20/02/2022
DE : Jherry le combattant
A : Olivier Martelly
Chè Olivier Martelly,
Menm jan ak anpil moun mwen wè kijan long metraj ou apèn sòti a simaye sou entenèt kote moun yo mete li sou anpil platfòm gratis, poutan li pa ta dwe konsa paske mwen sipoze youn nan objektif ki te pouse ou te fè li se pou ou te ka benefisye de li ekonomikman. Anpil moun pran plezi pataje l, gade l gratis epi y ap rejwi de sa, pami yo mwen menm JHERRY ki adrese w lèt sila. Mwen fè chwa pa gade bagay ou, men mwen pa neglije simaye l tout kote.
An efè, ou petèt ap mande tèt ou poukisa Ayisyen mechan konsa ? Poukisa yo egri konsa ? Poukisa nou rayi w konsa ? Men veritab kesyon ou ta dwe poze tèt ou se :
> Kisa mwen ye nan sosyete a ?
> Kijan moun yo wè m ?
> Kisa mwen vo ?
> Kisa mwen itil ?
Pou ou jwenn repons sa yo, premye bagay pou ou pa janm bliye ou se Pitit Michel Joseph Martelly (ou konnen tout sa sosyete panse de papa w)
Si ou menm ak antouraj ou ka ap bay tèt nou manti, banm ede w konprann kijan fristre parèy mwen yo wè w :
Si pou ou, ou se YON CHANTÈ
Ou ka wè w kòm MIZISYEN, ANTREPRENÈ, PWODIKTÈ, PWOMOTÈ, SINEYAS, AKTÈ, REYALIZATÈ KI GEN YON MASTÈ... Ebyen pou sila ki nan mas pèp la nou jis wè w tankou yon vòlè.
Ou ka petèt wè w nan kategori BIC, ROODY ROODBOY, JIMMY JEAN LOUIS, RICHARD SENECAL, K-LIB poutan an reyalite fanmi w fè nou fè referans ak IZO, TI LAPLI, LANMÒ SAN JOU vèsyon po klè.
Si ou panse se yon pwoblèm fristrasyon, gade pou wè kijan nou te kontan wè JESSICA GENEUS ki t ap fè gran eksplwa Nan sinema, gade kijan nou toujou la pou Wendyyy ak anpil lòt jèn.
Lè mwen menm Jherry le combattant, mwen gen istwa (senaryo ekri) k ap dòmi nan tiwa depi 6 zan, ou panse fristrasyon ap pèmèt mwen sipòte yon jèn parèy mwen k ap reyalize pwojè pa l ak fon petwokaribe ? Kote ekilib la ? Kòman m ap janm fè konnen ou gen talan sinema pase m lè papa w gen chèk 3 milyon dola chak mwa nan leta a san li pa nan okenn pòs ? Èske mwen bezwen fè gwo desen pou raple w fanmi ou tranpe nan anpil bagay sal ?
Ou petèt pral mande ki rapò bagay sa yo genyen ak yon travay atistik ?
Laverite se ke nou pa ACHTE ZÈV ATIS YO SÈLMAN, nou achte moun ki reyalize l yo tou. Ou kòmanse viktim de sa ou reprezante kòm moun.
Pou ou ka gade si ou se yon viktim oubyen yon bouwo, mwen mete w an defi pou reponn kesyon sa yo :
1- Ki kote ou te travay yon jou nan vi w? (Yon grenn jou)
2- Kilè ou te antre premye santim ou epi konbyen li ye ? (Kòb ou travay fè)
3- Pou kounya ki biznis ou genyen ? Kijan l ap mache ?
Ou pa oblije reponn youn nan kesyon sa yo paske se vi prive w, men yo ka ede eklèsi kèk bagay epi retire vye imaj anpil moun gen de ou.
Depi ou mete nou klè, m ap angaje m lanse m nan yon kanpay valorisation pou moun yo respekte efò ou fè nan sosyete a. Sinon konnen ou sòti nan yon fanmi vòlè, ou ka toujou ap mache lib e libè paske Ayiti se latè enpinite, men respè ak valè w ap chache a ou p ap janm jwenn li. Vòlè pa konn soumoun.
Riiiiiiiiii ! "Très entre nous" oubyen konnen se kèk kòb sal ou bezwen blanchi paske kòb papa w vòlè yo se de anpil milyon n ap pale. Ou panse se pou ti kòb "streaming" w ap plenyen vreeee ?
Gade kijan ou estomake poutèt moun pirate 2 zè de tan plezi nan yo pwojè ki petèt koute 300 000 dola. Epi ou pa panse menm yon segond ak ou menm ki te sekretè deta espò ak lajenès ki pran kòb tout yon repiblik ? Reyaksyon sa yo se egzanp vivan "ASASEN TOUJOU PÈ SAN"
Patriyotikman !
Jherry le combattant, OTÈ LIV "Vilaj de Dyè"
PDG JHÉ RIZ LOCAL