Voice Of Naypyidaw, Naypyidaw (2024)

26/11/2024

နေပြည်တော် MICC 2 နှင့် အရေးပါတဲ့ နေရာတချို့ ကာမီကာဇေ ဒရုန်း နဲ့ တိုက်ခိုက်ခံရ

နိုဝင်ဘာ ၂၆

နေပြည်တော်၊ ဇမ္ဗူသီရိမြို့နယ်ရှိ Myanmar International Convention Center (MICC-2) အဆောက်အဦးကို နိုဝင်ဘာလ ၂၅ ရက်နေ့ မနက် ၉ နာရီ မိနစ် ၄၀ ခန့်က ကာမီကာဇေ ဒုန်းနဲ့ တိုက်ခိုက်ခံရတယ်လို့ စုံစမ်းသိရှိရပါတယ်။

အလားတူ နေပြည်တော်၊ ဇဗ္ဗူသီရိမြိုနယ်၊ ဇေယျာသိဒ္ဓိရပ်ကွက်၊ ညွှန်ကြားရေးမှူးချုပ် အိမ်ရာဝန်းအတွင်းရှိ ညွှန်ချုပ်အိမ်ရာ ခြံအမှတ် (၅၃၀-A/B)ရဲ့ ခြံဝင်းအနောက်ဘက် ၅ ပေခန့်အကွာမှာ နိုဝင်ဘာလ၂၅ ရက်နေ့ မနက် ၁၀ နာရီ မိနစ် ၃၀ အချိန်ခန့်က Fixed Wing အမျိုးအစား အဖြူရောင် Drone ၁ စင်း ပျက်ကျနေကြောင်း စစ်ကောင်စီဘက်က ကြေးနန်းသတင်း တက်နေတာတွေရှိတယ်လို့ ဖရဲသီးက မြို့တော်ကို သတင်းပေးပို့ထားပါတယ်။

ကာမီကာဇေနဲ့ တိုက်ခိုက်ခံရမှုကြောင့် စစ်ကောင်စီ လက်အောက်ခံ ရဲတပ်ဖွဲ့ဝင်တွေနဲ့ စစ်ကောင်စီ တပ်သားတချို့ ထိခိုက်ဒဏ်ရာရရှိခဲ့ပြီး အသေးစိတ် အချက်အလက်ကိုတော့ ပြောပြလို့ မရသေးဘူးလို့ ၎င်းက ဆိုပါတယ်။

ဒီတိုက်ခိုက်မှုကို ဘယ်အဖွဲ့အစည်းက လုပ်ဆောင်တယ်ဆိုတာမျိုးတော့ ထုတ်ပြန်တာ မရှိသေးပါဘူး၊ အလားတူ NUG အစိုးရအနေနဲ့လည်း ထုတ်ပြန်ချက် တစ်စုံတစ်ရာ ထုတ်ပြန်တာမျိုး မရှိသေးပါဘူး။

မြန်မာအပြည်ပြည်ဆိုင်ရာကွန်ဗင်းရှင်းဗဟိုဌာန (Myanmar International Convention Center - MICC 2) အဆောက်အဦးဟာ နိုင်ငံတော်အဆင့် အခမ်းအနားများ ပြုလုပ်တဲ့ အဆောက်အဦးဖြစ်ပြီး ၂၀၂၁ ခုနှစ်မှာလည်း MICC 2 အဆောက်အဦးအနီးတွင် အာဏာသိမ်းစစ်ကောင်စီရဲ့ ကင်းပုန်း စစ်သားတွေနဲ့ ရဲတပ်ဖွဲ့တို့ အပြန်အလှန် ပစ်ခတ်မှုတွေရှိခဲ့ပြီး ထိခိုက်ဒဏ်ရာရရှိမှုတို့ ဖြစ်ခဲ့ဖူးပါတယ်။

နေပြည်တော်က ကကကြည်း စစ်ရုံးချုပ်အပါအဝင် အရေးကြီးနေရာတွေကို လုံခြုံရေးတွေ တိုးမြှင့်ချထားပြီး စစ်တပ်မိသားစုတွေကိုပါ လုံခြုံရေးအရ တပ်လှန့်ထားတယ်လို့ သိရပါတယ်။

အာဏာသိမ်း စစ်ခေါင်းဆောင် ကူမင်းကိုသွားတဲ့ နိုဝင်ဘာလ ၅ ရက်နေ့ကလည်း တော်လှန်ရေးတပ်တွေက နေပြည်တော်လေဆိပ်ကို ဒရုန်းနဲ့ တိုက်ခိုက်ခဲ့ပြီး လေယာဉ်ပြေးလမ်းကြောင်းကို ချိန်ကိုက်မိုင်းနဲ့ ဖောက်ခွဲခဲ့ပါသေးတယ်။

အာဏာသိမ်းကာလအတွင်း နေပြည်တော်လို အတွင်းပိုင်း နေရာတွေတောင် လုံခြုံမှုမရှိတော့တာကြောင့် အာဏာသိမ်းကာလ ထပ်တိုးနေတဲ့စစ်ခေါင်းဆောင်ကို စစ်မှုထမ်းဟောင်းများအပါအဝင် နေပြည်တော် စစ်တပ်အသိုင်းအဝိုင်းက စိတ်ပျက်နေကြပါတယ်။

မြို့တော်

14/10/2024

တော်လှန်ရေးတပ်တွေသိမ်းပိုက်ထိန်းချုပ်ထားတဲ့
၈၃ မြို့

ဒီပ/People's Spring

ရှမ်းပြည်နယ်မြောက်ပိုင်း သီပေါမြို့နယ်မှာ စစ်ကောင်စီတပ်ရဲ့ နောက်ဆုံးကျန်နေတဲ့ အမှတ် (၂၃ )ခြေလျင်တပ်ရင်း (ခလရ ၂၃)ကို TNLA ဦးဆောင်တဲ့ ပူးပေါင်းတပ်တွေက အောက်တိုဘာ ၁၃ ရက်မှာ သိမ်းပိုက်နိုင်ခဲ့ပါတယ်။ခလရ ၂၃ မတိုင်ခင် ခမရ (၅၀၃) နဲ့ (၅၀၄ )တို့ကိုလည်း သိမ်းပိုက်ပြီးဖြစ်တာကြောင့်အခုဆိုရင် သီပေါမြို့နယ်မှာ စစ်ကောင်စီတပ်မကျန်တော့ပါဘူး။ဒါကြောင့် နွေဦးတော်လှန်ရေးကာလမှာ တော်လှန်ရေးတပ်တွေသိမ်းပိုက်ထိန်းချုပ်ထားတဲ့မြို့ပေါင်း ၈၃ မြို့ရှိလာပြီဖြစ်ပါတယ် ။ နွေဦးတော်လှန်ရေးမတိုင်ခင်ကတည်း တိုင်းရင်းသားတော်လှန်ရေးတပ်တွေ ထိန်း
ချုပ်ထားတဲ့၊အခြေချနေတဲ့ မြို့တွေကိုလည်း ဒီအင်ဖိုဂရပ်မှာမဖော်ပြထားပါဘူး။ တော်လှန်ရေးတပ်တွေ သိမ်းပိုက်ပြီးမှ စစ်တပ်ကပြန်သိမ်းပိုက်
နိုင်ခဲ့တာက ကောလင်း ၊ဆီဆိုင် ၊ဒီပဲယင်း မြို့တို့ရှိခဲ့ပါတယ် ။တော်လှန်ရေးတပ်တွေက သိမ်းပိုက်ထိန်းချုပ်ပြီးပေမယ့် သတင်းမထုတ်ပြန်တာ
ကြောင့် ဒီစာရင်းမှာ မပါသေးတဲ့မြို့တွေလည်းကျန်ရှိနိုင်ပါသေးတယ် ။

၁၀၂၇ စစ်ဆင်ရေး ဒုတိယလှိုင်းမှာ TNLA ဦးဆောင်တဲ့ မဟာမိတ်တပ် နောင်ချို ၊ မိုးကုတ် ၊ကျောက်မဲ ၊မိုးမိတ်၊သီပေါမြို့ နဲ့မြို့နယ်တွေကိုသိမ်းပိုက်ထိန်းချုပ်နိုင်ခဲ့တာပါ။ လက်တလော နောင်ချိုမြို့မှာ တောင်ခမ်းက စစ်တပ်လက်ကျန်အမြောက်တပ်တွေကိုလည်း TNLA နဲ့ ပူးပေါင်းတပ်တွေက အပြီးသတ်သိမ်းပိုက်နိုင်ဖို့ဆက်လက်ထိုးစစ်ဆင်နေပါတယ် ။

ကျန်ဒေသတွေမှာတော့ ရခိုင်ပြည်နယ်မှာ အာရက္ခတပ်တော် (AA)က အမ်း၊မောင်တော ၊ဂွမြို့နယ်ကစစ်တပ်လက်ကျန်စခန်းတွေကို ထိုးစစ်ဆင်နေသလို PDF တွေက စစ်ကိုင်းတိုင်းမှာ ထီးချိုင့်နဲ့ အင်းတော်မြို့က စစ်တပ်လက်ကျန်စခန်းတွေကိုတိုက်ခိုက်နေပါတယ် ။

People's Spring

07/08/2024

နေပြည်တော် ပျဉ်းမနားမြို့နယ် အရှေ့ခြမ်း တောင်ပေါ်ဒေသ ဘိုးမသံတောင် စစ်ကောင်စီတပ်စခန်းပစ်ခတ်တိုက်ခိုက်ခံရပြီး တပ်စခန်းဘက်မှ လက်နက်ကြီးတွေနဲ့ ပြန်လည်ပစ်ခတ်

