Talk About (2024)

08/07/2023

Temperatura ng mundo, record breaking ngayong linggo!

Nakapagtala na naman sa ikatlong pagkakataon ngayong Linggo ng “unofficial record high” na average temperature ang mundo.
Dahil dito, maituturing na itong pinakamainit na Linggo sa rekord.
Sa datos ng University of Maine – Climate Reanalyzer, pumalo sa 17.23 degrees Celsius ang planetary average temperature, mas mataas sa naitalang 17.18 degree Celsius noong Hulyo 4 at Miyerkules, Hulyo 5.
Kabilang sa naturang average ang mga lugar na nakaranas ng pinakamainit na panahon katulad ng Jingxing, China, na umabot ng 43.3 degrees Celsius, at sa Antarctica na nakaranas din ng above normal na init na aabot sa 8 degrees Celsius.
“Although NOAA cannot validate the methodology or conclusion of the University of Maine analysis, we recognize that we are in a warm period due to climate change,” sinabi ng National Oceanic and Atmospheric Administration.
Sa kabila nito, kapansin-pansin pa rin na ang mga bagay na ito ay epekto ng climate change.

08/07/2023

10-14 bagyo papasok sa huling 6 na buwan - PAGASA

Kahit nararanasan ng bansa ang epekto ng El Niño Phenomenon, mayroon pa ring nagbabadyang 10 hanggang 14 bagyo na inaasahang papasok sa bansa sa loob ng natitirang buwan ngayong 2023.
Ayon kay PAGASA Assistant Weather Services Chief Analisa Solis, ang ilan sa papasok na bagyo ay posibleng mag-landfall habang ang iba ay daraan lamang ng Philippine area of responsibility (PAR) pero paiigtingin nito ang habagat.
Sa kabuuan, hanggang 17 bagyo ang tatama sa bansa ngayong taon.
Sinabi ni Solis na titindi ang epekto ng El Niño sa pagitan ng December 2023 hanggang February 2024 pero dahil sa habagat na umiiral tuwing Hulyo, Agosto at Setyembre ay maaaring magkaroon ng mga pag-ulan at makatulong itong mapataas ang water level sa mga dam.
Ang bahagi ng Mindanao ang pinaka maapektuhan ng El Niño dahil sa kakulangan ng tubig sa naturang rehiyon.

08/07/2023

2.17-M Pinoy tambay nitong Mayo 2023

Umigi nang bahagya ang unemployment rate sa bansa matapos itong bumaba sa 4.3% nitong Mayo 2023 — ngunit lagpas 2 milyong Pilipino pa rin ang nananatiling walang trabaho sa ngayon, ayon sa huling datos ng Philippine Statistics Authority (PSA).
Ito ang ibinahagi ng PSA sa isang pahayag ngayong Biyernes, isang improvement mula sa 4.5% kawalang trabaho noong nakaraang Abril.
"The country’s unemployment rate dropped to 4.3 percent in May 2023 from 6.0 percent in May 2022 and 4.5 percent in April 2023," wika ng ahensya.
"The May 2023 unemployment rate was the second lowest since April 2005, following the 4.2 percent unemployment rate in November 2022."
Ang mga walang trabaho noong Mayo 2023 ay katumbas ng nasa 2.17 milyong Pilipino, bagay na mas mababa rin kaysa sa 2.26 milyong noong Abril at P2.93 milyon noong Mayo 2022.
Lumabas din sa May 2023 Labor Force Survey ang mga sumusunod na datos:
employment rate: 95.7%
may trabaho: 48.26 milyon
underemployment rate: 11.7%
underemployed: 5.66 milyon
labor force participation rate: 65.3%
labor force: 50.43 milyon
Kapansin-pansing gumanda ang poryento ng mga may trabaho kumpara sa 94% noong nakaraang taon. Bumaba rin nang husto ang mga bilang ng Pilipinong naghahanap ng karagdagang trabaho o oras sa trabaho kumpara sa 14.5% noong Mayo 2022.
"The underemployment rate in May 2023 was the second lowest since April 2005 with March 2023 underemployment rate of 11.2 percent as the lowest," patuloy pa ng PSA.
"Wage and salary workers continued to account for the largest share of employed persons with 60.5 percent of the total employed persons in May 2023. This was followed by self-employed persons without any paid employee at 28.1 percent and unpaid family workers at 9.2 percent."
Pinakakaonti naman sa mga may empleyo ang mga nasa sariling family-operated farm o negosyo sa 2.2%.
Lumabas ang ulat na ito isang araw matapos maibalitang bumagal ang inflation rate, o bilis ng pagtaas ng presyo ng bilihin sa isang takdang panahon, sa 5.4% bagay na naimpluwensyahan ng bentahan ng pagkain.

