Yobe Authors Forum YAF

13/11/2022

You are all invited.

27/09/2022

19/10/2020

Matasan Nguru; Mu Yunkura Mu Kawo Gyara.......

Sanin kowa ne, idan al'umma na son sauyi ko gyara; dole sai ta yunkura, ta yi abin da za ta iya, sannan ta bar sauran ga Allah. Wannan ya sanya sau da dama mukan zama da sauran kungiyoyin Nguru domin tattauna matsalolin da s**a shafi wannan gari namu, sannan mu yi kokarin tunkarar matsalolin a tare, wanda hakan ya kawo mana karshen wasu matsaloli da dama, wasu kuma an sami sauki.

Bisa haka muke ganin lokaci ya yi da za mu sake zama domin tattauna wasu matsaloli da a yanzu s**a addabi kowa a wannan gari, wato matsalar wutar lantarki, da bayanen da aka rinka yi game da School of Midwifery wadda aka ba mu tun lokaci mai tsawo, amma har yanzu ba mu ga tamu ta fara aiki ba. Da sauran dimbin matsalolin da muke fama da su.

Da yake abin muna hada karfi da karfe ne, kuma a yanzu muna ganin an kara samun yawaitar wasu kungiyoyi a wannan gari. Don haka, muna kira ga dukkanin kungiyoyinmu da su yi kokarin tura mana sunan kungiya da adireshinsu, wanda hakan zai ba mu dama wajen aika musu katin zaman da muke son yi cikin kwanakin nan. Sannan akwai daidaikun mutane da ba sa wata kungiya, amma suna sha'awar su rinka tarayya da mu a wadannan ayyuka. Don haka, su ma za su iya tuntubarmu.

Hanyoyin tuntubar su ne:
1. 07066366586 ko 08125351694 (ta Whatsapp ko message ko kira kai tsaye).

2. Inbox.

3. Ko kuma a tuntubi duk wani wanda aka san memba ne a NWAN.

Mu sani, so da kishin garinmu zai tabbata ne yayin da muka yi aiki a aikace ba maganar fatar baki kurum ba. Sannan kowa na da irin gudumawar da zai bayar domin tsamo garinsa ko taimakon al'ummarsa, don haka mu yi amfani da wannan dama, mu yi tarayya wajen magance mataalolinmu.

Bayan mun gama tattara sunayen, za mu tura wa kowa takardar zama, lokaci da kuma wurin da za a yi; k**ar yadda muka saba.

Do Allah a yada mana wannan sanarwa.

Allah ya taimake mu, amin.

18/10/2020

11/10/2020

Gobe Za A Bude Makarantu; Wane Shiri Gwamnati Ta Yi?

Kamar yadda aka sani gobe za a koma makarantun firamare da sakandare a fadin Jihar Yobe; bayan zaman dirshan da aka yi a gudaje sak**akon cutar CORONA.

Za a koma makarantu, domin shiga zangon karatu na uku (third term). Hakika dalibai manyansu da kanana, iyayensu sun kagu da a koma, k**ar yadda malamai masu himma s**a matsu da a koma.

Za a bude sabon babin karatu wanda kencike da wani yanayi da taka-tsantsan a wasu yankuna, da kuma labarai da jajantawa juna na rashin haduwa, da cututtukan da s**a keta tsakani gami da rashe-rashen da s**a dabaibaye al'umma!

Za a koma cikin wani yanayi na bakin talauci, da wahalhalun rayuwa da tsadar kayayyaki da hauhawar kudaden kayan masarufi.

Bisa wannan, muke bayar da shawara ga Gwamnati, musamman Ma'aikatar Ilimin Kananan Makarantu da ta yi la'akari da yanayin da ake ciki, ta sauke wa iyayen yara kudin da ake biya na PTA a dukkanin makatantu, musamman sakandare, ko kuma daga 500 da mafi yawan makarantun ke karba, a dawo da shi dari biyu ko ma daya, dubi da yanayi da ake ciki, da kuma ganin Gwamnatin na kokarin tabbatar da ilimi kyauta a Jihar.

Lalle za ka iske wasu makarantun ana karbar kudade na karya da gaskiya, kudin PTA, Kudin house (duk sati), kudin report sheet/jarabawa, kai har ma da kudin graduation a wasu makarantu, saboda shugabanninsu sun zama masu ci da gumin iyayen yara, da kuma mayar da iyayen tamkar injin tatsar kudi.

Mu sani, Jihar Yobe na kokarin bayar da ilimi kyauta tun lokaci mai tsawo, kuma daga abin da muke ji da gani, UNICEF na iyakacin kokarinta na taimakawa da kayan aiki da sauransu. Idan shugabannin makarantu na karbar wadannan kudade domin ayyuka ne, to aikin me za su yi da ya wuce sayen magani, alli, gyaran benci da wasu daidaikun abubuwan da naira dari biyu ma za ta iya saya.

