11/11/2020
N.E.STATE FING FING AN HIM HMA DAWN A NIH HMEL
- Lallura
Mizoram leh Assam ramri ah hian buaina kan nei ta fo mai a, a ninawm tan ta hle mai. Mi thil hre zau zawk, zirchiang leh, ram hmangaihtu tak tak te phenah ilo ri ve leh ta thin ila. Mihring siamthat nan khawdur a ngai tih te kan hria a, engkim hi kan thatna tura Pathian ruat te pawh a ni e. Beitu nei reng Israelte pawh an fing riau a nih hi. Keini pawh kan thenawm vaiho leh chakma te hi fin phahnan kan hmang ve hlauh dawn a nia nge..
Tun tum kan ramri buaina hi han thlir let ta ila....Assam ram Politic bawlhlawh tak, Bangladesh atanga "Bangla" hnam lo lut ru te, la hnawksak turzia ngaihtuah tha duh lo, an vote duh vanga vulh lian, an ngam leh tak si loh te vangin, kan buai ve tan ta zauh zauh a nih hi. Meghalaya chuan, Bangladesh nen a an ram ri, sang tawkin anlo hung daih tawh a. Assam, ramri hung/humhalh nachang hre velo-ah lo lut chhovin, Cachari nek ralin, Cachar pawh District Pathum, Karimganj, Hailakandi,leh Cachar in anlo then tawh hial a ni, chu chuan North Cachar & Mikir hills (South Karbi Anglong) pawh an la neklo a nih pawhin anla han nek ngei ang. Chung hun lo thlen hma in, Mizoram Forest Reserve Miles 509 chu an rawn hre chhuak niin a lang. Assam ram election alo hun dawn ta maw tih ah, kan ram Forest Reserve mai - piahlam, Innerline ramri chhungah lo lut in, k*t an rawn thlak ta a ni.
Vaiho tactic....Rs 100 a an chhiar Rs 70 a i lei duh chuan, Rs 50 atanga i dawn tan a ngai. Rs 50 a i dawn tan chuan Rs 70 ah a lo tla hreh lo ang. Rs 70 a hralh tumin Rs 120 te an han chhiar vel ang a. Rs 20 an hniam che a, Rs 100 a i lei chuan i lawm hle ang, mahse Rs 70 a hralh tumin, Rs 100 a a hralh tak avangin nang aiin a hlim rilru zawk ang.
Kanram pawh ramri chhunga an rawn in hrosak chuan, alo berah, Forest reserve thenkhat chu an chang thei turah an in ngai a ni mahna. Nakinah chuan tuna an DC te SP te khu, an pension hunah Karimganj MLA/Hailakandi MLA etc. pawh anla ni ve mai thei. Lung pakhat in sava pathum vawmthlak an tum niin a lang. Mizoram rilru tihnat pawisa lovin an ram leh hnam tan a pasaltha ah an in ngai hial awm e.
Tun tum kan buaina pawh, Karimganj, District alo nih tan atang a, Deputy Commissioner 37 na, Shri Anbamuthan (MP), IAS, hovin, Police venna hnuaiah, Karimganj, Hailakandi leh Cachar District official engemaw zat, 9 September 2020 ah Mizoram chhung lolut in Thinghmun a Mizo thlam an hal a, lungphun te, Kuhva kung leh thlai engemawzat, an tih chhiat atanga bul lo intan a ni tih kan hre theuh awm e.
17 October 2020 khan, Saihapui V a, Task Force ho venbuk, police in an luahzui tak chu Hawaithang leh a chhehvel vaiho chu lo lutin an rawn ti chhe leh a.
Hemi zan vek hian Lailapur vaiho 40/50 bawr vel lo chhovin, Auto-Ricksha stand a Police duty te chu lungin an rawn tawng leh ta zel a, Vairengte Mizo mipui thin a thawk ve ta a, an um thla a, Lailapur buk lo sak ve pawh an hal thlak sak ta a nih kha.
Hengho hi Assamese an nilova, West Bengal lam Bengali pawh an ni bawk lo va, Bangladesh atanga lo lut chho a, lopung chho ta zel Assamese ho pawhin Assam atanga an hnawh chhuah theih tawhloh, Assama Bengali tawng hmang 48 % "Bangla" ho an ni.