08/07/2023

WW2 bomb natagpuan sa bar sa Katipunan

Nagkaroon ng komosyon sa isang kilalang inuman nang matagpuan ang isang World War 2 bomb sa katabing pwesto doon sa Katipunan Avenue sa Quezon City.
Base sa imbestigasyon ng QCPD Station 9, isang maintenance staff ng establisimyento ang nakakita sa 81 millimeter vintage mortar habang nililinis ang loob ng inuman, 5:00 ng hapon.
Kwento ng isang security guard, matagal nang nakasara ang bar at pinalinis lamang ng may-ari dahil may bago nang uupa sa pwesto.
Agad ipinaalam ng maintenance staff ang natagpuang bomba sa mga security guard.
At 9:10 ng gabi na nai-report sa QCPD Station 9 ang insidente.
Pansamantalang kinordon ng mga awtoridad ang lugar at pinalabas sa parking lot ang mga costumer habang nagsagawa ng ocular inspection ang pulisya.
Dumating naman 9:22 ng gabi ang mga elemento ng District Explosive Ordnance Disposal Canine Unit ng QCPD para i-retrieve ang naturang bomba.
Matapos ang ilang minuto, pinabalik na rin sa loob ang mga tao.
Ire-review pa ng mga pulis ang cctv sa lugar para malaman kung saan nanggaling ang vintage bomb at kung sino ang nagpasok nito sa bar.

08/07/2023

Kelot nabitin sa halik, nanaksak ng kainuman

Arestado ang 58 anyos na lalaking nanghalik ng babae at nanaksak ng kainuman nito sa bayan ng Angat, Bulacan.
Kinilala ang salarin na si Joseph Austria, may-asawa, jobless, residente ng Brgy. Taboc; habang ang biktima si Mark Mendoza, 40, jeepney driver ng Brgy. Donacion.
Sa report ng Angat police, 2:30 ng umaga nitong Hulyo 4 isang tawag ang kanilang natanggap mula sa Brgy. Taboc na nagsabing may naganap na saksakan sa lugar.
Ayon sa imbestigasyon, sa kasagsagan ng inuman ng magkasintahan dumating ang salarin at kalaunan hinalikan ang babaeng kainuman.
Dahil dito, nagalit ang kasintahang si Mendoza kaya itimulak niya palayo ang salarin na dali-daling umuwi subali't agad na bumalik bitbit ang patalim.
Nabatid na walang kaabog-abog na tinarakan ng patalim ng salarin si Mendoza sa kaliwang itaas na bahagi ng likurang katawan nito.
Sinasabing nang humupa ang gulo agad dinala ang biktimang duguan sa Norzagaray Medical Hospital para sa paunang lunas.
Nahuli naman agad ng rumespondeng mga pulis ang salarin at maging ang kitchen knife na ginamit na nahaharap sa kasong Attempted Homicide habang nakakulong sa naturang istasyon.

08/07/2023

Kotse nahulog sa bangin: 7 sugatam

Nahulog ang sinasakyang Toyota Tamaraw FX ng walong menor de edad sa bangin sa bahagi ng Sitio Nawoy, Balantoy, Balbalan, Kalinga.
Sa report, ang mga biktima pawang mga estudyante ng Eastern Balbalan National High School at mga residente ng Brgy. Pasil at Balbalan, Kalinga.
Mabilis umano ang takbo ng naturang sasakyan na patungong Brgy. Pasil kaya nang makarating sa pakurbang bahagi ng daan at hindi umano natantiya ang manibela na dahilan upang dumeretso at mahulog sa bangin na may lalim na 80 metro.
Masuwerteng agad narespondehan ang pitong sugatan at naidala sa pagamutan ang mga estudyanteng sakay nito.
Lima sa mga sugatang biktima ang kasalukuyang nagpapagaling sa Kalinga Provincial hospital habang ang dalawa sa iba pang ospital sa lalawigan samantalang ang 17 anyos na estudyante maswerteng hindi nasugatan.
Samantala, tinitignan naman ng pulisya ang kaukulang kaso na isasampa laban sa magulang ng 15 anyos na drayber ng sasakyan.

08/07/2023

Motorsiklo bumanga sa nakaparadang trak: 1 patay

Patay ang isang Chinese national habang sugatan ang kasama nito nang bumungga ang minamaneho nitong motorsiklo sa nakaparadang dump truck sa Teresa, Rizal.
Sa ulat ng Region 4A Police, binabagtas nina He Tingyi at Geng Haowen sakay ng motorsiklo ang Pantay Road ala-1:30 ng madaling araw nang sumalpok ito sa nakaparadang dump truck sa gilid ng kalsada sa Barangay Dalig.
Dahil sa matinding impact, nagtamo ng matinding pinsala sa katawan si Haowen na agad nitong ikinamatay habang isinugod naman sa ospital si Tingyi.
Hindi naman tinukoy sa report kung mayroon bang early warning device o reflectorized ang nakaparadang truck.

