23/11/2023
တရုတ်နိုင်ငံ Liaoning ပြည်နယ် ရှိ Dalian မြို့၏ ဆိပ်ကမ်း၌ တရုတ်ရေတပ်မှ စစ်သင်္ဘောအသစ်တစ်စီးရေချထားသည့်ပုံ(၂)ပုံကို တရုတ်စစ်ဘက်လေ့လာသူများမှ social media များ၌ ယမန်နေ့ (၂၂.၁၁.၂၃) မှာတင်လာခဲ့ပါတယ်။
ထိုဓာတ်ပုံနှစ်ပုံဟာ စစ်လက်နက်လေ့လာသူများကိုဖမ်းစားနိုင်ခဲ့ပါတယ်။ ၎င်းစစ်သင်္ဘောအသစ်ကို Maintenance ပြုလုပ်နေသည့် Type 054A အတန်းစား ဖရီးဂိတ်တစ်စီး၏ နံဘေးတွင် ကပ်လျက်ရပ်ထားပါတယ်။ ထို Dalian သင်္ဘောကျင်းဟာ တရုတ်ရေတပ်၏ စစ်သင်္ဘောများကို Maintenance အဓိကပြုလုပ်ပေးသည့်နေရာလည်းဖြစ်ပါတယ်။
ယခုနှစ် ဩဂုတ်လကတည်းက ရေငုပ် သင်္ဘောကျွမ်းကျင်သူလည်းဖြစ် တရုတ်ရေတပ်ကိုအထူးစောင့်ကြည့်နေသူလည်းဖြစ်သည့် Tom Shugart ဟာ တရုတ်ရေတပ်၌ ရေယာဉ်အတန်းစားအသစ်တစ်ခု တည်ဆောက်နေကြောင်း ဂြိုဟ်တုဓာတ်ပုံမှတစ်ဆင့်ထောက်ပြခဲ့ပါတယ်။ ထိုစဉ်ကတည်းက ၎င်းရေယာဉ်ဘေး၌ ဒုတိယတစ်စီးအတွက် လျာထားသည်ကိုတွေ့ခဲ့ရတာကြောင့် ထိုရေယာဉ်အမျိုးအစားဟာ တစ်စီးတည်းမဟုတ်လောက်တာသေချာနေခဲ့ပါတယ်။
ရေယာဉ်အသစ်၏ ဒီဇိုင်းဟာ ဆွီဒင်ရေတပ်သုံး
Visby အတန်းစား ကော်ဗက်၏ ပုံစံကိုနမူနာယူထားတာဖြစ်ပါတယ်။ အဘယ်ကြောင့် ယခုလိုပြောရသလဲဆိုလျှင် ရေယာဉ်၏ ပင်မအမြှောက်၊ ပဲ့စင်နှင့် ကိုယ်ထည်ဟာ Visby နှင့်အတော်လေးဆင်နေတာကြောင့်ဖြစ်ပါတယ်။
ပထမဆုံး ထိုအကြောင်းကို စာရေးသူဟာ ၂၀၂၁ မှာစပြီးသတိထားမိခဲ့ပါတယ်။ ထိုအချိန်က အပေါ်တွင် ပြောခဲ့သည့် ဆွီဒင်ရေတပ်သုံး Bofors Mk3 ကိုယ်ပျောက်အမြှောက်ဟာ ခေတ်ထနေချိန်တွင် တရုတ်ကနေ URWS ဟူ၍ ဒီဇိုင်း မှီငြမ်းထားသည့် ကိုယ်ပျောက် ရေတပ်အမြှောက်အသစ်ကို ချပြခဲ့ပါတယ်။ ထိုအချိန်က စာရေးသူ၏စိတ်ထဲတွင် တရုတ်ဟာ သူများလုပ်တိုင်း အပိုလိုက်လုပ်တယ်လို့ထင်ခဲ့သော်ညားလည်း ယနေ့မြင်ရသည့် စစ်ရေယာဉ်အသစ်၌ တကယ်ကြီးထုတ်သုံးပြလာခဲ့တာကိုမြင်ခဲ့ရသဖြင့် အံ့ဩခဲ့ရပါတယ်။
Type 054A နှင့် ယှဉ်ရပ်ထားချိန်၌ စာရေးသူသတိထားမိသည်မှာ တန် ၂၀၀၀ ရှိသည်ဟု သိရသောထိုစစ်ရေယာဉ်အသစ်ဟာ ကော်ဗက်ဖြစ်နေကြောင်းကိုဖြစ်ပါတယ်။ ယခင်က တရုတ်ရေတပ်၌ Type 056 အတန်းစား ကော်ဗက်စစ်ရေယာဉ်ငယ် (၇၂)စီးတည်ဆောက်ခဲ့ပြီး ယခုအချိန်၌ ၎င်းတို့တည်ဆောက်မှုကိုရပ်နားလိုက်တာဟာ ယခုလို ကော်ဗက်အသစ်ကို အာရုံပြောင်းလိုက်တာကြောင့်ဖြစ်ပါတယ်။
