)

ഗ്രേ ഷെയ്‌ഡിൽ നിന്നും ബ്ലാക്കിലേക്കുള്ള തുടക്കത്തിലാണ് മൈക്കിനെ BCS ൽ നാം കാണുന്നത്. മകന്റെ മരന്നത്തിന് താനും കൂടി കാരണക്കാരനാണല്ലോ എന്ന ദു:ഖത്തിലാണയാൾ, എന്നാൽ അതിന് പ്രതികാരം തീർത്തതിൽ സന്തോഷ വാനുമാണ്. പാർക്കിംങ്ങ് ഗേറ്റിലെ കാവൽക്കാരനിൽ നിന്ന് പണം ഉണ്ടാക്കണം എന്ന ചിന്ത അയാളിലേക്ക് വരുന്നത് , തന്റെ മകന്റെ കുഞ്ഞിനും കുടുംബത്തിനും തന്നെ ആവശ്യമുണ്ടെന്ന ബോധ്യത്തിൽ നിന്നായിരുന്നു. തുടർന്നയാൾ പണം ഉണ്ടാക്കാനായി നടത്തുന്ന പ്രകടനങ്ങൾ സാലമാങ്കകൾക്ക് എതിരേ ആയിത്തീരുകയും, അത് ഗുസ്താവോ ഫ്രീം ങ്ങിന്റെ വിശ്വസ്തനായ ബോഡി ഗാർഡിലേക്ക് എത്തിച്ചേരാൻ പ്രേരിപ്പിക്കുകയും ചെയ്യുന്നു.

വളരെ കുറച്ച് മാത്രം സംസാരിക്കുന്ന, പെർഫെക്ഷനിസ്റ്റായ , എന്നാൽ ചില തരം നൻമകളിലും വിശ്വസിക്കുന്ന ആളാണ് മൈക്ക്.
"നിങ്ങൾക്ക് പ്രിയപ്പെട്ടവർ ഇനിയുള്ള കാലം നല്ല രീതിയിൽ ജീവിക്കാനുള്ള വകയുണ്ടാക്കി കൊടുത്താൽ നിങ്ങൾ മരിച്ചാലും അതൊന്നും പ്രശ്നം ഇല്ല എന്നതാണ് മൈക്കിന്റെ തിയറി .
ജോനാതൻ ബാങ്ക്സിന്റെ അളന്നു മുറിച്ച പ്രകടനമാണ് മൈക്ക് എന്ന കഥാപാത്രത്തെ മികച്ച താക്കിയത്.

3.Kim wexler
(Rhea seehorn)

ജിമ്മിയുടെ കാമുകിയും ബസ്റ്റ് ഫ്രണ്ടുമായ കിം സ്വന്തം മനസാക്ഷി യോടൊത്ത് ജീവിക്കാൻ തീരുമാനിച്ച വ്യക്തിയാണ്. ഒരു ലോയറായപ്പോൾ മുതൽ സത്യത്തിനൊപ്പം നിന്ന് പോരാടണമെന്ന് അവൾ ആഗ്രഹിച്ചിരുന്നു. എന്നാൽ ജിമ്മിയോടൊപ്പം ചേരുന്ന തോടെ അവൾ ഒഴുക്കിൽപ്പെട്ട് പോവുകയാണ്. കുറെയൊക്കെ അവൾ തമാശയായി കാര്യങ്ങളെ കണ്ടു. പലതിലും അവൾ സന്തോഷിക്കുന്നുണ്ടായിരുന്നു. എന്നാൽ ജിമ്മിയെ സംബന്ധിച്ച് അവൾക്ക് എല്ലായ്പോഴും ഭയമുണ്ടായിരുന്നു.
അങ്ങിനെയാണ് അവർ വിവാഹിതരാകുന്നത്. വിവാഹ മോചനം നേടുന്നതും അതിനായാണ്.

വിവാഹ മോചന പേപ്പറുകൾ ജിമ്മിയിൽ നിന്നും ഒപ്പിട്ടു വാങ്ങിയ ആ മഴയുള്ള രാത്രിയിലാണ്. പുറത്തു കാത്തു നിന്ന ജെസി പിങ്ക് മാൻ അവളോട് ചോദിക്കുന്നുണ്ട് -
"ഈ സോൾ ആളെങ്ങനെ ... നല്ലയാളാണോ ?
എനിക്കറിയാവുന്ന കാലത്ത് അയാൾ നല്ലവനായിരുന്നു എന്നാണ് കിം മറുപടി പറയുന്നത്.