Mai Girma Kwamishinan Ilimi, mun san tausayinka da adalcinka, da kuma son ganin 'ya'yanka talakawa sun yi karatu irin yadda kake son 'ya'yanka su yi karatu, wannan a fili yake. Mun gani ba dare ba rana kana kokarin hakan. Don haka, a sanya Kwamiti domin binciken yadda ake wannan badakala, a kuma kawo karshen abin. Hakika yana daga cikin tausayinka tun kafin ka zama Kwamishina, kana daukar 'ya'yan takalawa ka kai su ELKANEMI su yi karatu kyauta, to yanzu kuma ga wuka da nama a hannunka ta yadda talakawan za su kwankwada daga kokarinka ba tare da sun kusance ka ba ma.

Allah ya sassauta mana, Ya taimake mu da ku cikin kyawawan manufofi da kudirori, amin.

Ibrahim Garba Nayaya
11/10/2020.

14/08/2020

FUGA: YA KAMATA MU DAWO HAYYACINMU.....

Yana daga cikin abin da yake yawancin garuruwa suke ginuwa a kai, tabbatar da dan gari ko jihar a jagorancin wata cibiya ta Gwamnatin Tarayya wadda ta kafa a wannan gari. Hakan sai ya zama sababin ciyar da wannan cibiya gaba, garin ko jihar su kara samun yalwar arziki da bunkasa. Za ku yarda da ni, idan kun la'akari da wasu manyan jami'o'i a wannan Kasa, inda za ka iske yan Jihar ne kuma sai an taco masu himma, sannan a kaddamar da su a gaba.

Labari ya riske mu game da sharudan zabar Shugaba a Jami'ar Gwamnatin Tarayya da ke Gashua Jihar Yobe, inda aka yi wani abu da muke kallonsa tamkar wasan kwaikwayo cewar wai daga cikin sharudan zama VC, shi ne sai Farfesa ya kai matsayin shekaru bakwai da samun wannan matsayi, wanda hakan ya saba wa dokar asali; wadda ita ma a kan iya rushe ta idan akwai bukatar hakan.

Sanin kowa ne, tun daga aka kafa Jami'ar babu dan Jihar da ya rike wannan matsayi, hakan sai ya haddasa koma baya a cikin Jami'ar, inda sa'anninta s**a kere mata, kerewar da idan ba a samu zakakurin Shugaba ba, to ba za ta hango sahunsu ko kurarsu ba, b***e su yi tunanin kamo su.

Bisa haka, muke kira ga Shugaban Sanatocin Nijeriya, da kuma Gwamnan Jihar Yobe, su sani Yobe Jiharsu ce, kuma a dokance akwai alfarma ko la'akari da yanki wajen bayar da matsayi. Abubuwan da aka yi a baya na bai wa wadanda ba yan Jihar ba; ya wuce, kuma bai haifar wa da Jihar da mai ido ba. Don haka, su yi iyakacin yin su wajen ganin dan Jihar Yobe, idan son samu ne haifaffen yankunan da Jami'ar take sun samu shugaba daga wannan yanki na Yobe ta Arewa. Wannan shi zai kai Jami'ar ga gaci bisa kyakykyawan zatonmu.

Allah ya bai wa wannan Jami'a jajirtaccen shugaban da zai karkatar da damuwarsa ga Jami'ar, amin.

Ibrahim Garba Nayaya,
14/Aug./2020

21/07/2020

Game Da Bashin Gwamnatin Tarayya....

Kamar yadda malamai s**a bayyana haramcin karbar bashi mai ruwa, tuni Gwamnatin Tarayya ta amince za ta bai wa mutanen Arewa bashin da babu ruwa; bayan kira da malaman s**a yi. Bisa haka aka nemi mu ja hankalin jama'a masu son yin sana'a da su karbi wannan bashi, koda kuwa macen da take sayar da Awara, Kosai ko Waina ne.

Hanyar karbar bashin dole sai mutum ya yi rajista da Cibiyar Tattara Bayanan Yan Kasuwa wato Small and Medium Enterprise Development Agency in Nigeria, wanda da zarar ka yi rajita za su turo maka lamba wadda ta fara da SUIN..... Wanda lamba tana da matukar muhimmanci sama da kudin aljihunka, kuma da ita za ka samu damar karbar bashin.

Domin saukakawa al'ummarmu, Kungiyar Marubuta ta Nguru Writers' Association of Nigeria, ta dauki alhakin yin rajista kyauta ga duk wanda ya/take son yi. Kawai abin da za a zo da shi:
Cikakken suna,
Lambar Waya,
Nau'in kasuwanci,
Lambar Katin Zabe/Dan Kasa,

Ga duk wanda yake bukata, sai ya kira wadannan lambobi:
07066366586,
08125351694,
08165995555.

Allah ya sa mu dace, mutane su dage su karba domin su yi kasuwanci, bashin babu kudin ruwa (riba)

Ibrahim Garba Nayaya,
Shugaban NWAN.

29/03/2020

Mu Yi Wa Sheikh Jingir Adalci.....

Ko kadan ba na tare da Malam Jingir kan karyata cutar Korona wadda ta sa aka kora jama'a gidaje ko garuruwansu, haka ba na tare da shi kan jinginata ga makircin Yahudawa. Amma fa jama'a da dama ba su yi masa adalci ba kan cewar ya take dokar Gwamnatin Jihar Filato!

