12/12/2023
စစ်ကောင်စီအတွက် ပြိုကျနေတဲ့ စစ်ရေး၊ နိုင်ငံရေး၊ စီးပွားရေး
ချမ်းမင်း
စစ်တပ်အာဏာသိမ်းပြီး ၃ နှစ်နီးပါးအချိန်ကိုရောက်လာတဲ့ ယခုကာလမှာတော့ နိုင်ငံရဲ့ လူမူဖွံ့ဖြိုးရေးအဆင့်အတန်းနဲ့ နိုင်ငံ့စီးပွားရေးအခြေအနေတွေဟာ အတော်လေး စိုးရိမ်စရာအခြေအနေကို ရောက်လာနေပြီလို့ဆိုနိုင်ပါတယ်။ အာဏာသိမ်းခါစက စစ်ခေါင်းဆောင်အနေနဲ့ တိုင်းပြည်ချောက်ထဲကျမှာဆိုးလို့ စစ်တပ်အနေနဲ့ မလွှဲသာမရှောင်သာ အာဏာကိုခဏထိန်းလိုက်ရပါတယ်လို့ ပြောကြားခဲ့ပေမဲ့လည်း လက်တွေ့မှာတော့ နိုင်ငံရဲ့စီးပွားရေးဟာ စစ်အာဏာရှင်တွေကြောင့် ပိုမိုဆုတ်ယုတ်လာခဲ့တာကိုသာတွေ့ရပါတယ်။
အထင်သာဆုံး ဥပမာနဲ့ပြောရမယ်ဆိုရင် စစ်တပ်အာဏာမသိမ်းမှီက မြန်မာ နိုင်ငံအတွင်း ဆန်တစ်ပြည်ရဲ့စျေးနှုန်းဟာ ၁၀၀၀ ကျော်ပတ်ချာလည်လောက်သာရှိခဲ့ပေမဲ့လည်း ယခုအချိန်မှာတော့ တစ်ပြည်လျှင်း ၆၀၀၀ ကျော် ၇၀၀၀ အထိပင် ရှိနေခဲ့ပါတယ်။ ဒါဟာ အခြေခံလုပ်သားတစ်ယောက်ရဲ့ တစ်နေကုန်လုပ်ထားတဲ့ လုပ်ခလစာဟာ ဆန်ကောင်းတစ်ပြည်ကိုတောင်ဝယ်စားလို့မရတော့ဘူးဆိုတာကို ပြသနေတဲ့ အကောင်းဆုံးဥပမာပဲ ဖြစ်ပါတယ်။ ဒါ့အပြင် စားသုံးဆီရှားပါးမှုဟာလည်း ပြည်သူတွေရဲ့ကျပ်တည်းမှုကို ပြနေတဲ့ ဥပမာကောင်းတစ်ခုဖြစ်ပါသေးတယ်။
အာဏာသိမ်းမှုနောက်ဆက်တွဲ ဆိုးကျိုးတွေနဲ့ ဒေါ်လာလိုအပ်လာမှုကြောင့် စစ်ကောင်စီဟာ ပြည်ပကတင်သွင်းရတဲ့ စားသုံးဆီကိုလည်း အကန့်အသတ်နဲ့သာတင်သွင်းနိုင်ခဲ့ပြီး ပြည်သူတွေရဲ့ လိုအပ်ချက်ကို လောက်ဌအောင် ဖြည့်ဆည်းပေးနိုင်ခြင်းမရှိခဲ့ပါဘူး။ ဒါ့ကြောင့် အချိန်ကြာလာတာနဲ့အမျှ စားသုံးဆီလိုအပ်မှုဟာ ပြည်သူတွေကြားမြင့်တက်လာခဲ့ပါတယ်။ အကန့်အသတ်နဲ့သာ တင်သွင်းနိုင်တာကြောင့် စစ်ကောင်စီအနေနဲ့ ဩဂုတ်လနှောင်းပိုင်းကစပြီး စားသုံးဆီကို ခွဲတမ်းလိုက်ချပေးနေတာတွေ၊ တချို့မြိူ့နယ်တွေဆို လုံးဝပြတ်တောက်သွားတာကြောင့် တန်းစီပြီစောင့်ဆိုင်းဝယ်ယူရတာတွေပင် ပြုလုပ်နေရပါတယ်။
ဒီအဖြစ်ကို ကြည့်ရင်ပြည်သူတွေဟာ စားဝတ်နေရေး ကျပ်တည်းမှုသာမက ငွေကိုင်ထားလျှင်ပင် ဆန်ဝယ်ဖို့ စားအုန်းဆီဝယ်ဖို့တောင် အခက်ကြုံနေကြရတယ်ဆိုတာ သိသာပါတယ်။ နောက်ဆက်တွဲအနေနဲ့ စားအုန်းဆီရှားပါးမှုဟာ မြန်မာနိုင်ငံရဲ့လူဦးရေအများဆုံးနေထိုင်ပြီး စီးပွါးရေးအချက်ချာကျတဲ့မြို့ပေါင်း (၁၁၀) မှာ (၅၆) မြို့ဟာ စားအုန်းဆီပြတ်လပ်မှုဖြစ်ပေါ်နေပြီး ကျန် (၆၄) မြို့ဟာ စားအုန်းဆီတန်းစီ ဝယ်ယူနေရတယ်လို့ သိရှိရပါတယ်။