08/07/2023

Gunting, tumusok sa ulo ng batang babae

Na-ospital ang isang bata nang matusok ng gunting sa ulo sa Malungon, Sarangani.
Nangyari ang insidente habang nag-aaway ang bata at kaniyang kapatid.
Batay sa kuwento ng ama ng bata, nahampas ng bag ng 5 anyos na lalaki ang ulo ng 8 anyos niyang ate. Nasa loob daw ng bag ang gunting na tumusok sa ulo ng pasyente.
Sa report, kinakailangan maoperahan ang bata para matanggal ang gunting pero malaking halaga ng pera ang kinakailangan para sa operasyong nakatakda sanang gawin ngayong Sabado.

08/07/2023

Batang lalaking minolestiya ng trabahador ng medical center

Isinailalim sa psychological evaluation ang 14 anyos na batang lalaki na binastos ng 46 anyos na administrative assistant sa Southern Philippines Medical Center (SPMC).
Sinabi ni PSSG Jaquilin Abu, hepe ng WCPD ng Bajada Police station, na ayon sa kanilang physical assessment sa biktima, nakaranas ito ng trauma o tila wala sa sarili.
Dagdag pa ni Abu, isinailalim na sa assessment ng mga social worker ang biktima at ngayon ay kasama na ang kanyang pamilya para sa agarang paggaling sa masamang nangyari sa kanya.
Ayon sa opisyal ng pulisya, pormal nang sinampahan nitong Huwebes ang kasong paglabag sa section 15 ng Republic Act number 7610 o Other forms of child abuse ang suspek.
Inamin din ng suspek ang insidente, ngunit tila naguguluhan ito na sumagot kung bakit niya minomolestiya ang biktima.
Nabatid na mahigit 20 taon nang nagtatrabaho sa Southern Philippines medical center ang suspek.
Matatandaang mabilis na nagsumbong ang biktima sa kanyang kapatid matapos ang insidente, dahilan kung bakit agad nahuli ang suspek.
Nabatid na out-patient sa SPMC ang biktima at tinulungan ito ng suspek.

08/07/2023

Dentista, huli sa iligal na armas

Arestado ang 59 anyos na dentista nang salakayin ng pulisya ang kanyang bahay at magpositibo ang impormasyon hinggil sa pag-iingat ng mga armas sa Caloocan City.
Sa ulat, 4:35 ng hapon nitong Huwebes, Hulyo 6 nang isagawa ng pinagsanib na puwersa ng Northern Criminal Investigation and Detection Group (CIDG), Northen Police District (NPD) District Mobile Force Battalion (DMFB) at Caloocan City Police Station ang raid sa bahay ni Prospero Oropesa sa 434 Cherry Blossom St., Bo. Sto Nino, Brgy. 187 sa bisa ng search warrant na inilabas ni Caloocan Regional Trial Court (RTC) Judge Raymundo G. Vallega ng Branch 130.
Sa ulat na tinanggap ni NPD Director P/BGen. Ponce Rogelio “Pojie” Penones, Jr., humiling ng search warrant sa korte ang Northern CIDG nang maiprisinta ang kanilang testigo na magpapatunay na may mga hindi lisensiyadong armas na nasa pag-iingat ng suspek.
Ayon kay BGen. Penones, nakuha ng mga operatiba sa bahay ni Oropesa ang isang kalibre .9mm pistol na may dalawang magazine na parehong naglalaman ng pitong bala ng ,9mm, isang caliber .45 pistol na may nakalagay na magazine na may dalawang bala at isang MK2 na granada na dahilan upang arestuhin siya ng pulisya nang walang maipakitang mga dokumento hinggil sa legalidad ng naturang mga armas.
Mga kasong paglabag sa R.A. 10591 o ang Comprehensive Law on Fi****ms ang Ammunition Act at R.A. 9516 o Illegal Possession of Explosive ang isinampa ng pulisya laban kay Oropesa sa Caloocan City Prosecutor’s Office.

