Tactical Raptor 2.0

16/12/2023

105 မိုင် ဗျူဟာကုန်းမှာ ညီနောင်သုံးဖော်တပ်ဖွဲ့တွေ ဘက်ကနေသိမ်းနိုင်ခဲ့တဲ့ MT-LBMSh သံချပ်ကာယာဉ်နှစ်စီးရဲ့ပုံတွေပါ။ မီဒီယာတွေမှာအလွယ်ရေးသလို တင့်ကားတော့မဟုတ်ပါဘူး။

ဒီသံချပ်ကာယာဉ်တွေက ယူကရိန်းကနေ ဝယ်ယူထားတာပါ။ 2007 မှာ 10 စီး၊ 2009 မှာ 16 စီး ဝယ်ထားတယ်လို့ပြောတယ်။ နောက်ပိုင်း 2017 မှာလည်း ယူကရိန်းရှိ Kharkiv Tractor Plant ကနေ မြန်မာကိုပို့မယ့် MT-LB တွေအတွက် သံချပ်ကာတွေထုတ်လုပ်သွားဦးမယ်လို့ ပြောထားပြန်တယ်။ ပြည်တွင်းမှာ ဘယ်နစီးရှိမလဲ ခန့်မှန်းရတော့ခက်ဦးမယ်။

ယူကရိန်းလုပ်သံချပ်ကာယာဉ်တွေ အသိမ်းခံရတာဖြစ်တဲ့အတွက် ဒီကိစ္စတွေကို 1027 စစ်ဆင်ရေးအစပိုင်းတုန်းက ယူကရိန်း သတင်းတွေမှာပါ ဖော်ပြထားတာတွေ ရှိလာတာဖြစ်ပါတယ်။

ဒီသံချပ်ကာယာဉ်ကို ယူကရိန်းဘက်ကတော့ MT-LBMSh ကိုမှ KBA-105 Shkval combat module / remote weapon station တပ်ဆင်ထားတယ်လို့ ပြောတယ်။

MT-LBMSh က သံချပ်ကာယာဉ်ရဲ့နာမည်၊ Shkval က ယာဉ်ပေါ်တပ်ဆင်ထားတဲ့ စက်အမြှောက်ဆုံလည်ကို ခေါ်တာပါ။ မြန်မာပြည်တွင်း page တစ်ခုကတော့ BM-3 STRUM combat module တပ်ဆင်ထားတယ်ဆိုပြီး 2014 လောက်မှာ ရေးထားတယ်။ ယူကရိန်းဘက်ကရေးတဲ့ source ကတော့ ပိုမှန်မယ်လို့ထင်တယ်။

MT-LBMSh က MT-LB ထက် သံချပ်ကာအကာအကွယ်နဲ့ အင်ဂျင်ပိုင်းမှာ အဆင့်မြှင့်ထားတယ်လို့ ယူကရိန်း website က ပြောထားတယ်။ ဒါပေမယ့် drone dropped munitions နဲ့တွေ့ရင်တော့ ခံနိုင်ရည်ရှိမှာမဟုတ်သေးပါဘူး။

KBA 105 Shkval combat module မှာ
- အဓိကလက်နက်အဖြစ် ZTM-1 30mm စက်အမြှောက်
- KT-7.62 coaxial machine gun
- Barrier ATGM
- AGS-17 30mm gr***de launcher
‌တွေတပ်ဆင်ထားတယ်။ လိုအပ်ရင် Igla လို တာတိုလေယာဉ်ပစ်ဒုံးကျည်မျိုးတပ်ဆင်လို့ရပါသေးတယ်။

သယ်ဆောင်နိုင်တဲ့ကျည်ကတော့ 30mm အတွက် 360
7.62 machine gun အတွက် 2000
ATGM 4 လုံး
30mm gr***de 87 လုံး ဖြစ်ပါတယ်။

105 မိုင် ဗျူဟာကုန်းမှာ မတွေ့ရသေးပေမယ့် ရှေ့လတွေက သိမ်းမိထားတဲ့ BTR-3U တွေမှာလည်း KBA 105 Shkval combat module ပဲ တင်ဆင်ထားတာပါ။

တကယ်တော့ MT-LBMSh, BTR-3U , WMA-301 သံချပ်ကာယာဉ်တွေဆိုတာ 2015 လောက်ကိုင်ဒေသ တိုက်ပွဲတွေမှာ ကတည်းက စစ်တပ်ဘက်ကနေ သုံးခဲ့တဲ့ လက်နက်တွေဖြစ်ပါတယ်။ အဲ့တုန်းကတော့ စစ်တပ်ကနေ 30mm နဲ့ ပစ်နေပြီ၊ 105 နဲ့ တီးနေပြီ ဆိုပြီး ဂုဏ်ယူခဲ့ရတာပေါ့။

2023 အရောက်မှာတော့ MNDAA အပါအဝင် ညီနောင်သုံးဖော်တပ်ဖွဲ့တွေက COTS ဒရုန်းနည်းပညာ ကျယ်ပြန့်လာတာကို အသုံးချပြီး tactical level မှာ firepower အကြီးအကျယ် တိုးတက်လာပါတယ်။

အကျင့်ပျက်ခြစားမှုတွေအမြစ်တွယ်နေတဲ့ စစ်တပ်ကတော့ 2015 က firepower အတိုင်းပဲ ရှိနေပြီး တိုးတက်လာတာမရှိဘူး။ ဒရုန်းလို ခေတ်သစ်စစ်မြေပြင်ပေါ်က emerging threat တွေအတွက် ကြိုတင်ပြင်ဆင်ထားနိုင်တာတွေ မရှိဘူး။

ဒါ့ကြောင့် 2015 တုန်းက ဂုဏ်ယူစရာ သံချပ်ကာယာဉ်တွေဟာ 2023 မှာတော့ အရှက်တကွဲ အသိမ်းခံရတဲ့ Trophy တွေ ဖြစ်လာပါတော့တယ်။

Tactical Raptor
Raptorone

13/12/2023

❗Video contains graphic images. Viewers discretion is advised.

ဒီရက်ပိုင်း လူပြောများနေတဲ့ အစ္စရေး-ဟားမက်စ် စစ်ပွဲအတွင်းက combat footage တစ်ခုပါ။

ဂါဇာမြို့ထဲမှာ အစ္စရေးတပ်ဖွဲ့ဝင်တစ်ဦးကနေ ဟားမက်စ်လက်နက်ကိုင် နှစ်ဦးနဲ့ တကယ့်ကို အနီးကပ်တိုက်ခိုက်မှုကို ကောင်းကောင်းမြင်ရတဲ့ ဗီဒီယိုဖြစ်ပါတယ်။

အစ္စရေးတပ်ဖွဲ့ဝင်က Yahalom လို့ခေါ်တဲ့ အစ္စ‌ရေးရဲ့ ထိပ်တန်းအင်ဂျင်နီယာအထူးတပ်ဖွဲ့ (SOF Engineering Unit) ကဖြစ်ပါတယ်။

အိမ်အဝင်မှာ ဟားမက်စ်လက်နက်ကိုင်တစ်ဦးနဲ့တွေ့ပြီး neutralise လုပ်လိုက်နိုင်တယ်။ အဲ့အချိန်မှာ အိမ်ထဲကနေ ဟားမက်စ်နောက်တစ်ဦးပစ်လိုက်တဲ့ လက်ပစ်ဗုံးပေါက်ကွဲပြီး နောက်ပြန်လဲကျသွားပါတယ်။

လက်ပစ်ဗုံးထိထားတာကိုမှ အစ္စရေးတပ်ဖွဲ့ဝင်က ပြန်ထပြီး အိမ်ထဲကို ဝင်ရှင်းတဲ့အချိန် ဒုတိယဟားမက်စ်လက်နက်ကိုင်ကိုပါ အနီးကပ် neutralise လုပ်နိုင်ခဲ့တာဖြစ်ပါတယ်။

ဟားမက်စ်ဘက်က ပြန်ပစ်တဲ့ muzzle flash တွေမြင်ရပေမယ့် လွဲချော်သွားခဲ့ပုံရတယ်။ လက်ပစ်ဗုံးအစအန ထိထားတဲ့ကြားကနေ အိမ်ထဲဝင်ရှင်းတာကြောင့် ဗီဒီယိုထဲက အစ္စရေးတပ်ဖွဲ့ဝင်ရဲ့ သတ္တိကို လေးစားနေကြတာဖြစ်ပါတယ်။

ဗီဒီယိုထဲ မှာ Yahalom တပ်ဖွဲ့ဝင်ကိုင်ထားတာက သေချာမမြင်ရပေမယ့် AR-15 ပုံစံရိုင်ဖယ်တစ်လက်ဖြစ်ပြီး အစ္စရေးလုပ် Meprolight MOR optic တပ်ဆင်ထားပါတယ်။

ဒီလိုအနီးကပ် သေရေးရှင်ရေးအခြေအနေမှာတောင် full auto မပစ်ပဲ တည်တည်ငြိမ်ငြိမ်နဲ့ semi-auto ပစ်သွားတာကိုလည်း တွေ့ရမှာပါ။

Yahalom unit က အင်ဂျင်နီယာအထူးတပ်ဖွဲ့ဆိုတဲ့အတိုင်း ပေါက်ကွဲစေတတ်တဲ့ပစ္စည်းတွေရှင်းလင်းတာ (Explosive Ordnance Disposal EOD) တွေအပြင် မြေအောက်ဥမင်လှိုင်ခေါင်းတွေထဲမှာ စစ်ဆင်ရေးလုပ်ဆောင်နိုင်ဖို့ပါ လေ့ကျင့်ထားတဲ့ အထူးတပ်ဖွဲ့ဖြစ်ပါတယ်။ လက်ရှိ စစ်ပွဲအတွင်း အရေးကြီးလိုအပ်ချက်တစ်ခုပေါ့။ သူတို့မှာ EOD ကိစ္စတွေအတွက်သုံးဖို့ စက်ရုပ်တွေလဲရှိတယ်လို့ သိရတယ်။

Tactical Raptor
Raptorone

12/12/2023

နမ့်ခမ်းမြို့ပေါ်မှာ တွေ့ရတဲ့ စကစလေယာဉ်တစ်စီးက နည်းနည်းတော့ထူးဆန်းတယ်။ ပုံထဲမှာတွေ့ရတာက Grob G 120TP လို့ခေါ်တဲ့ အမောင်းသင်လေယာဉ်ပါ။

ဂျာမဏီကုမ္ပဏီ Grob Aircraft က ထုတ်လုပ်တယ်။ 2015 လောက်က စပြီး မြန်မာပြည်ကိုရောက်လာတယ်။ အစီး 20 ပတ်ဝန်းကျင်ရှိမယ် ယူဆထားပါတယ်။

ထူးဆန်းတာက ဒီ Grob G 120TP ကို နန့်ခမ်းမှာ ဗုံးလာကြဲတယ်ဆိုပြီး Myanmar Now က ရေးထားတယ်။

ဒီလေယာဉ်ကိုယ်ထည်က fiberglass reinforced plastic နဲ့ တည်ဆောက်ထားတာပါ။ အမောင်းသင်ဖို့ ရည်ရွယ်ချက်ကလွဲပြီး ground attack role မှာ သုံးလို့တော့မရဘူး။ လက်နက်ချိတ်ဆွဲစရာနေရာမပါဘူး။ လက်နက်အပြင် ထောက်လှမ်းရေး ISR အတွက် payload တစ်ခုခု တပ်ဆင်တာမျိုးလည်း မရနိုင်ဘူး။ နမ့်ခန်းမှာ ဘာရည်ရွယ်ချက်နဲ့ သုံးနေလည်းတော့ သေချာမသိရဘူး။

တခြားလေယာဉ်တွေကတော့ တရုတ်ကထုတ်လုပ်တဲ့ A-5 Fantan နဲ့ FTC-2000G တိုက်လေယာဉ်တွေပါ။

အမောင်းသင်သီးသန့်လေယာဉ်တောင် စစ်မြေပြင်ပေါ်ရောက်လာပြီဆိုတော့ စကစလေတပ်က တော်တော် အကြံအိုက်နေတယ်ထင်တယ်။ High intensity combat ရက် 40 ကျော်လာတဲ့အခါ အပိုပစ္စည်းမရ၊ maintenance ခက်၊ လေယာဉ်တွေက high demand, low availability ဖြစ်ပြီး ရတဲ့လေယာဉ် လွှတ်ပေးရပုံပေါ်ပါတယ်။

ပျက်ကျတာကလွဲလို့ တခြားမဖြစ်ပါစေနဲ့။

Tactical Raptor
Raptorone

08/12/2023

"ဘာလို့ မုဆိုး - The Hunter Campaign ကိုလှူသင့်တာလဲ"

စကစတပ်ဖွဲ့ဝင်တွေဆိုတာ များသောအားဖြင့် တော်လှန်ရေးတပ်ဖွဲ့တွေထက် ပစ်အားသာလေ့ရှိတယ်။ တိုက်ခိုက်ရေးတပ်မတွေဆိုရင် အတွဲလိုက်ပစ်နိုင်တဲ့‌ မောင်းပြန်ချေမှုန်းရေးရိုင်ဖယ်တွေ လူတိုင်းကိုင်နိုင်တယ်။ ပစ်ကူပေးမယ့် မော်တာ၊စိန်ပြောင်းလို လက်နက်ကြီးတွေလည်း ရှိတယ်။ လိုအပ်ရင် လေယာဉ်ပစ်ကူပါ ရှိပါသေးတယ်။

တော်လှန်ရေးရဲဘော်တွေဆိုတာက လက်နက်အင်အားကို သုည ကနေ စခဲ့ရတယ်။ အစပိုင်းမှာ တူမီးတွေ၊ လက်လုပ်တွေကိုင်ရတယ်။ ဒီနှစ်‌‌တွေမှာ ခက်ခက်ခဲခဲကြိုးစားရုန်းကန်ပြီးမှသာ မောင်းပြန်တွေကိုင်နိုင်လာတာဖြစ်ပါတယ်။

ယေဘုယျပြောရရင် စစ်ကောင်စီတပ်ဖွဲ့တွေက ပစ်အားသာတယ်ဆိုပေမယ့် ကရင်နီတပ်ဖွဲ့တွေက ပစ်အားသာတဲ့ နေရာတစ်ခုရှိတယ်။ အဲ့တာကတော့ စနိုက်ပါရိုင်ဖယ်တွေပဲဖြစ်ပါတယ်။

ဒါကို မြင်သာအောင် ပြောဖို့ဆိုရင် စကစ တပ်ဖွဲ့တွေရဲ့ စနိုက်ပါရိုင်ဖယ်အကြောင်းကိုပါ နည်းနည်းသိဖို့လိုလာပါတယ်။ သူတို့ကိုင်နေတာက ကပစ ကနေထုတ်လုပ်တဲ့ MA-S Mk 2 (Myanmar Army - Sniper) လို့ခေါ်တဲ့ ရိုင်ဖယ်တွေဖြစ်ပါတယ်။ Myanmar Army Sniper လို့ နာမည်ပေးထားပေမယ့် သူ့ကို Sniper ရိုင်ဖယ်လို့ ခေါ်ဆိုဖို့ အရည်အချင်းမပြည့်မီပါဘူး။ စနိုက်ပါလောက် တိကျမှုမရှိတဲ့ လက်ဖြောင့်တပ်ဖွဲ့သုံးရိုင်ဖယ် DMR (Designated Marksman Rifle) အဆင့်ပါရှိပါတယ်။ နိုင်ငံတကာ လေ့လာသူတွေကြားမှာလဲ MA-S ကို DMR လို့သာ အမျိုးအစားသတ်မှတ်ထားပါတယ်။

ဘာဖြစ်လို့ MA-S ကို စနိုက်ပါရိုင်ဖယ်လို့ မခေါ်ဆိုနိုင်တာလဲ။

နံပတ်တစ်ကတော့ အသုံးပြုတဲ့ ကျည်အမျိုးအစားပဲဖြစ်ပါတယ်။ သူက 7.62x51mm ကျည်ကိုအသုံးပြုတယ်။ ဒီကျည်က ပုံမှန်ချေမှုန်းရေးရိုင်ဖယ်သုံး 5.56x45mm ကျည်ထက် ထိရောက်မှု ကောင်းတယ် ပိုဝေးဝေးပစ်လို့ရတယ်ဆိုပေမယ့် စနိုက်ပါလို အဝေးပစ်ဖို့တော့ ကန့်သတ်ချက်တွေရှိနေပါတယ်။ တာဝေးပစ်ရာမှ သူ့ထက် ပိုကောင်းတဲ့ရွေးချယ်စရာတွေရှိနေတယ်။ ဥပမာ နောက်ပိုင်းမှာခေတ်စားလာတဲ့ .338 ကျည်၊ 0.5 ကျည်၊ .408 CheyTac ကျည်လိုမျိုးတွေရှိနေပါတယ်။ နိုင်ငံတကာမှာဆိုရင် 7.62x51 ကျည်ကို လက်ဖြောင့်သေနတ် (DMR), စနိုက်ပါအကူ (Sniper Support) အနေနဲ့သာ အသုံးများကြပါတယ်။ MA-S Mk 2 က ပြောင်းလွယ်ပြင်လွယ် modular design မဟုတ်တာကြောင့် တခြားကျည်အမျိုးအစားတွေ ပြောင်းလဲပစ်ခတ်လို့လဲ မရနိုင်ပါဘူး။

MA-S မှာသုံးတဲ့ကျည်က ကန့်သတ်ချက်ရှိသလို တွဲဖက်သုံးဖို့ ထုတ်ပေးလိုက်တဲ့ မှန်ပြောင်း Scope ကလည်း တာဝေးပစ်ဖို့ ကန့်သတ်ချက်တွေ ရှိနေပါတယ်။ MA-S မှာသုံးတဲ့ PSO-1 က 1960 ကျော်ကတည်းက ရုရှားမှာစတင်အသုံးပြုလာတဲ့ မှန်ပြောင်းဖြစ်ပါတယ်။ 4x24 ဆိုတော့ ချဲ့အားက 4 ဆ အထိပဲရှိတယ်။ ဒါ့အပြင် ချဲ့အားကို အတိုးအလျော့ လုပ်လို့မရနိုင်ပါဘူး။ ချဲ့အား 4 ဆ ဆိုတာ မီတာ 1000 လောက်အထိ ပစ်မှတ်ကို မြင်နိုင်ဖို့၊ အတည်ပြုဖို့ (positive identification) အတွက် မလုံလောက်ပါဘူး။ ခေတ်မီစနိုက်ပါမှန်ပြောင်းတွေဆိုတာ HPVO (High Power Variable Optic) တွေကို ဖြစ်ပြီး ချဲ့အား အဆ 20 ကျော်အထိ စိတ်ကြိုက် အတိုးအလျော့လုပ်လို့ရပါတယ်။

နောက်ဆုံးတစ်ချက်ကတော့ စစ်ကောင်စီရဲ့ MA-S ရိုင်ဖယ်တွေမှာ တော်တော်ကြည့်ရဆိုးတဲ့ အချက်ဖြစ်ပါတယ်။ သေနတ်ပြောင်းမှာ ဒေါက် bipod လာတပ်ဆင်ထားတာပဲဖြစ်ပါတယ်။ တိကျမှုကို ဦးစားပေးတဲ့ စနိုက်ပါရိုင်ဖယ်တွေဆိုတာ ‌သေနတ်ပြောင်းကို တတ်နိုင်သလောက် အနှောင့်အယှက်မဝင်အောင် ဒီဇိုင်းလုပ်ကြပါတယ်။ ပြောင်းကာနဲ့ ပြောင်းမထိအောင် free floating barrel တွေ သုံးထားကြတယ်။ MA-S မှာတော့ free floating barrel မဟုတ်တဲ့အပြင် bipod ကိုပါလာတပ်ပေးထားတယ်။ ဒေါက်ထောက်လိုက်တာနဲ့ သေနတ်ပြောင်းပေါ်ကို မလိုအပ်တဲ့ သက်ရောက်မှုဖိအားတွေရှိနေပြီး တိကျမှုကို ထိခိုက်စေမှာဖြစ်ပါတယ်။

ဒီအချက်တွေကြောင့် စစ်ကောင်စီရဲ့ MA-S ဆိုတာ စနိုက်ပါရိုယ်ဖယ်မဟုတ်ပဲ မီတာ 600-800 လောက်မှာပဲ ထိရောက်မှုရှိနိုင်တဲ့ DMR တစ်လက်သာဖြစ်ပါတယ်။

ကရင်နီအပါအဝင် အခြားတော်လှန်ရေးတပ်ဖွဲ့ဝင်တွေ အဓိကသုံးနေတဲ့ စနိုက်ပါရိုင်ဖယ်ကတော့ နာမည်ကျော် ရူဂါ ကုမ္ပဏီကထုတ်လုပ်တဲ့ R***r Precision Rifle တွေဖြစ်ပါတယ်။ 2015 ကမှ ဈေးကွက်မှာ စတင်မိတ်ဆက်လာတဲ့ ခေတ်မီ တာဝေးပစ်ရိုင်ဖယ်တစ်လက်ပါ။ မုဆိုး - The Hunter campaign ကနေ ဝယ်ယူဖို့ စီစဉ်ထားတာလည်း ဒီရိုင်ဖယ်တွေပဲဖြစ်ပါတယ်။

တော်လှန်ရေးတပ်ဖွဲ့စနိုက်ပါတွေကိုင်တဲ့ R***r Precision Rifle ဆိုတာ စစ်‌ကောင်စီ စနိုက်ပါတွေကိုင်တဲ့ MA-S ရိုင်ဖယ်တွေထက် အစစအရာရာသာလွန်ပါတယ်။

R***r Precision Rifle မှာ အသုံးပြုတဲ့ကျည်ဆိုရင် .308 ကနေစလို့ .338 လိုမျိုး တာဝေးပစ်ကျည်တွေအထိ ရွေးချယ်ဝယ်ယူနိုင်တယ်။ .338 ဆိုရင် 0.5 ကျည်နီးပါး ထိရောက်မှုအကွာအဝေးနဲ့ ပြင်းအားရှိပါတယ်။ နာမည်ကျော် အမေရိကန် စနိုက်ပါဖြစ်တဲ့ Chris Kyle ရဲ့ အဝေးဆုံးပစ်ချက်ကို .338 ကျည်အသုံးပြုပြီးတော့ ရယူနိုင်ခဲ့တာဖြစ်ပါတယ်။

R***r Precision Rifle ကို ဝယ်ယူတဲ့အခါမှာ မှန်ပြောင်းတစ်ခါတည်းပါမလာပဲ ဝယ်သူစိတ်ကြိုက် ရွေးချယ်ဝယ်ယူနိုင်ပါတယ်။ ခေတ်မီမှန်ပြောင်းတွေ အလွယ်တကူတပ်ဆင်နိုင်အောင်လည်း သေနတ်မှာ rail တွေ အသင့်ရှိပြီးသားပါ။ ဒါ့ကြောင့် တော်လှန်ရေးတပ်ဖွဲ့စနိုက်ပါတွေအနေနဲ့ ချဲ့အားများတဲ့ HPVO မှန်ပြောင်းတွေကို တပ်ဆင်ထားကြတယ်။ ဝေးဝေးမြင်နိုင်လို ပစ်မှတ်အခြေအနေကိုလည်း သေချာ မြင်သာနိုင်ပြီး Target Identification လုပ်နိုင်ပါတယ်။

ဒါ့အပြင် စနိုက်ပါရိုင်ဖယ်တစ်လက်အတွက် အသက်ဖြစ်တဲ့ ပြောင်းကိုလည်း ပြောင်းကာနဲ့မထိတဲ့ free floating barrel ဖြစ်အောင် လုပ်ပေးထားတယ်။ ပြောင်းကို cold hammer-forged 4140 chrome-moly steel ကနေ ပြုလုပ်ထားတာဖြစ်ပါတယ်။

ဒီအချက်တွေကြောင့် တော်လှန်ရေးတပ်ဖွဲ့ဝင်တွေသုံးတဲ့ R***r Precision Rifle ဆိုတာ မီတာ 1000 ကျော်အထိ ထိထိရောက်ရောက်ပစ်ခတ်နိုင်တဲ့ တင်းပြည့်ကျပ်ပြည့် စနိုက်ပါရိုင်ဖယ်ဖြစ်ပြီး စစ်‌ကောင်စီရဲ့ MA-S တွေထက် အပြတ်အသတ် သာလွန်နေတာဖြစ်ပါတယ်။

ဘာလို့ဒါတွေပြောနေရတာလဲဆိုတော့ ကရင်နီတပ်ဖွဲ့တွေအတွက် လိုအပ်‌နေတဲ့စနိုက်ပါရိုင်ဖယ်တွေဆိုတာ စစ်ကောင်စီ တပ်ဖွဲ့တွေကို ကောင်းကောင်းဒုက္ခပေးနိုင်လို့ပဲဖြစ်ပါတယ်။ MA-S တွေ မမီတဲ့နေရာကနေ R***r Precision Rifle တွေက ပစ်လို့ရတယ်။ သေချာပစ်ရင် ကိုက် 100 ကျည်စု က 1 လက်မအတွင်း ဝင်တာကြောင့် တိကျမှုလည်း ပိုကောင်းပါတယ်။ R***r Precision Rifle ကိုင်ထားတဲ့ ကရင်နီစနိုက်ပါတွေကို စစ်ကောင်စီ စနိုက်ပါတွေက အနီးကပ်အခြေအနေကလွဲလို့ တခြားအခြေနေမှာ တန်ပြန်ချေမှုန်းနိုင်ဖို့ မလွယ်ကူပါဘူး။

ဒါ့ကြောင့် စနိုက်ပါနဲ့ပတ်သက်လာရင် ကရင်နီတပ်ဖွဲ့တွေက ပစ်အားသာလွန်မှုရယူထားနိုင်နေတာဖြစ်ပြီး ဒီလို ပစ်အားအသာရယူနိုင်တာကို ဆက်လက်ထိန်းထားနိုင်ဖို့အတွက် သူတို့ရဲ့ Campaign Target ပြည့်မီအောင် ဝိုင်းဝန်းကူညီပေးကြပါလို့ တိုက်တွန်းလိုက်ရပါတယ်။

Tactical Raptor
Raptorone

07/12/2023

တော်လှန်ရေးရဲဘော်တွေကနေ ပြည်တွင်းတစ်နေရာမှာ သိမ်းမိတယ်ဆိုတဲ့ 40mm ဗုံးသီးတစ်မျိုး။ အသေးစိတ်သိဖို့မေးထားပေမယ့် ပြန်မပြောလာသေးဘူး။

MV က medium velocity
HE က high explosive
2023 ကမှ စက်ရုံကထွက်လာတာ၊ ဝယ်ထားတာဖြစ်မယ်။

Air Burst Gr***de လို့ပါရေးထားတာက နည်းနည်းခေါင်းစားတယ်။ Air burst fuze နဲ့ဆိုရင် လေထဲမှာကွဲရမယ်။ လေထဲမှာကွဲဖို့ fuze ကို ဘယ်လောက် အကွာအဝေးသွားပြီးရင် ပေါက်ကွဲပါဆိုပြီး data တွေ ထည့်ပေးဖို့လိုတယ်။

Data တွေထည့်နိုင်ဖို့ laser range finder တွေ၊ fire control စနစ်တွေ၊ electronic fuze setter တွေ လိုလာတယ်။ စခတွေမှာ MA-4 နဲ့တွဲသုံးတဲ့ BA203 တွေမှာ ဒီလိုစနစ်တွေမပါဘူး။ M79 မှာလည်း မပါဘူး။ ဘယ်လို gr***de launcher မှာ တွဲဖက်ပြီး သုံးနေတာဖြစ်မလဲ။

05/12/2023

စခလေတပ် MAF ကနေ သယ်ယူပို့ဆောင်ရေးလေယာဉ် (utility/transport aircraft) တွေသုံးပြီး ဗုံးကြဲနေတယ်ဆိုတာ နိုဝင်ဘာလလယ်‌လောက်ကတည်းက သတင်းထွက်နေတဲ့ကိစ္စဖြစ်ပါတယ်။

Y-8 နဲ့ Y-12 အမျိုးအစားလေယာဉ်တွေသုံးတယ်လို့ပြောကြတယ်။ ဒီလေယာဉ်တွေက တိုက်ခိုက်ရေးလေယာဉ်တွေ မဟုတ်တဲ့အတွက် MAF အရမ်းကြိုက်တဲ့ rocket pod တွေ မပစ်နိုင်သလို ပေါင် 500, 1000 ဗုံးတွေ ချိတ်ဆွဲပြီး ‌‌ လေကြောင်းတိုက်ခိုက်မှု‌တွေမလုပ်နိုင်ဘူး။ ဒါ့ကြောင့် သူတို့ကို မြေပြင်တိုက်ခိုက်ရေးအတွက် သုံးချင်တဲ့အခါ improvise လုပ်ရတယ်။ Improvise လုပ်တယ်ဆိုပေမယ့် တကယ်ကတော့ တံခါးပေါက်ကနေ သင့်တော်သလိုပြုပြင်ထားတဲ့ ဗုံးတွေပစ်ချတာပါပဲ။ လက်ရှိမှာတော့ မော်တာဗုံးသီးတွေကို ပစ်ချတယ်လို့ ပြောကြတယ်။ 60, 81, 120 mm မော်တာဗုံးသီးအစုံ သုံးတယ်ပေါ့။

ဆီးရီးယားမှာလဲ အာဏာရှင်သမ္မတအာဆတ်က‌နေ ဒီနည်းတွေသုံးပြီး အရပ်သားတွေပေါ်ကို ဗုံးကြဲချခဲ့တာ အင်မတန်နာမည်ကြီးပါတယ်။ Aleppo မြို့ပေါ်က Barrel bombs တွေအကြောင်းကို အလွယ်တကူရှာဖတ်လို့ရပါတယ်။ ဆီပီပါ၊ container တွေထဲကို သံတိုသံစ နဲ့ ပေါက်ကွဲစေတတ်တဲ့ ပစ္စည်းတွေ၊ ယမ်းတွေထည့်ပြီး ရဟတ်ယာဉ်ပေါ်ကနေ တွန်းချတယ်၊ အောက်ရောက်တော့ impact fuze (ထိကွဲစနက်တံ) နဲ့ ပေါက်ကွဲပါတယ်။ Barrel bomb တွေက ပဲ့ထိန်းစနစ်မပါပဲ ကျချင်တဲ့နေရာကျတဲ့အပြင် ပေါက်ကွဲအားပြင်းထန်တာကြောင့် ဆီးရီးယား အရပ်သားတွေ သောင်းနဲ့ချီပြီ သေဆုံးခဲ့ရပါတယ်။

စခလေတပ်က မော်တာဗုံးသီးပစ်ချတယ်၊ အာဆတ်ကတော့ Barrel bombs တွေပစ်ချတယ်။ အသုံးပြုတဲ့ လက်နက် အတိအကျမတူပေမယ့် သဘောတရားကအတူတူပါပဲ။ လေကြောင်းစိုးမိုးမှုအပြည့်အဝရထားတော့ utility aircraft တွေကို အသုံးပြုပြီး ပေါပေါ၊ လွယ်လွယ် ရနိုင်၊ထုတ်လုပ်နိုင်တဲ့ ဗုံးတွေ ပစ်ချတာပဲဖြစ်ပါတယ်။ ပဲ့ထိန်းစနစ်မပါတော့ တိကျမှုနည်းပြီး စစ်ရေးပစ်မှတ်တွေသာမက အရပ်သားတွေပါထိခိုက်ပြီး collateral damage အင်မတန် များတဲ့ indiscriminate bombing တွေဖြစ်ပါတယ်။

ဒီကိစ္စနဲ့ဆက်စပ်ပြီး မေးစရာဖြစ်လာတာက ဘာလို့ မြေပြင်တိုက်ခိုက်ရေးလေယာဉ်တွေကိုမသုံးပဲ utility လေယာဉ်တွေပေါ်ကနေ ဗုံးသီးပစ်ချနေရတာလဲပေါ့။

The Irrawaddy ကတော့ လေယာဉ်တွေမှာတပ်ဆင်အသုံးပြုတဲ့ rocket တွေ၊ ပေါင် 500, ပေါင် 1000 ဗုံးတွေ နည်းလာတဲ့အတွက်ကြောင့် ဒီလိုမျိုး မော်တာဗုံးသီးတွေ ပစ်ချနေရတာဖြစ်မယ်လို့ ယူဆထားတယ်။

ရှမ်းမြောက်မှာ 1027 စစ်ဆင်ရေး စပြီးကတည်းက တစ်နေ့တစ်နေ့ လေယာဉ်ပစ်ကူပေးရတာတွေ ပိုများလာတယ်။ ဒီအတွက်ကြောင့် လက်နက်ခဲယမ်းနည်းလာပြီး improvise နည်းလမ်းတွေသုံးလာရတယ်ဆိုတာ ဖြစ်နိုင်ချေတော့များပါတယ်။

ထပ်စဉ်းစားရင်တော့ လက်နက်ခဲယမ်းနည်းတာအပြင် စခလေတပ်အနေနဲ့ တစ်နေ့တစ်နေ့ sortie အရေအတွက်များလာလို့ လေယာဉ်လုံလောက်မှုမရှိတာမျိုးလည်း ဖြစ်နိုင်တယ်။ တိုက်လေယာဉ်ဆိုတာ ပျံတက်ပြီးရင် နာရီပေါင်းများစွာ maintenance ပြန်လုပ်ရသေးတာကိုး။ ဒီအတွက် အခြားလေယာဉ်တွေ အစားထိုးပြီး close air support လိုအပ်ချက်ကို ဖြည့်ဆည်းတာမျိုးလည်း ဖြစ်နိုင်တယ်။

ဒါ့အပြင် နောက်ထပ်စဉ်းစားစရာက Yak-130 , K-8 တွေဆိုတာ အပေါ့စားလေယာဉ်တွေဖြစ်တယ်။ သူတို့သယ်နိုင်တဲ့ payload က ကန့်သတ်ချက်ရှိတယ်။ နည်းနည်းပစ်ပြီးရင် ကျည်ကုန်ပြီး စခန်းပြန်ရမယ်။ Mission area အပေါ် loitering time ကြာကြာမ‌ပေးနိုင်ဘူး။ Mig-29, Su-30SME တွေကျပြန်တော့လည်း ပျံသန်းစရိတ်ကြီးတယ်၊ အရှိန်မြန်တယ်။ သူတို့ကို CAS role အတွက် သုံးနိုင်တယ်ဆိုပေမယ့် အကောင်းဆုံး ရွေးချယ်မှု‌တော့မဟုတ်ဘူး။ စကစအနေနဲ့ ရုရှားကို ငုံမတတ် ဘောမထားပေမယ့် Counterinsurgency မှာ အသုံးဝင်တဲ့၊ CAS role မှာ အင်မတန်အားကိုးရတဲ့ Su-25 လို မြေပြင်တိုက်ခိုက်ရေးလေယာဉ်မျိုး မပိုင်ဆိုင်ထားနိုင်တာကလည်း ကိုယ်တွေအတွက် ဝမ်းသာစရာတစ်ခုပဲပြောရမယ်။

ဒီအချက်တွေကြောင့် Y-12 လို လေယာဉ်သုံးပြီး မော်တာဗုံးသီးတွေ ပစ်ချနေတာမျိုးလည်းဖြစ်နိုင်တယ်။ အရှိန်နှေးတယ်၊ စစ်မြေပြင်ပေါ် loitering time အချိန် ကြာကြာပေးနိုင်တယ်၊ မော်တာဗုံးသီးတွေလဲ များများသယ်နိုင်တယ်။ ပစ်မှတ် ဧရိယာ‌ပေါ် အကြိမ်ကြိမ်ဖြတ်ပျံပြီး ဗုံးပစ်ချတာမျိုး လုပ်နိုင်တယ်။ နှေးပေမယ့် တော်လှန်ရေးတပ်ဖွဲ့တွေဆီမှာ လေယာဉ်ပစ်လောက်လောက်လားလားမရှိ‌တော့ ပစ်ချခံရဖို့ risk လည်းအတော်နည်းတယ်။

မော်တာဗုံးသီးတွေကို လက်နဲ့ပစ်ချတာဖြစ်တဲ့အတွက် တိကျမှုကတော့ ရှိမှာမဟုတ်ဘူး။ ဒါပေမယ့် အများကြီးပစ်ချပြီး တိကျမှုမကောင်းတာကို ဖာထေးနိုင်တယ်။

ဒီကိစ္စက အပေါ်ယံကြည့်ရင် ရယ်စရာဖြစ်ပေမယ့် လျော့တွက်တာမျိုးတော့ မဖြစ်စေချင်ဘူး။ တိကျမှုမကောင်းပေမယ့် အများအပြားပစ်ချတဲ့ဒီဗုံးသီးတွေထိရင် ရဲဘော်တွေ၊ပြည်သူတွေရဲ့ အသက်တွေသေကြေပျက်စီးစေနိုင်တယ်။

ရုရှားဆိုရင်လည်း ယူကရိန်းကိုဝင်တိုက်ပြီး မနိုင်လို့ T-54/55 လို အိုဟောင်းနေတဲ့ တင့်ကားတွေပါ ထုတ်သုံးလာလို့ ဝိုင်းရယ်ကြတယ်။ ဒါပေမယ့် တကယ့်စစ်မြေပြင်မှာတော့ တင့်အိုကြီးတွေရဲ့ အမြှောက်ကျည်က အခြားခေတ်မီလက်နက်တွေလိုပဲ အန္တရာယ်ပေးနိုင်ဆဲပဲဖြစ်ပါတယ်။ တင့်အိုကြီးဆိုပြီး မေ့ထားလို့မရဘူး။ ယူကရိန်းစစ်သားတွေအနေနဲ့ effort စိုက်ထုတ်ပြီး၊ ခွဲတမ်းနဲ့ရတဲ့လက်နက်ခဲယမ်းတွေသုံးပြီး တင့်အိုကြီးတွေကို ဖျက်ဆီးရတယ်။

ယူကရိန်းစစ်ပွဲကနေ သင်ခန်းစာယူလာရတာက လက်နက်စနစ်တစ်ခုက acurracy မကောင်းဘူး၊ ခေတ်မမီဘူး ဆိုပေမယ့် အရေအတွက် များများ သုံးနိုင်တယ်ဆိုရင် အသုံးဝင်လာတာပါပဲ။ လျော့တွက်လို့မရဘူး၊ ထိုက်သင့်တဲ့ respect ပေးဖို့လိုတယ်။

နောက်ထပ် တွေးမိတာတစ်ခုကတော့ တော်လှန်ရေးတပ်ဖွဲ့တွေမှာ လေယာဉ်ပစ်မရှိဘူးဆိုပြီး စခလေတပ်က အရှိန်နှေး၊ manoeuvrability မကောင်းတဲ့ utility aircraft တွေကို အတင့်ရဲပြီး စစ်မြေပြင်ပေါ် သုံး‌နေတာဖြစ်ပါတယ်။။ ဒီအခြေအနေမှာ Y-8, Y-12 တွေ ပျက်ကျတယ် ဒါမှမဟုတ် ပစ်ချလိုက်နိုင်တယ်ဆိုရင်တော့ စခလေတပ်ရဲ့ airlift capability တော်တော်လေးထိခိုက်သွားနိုင်တယ်။ ဒီလို utility လေယာဉ်တွေဆိုတာ အစီးရေလုံလုံလောက်လောက် မရှိကြတာများတယ်။ High demand , low availability ဖြစ်နေတာပါ။

အဆုံးသတ်ပြန်ပြောရရင်တော့ စခလေတပ်အနေနဲ့ မော်တာဗုံးသီးတွေပစ်ချနေရတယ်ဆိုတာ လေယာဉ်သုံးလက်နက်ခဲယမ်းတွေ နည်းနေလို့လည်းဖြစ်နိုင်တယ်။ တခြားလိုအပ်ချက်တွေကြောင့် improvise လုပ်ပြီး သုံးလာတာလည်းဖြစ်နိုင်တယ်။ ခပ်ပေါပေါသုံးလို့ရလို့ သုံးလာတာဖြစ်နိုင်တယ်။ မော်တာဗုံးသီးကနေ ပိုပြီး desperate ဖြစ်လာရင် အာဆတ်လို Barrel bombs တွေအထိ သုံးလာတာမျိုးပါ ဖြစ်လာနိုင်သေးတယ်။ တဖြည်းဖြည်း ချောင်ပိတ်မိလာတဲ့ စခတွေရဲ့ ယုတ်မာမှုကို လျော့မတွက်ထားစေချင်ဘူး။

Tactical Raptor
Raptorone

03/12/2023

November 30 တုန်းက ယူကရိန်းလေတပ်စခန်းတစ်ခုမှာ ရပ်နားထားတဲ့ Su-25 မြေပြင်တိုက်ခိုက်ရေးလေယာဉ်တစ်စီးကို ရုရှားဘက်ကနေ Lancet drone သုံးပြီး ဖျက်ဆီးခဲ့တယ်။

ရုရှားတို့လည်း Lancet က ဗီဒီယိုရော ၊ ဖြစ်စဉ်ကို စောင့်ကြည့်နေတဲ့ Orlan-10 လို survillance drone က ဗီဒီယိုပါ ထုတ်ပြပြီး ပွဲခံခဲ့တယ်။

ဒါပေမယ့် ဗီဒီယိုမှာ မြင်ရတဲ့ ယူကရိန်း Su-25 ဆိုတာ သေချာကြည့်တော့မှ သံသယဝင်စရာတွေ ဖြစ်လာရတယ်။

ဗီဒီယိုထဲက Su-25 က ယူကရိန်းလေတပ်ရဲ့ အဆင့်မြှင့်ထားပြီးသား Su-25 တွေမှာတွေ့ရလေ့ရှိတဲ့ digital gray camo ဆေးသုတ်ထားတယ်။ ရုရှားကျူးကျော်စစ်စပြီး အချင်းချင်းမှားမပစ်မိအောင် အတောင်ပံ‌အစွန်း တွေမှာလည်း အပြာ၊အဝါ တွေ ဆေးသုတ်ထားတယ်။ လေယာဉ်မှာ ဆီတိုင်ကီတွေလည်း ချိတ်ထားတယ်။ ဒါ့အပြင် လေယာဉ်ကွင်းထဲမှာ လေယာဉ်ကို အစအနမထိအောင် barrier တွေ ချပြီး ကာကွယ်ပေးထားပါသေးတယ်။

ဒီလောက်ဆိုတော့ ရုရှားတွေလည်း အပိုင်ပဲဆိုပြီး Lancet နဲ့ ပစ်တယ်။ စစ်သုံးလေယာဉ်တစ်စီးနဲ့ Lancet drone တစ်စီးယှဉ်ရင် တန်ဖိုးက အဆပေါင်းများစွာ ကွာဟတော့ ဒီလို လေယာဉ်ကို Lancet နဲ့ ဖျက်ဆီးတဲ့ ဗီဒီယိုဆိုတာ propaganda ရှုထောင့်ကကြည့်ရင် အကြီးအကျယ်အောင်ပွဲပဲပေါ့။ ယူကရိန်းမှာ တိုက်ပွဲဝင်ပျံသန်းနိုင်တဲ့ လေယာဉ်ကလည်း နည်းလာနေတယ်ဆိုတော့ ရုရှားအတွက် အမြတ်တွေကြီးပါပဲ။

ဒါပေမယ့် ရုရှားတို့ အပျော် ကြာကြာမခံပါဘူး။ ဗီဒီယိုကို social media ပေါ်တင်လိုက်ပြီး မကြာဘူး၊ လေ့လာဆန်းစစ်တဲ့သူတွေက ဗီဒီယိုထဲက ယူကရိန်း Su-25 က အတု (decoy) ကြီးပါဆိုပြီး အချက်အလက်တွေနဲ့ ထောက်ပြလာကြတယ်။

အသိသာဆုံးကတော့ Su-25 အစစ်မှာဆိုရင် အတောင်ပံနဲ့ အင်ဂျင်က တဆက်တည်းဖြစ်တယ်။ အတောင်ပံက အင်ဂျင်ထဲကို လာဆက်ထားတဲ့ ပုံစံမျိုးပါ။

ဒါပေမယ့် ဗီဒီယိုထဲက Su-25 မှာတော့ အင်ဂျင်က အတောင်ပံအောက်မှာ ရောက်နေတယ်။

ပြီးတော့ Su-25 တွေရဲ့ အတောင်ပံမှာ သယ်‌ဆောင်မယ့် ဆီတိုင်ကီ၊ လက်နက်တွေ ချိတ်ဆက်ဖို့ Pylon စုစုပေါင်း 5 ခုပါတယ်။ ဗီဒီယိုထဲက Su-25 ထဲမှာတော့ Pylon 4 ခုပဲ ပါတယ်။ ဒါ့အပြင် Pylon တစ်ခုက ရှည်ထွက်နေသေးတယ်။

Cockpit canopy ပုံစံမတူ‌တာလည်းရှ်ိသေးတယ်။ ဒါကတော့ canopy cover တပ်ထားရင် ဒီပုံမျိုးဖြစ်နိုင်တယ်ဆိုတော့ လျော့ပေးလိုက်လို့ရတယ်။

အင်ဂျင်၊အတောင်ပံ၊ Pylon တွေ မတူတာနဲ့တင် Lancet ဗီဒီယိုထဲက Su-25 က decoy ဆိုတာ တော်တော်သေချာနေပြီဖြစ်ပါတယ်။

ဒီကိစ္စဟာ 2 နှစ်ပြည့်တော့မယ့် ရုရှား-ယူကရိန်း စစ်ပွဲအတွင်း ယူကရိန်းဘက်က‌နေ လေယာဉ် decoy သုံးတယ်ဆိုတာ ပထမဦးဆုံးအကြိမ် မှတ်တမ်းတင်နိုင်တာဖြစ်ပါတယ်။

ရုရှားအနေနဲ့ ဒီကိစ္စမှာ ဂျင်းမိသွားတယ်ဆိုပေမယ့် သူတို့ရဲ့ Lancet တွေမှာ ပိုဝေးဝေးသွားနိုင်တဲ့ model အသစ်တွေရှိနေပြီး ယူကရိန်းနောက်တန်းထဲက လေယာဉ်ကွင်းတွေကို ခြိမ်းခြောက်နိုင်စွမ်းရှိနေပါတယ်။

Tactical Raptor
Raptorone

02/12/2023

ကုန်းကြမ်းဗျူဟာကုန်းကနေ ပြန်ပြေးလာရင်း ကြားဖြတ်တိုက်ခိုက်ခံရလို့ အတုံးအရုံးဖြစ်သွားတဲ့ စခစစ်ကြောင်း ဗီဒီယိုတစ်ခုရှိတယ်။ စစ်ကြောင်း တစ်ခုလုံး အတန်းလိုက် မုန့်ဟင်းခါးဖြစ်သွားတာ ဗီဒီယိုထဲ လိုက်ရေကြည့်ရင် အနည်းဆုံး ပွဲ 40 ရှိတယ်။

ကြည့်ရတာ အပြန်အလှန်ပစ်ခတ်ချိန်တောင်မရလိုက်ပဲ လုံးဝ အငိုက်မိသွားတဲ့ ပုံစံနဲ့တောင် တူတယ်။ ဗီဒီယိုထဲမြင်ရတာ MA series ရိုင်ဖယ်တွေ၊ စခ ယူနီဖောင်းတွေဆိုတော့ မြန်မာပြည်က စခ မုန့်ဟင်းခါးတွေဆိုတာသေချာတယ်။ ဗီဒီယိုရိုက်နေတဲ့သူတွေ ပြောတဲ့ ဘာသာစကားနားထောင်တော့လည်း ရှမ်းမြောက်မှာ ဖြစ်မယ်ဆိုတာ အတော်လေး သေသေချာချာသိနိုင်တယ်။ ဒီရက်ပိုင်းဖြစ်တဲ့ကိစ္စ ဟုတ်မဟုတ် အတည်ပြုဖို့တော့ နည်းနည်း စောင့်ရဦးမယ်။

ဒီဗီဒီယိုနဲ့ဆက်စပ်မှုရှိမယ်ယူဆရတဲ့ နောက်ဗီဒီယိုမှာတော့ သိမ်းဆည်းရမိတဲ့ လက်နက်တွေကို ပုံထားတယ်။ စခတို့ရဲ့ standard issue ဖြစ်တဲ့ MA တွေအပြင် စခတွေမကိုင်တဲ့ Type-81 ပါရီကန်‌တွေရော တွေ့ရတယ်။ စစ်ကြောင်းမှာ စခတွေအပြင် အခြား ပသစ ပုံစံမျိူး တွေပါလာမယ်ယူဆရပါတယ်။

The Kokang ကထပ်မံသိရတဲ့ အချက်အလက်တွေနဲ့ update လုပ်ထားပါတယ်။

Tactical Raptor
Raptorone

30/11/2023

ပြည်ပဒရုန်းပညာရှင်တွေ ပါဝင်နေလို့ပါ။

28/11/2023

လွန်ခဲ့တဲ့ရက်ပိုင်းက စကစရဲ့ မိုင်းကျက်ဗျူဟာကုန်းကျပြီး TNLA ကနေ သိမ်းဆည်းမိခဲ့တဲ့ သေတ္တာပုံးတွေကို စိတ်ဝင်စားခဲ့ကြတယ်။

122mm D-30 Howitzer တွေလည်းသိမ်းမိတယ်။ အမြှောက်ကျည်တွေနဲ့ သေတ္တာပုံးတွေကို ကပ်လျက်နေရာချပြီး ဓါတ်ပုံရိုက်ထားတယ်ဆိုတော့ ဒီသေတ္တာတွေက 122mm အမြှောက်ကျည်တွေဖြစ်မယ်လို့တော့ အကြမ်းဖျင်း ခန့်မှန်းထားနိုင်ကြတယ်။

File size ကြီးကြီးရပြီး zoom ဆွဲကြည့်တော့မှ ရေးထားတာတွေက

122mm
HE - High Explosive
ERFB - Extended Range Full Bore
BB - Base bleed

အမျိုးအစားအမြှောက်ကျည်တွေဖြစ်တယ်ဆိုတာ သေချာတွေ့ရပါတယ်။

122mm ERFB/BB ကျည်ဆိုရင် အကွာအဝေး ကီလိုမီတာ 20 လောက်အထိ ပစ်လို့ရနိုင်တယ်။

ထုတ်လုပ်တဲ့နိုင်ငံကတော့ အတိအကျမသိရ‌ဘူး။ Twitter က War Noir အကောင့်ကတော့ တရုတ်ကထုတ်လုပ်တယ်လို့ပြောတယ်။

Directorate of Procurement
Ministry of Defence, Union of Myanmar လို့ရေးထားတာလည်းတွေ့ရတယ်။ ကပစ၊ DI လို့မရေးပဲ ဒီလိုရေးထားတော့လည်း တရုတ်ကဝယ်ထားတာဖြစ်နိုင်မယ်ထင်တယ်။

Tactical Raptor
Raptorone

27/11/2023

25/11/2023

Operation 1027 အတွင်း ကိုးကန့်တပ်ဖွဲ့တွေကနေ သိမ်းဆည်းမိတဲ့ ဟောင်ဝစ်ဇာအမြှောက်တွေထဲမှာ အစွမ်းထက်ဆုံးအဖြစ်သတ်မှတ်ရမယ့် အစ္စရေးလုပ် 155mm Soltam M845P howitzer ပါ။

ဒီအမြှောက်တွေက ပြောင်းအရှည်ပေါ်မူတည်ပြီး Soltam M839 , M845 ဆိုပြီးရှိသေးတယ်။ 39 calibre နဲ့ 45 calibre ပေါ့။ Calibre ပိုကြီးရင် ပြောင်းပိုရှည်တယ်၊ တွန်းယမ်း များများပိုထည့်လို့ရတယ်၊ ဝေးဝေးပိုပစ်လို့ရပါတယ်။

ဒါ့အပြင် ဒီဇယ်အင်ဂျင် (APU auxillary power unit) ပါမပါ အပေါ် မူတည်ပြီး M839P, M845P ဆိုပြီး ရှိပြန်သေးတယ်။

APU ပါလာရင် ယာဉ်ဆွဲစရာမလိုပဲ ခရီးတို အရှိန်ခပ်နှေးနှေးနဲ့ မောင်းလို့ရတယ်။ ဒေါက်တွေချဖို့ ကူညီပေးနိုင်တယ်။ ဒါ့အပြင် ဆွဲယာဉ်ကနေဖြုတ်ပြီးတဲ့အခါ firing position မှာ နေရာချဖို့ ကူညီပေးနိုင်တယ်။

စကစမှာ ဘယ် model ရှိတာလဲ အတိအကျမသိရပေမယ့် ပြည်တွင်း channel တွေကတော့ 45 calibre, APU ပါတဲ့ M845P လို့ ရေးကြတယ်။

ပစ်နိုင်တဲ့အကွာအဝေးကတော့ အသုံးပြုတဲ့ကျည်‌အပေါ်မူတည်ပြီး ကီလိုမီတာ 30 , 18 မိုင် လောက်အထိ ရှိနိုင်ပါတယ်။

အကောင်းအတိုင်းသိမ်းဆည်းမိတာလား၊ သုံးမရအောင်ဖျက်ဆီးသွားနိုင်လားတော့ မသိနိုင်သေးပါဘူး။

စခတွေအနေနဲ့ ရှေ့ရက်တွေက 122mm D-30 တွေပေးတာများလို့ ကိုယ်တွေ ရင်မခုန်တော့ဘူးဆိုတာ သိလာပြီးတဲ့နောက် 155mm ပါ အလှူပေးတဲ့အထိ ဖြစ်လာပါတော့တယ်။

Tactical Raptor
Raptorone

25/11/2023

ယူကရိန်းမှာ‌တော့ ရုရှားရဲ့ အီရုန်လုပ် ဒရုန်းတွေက ‌‌ ဒေါ်လာ သောင်းဂဏန်းပဲ တန်ဖိုးရှိတယ်၊ သူတို့ကို ပစ်ချဖို့ သုံးရတဲ့ လေကာဒုံးကျည်တွေက ဒေါ်လာသိန်း၊သန်း နဲ့ချီပြီး တန်ဖိုးရှိလို့ ပစ်ချရတာ တွက်ချေမကိုက်ဘူးဆိုပြီး ပြောကြတယ်။

မြန်မာပြည်မှာလည်း ဘာထူးလဲ။ .338 ကျည်သာသုံးမယ်ဆိုရင် မြင်ကွင်းထဲက စခ တစ်‌ကောင်ရဲ့ တစ်လစာနဲ့သိပ်မကွာလှဘူး။

Tactical Raptor
Raptorone

23/11/2023

KNDF ရဲ့ မုဆိုး - The Hunter campaign အတွက် promotion လုပ်ဖို့ ဗီဒီယိုတွေ ရိုက်ထားတာရှိတယ်။

ပထမဗီဒီယိုကကတော့ GoPro footage တွေစုထားတဲ့ combat footage ပုံစံမျိုး , နောက်ဆုံးတစ်ခုကတော့ မှန်ပြောင်းကနေတဆင့်မြင်ရတဲ့ ဗီဒီယိုပါ။

မုဆိုး The Hunter page မှာ တင်ထားတဲ့ ပုံတွေအရ အဓိကအသုံးပြုနေတဲ့ စနိုက်ပါရိုင်ဖယ်က

- R***r Precision Rifle ဖြစ်ပါတယ်။ သူက calibre အမျိုးမျိုးနဲ့ဝယ်လို့ရနိုင်တယ်။ မြန်မာပြည်မှာကတော့ .308 version ပဲ အသုံးများမယ်ထင်ပါတယ်။

- spotter လို့တော့ပြောလို့မရပေမယ့် sniper assist အဖြစ်ပုံဖော်ထားတဲ့ KNDF တပ်ဖွဲ့ဝင်ကတော့ Type 80 GPMG (General Purpose Machine Gun) ကိုင်ပါတယ်။ ဆိုဗီယက်တို့ရဲ့ PKM ကို တရုတ်က ပြန်ထုတ်ထားတာဖြစ်ပြီး 7.62x54mm ကျည်သုံးပါတယ်။

ဒုတိယ scope view ဗီဒီယိုကို ကြည့်ပြီး စိတ်ဝင်စားစရာတွေ့ရတာက scope ကနေမြင်ရတာကို ဗီဒီယိုအဖြစ် ဘယ်လို ရိုက်ကူးထားလဲပေါ့။

ဒီအတွက်အဖြေက KNDF စနိုက်ပါ ထမ်းထားတဲ့ R***r Precision Rifle ပေါ်မှာပဲရှိပါတယ်။ Scope eyepiece အပေါ်မှာ တပ်ဆင်ထားတဲ့ ပစ္စည်းလေးက Triggercam 2.1 နဲ့ အတော်လေးတူပါတယ်။ Camo tape ပတ်ထားလို့ logo ကိုတော့ မမြင်ရတော့ဘူး။ ဒါပေမယ့် ဒီလို scope view camera ဈေးကွက်က သိပ်မကြီးကျယ်တော့ တခြား ပုံစံတူ ပစ္စည်းမရှိလောက်ဘူးယူဆပါတယ်။

Triggercam 2.1 ကို တောင်အာဖရိကအခြေစိုက် Eyecam Technologies ဆိုတဲ့ ကုမ္ပဏီက ထုတ်လုပ်ပါတယ်။ ကုမ္ပဏီရောင်းဈေးတင် ဒေါ်လာ 565.50 ဆိုတော့ ပစ္စည်းသေးပေမယ့် ဈေးကမသေးဘူးပြောရမယ်။

သူက scope ရဲ့ eyepiece မှာပဲ သွားစွပ်ရတယ်။ Scope eyepiece size အမျိုးမျိုးအတွက်အဆင်ပြေအောင် အစွပ်ဆိုဒ်မျိုးစုံဘူးထဲပါတယ်။ 32mm ကနေ 48mm အထိ တပ်လို့ရတယ်။ ထူးခြားတာက အထဲမှာ prism တွေနဲ့ တည်ဆောက်ထားတာပါ။ Rifle scope ကလာတဲ့ ပုံရိပ်အလင်းတန်းက Triggercam ရဲ့ prism တွေဆီ ဖြတ်တာက‌နေ အလင်းပြန်ပြီး အပေါ်ဘက်မှာရှိတဲ့ ကင်မရာဆီကိုရောက်တယ်။ ကင်မရာက ဒီပုံရိပ်ကို record လုပ်တယ်ပေါ့။ ဒီလို prism တွေကနေ camera ဆီကို သွားတာကြောင့် ရလာတဲ့ ပုံရိပ်က ပိုပြီး ကြည်လင်ပြတ်သားတယ်လို့ review တွေမှာ ပြောကြတယ်။ ဖုန်းကင်မရာအသုံးပြုပြီး ကြည့်ရတဲ့ စနစ်တွေထက် ပုံရိပ်ပိုကောင်းတယ်ပေါ့။ အခုလက်တွေ့မြင်ရတဲ့ KNDF ဗီဒီယိုမှာလည်း quality ကောင်းတာ‌ကို တွေ့ရမှာပါ။

Triggercam 2.1 က‌နေ WiFi လွှင့်ပြီး ကိုယ့်ဖုန်းနဲ့ ချိတ်လို့ရတယ်။ Live view ကြည့်လို့‌ရတယ်။ ရိုက်ကူးထားတဲ့ footage / photo တွေကို ကူးယူလို့ရတယ်။

IP64 rating မို့လို့ ရေပက်တာ၊ ဖုန်ဝင်တာတော့ ခံနိုင်တယ်။ ရေငုပ်လို့တော့မရနိုင်ဘူး။

Resoulution အနေနဲ့
4K ဆိုရင် 30fps
FHD 1080P ဆိုရင် 120fps
HD 720P ဆိုရင် 240fps အထိ ရပါတယ်။

Battery ကတော့ အားပြန်သွင်းရတယ်။ ရိုက်ကူးချိန် 2 နာရီခွဲ၊ stand-by time 10 နာရီ ခံပါတယ်တဲ့။

Military grade အဆင့်ထုတ်လုပ်ထားပြီး အကြမ်း ခံနိုင်တယ်ဆိုပေမယ့် မူရင်းကုမ္ပဏီရဲ့ ရည်ရွယ်ချက်ကတော့ စစ်သုံးဖို့မဟုတ်ပါဘူး။ အမဲလိုက်တဲ့သူတွေ၊ သေနတ်ပစ်တဲ့သူတွေ အနေနဲ့ ကိုယ့်ရဲ့ ပစ်ချက်တွေကို အမှတ်တရ မှတ်တမ်းတင်ထားနိုင်ဖို့၊ ပြန်ကြည့်ဖို့ ဖြစ်ပါတယ်။

အခုလည်း KNDF က စခ တွေကို အမဲလိုက်ဖို့သုံးနေတာဆိုတော့ မူလရည်ရွယ်ချက်နဲ့ကိုက်ညီပြိး ဝိနည်းတော့လွတ်ပါတယ်။

KNDF ရဲဘော်ကတော့ အသက်တွေပါရင်းထားရုံသာမက ဒီလိုပစ္စည်းကောင်းတွေလည်းသုံးထားပြီး ပြည်သူတွေ စိတ်ဝင်စားအောင်၊အားတက်အောင် ကြိုးစားဆွဲခေါ်နေတာဖြစ်ပါတယ်။ အသက်မရင်းရတဲ့ကိုယ်တွေအတွက်ကတော့ ရတဲ့နည်းနဲ့ ရဲဘော်တွေလိုအပ်ချက်ပြည့်မီအောင် ထောက်ပံ့ကူညီပေးဖို့လိုပါတယ်။

Tactical Raptor
Raptorone

22/11/2023

ဒီရက်ပိုင်း ယူကရိန်းစစ်မြေပြင်မှာ ပြောစရာဖြစ်သွားတဲ့ကိစ္စကတော့ ယူကရိန်းစနိုက်ပါတစ်ဦးကနေ မီတာ 3800 (2.3 မိုင်) အကွာအဝေးမှာရှိတဲ့ ရုရှားတပ်ဖွဲ့ဝင်တစ်ဦးကို ထိအောင်ပစ်ပြီး မြေဩဇာဖြစ်အောင်လုပ်နိုင်ခဲ့တယ် ဆိုတာပဲဖြစ်ပါတယ်။

မီတာ 3800 confirmed kill ဆိုတော့ ဒီပစ်ချက်က ကမ္ဘာ့အဝေးဆုံး sniper kill အဖြစ် မှတ်တမ်းဝင်သွားနိုင်တယ်။ လောလောဆယ်က ဒီစံချိန်ကို ယူကရိန်းဘက်က အတည်ပြုတာမျိုးပဲ တွေ့ရသေးတယ်။ နိုင်ငံတကာကရော လက်ခံမလားစောင့်ကြည့်ဖို့လိုဦးမယ်။ ဒါတောင် ဝီကီပီးဒီးယား မှာ ယူကရိန်းစနိုက်ပါ ပစ်ချက်က အဝေးဆုံး sniper kill အဖြစ် ရေးထားပြီဖြစ်ပါတယ်။ ရှေ့က စံချိန်က 2017 မှာ အီရတ်ရှိ ကနေဒါ အထူးတပ်ဖွဲ့ဝင်စနိုက်ပါတစ်ဦးကနေ (Joint Task Force 2) မီတာ 3540 မှာရှိတဲ့ ပစ်မှတ်ကို ထိအောင်ပစ်ပြီး အဝေးဆုံးပစ်ချက်အဖြစ် စံချိန်တင်နိုင်ခဲ့တာပါ။

မီတာ 3800 ပစ်ချက်ကို ယူကရိန်းစစ်ဘက်ထောက်လှမ်းရေး (SBU) လက်အောက်ခံ အထူးတပ်ဝင်တစ်ဦးကနေ ပစ်ခဲ့တာလို့ သိရတယ်။ ပစ်တဲ့အချိန်ကနေ ရုရှားစစ်သားတစ်ဦးကို ထိသွားတဲ့ အထိဗီဒီယိုလဲ ပြပေးထားတယ်။ သုံးသွားတဲ့လက်နက်က‌တော့ ယူကရိန်းပြည်တွင်းဖြစ် Horizon's Lord လို့အမည်ရတဲ့ Anti-material Sniper rifle ဖြစ်ပါတယ်။ သူ့အကြောင်းက ပီးရင် ဆက်ပြောပါ့မယ်။

ဒီပစ်ချက် တကယ်ဖြစ်နိုင်သလား၊ မဖြစ်နိုင်ဘူးလားကတော့ အမြင်ကွဲတာတွေရှိနေတုန်းပဲ။ အဓိကကတော့ မီတာ 3800 အထိ ပစ်မှတ်ကိုမြင်နိုင်တဲ့ မှန်ပြောင်းမရှိဘူး၊ Spotter က ကျည်ဘယ်နားကျနေလဲဆိုတာကိုမမြင်နိုင်တာမို့လို့ windage, elevation ဘယ်လိုချိန်မလဲ မေးခွန်းထုတ်ကြတယ်။ ပြီးတော့ မှန်ပြောင်းက မီတာ 3800 အထိ elevation ချိန်လို့ရမှာမဟုတ်ဘူး ထောက်ပြကြတယ်။ ဒါပေမယ့် ဒီလိုစံချိန်တင်ပစ်ချက်တစ်ခု အသစ်ထွက်ပေါ်လာတိုင်း သံသယဝင်ကြရတာတော့ ထုံးစံပဲဖြစ်ပါတယ်။

တစ်ဖက်က ပြန်ကြည့်ရင် သုံးသွားတဲ့ လက်နက်နဲ့ကျည် ရဲ့ specifications တွေကို ကြည့်ရင် ဖြစ်နိုင်ဖွယ်ရှိတယ်။ ယူကရိန်းအထူးတပ်ဖွဲ့ဝင်တွေဆိုတာ ရှေ့နှစ်တွေကတည်းက US, UK ဆီကနေ training တွေရထားတယ်။ ရုရှားကျူးကျော်စစ် 2 နှစ် ကာလတွင်းမှာလဲ အတွေ့အကြုံကောင်းတွေရထားပြီး ဖြစ်တယ်။ ယူကရိန်းက မြေပြန့်များတယ်၊ ရာသီဥတုအေးလို့ အဝေးကိုကြည့်ရင် လျှပ်ထတာမရှိဘူး၊ အရှေ့အလယ်ပိုင်းလို ဖုန်ထူတာမျိုးမရှိတာကြောင့် ဒီပစ်ချက်က ဖြစ်နိုင်လောက်တယ်လို့ ထောက်ပြကြတယ်။

SBU Alpha အဖွဲ့ဝင်ရဲ့ ဒီပစ်ချက်က တကယ်ဖြစ်နိုင်မဖြစ်နိုင် ကိုယ်တွေလည်း အတည်ပြုပေးနိုင်တဲ့ အရည်အချင်းတော့ရှိမနေဘူး။ Subject matter expert တွေကနေ ဘယ်လို ဆန်းစစ်ပြမလဲ ဆက်စောင့်ကြည့်ရဖို့ပဲရှိပါတယ်။

Horizon's Lord Anti-material/Sniper rifle

တကယ် မီတာ 3800 ပစ်ချက် ဟုတ်တာ၊ မဟုတ်တာ ခဏထားလိုက်ပြီးရင် စိတ်ဝင်စားစရာက အသုံးပြုသွားတဲ့ လက်နက်ပါ။ ယူကရိန်းပြည်တွင်းဖြစ်ဆိုပေမယ့် ယူကရိန်း ထိပ်တန်းစနိုက်ပါတွေ၊ Horizon's Lord ကုမ္ပဏီရဲ့ အင်ဂျင်နီယာတွေ၊ US , UK ကုမ္ပဏီတွေ ပေါင်းစပ်ထုတ်လုပ်ထားတာဖြစ်ပါတယ်။ 12.7x114HL ကျည်သုံး anti-material rifle ဖြစ်ပါတယ်။ (HL က Horizon's Lord ကို ရည်ညွှန်းတာဖြစ်မယ်ယူဆရပါတယ်)

ကျည်ကဒ်မပါပဲ တစ်တောင့်ချင်းထိုးရတဲ့ single-shot bolt action စနစ်နဲ့ အလုပ်လုပ်တာပါ။ ကျည်အိမ်နဲ့ ဗားရှင်းလည်းရှိပေမယ့် 17 ကီလိုအထိလေးလာတယ်။ မူလ ဒီဇိုင်းလိုအပ်ချက်က 16 ကီလို မကျော်ရဘူး သတ်မှတ်ထားတာကြောင့် single-shot version ကိုပဲ သုံးနေတယ်ယူဆရပါတယ်။

သေနတ်အလေးချိန် - 15.5 ကီလို၊ ဒင်မခေါက်ထားရင် 1.82 မီတာ ရှိတာမို့ သူ့တစ်လက်တည်းတင် အတော်လေးနေပါပြီ။ ဒါကြောင့် သယ်ရပြုရ လွယ်ကူသက်သာ‌စေဖို့ ပစ်ခတ်မယ့် စနိုက်ပါ တစ်ယောက်မှာ အကူနှစ်ယောက် တွဲဖက်ပေးလေ့ရှိတယ်လို့ ဒီကိစ္စတွေနဲ့ နီးစပ်တဲ့ ယူကရိန်းစနိုက်ပါဟောင်းတစ်ဦးက ပြောထားတယ်။

သုံးတဲ့ကျည် 12.7x114 mm ကလည်းစိတ်ဝင်စားစရာကောင်းတယ်။ ဒါက ကျည်ဆံနှစ်မျိုးကို ပေါင်းစပ်ထားတာဖြစ်ပါတယ်။

- အနောက်နိုင်ငံတွေရဲ့ M2 Browning Machine Gun မှာသုံးတဲ့ 12.7mm "ကျည်ထိပ်ဖူး (12.7)" ကိုယူတယ်။
- ဆိုဗီယက်တို့ရဲ့ KPV Heavy machine gun မှာသုံးတဲ့ 14.5x114mm ကျည်ကနေ "ကျည်ခွံ (114)" ကိုယူတယ်။ (ရှမ်းမြောက်မှာ သိမ်းမိတဲ့ ZPU-1 လည်း ဒီကျည်ပဲ သုံးပါတယ်)

Soviet 114mm ကျည်ခွံမှာ NATO 12.7mm ကျည်ဖူးရအောင်တပ်ဆင်ထားတဲ့ အထူးထုတ် ကျည်ဖြစ်ပါတယ်။ ဒီကနေ 12.7x114HL ဖြစ်လာတယ်။

တကယ်တော့ တာဝေးပစ်ဖို့ဆိုရင် မူလကျည်တွေဖြစ်တဲ့ .50 BMG, 14.5x114mm တွေ အပြင် နောက်ပိုင်းကျည်အသစ်တွေဖြစ်တဲ့ .408 CheyTac တွေက အစွမ်းထက်နေပြီးသားပဲ၊ ဒါကို ဘာကြောင့် အလုပ်ရှုပ်ခံပြီး 12.7 နဲ့ 14.5 ပေါင်းစပ်ဖို့ကြိုးစားတာလဲဆိုတာ မေးနိုင်တယ်။ ဒီမေးခွန်းအတွက် ယူကရိန်းသားတွေမှာ ကိုယ်ပိုင်အကြောင်းပြချက်ရှိပြီးသားပါ။
408 CheyTac က အဝေးပစ်ဖို့ အင်မတန်ကောင်းတဲ့ကျည်ဖြစ်တာဟုတ်တယ်၊ ဒါပေမယ့် သံချပ်ကာဖောက်ဖို့ armor piercing incendiary API ကျည်ဖူးမျိုး .408 CheyTac မှာမရှိဘူး။ သူတို့က အဝေးလည်းပစ်ချင်တယ်၊ anti-material စွမ်းရည်လည်း လိုချင်တာကိုး။

Soviet 14.5x114mm မှာဆိုရင် anti-material စွမ်းရည်ပေးနိုင်တဲ့ API လိုမျိုး အထူးပြု ကျည်ဖူးတွေရှိတယ်။ ဒါပေမယ့် long range sniping အတွက် ရည်ရွယ်ထုတ်လုပ်ထားတဲ့ ကျည်ဖူး မရှိပြန်ဘူး။
50 BMG မှာတော့ အဝေးပစ်ဖို့ precision grade ammunition လည်းရှိတယ်၊ payload သယ်တဲ့ special ammunition တွေလည်းရှိတော့ အကြိုက်တွေ့တယ်။ .50 BMG ရဲ့ 12.7mm ကျည်ဖူးကိုသုံးမယ်။ ဒါပေမယ့် .50 BMG ရဲ့ ပြောင်းထွက်အလျင်ကို အားမရဘူး။ ပြောင်းရှိန် ပိုပြီးပြင်းပြင်းနဲ့ ပစ်ချင်ပြန်တယ်။ ဒီတော့ ယမ်းပိုသုံးရမယ်၊ ယမ်းပိုသုံးဖို့ ကျည်ခွံပိုကြီးဖို့လိုတယ်။ ဒါ့ကြောင့် .50 BMG ရဲ့ ကျည်ခွံထက်ပိုကြီးတဲ့ Soviet 14.5x114mm က ကျည်ခွံကို ယူသုံးလိုက်တာဖြစ်ပါတယ်။
50 BMG ရဲ့ special/precision grade ကျည်ဖူးအမျိုးမျိုးသုံးလို့ရတဲ့ အားသာချက်
14.5x114 ရဲ့ ယမ်းပိုထည့်ဖို့ ကျည်ခွံအကြီး အားသာချက် - ဒါတွေကို ပေါင်းစပ်လိုက်တဲ့အခါမှာ 12.7x114HL ဖြစ်လာပါတော့တယ်။

End result ကတော့ အဝေးပစ်တဲ့အခါ 12.7x114HL သည် 14.5x114HL ထက် ကျည်ကျပိုနည်းတယ်၊ supersonic အလျင်နဲ့ ပိုကြာကြာသွားနိုင်တယ်၊ အရှိန်လျော့သွားတာ သိပ်မရှိဘူးပေါ့၊ လေတိုးတဲ့ဒဏ်ပိုခံနိုင်တဲ့၊ ပစ်မှတ်ကို ထိမှန်တဲ့အခါမှာလည်း ပြင်းအားပိုပါလာတယ်။

12.7x11HL ရဲ့ကျည်က ပြောင်းထွက်အလျင် 1000 m/s ရှိတယ်၊ မီတာ 3000 လောက် သွားပြီးမှ အရှိန်လျော့ပြီး subsonic ဖြစ်သွားတယ်။

14.5x114mm ရဲ့ ကျည်က ပြောင်းထွက်အလျင် 1000 m/s ရှိပေမယ့် မီတာ 2400 မှာတင် subsonic အရှိန်အထိ လျော့ကျသွားတယ်လို့ MAYAK ကုမ္ပဏီကနေ data တွေ ထုတ်ပြန်ပေးထားပါတယ်။

MAYAK ကုမ္ပဏီက သူ့ရဲ့ 12.7x114HL ကျည်တွေကို တိကျမှုကောင်းအောင်၊ စံတစ်ခုတည်းဖြစ်အောင် ကျည်ခွံတွေကို US ကနေ မှာယူပါတယ်။ ဒါ့အပြင် သေနတ်ပြောင်းကိုလည်း US ကုမ္ပဏီဖြစ်တဲ့ Bartlein Barrels ကနေပဲ မှာယူတယ်။ ဒီလို တိကျမှုကို ဦးစားပေးတဲ့ ထုတ်လုပ်မှုတွေကြောင့် Horizon Lord rifle နဲ့ 12.7x114HL ကျည်အတွဲဟာ anti-material rifle လို့ပြောပေမယ့် sub-MOA accuracy ရှိနေတာဖြစ်ပါတယ်။

သူ့ကို 12.7x114HL အပြင် အခြားကျည်သုံး ဗားရှင်းတွေနဲ့လည်း ဝယ်ယူရရှိနိုင်တယ်။ ကုမ္ပဏီ website မှာတော့ multi-calibre anti-material sniper rifle လို့ ရေးထားတယ်။

ဒီစနိုက်ပါရဲ့ ရည်ရွယ်ချက်က
- Sabotage and counter-sabotage activities
- ရန်သူစနိုက်ပါ၊ စက်သေနတ်ကြီး၊ ATGM စနစ်တွေကို တန်ပြန်ချေမှုန်းဖို့
- အပေါ့စားသံချပ်ကာယာဉ်တွေကို တိုက်ခိုက်ဖို့ ဖြစ်တယ်လို့ ပြောထားပါတယ်။

Tactical Raptor
Raptorone