Bangladesh khu, tuilian in harsatna a siamsak fo, tawlhsawn reng ngai an ni. K*m 1988, 1998 leh 2004 khan hmun thum a then hmun hnih (2/3) tuiin alo chim tawh a. K*m 2005, k*mtir lam phei kha chuan thintlang khaw thenkhat, tuiin a chim a, an buai hle. K*m 2015, 2017 te pawh khan harsatna an tawk nasa hle a ni. Tichuan India ram chhung pawh nise, danlo anga lo lutin Karimganj, Hailakandi, Cachar bawr velah an inkhuar chho ta zel a. An thiltum zinga pakhat an nek tuk tur ram/hnam hmeichhiate nupuia neih a, chumi rama chen zui leh khua leh tui nihna neih nghal bakah an nupui zara an chungte dang kohluh a ni bawk. Tripura pawh an chimral tawh a, tunah Mizo ah an tan mek a ni. Meghalaya lah bang sang tawkin ramri an hung pup tawh mai si a, aruk a ral a, Karimganj atanga lo lut zelin Mizoram Reserve Forest, Miles 509 min rawn chhuhsak theih chuan an population lo pung zel tur tan malsawmna ropui tak a ni dawn a, an pung chak ropui mai si a.
Heng ho hi a ni, CAA an passed chiah pawh khan N.E India a mangang leh duhlo a tan khawh bertu chu, (Assam State) an nih kha. Central Sorkar pawh hian thiam takin thu an rawn nge maw ni le"?
Mizoram Sorkar lah chawmhlawm, leiba tun, Central rinchhan lova la nung theilo a ni si. Mipuite lah Cacharin kawng an dan chuan, Biak In a inkhawm ngailo ang mai a, kristianna dah tha a, mahni hamthatnan a thil man lo tipung thuai hnam – ram hmangaihtu tak tak awm chuanglo, hausak tum thram mai an ni si. Ram humhalh tumtu a piang lah, police vuak tir mai thin tu, ram leh mipui humhalh tumna neilo, lal chiah duh sorkar kan la hrawn reng emaw tiin – Cachar/ Karimganj ('Bangla") te, Chakma te, Tukuk te thlengin min zuam tawh nasa mai a ni.
Tun kan tawng an huat thu lovah, K*m 2018, February 28 a Zirlaipawl in an Chawlhbuk an sak, Assam Police in 5 March a an tihchhiat sak tum khan Congress sorkar khan huaisen takin, Mipui leh ram humhalh nghalin IR leh Police chhawp nghal hmiah sela, ramri chingfel turin Central sorkar ah buaipui nghal sela, Bangladesh atanga lo lut ru ho hian, min zuamin min ti buai fo ngam lovang.
A landan: Karimganj, Hailakandi, Cachar te hian, Mizoram min rawn chuhpui turin tanfung, Document engmah an neilo va, Document anla kawl that atangte in,(an hal tawh hial mai thei) Assam in minlo enkawl sak Reserve Forest hi Mizoram ta ngei a nihzia hi Mizo Politician tamtak te aiin an hre zawk hialma thei.
Ramri kan humhalh ngamlo ni a ngaiin, media te thlenga rawn inring sa in, Mizoram an rawn chuh (claim) ta a. Mahse, ramdang mi India ram a, a ruka lo lut te ngawt aiin, Mizo lehkha chhiar peih hnam, India highest literacy lo han hawlh pha ve zauh tawhte chuan kan ramri chin :- Mizoram has the area 21,087 Sq.Kms - North to South is about 277 Kms leh East to West 121 kms tih te, hmarlam bawra Tripura, Assam, Manipur kan ri bak hi chu, International boundary, Myanmar lamah Kms 404, Bangladesh lamah Kms 300 bawr velin in min rawn khuap a, tih te chu, a nawlpuiin kan lo hre ve thlip thlep si a. Documents kan nei tha tih lah an hre kherlo a ni mai thei.
Tactic hrang hrangin min beizui tan ta. An tum anga min tihthaih leh min nawr theih tak silo ah chuan kan sorkar hi sihhnip taka la ngaiin, sorkar leh sorkar inbiakna neih an rawt tan ta a.