သြဂုတ် ၇၊ ၂၀၂၄ ခုနှစ်။

နေပြည်တော်ကောင်စီနယ်မြေ၊ ပျဥ်းမနားမြို့နယ် အရှေ့ဖက်ခြမ်း ဘိုးမအုပ်စု၊ ဘိုးမသံတောင်ကျေးရွာရှိ စစ်ကောင်စီတပ်စခန်းကို ပြည်သူ့ကာကွယ်ရေးတပ်ဖွဲ့တွေမှ ယနေ့ သြဂုတ်လ ၇ ရက်နေ့ မနက်ပိုင်း ၁၀ နာရီခွဲ ၁၁ နာရီဝန်းကျင်အချိန်က အဝေးပစ်လက်နက်တွေနဲ့ စတင်ပစ်ခတ်ခဲ့ရာ စစ်ကောင်စီတပ်မှလည်း လက်နက်ကြီးတွေနဲ့ ပြန်လည်ပစ်ခတ်ခဲ့တယ်လို့ သိရပါတယ်။

" ကျနော်တို့မှာ လက်နက်ကြီးတွေအပြန်အလှန် ပစ်ခတ်နေကြလို့ ရွာထဲမှာ ရွာသားတွေက မနေရဲတော့ဘူး" လို့ ဒေသခံတစ်ဦးမှ ပြောပါတယ်။

ဘိုးမသံတောင် စစ်ကောင်စီတပ်စခန်းဟာ ဘိုးမသံတောင်ကျေးရွာအပေါ်မှာတည်ရှိတာဖြစ်ပြီး အဲ့ဒီစခန်းကုန်းကို ပြည်သူ့ကာကွယ်ရေးတပ်ဖွဲ့တွေကနေ ယခုတစ်ကြိမ်အပါအ၀င် နှစ်ကြိမ်မြောက် လာရောက်တိုက်ခိုက်တာဖြစ်တယ်လို့လည်း သိရပါတယ်။

04/08/2024

လာရှိုးအရှေ့မြောက်တိုင်းစစ်ဌာနချုပ်ကို သိမ်းပိုက်မှု ရရှိမှုတွင် တိုင်းမှူးဟောင်း ဗိုလ်ချုပ် စိုးတင့်၊ တိုင်းစစ်ဦးစီးချုပ် ဗိုလ်မှူးချုပ် သန့်ထင်စိုး၊ အမှတ် ၁ စကခမှူး ဗိုလ်မှူးချုပ် မျိုးမင်းထွေးတို့ကို MNDAA က အရှင်းဖမ်းဆီးရရှိ

ရန်ကုန်၊ ဩဂုတ် ၄

လားရှိုးမြို့ MNDAA နှင့် ပူးပေါင်းတပ်များတိုက်ခိုက်ခဲ့သည့် တိုက်ပွဲများအတွင်း အကြမ်းဖက်စစ်တပ်ဘက်မှ ဗိုလ်မှူးချုပ် ၂ ဦးနှင့် ဗိုလ်ချုပ် ၁ ဦး အရှင်ဖမ်း မိခဲ့ကြောင်း CDM ဗိုလ်ကြီး ဇင်ယော်က ရန်ကုန်ခေတ်သစ်သတင်းဌာနသို့ ပြောကြားသည်။

အရှင်ဖမ်းမိသူများမှာ ဗိုလ်ချုပ် စိုးတင့်၊ အမှတ် ၁ စစ်ဆင်ရေးကွပ်ကဲမှုဌာနချုပ် စကခမှူး ဗိုလ်မှူးချုပ် မျိုးမင်းထွေး၊ ရမခ တိုင်းစစ်ဦးစီးချုပ် ဗိုလ်မှူးချုပ် သန့်ထင်စိုး တို့ ဖြစ်ကြကြောင်း သိရှိရသည်။

"ဒါ နောက်ဆက်တွဲဖြစ်စဉ်အသစ်ပါ"ဟု CDM ဗိုလ်ကြီး ဇင်ယော်က ရန်ကုန်ခေတ်သစ်သတင်းဌာနသို့ ပြောကြားသည်။

အရှေ့မြောက်တိုင်းစစ်ဌာနချုပ်၊ တိုင်းမှူးဟောင်း ဗိုလ်ချုပ် စိုးတင့် သည် အလုပ် သင်ဗိုလ် တေဇ ၁၆ ကျောင်းဆင်းဖြစ်ကြောင်း၊ တိုင်းစစ်ဦးစီးချုပ် ဗိုလ်မှူး ချုပ် သန့်ထင်စိုးသည် စစ်တက္ကသိုလ်အပတ်စဉ် ၄၁ ကျောင်းဆင်းဖြစ်ကြောင်း၊ ဗိုလ်မှူးချုပ် မျိုးမင်းထွေးမှာ ကျောက်မဲ အခြေစိုက် စစ်ဆင်ရေးကွပ်ကဲမှုဌာနချုပ် (စကခ) ၁ မှူး ဖြစ်ပြီး အလုပ်သင်ဗိုလ် တေဇ ၂၆ ကျောင်းဆင်းဖြစ်ကြောင်း သိရှိရသည်။

ဓာတ်ပုံ- တိုင်းမှူးဟောင်း ဗိုလ်ချုပ်စိုးတင့်နှင့် တိုင်းစစ်ဦးစီးချုပ် ဗိုလ်မှူးချုပ် သန့်ထင်စိုးတို့ကို အခမ်းအနားပွဲတစ်ခုတွင် တွေ့ရစဉ်။

Khit Thit Media

03/08/2024

Breaking News- လားရှိုးမြို့အခြေစိုက် အရှေ့မြောက်တိုင်းစစ်ဌာနချုပ် (ရမခ) ကို MNDAA ဦးဆောင်သော မဟာမိတ်တပ်များက အပြီးသတ် သိမ်းပိုက်ရရှိပြီး တိုင်းစစ်ဌာနချုပ်တစ်ခုကို ပထမဆုံးအကြိမ် ချေမှုန်းနိုင်ခြင်းဖြစ်

ရန်ကုန်၊ ဩဂုတ် ၃

ရှမ်းပြည်နယ်မြောက်ပိုင်း၊ လားရှိုးမြို့ အခြေစိုက် အရှေ့မြောက်တိုင်းစစ်ဌာန ချုပ်(ရမခ)ကို MNDAA ဦးဆောင်သော မဟာမိတ်တပ်များက ယနေ့တွင် အပြီးသတ်သိမ်းပိုက်ရရှိပြီဖြစ်ပြီး စစ်အာဏာသိမ်းပြီးနောက် တိုင်းစစ်ဌာနချုပ်တစ်ခုကို သိမ်းပိုက်ရရှိခြင်း ဖြစ်ကြောင်း သိရှိရသည်။

"မနေ့က ကျနော်တို့သိရတာက တချို့ စစ်ကောင်စီတပ်သားတွေ လက်နက်ချတာတွေရှိတယ်။ တချို့လည်း ရမခထဲကနေ ပွင့်နေတဲ့ လမ်းကြောင်းတွေကနေ ထွက်ပြေးတာတွေလည်းရှိနိုင်တယ်။ ရမခက အကျယ်ကြီးပဲ။ တကယ်က ရမခ ပတ်ပတ် လည်ကို မဟာမိတ်တပ်တွေအားလုံးက ၀ိုင်းရံပိတ်ဆို့ထားတာ။ ရမခ တကယ်ရပြီဆိုတာတော့ သက်ဆိုင်ရာ တာဝန်ရှိသူတွေက သတင်းတင်ပါလိမ့်မယ်" ဟု MNDAA ရှေ့တန်းသတင်းရင်းမြစ်က ရန်ကုန်ခေတ်သစ်သတင်းဌာနထံသို့ ပြောဆိုသည်။

ထို့ပြင် လားရှိုး ရမခ တိုင်းစစ်ဌာနချုပ်နယ်မြေထဲရှိ အကြမ်းဖက်စစ်သားများ အားလုံး ထွက်ပြေးသွားပြီဖြစ်ကာ MNDAA နဲ့ ပူးပေါင်းတပ်ဖွဲ့များ ခြေကုတ်ယူပြီး နယ်မြေ ရှင်းနိုင်ပြီ ဖြစ်ကြောင်း CDM ဗိုလ်ကြီး ဇင်ယော်က စစ်တပ်သတင်းရင်းမြစ်များကို ကိုးကား၍ ရန်ကုန်ခေတ်သစ်သတင်းဌာနသို့ ပြောကြားသည်။

လက်ရှိတွင် ရမခ တိုင်းစစ်ဌာနချုပ်နယ်မြေထဲရှိ အကြမ်းဖက်စစ်သားများအားလုံး စွန့်ခွာသွားပြီဖြစ်ကြောင်း ၊ လက်နက်ချ မချ၊ သေချာ မပြောနိုင်သေးသော်လည်း အကြမ်းဖက်စစ်သားများ အားလုံး တိုင်းစစ်ဌာနချုပ်တွင် မရှိတော့ကြောင်း CDM ဗိုလ်ကြီး ဇင်ယော်က ပြောဆိုသည်။

“အခုလက်ရှိအနေအထားမှာတော့ ရမခ တိုင်းစစ်ဌာနချုပ် စခန်းဌာနချုပ်နယ်မြေထဲမှာ စစ်ကောင်စီတပ်ဖွဲ့ဝင်တွေ မရှိတော့ဘူး ။ MNDAA နဲ့ ပူးပေါင်းတပ်ဖွဲ့တွေ ဝင်ပြီးတော့ ခြေကုတ်ယူပြီးတော့ နယ်မြေရှင်းနိုင်တဲ့ အဆင့်ကို ရောက်နေတာတော့ သေချာသွားပါပြီဗျ။ လက်နက်ချခြင်း၊ မချခြင်းကတော့ ကျွန်တော်တို့ သေချာမပြောနိုင်သေးပါဘူး။ လက်နက်ချဖို့ ရာခိုင်နှုန်းကတော့ နည်းပါတယ်။ သူတို့တွေ လုံးဝ တစ်နေရာကို ပြောင်းပြီးတော့ ခံစစ်ဆင်တဲ့ အနေအထားမျိုးတော့ များပါတယ်။ ဒါပေမဲ့ ရမခ တိုင်းစစ်ဌာနချုပ်ရဲ့ စခန်းဌာနချုပ် နယ်မြေကြီး တစ်ခုလုံးကတော့ စစ်ကောင်စီတပ်တွေ အားလုံး စွန့်ခွာသွားပြီဖြစ်ပါတယ်ဗျ” ဟု CDM ဗိုလ်ကြီး ဇင်ယော်က ရန်ကုန်ခေတ်သစ်သတင်းဌာနသို့ ပြောကြားသည်။

