Netabik Thuphuan

23/10/2023

14/10/2023

Bible sung ih Filistin, Israel mi leh Arab pawl thu thliirnak.
- Palestine hi zo ih cithlah an si?
- Palestine leh Arab hi miphun phunkhat an si maw?
- Arab pawl cu zo ih cithlah an si?
- Zumtu pawl nih Israel kan ngaihven a ttul maw?

14/10/2023

ကျမ်းစာအမြင်ဖြင့် Israel နှင့် Palestine အကြောင်း ကြည့်ရှုခြင်း

YouTube Link:
https://youtu.be/NEz_nW2iXmg

01/10/2023

Pathian min ahodah a si?

01/10/2023

Trinity Pathian kong

31/08/2023

Trinity Pathian Thu
(Pathian Pakhat ah Pum Thum)

Khrihfa ih zumnak hrampi a simi Trinity thu.
Trinity thu na theih hmaisa le Bible na siarmi na fiang thei ding ih Pathian duhnak na thei thei ding.

31/08/2023

သုံးပါးတစ်ဆူဘုရား အကြောင်း (Trinity God)

သုံးပါးတစ်ဆူဘုရားအကြောင်းသိမှ ကျမ်းစာဖတ်တဲ့အခါ နားလည်နိုင်မှာပြီး ဘုရားရဲ့ အကြံအစည်တော်ကို နားလည်နိုင်မှာဖြစ်ပါတယ်။

You Tube:
https://youtube.com/watch?v=US_tGdrk8pU&feature=shared

26/03/2023

Bible Theihkaunak
🔸Mark Thuthangtha Cabu ngantu Marka ih Thuanthu

28/02/2023

🔸Jesuh Khrih dungthluntu pawl KHRISTIAN tiih kawh hmaisabiknak TURKEY ram thu pa 10

🔸ယေရှုခရစ်နောက်လိုက်များကို ရှေးဦးစွာ ခရစ်ယာန်များဟု ခေါ်သည့်တူရကီနိုင်ငံအကြောင်း ၁၀ ခု

29/10/2022

Zumtu nih HALLOWEEN hmang ding a si maw?
Zumtu nih HALLOWEEN ni ah ziangsi kan tuah thei?

25/01/2022

Hell Ram a Umnak Hmun

Van Ram cu mi piangthar pawl Pathian thawn k*mkhua umnak ding hmun, Hell Ram cu mi piangtharlo le Jesuh zumlotu pawl k*mkhua tuarnak ding Hremhmun ti cu theih cio mi a si. Cun Van Ram le Hell Ram thu cu a thupi zetmi le Khristian zumnak hrampi khal a si.

John 3:16 ah “Pathian in leilung hi a duhdawt zet ruangah a Fapa neihsun a pek ih amah a zumtu hmuahhmuah cu thi loin k*mkhua nunnak an co ding” a ti vekin Pathian nih k*mkhua hremhmun Hell ih feh ding in siang lo ruangah a Fapa neihsun tiang in peknak a si.

Van Ram le Hell Ram thu Bibal sung khui tawkah a um ti thei ding ah le fiang deuh ih thei duhtu hrangah cun original ngan nak Hebrew ṭong le Greek ṭong in zoh a ṭul. Ziangahtile Bibal translation tampi cu original ṭongfang vekih letmi a si lo tikah theih sual le fehpi sual a awl zet.

Thukam Hlun sung ih Hell (Hell in the Old Testament)

Mithi khua “Sheol” le Mithi thlaan “Gibrah” danglamnak

Thukam hlun cu Hebrew ṭong ih nganmi a si ih Hebrew tong in Hell cu Sheol ti a si.

“Hell” timi ṭongfang hi Thukam Hlun (King James Version) ah voi 31 hrawng a lang ih atam sawn cu Hebrew ṭong “Sheol” in lehmi a si.

Mipumsiarnak 16:30, 33 le Job 17:16 ahcun “Pit” (leikua) tiah a let. Asinan “Pit” (leikua) cu Hebrew Baibal ah cun “Sheol” ti thotho a si.

Mithi thlaan menmen cu Hebrew ṭong in “Gibrah”, mirang in “grave” ti a si. Thlaan an rak leiawk tikah “Gibrah” timi ṭongfang an hmang.

Asinan Bibal tampi ah “Sheol” timi cu “grave” (thlaan) tiah an let ttheu ih a siartu pawl a buai ter ṭheu. NIV Bibal cun “Sheol” cu “grave” (thlaan) ti ah a let ve men. Falam Bibal Thianghlim ahcun “Sheol” cu “Mithi khua” tin a let.

“Sheol” (Mithi khua) le “Gibrah” (thlaan) cu a bangawk lo ih a umnak hmun khal a bangawk lo. Ziangahtile Bibal sungah “Sheol” cu leilung ih a laifang (in the center of the earth) ah a um a ti.

“Gibrah” (thlaan) cu minung thih tikih ruangpum phumnak hmun a si ih, “Sheol” (Mithi khua) cu minung thih tikih thinlung le thlarau (soul and spirit) fehnak hmun a si. Thinlung le thlarau cu a thi thei lo mi a si.

