Revolution News - Mindat (2025)

13/08/2024

ဝေခွင့်မရ
ကြွေလွင့်ကြသည့်
နွမ်းလျမာလာ
ကြယ်တာရာသို့
ငါတို့ဦးညွတ်ကြပါ၏။

ခေတ်ဝန်ကိုထမ်း
ခေတ်လမ်းကိုဖောက်
ဆူးမကြောက်စတမ်း
ဒူးမထောက်စတမ်း။

CDF (မင်းတပ်)ရဲဘော်၊ရဲမေများပါဝင်သရုပ်ဆောင်ထားသော"နွေဦးဇာတ်ခုံ"ရုပ်ရှင်။ကိုယ်တိုင်ကြည့်ရှုပြီးသော်ရုပ်ရှင်အရည်အသွေးအားဝေဖန်သုံးသပ်ကြပါကုန်။သို့ပေမင့်ဇာတ်လမ်းဇာတ်အိမ်ကိုကားသံသယမြူမှုန်မျှမရှိပါလင့်။နောင်အနာဂတ်အထိဥဒါန်းတွင်ကျန်ရစ်ခဲ့မည့်လက်ရှိဖြတ်သန်းနေဆဲခေတ်သရုပ်ကိုခြယ်မှုန်းထားခြင်းဖြစ်၏။
ပြည်တွင်းပြည်ပလက်မှတ်အရောင်းကိုယ်စားလှယ်များထံမှဝယ်ယူကြည့်ရှုအားပေးကြပါမည့်အကြောင်းမေတ္တာရပ်ခံပါသည်။

12/04/2024

အမေရိကန်ဗိုလ်ချုပ်ကြီး Michael Erik Kurilla နဲ့အစ္စရေးစစ်ဦးစီးချုပ်ဒုတိယဗိုလ်ချုပ်ကြီး Herzi Halevi တို့ဦးဆောင်တဲ့ ၂ နိုင်ငံစစ်ဘက်ခေါင်းဆောင်တွေဟာအီရန်တိုက်ခိုက်လာခဲ့ရင်တုန့်ပြန်နိုင်ဖို့အတွက်ပူးပေါင်းဆောင်ရွက်နေကြကြောင်းအစ္စရေးကာကွယ်ရေးဝန်ကြီးဌာနရဲ့တွီတာလူမှုကွန်ယက်စာမျက်နှာမှာရေးတင်ထားတယ်။အခုနောက်ဆုံးဝင်လာတဲ့သတင်းတွေအရလက်ဘာနွန်မှာရှိတဲ့ Hezbollah စစ်သွေးကြွတွေကအစ္စရေးကိုရော့ကက်ဒုံးကျည်ပေါင်း ၄၀ ကျော်နဲ့ပစ်ခတ်တိုက်ခိုက်ခဲ့ကြောင်းသိရတယ်။
“မည်သည့်တိုက်ခိုက်မှုကနေမဆိုအစ္စရေးကိုကာကွယ်ဖို့ကျုပ်တို့ကတိကဝတ်ပြုထားပါတယ်”လို့အမေရိကန်သမတဘိုင်ဒင်ကထွက်ပြောနေပါပြီ။အခြေအနေတွေကခန့်မှန်းလို့မရနိုင်လောက်အောင်ဖြစ်နေပြီထင်တယ်။ဘာမဆိုဖြစ်သွားနိုင်တယ်။

12/04/2024

အီရန်ကအစ္စရေးပစ်မှတ်တွေကိုလာမယ့် ၄၈ နာရီအတွင်းတိုက်ခိုက်လာနိုင်ကြောင်းသတင်းဌာနများစွာကအရေးပေါ်သတင်းအဖြစ်သတိပေးဖော်ပြနေကြတယ်။အိမ်ဖြူတော်ကအဆိုပါသတင်းမှန်ကန်ကြောင်းအတည်ပြုပေမဲ့အချိန်အတိအကျကိုတော့့ဖော်ပြခြင်းမပြုပါဘူး။အစ္စရေးသံရုံးတွေရဲ့အနီးအနားကိုသွားလာခြင်း‌မပြုကြဖို့အစိုးရအသီးသီးကသူတို့နိုင်ငံသားများကိုသတိပေးနေကြတယ်။
အခုလိုသတင်းတွေထွက်ပေါ်လာတဲ့အချိန်မှာပဲအစ္စရေးဝန်ကြီးချုပ် Benjamin Netanyahu ဟာကာကွယ်ရေးဝန်ကြီး Yoav Gallant နဲ့တကွစစ်အရာရှိကြီးတွေကိုအရေးပေါ်ဆင့်‌ခေါ် ပြီးအစည်းအဝေးလုပ်နေကြတဲ့သတင်းတက်လာတယ်။အီရန်ရဲ့တိုက်ခိုက်လာနိုင်ချေအတွက်ကြိုတင်ပြင်ဆင်ကြဖို့အစ္စရေးရေဒီယိုကကျေညာသွားတယ်လို့သိရတယ်။
ဆီးရီးယားနိုင်ငံ၊ဒမတ်စကတ်မြို့ရှိအီရန်ကောင်စစ်ဝန်ရုံး(ပုံ)ကိုအစ္စရေးကတိုက်ခိုက်ပြီးနောက်ပိုင်းအီရန်ဘက်ကလက်တုန့်ပြန်လာမယ့်အချိန်ကိုစောင့်ကြည့်နေခဲ့ကြတာပါ။ဒိန်းမတ်နိုင်ငံကတော့အီရန်ကိုပြေးဆွဲနေတဲ့ဒိန်းမတ်လေကြောင်းလိုင်းတွေကိုဧပြီလ ၁၈ ရက်အထိခရီးစဥ်အားလုံးရွှေ့ဆိုင်းဖို့အမိန့်ထုတ်ပြန်လိုက်ပါတယ်။
အစ္စရေးစစ်တပ်ဟာအရှေ့အလယ်ပိုင်းမှာအတောင့်တင်းဆုံး၊နည်းပညာအမြင့်မားဆုံးနဲ့လေ့ကျင့်မှုအကောင်းဆုံးစစ်တပ်ပါ။အီရန်အနေနဲ့အစ္စရေးနိုင်ငံကိုတိုက်ရိုက်တိုက်ခိုက်ခဲ့ရင်တန်ဖိုးကြီးကြီးပေးဆပ်ရပါလိမ့်မယ်။