അവസാന എപിസോഡിൽ ജിമ്മിയെ കാണാൻ ജയിലിൽ എത്തുന്ന കിം സിഗരറ്റ് കത്തിച്ച് ഇരുവരും വലിച്ചു കൊണ്ട് നിൽക്കുന്ന സീൻ - അത് ആദ്യ എപിസോഡിലെ ഒരു സീനിന്റെ ഓർമ്മകളെ ഉണർത്തുന്നു.
ജിമ്മിക്ക് തന്റെ സത്യവും ബോധ്യപ്പെടുത്തേണ്ടത് കിമ്മിനെ മാത്രമായിരുന്നു.

Reha seehorn ന്റെ അന്യായമായ പെർഫോമൻസാണ് കിമ്മിനെ പ്രേക്ഷകർക്ക് പ്രിയങ്കരിയാക്കിയത്.

4.Howard Hamlin
(Patrick Fabian)

തെറ്റായ സ്ഥലത്ത് തെറ്റായ സമയത്ത് കയറി വന്നയാളാണ് ഹോവാർഡ്.HHM ലെ ഒരു പാർട്ണർ . ചകിന്റെ മരണത്തിന് താൻ ഉത്തരവാദിയാണന്നയാൾ കരുതി. ഒരു കളിയിലും അയാൾ ഇല്ലായിരുന്നു. എങ്കിലും അയാൾക്ക് കളിയുടെ ഭാഗമാകേണ്ടി വന്നു.

5.Nacho Vargo.
(Michael Mando)

എടുത്തു ചാട്ടക്കാരനായ നാച്ചോ വാർഗ . തുടക്കം മുതൽ അയാൾക്ക് പിഴച്ചു. കളിയിൽ നിന്നും ഊരി പോകാനാവാതെ അയാൾ ചൂണ്ട കൊളുത്തു പോലെ ഉടക്കി പോയി. പ്രാണനെ കൊടുത്താണ് ആ കടം വീട്ടേണ്ടി വന്നത്.

6. Gus fring
(Giancarlo Esposito)

ബ്രേക്കിംങ്ങ് ബാഡിലൂടെ തന്നെ ഗുസ്താവോ പ്രേക്ഷകരെ പിടിച്ചടക്കിയ വില്ലനായിരുന്നു. വ്യത്തിയും വെടിപ്പും അച്ചടക്കവുമുള്ള വില്ലൻ. ജീനിയസ് . ചെസ് കളിയിലെ പോലെ ശത്രുവിന്റെ ഏഴു നീക്കങ്ങളെ മുന്നേ കാണുന്നയാൾ. രണ്ട് തരം മുഖമുള്ള കഥാപാത്രം.

7. Lalo Salamanca
(Tony Dalton)

BCS നെ ബൂസ്റ്റ് ചെയ്തത് ലാലോ സാലമാങ്ക എന്ന കഥാപാത്രമായിരുന്നു. ചുണ്ടിൽ എപ്പോഴും വിരിയുന്ന ചിരി . ഒരു സാധാരണക്കാരൻ എന്നു തോന്നുമ്പോഴും ഉള്ളിൽ ഒരു മൃഗത്തെ ഒളിപ്പിച്ചവൻ. എപ്പോഴും ഊർജ്ജസ്വലമായ കഥാപാത്രം.
സ്ക്രീനിൽ അയാൾ വരുമ്പോൾ ചിരിച്ചു കൊണ്ടാണങ്കിലും മറ്റുള്ള കഥാപാത്രങ്ങൾ ഭയന്നാണ് നിൽക്കുന്നത്. ഫ്രീംങ്ങ് പോലും .
ലാലോ എന്ന കഥാപാത്രമില്ലായിരുന്നെങ്കിൽ BCS തീർത്തും ശോകമാകുമായിരുന്നു.

