21/07/2026
Balita | Intramurals 2026, matagumpay na binuksan; KNHS Food Park, dinagsa ng mga mag-aaral.
Masaya, nakae-enjoy, at nakapapagod — ’yan ang naramdaman ng mga mag-aaral mula sa Kaong National Highschool sa ginanap na opening ng Intramurals 2026 noong Sabado, Hulyo 18, kung saan naroon ang iba’t ibang manlalaro, mga g**o, mga club officers, at mga nagsasarapang pagkain at inumin na kinagiliwan ng mga dumalo sa nasabing event.
Kitang-kita sa kanilang mga mata ang bakas ng excitement upang makisaya at i-cheer ang kanilang mga iniidolo sa larangan ng pampalakasan.
Sa pangunguna ng Sports Club Officers at ng kanilang adviser na si Ginang Kathleen Chill Bawar, nailunsad nang matagumpay ang Intramurals sa KNHS; mula sa paglalatag ng event sa pamunuan ng paaralan, pagpapalista ng mga manlalarong nais makilahok sa iba’t ibang sports, hanggang sa pag-o-officiate dito, mas naging kapana-panabik at makatotohanan ang programa.
"Oo, na-enjoy ko ’yung first part ng Intrams. For me, worth it talaga lahat ng pagod, preparation, and effort na binigay ng buong Sports Club. At the start of the school year, akala talaga namin na hindi matutuloy ’to. But because of the dedication and effort of our club adviser, Ms. Kathlene Chill Bawar, nai-push at nai-propose ang event na ito, nabigyan kami ng chance na ma-experience ulit ’yung excitement of being an athlete," saad ni Ervetliz Mallari, Taekwondo athlete at presidente ng Sports Club.
Sa pagsisimula ng Intramurals, naunang ganapin ang Taekwondo bandang alas-otso ng umaga, kung saan ipinamalas ng mga atleta ang kanilang husay sa pakikipag-sparring suot ang kani-kanilang armor at gears.
"It was a mix of happy and sad moments. Super happy ako kasi nakita ko ulit ’yung mga old teammates ko from my first year as a KNHS athlete. Pero the saddest part was when bumalik ’yung knee injury ko during the competition. Bigla akong na-down kasi parang nawala ’yung momentum ko. Pero grateful pa rin ako kasi nagkaroon ulit ako ng chance na magsuot ng armor at gears, tumapak ulit sa mats, at makapaglaro ng sparring," dagdag pa ni Mallari.
Sinabayan din ito ng Badminton na nagsimula sa parehong oras. Hawak-hawak ng mga manlalaro ang kanilang mga raketa, handang-handa na ang mga ito na makipagsabayan laban sa kani-kanilang katunggali.
Habang naghihiyawan ang iba’t ibang mag-aaral at atleta sa covered court, tahimik namang naka-focus ang mga manlalaro sa Chess sa loob ng Information and Communication Technology (ICT) room, nag-iisip ng matibay na istratehiya upang mapataob ang kanilang kalaban.
"Napakatahimik sa loob ng ICT, talagang gusto nilang makapasok ng Municipal Meet pero kahit tahimik, masaya pa rin naman, at na-enjoy naman naming lahat. Strategy ko nga lang is i-ovethink lahat ng posibleng galaw ng kalaban, na may kaunting dasal na sana ’di makita ng kalaban ’yung plano ko," sabi ni Haru Carnicel, manlalaro ng Chess.
Bandang ala-una ng hapon, sinimulan naman ang Volleyball sa covered court; naroon si Ginang Jedalyn Ortega na naging referee ng laro, kasama ang iba’t ibang mga volleyball players na handa nang makipagpaluan ng bola sa kalabang team.
"Mahirap ang naging experience ko rito, maraming challenges and uncertainties na nangyari. Pero patuloy pa rin akong lumalaban, nagte-training, at nagho-hope na sana one day, makamit ko ang mga pangarap ko, maging isa na akong pro volleyball player," wika ni Louise Antonette Austria, manlalaro ng Volleyball.
Hindi lamang sports ang ginanap noong Sabado, naroon din ang KNHS Dance Company, kasama ang mga estudyanteng interesadong mag-audition at maging "Pep" dancer ng paaralan, na nagpamalas ng kani-kanilang talento sa larangan ng pagsasayaw.
