05/02/2022
ئێوارەی ئەمڕۆ، سەرۆک مەسعود بارزانی لە پەیوەندییەکی تەلەفۆنیدا لەگەڵ موقتەدا سەدر، رێبەری رەوتی سەدر دوایین پێشهاتە سیاسییەکانیان تاوتوێکردووە.
بارەگای بارزانی لەبارەی پەیوەندییە تەلەفۆنییەکە لە راگەیێندراوێکدا دەڵێت، "ئێوارەی رۆژی شەممە 5ـی شوباتی 2022 سەماحەتی سەید موقتەدا سەدر لەڕێی تەلەفۆنەوە پەیوەندی بە سەرۆك مەسعود بارزانییەوە كرد."
بەپێی راگەیێندراوی بارەگای بارزانی، لەو پەیوەندییە تەلەفۆنییەدا جەخت لە هاوپەیمانێتیی ستراتیژی و، بەردەوامیی هەوڵەكان بۆ خێراتركردنی پێكهێنانی حكومەتی زۆرینەی نیشتمانی كرایەوە. بۆ ئەوەی حكومەتی داهاتوو بتوانێ بە ئەركی خۆی بەرانبەر داخوازییەكانی رۆڵەكانی گەلی عێراق و پارێزگاری لە بەرژەوەندییە باڵاكان و قووڵكردنەوەی سەقامگیری و خوشگوزەرانی هەڵبستێت."
پەیوەندییە تەلەفۆنییەکە دوای تویتەکەی شەوی رابردووی موقتەدا سەدر، رێبەری رەوتی سەدر و گۆڕانکارییە سیاسییەکانی ئەمڕۆ دێت. لە تویتەکەی سەدردا هاتبوو، "ئەگەر بەربژێری پارتی دیموکراتی کوردستانی هاوپەیمانمان بۆ پۆستی سەرۆککۆماری عێراق، تەنانەت هەموو بەربژێران بۆ ئەو پۆستە مەرجەکانیان تێدا نییە، داوا لە پەرلەمانتارانی چاکساز دەکەم دەنگی پێ نەدەن، چونکە ئێمە لە خەمی چاکسازییداین و خوازیاری دەسەڵات و دەسەڵاتداری نین."
پێشنیوەڕۆی ئەمڕۆ شەممەش حەسەن عەزاری، سەرۆکی فراکسیۆنی رەوتی سەدر لە کۆنگرەیەکی رۆژنامەڤانیدا رایگەیاند، لەسەر داوا و فەرمانی موقتەدا سەدر، رێبەری رەوتی سەدر سەرجەم دانوستاندنەکان بۆ پێکهێنانی حکومەت لەگەڵ لایەنەکان رادەگرن، هەروەها دەشڵێت، "بەشداری لە دانیشتنی رۆژی 7ـی مانگ ناکەین پەرلەمانتارانمان ئامادەی دانیشتنەکە نابن."
هەڵکەوت عەزیز، پەیامنێری تۆڕی میدیایی رووداو لە بەغدا رایگەیاند، ئەو بڕیارەی رەوتی سەدر بۆ زۆر لایەن شۆکهێنەر بوو، بەهۆی بەشداریی نەکردنی پەرلەمانتارانی رەوتی سەدر، زۆر ئەستەمە رۆژی دووشەممە 07-02-2022 دانیشتنەکە رێکبخرێت و پێدەچێت پرۆسەی هەڵبژاردنی سەرۆککۆمار دوابخرێت.
پەیامنێری رووداو ئەوەشی گوت کە ھەر لەدوای کۆنگرەکە رۆژنامەوانییەکەی ئەمڕۆ لە حەسەن عەزاری، سەرۆکی کوتلەی سەدری و دەستەڕاستی موقتەدا سەدرم پرسی کە ئایە دوای ئەو پەیامە ئیدی رێککەوتن کۆتایی ھات؟ گوتی ئێستاش ھەر دەڵێین، "حکومەتی زۆرینەی نیشتمانی."