8.Jimmy McGill
(Bob Odenkrik)

അവസാനമായി ജിമ്മി, സോൾ ഗുഡ് മാൻ.
ബ്രേക്കിംങ്ങ് ബാഡിൽ അൽപം കോമഡിയുമായി വന്ന വക്കീൽ കഥാപാത്രത്തെ നിരവധി അടരുകളുള്ള ഒരു വ്യക്തിത്വമാക്കി മാറ്റിയതിന് വിൻസ് ഗില്ലിഗനും പീറ്റർ ഗുൾഡിനുമാണ് ക്രെഡിറ്റ് .

ജിമ്മിയുടെ ബാല്യം, യൗവ്വനം, തുടങ്ങി അമ്പതാം വയസ്സിലെത്തുന്ന കാലം വരെ സീരീസ് പറഞ്ഞു പോകുന്നുണ്ട്.

തട്ടിപ്പുകൾ നടത്തിയുള്ള ജീവിതത്തിൽ നിന്ന് , സ്വയം പഠിച്ച് വക്കീലാകുന്ന ജിമ്മി . അവിടെ നിന്നും മികച്ച ലോയറിലേക്ക് എത്താനുള്ള അയാളുടെ പരക്കം പാച്ചിൽ . സഹോദരന്റെ അവഗണന. കിമ്മിനോടുള്ള ആത്മബന്ധം .
അറിയാതെ പെട്ടു പോകുന്ന സംഭവ വികാസങ്ങൾ .തുടർന്ന് ശരിക്കും ക്രിമിനലായി മാറുന്ന അവസാന ഭാഗം.

ജിമ്മിയുടെ കഥാപാത്രത്തിന്റെ ഏറ്റവും വലിയ പ്രത്യേകത അയാൾ സംഭവിച്ചതിനെയോർത്ത് കൂടുതലായി വ്യാകുലപ്പെടുന്നില്ലയെന്നതാണ്. മുന്നോട്ടു പോവുക .... മുന്നോട്ടു പോവുക എന്നതു മാത്രമാണ് അയാളുടെ ഒരേയൊരു മുദ്രവാക്യം.

ബോബ് ഓഡൻ ക്രിക്കിന്റെ അഭിനയ ജീവിതത്തിലെ ഏറ്റവും മികച്ച കഥാപാത്രമാണ് സോൾ ഗുഡ്മാൻ .
------------------------------------------------

BCS വാക്കുകൾ കൊണ്ട് അധികം വിവരിക്കാൻ കഴിയാത്ത ഒരു ദൃശ്യ അനുഭവമാണ്. ഒരാൾ പുതിയതായി ചലച്ചിത്ര മേഖലയിലേക്ക് കടക്കാൻ പോവുകയാണെങ്കിൽ , നമുക്കായാളോട് പറയാം .... നിങ്ങൾ ബെറ്റർ കോൾ സോൾ കണ്ടു നോക്കൂ ....

01/02/2023

Stay ( 2005)
American psychological Thriller

ട്രൈസർ റേവർ എന്ന ആർട്ടിസ്റ്റിനെ കുറിച്ച് കേട്ടിട്ടുണ്ടോ ?
ഡോ. സാം ഫോസ്റ്റർ ലൈലയാട് ചോദിച്ചു.

തീർച്ചയായും " ലൈല പറഞ്ഞു.

" അദ്ദേഹത്തിന്റെ വർക്കുകൾ ഇഷ്ടമാണോ ?
സാം വീണ്ടും ചോദിച്ചു.

" ഞാൻ കണ്ടിട്ടില്ല. വേറെയാരും കണ്ടിട്ടുമില്ല ....
ലൈല ഇടക്കു നിർത്തി സാമിനെ നോക്കി.
" അദ്ദേഹം 18 മത്തെ വയസ്സിൽ , താനിനി മൂന്നു വർഷം കൂടിയേ ജീവിക്കുകയുള്ളൂ എന്ന് പറഞ്ഞിട്ട് പെയിന്റിംഗുകൾ എല്ലാം തീവച്ച് നശിപ്പിച്ചു.

സാം അതു കേട്ട് തരിച്ചിരിക്കുകയാണ്. ലൈല തുടർന്നു.
" 21ാം വയസ്സിൽ അദ്ദേഹം ന്യൂയോർക്കിൽ എത്തി ആത്മഹത്യ ചെയ്തു. തന്റെ ഇരുപത്തൊന്നാം ജൻമദിനത്തിൽ . ആത്മഹത്യാ കുറിപ്പിൽ ഇങ്ങിനെ എഴുതിയിരുന്നു - " ലക്ഷണമൊത്ത ആത്മഹത്യയെന്നത് അത്യന്തികമായ കലയാണ്.

