06/05/2023
RENGGANG
Olland Prawine
__________________________
Engko su rehat niat kah? Sa te mau itu terjadi engko tau? Sa lupa kalo hari ini engko lelah berkelahi deng harap yang patah, maaf kalo itu sa yang buat engko rapuh dan hilang kemauan. Tapi deng Tuhan sa curahkan utuh kita pu rante luka.
Lebam engko pu ucap itu jaga sa pu diri, sa yakin engko pu niat baik untuk sa seorang diri. Engko te chat juga, te telpon juga ato mo kas lepas sekali berdering pun. Bila tiba engko su lelah deng diam, semestinya engko te canggung meruah suara.
Sa te lupa sa engko ucap " sa takut engko kas tinggal sa pu diri." Utas kalimat yang bisu mulai membius kali ini sa te main gila. Sa tau kalo itu engko benar - benar patah dilumpuh lara. Sa ju takut kalo itu pikiran mulai membara.
Disudut engko pu rak hati , Engko pu niat deng sa su mulai makin surut. Benih yang kita tanam masing - masing su mengerut. Sa deng engko su te mulai sujud bersama deng ujud. Dan engko pu raut su bening dan kelihatan lebih dingin sa p**a takut.
Belum lama ini engko pernah mengukir kata - kata purba yang diusung untuk mati dalam kita pu cerita. Tapi seiring waktu yang patah mulai tumbuh, yang lara mulai membara dan yang mati mulai kembali hidup. Sa takut semua hal semu itu muncul untuk membias pisah.
Kalo ragu su baru, sa te yakin engko bisa haru ukir suara. Engko pu suara mulai bergugur di pohon telinga. Engko pu wajah su mulai pudar dibingkai pertemuan. Tanpa engko sadari sa pu sabar su menjelmah sadar.
Mungkin sa engko su kas kode biar sa bisa sendiri. Meramuh tawa deng bayang lalu merawat diri. Itu engko pu ujud biar sa sendiri dulu.
Rupanya, Bila masa Engko su baku gandeng mesra deng gelisah, lepas kita makin renggang sampe pisah. Itu sa pu gelisah yang paling resah.
Lantai Bumi, 06 Mei 2023