1. Saam 6:5. Thih hnuah cun zoso a lo thei thei ding, Sheol ah zoso a lo thangṭhat ding?

2. Saam 31:17. Mi ṭha lo pawl cu an ningzak ko seh; Mithi khua (Sheol) ah ṭong ding nei loin um hai seh.

3. Saam 49:15. Pathian in kei cu i hum ding; Thihnak (Sheol) huham sung ihsin i runsuak ding.

4. Job 33:22. Thlaankhur an pan deuhdeuh, Mithi khua (Sheol) an thleng cing ding.

5. Isaiah 38:18. Mithi khua (Sheol) ihsin zohman in an lo thangṭhat thei lo ding; mithi pawl in rintlak na sinak cu an ring thei lo a si.

6. 1 Samuel 2:6. Bawipa in a thihter ih nunnak a pesal; Mithi khua (Sheol) ah a thlenter hai ih, a thi mi pawl tla a nunter sal.

7. Hosea 13:14. Himi pawl cu Mithi khua (Sheol) ihsin ka run suak lo ding;

8. Isaiah 5:14. Mithi khua (Sheol) in a pum a puar zo a khop zo ti a nei lo; a kaa kau zetin a aang ringring.

9. Saam 9:17. Mi ṭha lo pawl le Pathian a dungtuntu miphun pawl ih lamzin netnak cu thihnak Sheol a si.

10. Deuteronomy 32:22. “Ka thinhengnak cu mei bangin a alh ding ih, leilung le a thuai (Sheol) ih um hmuah a kang ṭheh ding.

11. Isaiah 14:15. Asinain a thuknak bik hmun mithi khua (Sheol) ah dirhthlak na si zo.

12. Genesis 37:35. “Amah hnen mithi khua (Sheol) ih ka thlen ve lai hlan lo, ka fapa ngai in ka um ding,”

Hebrew ṭong ih “Gibrah” (thlaan) cu King James nih cun “grave” (thlaan) tiin a ngan.

1. 1 Siangpahrang 13:30. Anmah ih sung thlaan (Gibrah) ah an phum ih amah le a fapa pawl in, “Mi vanduai unaupa ee,” tiah an ṭah.

2. 2 Samuel 3:32. Abner cu Hebron ah an phum ih a thlaan (Gibrah) ah David siangpahrang cu napi in a ṭap.

3. Saam 88:5. Mithi lakih taanta mi ka si. An thah ih thlaan (Gibrah) ih an retmi, ....

4. 2 Samuel 2:32. Joab le a ralkap pawl in Asahel ruak cu an zawn ih Bethlehem khua, an innsang thlaan (Gibrah) ah an phum.

5. Genesis 47:30. “Ka thih tikah Izipt ram ihsin I fehpi awla ka pu le ka pa vekin an thlaan (Gibrah) ah I phum aw,” ti ah Jacob in a ti.

A tlun ih Bibal cang pawl hi “Sheol” le “Gibrah” a danglamnak pawl an si. “Sheol” cu thinlung le thlarau (soul and spirit) fehnak a siih “Gibrah” cu ruangpum phumnak hmun a si. “Gibrah” (thlaan) sungah minung ruangpum cu a siatral nan, thinlung le thlarau cu “Sheol” (Mithi khua) ah a thi thei ve lo.

Thukam Thar sung ih Hell (Hell in the New Testament)

Thukam Thar cu Greek ṭong in nganmi a siih Sheol timi ṭongfang a hmang nawn lo.
Thukam Thar ah “Hell” (Hremhmun) timi ṭongfang voi 23 a um ih Greek ṭong ihsin letmi (translate mi) a si. “Hell” (Hremhmun) kan timi hi Greek ṭong in cu pa li lai a um:
Hades, Gehenna, Tartaroo, Abyss tiin an um hai.

1. Hades
“Hades” timi cu Hebrew ṭong ih “Sheol” timi mithi khua thawn a bangawk mi a siih Thukam Thar sungah voi 10 a umih, Matthai 11:23; 16:18, Luke 10:15, 16:23, Acts 2:27, 32, Thuphuan 1:18, 6:8, 20:13, 14 pawl ah kan hmu thei. Himi “Sheol lole Hades” cu k*mkhua hrang a si lo.

Thuphuan 20 :13-15, “Thihnak le mithi khua (Hades) khal in an hren cihmi mithi pawl an hun suah ve. An zatein an hnaṭuan ciami vekin thuṭhen an si ṭheh. Cule thihnak le mithi khua (Hades) cu tilipi vek a si mi Meilipi sungah thlak an si. Hi Meilipi cu voihnih thihnak kha a si. Zokhal nunnak cabu sungih hmin ngan lomi cu Meilipi sungah hlon an si.

2. Gehenna
“Gehenna” cu k*mkhua hremhmun ‘Kaat mei-alh’ (lole, Meilipi) a si. Jesuh Khrih ih tohkham raang thuṭhennak a ṭheh in Satan le a dungthlun pawl, zumlo tu hmuahhmuah k*mkhua in an tuar nak ding hmun a si. Himi Hell (Kaat mei-alh) cu tuni ah a um hrih lo. Gehenna timi ‘Kaat mei-alh’ cu Matthai 5:22,29,30; 10:28; 18:9; 23:15,33; Mark 9:43,45,47; Luke 12:5; le James 3:6 ah kan hmu thei.