Bincike ya tabbatar min cewa Gwamnatin Jihar ba ta hana zuwa masallaci domin yin sallah ba! Amma saboda gafala ko wani son zuciya s**a sanya mutane ke ta yamididin ya karya doka, ya je masallaci! To idan har an sanya dokar han zuwa, ina jami'an tsaro suke yayin da jama'a s**a hallara a Masallacin, me ya sa ba a kore su ba? Domin sai mamu sun je, sannan Liman yake zuwa, kuma duk hotuna sun nuna babu wani tashin hankalin da aka yi! Amma abin mamaki sai ga shi wasu da sunan ilimi suna yada maganganu na karya, wai har an je gidansa baya nan!

Ni ina ganin irin wadannan soke-soken da karerayin ba za su haifar mana da d'a mai ido ba! Yanzu do Allah, ba jihohin Katsina da Neja ba ne s**a sanya wannan dokar, su din ma bisa rashin lissafi irin na shugabanninsu. Sun bar kasuwanni a cike makil, da gidajen masha'a, amma masallata a rufe, bayan n ne wurin nutsuwa.

Yak**ata mutane mu ji tsoron Allah, mu rinka yada alheri. Mu sani, Musulunci ya umarce mu wajen yin adalci ga koda makiyinmu ne, ko wanda ba mu hada addini ba! Sannan ya hana mu yada karerayi da ji-ta ji-ta.

Ibrahim Garba Nayaya
Ibrahim Garba Nayaya

29/03/2020

02/03/2020

IDAN AN CIZA; A BUSA..........

Ilimi shi ne tsani na hayar da al'umma, da shi ake samun ci gaba, da shi ake yakar jahilci, da shi ake samun yalwar arziki, da shi ake samun zaman lafiya da nutsuwa, bal ma da ilimi ake bauta wa Mahalicci. Ilimi, mabubbuga ce da samar da kyakkyawar al'umma wadda za ta zama sanyin idanu a zamaninta, da dora al'ummar dake biye da ita a kan gwadabe na tsira.

Makaranta wuri ne da ake koyar da ilimi; dubi da mataki daban-daban na ilimi, matattara ce ta yada ilimi. Dukkanin al'ummar da aka samu makarantu a cikinta, da malamai gogaggu, to wannan al'umma ta rabauta, musamman idan ya kasance malaman suna sauke nauyinsu, shugabanni kuwa na bai wa malamai hakkokinsu, tare da samar da ingantaccen muhalli na bayar da ilimi, da kuma kayan aikin yada wannan ilimi.

Labari ya riske mu game da kokarin gina makarantu a wannan Jiha ta Yobe, ciki har da Karamar Hukumar Nguru, wanda wannan ya nuna irin kulawa da Gwamnati take yi wajen ganin an samar da wadatacce kuma ingantaccen ilimi. Lalle wannan abin a yaba ne, abin a yi wa Gwamnati jinjina ne. Sai dai wurin da aka kebe domin gina wannan wuri ne aka samu cece-kuce a kai, musamman ganin rashin dacewar gina makaranta a wannan wuri la'akari da Sallar Idi, da wasannin yara da manya da ake yi, sannan wurin a kewaye yake da wasu makaranta har guda uku.

Haka ne, lalle Gwamnati na da ikon yin gini a duk inda ta ga dama, koda kuwa wani ya fara gini a wurin ne, za ta iya karba ta biya shi diyya. To amma matsalar da ke faruwa a nan ita ce, ya k**ata Gwamnati ta yi la'akari da abubuwan da jama'a suke kokawa a kai, ta janye wannan kudiri, idan ya so ta mayar cikin Nayi-Nawa, domin an fi bukatar makaranta a can; sabanin wannan wuri. Idan har abin da jama'a ke fada daidai ne, ai a tsarin tanka unguwar Nayi-Nawa an ce wai akwai filin makaranta, ofishin 'yan sanda da kasuwa. Idan har wannan magana gaskiya ce, ya k**ata Gwamnati ta nemi taswirar unguwar domin ganin wannan fili, da kuma mayar da ginin can.

Wani hanzari ba gudu ba, shin anya ma Gwamnati tana da masaniyar ana Sallah a filin a hukumance, ba wai maganar baki ba? Ma'ana, Kungiyar Izala ta nemi wurin kuma an bata a rubuce? Domin ina ganin idan har akwai wannan yarjejeniya zai yi wuya Gwamnati ta sanya kafa ta shure ba tare da ta zauna da Kungiyar ba, ba tare da ta ba ta wani filin ba. Don haka, ya k**ata Kungiyar Izala ta yi la'akari da haka domin gaba, sannan masu rubuce-rubuce su bibiyi lamarin a nutse, kuma su yi bayani cikinsu hikima. Amma ba daidai ba ne a rinka zagin wasu, ko a rinka dora laifin ga wadanda ba su da laifi.

