#رسائلكم
صراتلي صدمة البارح الشوفة تاعي مدلي هذا اللي جا يشوفني 20 ألف والله راني مشوكية مقلت لحتى واحد من غير أختي من البارح وهي تضحك وفليل ترقد وتنوض تضحك 😥💔🥺🙂🤦
01/06/2022
#رسائلكم
مساء الخير شوفو بعينيكم أغرب حالات الت...حرش هذه صراتلي اليوم فالبيس والله غير حرت ياخوتي مد رجله تقول عليه ث...عبان🤮
01/06/2022
#رسائلكم
انا استاذة ابتدائي عمري 30 وخطبني واحد 32 يخدم طباخ في مستشفى قبلت ودرت الخطبة وكي حكيت معاه لقيت عقليتو مليحة وتعاملو الله يبارك بصح غير عرفت بلي هو لي يطيب ويسربي للطبيبات والفرمليات وانا عندي صحاباتي يخدمو تم طبيبات جاتني مش نرمال كفاه يقولو راجل فلانة يخدم طباخ و سيرفور و صحاباتي رجالهم واحد طبيب واحد تاجر واحد شرطي حشمت بيه صراحة...عييت نتقبل الفكرة مقدرتش معلبليش علاه جاني هاد الشعور ....كنت نحسب فيه يطيب برك غير فقت بيه يسربي تقلبت في ودك لي يسقسيني من لفامي خطيبك وش يخدم نقولهم فرملي...
حبيت نحبس معاه بصح خفت يخرجها فيا باسكو فري عاقل وناس ملاح
31/05/2022
#رسائلكم
عجوزتي شرات ميكروفون شافتو عند وليد بنتها ڨاتلي مليح كي نحتاجك نهدر معاك بيه منقدرش نخرج من شمبرتي بزاف انا حسبتها تضحك برك وهي تحكي منها صح البارح قبل العصر كنت راقدة حتى نسمع فيها تعيط عليا بالميكروفون خلعتني رحت نجري ليها قاتلي نوضي باه تصلي و طيبي قهوة هداك هو الوقت مالقيت ما نقول وتضل تعيط جيبيلي نشرب جيبيلي هاديك و تقولي راهو يسمع حتى لبرا باه ماتلعبيهاش و تقوليلي ماسمعتكش راح نهبل منها و راجلي شكيتلو عاد يضحك عليا راح نهبل كيفاه ندير دك!؟
31/05/2022
.
#رسائلكم :
مسلخير عليكم راني مهاوشة و راني مقلقة راني نكتب سوغ لينار مانيش عايشة مع عجوزة راني عايشة مع مراهقة انا ايلا لبست وحططت جي عليا خرجت لماما طاع حطة وهدة بصح عجوزتي وبنتها القليط حبو يعاندوني و يولو كيما انا وماماتي هادي جامي تصرا امپوسي ايلا سبغت شعري يسبغو ويلا لبست يشرو من لماڨازان لي نبيش منهم بزاف ماشي للدرجة هاذي ماما قاتلي ماتحلبيهمش خليهم يحرحرو الوغ لا لوستي معوجة الفم و راجلها الطلاب يعاند في راجلي خاب يولي أوم دو كلاس كيما هو المهم راني بديت نتنارفا و نتقلق حبيت ندي غاجلي و نخرج من هاذيك الفيلا المنحوسة ديرو رواحكم في بلاستي واش ديرو لعيباد كيما هاذو خاصة عجوزتي حبيت نعذبها بالضرب باش تولي لعقلها زعما طبيبة بصح فالصح زيرو فهامة انا حبست قراية فالسيام بصح مخي يوزن بلاد ماتبانش قدامي ايا القاولي حل حم باباكم .
31/05/2022
كوني واثقة من نفسك ولكن لا تتكلمي أمامهم عن نفسكِ بأنكِ الأجمل والاذكى أو الأقوى .
لا تقولي امام البشر انك الاذكى ولكن اجعلي ذكائك يتحدث عنك.
كوني قوية ولتكن لديك الجرأة الكافية لتمدحي امرأة تستحق ، كوني أكبر وأجمل من أن تغاري من امرأة جميلة .. قوّي ثقتك بنفسك لأنها اساس الجمال
31/05/2022
الرجل _غالبا_ لايحب أن يتزوج امرأة تفوقه علما وفهما واطلاعا بخلاف المرأة فهي تحب كل ذلك ! .. لأن رجولته لا تتم إلا إن رأى نفسه فوق المرأة بشئ ! ولو بشئ واحد !
فعقدة نقصه عنها في مثل هذه الأمور يجعله يفضل _في الغالب _ زواج الجاهلة التي ستسمع لعلمه ولفهمه ولحكمته على زواج المثقفة التي ستعارضه فهما بفهم وعلم بعلم وحكمة بحكمة ..!