ဓာတ်ပုံ- ခလရ ၄၁ ကို MNDAA တပ်များက ဝင်ရောက် သိမ်းပိုက်စဉ်။

Khit Thit Media

25/07/2024

ရှမ်းပြည်မြောက်ပိုင်းတွင် အကြီးဆုံးမြို.ဖြစ်သော လားရှိုးမြို.ရှိ စစ်တပ်၏ စစ်ဌာနချုပ် အရှေ.မြောက်တိုင်းစစ်ဌာနချုပ်အား ကိုးကန့်တပ်မတော်က ထိုးစစ်ဆင်ပြီး ယနေ့မနက် ၄ နာရီတွင် သိမ်းပိုက်နိုင်ခဲ့ပြီဖြစ်ကြောင်း ကိုးကန့်တပ် MNDAA က သတင်းထုတ်ပြန်လိုက်သည်။

“လားရှိုးမြို့ လွတ်မြောက်ရေး တော်လှန်ရေး လှုပ်ရှားမှုသည် သမိုင်းဝင်အောင်ပွဲတစ်ခု ဖြစ်သည်” ဟု MNDAA တပ်၏ လူမူကွန်ယက်စာမျက်နှာကတစ်ဆင့် သတင်းထုတ်ပြန်ခဲ့ခြင်း ဖြစ်သည်။

ယမန့်နေ့က လည်း တအာန်းလွတ်မြောက်ရေးတပ်နှင့် မန္တလေးပြည်သူ့ကာကွယ်ရေးတပ်ဖွဲ့များက ပတ္တမြားထွက်ရာ မိုးကုတ်မြို.ကို သိမ်းပိုက်နိုင်ခဲ့သည်။ မန္တလေးမြို.၏ မြောက်ဖက်ရှိ သပိတ်ကျင်းမြို.နှင့် မတ္တရာမြို.များတွင်လည်း စစ်ကောင်စီတပ်ဖွဲ့များနှင့် တော်လှန်ရေးမဟာမိတ်တပ်များ တိုက်ပွဲများ ယနေ့မနက်ထိ ဆက်လက်ဖြစ်ပွားနေသည်။

သတင်းအပြည့်အစုံဆက်လက်တင်ဆက်ပါမည်။

Myanmar Now

20/07/2024

စဥ့်ကူးမြို့အပါအဝင်မြို့နယ်တစ်ခုလုံးကို မန္တလေး PDF အပြီးသတ်သိမ်းပိုက်

▪︎မန္တလေးတိုင်းအတွင်း ပထမဆုံးသိမ်းယူသော မြို့အဖြစ် သမိုင်းမှတ်တမ်းတင်

-ဇေအောင် ၊ ယောနသံ /People's Spring

ပြည်သူ့ကာကွယ်ရေးတပ်မတော် (မန္တလေး)သည် စဉ်ကူးမြို့နယ်အတွင်းရှိ စစ်ကောင်စီ စခန်းများအားလုံးနှင့်စဉ့်ကူးမြို့ကို ၂၀၂၄ ခုနှစ် ဇူလိုင်(၁၇)ရက်နေ့တွင် အပြီးသတ် သိမ်းပိုက်နိုင်ခဲ့ကြောင်းထုတ်ပြန်လိုက်သည်။

စဉ့်ကူးမြို့နယ်သည် စစ်ကောင်စီ ကင်းစင်သော မြို့နယ်တစ်ခုဖြစ်လာပြီး စဉ့်ကူးမြို့သည်လည်း ပြည်သူ့ကာကွယ်ရေးတပ်မတော် (မန္တလေး) မှ မန္တလေးတိုင်းအတွင်း ပထမဆုံးသိမ်းယူသော မြို့အဖြစ် သမိုင်းမှတ်တမ်းတင်နိုင်ခဲ့ပြီဖြစ်ကြောင်း.မန္တလေး PDF က ယနေ့ (ဇူလိုင် ၂၀ )ထုတ်ပြန်ချက်၌ဖော်ပြသည်။

စဉ့်ကူးစစ်ဆင်ရေးများတွင် စစ်သုံ့ပန်း အများအပြား ဖမ်းဆီးရမိခဲ့ပြီး လက်နက်ခဲယမ်းအများအပြားလည်း သိမ်းဆည်းရရှိခဲ့သည်။

စစ်ဆင်ရေးများတွင် ပြည်သူ့ကာကွယ်ရေးတပ်မတော် (မန္တလေး)ဘက်မှ ထိုက်သင့်သော ပေးဆပ်မှုအချို့ရှိခဲ့ပြီး အသက်ပေးလှူသွားခဲ့သော ရဲဘော်များအား ဦးညွှတ် အလေးပြု မှတ်တမ်းတင်အပ်ပါသည်ဟုဖော်ပြသည်။

စဉ့်ကူးစစ်ဆင်ရေးများတွင် စစ်ကောင်စီမှ လေကြောင်းတိုက်ခိုက်မှုများ အဆက်မပြတ်ပြုလုပ်ခဲ့သောကြောင့် မြို့နေဧရိယာများ ၊ အရပ်သားပြည်သူနေအိမ်များ ထိခိုက်ပျက်စီးခဲ့သည်ဟုပြည်သူ့ကာကွယ်ရေးတပ်မတော် (မန္တလေး)
စစ်ဦးစီးအဖွဲ့ ကအသိပေးထားသည်။

"စဥ့်ကူးမြို့ကို စစ်ကောင်စီဘက်က လုံးဝလက်လွှတ်လိုက်ရပြီဖြစ်ပေမယ့် လေကြောင်းတိုက်ခိုက်မှုတွေ လက်နက်ကြီးပစ်ခတ်မှုတွေတော့ ပြုလုပ်နေဆဲဖြစ်ပါတယ်ခင်ဗျ။"ဟု ပြည်သူ့ကာကွယ်ရေးတပ်မတော်(မန္တလေး)၏ ပြောရေးဆို
ခွင့်ရှိသူ ကိုအော်စမွန်က ပြောသည်။

ပြည်သူ့ကာကွယ်ရေးတပ်မတော် (မန္တလေး)သည် စဉ့်ကူးမြို့မသိမ်းမီက ယင်းနယ်အတွင်းရှိရွှေပြည် ရဲစခန်း ၊ လက်ပန်လှ ရဲစခန်း ၊ ကျည်တောက်ပေါက် တပ်စခန်း ၊ ကန်တောင် တပ်စခန်း နှင့် ပင်လယ်ကြီး တပ်စခန်းများအပါအဝင် တပ်စခန်းပများအပြားကိုတိုက်ခိုက်သိမ်းပိုက်ခဲ့ သည်။

စဉ့်ကူးစစ်ဆင်ရေးများအတွင်း စစ်အုပ်စုဝင်များ ထိခိုက်သေဆုံးများပြီး လက်နက်ခဲယမ်းများလည်း သိမ်းဆည်းရမိခဲ့သည်။စစ်ဆင်ရေးအတွင်း စစ်ကောင်စီဘက်မှ သပိတ်ကျင်းမြို့နယ် ဒုတပ်မှုး ဒုတိယဗိုလ်မှူးကြီး လှိုင်းထွန်းအောင် (OTC-19) အပါအဝင် (၁၅)ဦး အရှင်ဖမ်းဆီးရမိခဲ့သည် ။ လက်နက်ချ အလင်းဝင်သော ပသစ(ပျူစောထီး)တပ်ဖွဲ့များလည်း ရှိခဲ့သည်။

စဉ့်ကူးမြို့နယ် ပင်လယ်ကြီးတပ်စခန်းမှ ထွက်ပြေးသော စစ်ကောင်စီတပ်သားများကို လိုက်လံချေမှုန်းရာ ဗိုလ်ကြီး(၁)ဦး အပါအဝင် သုံ့ပန်း (၄)ဦးခန့် ထပ်မံဖမ်းဆီးရမိခဲ့သည်။ ထို့အပြင် ရန်သူ့အလောင်း(၂)လောင်းနှင့် လက်နက်ခဲယမ်းများလည်း ထပ်မံသိမ်းဆည်းရမိခဲ့သည်။

ထို့အပြင် စဉ့်ကူးစစ်ဆင်ရေးများတွင် စစ်ကောင်စီမှ လေ
ကြောင်းဖြင့် ချပေးခဲ့သော လက်နက်ခဲယမ်းအထုပ်များအပါအဝင် အခြားသောလက်နက်ခဲယမ်းအများအပြားကိုလည်း သိမ်းဆည်းရမိခဲ့သည်။

စဉ့်ကူးစစ်ဆင်ရေးများတွင် ပြည်သူ့ကာကွယ်ရေးတပ်မတော် (မန္တလေး)အား စဉ့်ကူးမြို့နယ် ပကဖမှ ထောက်ပို့ဆိုင်ရာလုပ်ငန်းများကို ပံ့ပိုးကူညီပေးခဲ့ကြောင်းအသိပေးထား သည်။

People's Spring

16/07/2024

နေပြည်တော် အေလာလေဆိပ်ကို ၁၀၇ မမ ရှော့တိုက်ဒုံးဖြင့် ပစ်ခတ် တိုက်ခိုက်မှု လေတပ် အရာရှိ ၄ ဦး အပါအဝင် ၁၆ ဦးသေဆုံး၊ တိုက်လေယာဉ် ၂ စီး အပါအဝင် လေယာဉ် ၃ စီး ပျက်စီးပြီး အဆောက်အအုံများ ထိခိုက်ပျက်စီး