"The audition ran smoothly and was a success, especially with the help of KNHS DC alumni while we managed the Dedication Booth. One of the most memorable moments last Saturday was watching the auditioners enjoy themselves and showcase their talent in dancing. It felt full circle — I saw myself in them, back when I was in Grade 7 auditioning. Now I’m standing in front of them, leading what I once only dreamed of," saad ni Elijah Ezekiel Duma, presidente ng MAPEH Club.
Dagdag pa ni Emmanuel James Dave, alumni ng KNHS DC, "Sobrang saya as in, like, parang bumalik ako sa nakaraan na nagsasayaw ako kasama 'yung "Pep" squad hindi lang para sa mga events, pero para maging family. Pati na rin noong nakita ko silang nakangiti lalo na si nanay Alice noong dumating kami, parang gusto ko na lang bumalik sa JHS (Junior Highschool) HAHAHAHA."
Sa bawat sigaw ng mga estudyante at pagod ng mga atleta, siyempre, hindi mawawala ang iba’t ibang pagkain at inumin bilang pampawi ng gutom at uhaw ng mga ito; naghain ng iba’t ibang produkto ang bawat clubs upang maibenta na bahagi ng KNHS Food Park.
Bilang pantagal uhaw dulot ng mainit na panahon, naghanda ang Sports Club ng chocolate and sweets gaya ng ice cream; iba’t ibang drinks mula sa Kabayani Club; at nagyeyelong shakes naman mula sa Youth for Environment in School Organization (YES-O) at Science Club.
Upang maibsan ang gutom at cravings ng mga estudyante, naghanda ng nachos ang Supreme Secondary Learner Government (SSLG); ricetoppings mula sa Barkada Kontra Droga (BKD) at Peace And Values Education (PAVE) Club; street foods galing sa ICT at Technology and Livelihood Education (TLE) Club; sandwiches mula sa Math Club; samantalang fries naman mula sa JOLINO (Journalism, English, at Filipino) Club.
"For me, super duper masarap ’yung food that was prepared ng bawat club, ang maipapayo ko sa kanila is damihan nila medyo ’yung mga stock at ingredients nila kasi mabilis maubusan, for their Occupational Safety and Health (OSH), I would say na medyo hindi maayos, dahil ’yung iba walang gloves at hairnet," ayon kay Aerhone Reald Mesde, mag-aaral sa KNHS.
Ngunit may mga hindi maiiwasang pangyayari kagaya ng aksidente sa isang programa; habang busy ang ICT/TLE Club sa pagluluto ng street foods, biglang nagliyab ang kanilang pinaglulutuang kalan bandang alas-dos ng hapon, dahilan upang matakot at mabahala ang mga club officers nito, maging sa ibang kalapit na club booths.
"’Yung aberya sa booth, hindi ko alam exact time kasi nasa court ako no’n, naglalaro ng volleyball. And dahil sa incident na nangyari, magmi-meeting kami this coming week. Although wala pang exact date, ime-make sure namin na matutuloy ’yon. Mag-a-assign din kami ng mas malinaw na duty and task each hour para hindi masikip sa booth, para rin makapagpahinga tiyaka ma-enjoy pa rin ng ibang officers ’yung Intrams," wika ni Leopoldo Miguel Catambay, presidente ng ICT Club.
Agad namang naapulahan ang gas stove na sumabog, dahilan upang hindi na magkaroon pa ng malaking sunog sa paaralan at walang nasawing mag-aaral sa nangyaring aberya.
Matagumpay na naisagawa ang Intramurals 2026 Opening sa KNHS. Sa susunod na Sabado, Hulyo 25, ay ang pangalawang araw ng nasabing programa, samantalang sa Setyembre 8 naman ang huling bahagi nito.
"Naging successful at naidaos nang maayos ang Intrams. Masaya ang naging experience ko lalo na't ang lahat ay masaya at nag-e-enjoy lalo na sa foodpark. Masasabi ko lang ay grabe ’yung preparation ng bawat clubs at talagang mae-enjoy mo. Maipapayo ko lang na mag-ingat, lalo na sa bawat galaw especially ng bawat clubs, para iwas aksidente at maging maayos ang flow ng event," ayon kay Felix Martin Rivera, presidente ng SSLG.
-----
Balita ni: Cris Anthony L. Marcaida
Mga larawan nina: Majesty Mapalad, Kian Bryce Orca