08/07/2023

2 mataas na opisyal ng NPA at miembro ng Maute, timbog

Arestado ng mga operatiba ng Criminal Investigation and Detection Group (CIDG) ang dalawang mataas na opisyal ng rebeldeng New People’s Army (NPA) kasapi ng Islamic State-inspired Maute terror group sa magkahiwalay na operasyon sa Lanao del Sur at Isabela, iniulat kahapon.
Ayon kay CIDG chief Maj. Gen. Romeo Caramat Jr., nadakip na sina Cedric Casano, 29, Secretary ng Henry Abraham Command East Front Committee KOMPROB Cagayan at Charlotte Velasco, 28, Finance Officer ng Komiteng Probinsya Isabela (KOMPROB ISABELA),” sa ipinatupad na search warrant ng ahente ng CIDG sa Barangay Upi, Gamu, Isabela noong Martes.
Sa bisa ng warrant of arrest na ipinalabas Tuao, Cagayan Regional Trial Court (RTC) Branch 11 nadakip si Casano sa kasong paglabag sa Republic Act 10591 (Comprehensive Fi****ms and Ammunition Regulation Act), RA 11479 (Anti-Terrorism Act of 2020), and RA 9516 (Illegal Possession of Explosives).
Habang si Velasco ay wanted sa kasong attempted murder sa RTC Branch 16, Ilagan City, Isabela.
Sinabi ni Caramat na ang dalawa ay kapwa may mataas na posisyon ng rebeldeng grupo at nasa listahan ng Periodic Status Report Threat Group (PSRTG) watchlist.
Dagdag pa ni Caramat na si Velasco, ay asawa ni Yoshida Orion alias “Brown”, na dating vice chairperson ng Anakbayan National, political instructor ng Regional Sentro De Grabidad (RSDG), Regional Operations Command (ROC), at dating Secretary ng RSDG sa ilalim ng NPA Fortunato Camus Command.
Ang dalawang akusado ay nasa kustodiya ng 5th Infantry Division- Philippine Army habang ang kanilang mga warrant of arrest ay ibabalik sa court of origin.
Samantala, noong Martes, nagpatupad ng search warrant ang mga tauhan ng CIDG Lanao Del Sur Provincial Field Unit kasama ang iba pang PNP operating units na nagresulta sa pagkakaaresto kay Acmad Casim, miyembro ng Maute Group sa Barangay Lakadun, Masiu, Lanao del Sur.
Sinabi ni Caramat na nahuli ng mga operating team si Casim alyas “Batang Criminal” dahil sa paglabag sa RA 10591 na inisyu ng korte sa Kapatagan, Lanao del Norte.
Habang tugis naman ng mga operatiba ang dalawang nakatakas na kasamahan nitong sina Aminola Casim at Pandi Dimaocom Mama.
Nakuha ng mga operatiba ng pulisya mula sa suspek ang isang caliber .45 pistol, isang steel magazine assembly para sa .45 caliber, dalawang live ammunition para sa .45 caliber at dalawang basyo ng bala.
Si Casim ay may warrant of arrest sa pagpatay na inisyu ng Malabang, Lanao del Sur RTC Branch 11 noong Setyembre 30, 2014, na walang inirekomendang piyansa.
Kasalukuyan nasa kustodiya ng CIDG Lanao del Sur PFU si Casim para sa dokumentasyon at tamang disposisyon.

05/07/2023

World’s hottest day ever, naitala!

Naitala nitong Lunes, Hulyo 3 ang pinakamainit na araw sa buong mundo, ayon sa datos ng US National Centers for Environmental Prediction.
Umabot kasi sa 17.01 degrees Celsius ang average global temperature, lampas sa August 2016 record na 16.92 degrees Celsius.
Matatandaan na nakararanas na ng matinding heat dome ang southern US sa mga nakalipas na linggo.
Sa China naman, nagpapatuloy din ang heat wave kung saan ang temperatura ay umaabot ng 35 degrees Celsius, at sa North Africa ay umaabot naman sa 50 degrees Celsius.
Bagama’t winter ngayon sa Antarctica, hindi rin ito nakalampas dahil naitala ang kakaibang mainit na temperatura sa lugar, kung saan ayon sa Vernadsky Research Base sa Argentine Islands, umabot ang temperatura ngayong buwan sa 8.7 degrees Celsius.
“This is not a milestone we should be celebrating,” ayon kay climate scientist Friederike Otto ng Grantham Institute for Climate Change and the Environment sa Imperial College London.
“It’s a death sentence for people and ecosystems.”
Ayon naman sa mga eksperto, maituturong sanhi nito ay ang paglitaw ng El Nino at tumitinding climate change.
“Unfortunately, it promises to only be the first in a series of new records set this year as increasing emissions of [carbon dioxide] and greenhouse gases coupled with a growing El Niño event push temperatures to new highs,” ayon naman kay Zeke Hausfather, research scientist sa Berkeley Earth.