■ အေလာလေဆိပ်အနီးရှိ ကျေးရွာ ၇ ရွာကို စစ်တပ်က ဝင်ရောက် စီးနင်းပြီး ပြည်သူ ၁၂ ဦးကို အကြောင်းမဲ့ ဖမ်းဆီးထား

ရန်ကုန်၊ ဇူလိုင် ၁၆

နေပြည်တော် အေလာလေဆိပ်ကို ၁၀၇ မမ ရှော့တိုက်ဒုံးဖြင့် ပစ်ခတ် တိုက်ခိုက်ရာ လေတပ်အရာရှိ‌ ၄ ဦးအပါအဝင် ၁၆ ဦးသေဆုံးပြီး တိုက်လေယာဉ် ၂ စီးအပါအဝင် လေယာဉ် ၃ စီး ပျက်စီးကာ အဆောက်အအုံများလည်း ထိခိုက်ပျက်စီးခဲ့ကြောင်း Mountain Knights Civilian Defense Force (MKCDF) မှ တာဝန်ရှိသူ တစ်ဦးက ရန်ကုန်ခေတ်သစ် မီဒီယာသို့ ပြောဆိုသည်။

ယနေ့ ဇူလိုင်လ ၁၆ ရက်နေ့ နံနက် ၉ နာရီခန့်တွင် နေပြည်တော် အေလာလေတပ်အတွင်းကို ၁၀၇ မမ ရှော့တိုက်ဒုံး ၇ လုံးဖြင့် ပစ်ခတ် တိုက်ခိုက်ခဲ့ပြီး ရှော့တိုက်ဒုံး ၅ လုံးသည် ပစ်မှတ်ကို အောင်မြင်စွာ ထိမှန်ပေါက်ကွဲခဲ့ပြီး လေတပ်အရာရှိ ၄ ဦးနှင့် လေတပ်အခြား အဆင့်စစ်သည် ၁၂ ဦး သေဆုံးခဲ့ကြောင်း၊ ထို့ပြင် A-5 Bomber Jet Fighter ၁ စီး သုံးမရအောင် ပျက်စီးပြီး နောက်ထပ် Jet Fighter ၁ စီး ခေါင်းပိုင်းထိခိုက် ပျက်စီးခဲ့ကြောင်း၊ Y-12 Military Transport Aircraft ၁ စီးလည်း ထိခိုက်ပျက်စီးခဲ့ကြောင်း သိရသည်။

အလားတူ အဆောက်အဦး ၄ လုံး၊ လက်နက် ခဲယမ်းတိုက် ၁ လုံး၊ လေယာဥ်ပြုပြင်ရေး အပိုပစ္စည်း ဂိုဒေါင်ရုံတို့ မီးလောက်ပျက်စီးခဲ့ပြီး လေတပ်အရာရှိ ၃ ဦးနှင့် အခြားအဆင့် ၇ ဦးလည်းပျောက်ဆုံး နေကြောင်း သိရှိရသည်။

အဆိုပါ တိုက်ခိုက်မှုကို Mountain Knights Civilian Defense Force (MKCDF) အဖွဲ့ နှင့် Mercury Revolution Force (MRF) သည် Brave Warriors for Myanmar (BWM) အဖွဲ့၏ စီမံမှု ဖြင့် တိုက် ခိုက်ခဲ့ခြင်းဖြစ်ပြီး ပစ်ခတ်တိုက်ခိုက်ခဲ့သည့် ရဲဘော်အားလုံး ဘေးကင်းလုံခြုံစွာ ဆုတ်ခွာနိုင်ခဲ့ကြောင်း သိရသည်။

တိုက်ခိုက်မှု ဖြစ်ပွားပြီးနောက် အကြမ်းဖက် စစ်တပ်က အေလာလေဆိပ်အနီးရှိ ကျေးရွာ ၇ ရွာကို သေနတ် ပစ်ဖောက်၍ ဝင်ရောက် စီးနင်းပြီး ပြည်သူ ၁၂ ဦးကို အကြောင်းမဲ့ ဖမ်းဆီးသွားကြောင်း သိရှိရသည်။

"နေပြည်တော် မြို့အဝင် လမ်းကြောင်းကို ဇူလိုင်လ ၁၂ ရက်နေ့ကတည်းက အခုထိ လုံခြုံရေး အပြည့်ချထားပြီးတင်းကြပ်ထားတယ်။ အဲ့ကြားထဲကနေ ကျနော်တို့ ရဲဘော်တွေ အေလာလေတပ်ကို အလစ်ဝင်လုပ်တယ်။ ပစ်ပြီးပြီးချင်း စစ်ကောင်စီ တပ်ဖွဲ့တွေက ဖြစ်နိုင်ချေရှိတဲ့ နေရာတွေအားလုံးကို ဝိုင်းပိတ်တယ်။ ရွာ ၇ ရွာကို ပိုက်စိတ်တိုက်ဝင်ရှာတယ်။ ဖမ်းတယ်။ ရွာတွေ ပတ်ချာလည်က ကြံခင်း နှမ်းခင်း ပြောင်းခင်းတွေကို လက်နက်ငယ် ငါးကျင်းမြီး၊ စက်သေနတ်တွေနဲ့လိုက်ပစ်နေတယ် သံသရရှိသူ ၁၂ ကို ဦးဖမ်းသွားတယ်" ဟု Mountain Knights Civilian Defense Force (MKCDF) မှ တာဝန်ရှိသူ တစ်ဦးက ပြောဆိုသည်။

ဧလာလေတပ်စခန်းသည် လုံခြုံရေးအထူးတင်းကြပ်သော အဆင့်မြင့်လေဆိပ်ဖြစ်ပြီး အာဏာသိမ်း စစ်တပ်က ကရင်နီဒေသနှင့် ကရင်ပြည်နယ်အပါအဝင် နိုင်ငံအနှံ့အပြားမှ ပြည်သူများနှင့် တော်လှန် ရေးအင်အားစုများကို ဗုံးကျဲတိုက်ခိုက်ရာတွင် အထူး အားထားရသော လေဆိပ်ဖြစ်ကြောင်း သိရသည်။

အဆိုပါ မစ်ရှင်သည် BWM အဖွဲ့ နှင့် MKCDF အဖွဲ့တို့က တစိုက်မတ်မတ် ပူးပေါင်းဖော်ဆောင်နေသော လေတပ်ချေမှုန်းရေး စီမံချက်၏ အစိတ်အပိုင်းတစ်ရပ်ဖြစ်ပြီး ယခုတိုက်ပါတိုက်ခိုက်မှု အပါအဝင် နေပြည်တော်ဧလာလေတပ်ကို ၅ ကြိမ်မြောက် တိုက်ခိုက်ခြင်းဖြစ်ကြောင်း၊ အာဏာသိမ်းစစ်ဗိုလ် ချုပ်များ အခြေအနေမကောင်းလျှင် ပြည်ပသို့ထွက်ပြေးရန် အားထားရသည့် လေတပ်ဖြစ်သော ကြောင့် စစ်ဗိုလ်ချုပ်များပြေးပေါက် မရှိရန်လည်း ရည်ရွယ်တိုက်ခိုက်ခဲ့ခြင်းဖြစ်ကြောင်း သိရသည်။

"ကျွန်တော်တို့ မစ်ရှင်မှာ ဦးဆောင်စီမံပေးတဲ့ BWM အဖွဲ့ကိုရော Mercury Revolution Force အဖွဲ့ကိုရော ကဏ္ဍအသီးသီး ကနေပါဝင်အားဖြည့်ပေးတဲ့ မဟာမိတ်ရဲဘော်ရဲဘက်တွေအားလုံးကိုကျေးဇူးတင်ပါတယ်လို့ပြောချင်ပါတယ်" ဟု Mountain Knights Civilian Defense Force (MKCDF) မှ တာဝန်ရှိသူ တစ်ဦးက ဆက်လက် ပြောဆိုသည်။

Photo - အေလာလေဆိပ်ကို ပစ်ခတ်ခဲ့သော ၁၀၇ မမ ရှော့တိုက်ဒုံး

Khit Thit Media

14/07/2024

Breaking News - စဉ့်ကူးမြို့ကို တော်လှန်ရေး တပ်ဖွဲ့များ သိမ်းပိုက်

ရန်ကုန်၊ ဇူလိုင် ၁၄

မန္တလေးတိုင်း၊ စဉ့်ကူးမြို့ကို တော်လှန်ရေး တပ်ဖွဲ့များ သိမ်းပိုက် ထိန်းချုပ်လိုက်ပြီးဖြစ်ကြောင်း စဉ့်ကူးမြို့နယ် မြေပြင်သတင်းမှန်ပြန်ကြားရေး အဖွဲ့မှ တာဝန်ရှိသူ တစ်ဦးက ရန်ကုန်ခေတ်သစ် မီဒီယာသို့ ပြောဆိုသည်။

ယနေ့ ဇူလိုင်လ ၁၄ ရက်နေ့တွင် စဉ့်ကူးမြို့၌ အကြမ်းဖက် စစ်တပ်နှင့် တော်လှန်ရေး တပ်ဖွဲ့များ တိုက်ပွဲပြင်းထန်ခဲ့ပြီး စစ်တပ်က ဂျက်ဖိုက်တာ ၊ Mi35 တို့ဖြင့် လေကြောင်း ပစ်ကူများ ဆက်တိုက် ပစ်ခတ် နေသည့်ကြားမှ တော်လှန်ရေး တပ်ဖွဲ့များက စဉ့်ကူးမြို့ကို သိမ်းပိုက် ထိန်းချုပ်နိုင်ခဲ့ခြင်းဖြစ်ကြောင်း သိရသည်။