ونظرة المرأة الغير مثقفة له وهو يعلمها وهي تستمع أفضل عنده بكثير من نظرة المثقفة له وهي تجادلها وهي تحاول أن تقنعه وهو يحاول أن تقتنع .!
30/05/2022
#رسائلكم
أنا هي لي كنت نعشق في خو صحبتي وكنت نروح عندهم نراجع دروسي حتى نشوفه كل يوم وسمعت بلي يحب اللون الازرق بدلت قشی ولیت نلبس كلشي زرق كيفه؛مرة كنت عندهم كي دخل لقا ختو قاعدة وما شافنيش بلي راني ثم سمعته يقولها صحبتك هذيك الباطة تاع نيفيا وين راهی ماجاتش 😑
30/05/2022
#ميساجاتكم
اليوم هبطت لبلاد وين كاين زعما ناس تشري ...
لقيت بنات الله يستر معندهمش والدييين ؟؟؟؟ على لبسة المفضوحة 💔💔💔
كفاه يشوفوكم رجاال ؟؟؟؟
لافاك قالتلهم اسكتو علاه ديروا هاك ! ديروا قيمة برك لعماركم ونتوما تتعراو حاسبينها حاجة زينة
رسالة لكل بنت الله يسترك اخرجي بلبسة مستورة 💔💔
الله يحفظكم انا طفلة ونشوفهم بنظرة اشمئزاز وما بالك راجل ؟؟؟ اقسم بالله نتلاقى في ستاتيات على العرا تاع البنات يقلك نتبعوهم علاجال شهوتنا وبسك نحوسوا على واش حابين وندو وصاي ... اختي ديري قيمة لوالديك لي رباوك احشمي من ربي لي يشوف فيك
روحي اوقفي قدام سجادة بلبستك لي تخرجي بيها
اسكو تقدري تقابلي ربي بيها ؟؟؟ وهل ترى تقبل صلاتك بهذيك لبسة ؟؟؟ خممي في هذي مليح مليح وجاوبي روحك
انا ماعندي حتى هدف باش نقولكم استروا رواحكم (هاذ الفئة ) راني قادرة نقول عومي بحرك وادخلي جهنم ولا الجنة كما تحبي
مي رسول عليه الصلا والسلام قال من رأى منكم منكرا فليغيره بيده فإن لم يستطع فبلسانه فإن لم يستطع فبقلبه ما بقى غي نقول الله يهديكم وخممو فالاخرة ميديكمش زف دنيا راح تندموا أشد ندم وتقولو ياليتني سترت وكسبت مرضاة رب العالمين
30/05/2022
طاقي صاحبك لعزيز اسمو عماد
30/05/2022
#رسائلكم
اليوم كنت قاعدة مع جارتي نشربو قهيوة وانا هاذو اليومين شوية مريضة وعندي مشاكل خفاف مع راجلي بديت نشكيلها قاتلي وعلاه ماتروحيش لشيخ فلان تكتبيلو انا بنتي كي ماتجيبش نتائج مليحة نكتبلها عندو تجي الأولى حتى راجلي نديرلو حرز التكميمة يولي يدخل يخرج ساكت مايقلقنيش كامل كون مانهدرش معاه مايهدرش و مين ذاك نديرلو حرز القبول واش نقولو على حاجة يقولي سمعا وطاعة وكي تتعسر ضروفنا المادية ندير حرز الرزق تزعفني عجوزتي نكتبلها وهكدا راني مشوكية يانساء لدرجه هذه غاب وازع الديني و ناس معادتش تخاف ربي 😨 درك راني نخمم نبدل الدار و نرحل خوفتني ندمت لي عاشرتها عندها لي سكنت تما
30/05/2022
#ميساج
اني حامل و زوجي مايخدمش شا نسمي بيبي ديالي
30/05/2022
كنت هانية و فرحانة مع راجلي حتى وحد النهار راجلي قالي نمت جاني بابا فالمنام و هدا باباه عندو 10 سنين ملي توفى و قالي زيد الزوجة الثانية راح تكون خير ليك و رزق و قالي وعدني و وعدتو كي حكالي لمنام قالي لازم نزيد الزوجة الثانية باش نرضي بابا في قْبرو و نوفي بوعدي ليه انا مقبلتش قلتلو غير هادي لي متصراش قلتلو ادا تزوجت الثانية انا طلقني قالي مفيش مشكل نطلقك انا ندير كلش باش نرضي بابا ، جابلي ربي راه يخرط عليا باش يزيد يزوج تعيشو اعطوني كاش حل كيفاش ندير باش ميزيدش يتزوج عليا بسك انا قلتلو طلقني مي مرانيش حابة نطلق و نخلي داري لمرا وحد اخرى
30/05/2022
:
