08/07/2021
Ram Le Miphun Dawt Kan Timi Hi
=================
Minung kan i khah ciolo bang kan lungput le thiamnak hna zong ai khat dih kho loh. Cucu milungtlawm pawl nih huatnak le ralsernak ah an hman ttheu. A ngaingai tiah cun kan i khah dihlo hi minung kan sunlawi khun nak pakhat a si. Cu kan lungput le thiamnak ai khat lomi pawl cu hmunkhat ah kan fonh tik hna ah a ruahawk hmanh kan hngalh bal lomi thil-lianngan ttuanchuah khawhnak a si.
Khah! Ram le Miphun ka/kan dawt kan ti tikah a zeiset cu dah kan dawt kan timi cu a si ti hi fiang tein kan hngalh a herh. Ram le Miphun a dir khawhnak ding ahcun, Ram a ngeimi kan si a herh. Cu ram cu ramchung mipi vialte nih kan kilven le zohkhenh a herh. Miphun a dir khawhnak ding ahcun holh le ca, bia le hla, nunphung hna an herh (thil dangdang a herhmi zong an um ve ko rih la...).
Kan ngeihmi kan ram kan humhak nak ah nunnak peek a si cuahmah lio ah kan HOLH le kan CA hna kan thlau ahcun thaizing ah kan tlau tthan ko la. Miphundang holh le ca, fimthiamnak hna hi kan thiam khawhchung in thiam kan i zuam ko hna lai. Nain cu miphundang holh le ca hna cu kan miphun holh le ca can ah hmanlo ding hi an biapi hringhran! Kan ngeih lomi biathar le holhthar an si ahcun kan miphun holh ah i laak khawh an si tthiamtthiam ko. Cucu miphun ngan le holh a rummi hna nih an tuah ciomi a si ko.
Langhter kan duh tak takmi cu, Ram le Miphun kan dawt hna nak ah hin i palh sual hlah usih. Ram hi amah pi lawngin a dir kho loh i a chungah a lengmi minung an um a herh. Cu a chung ah a lengmi minung hna nih cun Holh le Ca, Bia le Hla, Nunphung hna tlamtling tein an ngeih a herh. Cucaah, kan miphun holh le ca, bia le hla hna hi duh chin lengmang hna usih law tthanchoter chin lengmang ko hna usih. Miphundang holh le ca in maw thlengnawng sual hlah u sih!