Sannan ya k**ata Kungiyar Izala ta je ta kai kokenta ga 'yan majalisunta na ciki da na wake, musamman na ciki wanda shi ke wakilcin wannan yanki. Sannan su ziyarci Dattijo Malam Baba Malam Wali, mni su sanar da shi halin da ake ciki, na tabbata zai saurare su, kuma zai yi wani abu a kai insha Allah. Ai a wani labari ma da muke ji, Mai Girma Gwamnan cewa ya yi a nemo fili a saya, amma saboda mugun nufin wasun mu, sai aka ce wai an zabga kudaden da s**a shallake hankali da tunani a filayen, don haka Gwamnati ta ce za ta yi amfani da nata (Ban san gaskiyar wannan labari ba, amma dai yana yawo).

Allah ya sa shugabanni su ji wannan koke, kuma su sauya wurin wannan gini, su mayar da shi inda ya fi cancanta, amin.

Ibrahim Garba Nayaya
2/3/2020

12/02/2020

MAWAKA: GAME DA GASAR YAF....

Bayan kira da marubuta waka s**a rinka yi game da gasar KUNGIYAR MARUBUTA LITTATTAFAN HAUSA reshen Jihar Yobe, Yobe Authors Forum (YAF) karo na farko ta sanya wadda za a karrama zakarun gasar a yayin bikin kaddamar da Kungiyar a Damaturu Fadar Gwamnatin Jihar Yobe. Kwamitin wannan gasa karkashin jagorancin Mataimakin Shugaban Kungiyar Muhammad Yakubu Lailai, sun nazarci shawarwarin, inda a yau s**a yanke hukuncin kara adadin baituka ga mawaka daga baiti 20 zuwa 30.

Sannan game da kebe jigon farko na gasar ga marubutan na Yobe, yanzu an bude; kowa zai iya daukar dukkanin jigon da ya ga dama cikin guda ukun da aka bayyana.

Game da Email din da aka bayar, an samu kuskure a baya, ga mai kyaun nan [email protected]

Kar a manta, za a rufe karbar labarun da wakokin a ranar 31 ga watan Maris na wannan shekara insha Allah. Kawo yanzu an samu labarai da wakokin da aka turo; wanda insha Allah za a rinka sanar da duk wadanda s**a turo domin su san sakonsu ya zo.

Ali Wakil Jajimaji,
Sakataren Watsa Labarai,
08128339974.

28/01/2020

GAME DA MARYAM SANDA

Daga jiya zuwa yau, batutuwan Maryam Sanda ne s**a cika wadannan kafafe, batutuwan da ba za su haifar mana da komai ba face bata lokaci, domin hukunci kam an yanke bisa abin da dalilai s**a tabbatar, kuma sai ya dace da irin hukuncin Musulunci. Mutane na nuna tausayawa da jimami har ma da yin Allah wadai, a daidai lokacin da ba sa irin wannan jimamin ga kashe-kashen da ake yi wa sassan wannan Kasa, da sace mana yara! Babban abin takaici shi ne yadda wasu s**a fake da wannan hukunci s**a fara s**ar Musulunci.

Ya k**ata masu irin wannan su sani, Alkalin nan fa ba da Alkur'ani da Hadisi ya yi wannan hukuncin ba! Ya yi ne da kwansitushin din da kuke bi, kuma shi ya bayar da umarnin kisa ga wanda ya kashe wani, sai aka yi dace ya zo daidai da hukuncin Musulunci. Amma saboda rashin ta-ido, sai aka koma zagin malaman Addini da ma s**ar Musulunci. Maimakon mu mayar da hankali, wannan hukunci ya zame mana wata aya abar lura, wa'azi abin wa'azantuwa. Kaicon irin wannan rayuwa tamu ta wauta da rashin lissafi.

Don haka, duk mai ganin kuskuren abin da aka yi, Allah ya ganar da shi! Idan ba mai shiryuwa ba ne, Allah ya jarrabi wani nasa fadawa kan irin halin da Maryam Sanda ta jefa mijinta, a nan sai mu ji me zai ce?

Allah ya sanya wannan hukunci ya zame wa Maryam Sanda hanyar kusantarta ga Allah, ta hanyar yawaita tuba da nafilfili da karatun Alkur'ani har zuwa lokacin da za a tabbatar mata da wannan hukunci.

Sannan muna kira ga mahukunta da su dauki irin wannan mataki ga masu kisan mutane wadanda suke hannu, domin su ma kisa s**a aikata.

Ibrahim Garba Nayaya
28/1/2020

06/01/2020

ALLAH NA AMFANI DA SHAIDAR MUTANE.....

"Baba Malam Wali, ya kasance zuciya mai tace dattin jini na Jihar Yobe, domin duk wani aiki da Gwamna zai yi, matukar bai samu kwararren Sakatare ba, to za a samu matsala".

"Hon. Ahmad Mirwa, gaskiyarsa ce ta hakurinsa s**a yan majalisu s**a amince masa ya jagorance su ba tare da an yi zabe ba".
-----Mataimakin Gwamnan Jihar Yobe.