Inbiakna in a tum ni a langte:-
1) Ramri kan hrechiang em?: Inbiakna ah kan hotu (ram ai-awhtu) ten ramri anlo hriat chian bakah History nen lam an sawi thei ta si a. Nek mai mai theihloh turin ramri ah duty tur IR/Police ah bun nghal thlap ta si a. ramri duty te, mipui leh sawrkarin a tawiawm tha nasa ta mai bawk si a. An hlawh chham e.
2) Kan Dawih AW em/Ramri diktakah kan tang ngam em? : Inbiakna ah hian chianglo deuh ruai emaw, tuai aw, tanfung bulbal kan neihloh chuan, officialte tawngkam ang ang kha tanfung leh document a hman tumin an record vel thlap a. Mahse, an tan, tanfung tha siamsak tur hawi zawng in Mizoram sorkar a tawng-awk duh ta silo a. An hlawh chham leh e.
3) Police min hnuhkir tir: Ramri duty an awmloh chuan, hnawh chhuah leh chu thil hau tak a nih hria in, mihring rawn indahluh a, an ramluah chin chu ram hauhnan a hman. Mahse Mizoram sorkar chuan ramri duty hnuh kir chu 'thil fel lo' lo thlen theihna tur a ni tih hria in, hnuhkir a tumlo bur mai si. Mawi takin mipui thlamuan an ngai tiin, vaiho rawn chet mawiloh hmasakna kha, an tan a pawizia tarlan nan an hmang ta zaih mai si a nih kha. An hlawhchham leh ta zel a.
Tichuan, an chet that theihna awm chhun tur daltu, ramri duty, te min hnuhkir tirnan, an phen a awm DC te remruatna in, an tih theih ropui ber kawng danchah lam hna… chu an bei ta. Kawngte an ping thul, an laichhe thul, Motor an dang thul. Central lama thiam chan nan, "Chhuah tir tumin Mizoram house atangin kan es**rt ngei a, mahse kan tlangpui zo lo a ni" tih ve theihnan an hruai chhuak a, an bikbo san leh thul. Mahse Mizoram hi an tum ang ngawt a dah nil theih alo ni ta hauh silo va.
MIzoramin rei tak, tul lem a an hriatloh, State dang nena inkal pawhna Manipur leh Tripur lam a tuaihnum tan ta hlauh si a. Mamawh zualpui eng eng emaw a lo lut tan ta si a le… an palpin an thiat leh ta vel….Mizoram anlo mamawhzia an in hre rawih rawih tan thuai dawn a ni. Ti khuan Assam politics chhungah BJP leh Congress an in bei dawn ta a ni. Silchar kawnga mi hnawksak Raju pawh, Mizoram tello chuan a sumdawnna a kal tha vaklo a nia nge, Congress ho a puh/tawng ve leh tan ta a ni.
Assam State hualtu te hi International boundary vek kan ni. A bik in, Arunachalin Bhutan, China leh Myanmar, Nagaland leh Manipur pawh in, Myanmar, Mizoram lahin Myanmar leh Bangladesh, Meghalaya leh Tripura in Bangladesh. Assam hian a thenawm te hi nekloh a hleih pawh a nei tawh lo vai. Min nawk min nawk a, kan nin hun a thlen vaih chuan, India atanga inlak hran kan duh hun alo la thleng mahna.
Chutih laiin, harsatna te hian, min ti thangharh ve se, Political party te, Kohhran pawl (Denomination) te hian Mizote in unauna, min thendarh tirlo sela, kawng engkimah Zoram chhung leh pawna awm tute pawh Mizo anga tang rualin, in hmangaih tlang takin kan Zoram hi, ram nuam leh muan-awm a siam turin, tanla tlang ang u.
A bulpui leh pawimawh ber, kan pi leh p**e hunlai ang khan, ei leh barah in todelh leh tum ila, kan hnam ro hlu tlawmngaihna, rinawm na, taimakna leh huaisenna te kha chhawm nung zel in, Isua ringtu, Kristian, Van khua leh tui nihna neitu, lehkha thiam hnam kan ni tih i hre reng ang u.
Tin, Ramri hnaivai a, lui te leh khaw hmingte hi an Mizo hmingin i lam hram hram u.
