22/06/2023
‘විකිණීමද? ප්‍රතිව්‍යුහගතකරණයද?’ යනුවෙන් ලංවිම කොටස් කර සමාගම් 15 කට විකිණීමට එරෙහි සමුළුවක් ඊයේ (21) කොළඹ විහාරමහාදේවි එළිමහන් රංගපීඨයේ දී පවත්වනු ලැබුවා. ඒ සඳහා ලංකා විදුලි බල මන්දය නියෝජනය කරන ය ලංවිම සියලු වෘත්තීය සමිති එක්ව සිටි බවයි වාර්තා වන්නේ. මෙම සමුළුව සඳහා රට පුරා විදුලි සේවකයින් විශාලා පරිසක් එක්ව සිටි අතර සහභාගී වූ සියලු සේවකයින්ගේ ඒකමතිකත්වයෙන් සමුළු යෝජනා 3ක් සම්මත කරගෙන තිබෙනවා.
ඒවා වන්නේ,
“යෝජනා අංක 1
ජනතාවට රටට ඉමහත් සේවයක් සපයන වසර පනස් හතරකට වැඩි කාලයක් පුරා අප රටේ සියලු අඳුරු අහුමුලු විදුලියෙන් ඒකාලෝක කළ ලංකා විදුලිබල මණ්ඩලය, සුවිශේෂී ජාතික සම්පතකි.
1969 අංක 17 දරණ පනතින් ස්ථාපනය කළ මෙම ආයතනය ආරම්භක අවධියේ දී ජාතික විදුලි ශ්‍යතාවය සම්පූර්ණන්ධයෙන්ම පාහේ ජල විදුලිය මගින් සපයා ගත් අතර, ජනන වියදම් අවම වීම නිසා මෙම ආයතනයේ සේවක වැටුප් දීමනා බොහෝමයක් සේවකයන්ට ලබා දුන්නේ රටේ ජනතාවට ද සහන සලසන අතරතුර, කිසිදු අලාභයක් නොලැබූ ආයතනයක් ලෙසට ය. ඒ අනුව අවිවාදයෙන්ම ලංකා විදුලිබල මණ්ඩලය ජාතිකව හා ජාත්‍යන්තරව ඉමහත් කීර්තියක් ලබා ගත් ආයතනයකි.
කෙසේ නමුත්, 1969 සිට ආ ගමන තුළදී, මෙතෙක් රට පාලනය කළ පාලකයන්ගේ වැරදි ප්‍රතිපත්ති, නිවැරදි තීන්දු නිසි වෙලාවට ක්‍රියාත්මක නොකිරීම, යෝජිත විදුලි බලාගාර ඉදිකිරීමේ ජනන සැලසුම් ක්‍රියාත්මක නොකිරීම, ක්‍රියාත්මක වෙමින් පැවති ජනන ව්‍යාපෘති හිටි හැටියේ නවතා දැමීම, අකාර්යක්ෂමතාවය හා දූෂණ වංචා සහ මහජන උපයෝගීතා කොමිසමේ අත්තනෝමතික ක්‍රියා පිළිවෙත හේතුකොටගෙන, ලංවිම නැමැති එතෙක් කිසිදු අලාභයක් නොලැබූ ආයතනය පාඩු වුණ නොව, පාඩු කරන ලද ආයතනයක් බවට පත් කරන ලදී.
මෙම ශෝචනීය තත්ත්වයට ලංවිම පත්කළ වගකිවයුත්තන්, මෙම විනාශය වගකීමෙන් නිර්ලජ්ජිතව නිදහස් වූයේ එම සියළු චෝදනා දේශයේ ඒකාලෝක කිරීමට දිවා රෑ වෙහෙස මහන්සි නොබලා කැපවීමෙන් වැඩ කළ, ඇතැම්විට රාජකාරියේ දී තම ජීවිතය ද පූජා කළ සේවකයින්ටද පරිභව කරමින්ය.
ලංකා විදුලි බල මණ්ඩලය පමණක් නොව, රටේ මුළු බලශක්ති ක්ෂේත්‍රය ම නගා සිටුවීමට සංවිධානාත්මක, සැලසුම් සහගත හා නිවැරදි කාල රාමුවක් සහිත ප්‍රතිව්‍යූහගතකරණයක් සිදුවිය යුතුමය.