സാം ചാടിയെഴുന്നേറ്റു. "ഹെൻറി യുടെ ഇഷ്ടപ്പെട്ട ആർട്ടിസ്റ്റ് ട്രൈസർ റേവർ ആണ്. അവനെ തടയണം.

അനേകം അടരുകളുള്ള മസ്തിഷ്ക്കത്തെ കീഴ്മേൽ മറിക്കുന്ന ദൃശ്യാനുഭവമാണ് "സ്റ്റേ " .
ചിത്രത്തിന്റെ തുടക്കം തന്നെയാണ് ഒടുക്കവും.
കുറഞ്ഞത് രണ്ട് തവണയെങ്കിലും കാഴ്ച്ച ആവശ്യപ്പെടുന്ന ചിത്രം . മാർക് ഫോസ്റ്റർ ആണ് സംവിധായകൻ. തിരക്കഥ എഴുതിയിരിക്കുന്നത് ഗെയിം ഓഫ് ത്രോൺസിലുടെ പ്രശസ്തനായ David Benioffഉം.

ഈ ചിത്രത്തിലെ ഏറ്റവും പ്രധാനപ്പെട്ട വർക്ക് എഡിറ്റിംങ്ങിലാണ്. Matt Chesse ആണ് അത് നിർവ്വഹിച്ചിരിക്കുന്നത്.

ഒരു കാർ ആക്സിഡന്റിൽ നിന്നാണ് ചിത്രം ആരംഭിക്കുന്നത്. ചിത്രം അവസാനിക്കുന്നതും അതേ കാർ ആക്സിഡന്റിലാണ്. മുഴുവൻ സമയവും നമ്മുടെ ശ്രദ്ധയെ ചിത്രം പിടിച്ചിരുത്തുന്നു. നിർവ്വചനം തീരുമാനിക്കേണ്ടത് കാഴ്ച്ചക്കാരനാണ്.

30/01/2023

The Secret in Their Eyes.(2009)

അവൻ തീവണ്ടിയുടെ ചില്ലുവാതിലിനരികിലേക്ക് ഓടി , അവന്റെ കൺമുന്നിൽ അവളുടെ രൂപം നേർത്തു നേർത്ത് ഇല്ലാതായി - പക്ഷേ ഹൃദയത്തിൽ ആ ദൃശ്യം കൂടുതൽ മിഴിവാർന്നു വന്നു. -:

ഇത്രയും എഴുതിയ ശേഷം ബന്യാമിൻ അതു മുഴുവൻ പേന കൊണ്ട് വെട്ടി. അയാൾ ഒരു നോവൽ എഴുതുകയായിരുന്നു. തന്റെ കൺമുന്നിൽ കണ്ട മുൻ കാല ജീവിതമായിരുന്നു അതിനുള്ള പ്രേരക ശക്തി . അപ്പോഴേക്കും അയാൾക്കു വയസ്സാകാൻ തുടങ്ങുന്നതിന്റെ ആദ്യ ലക്ഷണങ്ങൾ കണ്ടു തുടങ്ങിയിരുന്നു.

ബന്യാമിൻ ഒരു ജുഡീഷറി ഏജന്റ് ആയിരുന്നു. ഒരിക്കൽ ബലാത്സംഗം ചെയ്തു കൊല ചെയ്യപ്പെട്ട ലിലിയാന എന്ന സ്ത്രീയുടെ കേസിൽ അയാൾക്ക് ഇടപെടേണ്ടി വന്നു. അതാകട്ടെ അയാളുടെ പിന്നീടുള്ള ജീവിതത്തെ തന്നെ മൊത്തം ബാധിക്കുന്ന ഒന്നായി മാറി. അയാളുടെ പ്രണയവും പ്രണയ നഷ്ടവും , പ്രിയ സുഹൃത്തിന്റെ മരണവും എല്ലാം അതിനോട് ചേർന്നായിരുന്നു ഉണ്ടായിരുന്നത്.