လက်ရှိချိန်တွင် တိုက်ပွဲဝင် ရဲဘော်များကို မြို့နယ်နေ ပြည်သူများက သောင်းသောင်းဖျဖျ ကြိုဆိုနေကြောင်း စဉ့်ကူးမြို့နယ် မြေပြင် သတင်းမှန်ပြန်ကြားရေး အဖွဲ့မှ တာဝန်ရှိသူ တစ်ဦးက ပြောဆိုသည်။

"စဉ့်ကူးမြို့ကို တော်လှန်ရေး တပ်ဖွဲ့တွေ ထိန်းချုပ်လိုက်ပြီး ညနေ ၃ နာရီလောက်မှာ မြေပြင်ကို အကုန်ရှင်းနိုင်ခဲ့တယ်။ စစ်ခွေး အသေအ‌ပျောက်တော့ အတည်မပြုနိုင်သေးဘူး" ဟု စဉ့်ကူးမြို့နယ် မြေပြင်သတင်းမှန်ပြန်ကြားရေး အဖွဲ့မှ တာဝန်ရှိသူ တစ်ဦးက ပြောဆိုသည်။

Khit Thit Media

07/07/2024

မောင်တောနှင့် သံတွဲတိုက်ပွဲ စစ်ကောင်စီတပ်အလောင်း ၇၅၀ ကျော်နှင့် လက်နက်ခဲယမ်းများ သိမ်းရဟု AA အသိပေး

▪️ငပလီလေဆိပ်ထိန်းချုပ်ထားနိုင်ဟုဆို

▪️အမ်း၊ နပခ စစ်တိုင်း၊ စကခ (၅)တောင်ကုတ်၊ စစ်တွေ(ဒကစ)နှင့် ဓည၀တီရေတပ်စခန်း ဌာနချုပ်များအား ဖြတ်တောက်ပိတ်ဆို့ထား

▪️သံတွဲမြို့သိမ်းတိုက်ပွဲမှာ အခက်ခဲဆုံးဟု AA အသိပေး

ရှိုင်း၊မိထက်/People’s Spring

ရက္ခိုင်ပြည်နယ် မောင်တောမြို့နယ်တိုက်ပွဲနှင့် သံတွဲမြို့နယ် တိုက်ပွဲတွင် စစ်ကောင်စီတပ်က သေဆုံးထိခိုက်များပြားခဲ့ပြီး အဆိုပါမြို့နယ် နှစ်ခု တိုက်ပွဲများ၌ စစ်ကောင်စီတပ်ဖွဲ့ အလောင်း ၇၅၀ ကျော်၊ လက်နက်ခဲယမ်းများစွာ သိမ်းပိုက် ရရှိခဲ့ဟု အာရက္ခတပ်တော်(AA)က ထုတ်ပြန် ကြေညာသည်။

အာရက္ခဒေသတစ်ခုလုံးအတွင်း၌ စစ်ကောင်စီ ၏တပ်များအားလုံး အနှေးနှင့်အမြန်ကင်းစင်ရမည်ဟူသော စစ်ရေးရည်မှန်းချက်အတိုင်း စစ်ကောင်စီတပ်ရင်းတပ်ဖွဲ့များအား ထိုးစစ်ဆင်ခဲ့ရာ အနောက်ပိုင်းတိုင်းစစ်ဌာနချုပ်တည်ရှိရာ အမ်းမြို့၊ ငပလီ ကမ်းခြေရှိရာ သံတွဲမြို့နှင့် နခခ(၂)၊ နခခ(၅) တည်ရှိရာ မောင်တောမြို့များ၌ တိုက်ပွဲများဆက်လက်ပြင်းထန်လျက်ရှိကြောင်း အသိပေးသည်။

၂၀၂၃ နိုဝင်ဘာ ၁၃ရက်မှစတင်ခဲ့သော အာရက္ခဒေသအတွင်း တိုက်ပွဲဖြစ်ပွားနေသည်မှာ (၇) လခွဲကျော် ကြာမြင့်ခဲ့ပြီး မိုးတွင်းကာလဖြစ်သည့်တိုင် တိုက်ပွဲအရှိန်လျော့ကျ၊ ရပ်တန့်ခြင်းမရှိဘဲ တစ်ရက်ပြီး တစ်ရက်ဆက်လက်မြင့်တက်လျက်ရှိသည်ဟု ဖော်ပြသည်။

စစ်ကောင်စီဘက်မှလည်း ကြည်း၊ ရေ၊ လေ တပ်များအစုံသုံးပြီး ခုခံစစ်များဖြင့် အသည်းအသန်ခုခံနေသကဲ့သို့ AA ဘက်ကလည်း လက်နက်ချအညံ့မခံသေးသော စစ်ကောင်စီ၏ တပ်စခန်းတိုင်းအား ထိုးစစ်ဆင်တိုက်ခိုက်လျက်ရှိကြောင်း အသိပေးသည်။

ဇွန်လ ၂၃ရက်တွင် အမ်းမြို့နယ်ရှိ စစ်ကောင်စီ၏ ရှေ့တန်းတပ်မ အထိုင်ဗျူဟာစခန်းကြီးဖြစ်သော တောဟိန်းတောင်ဗျူဟာအား အပြီးသတ်သိမ်းပိုက်ရရှိခဲ့ကြောင်း၊ ယင်းတပ်စခန်းရရှိရေး ၂လကျော်ကြာ ထိုးစစ်ဆင်ခဲ့ရပြီး AAဘက်ကလည်း ထိုက်သင့်သည့်ကျဆုံးထိခိုက်မှုရှိခဲ့ကြောင်း ၊ရန်သူ့အလောင်း အမြောက်အမြား၊ စစ်အသုံးအဆောင်ပစ္စည်းများနှင့် လက်နက်ခဲယမ်းအချို့အား သိမ်းဆည်းရမိခဲ့ကြောင်း ထုတ်ပြန်သည်။

အဆိုပါဗျူဟာကုန်းများမှ ထွက်ပြေးလွတ်မြောက်နေသောသူများအား လိုက်လံချေမှုန်း တိုက်ခိုက်လျက်ရှိသကဲ့သို့ အနောက်ပိုင်းတိုင်းစစ်ဌာနချုပ် (အမ်း)အား ဝိုင်းရံပိတ်ဆို့ ဖြတ်တောက်မှုများနှင့်အတူ ထိုးစစ်ဆင် တိုက်ခိုက်လျက်ရှိသည်ဟု ဆိုသည်။

မောင်တောဒေသ တိုက်ပွဲတွင်လည်း အမှတ်(၁၇) စစ်ဆင်ရေးကွပ်ကဲမှုဌာနချုပ်(စကခ-၁၇) တပ်ရင်းများ စုပေါင်း ခုခံတိုက်ခိုက်နေသည့် နခခ (၂)၊ နယ်ခြားစောင့်တပ်စခန်းအားယခု ဇူလိုင် ၆ရက်တွင် သိမ်းနိုင်ခဲ့သည်ဟု ဆိုသည်။

အဆိုပါ တပ်စခန်းမှ စစ်ကောင်စီတပ်ဖွဲ့ဝင် အလောင်း ၃၅၀ကျော်၊ လက်နက်ခဲယမ်း၊ စစ်အသုံးအဆောင်ပစ္စည်းအများအပြားတို့ ကို သိမ်းပိုက်ရရှိခဲ့ကြောင်း ဖော်ပြသည်။

ဧပြီ ၁၃ရက်က စတင်ထိုးစစ်ဆင်ခဲ့သည့် သံတွဲမြို့နယ် တိုက်ပွဲကိုလည်း ဖော်ပြခဲ့ရာ ဇွန်လနှင့် ဇူလိုင်တွင် တိုက်ပွအရှိန်ပြင်းထန်ခဲ့ပြီး ဇူလိုင် ၅ရက် မနက်တွင် ငပလီ (မဇင်)လေဆိပ်အား ထိန်းချုပ်ထားနိုင်ပြီးဖြစ်သည်ဟု အသိပေးသည်။

သံတွဲဒေသအတွင်း၌ စစ်ကောင်စီ၏ သံတွဲအခြေစိုက်တပ်ရင်းများဖြစ်ကြသော ခမရ (၅၆၆) နှင့် ခလရ (၅၅) တပ်ရင်းတို့အပြင် တပ်မ (၁၀၁) လက်အောက်ခံတပ်ရင်းများဖြစ်ကြသော ခလရ (၂၃၅)၊ ခလရ (၂၅၁)၊ ခလရ (၂၅၂)၊ ခလရ (၂၅၃)၊ ခလရ (၂၅၄)၊ ခလရ (၂၅၅)၊ ခလရ (၂၅၆)၊ ခလရ (၂၅၇)၊ ခလရ (၂၅၈)၊ ခလရ (၂၅၉) နှင့် ခမရ (၃၁၅) (မိတ္ထီလာ-တမခ-၉၉) - လပခ ၊ ခမရ (၃၆၆) (မော်လိုက်-စကခ-၁၀-ကလေး) - နမခ၊ ဧရာဝတီအခြေစိုက် တပ်ရင်းအချို့၊ စစ်ကောင်စီ၏ သံတွဲဒေသခံ ပြည်သူ့စစ်တပ်ရင်းအချို့ နှင့် Myanmar Navy SEALs တပ်ဖွဲ့ဝင်များပါဝင်ကာ ခုခံခဲ့သည်ဟုဆိုသည်။

ထို့ပြင် ဘင်္ဂလားပင်လယ်ပြင်ထက်တွင် တပ်စွဲထားသော ရေတပ်စစ်သင်္ဘော (၅)စီးပါ စစ်ရေယာဉ်စု၊ ကွင်းဝိုင်း၊ သပြုချိုင်၊ ဂျိတ်တော စသည့်နေရာများမှ လက်နက်ကြီးပစ်ကူ၊ လေကြောင်းပစ်ကူ၊ ဒရုန်းတိုက်ခိုက်မှု အမြောက်အမြား ပစ်ကူပေးပြီး ကြည်း၊ ရေ၊ လေ စုပေါင်းပြီး အသည်းအသန် ခုခံကာကွယ်နေခဲ့ကြောင်း ဖော်ပြသည်။