" Ina godiya ga yan majalisu da s**a aminta na jagorance su ba tare da an yi zabe ba. Kuma za mu bi dukkanin ayyukan da Gwamna ya ce zai yi, mu ga an yi su".
-----Hon. Ahmad I. Mirwa

"Abar duk wasu gulmace-gulmace a zo a hada kai domin yi Jiha aiki, mu ciyar da garinmu da Jiharmu da Kasarmu gaba. Mu taimaki Mai Girma Gwamna a kan muhimman ayyukan da ya sa a gaba, domin mutum ne mai kyakkyawar manufa da son ci gaba, da jan matasa da ba su sana'o'i."
-----Malam Baba Malam Wali, mni.

"Mai Martaba, ya k**ata ka kira mu, ka zaunar da mu, idan akwai matsala a dinke..... Na sadaukar da albashina da alawuns din farko ga marayu domin su ma su ji dadi.... Zan ci gaba da raba albashina gida biyu a duk wata, rabi ni da iyalaina, rabi ga marayu. Fatan Allah ya ji tausayinmu, Ya taimaki Mai Girma Gwamna kan manufofinsa, Ya hada kawunanmu."
-----Dr. Muhammad Sani Idris.

Tsakure cikin muhimman zantuka a wannan sati.

Ibrahim Garba Nayaya,
6/01/2020

02/01/2020

Salam ya ke muradina,
Da safe na antayo kauna,
Na bayyana sirrikan raina,
Gare ki ina makwancina,
Zo amsa min cikin son rai.

Abar sona abar sona,
Abar kauna abar kauna,
Abar marari a rayina,
Yau ga ni da so cikar kauna,
Cikar buri cikar komai.

Gare ki masoyiya tawa,
Ki ji ni da zantukan baiwa,
Na kaunar nan da ba tsaiwa,
Cikin mararin cikar sowa,
Na bayyana baitukan so dai.

Idan na gane ki don kauna,
Na manta abin da ke raina,
Cikar buri ki zo guna,
Ki amshi bukatuna,
Ki share min duhun komai.

Ranar wanka Bahaushe de,
Ya ce cibi waje bude,
Nufinsa a wangame bude,
Kowa ya gano ido bude,
A san shi a san kalar komai.

Kin san so ba a mai yarfe,
Ba a kyamar tuwon safe,
Zoben so ba a sa karfe,
Burina na tattaro lefe,
Na kai ki garin da ba kome.

Kin san so ba a mai kulle,
Gararinsa yawa na 'yan talle,
Shuhurarsa a zuciya zille,
A ganta a fuska ba kyalle,
A san ya zarce duk komai.

Idan na taho a motata,
Cikin tafiya ta kasaita,
Idan na gane ki 'yar auta,
Kina tafiya ta kasaita,
Na manta batu na tukin dai.

Kalarki daban a mataye,
Sunanki daban na 'yar yaye,
Sautinki daban a Karaye,
A soyayya ana maye,
A sonki ko za na yo komai.

Naman da ake kira soye,
A cakuda kafi zabaye,
A sa naman a sa maye,
A sa gishiri a yo soye,
A so haka duk ake komai.

Maimaita aji fa sai dolo,
A so kam ba a son gwalo,
Ba a kome cikin salo,
Jifa kam sai da dan kwallo,
A so ba a barin komai.

Baitin karshe na ce santsi,
Ya debi mutum ya yo watsi,
Ya farfasa kai ya yo rotsi,
A soyayya a bar kutsi,
Aure a gare ki ne komai.

Ni Nayaya na ce ki dube ni,
Ki min kallon da ba raini,
Da zai mai she ni dan birni,
Na sa kaya na sa rawani,
Na so domin na zam komai.

10/12/2019

SAMAR DA SANA'O'IN HANNU GA MATASA: SHAWARA GA GWAMNATIN YOBE.

Sana'a hanya ce ta bunkasar Kasa, yawaitar arziki da magance matsalolin zaman banza da shaye-shaye. Dukkanin shugabannin da s**a san abin da suke yi, to za ka iske suna kokarin kafa masana'antu da horas da matasa a bangarorin sana'o'i daban-daban.

Tun hawan wannan Gwamnati ta fara kokarin dawo da wasu masana'antun da s**a jima da mutuwa ko kuwa dogon suma, k**ar yadda ta rinka yi wa matasa horo a bangarori daban-daban. Wannan ya nuna wata 'yar manunia ce ta alheri da samar da ci gaba a tsakanin al'umma. Bisa haka, dole a yi jinjina ga wannan Gwamnati tare da addu'ar ci gaba a irin wannan yanayi.

A kebance, muna bayar da shawara ga Gwamnati da ta rinka la'akari da wadanda take bai wa wannan horo.
*Kada a ware wasu mutane sunayensu ya rinka maimaituwa a dukkanin wani horo da za a bayar.
*Bibiyar dukkanin wanda aka ba shi horo daga lokaci zuwa lokaci, domin ganin an samu riba ko akasin haka.
*Duk wanda za a bai wa horo, a tabbatar yana son aikin, ba wai zai yi ba ne a dalilin ba shi da wani aiki.