ആദ്യം തണുപ്പൻ മട്ടിൽ തുടങ്ങുന്ന ചിത്രം - കുറച്ചു സമയത്തിനുള്ളിൽ ചൂടുപിടിക്കുന്നു.

നോൺ ലീനിയർ ശൈലി അവലംബിച്ച തിരക്കഥ , ചിത്രത്തിന്റെ സസ്പെൻസിനെ നിലനിർത്താൻ സഹായിച്ചിട്ടുണ്ട്.

പാബ്ലോ എന്ന ബന്യാമിന്റെ സുഹൃത്ത് പറയുന്ന ഒരു വാചകമുണ്ട്. " നിങ്ങൾക്ക് ജീവിതത്തിൽ നിന്ന് എല്ലാം മാറ്റാം - മുഖം , പേര്, മതം, ദൈവം ...... പക്ഷേ നിങ്ങളുടെ പാഷനെ മാറ്റാൻ ആവില്ല :

അർജന്റീനിയൻ - സ്പാനീഷ് ക്രൈം ഡ്രാമ വിഭാഗത്തിൽപ്പെട്ട ചിത്രം സംവിധാനം ചെയ്തിരിക്കുന്നത് -Juvan Jose Campanella യാണ്. മികച്ച വിദേശ ചിത്രത്തിനുള്ള ഓസ്കർ പുരസ്കാരം ചിത്രം കരസ്ഥമാക്കിയിട്ടുണ്ട്.

കവിത പോലെ മനോഹരമായ ഒരു സിനിമയെന്ന് ഇതിനെ വിശേഷിപ്പിക്കാം -

29/01/2023

Memories of Murder(2003)

മഴയുള്ള രാത്രി - ചുവപ്പ് -
"തെറുങ്ങ് ജില്ലയിൽ നിന്നും ഏകാന്തനായ ഒരാൾ ആവശ്യപെടുന്ന ഗാനം " - സാഡ് ലെറ്റർ "
ഇരുട്ടിൽ നിന്നും അവൻ പുറത്തേക്കു വരികയാണ്. തന്റെ ഇരകളെയും തേടി .

വളരെ കുറച്ചു കൊറിയൻ ചിത്രങ്ങളേ ഞാൻ കണ്ടിട്ടുള്ളൂ. മെമ്മറീസ് ഓഫ് മർഡർ " കാണാതെ ഞാൻ മാറ്റിവച്ച ചിത്രമാണ്. ഒരു പക്ഷേ ഏറ്റവും കൂടുതൽ ആളുകൾ കണ്ട കൊറിയൻ ചിത്രങ്ങളിൽ ഒന്നായിരിക്കും ഇത്.

കൾട്ട് ക്ലാസിക് എന്നു വിശേഷിപ്പിക്കാവുന്ന ചിത്രമാണ് മെമ്മറീസ് ഓഫ് മർഡർ .

ഓപ്പണിംങ്ങ് സീൻ മുതൽ - ടെയിൽ എൻഡ് വരെയും ചിത്രം ഓരോ സിനിമ പ്രേക്ഷകരെയും അതിനുള്ളിൽ തളച്ചിടുന്നു.

ഒരു സൈക്കോ കില്ലറെ തേടിയുള്ള ഡിക്റ്ററ്റീവുകളുടെ അന്വേക്ഷണമാണ് ചിത്രത്തിന്റെ കഥാസാരമെങ്കിലും, അത് എല്ലാത്തരം വാർപ്പ് മാതൃകകളെയും നിരാകരിക്കുന്നു.

1986-ൽ തുടങ്ങി - 1991 വരെ നീളുന്ന കാലഘട്ടമാണ് സിനിമ പറയുന്നത്. ടെയിൽ എൻഡ് വരുന്നതാകട്ടെ 2003 ലും .

കൊറിയയിലെ യുദ്ധകാലഘട്ടത്തിലാണ് കഥ നടക്കുന്നത്. ആഭ്യന്തര കലാപങ്ങളും , പ്രക്ഷോഭങ്ങളും നിരന്തരം സംഘർഷം വിതക്കുന്ന ഭൂമികയിൽ , പോലീസ് തീർത്തും നിർവ്വീര്യമായിരുന്നു.