Type 056 နှင့်ယှဉ်လျှင် သိသိသာသာတိုးတက်လာတာကြီးက ၎င်း၏ ကိုယ်ပျောက်ကိုယ်ထည်အသစ်ဖြစ်ပါတယ်။ ယခင်လို ပင်မပဲ့စင်ကိုမပြောင်းဘဲ ရေယာဉ်ကိုယ်ထည်ကိုသာ ကိုယ်ပျောက်မလုပ်တော့ဘဲ ပဲ့စင်ရော ရေဒါတိုင်တစ်ခုလုံးကိုပါ ကိုယ်ပျောက်ဒီဇိုင်းလုပ်လိုက်တာဖြစ်ပါတယ်။ Funnel ကိုပါ အပျောက်ဒီဇိုင်းဖြင့် ဖန်တီးထားတာကိုလည်း မြင်ရပါတယ်။ ထိုကြောင့်ရန်သူအနေဖြင့် ကော်ဗက်အသစ်ကို ထောက်လှမ်းရတာခက်ခဲမည်ဖြစ်ပါတယ်။
နောက်ထပ်ပြောင်းလဲလာသည့်အချက်မှာ လက်နက်စနစ်ပါ။
အပေါ်မှာပြောခဲ့သည့်အတိုင်း ပင်မအမြှောက်ကို ကိုယ်ပျောက်ဒီဇိုင်းသုံးပုံစံတပ်ဆင်လာသလို နေရာအခက်အခဲကြောင့် Type 056 ၌ မထည့်နိုင်ခဲ့သည့် ဒေါင်လိုက်ဒုံးပစ်စင် (VLS) ကို ယခုကော်ဗက်အသစ်၌ တပ်လာနိုင်ခဲ့ပါတယ်။ တကယ်ထည့်ချိန်၌ VLS ပြွန်ဟာ (၈)ခုဟုတ်မနေတော့ဘဲ (၁၆)ခုအထိ တပ်ဆင်နိုင်ခြင်းဟာ တကယ်ကိုကောင်းသည့်လက္ခဏာတစ်ရပ်ဖြစ်ပါတယ်။
ခန့်မှန်းကြည့်ရသလောက် HHQ-16 လို ရေပြင်ကနေ ဝေဟင်ပစ် တာလတ်ဒုံးများကို VLS (၈)ခု၌ တပ်ဆင်မှာဖြစ်ပြီး ကျန် (၈)ခုကို ရန်သူ့ရေယာဉ်များကိုဖျက်နိုင်ရန်အတွက် ရေယာဉ်ဖျက်ဒုံးများတပ်ဆင်လာနိုင်ပါတယ်။ Type 056 လိုကော်ဗက်ငယ်ကတည်းက YJ-83 အမျိုးအစား သင်္ဘောဖျက်ဒုံး (၄)စင်းကို သေချာစွာ နေရာပေးတပ်ဆင်ခဲ့သဖြင့် ယခုလိုကော်ဗက်အသစ်၌လည်း Anti-Ship Role ကို တရုတ်က လက်လွှတ်ပေးမည့်ပုံမရှိသလောက်ဖြစ်နေခဲ့ပါတယ်။
ရေယာဉ်အနောက်ဘက်၌ HHQ-10 အမျိုးအစား တာတိုရေပြင်မှ ဝေဟင်ပစ်ဒုံးပစ်စင်ကိုထပ်မံတပ်ဆင်လာခြင်းဟာလည်း မိမိကမ်းရိုးတန်းရေပိုင်နက်နှင့် ဝေဟင်ပိုင်နက်ကိုကာကွယ်ရာ၌ အထောက်အကူပြုနိုင်မှာဖြစ်သလို ဖြစ်နိုင်လျှင် လေယာဉ်တင်သင်္ဘောရေယာဉ်စုကြီးကိုပါ ကာပေးနိုင်သည့်အနေအထားကိုရောက်ရှိစေမှာဖြစ်ပါတယ်။
နောက်ထပ်တိုးတက်လာသည့်အချက်မှာ ယခင် Type 056 ၌ Funnel နှင့် YJ-83 သင်္ဘောဖျက်ဒုံးပစ်စင် (၄)ခု ပါသည့်အတွက် နေရာအခက်အခဲကြောင့် မထည့်သွင်းနိုင်ခဲ့သော Hangar ကို ထည့်ပေးလာနိုင်သည့်အချက်ဖြစ်ပါတယ်။ ဒါဟာ ပင်လယ်ပြင်ရှာဖွေကယ်ဆယ်ရေး (SAR) နှင့် ရေငုပ်သင်္ဘောတိုက်ဖျက်ရေး (ASW) ကိုပါ တင်ဆောင်သည့် ရေတပ်သုံးရဟတ်ယာဉ်မှတစ်ဆင့် ကော်ဗက်တစ်စီးအနေဖြင့် လုပ်ဆောင်လာနိုင်သည့်အချက်ကိုပြသနေတာဖြစ်ပါတယ်။
လက်ရှ်ိ၌ ထိုကော်ဗက်ရေယာဉ်အသစ်ကို တရုတ်ရေတပ်ဟာ မကြာမီ၌ ပင်လယ်ပြင်စမ်းသပ်မှုစတင်ပြုလုပ်တော့မှာဖြစ်ပြီး အောင်မြင်သွားခဲ့ပါက ဤ အသစ်သစ်သော ကော်ဗက်များစွာကို မကြာမီအချိန်အတွင်း စာဖတ်သူတို့၏ မျက်မှောက်၌ ဘဲအုပ်လိုက်ရေထဲတန်းစီထွက်လာသလို သင်္ဘောကျင်းပေါ်ကနေ အုပ်လိုက်ကြီးဆင်းလာနိုင်ပါကြောင်း တင်ပြရင်းနိဂုံးချုပ်လိုက်ပါတယ်။