A karshe, muna kira ga Mai Girma dan majalisar Jiha mai wakiltar Nguru ta tsakiya, Hon. Lawan Sani Inuwa Nguru, da ya sanya ire-iren matan da aka yi alkawarin ba su tallafi kafin zabe; a cikin wadanda Gwamnati take bayarwa. Yin hakan zai rage radadi na talauci sosai, sannan zai kawo masa sauki a wasu al'amuran da ya sanya a gaba na alheri.

Ibrahim Garba Nayaya
10/12/2019.

07/12/2019

ZUWA GA SABBIN KWAMISHINONIN YOBE............

Kamar yadda ya gabata, jiya aka rantsar da sabbin kwamisginoni a Jihar Yobe, wanda wannan ke nuni yanzu komai zai hau seti, ayyuka za su ci gaba da gudana yadda ya k**ata. Muna yi musu addu'a da fatan alheri, Allah ya ba su damar yin adalci.

Kwamishinoni ku sani, da yawan ku kun rike matsayi a baya, wasu ma wanda ya fi wannan, wasu kuwa kasa da wannan, amma siyasar ta juyaba a yi da su. To ku sani yanzu dama ce ta kara zuwa muku; domin ku yi ayyukan alheri irin yadda kuka yi a baya, idan har kun yi. Idan kuwa ba ku yi ba, to dama ta zo muku ta yadda za ku kankare wancan bakin fenti da kuke da shi a baya, idan har kuna da shi din. Ku kun sani, idan ma alheri kuka yi ko sharri. Ku zama mutanen da bayan mulkinsu za a rinka shi musu albarka, ba wadanda za a rinka tsine musu ba, kila idan sun je wuri ma a tashi.

A kebance, ina kara yabawa da ganin yadda aka samu wasu muhimman mutane a matsayin kwamishinoni, wato Farfesa Munkaila wanda malamina ne, ya koyar da ni a aji a yayin da nake digirina na biyu (Masters), mutum ne da yake da himma da gaskiya da kokari, da tausaya wa dalibai, muna fatan zai kawo karshen matsalar rashin karbar result na daliban da suke kammala Kwalejin Ilimi ta Gashu'a, sannan ya shiga al'amarin wajen ganin an sassauta wa dalibai a fagen yin rajita.

Dr. Muhammad Sani Idris, wanda tsohon ma'aikaci ne, Darakta ne, shekaru biyu baya, na bibiyi tarihinsa da gudumawarsa domin sanyawa a cikin aikin FITATTUN MUTANE, a garinmu na Nguru.

Alal hakika, Darakta ya bayar da gudumawa a bangarori da dama, to yanzu ga wata dama nan ta maimaitu wadda ita ce za ta kara sanyawa wadanda ba su san amfaninka ba, to za su sani. Kowa ya san yadda ake da kalubale a fuskar ilimin Basic Education, lokaci ya yi da za a kawo karshen cin zarafin dalibai ta hanyar karbar kudaden karya da yaudara da duka bisa zalunci da son zuciya da wasu bata-garin malamai da azzaluman shugabannin makarantu ke yi. Muna kyautata zaton za ka iya, aikinka ne, wannan ya sanya a Jihar Borno, Masarauta mai tarihi da albarka ta nada ka SHETTIMA ILIMU. Muna sa ran, za ka gyara harkar ilimi kwatankwacin yadda Dr. Abba Idris Adam FCIDA, AIA ya gyara Kwalejin Shari'a da Addinin Musulunci ta Atiku Abubakar dake Nguru.

Allah muke roko da ya agaza muku, Ya hada ku da mashawarta nagari ba masu son zuciya ba.

29/11/2019

YA KAMATA GWAMNATI TA SAKE LALE A WANNAN BATU.....

Cikin kwanakin nan na ga rubuce-rubuce sun yawaita game da karin lokacin da aka ce wai an yi a manyan makarantun sakandare na Jihar Yobe. Lalle irin wannan abu idan har da gaske an yi, to muna kyautata zaton an yi da kyakkyawar niyyar gyara harkar ilimi, kuma abu ne mai kyau.

Sai dai a irin wannan abu, akwai matsaloli har guda biyar da muka hango; wanda kila Gwamnati ba ta hango ba, ko kuma akwai matakin da za ta dauka a kai.

*Ba lalle dalibai su fahimci abin da za a koya musu ba, domin hankalin su ya koma zuwa gida da yunwa. Matsayar akwai wadannan tunane-tunanen na rashin nutsuwa, to karatu ba zai dauku ba. Maimakon haka, sai a bata goma biyar ba ta gyaru ba.

*Da yawa daliban, musamman mata, sai sun koma gidajensu suke yin dan kasuwancin awara, gyada, dankali domin samun abin da gobe za su tafi makaranta. Hatta kudaden PTA da yin uniform da sauran kudaden da ake karba a wurarensu, suna samu ne ta hanyar wadannan sana'o'i.