عمري 27 سنة خطبني واحد عمرو 45 سنة سقساو عليه خاوتي وبابا قالولهم ناس ملاح ومربي وخدام ايا قبلت درنا شوفة وخاتم على ضربة موراها بدينا نحكيو في التيليفون هو اسمو أيمن حتى نهار قالي انتي علاه ما دلعيش فيا قتلو رانا كبار التدليع تاع المراهقين قالي جربي تشوفي قوليلي ليموني قتلو ليموني قالي قشريني يا عيوني قتلو ياك راك سيير عمرك 45 ؟؟ قالي وي وين راه المشكل مع الناس نكبر معاك نرجع بيبي عاودي عاودي قوليلي ليموني قتلو ليموني قالي اعصريني يا عيوني
انا يبالي كبير وجايح واقيلا 😂😂
27/05/2022
#رسائلكم :
أنا متزوجة من قاوري فرنسي و زوجي يرفض فكرة تختين أبنائي...؟ هل عليا ذنب ولا لا وهل الختانة ضرورية في الدين تاع الإسلام راني خايفة على ديني ..ومغسي بوكو
02/05/2022
#رسائلكم
علبالي راح تجيكم تافهة وتضحك بصح يما راهي تقوللكم ادا
غلطت ولا لالا
خويا خطب عن حب يعني كانو كيف كيف
البارح عرضونا اهل خطيبتو للفطور قالونا رواحو بكري باه
نقصرو شوية رحنا انا ويما هوما قاعدو فالبالكون وانا رحت «
خطيبة خويا وقفنا فالبالكون ويضرب الضو فشعرها طويل
بزااف بصح مکاش شعرة مافيهاش قملة وزاد هبطلها على
جبتها يمشي كي فاقتلها نحاتها او ودارتلها طررق بظفارها انا
تم قلبي خرج الماكلة ماكليتش
كي جيت قتلو صراحة بحكم خويا مداصراتو قالنا علبالي
شايفو فشعرها ل يما تان شافتها قالتلو قوللها تدير حل قبل
ماتجي تعدينا زعف وبدا يعيط ويقولنا نحبها بقملها|| دار
حالة،انا ماعرفت نضحك ماعرفت نهدر مع يما ونسكتها هي
تقولو حتى تنحي القمل وهو يقوللها نبغيها مقملة وانشالله
نجیب زوج مقملين كيما هي
الحب اعمى لهاذي الدرجة !
02/05/2022
عيدكم مبارك كل عام وانتم بالف خير ينعاد علينا وعليكم بالصحة والهناء
02/05/2022
#رسائلكم
لكل فتاة اذا سقسيتيه علاه تحبني؟ وقالك خاطر نتي شابة ولا
دمك خفيف ولا مثقفة ولا قوية ولا ولا ولا ... هاذا
حب مشروط وزائل بزوال السبب أو الشرط ..
والشخص هاذاك عندك تديري الأمان فيه والاحسن
انك تليكيديه..
اما اذا قالك نحبك بدون سبب، انا مانيش عارف علاه
نحبك .. هاذا راهو فاهم للعب ويعرف يهدر وراهو
يلعبلك فيها، والافضل انك تليكيديه تاني..
01/05/2022
#رسائلكم
ابي متزوج بوحدة خلاف بعد ما ماتت ماما الله يرحمها و عندو منها ولاد و ذا العيد قالي نكسي غير خاوتك و نتي كبيرة نن خلي بعد العيد و مرت ابي كانت تخيط ذا رمضان و خذمت الله يبارك عيطتلي و مدتلي زوج ملاين و نص و قاتلي اكسي روحك و اذا ما كفاوكش نزيدلك 😢❤️ الدمعة طاحتلي
ربي عوضني بيها 😢❤️ نعتبرها ماما ❤️
01/05/2022
كافحي من اجل هذاه اللحظة عزيزتي..😍💪😂
30/04/2022
#رســـائلكم
كيما خدعتيني مع ولد خالتك وانا خاطبك نوكل عليك ربي و جامي نسمحلك ضحيت علا جالك صبرت للبرد صبرت للجوع صبرت للعطش مرضتي دويتك نتي فسبيطار وانا واقف عليك ونبكي بدمعة قلت نتي لي تشرفني و تفرحني في حياتي لوكان جيتي حنونتي متخونينيش نوكل عليك ربي كرهتلي حياتي راني عايش في ظلمة مراني ناكل مراني نشرب لوكان غي نموت ونريح من هدي دنيا كرهت مليت 😭😭😭😭😭😭
30/04/2022
#رسائلكم