05/07/2023

El Niño, dumating na sa Tropical Pacific – PAGASA

Inanunsyo ng Philippine Atmospheric, Geophysical and Astronomical Services Administration (PAGASA) nitong Martes, Hulyo 4, na dumating na ang El Niño sa Tropical Pacific.
Dahil dito, itinaas na rin ng PAGASA ang El Niño-Southern Oscillation Alert System status sa El Niño advisory mula El Niño alert.
Ayon kay Ana Liza Solis, chief ng climate monitoring and prediction section ng PAGASA, nagpapakita ang El Niño ng mga sensyales ng unti-unting paglakas nito sa mga huling quarter ng taon.
Gayunpaman, maaari pa rin umanong makaranas ang ilang bahagi ng bansa ng halos mas mataas sa normal na pag-ulan sa pagitan ng Hulyo at Setyembre.
Ayon din sa PAGASA, maaaring magdulot ang El Niño ng mga tagtuyot sa ilang bahagi ng bansa sa pagitan ng huling quarter ng 2023 at unang kalahating bahagi ng 2024.

05/07/2023

Pinas magiging malaria free sa susunod na 2-3 taon

Magiging malaria free na ang Pilipinas sa susunod na dalawa o tatlong taon.
Ayon kay Health Secretary Teodoro Herbosa, sa ngayon, tanging ang Palawan na lamang ang may kaso ng malaria.
Pero ayon kay Herbosa, maliit na kaso na lamang ng malaria ang naitatala sa Palawan.
Kailangan kasi aniya na zero case ang Pilipinas ng ilang taon bago makapagdeklara ng malaria free.
Base sa talaan ng DOH, nasa 3,157 na kaso ng malaria na lamang ang naitala noong 2022.

05/07/2023

5 patay sa leptospirosis, dengue sa QC

Lima ang naitalang nasawi dahil sa dengue at leptospirosis sa lungsod ng Quezon.
Ayon sa Quezon Cityd Epidemiology & Disease Surveillance Unit (QCESU), isa ang nasawi sa 1,160 dengue cases na naitala mula Enero 1 hanggang Hunyo 24, 2023 sa lungsod.
Sa nasabi ring panahon, apat sa 32 pasyenteng may leptospirosis ang nasawi.
Dahil dito, hinimok ni Quezon City Mayor Joy Belmonte ang mga residente na panatilihing alerto at maingat na makakuha ng dengue at leptospirosis.
“In order to make our community safe from dengue and leptospirosis, let us start with protecting our families by cleaning our surroundings and making sure that preventive measures are in place,” pahayag ng alkalde.
Upang maiwasan ang leptospirosis, babala ni Belmonte ay huwag lumusong at maligo sa mga kontaminadong tubig katulad ng baha, magsuot ng protective clothing at lumayo sa mga patay o maysakit na hayop.

05/07/2023

10 pulis, isasailalim sa ‘lie detector test’ sa pagkasawi ng police corporal sa Bukidnon

Isasailalim ng ‘lie detector test’ ng forensic team ng Philippine National Police ang 10 na pulis kaugnay sa paghahanap hustisya sa pagkasawi ng isang police corporal na pinaniwaalang pinatay sa loob ng manuever company detachement ng 1004th ng Regional Mobile Force Batallion 10 sa bayan ng Kalilangan, Bukidnon.
Pahayag ito ni Police Regional Office 10 Director Police Brigadier General Lawrence Coop bilang bahagi ng kanyang pangako na mananagot ang kanilang mga kasamahang pulis kung sakali na mayroong kinalaman sa pagkasawi ni late Corporal Jeffrey Dabuco noong huling bahagi ng Hunyo 2023.
Sinabi ni Coop na hawak na nila ang ibang mga ebedensiya na maaring magtugma sa makukuha na pahayag mula sa nabanggit na mga pulis na kasama ni Dabuco noong buhay pa ito.
Magugunitang nasa kasagsagan nang inuman ang buong team habang biglang pinag-initan si Dabuco na nag-resulta pagka-missing nito ng tatlong araw at bangkay na noong marekober sa ilog ng Wao,Lanao del Sur.
Tiniyak ng heneral na kasong administratibo at kriminal ang ipapasampa nito laban sa sinuman sa mga pulis na iniimbestigahan ang matuklasan na mayroong kinalaman sa krimen.

