22/07/2022
اسلام آباد(کرائم رپورٹر)
تھانہ رمنا کے علاقہ سیکٹر جی ٹین فور میں ڈکیتی کی واردات میں ناکامی پرچھری سے مسلح ڈکیت نے حملہ کرکے باپ بیٹی کو شدید زخمی کردیا اور فرار ہوگیا۔پولیس نے واقعہ کا مقدمہ درج کرلیاہے۔مکان نمبر511، سٹریٹ نمبر47سیکٹر جی ٹین فور کے رہائشی الحاج قادر بخش نامی شہری نے پولیس تھانہ رمنا کو تحریری درخواست دیتے ہوئے بتایاکہ 21جولائی2022ء کی رات ڈھائی بجے میں تہجد کی نماز کے لئے اٹھا تو اسی دوران ہمارے گھر میں نامعلوم چور گھس آیا۔میری بیٹی حنا فاطمہ بھی جاگ گئی۔ہمارے شورشرابے پر ملزم نے چھری سے حملہ کرکے مجھے اور میری بیٹی کو زخمی کردیا اور فرار ہوگیا۔مدعی مقدمہ کا مزید کہنا تھاکہ تقریباً چار ماہ قبل بھی یہی ملزم ہمارے گھر داخل ہوا تھا اور چالیس ہزار روپے چھین کر لے گیا تھا۔آج دوبارہ اس نے واردات کرنے کی کوشش میں ہمیں زخمی کردیا۔پولیس تھانہ رمنا نے واقعہ کا مقدمہ نمبر591/22 بجرم394 درج کرلیا ہے۔