3. Tartaroo
Thukam Thar ah “Tartaroo” timi ṭongfang cu 2 Peter 2:4 ah kan hmu.
Vancungmi a sualmi pawl cu Pathian in zuah loin hell (Tartaroo) sungah a hlonthlak ih cutawk khawthim sungah cun ṭemṭawnin an um ih Thuṭhennak Ni hngak fualfo in an um.

4. Abyss
“Abyss” timi cu Greek ṭong a siih khur thuuk tinak a siih “Bottomless pit” “Tawpneilo khur” tiah leh a si. Bible scholars tampi cun “Sheol, Hades, Abyss, Tartaroo” cu abang awk mi a si tiah an zum.

“Cuih arsi in tawpneilo khur (Abyss) cu a on tikah sosernak somei tumpi ihsin meikhu a suah vekin meikhu a hung suak luailo. Cuih meikhu in ni tleunak le thli lak khal a thimter ṭheh.”

“Hades, Abyss, Sheol” umnak Hmun

“Hades” (Mithikhua) umnak hmun thu ah zumnak theory pahnih a um.
1. Van ṭhat khatnak le ṭhat hnihnak (first heaven and second heaven) lak ih hmun khatkhat ah a um tin le,

2. Leilung sung ah a um tin theory pahnih a um.
A pahnih nak theory hi atanglam ih Bible caang pawl sirhsan in mi tamsawn ih pommi a si.

Matthai 12:40
“Jonah cu ngapi pum sungah ni thum le zan thum a um vekin Milai Fapa khal leilung sung (Hades) ah ni thum le zan thum a um ve ding.”
“For as Jonas was three days and three nights in the whale's belly; so shall the Son
of man be three days and three nights in the heart of the earth."

Isaiah 14:9
“Babilon siangpahrang hmuak dingah (a tanglam ih) mithi khua (Sheol) cu a ralring.”
"Hell (Sheol) from beneath is moved for thee to meet thee at thy coming..."

Efesa 4:9
“…(Jesuh cu) a hmaisa bikah leilung hmun niam bikah a vung thleng.”
"Now that he(Jesus) ascended, what is it but that he also descended first into the lower
parts of the earth?"

Saam 16:10
“Ziangah tile mithi khua (Sheol) ahcun i fehter siang lo ding ih, Nangmah a lo rinsantu cu khur sung (lolen, “thlaan”, mirang in “corruption”, “decay”) ah cun na tanta lo ding.”
“For You will not leave my soul in Sheol, Nor will You allow Your Holy One to see corruption.” (NKJV)

Dungthluntu 2:31
“‘Mithi khua (Hades) ah amah (Jesuh) cu a taanta lo ding ih, a taksa ruangpi cu thlaan (corruption) sungah a ziamta lo ding,’ tiah a ti.”
“…he, foreseeing this, spoke concerning the resurrection of the Christ, that His soul was not left in Hades, nor did His flesh see corruption.” (NKJV)

A par ih Bible caang pawl zohnak in “Sheol” lole “Hades” cu leilung sung thuknak hmun ah a um tiah zum a si. A san cu Israel pawl in mithi cu leilung laai tahrat in a sung ah an phum lo. Israel pawl ih thlaan cu lungkua a siih lungto pheng thawn an khar. Curuangah “Sheol” lole “Hades” cu leilung ‘Core’ (a lai fang) sung ah a um tiah zum a si. Leilung sung ‘Core’ cu minung umnak surface in 7000 Km (4349 miles) zik a hlat ih 6000˚ C (10 832F) hrawng a sa.
(Atang ih zuk ah zoh)

Sheol (Mithikhua) sung ih Khaan Hnih
(Two compartment of Sheol)

Theologian tampi cun Thukam hlun san ah Mithi khua (Sheol) sungah khaan hnih (two compartments) a um ih khaan khat cu hmun nuam Abraham umnak (Abraham’s bosom) a siih khaan khat cu hremhmun a si tiah an zum. Johan 3:13 “Milai Fapa siarlo zohman vancungah a kaitu an um lo” timi sirhsan in Thukam hlun san ih zumtu cu an thi le “Sheol” sung ih Abraham umnak ah an feh hmaisa ih Jesuh thawhsal hnu lawngah Van Ram ah an um nak ṭhawn a si tiah an zum.

Theologian hmin thang lakin zumnak dang khal a um ve.
Tahṭhimnak ah:
1. Matthew Henry
2. Dr. John R. Rice (1895-1980)
3. 'Unger's Bible Dictionary'
pawl cun Thukam hlun ih zumtu cu an thi le Pathian umnak Van Ram ah an feh cih tiah an zum.
Culen,
4. Pastor J. Vernon McGee (1904-1988) cun John 3:13 sirhsan in Sheol sung ih Abraham's ṭaangsung ah an um lawk tiah a zum.
5. Pastor Oliver B. Greene cun Abraham's bosom cu Paradis a si tiah a zum.
6. Halley's Bible Handbook cun “Sheol, Hades” sungih Abraham ih ṭaang sung ah an um lawk ih Jesuh vanih laakso a si ah laakso a si ve tiah a zum.