انا لوكان جيت مخطوبة لوكان يحللني على المهيبة و يحلف والله مانقبل يجيني سورتو تاع العيد الصغير اخاااااه لعياااا الواحد خارج من رمضان وشو اصفر شغل حاكمو فقر الدم الحاد نص شعرو طايح مفاصلو مقسومة و يزيد ينوض يدير الميناج ويبدل لي كوفر تاع المطارح و الريدوات و يغسل الزرابا و يخرج الماغن يغسلهم و يستيكيهم و لازم يدير حلوة بالطبع والشان و يصرف عليها مليون ولا زوج و لازم نخرج فالڨوايل وين الشميسة تصرع و نشري جبة و بليغة و نشري ليهم كادووات و البارفان و لازم نوض بكري صبحة العيد لي اصلا نبات نايضة نوض كي الزومبي عينيا زروقة من قلة النوم و نليسي شعري و نماكيي نخرج شغل مطلسة بالماستيك 🥴 كتبتهم برك طاحلي السكر و طلعتلي لاطونسيون وينك يا نديرهم مالا السماح يشد مليونو و سنيوة حلوتو و يعيد بالصحة والهناء نوض نعيطلهم نغافرهم و ن لي نرقد علاه عليا هاد التشقلالة 🤦🏼🤦🏼🤦🏼🤦🏼🤦🏼
30/04/2022
#رسائلكم
غاضتني عمري بزاف اليوم ..انا ملي مات بابا وزادت يما مشفتش الفرحة تاع العيد ..ربي مكتبليش نتزوج بقيت عايشة في دارنا خويا تزوج مرتو تخدم انا اللي نربي أولادها هي تدخل لعشيا تلقى كل شي واجد ومحبة خاطر نديرها والله شاهد ولاكن حاجة عزت في نفسي اليوم ..لقيت خويا جايب صاشي تاع جلابات من عند صاحبو يبيع فيهم وقال لمرتو خيري وحدة تعيدي بيها وانا نشوف والله مقالي شغول مكانش كامل وهي خدامة بشهريتها منيش حاسدتها ..انا نخدم عليهم معندي حتى مدخول المهم راحت تلبس وتبدل فيهم وتسقسي فيا الا خرجت عليها وانا نضحك في وجها ونقولها ايه بصحتك وخرج دا الساشي وانا واقفة هكداك نلقاها دخلت الشمبرة تعها وجابتلي جلابة قديمة تعها قالتلي هادي ليك عيدي بيها صدقوني شحال من عام هكدا جامي حكيتها لواحد شادة في قلبي ولاكن اليوم منعرف واش صرالي اعتبروني اختكم في الله وادعولي للعلم انا كبيرة في عمري 48 سنة كانو يخطبوني كي يعرفو بلي عندي مرض السكري يروحو ميرجعوش
المهم طولت عليكم ..اللي عندو اختو يتهلا فيها ميفوتهاش وعيدكم مبارك وكل عام وانتم بخير
30/04/2022
#رسائلكم
أنا هو لي نهار الباك كي جينا نفوتو فيزياء الطفلة لي مورايا بدات تعيط و تزوي و تبكي ( لانو باكنا 2019 اول مرة طيح الإهتزازات) و انا من الخلعة عطيتلها قرعة ماء تاعي قتلها هاكي أشربي ماء زمزم( و هو في الحقيقة قرعة ماء عادية جبتها من الدار من اول يوم باك وهي كاينة في الكرطابل 😩) المهم شربت هي شوي و سكتت و بدات جاوب عادي و القرعة تاع الماء عقبت على لكلاسة أكل يشربو شوي و يعقبو لبعضاهم و زيد ولات طفلة في لكلاسة لي مساميتنا تعيط قالي وحد من الأساتذة الحراس معليش نديلها ماء زمزم قتلو معليش🥺ههههه.. دلها و بعد مدة سكتت ثاني.. وانا نكتب و ندعي ربي ميخلفهاش فيا في الباك على خاطر كذبت هههههههه
كي خلصنا و خرجنا قاتلي الطفلة مننسالكش خيرك طول 🤍
من هذا المنبر عزيزتي انا أعتذر لم يكن ماء زمزم
😂
30/04/2022
#رسائلكم
عندي مشكلة وهي اني موسوسة تجاه موضوع السحر .. افكر فيه كثير و اخاف يكون بيني و بين اي انسان مانعرفوش اي تواصل بسبب هذا الموضوع .. لما يصرالي اي موقف غريب او شيء اول شي يجي فبالي هدا مع انه احاول ابطل و احسن نيتي فالناس ولكن مني عارفه كيف ، الله يخليكم ساعدوني واش ندير تعبني الموضوع
30/04/2022
#رسائلكم
لبنات انا مزوجة عندي سبع شهر زواج هدا رمضان لول تاعي في دار راجلي