သံတွဲတိုက်ပွဲသည် ရက္ခိုင်ဒေသ မြို့သိမ်းတိုက်ပွဲများအတွင်း အခက်ခဲဆုံးမြို့သိမ်းတိုက်ပွဲဖြစ်ကြောင်း AAက အသိပေးသည်။

သို့သော်လည်း စစ်ကောင်စီဘက်က အထိနာခဲ့ပြီး စစ်ကောင်စီ တပ်ဖွဲ့ဝင်အလောင်း ၄၀၀ကျော်နှင့် လက်နက်ခဲယမ်းများ သိမ်းရခဲ့ဟု AAက ထုတ်ပြန်သည်။

သံတွဲအခြေစိုက် ခမရ(၅၆၆) တပ်ရင်းအား ဇွန်လ ၂၇ရက်တွင် သိမ်းပိုက်နိုင်ခဲ့ပြီး သံတွဲမြို့အနီးပတ်ဝန်းကျင်ရှိ အခြားသော ရန်သူ့တပ်စွဲထားသော စခန်းအချို့တို့ကိုလည်း သိမ်းပိုက်ရရှိထားပြီးဖြစ်ကြောင်း အသိပေးသည်။

ခမရ (၅၆၆)အား လက်လွှတ်လိုက်ရသည့် နောက်ပိုင်းတွင် ရန်သူသည် သံတွဲ၊ လေဆိပ်အတွင်း၊ လေဆိပ်အနီးအဆောက်အအုံများ၊ နာမည်ကြီးဟော်တယ်ကြီးများနှင့် ဇီးဖြူကုန်းရှိ သုံးထပ်တိုက် တစ်တိုက်ထဲမှ ခုခံစစ်များကိုဆင်နွှဲခဲ့ကြောင်း၊ သို့သော်လည်း ရန်သူများအားလုံးကို ချေမှုန်းနိုင်ခဲ့ကြောင်း၊ ရန်သူအများစုမှာ တပ်မ (၁၀၁)၏ လက်အောက်ခံ တပ်ရင်းများဖြစ်ကြပြီး အဆိုပါတပ်ရင်းများအားလုံးနီးပါးကို အပြတ်အသတ်ချေမှုန်းနိုင်ခဲ့ကြောင်း AAက ထုတ်ပြန်သည်။

သံတွဲဒေသတိုက်ပွဲများအတွင်း ရန်သူ့အလောင်း ၄၀၀ကျော်၊ လက်နက်ခဲယမ်း အများအပြားကိုသိမ်းဆည်းရ မိခဲ့ပြီး သိမ်းဆည်းရမိသည့် ရန်သူ့အလောင်းများအား ကောင်းမွန်စွာမြေမြှုပ်သင်္ဂြိုလ်ခဲ့ပြီးဖြစ်သည်ဟု ဖော်ပြသည်။

သံတွဲအခြေစိုက်တပ်ရင်းဖြစ်ပြီး လက်ရှိတွင် တစ်ခုတည်းသော လက်ကျန်တပ်ရင်းဖြစ်သော ခလရ (၅၅)တပ်ရင်းအား ဆက်လက်ထိုးစစ်ဆင်နေကြောင်းလည်း အသိပေးသည်။

ထို့ပြင် ထွက်ပြေးလွတ်မြောက်နေသော ရန်သူများကို လိုက်လံချေမှုန်းလျက်ရှိကြောင်း၊ ခလရ (၅၅) နှင့်အတူ (၁၀၁) တပ်မလက်အောက်ခံ၊ ပခုက္ကူအခြေစိုက် ခလရ (၂၅၂) တပ်ရင်းနှင့် အခြားအမည်မသိသေးသော တပ်ရင်းအချို့တို့ စုပေါင်းပြီး ခလရ (၅၅)တပ်ရင်းနှင့် ၎င်းပတ်ဝန်းကျင် အနီးမှ ခုခံတိုက်ခိုက်လျက်ရှိသကဲ့သို့ ရေတပ်၊ လေကြောင်းပစ်ကူ တိုက်ခိုက်မှုများကြောင့် တိုက်ပွဲများမှာ ယနေ့ ညနေပိုင်းအထိ ပြင်းထန်နေဆဲဖြစ်ကြောင်း ဖော်ပြသည်။

အာရက္ခဒေသတိုက်ပွဲများအတွင်း အသက်၊ ခန္ဓာစွန့်လွှတ်ခဲ့ကြသော အာရက္ခစစ်သည်တော်များ၊ သတ္တိပြောင် မြောက်စွာဖြင့် ပေးအပ်လာသော အမိန့်နှင့်တာဝန်ကို ကျေပွန်စွာထမ်းဆောင်ခဲ့ကြသော စစ်ဒေသအသီးသီးမှ အာရက္ခစစ်သည် တော်များ၊ ဆေးဘက်ဆိုင်ရာဝန်ထမ်း၊ ပူးပေါင်းဆောင်ရွက်ကူညီပေးကြသော အာရက္ခပြည်သူများ အားလုံးကို လေးနက်စွာမှတ်တမ်းတင်ဂုဏ်ပြုကြောင်းလည်း AAက ထုတ်ပြန်သည်။

အခြားတစ်ဖက်တွင် ရန်သူ၏အရေးပါသော စခန်းကြီးများဖြစ်ကြသော အမ်း၊ နပခ ဌာနချုပ်၊ စကခ (၅) တောင်ကုတ်ဌာနချုပ်၊ စစ်တွေ(ဒကစ) ဌာနချုပ်နှင့် ဓညဝတီ ရေတပ်ဌာနချုပ်တို့အား ဖြတ်တောက်ပိတ်ဆို့ထားပြီး ဖြစ်သကဲ့သို့ အချို့စခန်းများကို ထိုးစစ်ဆင်တိုက်ခိုက်နေပြီဖြစ်ကြောင်း၊ ရန်သူ့စခန်းတချို့ကိုလည်း တစ်ဝက်တစ်ပျက် သိမ်းဆည်းထားပြီးဖြစ်ကြောင်း ထုတ်ပြန်သည်။

(မောင်တောမြို့နယ်နှင့် သံတွဲမြို့သိမ်းတိုက်ပွဲအတွင်း သိမ်းရသော တပ်စခန်းများ။ ဓာတ်ပုံ - AA)

People's Spring

23/06/2024

Breaking News - အမ်းမြို့နယ်ရှိ အနောက်ပိုင်းတိုင်းစစ်ဌာနချုပ် ၏ ရှေ့ကာ စခန်းဖြစ်သော တောဟိန်းတောင်ဗျူဟာကုန်းကို AA က အပြီးသတ်တိုက်ခိုက်သိမ်းပိုက်

ရန်ကုန်၊ ဇွန် ၂၃

ရခိုင်ပြည်နယ်၊ အမ်းမြို့နယ်၊ အနောက်ပိုင်းတိုင်းစစ်ဌာနချုပ် (နပခ)၏ ရှေ့ကာ စခန်းဖြစ်သော ကဇူးကိုင်း၊ တောဟိန်းတောင်ဗျူဟာကုန်းကို AA က အပြီး သတ်တိုက်ခိုက်သိမ်းပိုက်သွားပြီဖြစ်ကြောင်း စစ်ကောင်စီ၏ စစ်ဘက်သတင်းရင်းမြစ်က ရန်ကုန်ခေတ်သစ်သတင်းဌာနထံသို့ ပြောဆိုသည်။

ဇွန်လ ၂၃ ရက်နေ့ နံနက် ၂ နာရီ ကျော်အချိန်တွင် အမ်းမြို့နယ်၊ ကဇူးကိုင်း၊ တော ဟိန်းတောင်ဗျူဟာကုန်းစခန်းနှင့် အနောက်ပိုင်းတိုင်းစစ်ဌာနချုပ်တို့ အဆက်အသွယ် လုံး၀ ပြတ်တောက်သွားကြောင်း၊ အဆိုပါ တောဟိန်းတောင်ဗျူဟာကုန်းကို AA က မတ်လ နောက်ဆုံးအပတ်မှစတင်၍ ထိုးစစ်ဆင်ခဲ့ခြင်းဖြစ်ပြီး ဇွန်လ ၂၃ ရက်နေ့တွင် အဆက်အသွယ် လုံး၀ ပြတ်တောက်သွားခြင်းဖြစ်ကြောင်း သိရှိရသည်။

"ကဇူးကိုင်း ဗျူဟာကုန်း ကျသွားပြီလို့ ပြောလို့ရပါတယ်။ အဆက်အသွယ်ပြတ် တောက်တယ် ဆိုတာ စခန်းကုန်းကျသွားလို့ မဆက်သွယ်နိုင်တော့တာပါ" ဟု စစ်ဘက်သတင်းရင်းမြစ်က ဆိုသည်။

AA စစ်ရေးသတင်းရင်းမြစ်ကလည်း ဗိုလ်မှူးချုပ် အဆင့် ဦးစီးနေသည့် အမ်းမြို့နယ်၊ကဇုကိုင်း၊ တောဟိန်းတောင်ဗျူဟာရှိ ပင်မကုန်း နှစ်ခုစလုံးကို အာရက္ခတပ်တော်က ယနေ့ နံနက် ၈ နာရီအချိန်တွင် သိမ်းပိုက်လိုက်ပြီဖြစ်ကြောင်း၊ လက်နက်ခဲယမ်းနှင့် စစ်သားအလောင်းအများအပြားရရှိထားပြီး ရှင်းလင်းရေး လုပ်ဆောင်နေကြောင်း သိရှိရသည်။

လက်ရှိတွင် စစ်ကောင်စီတပ်က Jet fighter ဖြင့် ၁၆ ကြိမ်၊ Y12 ဖြင့် ၂ ကြိမ်၊ Y(8)ဖြင့် ၁ ကြိမ်၊ လာရောက်တိုက်ခိုက် ဗုံးကျဲနေကြောင်း၊ အမ်းမြို့နယ်အနောက် ပိုင်းတိုင်းစစ်ဌာနချုပ်ကလည်း ဟောင်ဝစ်ဇာအမြောက်များဖြင့် ပစ်ကူပေးနေကြောင်း သိရှိရသည်။