ആദ്യത്തെ രണ്ട് കൊലപാതങ്ങൾ നടക്കുമ്പോൾ ഡിക്റ്ററ്റീവ് പാർക്ക് - ഡു - ഹോ തന്റെ പ്രാഥമിക നിരീക്ഷണവും ശേഷം കണ്ണിൽ കണ്ടതും മാത്രമായിരുന്നു അന്വേക്ഷണ പരിധിയിൽ ഉൾപ്പെടുത്തിയിരുന്നത്. മൂന്നാം മുറ ഉപയോഗിച്ചും ഭീഷണിപ്പെടുത്തിയും എങ്ങിനെയും പ്രതികളെ സൃഷടിക്കുക എന്നതായിരുന്നു അയാളുടെ ലക്ഷ്യം. - അയാൾക്ക് ചേരുന്ന സഹായിയായി - ചോ-യോങ്ങും ഒപ്പമുണ്ടായിരുന്നു.

എന്നാൽ ഡിക്റ്ററ്റീവ് -Tae-yoon ന്റെ വരവോടെ കാര്യങ്ങൾ മാറി മറിയുന്നു. ശരിക്കും രണ്ടു പെൺകുട്ടികളല്ല മൂന്നാണ് കൊല്ലപെട്ടിരിക്കുന്നതെന്ന് അയാൾ പറയുന്ന തോടു കൂടി , അതേ വരെ സ്വരുകൂട്ടിയ എല്ലാ സിദ്ധാന്തങ്ങളും അട്ടിമറിയുന്നു. തുടർന്ന് ചിത്രം ഇടുങ്ങിയ വീഥിയിൽ നിന്ന് വിശാലമായ ഒരു ഭൂമികയിലേക്ക് പ്രവേശിക്കുന്നു.

എന്നാൽ ശുഭ പര്യവസാനിയ ഒരന്ത്യം പ്രതീക്ഷിച്ചിരുന്ന പ്രേക്ഷകനെ വീണ്ടും ഭീതിയിൽ നിർത്തിയാണ് ചിത്രം അവസാനിക്കുന്നത്. ഡിക്റ്ററ്റീവ് - പാർക്ക് ഡു ഹോയുടെ കണ്ണുകൾ 4th wall Break ചെയ്ത് പ്രേക്ഷകരിലേക്ക് എത്തുമ്പോൾ - അവിടം മുതൽ പ്രേക്ഷകനിൽ മറ്റൊരു ചിത്രം ആരംഭിക്കുകയാണ്.

ബോംങ്ങ് - ജൂൻ - ഹോ യാണ് ചിത്രത്തിന്റെ സംവിധായകൻ. ഷിം സങ്ങ് ബോയൊടൊപ്പം അദ്ദേഹവും തിരകഥാ രചനയിൽ പങ്കാളിയായിട്ടുണ്ട്. കൊറിയയിൽ നടന്ന ഒരു കൊലപാതക പരമ്പര ചിത്രത്തെ സ്വാധീനിച്ചിട്ടുണ്ട്. കിംങ് കാങ്ങ് - റിംസിന്റെ നാടകമായ come to see me" യിൽ പ്രചോദനം ഉൾക്കൊണ്ടാണ് തിരക്കഥ വികസിപ്പിരിക്കുന്നത്. ബോങ്ങ് - ജൂനിന്റെ സംവിധായക പ്രതിഭ നിറഞ്ഞു നിൽക്കുന്ന ചിത്രമാണ് മെമ്മറീസ് ഓഫ് മർഡർ "

ചിത്രത്തിന്റെ കളർ ടോൺ എടുത്തു പറയേണ്ട ഘടകമാണ്. മൂടൽ നിറഞ്ഞ പകലുകൾ, മങ്ങിയ നിലാവുള്ള രാത്രികൾ - കഥയിലേക്ക് പ്രേക്ഷകനെ പിടിച്ചിരുത്താൻ കഴിയുന്ന ഒരു തീം ആയിരുന്നു അത്.
ഒപ്പം Kim heyon gu വിന്റെ ഛായാഗ്രാഹണം. അത് അന്യായമാണന്ന് പറയാതെ തരമില്ല.
എഡിറ്റിംങ്ങിൽ കിം സൺ മിൻ - ഒപ്പത്തിനൊപ്പം പ്രവർത്തിച്ചിരിക്കുന്നു. അഴുകിയ ബോഡി യിൽ നിന്നും വേകുന്ന മാംസത്തിലേക്കുള്ള മാച്ച് കട്ട് ഒക്കെ അൽപം ഞെട്ടലോടെയാണ് കാണാൻ കഴിയുക -