නමුත් ඒ මුවාවෙන් ජනන අංශය සමාගම් 06ක ට ද, සම්ප්‍රේෂණ අංශයේ සමාගම් 02කට ද ආදී වශයෙන්, විවිධ සමාගම් 15 කටත් අධික ප්‍රමාණයකට වෙන්කර විකිණීමට යම් උත්සාහයක් ඇත්තේ නම්, රටේ අනාගතය වෙනුවෙන් එය කොන්දේසි විරහිතව පරාජය කළ යුතුය.
මෙම ආයතනය විකුණා දැමීමේ උත්සාහයට ඉඟි පළ කරමින් ආණ්ඩුවේ වගකිවයුතු ඇමතිවරු විවිධ අවස්ථාවන්වල දී ප්‍රකාශ කර ඇත්තේ පාඩු ලබන ආයතන පමණක් නොව ලාභ ලබන ආයතන ද විකිණීමට සූදානම් කර ඇති බවයි. ඒ අනුව 1969 අංක 17 දරණ විදුලිබල මණ්ඩල පනත අහෝසි කරමින්, ඇමරිකානු ජාත්‍යන්තර සංවර්ධන ආයතනය (USAID) හරහා ඇමරිකානු නියෝජිතයින් විසින්, අප කිසිවෙක් නොදන්නා, එක්තරා පනතක් නිර්මාණය වෙමින් පවතින බව දැනගන්නට තිබේ.
2002 විදුලි බල ප්‍රතිසංස්කරණ යෝජනා පනත පාර්ලිමේන්තුවේ දී අනුමත වුවද සක්‍රීය කරගත නොහැකි විය. නමුත් එම පනතේ ඇති ප්‍රතිපාදනයන්ට ද එහා ගොස්, පුද්ගලීකරණය නොහොත් සමාගම් වලට කඩා නෝරච්චෝලේ වැනි බලාගාර ඇතුළු ලංවිම විකුණා දැමීමට හැකි වන පරිදි පනත් කෙටුම්පත් කිරීමෙන්, බලශක්ති ක්ෂේත්‍රයට සිදු විය හැකි බලපෑම, රටේ ජාතික ආරක්ෂාවට ද බරපතළ තර්ජනයක් බව මේ මහා ජාතික සමුළුව අවධාරණය කරනු ලබයි.
මෙතෙක් නිවැරදිව තක්සේරු නොකළ, රටපුරා ඇති ලංවිම භෞතික සම්පත් වලටත්, මිල කළ නොහැකි මානව සම්පතටත් කොපමණ මිලක් නියම කරාවි ද? එයට එසේ මිලක් නියම කළ හැකි ද? කිසිසේත්ම නොහැක.
මෙවන් වටපිටාවක පුද්ගලීකරණයට හෝ විකුණා දැමීමට අවශ්‍ය අවකාශ සලසමින් ඉදිරිපත් කිරීමට නියමිත නව පනත ඉදිරිපත් කිරීම වැළැක්විය යුතු යැයි තරයේ විශ්වාස කරන මෙම ඒකාබද්ධ ජාතික මහා සමුළුව, ඒ සඳහා රටේ සියළුම ජනතාවද සියලුම දේශපාලන පක්ෂ ද බහුජන සංවිධාන ද සියලුම ආගමික නායකයන් ද වහා ඉදිරිපත් වී, ඔවුන්ගේ සහයෝගය ද ඇතිව මෙම අනතුර වැළැක්වීම සඳහා පාර්ලිමේන්තුව නියෝජනය කරන සියලුම මහජන නියෝජිතයින් දැනුවත් කර, ඒ සඳහා සහයෝගය ලබා ගැනීමට කටයුතු කිරීමටත්, ලංවිම සේවකයන්ගේ ද බල ශක්ති ක්ෂේත්‍ර යේ ප්‍රවීණයන් ගේද අදහස් වලට කන්නොදී රටට අවාසිදායක යෝජනා ඇතුළත් පනතක් පාර්ලිමේන්තුවට ඉදිරිපත් කර සම්මත කරන්නට උත්සාහ ගන්නේ නම්, ඊට විරුද්ධව ඔවුන්ගේ ඡන්දය පාවිච්චි කරන ලෙස ඉල්ලා සිටීමටත් යෝජනා කරන අතරම, එවැනි යෝජනාවක් පරාජය කිරීමට ගත හැකි උපරිම වෘත්තිය සමිති ක්‍රියාමාර්ග ගැනීම සඳහා ද, ලංවිම සියලුම වෘත්තීය සමිති සාමාජිකත්වය සහභාගිත්වයෙන් මුළු දෙන මෙම ජාතික මහා සමුළුව යෝජනා කර සිටියි.
