13/03/2022
ဒေါငံခါးရွာတွင် လေကြောင်း တိုက်ခိုက်မှုများကြောင့် KNDF တပ်ဆုတ်ပေးခဲ့ရ ဟုဆို
ဧရာဝတီ၊ မတ် ၁၃ ၊ ၂၀၂၂
ကယားပြည်နယ်၊ ဒီးမော့ဆိုမြို့နယ်၊ ဒေါငံခါးရွာကို စစ်ကောင်စီက လေကြောင်းမှ ဗုံးကြဲခြင်း၊ လက်နက်ကြီးများဖြင့် ပစ်ခတ်ခြင်းတို့ကြောင့် အဆိုပါ ရွာကို ယာယီ လက်လွှတ်ခဲ့ရကြောင်း ကရင်နီ အမျိုးသားများ ကာကွယ် ရေးတပ်ဖွဲ့ (KNDF) တပ်ရင်း ၁ က ထုတ်ပြန် သည်။
စစ်ကောင်စီသည် လက်နက်ကြီး၊ လေယာဉ်တို့ အသုံးပြုကာ ယမန်နေ့ မတ်လ ၁၂ ရက်နှင့် ယနေ့ ၁၃ ရက် မနက်ပိုင်းတွင် ဒေါငံခါးကျေးရွာရှိ နေအိမ်များကို မီးရှို့နေကြောင်းလည်း သိရသည်။
KNDF က "နန်းမယ်ခုံမြို့ကို ယာယီ ဆုံးရှုံးရပြီးနောက် မတ် ၁၃ ရက်မှာ ကျနော်တို့ ဒေါငံခါးကို ထပ်မံ ဆုံးရှုံးလိုက်ရပါတယ်။ စစ်ကောင်စီဘက်မှ အကြိမ်ပေါင်း မြောက်များစွာ လက်နက်ကြီး၊ လေယာဉ်တို့ဖြင့် ဗုံးကြဲ ပစ်ခတ်ခဲ့သောကြောင့် နောက်ထပ်သော စစ်ရေးအရ အရေးပါလှတဲ့ ဒေါငံခါးကို ကျနော်တို့ ယာယီ လက် လွှတ်ပေးခဲ့ရပါတယ်" ဟု ဆိုထားသည်။
ယမန်နေ့ တိုက်ပွဲများတွင် ၎င်းတို့၏ တပ်ဖွဲ့ဝင်တချို့ ပြင်းထန် ဒဏ်ရာများ ရရှိခဲ့ပြီး ပြည်သူများအနေဖြင့် ၎င်းတို့ကို တတ်နိုင်သလောက် ဝိုင်းကူကြရန်လည်း မေတ္တာ ရပ်ခံထားသည်။
စစ်ကောင်စီ၏ လက်နက်ကြီးဖြင့် ပစ်ခတ်မှုများ၊ လေ ကြောင်း တိုက်ခိုက်မှုများကြောင့် ဒေါငံခါးကျေးရွာရှိ ဘာသာရေး အဆောက်အအုံများ၊ စာသင်ကျောင်းများနှင့် နေအိမ်များ အမြောက်အများ ပျက်စီးခဲ့သည်။
ကရင်နီ အမျိုးသား ကာကွယ်ရေး တပ်ဖွဲ့ဝင်များသည် ပြီးခဲ့သည့် ဖေဖော်ဝါရီလအတွင်းက နန်းမယ်ခုံမြို့မှ ဆုတ်ခွာပေးခဲ့ရပြီး ယခုအခါ ဒီးမော့ဆိုမြို့နယ် ဒေါငံခါးရွာမှ ထပ်မံ ဆုတ်ခွာပေးခဲ့ရခြင်း ဖြစ်သည်။
ဓာတ်ပုံ- KNDF