Khit Thit Media

12/06/2024

တော်လှန်ရေးတပ်တွေသိမ်းပိုက်ထိန်းချုပ်ထားတဲ့မြို့ပေါင်း
၆၀ ရှိလာ

-People's Spring

ကချင်လွတ်လပ်ရေးတပ်မတော် (KIA) ဦးဆောင်တဲ့ ပူးပေါင်းတပ်တွေက ဇွန် ၁၁ ရက်နေ့မှာ ဝိုင်းမော်-ကန်ပိုက်တည် လမ်းတလျှောက် မှာရှိတဲ့ စစ်တပ်စခန်းတွေကိုထိုးစစ်ဆင်တိုက်ခိုက်ပြီး ဆဒုံးဗျူဟာကုန်းအပါအဝင် စခန်းအကြီးအသေး ၁၈ ခုကိုသိမ်းပိုက်ခဲ့ပါတယ် ။ဆဒုံးဗျူဟာကုန်းအပါအဝင် ဆဒုံးမြို့အဝင်ဂိတ်စခန်း ၊ဆဒုံးမြို့ ရဲစခန်း ၊
ဆဒုံးမြို့ထွေအုပ်ရုံး ၊ဆဒုံးစုပေါင်းဂိတ်စခန်း ၊ဆဒုံးရေတံခွန်ဂိတ်စခန်းစတဲ့ စခန်းတွေသိမ်းပိုက်ခဲ့ပြီး ဆဒုံးမြို့ကိုပါ KIA ကအလုံးစုံသိမ်းပိုက် ထိန်းချုပ်လိုက်ပါတယ် ။ဒါကြောင့် နွေဦးတော်လှန်ရေးမှာ တော်လှန်ရေးအင်အားစုတွေ သိမ်းပိုက်ထိန်းချုပ်ထားတဲ့ မြို့ပေါင်း ၆၀ ရှိလာပြီဖြစ်ပါတယ်

ဒါအပြင် ဝိုင်းမော်-ကန်ပိုက်တည် လမ်းတလျှောက်မှာ KIA သိမ်းပိုက်ဖို့က ကန်ပိုက်တည်မြို့က စစ်ကောင်စီတပ်စခန်းအနည်းငယ်ပဲကျန်တော့တာဖြစ်ပါတယ် ။ဒါကြောင့် မြန်မာ-တရုတ် နယ်စပ်မှာ စစ်ကောင်စီ ထိန်းချုပ်စီမံနိုင်တာ နောက်ဆုံးတစ်ခုတည်းကျန်တဲ့ ကန်ပိုက်တည်နယ်စပ်ကုန်သွယ်ရေးစခန်းနဲ့ မြို့ဟာ KIA သိမ်းပိုက်ထိန်းချုပ်ဖို့ လက်တကမ်းအကွာကိုရောက်နေပြီဖြစ်ပါတယ် ။ ဒါတောင် ကန်ပိုက်တည်မြို့ အနီးဝန်းကျင်က စစ်ကောင်စီစခန်းနဲ့ ရုံးအချို့ကို KIA က ဇွန် ၁၁ ရက်မှာပဲစတင်သိမ်းပိုက်ထားပြီဖြစ်ပါတယ် ။

People's Spring

04/06/2024

စစ်ကောင်စီ၏ တပ်မ နှင့် စကခ ရှုံးနိမ့်မှု

၂၀၂၃ ခုနှစ်၊ အောက်တိုဘာလပိုင်းမှစ၍ ၂၀၂၄ ခုနှစ်၊ မေလအထိ ခြောက်လကျော်အတွင်း တပ်မ ၁၁၊ ၄၄၊ ၈၈၊ ၉၉ တို့မှ တပ်မမှူးများ သေဆုံးပြီး တပ်မ ၅၅ တပ်မမှူး သေဒဏ်ပေးခံရသည်။
တပ်မ ၁၀၁ တပ်မမှူး သုံ့ပန်းအဖြစ် အဖမ်းခံခဲ့ရသည်။ လက်ရှိအချိန်တွင် တပ်မ ၇၇ တခုတည်းသာ အင်အားပြည့်ရှိသည်။
စကခ ၁၊ ၁၂၊ ၁၄၊ ၁၆ တို့မှ စကခမှူးများ အရေးယူခံရ၊ စကခ ၈ မှူး ဒဏ်ရာရရှိ၊ စကခ ၉ မှူး၊ စကခ ၁၅ ဒုစကခ မှူး အဖမ်းခံရ၊ စကခ ၁၉ မှူး ပျောက်ဆုံးနေသည်ကို တွေ့ရ၏။ စကခ ၉၊ ၁၅၊ ၁၆ တို့မှာ ဖွဲ့စည်းပုံ လုံးဝပျက်သွားပြီး စကခ ၇၊ ၁၂၊ ၁၉ တို့မှာ ဖွဲ့စည်းပုံ ပျက်လုနီးပါးဖြစ်၏။
စကခ ၅၊ ၈၊ ၁၃၊ ၁၇၊ ၂၁ တို့မှာလည်း တော်လှန်ရေးတပ်ဖွဲ့များ၏ ပြင်းထန်သောထိုးစစ်နှင့် ရင်ဆိုင်နေရသည်။ စကခ ၁၊ ၁၄ ကမူ လောက်ကိုင်တွင် လက်နက်ချခဲ့ရသည်ဖြစ်၍ ဦးကျိုးနေ၏။

(ကိုးကား-အေးချမ်းစု ၏ အထိနာနေသော စစ်ကောင်စီ တပ် ဆောင်းပါး)

29/05/2024

မင်းအောင်လှိုင်၏ ကောက်ရိုးမျဉ်
**************

မင်းအောင်လှိုင် ဦးဆောင်သော စစ်ကောင်စီသည် အာဏာသိမ်းပြီး ချိန်မှစ၍ နိုင်ငံရေး၊ စီးပွားရေး၊ လူမှု ရေး အစရှိသည် တို့တွင် မည်သည့်နယ်ပယ် တွင် မှ ဦးမော့အောင် မလုပ်နိုင်သေး ဆိုသည်က အားလုံး အသိပင် ဖြစ်သည်။

၎င်းတို့ ကျွမ်းကျင် ပါသည် ဆိုသော စစ်ရေး တွင်လည်း ဆက်တိုက်ဆိုသလို အရေးနိမ့်လာခဲ့သည်မှာ ၆ လ ပင် ကျော်လာခဲ့ပြီ ဖြစ်သည်။ ထိုကာလ များ အတွင်း တော်လှန်ရေး တပ်များ သိမ်းယူ နိုင်ခဲ့သော မြို့ရွာ များကို ပြာပုံ ဖြစ်အောင် လုပ်နိုင်ခဲ့သည် မှ အပ အခြား တိုးတက်မှု တစုံတရာ မတွေ့ရသေး။

မြဝတီ ကို ပြန်လည် ထိန်းချုပ် နိုင်ရန် ဒု ခေါင်း‌ ဆောင် စိုးဝင်း ကိုယ် တိုင် ဦးဆောင်ကာ အင်အား အလုံးအရင်း သုံးကာ ထိုးစစ် ဆင်နေသည် ဆိုသော နိုင်ငံတော် အဆင့် အောင်ဇေယျ စစ်ဆင်ရေး သည် ဒေါန တောင်ခြေ တောနော် ရေတံခွန် အနီး မှ ရှေ့မတိုး နိုင် ဖြစ်နေရသည်။

ရခိုင်၊ ကချင် ဒေသများ တွင်လည်း မရှူ မလှ အရေး နိမ့်နေပြီး ယခု အခါ ချင်းတော်လှန်ရေး ညီနောင်များက တီးတိန် ကို သိမ်းယူရန် ညီညွတ်စွာ ပူးပေါင်း တိုက်ခိုက်နေကြပြီ ဖြစ်သည်။

ထိုသို့ ဖြစ်ပျက် နေသည်များကို ကြည့်မည်ဆိုက စစ်ကောင်စီ အဖို့ မည်သို့မျှ ပြန်လည် နာလံထူလာနိုင်တော့မည် မဟုတ်ဆိုသည်က ထင်ရှားနေသည်၊ ၎င်းတို့ အဖို့က အချိန်ကို ချေးငှားပြီး နေ နေရသည့် living on borrowed time အနေအထားမျိုး ဖြစ်လာနေသည်။

မင်းအောင်လှိုင်၏ တခုတည်းသော မျှော်လင့်ချက် အဖြစ် ဆုပ်ကိုင်ထားနေသည်က စစ်မှု ထမ်း ဥပဒေ ဖြင့် စစ်ထဲ ဆွဲသွင်းခံရသော လူငယ် လေးများ၏ အသက်ကို ရင်း၍ ပြန်၍ အနိုင်‌တိုက်နိုင်ကောင်းရဲ့ဟူ၍ ဖြစ်သည်။ ၎င်းကိုယ်တိုင်လည်း နှစ်နှစ်ကာကာ ယုံကြည်ခြင်း မရှိ၊ လက်အောက် ဗိုလ်ချုပ် များသည်လည်း အလားတူပင် ဖြစ်သည်။

လူဆိုသည်က ထွက်ပေါက် ပိတ်လာလျင် ကောက်ရိုးမျဉ် သာသာ မျှ ရှိသော မျှော်လင့်ချက်မျိုးကိုပင် မလွတ်တမ်း ဆွဲကိုင်ထားလိုကြသည်ပင် ဖြစ်သည်။