*Ba lalle malamai su bayar da hadin kai wajen shiga ajujuwa ba, kila saboda halin yunwa ko gajiya, ga kuma ba karin albashi s**a samu ba. Wannan zai iya sanya wa abin da ake dafa wa dalibai, a fara rabawa da malamai, karshe wannan abin ba zai kai su ko'ina ba. Sannan su kansu malaman s**an fita wasu sana'o'i, wato ba su dogara da albashi ba. Yin karin, zai hana su wani abu da suke alhali ba a musu kari ba.

*Idan wannan karin ya tabbata, to me za a koyar a wurin? Domin a ka'ida ta koyarwa, kowane darasi yana da adadin shigarsa a sati, wanda wannan ne zai bayu zuwa ga wata, har zuwa zango, har zuwa shekara k**ar yadda manhajar tsarin koyarwa (curriculum) ta tsara.

*Sannan wannan zai kara bude wata kofa ta fitina wajen fakewa da makaranta a tafi sharholiya, wato a saci kafa a gudu. Wannan ba boyayyen abu ba ne, akan samu lalata tsakanin dalibai mata da maza ko da malamai, duk da ana daukar mataki, amma dai wannan zai bayar da wata kariya wajen aikata hakan.

Bisa wadannan dalilai da nake ganin za su gamsar, ya k**ata a gyara wannan harkar, ina da yakinin ba lalle wannan abin ya haifar da d'a mai ido ga koyarwa ba, sai ma dai ya rusa. Na tabbata da yawan cikin iyaye za su iya hakura da karatun 'ya'yansu in dai wannan tsarin za a bi, daman talaka ne ke zuwa makarantun Gwamnati, da wanda ba zai iya biyan makarantun kudi ba. Hatta malamai na firamare ko sakanadare ko manyan makarantu, ma'aikata, 'yan siyasa ba sa kai yaransu makarantun Gwamnati. Koda ka ga malamin firamare ya kai dan/yarsa makarantar Gwamnatin da yake koyarwa, to ya kai ne kafin ya fara wayo sai ya mayar da shi ta kudi.

Sannan ina kira ga wannan Gwamnati mai albarka, do Allah idan za a rinka irin haka, to a rinka kiran public hearing domin jin ra'ayin iyaye da sauran al'umma da malamai, musamman tsoffin malaman makarantu, domin hanyar da za su bayar wajen warware wata matsala; ba lalle farfesa ya bayar ba, domin su layinsu ne, a nan s**a kammala ayyukansu.

Allah ya haska zukatan shugabanninmu, su tausaya wa talakawa domin samun ilimi ingantacce.

Ibrahim Garba Nayaya
29/11/2019

26/11/2019

YAUSHE MATASANMU S**A KOMA HAKA???

Tun farkon bayyanar 'yan takarkaru da ire-iren abubuwan da s**a fara biyowa baya, muka yi ta rubuce-rubuce game da karfafa tsaro da kokarin dakile abin da ake ganin barazana ce ga al'umma. Idan ban manta ba, Kungiyar NWAN ta shirya taro na musamman a kan hakan, sannan ta rubuta wasiku wadda aka raba ga dukkanin wani ofishi na jami'an tsaro, shugabanni, kungiyoyi, malaman addinai, 'yan siyasa da jam'iyyunsu da dukkanin 'yan takara.

Duk wannan mun yi ne domin magance matsalolin da za su iya bayuwa zuwa ga ta'addanci da asarar rayuka da tashin-tashina.

Abin takaici, duk da wannan abu da aka yi, sai da aka samu tashe-tashen hankula da zub-da jini.

Zabe ya wuce, komai ya lafa, sai 'yan abin da ba a rasa ba, musamman a soshiyal mediya.

Jiya na ci karo da wani mummunan al'amari da ya faru na fasa wasu motoci har ma da dukan wasu wadanda ba su ji ba; ba su gani ba. Lalle wannan abu ya munana, ya shallake tunani da hankali.

Na samu labari cewa, wannan abu ya faru ne sak**akon wai ihu da wasu wawaye s**a yi a kan Alhaji Sani Inuwa Nguru! Idan har haka ne, wannan abu da s**a yi ya munana, sun yi rashin kunya da rashin da'a.

Majiyar ta ce, kokarin daukar fansar wancan ihun ne ya sanya aka je aka yi wancan ta'addanci a kofar gidan su Hon. Shu'aibu Danladi Hamza, wanda ba shi ya yi ihun ba, ba shi ya sa aka yi ba, ba kuma 'ya'yansa ba ne ko yaransa s**a yi ba.

Hakika dukkanin wadanda s**a aikata wadannan nau'o'in laifuka mabambanta guda biyu sun cancanci a k**a su, kuma a yi musu horo mai tsanani, musamman abu na biyu da ya faru na ta'addanci. Mene ne alakar Alhaji Danladi da wancan ihun (idan har dan ihun aka yi)? Alhaji Danladi da Alhaji Sani Inuwa mutane ne dattijai masu muhimmanci da daraja, bai dace matasanmu su dauki cin zarafinsu a matsayin hanyar huce haushi ba.

A karshe, muna kira ga mahukunta wajibi ne ku dauki kwakkwaran mataki domin kare faruwar haka a nan gaba, ku k**a duk wanda yake da laifi, kuma ku hukunta shi.