Sheol sung ah Khaan hnih a um tiah an zumnak san

Milian Pa le Lazaras (Luke 16:22-23)
“Mifarah pa (Lazaras) cu a thi ih vancungih rawl ei-nak puai ah Abraham kiang (Abraham’s bosom) ih to dingah vancungmi pawl in an fehpi. Milian pa cu a thi ve ih an phum; cule Hell (Hades) sungah a tla ih harzet in a tuar. Cuphah in tlunlam a hun zoh ih lamhlatzet ah Abraham le a kiangih Lazaras kha a hun hmu.”

Jesuh in himi milian pa le Lazarus thu hi tahṭhimnak (Parable) menmen ih a simmi silo in a ngaingai ih a ummi thu a simmi a si tiah zum a si. Curuangah theologian tampi in Sheol sungih khaan hnih a um ding thu cu himi milian pa le Lazaras thu in an laak.

Saam 139:7,8
“Na hnen ihsin khuiah so ka relh ding? Na mithmuh ihsin khuiah so ka tlan cuang ding?
Vancung ah kai ningla cunah nang na um ding; Mithi pawl ram Sheol ah it khal ningla cunah na um thotho ding.”

David cu Pathian nih “a man after my own heart” a timi a siih rundamnak a co ti cu a fiang. David in Sheol ah it khal ningla cunah na um ding a timi hi Sheol ih Abraham umnak khaan a si ding tiah zumnak a um.

Dungthluntu 2:31
‘Mithi khua (Hades) ah amah (Jesuh) cu a taanta lo ding ih, a taksa ruangpi cu thlaan (corruption, decay) sungah a ziamta lo ding,’ tiah a ti.

Efesa 4:9
“…a hmaisa bikah leilung hmun niam bikah a vung thleng.”
"Now that he ascended, what is it but that he also descended first into the lower parts of the earth?"

A tlun ih himi Bible caang pawl sirhsan in Jesuh Kross parih a thih ah a taksa ruangpi cu thlaan sungah a um ih a thinlung le thlarau cu Mithi khua (Hades) sung ih Abraham umnak khaan ah a feh a si tiah theologian tampi cun an zum.

Luke 23:43
“Jesuh in cu pa ih hnenah cun, “Thu ka lo kam a si: tuihsun ah keimah thawn Paradis ah na um ding,” tiah a ti.”

Himi Bible caang ah hin zumdaan pahnih a um.
A pakhatnak cu Jesuh in tuihsun ah keimah thawn Paradis ah na um ding a ti ruangah Jesuh Kross parih a thih ah Pa Pathian hnen Vanram (Paradis) ah a feh cih tiah an zum.

A pahnihnak zumnak cu
1 Peter 3:19 sung ah
“Cutiin thlarau in a nun sal ruangah thlarau thawngtla pawl hnenah a feh ih thu a sim.”
“By which also He went and preached unto the spirits in prison.” (KJV)
“Which also He went and made proclamation to the spirits now in prison.” (NASV)
a ti vekin Jesuh cu Kross parih a thih hnu ah a thlarau cu Mithi khua (Hades) sung ih Abraham umnak khaan ah a feh ih cutawk ih zumtu pawl hnen ah nehnak thu a va than. Cuhnu lawngah Van Ram ṭhatthumnak ah hruai so an si tiah an zum. Thukam hlun zumtu pawl Van Ram ah feh cih hai seh la 1 Peter 3:19 hi san nei lo a si ding. Cun Jesuh in tuihsun ah keimah thawn Paradis ah na um ding a timi ah Hades sung ih Abraham umnak khaan kha Paradis a si tiah an zum.

Atu ah zumtu thizomi pawl cu Van Ram (third heaven) ah an um tiah zum a si. Ziangahtile 2 Kor. 12:1-4 ah Apostol Paul cu Van ṭhat thumnak ah laakso a sinak kan hmu.

Hades sung hremhmun kiangah cun ziangtin Paradis vek hmunnuam a um thei ding tiah thusuh nak a um men thei.

Pathian cu sersiamtu a siih a hrangah cang thei lo mi a um lo. Daniel ih a rualpi pathum tla meisa a let 7 ih sa nak ah an thlak nan Jesuh nih a umpi hai ah cun a sat nak an thei lo.

Cun Johan 3:13 ah Jesuh in Nicodemus hnen ah,
“Vancung ihsin a rung ṭummi Milai Fapa siarlo zohman vancungah a kaitu an um lo.”
“No one has ascended into heaven, but He who descended from heaven: the Son of Man.” (NASB)
timi sirhsan in Jesuh Khrih thihnak in a thawhsal hlan cu zohman Vancungah a kaitu an um lo ding tiah an zum.

Thunetnak:
A parih nganzo vekin Mithi khua (Sheol, Hades, Abyss) le Kaat mei-alh (Gehenna) a bangawk lo thu Bible sungah fiangtein kan hmu.

Pathian nih in duhdawt tuk ih k*mkhua hremhmun Hell ih feh in sian lo ruangah kan tuar dingmi Hell cu Kross par ah in tuar sak zo. Hell Ram ih k*mkhua kan sualman tuar ding cu Kross ah in phurh sak ṭheh zo. A thawhsalnak ah thawhtersal kan siih nunnak thar in pek zo.

Tuni ah Satan in Hell Ram a um lo tin mi tampi a bum ih Hell Ram thu cu phuahcop thuanthu men ah a ruat tu Khristian lak hman ah tampi an um.