04/07/2023

Mag-lolong mangingisda 4 araw nagpalutang-lutang sa dagat, nalambat

Nailigtas na ang mag-lolong mangingisda na apat na araw na pananatili sa dagat nang masiraan ng bangka sa kanilang pangingisda sa Vigan city.
Kinilala ang mag-lolo na sina Armando Mostales, 63; at Melvin Halagao, 16 anyos, parehong residente ng Brgy. Apatot, San Esteban, Ilocos Sur.
Ayon kay Mostales, June 29 ng madaling araw noong pumalaot ang mag-lolo ngunit noong nakakuha na sila ng isda at uuwi na sana bigla na lamang umanong nasira ang makina ng bangka na sanhi ng hindi nila pagkabalik sa tamang oras.
Aniya, 33 milya ang layo nila mula sa lupa at upang hindi na makalayo ang bangka itinali nito sa isang floater at doon na sila inabot ng apat na araw at tatlong gabi.
Ibinahagi nito ang survival journey nila ng kaniyang apo na aniya, hilaw na ang kinakaing isda at umiinom na sila ng tubig dagat upang maibsan ang gutom at uhaw.
Pagkalipas ng ilang araw, maswerteng pumalaot ang mga kasamahan nilang mangingisda na siyang nag-rescue sa kanila kung gaya’t nakauwi na sila sa kanilang tahanan.

04/07/2023

Wanted: Parak na pumatay ng titser sa Tacloban

Pinaghahanap na ng pulisya ang isa rin pulis na pumaslang sa isang g**o sa Tacloban City nitong Mayo.
Nasa P200,000 na rin ang inilabas na pabuya ng pulisya para sa agarang pag-aresto sa salarin na si Police Senior Master Sergeant (PSMS) Van Gregory Benitez, nakatalaga sa Tacloban City Police Office.
Panawagan ng Police Regional Office 8 (PRO8) sa sinumang makapagtuturo sa pinagtataguan ni Benitez, makipag-ugnayan na lamang sa pinakamalapit na presinto sa ikaaaresto nito.
Matatandaang naglalakad ang biktimang si Jessica Durana, 30, taga-Barangay 42, Tacloban City, sa Brgy. 43, Quarry district, kasama ang kanyang ina, nitong Mayo ng hapon, nang barilin ni Benitez.
Tumakas si Benitez nang isagawa ang pamamaslang.

04/07/2023

Killer sa Mindoro rape-slay sapol ng CCTV

Pinaghahanap na ng Philippine National Police (PNP) ang isang lalaking person of interest sa kaso ng pagpatay sa architectural student na si Eden Joy Villacete sa San Jose, Occidental Mindoro.
Sinabi ni PNP Spokesperson Police Col. Jean Fajardo na may isang lalaking nakuha sa CCTV camera na naglalakad nitong madaling-araw ng Miyerkules malapit sa apartment ng pinaslang na biktima.
“Kausap ko 'yung provincial director sa Occidental Mindoro at sabi niya may na-recover sila na CCTV na mga around 3:00 ng madaling araw noong araw na 'yun ay may nakitang isang lalaki na naglalakad malapit doon o katabing lugar kung saan natagpuan yung bangkay ni Eden Joy at 'yun ngayon 'yung pinupursue nila,” saad ni Fajardo.
Sa ngayon, nag-alok na ng pabuyang aabot sa P500,000 ang lokal na pamahalaan ng San Jose at Occidental Mindoro Provincial Government para sa ikakadakip ng salarin.
Matatandaang nitong 8:00, Biyernes ng umaga natagpuang tadtad ng saksak at walang saplot ang bangkay ni Villacete, 5th year architecture student ng Occidental Mindoro State College sa inuupahan nitong apartment sa Barangay 7 sa bayan ng San Jose.
Wala din ang mahahalagang gamit nito katulad ng cellphone, laptop at wallet.
Kaugnay nito, inatasan na rin ang National Bureau of Investigation (NBI) na imbestigahan ang pagkamatay ng dalaga.
Ang kautusan, inilabas ni Justice Secretary Jesus Crispin C. Remulla nitong Lunes, Hulyo sa NBI na magsagawa ng sariling imbestigasyon.

04/07/2023

Kotse sumalpok sa sa road barriers: 8 sugatan

Sugatan ang walong magkakapamilya kabilang ang 3 bata nang sumalpok ang sinasakyang kotse sa road barriers sa gitna ng highway sa diversion road Barangay Kanluran Mayao, Lucena City, nitong Lunes ng madaling araw.
Ayon sa report ng Lucena City police, galing Bicol at pauwi na sa kanilang tahanan sa Cavite ang mga biktima nang mangyari ang aksidente 4:00 ng umaga.
Sumalpok muna ang kotse sa mga concrete barriers na humahati sa magkabilang lane ng highway bago bumangga sa konkretong poste ng koryente.
Kabilang sa nasugatan ang driver na si Erwin Orbase Biares, 39, isang g**o; at ang misis nitong teacher din na si Lea May Biares, 33. Sugatan din ang dalwang batang anak ng mga ito at ang tatlo nilang pamangkin.
Isinugod ng mga nagrespondeng tauhan ng Lucena City Disaster Risk and Reduction Management Office ang mga biktima sa Quezon Medical Center sa Lucena City para lapatan ng lunas.
Napag-alaman na Linggo ng gabi nang umalis sa Camarines Sur ang pamilya mula sa pagbabakasyon at halos magdamag nang bumibiyahe nang mangyari ang insidente.