انا عندي هوس النظافة لدرجة ندوش ونعاود. وسورتو ف. كوزينة نطيب ونقي كل دقيقة فايونص مانخليهش نهار نسيق دايمن منقدرش نقعد نهار بلي شغل وراجلي خدام صباح انا ف لوقت لي يكون خدام فيه نغسل نقي نسيق نطيب لفطور ندوش نستيكي روحي لي يشوفني مايامنش بلي نخدم شغل تالمو متهلية في روحي حتى يديا مايبانوش تع شغل وراجلي كي يدخل للدار يلقاني مستيكيا روحي خادمةة شغلي كلش يشعل ملي تزوجنا جامي شافني. نخدم شغل تالمو. نكمل كلش وكي يجي منحبش نقابلو بريحة جافال ولا ريحة لبصل توجور روايح الله. الله
هاد رمضان ملي دخل وانا نطيبلو ف ليبلا جدد ماخليت حتى حاجة. ومطيبتهالوش وتوجور يشكرلي ماكلتي يقولي حلوى عسل مي ملي. بدا رمضان جامي شاف ماعن فوق بوطاجي ماشي مغسولين وهوا يايكون خدام يايكون برا وكي يدخل يلقاني موجدة كلش. هاد خطرة قالي. مهوش عاجبني لحال قتلو علاه. غير الخير منيش قايمة بيك ؟وش كاين قالي منيش حاس لرمضان موالف مع دارنا ويما وخواتاتي نلقا بوطاجي معمر ب ماعن خواتاتي من يضرابو شكون يغسل شكون مايغسلش هادي ختي تخبي لمقالي ف فريجيدار يما راهي مع طياب وقدامهاجبل تع. ماعن. قالي مي بصح نتي جامي لقيت ماعن ماشي مغسوليين قالي جامي حكمتك تخدمي شغل قالي جامي شميت فيك ريحة ثوم ولا عرق انا قعدت مشوكيا مالقيت مانهدر قالي. ماشي اوبليجي تنقي دار قالي ني حاب نجيبو دراري باش نشوف حالتك مخربة مافهمتش لبنات اسكو حاب يلقالي كاش ديفو فيا ولا وشنو ؟؟ راني نخمم نهمل داري نخليها هكاك وسمانة ونشوفو وش يدير مالڨري عندي هوس ماقدرتش نتغلب عليه عندهم الحق لي يقولك يحبو معفونا_ت
سلام لبنات جيت نحكيلكم حكايتي قلبي راه مزير عليا و راني نكتب فيها بالدموع
انا عندي 3 اشهر زواج شهر هذا رزقني ربي بلحمل حمدلله و راني نتوحم
راجلي ماهوش حاس بيا طول.. زعمة داني عن حب.
و دارنا بالسيف ماقبلو يمدوني ليه
ليسونسيال جات في بالي نشرب جي تاع القارس راني نتوحم على الحماضة
قوتلو مور لبارح و مزال مشراليش
لبارح كنا في الطريق رايحين لدارهم قوتلو اشريلي جي تاع القارس جاية قرعة خضرة وسمها افروي بدا يعكس فيا و يقولي انا جامي شفت قرعة خضرة وووو
سكت و انا قلبي تزير كي هدرلي هكذاك
و مبعد جينا فايتين على واحد يبيع جاج تاع الجمر قوتلو منعرف ڨداه يدير هذاك لجاج ناض يعيط عليا بوحد الطريقة و يقولي سخفتي ثاني على لجاج يسما نتي راكي تتمسخري بيا اني نكره لعقلية هذي
قوتلو انا سقسيت برك قداه يدير ماقتلكش اشريلي
غاضتني روحي و بقيت ساكتة و مبعد قالي عاودي قوليلي على جي كيفاه مداير قوتلو خلاص مانشربش ماتشريليش
كي هدرتلو هكذا بدا يسب فيا و يطيحلي و قالي ان شاء الله تجيبي شادي ولا قط و ان شاء الله تموتي قبل ماتولدي
بقيت غير نبكي و زاد ضربني باسكو انا كنت نحوس نعيط لدارنا يجيو يديوني
ضك كتفي راه زرق
كي وصلنا لدارهم قالي تهبطي من طوموبيل ندير فيك و ندير .... دخلني للڨراج و قالي مبعدا نجيبلك تفطري في لڨراج كي لكلب
و مبعد كي شافوه دارهم ثما بداو يسقسيو عليا وين راني قالهم مجاتش
و مو جات طلت على طوموبيل قاتلي لاه مهبطتيش قتلها اني ديخانة برك اني هابطة محبيتش نبينلها كساع حب يذلني قدامها جيت هابطة من طوبيل و هي يجبد فيا من حوايجي و يقولي والله ماكي هابطة غير ضك نوصلك لماليك و نعيط لباباك نقولو يجي يدي خ.... ( حشاكم اسمحولي ) زادو جاو خوتاتو لبنات هوما يحوسو يدخلوني و هو يدز فيا جهة لباب تاع لڨراج بش ماندخلش للدار
خرجت برا لقراج و قعدت غير نبكي
و مبعد
دخلتني ختو بالسيف و مبعد مقدرتش نفطر راني مدمرة و مصحرتش من القلقة ...