Mi tampi cun minung kan thi le kan thlarau cu a it that men tiah an ruat. Hivekin Satan ih bumnak ruangah mi tampi thih hnu ih fehnak ding an thei lo. Zumtu pawl Van Ram kan thlen tikah kan nu le pa, kan u le nau, kan nupi le kan pasal, kan fa te, kan rualpi pawl kan hmu lo pang ding phan a um tuk. Pathian nih caan ṭha in pek laiah a Thuthangṭha cohlang in phuang cio uh si.

Matthai 7:13-14
“A fiakmi kotka sungin feh uh, ziangah tile hell fehnak kotka cu a kau ih a lamzin khal a ol; curuangah a zawhtu khal an tam a si. Sikhalsehla nunnak sungih luhnak kotka cu a fiak ih a fehnak lamzin khal a har; curuangah a thleng suaktu cu mi malte an si.”

Ma Hming

Ref. ‘A Biblical Examination of Hell’
Dr. Max D. Younce

24/12/2021

Bethlehem khua khuitawk hmun ah Jesuh a suak?

"The Bread of Life"
"Saang Nung" Jesuh cu
"House of Bread" "Saang Inn" a simi "Bethlehem" khua ah a suak. John 6:35

"The Lamb of God" "Pathian Tuufa" Jesuh cu
"Tuu itnak Kuang" ah a suak.
John 1:29

27/10/2021

Thlarau Thianghlim Hnatuan
(The Work of the Holy Spirit)

☘️☘️☘️

Thukam hlun san ah, Thlarau Thianghlim cu a hril hleicemi profet pawl hnenah lut in Pathian duhnak famkim ter dingin hna a rak ttuan ttheu.

Psalm 51:11
"Na umnak ihsin i dawi hram
hlah awla,
Na thlarau thianghlim cu
ka hnen ihsin la hram hlah aw."

Thukam thar san ah Thlarau Thianghlim cu, Jesuh Khrih rundamtu ih a cohlangtu hmuahhmuah hnen ah lut in hna a tuan.

John 3:5
Jesuh in, “Thungaite in ka lo sim: Zokhal tidai le Thlarau in hrinsal a si lo ahcun Pathian Uknak sungah a lut thei lo ding."

Thlarau Thianghlim hnatuannak tello in Pathian thu kan thei thei lo.

Thlarau Thianghlim cu Ezekiel hnen ih a luh hnu lawngah Ezekiel cun Pathian ih ttongaw a thei thei.

Cuvek in a tu san khalah Thlarau Thianghlim kan hnen ih a luh hnu lawngah Pathian ih aw kan thei thei ding. Thlarau Thianghlim tello, minung zuamnak men in Pathian thutak fiangthei le theih thei a si lo.

John 16:13
"Sikhalsehla Thlarau a run tikah cun Pathian thutak langtertu a si ruangah thutak hmuahhmuah ah a lo hruai ding."

☘️☘️☘️

In the Old Testament era, the Holy Spirit selectively came upon prophets to accomplish the will of God.

Psalm 51:11
"Do not cast me away from Your presence, And do not take Your Holy Spirit from me."

In the New Testament, the Holy Spirit enters all believers, who believe in Jesus Christ.

John 3:5
Jesus answered, “Very truly I tell you, no one can enter the kingdom of God unless they are born of water and the Spirit."

Only after the Holy Spirit entered Ezekiel did he stand on his feet, and then hear the message from the Glory of the Lord.
We also can only hear the message of God through the Holy Spirit.

John 16:13
"However, when He, the Spirit of truth, has come, He will guide you into all truth; for He will not speak on His own authority, but whatever He hears He will speak; and He will tell you things to come.

01/10/2021

📙Thuphuan Cabu Zirnak📙
Chapter 7

🕍Jerusalem Temple Pathumnak🕍
(The Third Temple of Jerusalem)

Thuphuan 11:1-2, Daniel 9:27, Matthai 24:25, 2 Thes. 2:2-4

☘️☘️☘️

Jesuh Khrih a voihnihnak a rat sal (Second Coming) hlan ah Solomon in Pathian hrang ah Temple a rak saknak hmun ciah ah Temple thar pathumnak sak sal a si ding.

Cumi Temple thar sak sal ding hi Israel mi pawl hrangah a thupibik mi le an hngak bikmi pakhat a si. Temple saknak ding ah thilri famkim an nei theh zo ih puithiam hna tuantu ding khal training pek ttheh an si zo.

Sinan tuni tiangah cun saksal a ngah hrihlo. Ziangahtile Temple saksalnak ding hmun ah Islam Mosque pahnih a um zo ruangah a si.

☘️☘️☘️

▫️Jerusalem Temple pakhatnak cu ziang tik ah zo nih a rak sak?

🕍Temple pakhatnak

Pathian in Abraham cu a fapa Isak k*m 16 a kim tik ah Moriah tlang par ah thawinak pekding ah a fial. K*m 1000 hnu ah Pathian in David Siangpahrang le Solomon Siangpahrang hnen ah Abraham in Isak thawinak a tuah fialnak hmun Moriah tlang ah Temple sak a fial. Cutin Solomon in BC 959 ah Temple cu a rak sak (1siangpahrang 6:38). Himi hi Temple pakhatnak a si.

☘️☘️☘️

🕍Temple pahnihnak

Nebuchadnezzar in Judah mi pawl cu sal ah a hruai hai ih Solomon Temple khal a siatbal thluh (2siangpahrang 24:13).

K*m 70 hnu ah Judah mi pawl an sal taannak in an ram ah an kir sal hnu Solomon Temple cu BC 516 ah an sak sal (Jeremiah 25:12, 30:18, Ezra 6:15-16). Cumi saksalmi Temple cu Zerubbabel Temple tiah an ko. K*m 500 a luan tik ah Temple cu a hlun tuk thlang ruangah Herod in a cui Temple cu a rem ttha (renovate) sal ih Herod Temple tin tla an ko.

AD 30, Jesuh leitlun ih a um lai ah a dungthluntu pawl hnen ah a cui Herod Temple cu siatbal a si leh ding thu a phuang cia (Matthai 24:2). Jesuh ih simcia vek in AD 70 ah Herod Temple leh Israel ram cu Roman Empire san ah siatbal theh a si ngai ngai.

K*m zabi 1 in 3 hrawng ah Jewish hotu pawl in Temple pathumnak cu a um dahnak hmun kel ah sak sal an tum ttheu nan Pathian in sak a siang hai lo. Cuhnu ah Israel mi pawl ramdang ah an vai vivo ih k*m tam a kim cun Temple saknak hmun khal ramdangmi in an luah ih atu ah cun Muslim Mosque pa hnih sak a si zo.

☘️☘️☘️

▫️Solomon Temple umnak hmun ciah ah ziangruangah Muslim Mosque an sak?

Abraham in Isaak thawinak a peknak hmun, Solomon in Pathian Temple a saknak hmun ah Muslim pawl in an biakinn Mosque an sak nak san cu hitin a si.

Islam sakhua biaknak pawl ih zumnak ah; an pabik Mohammad cu AD 570 ah Saudi Arabia ram Meka khua ah a suak ih k*m 40 hrawng a si ah vancungmi Gabriel hnen ih sin thlaraulam hmuhsaknak a nei. Zaan khat ah Gabriel cu rang raang to in Mohammad hnen ah a ra ih Mohammad cu a rang raang ah phurin Abraham in Isak thawinak a rak tuahnak Moriah tlaang ah a tlawn pi.

Muslim pawl cun Abraham in Pathian hnen ih thawinak a pek mi kha Isak silo in Ishmael sawn a si tin an zum. Ziangahtile Mohammad cu Ishmael ih cithlah a si ruang ah a si. Mohammad cu Ishmael ih fapa pakua sung ah a fapa pahnih nak Kedar ih cithlah a si. Gabriel in Mohammad cu hmun thianghlim Moriah tlang ah a tlawnpi hnu van ah a hruai ih cuhnu ah a khua Meka ah a thlah tlung sal ti`n Islam sakhua biaknak cun an zum dan a si.

Zaan laifang ih an zam ruang ah mirang ttong in 'The Night Flight' tiah an ko. Mohamaad thih hnu ah a dungthluntu in Islam sakhua biaknak thu cu a leh-la vivo. A dungthlun pakhat Abd al-Malik in AD 691 ah Moriah tlaang ah a tlawng ih 'the Dome of the Rock' ti mi Islam Mosque cu a rak sak. K*m 20 hnu ah the `Dome of the Rock` kiang ah `Al-aqsa` ti mi Mosque cu sak bet a rak si. Moriah tlaang cu Abraham in Ishmael thawinak a rak tuahnak hmun a si ruang ah hmun thianghlim a si tiah an zum.

☘️☘️☘️

▫️Temple Pathumnak cu ziangtikah sak sal a si ding?

🔹Gog le Magog raldonak a ttheh tik ah Antichrist in Israel leh a kiangkap Muslim ram pawl remdaihnak (peace agreement) a tuahpi ding ih Jerusalem Temple Pathumnak sak thok a si ding.

Jesuh cu “Daihnak Siangpahrang (Isaiah 9:6)” a si vekin Satan khal “Daihnak lem” thawn leitlun ah daihnaklem k*m 7 hrangin a tuah ding.

Israel le Muslim ram karlak ah daihnak lem caan tawite a um ding ih Jerusalem Temple Pathumnak cu sak thawk a si ding. Cumi Temple cu Israel mi lawng silo in Muslim pawl in Allah biaknak ah an hmang ve ding, Hindu pawl in Hindu pathian an biak ding, Buddhist pawl in Buddhah an biak ve ding ih Jewish pawl khal in an Pathian an biak ve ding. Curuangah Jesuh in 'Tuksumza Thil-borhhlawh' a tinak san cu a si (Matthai 24:15).

Culawngsiloin, k*m thum le hrek hnu ah Antichrist cun remdaihnak a tuahmi cakhen cu a phiat dingih Israelmi pawl that a tum ding. Temple sung ah a to ding ih pathian ka si a ti ding (2 Thes. 2:4).

☘️☘️☘️

▫️Ziangah tuni ah Israel pawl in Temple an nei thei nawn lo?