04/07/2023

Bosero inireklamo ng kapitbahay sa Pasig

Inaresto ang isang lalaki na inirereklamo ng kaniyang mga kapitbahay ng pananakot, panggugulo at pamboboso sa Pasig City.
Kinilala ang suspek na si Arturo Cordova Jr., alyas Turbo.
Inaresto si Cordova sa bisa ng arrest warrant kaugnay sa kinakarap nitong kaso na six count ng paglabag sa Child Abuse Law na isinampa ng kaniyang mga kapitbahay.
Kuwento ng isa sa mga biktima na itinago sa pangalang "Nene," nakita niya ang suspek na may ginagawang kahalayan sa sarili.
"May kinukuha akong sampay sa gate namin, ngayon may sumitsit sa akin," ani Nene, at sinabing nakita niya ang hindi kanais-nais na ginagawa ng suspek sa sarili.
Ayon pa kay Nene, pinagti-tripan din umano ng suspek ang mga menor de edad niyang anak na babae at sinusundan sa eskinita.
"Lagi niyang sinisitsitan. Madalas niyang sabihan na hihintayin kita paglaki," dagdag ng nagrereklamo.
Ayon naman kay Issa, 'di niya rin tunay na pangalan, tinututukan umano ng suspek ng sumpak ang kaniyang anak at sinasabihan na laging daan ng daan.
Dahil sa ginagawa ng suspek, naapektuhan na raw ang pag-aaral ng anak at umiinom na ng gamot dahil nagkaroon na ng depresyon at anxiety.
Sinisikap pang makuhanan ng pahayag ang suspek na nasa kostudiya ng pulisya.
Inatasan na rin ng mga opisyal ng pulisya ang mga tauhan na i-monitor ang lugar ng mga biktima para matiyak ang seguridad doon.

04/07/2023

Bgy. kagawad at kabit, huli ni mister na nagtatalik

Nahuli ang 47 anyos na kagawad ng barangay ng kanyang mister habang nakikipagtalik sa kanya lover sa bahay ng huli sa Infanta, Quezon noong Linggo.
Sa galit ng lalaki, ito mismo ang bumitbit sa asawang kagawad sa Infanta Municipal Police Station para ireklamo.
Sa ulat, kinutuban na umano ang mister na may kinalolokohang lalaki ang kanyang misis kaya sinundan niya ito.
Ayon sa report, 11:30 ng umaga nang matiyempuhan niya ang asawa habang nakikipag-sex sa kalaguyo nitong si Ariel Ungriano sa bahay nito sa Barangay Pilaway sa Infanta.
Nakatakbo ang lalaki samantalang napigilin ng mister ang kagawad na makatakas.
Inihahanda na ang ang kasong na isasampa laban sa magkalaguyo.

04/07/2023

Pulis sinapak ng 2 siga

Kulong ang dalawang lalaki na armado ng baril habang nagsisigaw sa kalsada at nanapak pa ng pulis sa Quezon City.
Kinilala ni Quezon City Police District – Payatas Bagong Silangan Police Station 13 chief, PLt. Col. Roldante Sarmiento ang mga suspek na sina Ryan Acena, 39; at Romel Igcasenza, 36, kapwa taga-Brgy. Commonwealth, Quezon City.
Sa ulat, 5:00 ng umaga, nagsagawa ng anti-criminality operation ang mga operatiba ng PS 13 sa Bonifacio Ext., Brgy. Bagong Silangan, nang maispatan sina Acena at Igcasenza na nagtutulak ng motorsiklo sa kalsada habang sumisigaw na nagdulot ng tensyon sa mga residente sa lugar.
Dahil dito, nilapitan ng mga atoridad ang mga suspek upang payapain pero sa halip na magpaawat sinuntok pa ni Igcasena sa tiyan ang isa sa mga pulis kaya naman agad silang dinakip.
Narekober mula sa mga suspek ang isang Caliber 22 mm at isang Honda Beat na motorsiklo.
Inihahanda na ang kasong illegal possession of fi****ms laban sa mga suspek.