ထိုအနေအထားကို အသေအချာ သုံးသပ်ကြည့်မည် ဆိုက စစ်ရေး တွင် အသာစီး ရမလာမချင်း မင်းအောင်လှိုင်နှင့် အဖွဲ့သည် နိုင်ငံရေး၊ စီးပွားရေး၊ ပညာကျန်းမာရေး ဖက်သို့ မည်သို့မျှ ဦးလှည့် နိုင်တော့မည် မဟုတ်၊ စစ်ရေး တွင် အသာစီး ရလာပြီး အာဏာ မသိမ်းခင် တည်ငြိမ်မှု မျိုးက မည်သို့မျှ ဖြစ်လာတော့မည် မဟုတ်။ အထက်တွင် ဆိုခဲ့သညိ့ အတိုင်း နေလို့ရသမျှ အချိန်များကို ချေးငှားပြီး နေနေကြခြင်းသာ ဖြစ်သည်၊ ၎င်းတို့၏ တခုတည်းသော အားကိုးရာ ဖြစ်သည့် တိုက်လေယာဉ် များသည်လည်း မြို့ရွာများကို ဖျက်စီး ပစ်ဖို့သာ အသုံးတည့်နေသည်။

စစ်တပ်သည် ၁၉၅၀ ကျော် နှစ်များ နောက်ပိုင်း အဆိုးဝါးဆုံး အနေအထား နှင့် ကြုံတွေ့နေရပြီး တရုတ် အစောင့်ရှောက်ခံ နိုင်ငံ ဘဝ ရောက်နေရပြီ ဆိုသည်ကို မြန်မာ အရေး အနီးကပ် လေ့လာနေသည့် ပြည်ပ သုတေသီများက တညီတညွတ် တည်း လက်ခံထားကြက

မင်းအောင်လှိုင်အဖို့က ရသမျှ အခမ်းအနား မကျန် လိုက်တက်ကာ မိုးလားကဲလားပြော၊ ယတြာချေ၊ ကြက်ဝက် နွား ခြံများ လိုက်ကြည့်နေသည် မျိုး ကိုသာ တွေ့နေကြရသည် မဟုတ်ပါလော။ ဤသည်ကလည်း လက်ရှိ တိုင်းသိပြည်သိ နိုင်ငံတကာ အသိ ဖြစ်ပျက်နေမှု များသည် ချဲ့ကား ပြောဆိုနေသယောင် အပူရုပ် ကို ဟန်လုပ်ကာ သရုပ်ဆောင် နေရခြင်း ပင် ဖြစ်သည်။

ဤသည်ကို အလေးအနက် စဉ်းစားရကောင်းမှန်း မသိပဲ အာဃာတ တရားများဖြင့် မိမိတို့ သားသမီးများ နောင်ရေးကို မျက်ကွယ်ပြုကာ ထောက်ခံ ပံ့ပိုးပေးနေသူ များ ရှိနေသည်က လွန်စွာမှ အံ့ဩဖို့ ကောင်းနေရသည်။

ပြည်သူတို့၏ ခုခံ တွန်းလှန်စစ် မုချ အောင်ရမည်!!!

Hla Soewai

05/04/2024

နေပြည်တော်စစ်ရုံးချုပ်၊ အေလာလေတပ်နှင့် စစ်ခေါင်းဆောင်နေအိမ် တိုက်ခိုက်ခံရမှုဖြစ်စဥ်တွင် စစ်ကောင်စီတပ်ဖွဲ့ဝင် ၁၅ ဦးသေဆုံးကာ စစ်ရုံးချုပ် ထိခိုက်ပျက်စီး

မြရာ/ဧရာ၀တီတိုင်းမ်
ဧပြီ ၅ ရက်

နေပြည်တော်ကောင်စီနယ်မြေရှိ စစ်ကောင်စီ၏ စစ်ရုံးချုပ်၊ အေလာလေတပ်စခန်းနှင့် စစ်ခေါင်းဆောင် နေအိမ်တို့ ယမန်နေ့ ဧပြီ ၄ ရက်နေ့က ဒရုန်းများဖြင့် ဗုံးကြဲတိုက်ခိုက်ခံရပြီးနောက် စစ်ကောင်စီတပ်ဖွဲ့၀င် ၁၅ ဦးသေဆုံးပြီး စစ်ရုံးချုပ်အတွင်း ပျက်စီးမှုများပြားခဲ့ကြောင်း သိရ သည်။

နေပြည်တော်၊ ဇေယျာသီရိမြို့နယ်ရှိ စစ်ရုံးချုပ်နှင့် အေလာမြို့နယ်ရှိ အေလာလေတပ်စခန်းတို့ကို ယမန်နေ့ နံနက်ပိုင်းတွင် အသေခံဒရုန်းများ(ကာမီကာဇေ)ဖြင့် ဗုံးသီးချတိုက်ခိုက်ခဲ့ရာ စစ်ကောင်စီဘက်က ၁၅ ဦးသေဆုံးခဲ့ကြောင်း Power Of Ababil POA Drone Team တပ်ဖွဲ့က ထုတ်ပြန်ထားသည်။

အသေခံဒရုန်းများဖြင့် ဗုံးသီးချ တိုက်ခိုက်မှုဖြစ်စဉ် တွင် စစ်ခေါင်းဆောင်ဗိုလ်ချုပ်မှူးကြီး မင်းအောင်လှိုင် ၏ နေအိမ်ကို ဒရုန်း လေး စင်း ၊ စစ်ရုံးချုပ်ကို ၁၂ စင်း၊ အေလာလေတပ်စခန်းအတွင်းသို့ ၁၂ စင်းဖြင့် ကြဲချတိုက် ခိုက်ခဲ့ခြင်းဖြစ်ကြောင်း သိရသည်။

အဆိုပါတိုက်ခိုက်မှုတွင် အေလာလေတပ်စခန်းအတွင်း လေယာဉ်ပြေးလမ်းနှင့် လေယာဉ်အချို့ပျက် စီးထိခိုက်မှုရှိပြီး စစ်ရုံးချုပ်အတွင်းရှိ ကာကွယ်ရေးဦးစီးချုပ်(ကကကြည်း) စစ်ဆင်ရေး၏ အဆောင်(၁) မြေပုံခန်းအထိပါ ပျက်စီးထိခိုက်မှုများရှိခဲ့ကြောင်း တပ်တွင်းသတင်းရင်းမြစ်ထံက သိရသည်။

ယင်းဖြစ်စဉ်နှင့်ပတ်သက်ပြီး စစ်ကောင်စီဘက်က ဇေယျာသီရိမြို့နယ်နှင့် အေလာမြို့နယ်အတွင်းရှိ စစ် ဘက်ဆိုင်ရာ အရေးကြီးသည့် အဆောက်အဦများ၊ နေရာများကို ပစ်မှတ်ထားတိုက်ခိုက်လာသည့် ဒရုန်း များအားလုံးကို ဖျက်ဆီးနိုင်ခဲ့ကြောင်းနှင့် ဒရုန်းနှစ်စီး ကို လေထဲ၌ပင် ဖျက်ဆီးနိုင်ခဲ့ကြောင်း ထုတ်ပြန်ထား သည်။

စစ်ရုံးချုပ်နှင့်အေလာလေတပ်စခန်းတို့ တိုက်ခိုက်မှုကို ရှားထူးဝေါနည်းပညာတပ်ဖွဲ့၊ Kloud Team၊ POA တပ်ဖွဲ့၊ တောင်ငူခရိုင်ပြည်သူ့ကာကွယ်ရေးတပ်ရင်း အမှတ်-၃၅၀၂ တပ်ခွဲ-၁ နှင့် Orion Drone Team တို့ ပူးပေါင်းကာ တိုက်ခိုက်ခဲ့ခြင်းဖြစ်ပြီး တော်လှန်ရေး တပ်ဖွဲ့များ အထိအခိုက်မရှိ ဆုတ်ခွာနိုင်ခဲ့ကြောင်း သိရသည်။

#နေပြည်တော်စစ်ရုံးချုပ် #အေလာလေတပ်စခန်း #စစ်ခေါင်းဆောင် #ဒရုန်းဗုံးတိုက်ခိုက်ခံရ #စစ်ကောင်စီတပ် #၁၅ဦးသေဆုံး

04/04/2024

ကနဦး သတင်းထုတ်ပြန်ချက်

နေပြည်တော်၊ စစ်ရုံးချုပ်နှင့် အေလာလေတပ်ကို ဒရုန်းများဖြင့် တိုက်ခိုက်
၂၀၂၄ ခုနှစ်၊ ဧပြီလ (၄) ရက်နေ့

အာဏာသိမ်းအကြမ်းဖက် စစ်ကောင်စီ၏ စစ်ရုံးချုပ်(ကက-ကြည်း) တည်ရှိရာ နေပြည်တော်နှင့် အေလာလေတပ်များကို ဒရုန်းများဖြင့် တပြိုင်နက် တိုက်ခိုက်ခဲ့ရာ ထိခိုက်မှုများ ရှိကြောင်း ကနဦး သတင်းရရှိသည်။

အဆိုပါ တိုက်ခိုက်မှုကို ပြည်သူ့ကာကွယ်ရေးတပ်မတော် (PDF) အထူးတပ်ဖွဲ့များနှင့် ရှာထူးဝေါ် နည်းပညာတပ်ဖွဲ့၏ Kloud Drone တပ်ခွဲက စစ်ရုံးချုပ်ကိုလည်းကောင်း၊ ပြည်သူ့ကာကွယ်ရေး တပ်မတော် (PDF) အထူးတပ်ဖွဲ့များနှင့် ရှာထူးဝေါ် နည်းပညာတပ်ဖွဲ့၏ Lethal Prop တပ်ခွဲက အေလာလေတပ်ကို လည်းကောင်း တိုက်ခိုက်ခဲ့ခြင်း ဖြစ်သည်။

ပြည်သူ့ကာကွယ်ရေးတပ်မတော်(PDF)၊ စစ်ရုံးချုပ်
ကာကွယ်ရေးဝန်ကြီးဌာန
အမျိုးသားညီညွတ်ရေးအစိုးရ

MOD

Voice Of Naypyidaw