🔹“Nan ruangpi cu Thlarau Thianghlim ih Temple a si” tiah 1 Kor.6:19 ih kan hmuh vekin Jesuh thihnak in a thosal hnu ah minung ih sakmi Temple sungah Pathian hnen thawinak tuah a ttul nawn lo. Jesuh in kan sualnak hrangah thawinak in tuahsak ttheh zo. Kan thinlung cu Thlarau Thianghlim umnak Temple sawn a si zo.

Jesuh cun Israelmi pawl an thlarau mit a cawt zia a rak hmu cia. Temple an saksal a sile Amah Jesuh biak lo in Temple sawn ah an thinlung a um ding ih ahlan ih an tuah kel in rannung thawn sual thawinak an tuah ding ti a hmu cia.

Cu ruangah Jesuh in Jewish Temple cu Roman Empire pawl ih siatbal ding a siang ih cumi hmun ah Islam temple pahnih um ter a siannak san khal a si.

Gog le Magog ral ttheh ah Jerusalem Temple Pathumnak cu din sal a si ding ih Israelmi pawl cun ahlan ih rannung thawn sual thawinak an tuah kel ten an tuah sal ding.

☘️☘️☘️☘️

Daniel 9:27
Cuih ram uktu bawi cun k*m sarih hrangin mi tampi thawn lungkimnak cakhen a tuah ding ih cuih tikcu ih hrek a cem tikah peknak le thawinak pawl cu a cemter ding. Thil Fihnung Tuksumza cu Biakinn sung hmunsang bikah ret a si ding ih cutawkih a rettupa in Pathian ih tumtahsakmi netnak a ton hlanlo cutawk hmunsang bik ahcun a um ringring ding.

Matthai 24:15
Profet Daniel in a rak sim ciami, ‘Tuksumza Thil-borhhlawh,’ cu nan hmu ding. Cuih Thil-borhhlawh cu hmun thianghlim ah a ding ding.


2 The. 2:2,4
Misualral pa cun midang in khawzing ih an ruahmi le biak dingih an ruahmi hmuahhmuah a dodal ding ih cu pawlih tlunah a ret-aw ding. Pathian Biakinn sung khalah a lut ding ih to tahratin keimah hi Pathian ka si, a ti ding.

17/09/2021

📙Thuphuan Cabu Zirnak📙
Part 6

▫️Gog le Magog raal cu ziang a si?
▫️Anti-Christ ziangtikah a suak ding?

☘️☘️☘️

🔸Gog le Magog raal cu ziang a si?

▫️Pathian in Profet Ezekiel hmangin hmailam ih a um leh dingmi Gog le Magog raaldonak thu a rak phuang cia.

Ezekiel cabu sungah:

• Pathian in Israelmi pawl hnamdang khuazing an biak ruangah a hremnak thu,
• Israel ram a hloral hnu ah 1948 k*m ah a tungding salnak thu,
• Hmailam ih a thleng leh dingmi Gog, Magog raal le k*m 7 harsatnak thu,
• K*m thawngkhat uknak thu pawl a um.

☘️
Gog le Magog raal thu hi b**g 38, 39 ah kan hmu thei.

Magog ram ih bawi Gog le a lam ţang ram pawl in Israel ram an donak ding thu a si. Magog ram cu tuni ih Russia a si tiah zum a si.

Ezekiel 38 :15, “miphun tampi lakin na khawmmi a cakzet le a tamzet na ralkap pawl thawn na umnak saklam ram ihsin na rungsuak ding.”

Russia ram cu Israel ih a saklam ah a um.

Magog (Russia) lam a ţangtu ding pawl cu Persia (Iran), Etheopia, Libia, Gomer(Turkey) pawl an si (Eze. 38:5-6).

☘️☘️☘️

🔸Gog/ Magog Raal cu ziangtikah a um ding?

• Thianglawr ţheh veten a um ding.

☘️☘️☘️

🔸Gog le Magog raaldonak cu ziangvek a si ding ?

• Gog lam ţang ralkap pawl cu Israel ram ih Golan tlang ah an ra ding.

• Pathian ih thinhengnak cu Gog par ah a thleng ding.

• Israel ramah ling nasazetin a hnin ding.

• Tlang saangpipi an min ding.

• Ralkap pawl anmah le anmah an do awk ding.

• Natsia a thleng ding.

• Thisen a luang ding.

• Ruah le rial cu meisa le katmei thawn Gog le a ralkap pawl le a hnenih a ţangtu parah Bawipa in a burh ding.

• Gog a sung ding.

☘️
Bawipa in Israel lam ţangin raal a do sak ding. Cutin miphun hmuahhmuah in Bawipa a maksak zia an hmu ding.

Gog le a ralkap le amah a ţantu pawl cu Israel tlangpar ah an thi thluh ding ih an ruak pawl cu vate le ramsa rawl ah a cang ding.

Cutin Bawipa hmin thianghlim cu Israel mi pawl in an thei ding ih miphun hmuahhmuah in Bawipa cu Israel ih Pathian Thianghlim ka si kha an thei ding.

☘️☘️☘️

🔸Anti Christ cu ziangtikah a suak ding?

• Gog le Magog raal a cem ve ten Anti-Christ a suak thawk ding

Gog le Magog raaldonak ruangah leitlunpi ti celcel in a buai lai ah Anti-Christ cun leitlun remdaihnak tuah ding in Israel thawn remdaihnak cakhen k*m 7 daih in a tuah ding ih leilungpi cu amah in k*m 7 sung a uk ding.