و كي كنا نهدرو في لڨراج مرت سلفي سمعت كلش
و سمعتني نبكي
ضك غاضتني روحي و انذليت قدامهم كامل
رايو عليا وش ندير راني حابة نروح نعيد في دارنا مانيش مليحة طول 😭😭😭💔💔💔💔 وش ندير ؟
29/04/2022
#رسائلكم
زوجي ملي بدا رمضان ميفطرش معايا يقولي خدام راجلي يخدم عساس فالشركة ، نقعد نفطر غير انا و وليدي لي في عمرو 7سنين و دموعي على خدي ايا بعد 10 ايام خرج قضى واش لازم و راح مرجعش كي قرب المغرب بخمس دقايق عيطتلو ريبوندا عليا قالي منجيش راني فالخدمة حتى سمعت صوت مرا عيطتلو بإسمو سمير راه قريب يأدن قلتلو شكون لمرا لي راهي معاك قالي تخدم معايا و كوبا عليا انا راني على نار و موسوسة منو خفت يكون متزوج بالتخبية عليا حبيت تعطوني رايكم كيفاش نتصرف واش ندير اسك صح كاين نساء يخدمو عساسين مع رجال ؟!💔🥺
29/04/2022
#رسائلكم
سلام عليكم
انا فتاة جامعية عمري 23 حبيتكم تنصحوني ولكن بدون تجريح انا كي طلعت لليسي تعرفت على شابين واحد جارنا والاخر لاعب كرة قدم يسكن في وهران لكن في عام الباك موليتش نحكي معاهم بحكم القراية والحمد لله جبت باك ديالي بمعدل ممتاز و درت التخصص لي حبيتو المهم بعد الباك رجعت نحكي معاهم والمفاجأة انهم للزوج عترفولي بحبهم ليا و بلي عرفو مكانتي عندهم كي غبت عليهم انا قبلت بيهم بسك موحال يفيقولي بلي ني نخدعهم لكن كنت نميل شوي لهاداك تع وهران بسك جاي زهواني وجارنا هاداك جاي تقيل شوي يهدر غير على قرايتو وجاي شوي زواخ ، بقيت نحكي معاهم وهاداك تع وهران طلعت بيه وراح يلعب فنادي اوروبي انا قلت سوغمون ينساني لكن العكس كان يقولي ربحت عليك ونجي نخطبك وبلي نتي حبيتيني كي كنت والو وهاداك جارنا تان دار مشروع كبير ونجحلو وكان يقولي نفس الكلام وبلي كي كان ماعندو والو حبيتو و وقفت معاه والصدمة هاداك تع وهران راح يبعت والديه بش يخطبني وهاداك جارنا قلي نهدر معا باباك ونجي نخطب دوك انا حبيت هاداك تع وهران و معرفتش كيفاش نليكيدي هاداك جارنا لكن راني خايفة بسك انا ظلمتو خايفة يوكل عليا ربي وراني ندمانة اشد ندمة نستعرف غلطت في صغري كنت مراهقة مكنتش نعرف بلي الامور كانت رح تولي سيريو كنت ديرتها تمسخير اصلا مكنتش ديرا فبالي بلي راح نتزوج واحد منهم خاوتي تعيشو انصحوني كيفاش نتعامل معاه خفت نجرحو و بلا تمسخير بسك دك جاتني الندامة ونصيحتي للبنات بلاكو تخلطو وأدو العبرة من حكايتي وشكراا
29/04/2022
#رسائلكم
عمري عشرين سنة و راني ندير فالڨاطو للعيد انا و عجوزتي و بنتي حذايا تلعب بالعجينة و راجلي يحل ف لي كيسات و انت ابقاي تقراي و تحوسي على خدمة بزوج دورو و كي تكملب ابقاي تتشرطي و تحوسي على دارك وحدك و قدسي نفسك كأنك ظيانة و حطي خمسة فالبيو حتى يرحيك التران 🤭🤭🤭
تحبو و لا تكرهو المرا ليها دار راجلها هو سندها و هو حياتها و نصفها الثاني و لي ملحقش العنقود يقول قارص قالكم راجلي نحللها الكيسات و لوكان نعرف نطيب منعييهاش هي تريح و انا نطيبلها موتشووووو 💃🏻💃🏻💃🏻💃🏻💃🏻
28/04/2022
#رسائلكم
