19/06/2023
PIPILA KA MGA NEGOSYANTE, WANTED SA CIDG
Hugot karon ang gihimong monitoring sa Criminal Investigation and Detection Group kun CIDG Regional Field Unit 8 batok sa mga negosyante nga silang Michelle Lim Go-Chu ug sa magtiayong Lorenzo ug Jerlyn Joyce Baltonado human padayon kining gawasnon bisan nalutsan na og mga warrant of arrest sa kasong large scale estafa.
Matod ni Police Lieutenant Colonel Arwin Tadeo, ang officer-in charge sa CIDG-8 nga nadawat nila ang warrant of arrest batok sa mga suspetsado nga giluwatan ni Judge Ruben Fermin Atubar sa RTC Branch 29 sa dakbayan sa Toledo sa kasong Estafa. Walay gitugot nga pyansa ang korte alang sa temporary nga kagawasan batom sa maong mga negosyante.
Human giluwat ang warrant of arrest, dali kining gi-serve sa CIDG-8 batok sa mga subject sa ilang panimay sa Barangay District 23 sa Ormoc City niadtong Mayo 16 ning tuiga. Apan wala makita sa mga otoridad ang mga subject sa maong arrest warrant.
Taliwa sa maong resulta, nipasalig ang CIDG-8 nga wala pa makabiya sa nasud ang mga akusado sanglit nakig-alayon na sila sa Bureau of Immigration ug nakumpirmar nga anaa pa kini sa Pilipinas.
Ang CIDG-8 nanawagan karon sa publiko sa pagpahibawo gilayon kanila alang sa mga dunay ideya ug impormasyon bahin sa nahimutangan sa mga negosyante.
Giandam na sab ang nagbalor ₱1.5 million nga reward alang sa makatudlo sa mga akusado nga maggikan sa nabiktima nila nga si Kaiser Tan kinsa mipasaka og kaso ug maoy gi-utangan sa mga akusado og dakong kantidad.
report ni Radyoman Arnold Bustamante