အဲ့ဒီလို ဆန်၊ စားသုံးဆီသာမက အခြားသော ဟင်းချက်စရာတွေကအစ အစစအရာရာစျေးကြီးမြှင့်ခဲ့ပေမဲ့လည်း လုပ်ခလစာနှုန်းကတော့ အရင်ကထက်ဘာမှ ထူးပြီးတိုးလာတာမျိုးတောင်မရှိခဲ့ပါဘူး။ ဒါတွေတင်မကဘဲ ယနေ့ခေတ်ရဲ့ အခြေခံလိုအပ်ချက်လို့ပြောရမဲ့ လျှပ်စစ်မီးဟာလည်း စစ်အာဏာသိမ်းပြီးတဲ့နောက်ပိုင်းမှာ ပုံမှန်ပင်မရရှိတဲ့အခြေအနေမျိုးဖြစ်နေပြီး သူ့ထက်ငါ တိုးတက်ဖို့အပြိုင်အဆိုင်ကြိုးစားနေတဲ့ကမ္ဘာမှာ မြန်မာနိုင်ငံတစ်ခုတည်းကသာ နောက်ကို ပြန်သွားနေသကဲ့သို့ပင်ဖြစ်နေပါတယ်။
အခုလို လူမူဘဝနိမ့်ကျနေရတာတွေ၊ ပြည်သူတွေအတိဒုက္ခရောက်နေရတာတွေဟာနယ်မြို့တွေမှာတင်ဖြစ်ပွားနေတာမဟုတ်ဘဲ မြန်မာနိုင်ငံရဲ့ စီးပွားရေးမြို့တော်လို့ ပြောလို့ရမဲ့ ရန်ကုန်မြို့မှာပင် အတော်လေးဆိုးရွားစွာဖြစ်ပေါ်နေပါတယ်။ရန်ကုန်ဟာ အလုပ်အကိုင်ပေါများပြီး အနယ်နယ်အရပ်ရပ်က လာရောက် အလုပ်လုပ်ကိုင်သူ များပြားတဲ့နေရာတစ်ခုဖြစ်သော်လည်းအာဏာသိမ်းပြီး နောက်မှာတော့ အလုပ်ကိုင်အခွင့်လမ်းနည်းပါးလာပြီး အလုပ်လက်မဲ့ဦးရေဟာလည်း တစ်နေ့တစ်ခြား ပိုမိုတိုးပွားလာနေပါတယ်။
၂၀၂၃ ကုလသမဂ္ဂဖွံဖြိုးရေးအစီအစဥ် (UNDP) ရဲ့ ဖော်ပြချက်အရဆို ရန်ကုန်မြို့ လူဦးရေ (၃) ထောင်၏ စစ်တမ်းကောက်ယူမှုအရ ရန်ကုန်မြို့ရှိ ပြည်သူတွေဟာ စစ်တပ်အာဏာသိမ်းပြီးနောက်ပိုင်း အလုပ်အကိုင်ရှားပါးမှုနဲ့ ကုန်စျေးနှုန်းကြီးမြင့်မှုတို့ကြောင့် ဝင်ငွေထွက်ငွေမညီမျှပဲ အစားလျော့စားရတဲ့အထိ ဖြစ်လာနေကြတယ်လို့သိရပါတယ်။
ဒါတွေဟာ အာဏာသိမ်းပြီးနောက်ပိုင်း ပြည်သူတွေကြုံတွေ့ခံစားနေရတဲ့ နေ့စဥ်လူမူဘဝရဲ့အခြေခံလိုအပ်ချက်လေးတွေသာရှိပါသေးတယ်။ အခြားသော ကုန်ပစ္စည်းပြတ်လပ်မှုတွေ၊ စက်သုံးဆီရှားပါးမှုတွေ တစ်နေ့တစ်ခြား ကုန့စျေးနှုနး်ကြီးမြင့်မှုတွေဟာ နိုင်ငံအနှံ့ဖြစ်ပွားလျက်ရှိသေးတာမို့ စစ်အာဏာရှင်မပြုတ်ကျမချင်း ဒီလိုပဲ ကြုံတွေ့ခံစားနေရဦးမယ်ဆိုတာ ပြည်သူတွေအနေနဲ့ သတိချပ်သင့်ပါတယ်။ ဒါကြောင့် ပြည်သူတွေအနေနဲ့လည်း စစ်တပ်ရဲ့အာဏာသိမ်းထားမှုအပေါ် သွေးမအေးသွားဘဲ အာဏာရှင်ပြုတ်ကျရေးဆန့်ကျင်မှုတွေမှာ ဒီထပ်ပိုပါဝင်အားစိုက်သင့်ပါတယ်။ ။
#မြုိ့သိမ်း
#တော်လှန်ရေး