27/11/2019.

18/11/2019

JUMA'AR DA ZA TA YI KYAU.....

Alkur'ani shi ne Littafi mafi daraja da inganci, waraka ce a zuci, tabbatar da nutsuwa ce ga dan'Adam, maganin damuwa ne da bayar da kariya ga mai karanta shi.

Da ire-iren wadannan dalilai ne ya sanya masu wayo da fahimta suke gabatar da shi a dukkanin lamuransu, suke fara karanta ayoyinsa yayin da za su yi karatu, da bayan sun gama.

Labari ya riske mu game da doka da sabon Shugaban Ma'aikatar makarantun jiniyo ya sanya, wato Farfesa Alabe, inda ya umarci dukkanin makarantu da su rinka bude karatunsu na kowace rana da karatun Alkur'ani Mai Tsarki. Lalle wannan wani kyakkyawan yunkuri ne game da sanya kaifin hadda da budewar kwakwalwa ga dalibai. Wannan ya sanya muka tuno kyakkyawan tarihi abin ambato a lokacin da yake rike da Shugaban Jami'ar Jihar Yobe.

Bisa haka, muna jinjina masa tare da yi masa fatan alheri da cin nasara.

Bayan haka, muna kara jan hankalinsa kan wasu matsaloli musamman game lokacin tashi a makarantun firamare da jiniya. Yaran da suke firamare ya dace su takaita zuwa 12:30, domin wuce wannan lokacin za ka iske mai koyarwar a gajiye, masu koyon a gajiye, shi ba zai koyar da su yadda za su gane ba, su ma kuma ba za su fahimta ba. Haka abin yake ga jiniya (kananan makarantun sakandare), muddin za su wuce 1:00, to babu abin da ake ganewa tsakanin dalibai da malamai. Wani abin takaici, ga rana ta take, ga shi ana sallah, ga kuma bakar yunwa.

Da yawa daliban da suke wadannan makarantu a gefe guda suna zuwa Islamiyya, tashin su da wuri shi zai ba su damar zuwa Islamiyoyinsu. Amma za ka iske an tashi yara 1:15, a gurguje za su je gida, ba su da sukunin cin abinci, haka za su canja kaya su tafi Islamiya cikin gudu-gudu.

Haka zalika a kan al'amarin kudaden da ake karba a wurin iyayen yara, har wasu makarantu sun koma tamkar Private, kuma a wasu lokacin har da duka ake karbar kudaden, idan yaro bai bayar ba, har a hana shi shiga aji. Idan ka bibiyi makarantu, za ka sha mamakin yadda wasu azzaluman shugabanni suke gina kawunansu da kudaden iyayen yara, kudin PTA, Report Sheet, Kudin graduation, kudin waka, kudin house (wanda duk sati ake karba), kudin karbar result, kudin rajista da sauransu.

Sannan matsala ta gaba, yadda ake horon da ya wuce hankali da tunani kan abin da bai taka kara ya karya ba. Lalle duka ba shi ne hanyar tarbiyyantarwa kadai ba, amma za ka iske aka dukan da ya wuce kima da hankali.

Allah ya isar da wannan sako, kuma ya sanya a bibiyi lamarin domin magancewa.

Ibrahim Garba Nayaya,
Shugaban NWAN,
18/11/2019.

17/11/2019

TA'AZIYYA DAGA NWAN ZUWA GA AUYO.

Kungiyar Marubuta ta Nguru Writers' Association of Nigeria (NWAN) tana mika sakon ta'aziyya ga Marubuci Abubakar Auyo bisa rasuwar mahaifinsa.

Hakika wannan rashi ne ba na dangin mamacin ko garin Auyo ko Masarautar Hadejia kadai ba, rashi ne na al'ummar Nijeriya, musamman marubuta.

Wannan Kungiya tana addu'ar Allah ya ji kansa, Ya bai wa 'ya'ya, iyalai, dangi da abokanen mamacin hakurin wannan rashi, Ya sanya mamacin ya samu kyakkyawan makwanci da sak**akon Aljanna, amin.

Ibrahim Garba Nayaya,
Shugaban NWAN.

17/11/2019

SAKON TA'AZIYYA GA AUYO.

Kungiyar Marubuta ta Jihar Yobe, Yobe Authors Forum karkashin jagorancin Ibrahim Garba Nayaya, tana mika sakon ta'aziyya ga Marubuci Abubakar Auyo bisa rasuwar mahaifinsa.

Hakika wannan rashi ne ba na dangin mamacin ko garin Auyo ko Masarautar Hadejia kadai ba, rashi ne na al'ummar Nijeriya, musamman marubuta.

Wannan Kungiya tana addu'ar Allah ya ji kansa, Ya bai wa 'ya'ya, iyalai, dangi da abokanen mamacin hakurin wannan rashi, Ya sanya mamacin ya samu kyakkyawan makwanci da sak**akon Aljanna, amin.

A madadin,
Kungiyar Marubuta ta
Jihar Yobe, (Yobe Authors Forum)