انا هي للي شفت ولدي يمو/ت قدامي ومعرفتهش ومحسيتش بيه انا هي للي معنديش احساس الامومة انا هي للي خرجت من دار رايحة للخدمة نشوف ناس متلايمة ولحماية مدنية ونوقف ونبقى نتفرج معاهم معلبليش بلي هداك ولدي للي ضر/بته لوطو انا هي للي رحت كملت طريقي ورحت نخدم وخليت ولدي يمو/ت خليت ولدي غارق في الد/م انا هي للي كملت لخدمة وجيت لدار نلقى ناس تتسنى فيا عند لباب ويبكو ويعزو فيا وانا مافهما والو 😭😭😭😭😭
ولدي صغير عنده 10 سنين خرج صايم وصاني نديرله لفون 😥😥
شحال راها غيضتني كي ماحسيتش بولدي بيسك انا ماشي ام الام تحس
شحال راها غضيتني كي مرحتش عنده ومسحتله د/مه
شحال راها غيضتني كي مرحتش عنده وعنڨته
شحال راها غيضتني كي مرحتش عنده ودعته بقيته على خير
شحال راها غيضتني كي مرحتش عنده وشهدتله
شحال راها غيضتني كي مارفتدتهش جريت بيه لسبيطار 😭😭😭😭😭
بغيتكم كاع تدوعولي ربي يصبرني مارنيش قادرة نتقبلها دعولي كبدتي راها محروقة دعولي تبرد جمرتي
28/04/2022
#رسائلكم
خدمت القاطو وخلصت كلش وحطيتو في سنيات جا السي راجلي هز نصو كامل وداه ليماه والمشكل يماه عايشة مع زوج كناين وعندها بنتها بلا زواج يعني هم اللي محتم عليهم يخدمولها مش انا.
والسي راجلي راه يقولي عادي واش فيها ديريها يماك حب يهبلني انا غاضتني كيفاش هزو بلا ما يقولي وغاضتني اللي هما مريحين ويلقاوها واجدة، حقي ولا مش حقي نزعف.
28/04/2022
#رسائلكم
عندي مرتي مانعرف عاقلة ما نعرف تلعب فيها عندنا 4 سنين زواج وعندنا طفل كي نطول برا ماتحاسبنيش،وماتراقبليش التلفون حتى كان نخليه مفتوح والمشكل الاعظم متفاهمة مع دارنا بزاف وحتى كان تسمع كلمة تجرح تفوتها وتنساها وتتصرف عادي،انا المخلوقة هذي حيرتني يعني اذا عاقلة صح بزاف هكذا عمرنا ولا صرالنا مشكل زعما وغضبت وحللتها وعمرها غضبت من دارنا واذا راهي تلعب فيها وتمثل ثاني بزاف كيفاه راهي صابرة للتمثيل ولحد الان مابينتش حقيقتها،مدولي فكرة نخرجها على عقلها باه تبان اذا هذي هي صح ولا راهي تمثل،لاني هبلت نسا خاوتي وخواتاتي وصحابي كل يوم مشاكل وكل عام يغضبو مرتين ثلاثة في العام وهي والو.
28/04/2022
28/04/2022
#رسائلكم
قبيل فطرنا غسلت لماعن وبديت نلبس باه نخرج انا وراجلي ولولاد نشريو حوايج العيد وعجوزتي علابلها بينا خارجين وتشنف المهم انا ساكنة معاهم يعني كلشي عندهم انا خرجت عند الباب وهي طاحت داخت رجعنا ليها هزها راجلي لسبيطار وبقيت انا ولولاد نستناو نص ساعة ورجعت لباس عليها سقسيتها ماحبتش ترد رد عليا راجلي قالي لباس عليها تعبت من الصيام برك وهي لاعبة روحها ميتة كلمة مكانش قتلو ودركا كيفاش نخرجو ولالا وهي تسمع الكلمة هذي وتبدى تنهج قالي ماكان لاه روحي ريحي وغدوة يفرج ربي المهم حنا نحينا قشنا وريحنا وهي رجعت لباس عليها تمشي ودور وتهدر مع بناتها في تليفون وتسقسي فيهم اذا شراو ولالا وقاعدة تقول لبنتها روحي اخرجي اشري واش بقى علاه راكي مضيعة روحك فرحي ولادك بالقش وانتي ثاني اشري حاجة مليحة.
يعني عرفتها دير في الزكارة ولا مرض لا والو وقررت غدوة الصباح نخرج وحدي مع ولادي ونشرو وتاني والله والله والله مانرجع نطيبلها نروح نفطر عند يما.
