25/03/2023
ပြင်ဦးလွင်မြို့နယ် ၊ ပွဲကောက်ကျေးရွာအုပ်စု သို့ ရပ်ရွာအေးချမ်း သာယာရေး၊ ဒေသဖွံ့ဖြိုးရေး လုပ်ငန်းများဆောင်ရွက်ရန် မြို့နယ် အဆင့်ဌာနဆိုင်ရာများ ပါဝင်သော စစ်ကြောင်းကြီး (၅)ကြောင်းနှင့် ဒေသခံပြည်သူများ တွေ့ဆုံပွဲကျင်းပ
ပြင်ဦးလွင် မတ် ၂၅
မန္တလေးတိုင်းဒေသကြီး၊ ပြင်ဦးလွင်ခရိုင်၊ ပြင်ဦးလွင်မြို့နယ်၊ ပွဲကောက်ကျေးရွာအုပ်စုတွင် လုံခြုံရေး၊ တရားဥပဒေစိုးမိုးရေး၊ ရပ်ရွာအေးချမ်း သာယာရေး၊ ဒေသဖွံ့ဖြိုးရေး လုပ်ငန်းများဆောင်ရွက်ရန် မြို့နယ်အဆင့် ဌာနဆိုင်ရာများပါဝင်သော စစ်ကြောင်းကြီး (၅)ကြောင်းနှင့် ဒေသခံပြည်သူများ တွေ့ဆုံပွဲကို ယမန်နေ့ မွန်းလွဲ ၂ နာရီက ကျင်းပသည်။
ရှေးဦးစွာ ပြင်ဦးလွင်မြို့နယ် စီမံအုပ်ချုပ်ရေးအဖွဲ့မှ အဖွဲ့ဝင် ဦးသောင်းမြင့်သိန်း က စစ်ကြောင်းကြီး(၅)ကြောင်းဖြင့် ဒေသဖွံ့ဖြိုးရေး လုပ်ငန်းများ ဆောင်ရွက်ပေးမှု အခြေအနေ ၊ နိုင်ငံတော်စီမံအုပ်ချုပ်ရေကောင်စီ၏ ရှေ့လုပ်ငန်းစဉ်များ နှင့် ဒေသဖွံ့ဖြိုးရေးကိစ္စများအား ရှင်းလင်းပြောကြားပြီး အထွေထွေအုပ်ချုပ်ရေးဦးစီးဌာနမှ ဒုတိယမြို့နယ်အုပ်ချုပ်ရေးမှူး ဦးကျော်ဇင်ဝင်း က မြို့နယ်အဆင့် ဌာနဆိုင်ရာများပူးပေါင်း၍ ဒေသခံပြည်သူများနှင့် ယခုကဲ့သို့ တွေ့ဆုံပွဲကျင်းပ၍ ဒေသဖွံ့ဖြိုးတိုးတက်ရေးလာရောက်ဆောင်ရွက်ပေးမှု အခြေအနေများအား ရှင်းလင်းပြောကြားခဲ့သည်။
ထို့နောက် မြို့နယ်ရွေးကောက်ပွဲ ကော်မရှင်မှ ဦးစီးအရာရှိ ဒေါ်အေးအေးခန့်က လာမည့်ရွေးကောက်ပွဲတွင် ကျင့်သုံးမည့် အချိုးကျ ကိုယ်စားပြု(Proportional Representation System-PR) စနစ်အကြောင်း သိကောင်းစရာများအားလည်းကောင်း၊ မြို့နယ်အဆင့် ဌာနဆိုင်ရာများဖြစ်သည့် မြို့နယ်ရဲတပ်ဖွဲ့၊ ပြည်သူ့ကျန်းမာရေးဦးစီးဌာန၊ စိုက်ပျိုးရေးဦးစီးဌာန၊ မွေးမြူရေးနှင့်ကုသရေးဦးစီးဌာန၊ ပြန်ကြားရေးနှင့်ပြည်သူ့ ဆက်ဆံရေးဦးစီးဌာန ၊ မြို့နယ်လျှပ်စစ်၊ ဆည်မြောင်း၊ ကျေးလက်လမ်းဦးစီးဌာန၊ ကျေးလက်ဒေသဖွံ့ဖြိုးတိုးတက်ရေးဦးစီးဌာန၊ လယ်ယာမြေ စီမံခန့်ခွဲရေးနှင့် စာရင်းအင်းဦးစီးဌာန၊စီမံကိန်းရေးဆွဲရေးဦးစီးဌာန ၊မီးသတ်ဦးစီးဌာန၊ လူဝင်မှုကြီးကြပ် ရေးနှင့် ပြည်သူ့အင်အားဝန်ကြီးဌာန၊ မြို့နယ်စည်ပင်အစရှိသည့် မြို့နယ်အဆင့် ဌာနဆိုင်ရာတာဝန်ရှိ သူများက သက်ဆိုင်ရာဌာနအလိုက် ဆောင်ရွက်ပေးနေသည့် ပြည်သူ့ဝန်ဆောင်မှုလုပ်ငန်း များကို ရှင်းလင်းပြောကြားပြီး တွေ့ဆုံပွဲအခမ်းအနားသို့ တက်ရောက်လာသည့် ပြည်သူများက ဒေသဖွံ့ဖြိုးရေး၊ ဆိုင်ရာကိစ္စရပ်များ၊ ပညာရေး ၊ လမ်းပန်းဆက်သွယ်ရေးနှင့် လျှပ်စစ်မီးကိစ္စရပ်များနှင့်ပတ်သက်၍တင်ပြခဲ့ရာ တာဝန်ရှိသူများက သက်ဆိုင်ရာဌာနအလိုက် ပေါင်းစပ်ညှိနှိုင်း ဆောင်ရွက်ပေးခဲ့ကြသည်။
ဆက်လက်၍ စစ်ကြောင်းကြီး (၅)ကြောင်းမှ ဌာနဆိုင်ရာတာဝန်ရှိသူများသည် ပွဲကောက်ကျေးရွာအုပ်စု မှ ဒေသခံပြည်သူများအား ကိုဗစ်-၁၉ရောဂါကာကွယ်ဆေးထပ်ဆောင်း Booster ဆေးများ ထိုးနှံပေးခြင်း၊ မီးဘေးအန္တရာယ် ကင်းဝေးစေရေး အသိပညာပေးဆောင်ရွက်ခြင်း နှင့် စည်ပင်သာယာရေးကိစ္စရပ်များ ၊ အိမ်ထောင်စုလူဦးရေစာရင်း မွေးတိုး နှင့် သေဆုံးပယ်ဖျက်ကိစ္စရပ် များကို ဆောင်ရွက် ပေးခဲ့ကြသည်။ အဆိုပါ တွေ့ဆုံညှိနှိုင်းဆွေးနွေးပွဲသို့ မြို့နယ်အဆင့် ဌာနဆိုင်ရာများ နှင့် ပွဲကောက်ကျေးရွာအုပ်စုမှ ဒေသခံပြည်သူများစုစုပေါင်း (၁၆၀) ဦးခန့် တက်ရောက်ခဲ့ကြကြောင်း သိရသည်။
ဖြူလူသစ် [ခရိုင်(ပြန်/ဆက်)]