ഈ സിനിമയെ ഇത്രമേൽ മികച്ചതാക്കുന്നതിൽ സംഗീതം വഹിച്ച പങ്കിനെ പരാമർശിക്കാതെ പോകാനാവില്ല. ചിത്രത്തിന്റെ ഓരോ ഷോട്ടിനൊപ്പവും ആ സംഗീതം ഇഴുകി ചേർന്നിരിക്കുകയാണ്. സാധാരണ ക്രൈം ത്രില്ലർ ചിത്രങ്ങളിൽ ഉപയോഗിക്കുന്ന മലങ്കൾട്ട് മ്യൂസിക് ആയിരുന്നില്ല അത്. ജാപ്പനീസ് കമ്പോസറായ Taro Iwashio ആണ് സംഗീതത്തിന്റെ ചുക്കാൻ പിടിച്ചിരിക്കുന്നത്. ഒരു പ്രത്യേക മൂഡാണത് നൽകുന്നത്.

നായകനെന്നോ , വില്ലനെന്നോ ഉള്ള കൺസപ്റ്റിലല്ല ചിത്രം മുന്നോട്ടു പോകുന്നത്. കഥയാണ് ഇവിടെ പ്രധാന താരം. ഗ്രേ ഷേഡിലുള്ള ആളുകളാണ് എല്ലാ കഥാപാത്രങ്ങളും. മാത്രമല്ല എല്ലാ കഥാപാത്രങ്ങളുടെയും സൂഷ്മമായ വിശദാംശങ്ങളിൽ പോലും സംവിധായകൻ ശ്രദ്ധ വച്ചിട്ടുണ്ട്. വെറുതെ കയറി ഇറങ്ങി പോകുന്ന ഒരു കഥാപാത്രങ്ങളും ചിത്രത്തിലില്ല.

പ്രതിയെന്നു സംശയിക്കുന്ന ബുദ്ധിമാന്ദ്യമുള്ള ഒരു പയ്യൻ പോലീസിൽ നിന്നും രക്ഷപെടാൻ ഓടി റെയിൽവേ പാളത്തിൽ നിൽക്കുമ്പോൾ , പിന്നാലെയെത്തുന്ന ഡിക്റ്ററ്റീവ് പാർക്ക് - ഡു അവനെ തടയുന്നുണ്ട്. പക്ഷേ പെട്ടന്ന് ടെയിൻ വന്ന് പയ്യനെ ഇടിച്ച് കടന്നുപോകുമ്പോൾ തെറിക്കുന്ന രക്തം ഡിക്റ്ററ്റീവിന്റെ കൈകളിൽ വീഴുകയും, അയാളതു സ്വന്തം കുപ്പായത്തിൽ തന്നെ തുടക്കുകയും ചെയ്യുന്നു. ഈ സീൻ - കാഴ്ച്ചയുടെ കലയെ അന്വർത്ഥമാക്കുന്ന ഒന്നായിരുന്നു. അയാൾ പയ്യനെ പിടിക്കാനല്ല പുറപ്പെട്ടത്. നേരത്തെ പറഞ്ഞ ഒരു മൊഴി ഒന്നുകൂടി വ്യക്തമാക്കാനാണ് പോയത്. പയ്യൻ മരിക്കണം എന്ന് അയാൾക്കില്ലായിരുന്നു. എന്നാൽ അതു സംഭവിച്ചു. പക്ഷേ കൈയ്യിലെ രക്തകറ എവിടെ കളയും, അതു കുപ്പായത്തിലാണ് കഴുകേണ്ടത് - അധികാരം അയാളെ സംരക്ഷിക്കാൻ പാകത്തിന് കുപ്പായം ആ രക്തത്തെ ഏറ്റെടുക്കും.

Address

Website

facebook.com

Alerts

Be the first to know and let us send you an email when Dutch Angle posts news and promotions. Your email address will not be used for any other purpose, and you can unsubscribe at any time.

Shortcuts

Address
Alerts
Claim ownership or report listing
Want your business to be the top-listed Media Company?

Country:

City: