12/10/2023
နာပိုလီရဲ့နည်းပြသစ်အဖြစ် ကွန်တီကို မြင်ရနိုင်ချေရှိမလား?
စီးရီးအေကလပ် အင်တာမီလန်၊ လန်ဒန်ဗျူးတီးစလွန်းနဲ့ ကြက်ဖကြီးတို့ရဲ့ ရှုးဂါးဒယ်ဒီဖြစ်ခဲ့ဖူးသူ အန်တိုနီယိုကွန်တီဟာ အခုတလော သူ့ရဲ့ဇာတိမြေက နာပိုလီအသင်းနဲ့ အပြောင်းအရွှေ့ သတင်းတွေထွက်ပေါ်လာပါတယ်။
အီတလီသားနည်းပြက ပြီးခဲ့တဲ့ မတ်လမှာ ပရီးမီးယားလိဂ်ကလပ် စပါးအသင်းကနေ ထွက်ခွာလာအပြီးမှာ လနဲ့ချီပြီး အသင်းလက်မဲ့ဖြစ်နေခဲ့သူပါ။ အခုချိန်မှာတော့ သူ့ရဲ့အနာဂတ်ကို တဖန်ပြန်ပြီး ဆုံးဖြတ်ရဦးမှာဖြစ်ပါတယ်။
ကွန်တီက သူ့ရဲ့ဇာတိမြေ အီတလီမှာရော အင်္ဂလန်မြေမှာပါ ဆုဖလာအောင်မြင်မှုတွေ ရရှိထားသူပါ။ ဒါကြောင့်လည်း ဒီရာသီအစမှာ ရလဒ်တွေကို စိတ်ပျက်နေတဲ့ စီးရီးအေကလပ်အသင်း နာပိုလီရဲ့ ဘုတ်အဖွဲ့က အေးဆေးကလေးမွေးလုပ်နေတဲ့ ကွန်တီကို မျက်စိကျလာပါတယ်။
ယခုနာပိုလီနည်းပြက ပြင်သစ်လီဂူးအသင်းဖြစ်တဲ့ လိုင်လီနဲ့ ထိပ်သီးစီးရီးအေကလပ်တစ်ခုဖြစ်တဲ့ ရိုးမားတို့ရဲ့ မန်နေဂျာဖြစ်ခဲ့ဖူးသူ ရူဒီဂရာစီယာပါ။ ပြီးခဲ့တဲ့ချန်ပီယံလိဂ် အုပ်စုပြိုင်ပွဲမှာ စပိန်ဘီလူးကြီး ရီးရဲလ်မက်ဒရစ်ကို ရှုံးနိမ့်ခဲ့တာ၊ တင်္နလာနေ့က ကစားခဲ့တဲ့ စီးရီးအေပွဲစဉ်မှာ ဖလော်ရန်တီနာအသင်းကို ရှုံးနိမ့်ခဲ့တာတွေကြောင့် ရာသီအစမှာတင် ချိုမိုင်မိုင်ကနေ ဂရာစီယာကို ဘုတ်အဖွဲ့က ကြည့်မရတော့ပါဘူး။
လန်ဒန်ကြက်ဖကြီးတို့ဆီမှာ အလုပ်မဖြစ်ခဲ့တာကို ဖယ်ထားလိုက်ရင် ကွန်တီက ကမ္ဘာထိပ်တန်းနည်းပြတစ်ယောက် ဖြစ်နေဆဲပါပဲ။ စီးရီးအေမှာ ရှိနေခဲ့စဉ်က ဂျူဗင်တပ်အသင်းနဲ့ စကူဒတ်တိုချန်ပီယံဘွဲ့ကို နှစ်ကြိမ်ရယူနိုင်ခဲ့သလို အင်တာမီလန်ကိုလည်း ၁၁နှစ်ကြာ ဝေးကွာနေတဲ့ စကူဒတ်တိုကို ပြန်လည်ရအောင် စွမ်းဆောင်ပေးနိုင်ခဲ့သူပါ။
နာပိုလီဘက်က အတော်လေး လိုလားနေပေမယ့် ကွန်တီကတော့ စိတ်ပါဟန်မတူပါဘူး။ နာပိုလီ သူ့ဆီကို ချည်းကပ်လာတာနဲ့ ပတ်သက်ပြီး ကွန်တီက “ထိပ်သီးကလပ်တွေက ကျုပ်ကို လာကမ်းလှမ်းတာတော့ ရှိပါတယ်၊ ဒါပေမယ့်လည်း ကျုပ်အနေနဲ့ အခြေအနေကို စောင့်ကြည့်သွားဦးမှာပါ။ မိသားစုနဲ့လည်း ဆက်ပြီးပျော်ပျော်ရွှင်ရွှင် နေချင်ပါသေးတယ်”လို့ လူမှုကွန်ရက်ပလက်ဖောင်းတစ်ခုဖြစ်တဲ့ အင်စတာဂရမ်မှာ တင်ခဲ့တာပါ။ အပြောင်းအရွှေ့ တကယ်ဖြစ်လာမလာကတော့ ဆက်ပြီးစောင့်ကြည့်ရပါဦးမယ်။