سلام.
عجايز الهم دراما كوين
28/04/2022
#رسائلكم
انا لي تعرفت على واحد تركي عندي وحد العامين ملي عرفتو و ديما نحكيو (هوا يترجم للعربي و يبعتلي) خطرة قالي نبعتلك دراهم في سيسيبي و اشريلي من تم iPhone 13 و أشري لروحك واحد و ادي الباقي صافي يجيه رخيس كي يشريه من هنا
المهم بعتلي دراهم (30 مليون) و قلت لصحبتي لنتيم لي دايرتها كي أختي نحكيلها كلش و رحنا كيف كيف شرينالو واحد و واحد ليا و بقاتلي 4 ملاين قتلها بيعي تيعك و نزيدك دراهم لي بقاو و أشري واحد جديد المهم شرات واحد جديد و بعتلو تيليفون تيعو
مبعد منعرف مين جابت الفيس تيعو و بعتتلو و قعدو يحكيو و انا معاباليش و قالها نجي لهنا و جا و تلاقاو. و ورا لعيد الخطبة تعهم 😭😭😢 حسبي الله و نعم الوكيل فيهم والله كنت نحبو خلاه و مام هوا كان يحبني منعرف وش دارتلو باه خطبها هيا 😭💔 اني مزلت لدرك مشوكيا حسبي الله و نعم الوكيل فيهم
28/04/2022
#رسائلكم
عندي ختي 16 سنة تقرى دوزيام ليسي ، جيب معدل 16 ماخاصها والو فالدار موفرلها كلش بابا ،
عندها يومين قالت مانزيدش نقرى ، وجا واحد خطبها وقالت راني قابلة بيه بابا انصدم قريب تغاشى حنا 3 بنات اللولين لي طبيبة طبيبة ولي أستاذة أستاذة كل وحدة واش تخدم ومتزوجات و بطونوبيلاتنا ديارنا وحدنا وديبلوماتنا وماقدرناش للراجل و ماليه والبوليتيك تاع اهل الزوج ، وهي هاد السيد لاخدمة لازدمة بابا راح سقسى عليه لقاهم ساكنين بعيد دوار كي شغل في دار وحدة صغيرة وفيها زوج عرايس معاهم ، وعندو خياتو بزاف وخاوتو بزاف وماعندهمش و هي موالفة بالتقلاش انا نمدلها دراهم خياتي خدامات تان يمدولها نشرولها بابا يشريلها يعني مارحش تقدر المعيشة هاديك .
وهي حابة تزوج وقالت صايي مانقراش ماما راها غير تبكي بابا راح لهداك السيد وعايلتو قلهم تزيدو دورو ب بنتي لحقها للعدالة ، وهي متمسكة برايها ماعرفناش كيفاش نديرو معاها راها في المراهقة لي يقلها نحبك تأمنو رانا كبار وبالديبلوم و شهريتنا ماقدرناش للمسؤولية والمشا.كل تاع الزواج. وهي صغيرة رانا خايفين عليها نصحونا كيفاش نقنعوها تعرف تقرى مليح طول حياتها هي الاولى في القسم..
27/04/2022
#رسائلكم
بدا رمضان كل منطيب متفاهمين انا وزوجي يخلصني يعطيلي زوج ورقات تاع 100 تالف ..اليوم أعطالي غير وحدة قالي معنديش ..خدعني انا طيبت وتعبت ملي نوض وانا واقفة مع الاخير يعطيلي 100 برك واش ندير بيها حسبنا الله ونعمالوكيل الا لعنة الله على الكاذبين ..اني حلفتلو غدوى مكانش طياب هكدا ميزيد يكدب عليا .خليه يتربى.ياك منيش غالطة
27/04/2022
#رسائلكم
خاوتي خواتاتي سمحولي مجرد نصيحة : لي مايصليش يبدا يصلي ويتقي الله المهم تبدا تصلي وينعل الشيطان .. وبعدو على الغناء و حوايج لحرام كامل راه لموت في اي لحظة تقدر تجي والمقابر ليس مكتوب عليها للكبار فقط ، دير الخير تلقى الزاد معك ينفعك يوم الحساب ، فنحن الآن في امتحان فقط ليس للخلود في الدنيا ... الصلاة الصلاة الصلاة او شيء اخر لمن اسطاع .. اللهم احسن خاتمتنا خوتي ساعدوني فهاد الحملة نفيقوا من الغفلة... الدنيا ماهيش دايمة و يا سعدك يا فاعل الخير وسمحولي والسلام عليكم
Be the first to know and let us send you an email when Nwarilk حكايتي posts news and promotions. Your email address will not be used for any other purpose, and you can unsubscribe at any time.