කෙසේ නමුත් දැන් හෝ ජනතාවගේ සහ ලංවිම සේවකයන්ගේ ද බල ශක්ති ක්ෂේත්‍ර යේ ප්‍රවීණයන් ගේද අදහස් ලබාගෙන ඔවුන්ගේ හඬට කන් දෙමින් ඔවුන්ගේ අදහස් හා යෝජනා ලබා ගනිමින් බලශක්ති ක්ෂේත්‍රයේ උන්නතිය උදෙසා, පුද්ගලීකරණයට හෝ විකුණා දැමීමට අවකාශ නොමැති සැලසුම් සහගත ප්‍රායෝගික කාල රාමුවක් සහිතව සිදු කරනු ලබන නිවැරදි ප්‍රතිව්‍යූහගතකරණ ක්‍රියාවලියක් සඳහා, භේදයකින් තොරව සහය ලබා දෙන බවද මෙම ජාතික මහා සමුළුව යෝජනා කර සිටියි.
යෝජනා අංක 2
පුද්ගලීකරණයට හා සමාගම් වශයෙන් වෙන් කර විකුණා දැමීමට අවකාශ සලසන, ප්‍රතිව්‍යූහගතකරණ ක්‍රියාවලියට මුවා වී මේ වන විටත් පාලකයින් විසින් සේවක අයිතිවාසිකම් බරපතළ කප්පාදුවකට ලක් කරමින් සිටී. ඒ අනුව අද දින මුළු දෙන ලංවිම ඒකාබද්ධ වෘත්තීය සමිති ජාතික සමුළුව පහත සඳහන් කරන අයිතිවාසිකම් කප්පාදු කිරීම් අහිමි කිරීම් කෙරෙහි දැඩි අවධානය යොමු කර සිටී.
දශක ගණනාවක් මුළුල්ලේ ලේ දහඩිය ශ්‍රමය කැප කළ ලංවිම සේවකයින්ගේ දරුවන් ඇතුළු තුන් දහස් අටසියයක් පමණ වූ NVQ පුහුණුවන්නන් වසර හතරක සාර්ථක පුහුණුවකින් පසු හා ප්‍රායෝගික පරීක්ෂණයකින් පසු, ලංවිම ස්ථිර සේවයට බඳවා ගනු ලබන බවට ඔවුන්ගේ පත්වීම් ලිපියේ සඳහන් කොන්දේසිය කඩකරමින් හා නොසලකා හරිමින් 2023 අප්‍රේල් 24 වන දින ලංවිම සියලුම වෘත්තිය සමිති සහභාගිවූ රැස්වීමේදී විෂය භාර අමාත්‍යවරයා තරයේම ප්‍රකාශ කර සිටියේ රාජ්‍ය ප්‍රතිපත්තිය අනුව එම සේවකයන් ස්ථිර කිරීමට හැකියාවක් නොමැති බවය.
වසර හතරකටත් වැඩි කාලයක් තම තරුණ දිවිය කැපකරමින් ඉමහත් බලාපොරොත්තු දල්වාගෙන සිටි එම යෞවනයන්ගේ බලාපොරොත්තු හා අපේක්ෂා සුන් නොකර, නීත්‍යානුකූලව පොරොන්දු වී ඇති පරිදි වහාම ඔවුන් සියලු දෙනා සේවයේ ස්ථීර කරන ලෙසත්, මෙතෙක් ලංවිම සේවකයන්ට ලබා නොදුන් ඔවුන්ට හිමි වෛද්‍යාධාර දීමනාව හා ප්‍රසාද දීමනාව කඩිනමින් වහාම ලබා දෙන ලෙසත්, අභ්‍යන්තර උසස්වීම් අත්හිටුවමින් නිකුත් කර ඇති අමාත්‍යාංශ ලේකම්වරයාගේ අත්තනෝමතික තීරණය වහාම අවලංගු කරන ලෙසත් මෙම මහා සමුළුව යෝජනා කර සිටියි.