04/07/2023

Suspek sa photo journ, maaresto ngayong Linggo - PNP

Posibleng maaresto ngayong linggo ang mga suspek sa pananambang sa isang photo journalist sa Quezon City kamakailan, ayon sa pahayag ng Philippine National Police (PNP) nitong Lunes.
Sinabi ni PNP Spokesperson, Col. Jean Fajardo, sinusubaybayan na ng pulisya ang mga suspek batay na rin sa pakikipag-usap nito kay Quezon City Police District (QCPD) chief, Brig. Gen. Nick Torre.
Nakilala na aniya ng pulisya ang limang suspek o persons of interest sa pananambang kay Remate online photojournalist Joshua Abiad nitong Hunyo 29.
Gayunman, hindi na nagbigay pa karagdagang impormasyon ang pulisya kaugnay sa kaso upang hindi mabulilyaso ang kanilang follow-up operations laban sa mga suspek.
Matatandaang hinarang at pinagbabaril ng mga suspek ang sinasakyan ni Abiad at ilang kaanak nito sa Corumi Street, Brgy. Masambong, Quezon City nitong Huwebes ng hapon.
Sugatan sa insidente si Abiad at mga kaanak nito. At pumanaw na rin ang 4 anyos na biktima ng pamamaril nitong Sabado.
Nauna nang sinabi ni Torre na walang kinalaman sa trabaho ni Abiad bilang photo journalist ang insidente batay na rin sa kanilang imbestigasyon.
Natuklasan ni Fajardo na ang plate number ng sasakyan na ginamit ng mga salarin nakarehistro sa ibang sasakyan at natunton ang may-ari ng kabilang sasakyan.
Bunsod nito, sinabi ni Fajardo na mayroong indikasyon na ang pamamaril sa media practitioner may kinalaman sa isang “propesyonal na grupo.”

04/07/2023

NBI, pasok na sa pagkamatay ng architecture stude

Magkakasa ng imbestigasyon ang National Bureau of Investigation (NBI) sa pagkamatay ng babaeng architecture student sa Occidental Mindoro.
Ito ay matapos atasan ni Justice Secretary Jesus Crispin Remulla nitong Lunes ang NBI na magsagawa ng sariling imbestigasyon.
Ayon sa NBI, kinilala ang biktimang si Eden Joy Villacete, 21 anyos, na incoming fifth year student ng Occidental Mindoro State College.
Nagtapuang walang buhay at walang saplot si Villacete noong June 30 sa loob ng inuupahan niyang kwarto sa bayan ng San Jose.
Inihayag naman ng NBI na nakalikom na sila ng P459,000 reward money para sa sinumang makapagbibigay ng impormasyon tungkol sa mga killer ng biktima.

04/07/2023

Babaeng 'financier' ng NPA, timbog sa Sultan Kudarat

Naaresto ang isang babaeng wanted sa mahigit 10 kaso kaugnay ng kanyang pagiging tagahawak ng pondo para sa New People’s Army (NPA) sa Kalamansig, Sultan Kudarat nitong Sabado, July 1, 2023.
Kinilala ang inaresto na si Aileen Manipol Villarosa, 41 anyos.
Sa report, dinala ang suspek ng mga operatiba ng Criminal Investigation and Detection Group sa Cagayan de Oro City kung saan ito lilitisin kaugnay ng mga kasong kanyang kinakaharap.
Kinumpirma nitong Lunes, July 3, ni Brig. Gen. Jimili Macaraeg, director ng Police Regional Office-12, ang pagkakaaresto kay Villarosa ng mga operatiba ng PRO-12 at mga kasapi ng CIDG-10 sa Barangay Poblacion sa Kalamansig.
Ang Kalamansig ay nasa sa probinsya ng Sultan Kudarat, sakop ng Region 12, kung saan nagpalipat-lipat ng taguan si Villarosa nang masampahan ng mga kasong kriminal sa iba't-ibang korte sa Northern Mindanao kaugnay ng kanyang diumano pangangalap ng pondong pantustos sa pangangailangan ng iba't-ibang grupo ng New People’s Army sa naturang probinsya.
Ayon kay Macaraeg natunton sa Kalamansig si Villarosa sa tulong ng mga residenteng nakilala siya at nalamang may mga kasong kinakaharap sa iba't-ibang korte sa Region 10.
Dating empleyada si Villarosa ng isang non-government organization, ang Rural Missionaries of the Philippines na may mga humanitarian projects sa Region 10.
Ayon sa ulat, ginamit ni Villarosa ang naturang NGO sa pag-solicit ng perang kanyang ipinapasa sa mga NPA.

Talk About

08/07/2023

08/07/2023

08/07/2023

08/07/2023

08/07/2023

08/07/2023

08/07/2023

08/07/2023

08/07/2023

08/07/2023

08/07/2023

05/07/2023

05/07/2023

05/07/2023

05/07/2023

05/07/2023

04/07/2023

04/07/2023

04/07/2023

04/07/2023

04/07/2023

04/07/2023

04/07/2023

04/07/2023

04/07/2023

04/07/2023

Address

Website

Alerts

Contact The Business

Shortcuts

Share