☘️

“Israel ram khawpi sungih a ummi pawl cu an suak ding ih ral pawl ih taanmi hriamnam pawl cu zanthing hrangah an khawm ding. Ralphaw pawl, li le thal pawl, feipi le talhtum pawl cu mei ah an tik ding ih zanthing tik lutein k*m sarih a daih ding.” (Ezekiel 39:9)

☘️

“Cuih ram uktu bawi cun k*m sarih hrang in mi tampi thawn lungkimnak cakhen a tuah ding ih cuih tikcu ih hrek a cem tikah peknak le thawinak pawl cu a cemter ding.” (Daniel 9:27)

☘️

“Misualral pa (Anti-Christ) cu,……. Pathian Biakinn sung khalah a lut ding ih to tahratin keimah hi Pathian ka si, a ti ding.” (2Thes 2:4)

☘️☘️☘️

🔸Anti-Christ cu zovek a si ding ih ziang a tuah ding?

Ezekiel 29, Daniel 9 le Thuphuan 13 sirhsan in:

• Amah cu leitlunpi uk theiding khop in fimthiamnak lam ah sangzetmi a si ding.

• Israel cu rualpi ah a tuah ding.

• Israel thawn k*m 7 daih remdaihnak (peace agreement) a tuah ding.

• Jerusalem ah Temple pathumnak sak sal theinak thu a pek ding.

• Leitlun miphun hmuahhmuah in pathian vek in an zum, an biak ding.

• K*m 3 le hrek a uk hnu ah a sung ah Satan a lut ding.

• Remdaihnak a tuahmi cakhen a phiat ding ih Israel mi pawl hrem le thah a tum ding.

• Israel pawl ih Temple thar sung ah a to ding ih pathian ka si a ti ding.

• A ţanpi tu profet deu a rak suak ding.

• Anti-Christ hmin in 666 a tuah ding .

• 666 number neilo tu hmuahhmuah zianghman leithei, zuarthei a si lo ding.

• Khrih zumtu pawl cu hngawng tan in a that ding.

• K*m 7 a cem in a tanpitu profet deu thawn meilipi sungah hlon an si ding.

10/09/2021

📙Thuphuan Cabu Zirnak📙

Part 5

"Thianglawr (Rapture)"

☘️☘️☘️

Thianglawr timi cu ziang a si?

Rapture (Thianglawr) timi cu Latin ţong “rapio” in a rami a siih “caught up (laakhlo, laakso)” tinak a si.

Leitlun ih a nunglaimi zumtu pawl Jesuh Khrih hnen mero lakah laakso ding tinak a si.

☘️

Cumi cu ziangtin kan thei thei ding?

🔸Paul nih 1 Thesalon 4:17 ah
“Khrih a zumtu a thi ciami pawl an tho hmaisa ding; cule kannih a nunglai mi pawl in vanah Bawipa cu a tho hmaisa pawl thawn mero lakah laak so kan si ding (shall be caught up in the air KJV).”a ti.

☘️

Ziangtikah Thianglawr a um ding?

🔸A ni le a caan Bible ah in sim cia lo. Curuangah ralringte ih um ding ah in sim.

Matthai 25:13
Jesuh in, “Cutiin a ni le a caan nan theih lo ruangah ralringte in hngak uh,” tiah a ti.

☘️

Sinan Jesuh Khrih a ratsal caan a nai tik ih a thleng ding hmuhsaknak (signs) pawl in sim cia.

Matthai 24:32-33
“Theipi kung thuhla in fim lo zirhseh. Theipi cu a hnge pawl an hung hring ih a hnah no tete tla an hung cerh tikah ṭhal tikcu a nai a si ti nan thei. Cuvekin hi thil hmuahhmuah nan hmuh tikah a tikcu a naizet thlang ih a thleng cing ding ti nan thei pei.”

☘️☘️☘️

"Rapture (Thianglawr) leh Second Coming (a voihnih ratsalnak) a bang aw lonak pa 7"

1️⃣
🔸Thianglawr: Jesuh a ke thawn leilung a pal lo ding. 🔸Second Coming: Jesuh cu a ke rori thawn Olive tlang a pal ding.

2️⃣
🔸Thianglawr: Zumtu pawl mero ah laakso an si ding.
🔸Second Coming: Jesuh cu a mithiang monu pawl thawn leilung ah a ra sal ding.

3️⃣
🔸Thianglawr: K*m sarih harsatnak thleng hlan ah a um ding.
🔸Second Coming: K*m sarih harsatnak thleng hnu ah a um ding.

4️⃣
🔸Thianglawr: Zumtu thicia pawl an tho sal ding.
🔸Second Coming: Zumlotu tampi an thi ding.

5️⃣
🔸Thianglawr: Sahrang Anti-Christ a suak ding.
🔸Second Coming: Anti-Christ cu meilipi ah thlak a si ding.

6️⃣
🔸Thianglawr: Gog-Magog raal, cu theh in k*m sarih harsatnak a suak ding.
🔸Second Coming: Armeggedon raal a suak ding.

7️⃣
🔸Thianglawr: Zumtu mithiang, Khrih monu pawl hrang ah si.
🔸Second Coming: Israel mi hrang ah a si.