තවද ලංකා විදුලබල මණ්ඩලයේ සේවකයින් තම සේවක අර්ථසාධක අරමුදලින් මෙතෙක් භුක්ති විඳි සියලුම අයිතීන් එලෙසින්ම පවත්වාගෙන යන ලෙසත්, ලංවිම සේවකයන්ට හිමි විශ්‍රාම වැටුප කිසිදු කප්පාදුවකින් තොරව කොන්දේසි විරහිතව එලෙසින්ම ලබා දෙන ලෙසත්, 2023 ජූනි මස විසි එක් වන දින බදාදා එනම් අද දින කොළඹ විහාරමහාදේවි එළිමහන් රංග පීඨයේ දී මුළු දෙන මෙම ලංවිම වෘත්තීය සමිති ඒකාබද්ධ ජාතික මහා සමුළුව ආණ්ඩුවට බල කර සිටින අතර එසේ නොවන ඕනෑම තීරණයක් පරාජය කිරීම සඳහා දැඩි වෘත්තිය සමිති ක්‍රියාමාර්ග ගන්නා ලෙස එකගතාවය සියලුම වෘත්තීය සමිති වෙත පළ කර සිටියි.
යෝජනා අංක 3
කම්කරු නීතියට අනුකූලව දැනට ලංවිම වෘත්තිය සමිති කටයුතු වෙනුවෙන් නීත්‍යානුකූලව නිදහස් වී සිටින සියලුම වෘත්තීය සමිති නායකයින්, ප්‍රතිව්‍යූහගතකරණ ක්‍රියාවලියට මුවා වී නීති විරෝධීව නැවත සේවයට කැඳවා ඇත. තවද ඉදිරි වර්ෂය සඳහා නීත්‍යානුකූලව ඉල්ලා ඇති සියලුම නිදහස් කිරීම් මේ වනවිට අත්හිටුවා ඇත.
මේ වන විට ඉදිරිපත් කර ඇති ප්‍රතිත්‍රස්ත පනතේ ඇති ප්‍රතිපාදන අනුව වෘත්තිය සමිති වල සිවිල් සංවිධානවල මාධ්‍යවල හා ජනතාවගේ භාෂණයේ, විරෝධය පළ කිරීමේ සහ අදහස් දැක්වීමේ අයිතියට එල්ල කර ඇති බරපතළ තර්ජනය නීති විශාරදයන් විසින් පැහැදිලිව පෙන්වා දී ඇත.
මෙවන් පරිසරයක් තුළ මර්දනය මගින් ගැටලු විසඳීමට ආණ්ඩුව ගන්නා උත්සාහය දැඩිව හෙලා දකින මෙම මහා සමුළුව, විද්‍යුත් හා මුද්‍රිත මාධ්‍ය ඉලක්ක කරගනිමින් ගෙන ඒමට නියමිත විකාශන අධිකාරි පනත මගින් ද, රටේ ජනතාවගේ මූලික අයිතිවාසිකමක් වන භාෂණයේ නිදහසට බාධා පමුණුවමින් මාධ්‍ය අයිතිය යටපත් කරමින් ජනමාධ්‍ය මර්දනය කිරීමට ගන්නා උත්සාහය සම්බන්ධයෙන් දැඩි අවධානය යොමු කර සිටියි.
මෙම සියලුම මර්දනකාරී තත්ත්වයන්, ලංකා විදුලිබල මණ්ඩලය අනාගත පරපුර උදෙසා සුරක්ෂිත කර ගැනීම සඳහා ගනු ලබන ක්‍රියාමාර්ග සඳහා දැඩි බාධාවක් වන බව ජාතික මහාසමුළුව අවධාරණය කරන අතර, ලංවිම හා ලංවිම සේවකයන්ගේ අයිතිවාසිකම් සුරක්ෂා කර ගැනීමට එම සියලුම මර්දන ක්‍රියාමාර්ගයන් පරාජය කිරීම සඳහා රටේ සමස්ත වෘත්තීය සමිති ව්‍යාපාරය, ආගමික නායකයින්, සිවිල් සංවිධාන හා මහජනතාව සමඟ එක්වී දැඩි විරෝධතා ක්‍රියාමාර්ග ගතයුතු යැයි මෙම සියලු වෘත්තීය සමිති ඒකාබද්ධ ජාතික මහා සමුළුව යෝජනා කර සිටියි”
සමුළුව විසින් ඉදිරිපත් කළ මෙම යෝජනා රැස්ව සිටි පිරිස් වින් සිය දකුණු ඇත ඔසවා එකඟතාව ලබාදෙමින් අනුමත කර තිබෙනවා. ඒ අනුමැතිය ලබාදී ඇත්තේ එක් එක් යෝජනාවට වෙන් වෙන් වශයෙනුයි.