11/04/2024

"တကယ်လို့ယူကရိန်းသာစစ်ရှုံးသွားခဲ့ရင်တရုပ်ကိုခွန်အားပေးသလိုဖြစ်သွားပါလိမ့်မယ်၊အမေရိကန်ရဲ့အကူအညီမရခဲ့ရင်ယူကရိန်းစစ်ရှုံးသွားလိမ့်မယ်၊ဒီလိုဖြစ်လာခဲ့ရင်တရုပ်အတွက်နမူနာယူစရာဖြစ်လာပြီးအာရှအရှေ့ပိုင်းတခုလုံးအကြပ်ရိုက်တဲ့အထိအန္တရာယ်ကြီးလာလိမ့်မယ်၊အမေရိကန်ရဲ့ခေါင်းဆောင်မှုဟာယူကရိန်းအတွက်မရှိမဖြစ်လိုအပ်နေပါတယ်"

(အမေရိကန်သို့အလည်အပတ်ရောက်ရှိနေသောဂျပန်ဝန်ကြီးချုပ် Fumio Kishida ၏ကွန်ဂရက်မိန့်ခွန်း)

11/04/2024

ယူကရိန်းကိုလေကြောင်းရန်ကာကွယ်ရေးလက်နက်စနစ်များမပေးပို့မချင်း EU ကောင်စီရဲ့ဘတ်ဂျက်ချမပေးဖို့ဥရောပပါလီမန်ကဒီနေ့(၁၁-၄-၂၄၊ကြာသပတေးနေ့)မဲခွဲဆုံးဖြတ်လိုက်ပါတယ်။ယူကရိန်းကအကူအညီတောင်းခံထားတဲ့ပက်ထရီယော့လေကြောင်းရန်ကာကွယ်ရေးလက်နက်စနစ် ၇ ခုကိုအီးယူနိုင်ငံတွေကဖြည့်ဆီးမပေးနိုင်တာအပေါ်အားမလိုအားမရဖြစ်ကြတဲ့အီးယူပါလီမန်အမတ်တွေကထောက်ခံမဲ-၅၁၅၊ကန့်ကွက်မဲ-၆၂၊ကြားနေမဲ-၂၀နဲ့အကြပ်ကိုင်လိုက်ကြတာပါ။
"ယူကရိန်းကိုအီးယူအဖွဲ့ထဲဝင်ရောက်ဖို့ကြိုဆိုတယ်လို့ပြောပြီးလေကြောင်းကာလက်နက် ၇ ခုကိုတောင်အမြန်ဆုံးပေးပို့အောင်မဆုံးဖြတ်နိုင်တဲ့အီးယူကောင်စီကိုအံ့သြလို့မဆုံးဘူး"လို့အီးယူပါလီမန်ဆိုင်ရာဘယ်လ်ဂျီယံအမတ် Guy Verhofstadt ကပြောသွားပါတယ်။

- https://twitter.com/i/status/1778370017945411848

11/04/2024

ယူကရိန်းမြို့တော်ကိုလျှပ်စစ်ဓါတ်အားပေးပို့နေတဲ့ Tripilska ဓါတ်အားပေးစက်ရုံကိုရုရှကမစ်ဇိုင်းဒုံးကျည်၊ဒရုန်းတို့နဲ့တိုက်ခိုက်ဖျက်ဆီးလိုက်ပါတယ်။ရုရှဟာယူကရိန်းရဲ့လျှပ်စစ်ဓါတ်အားပေးစက်ရုံတွေတခုပြီးတခုတိုက်ခိုက်ဖျက်ဆီးနေတာပါ။ယူကရိန်းပြည်သူသန်းပေါင်းများစွာဟာလျှပ်စစ်ဓါတ်အားပြတ်တောက်လို့ဒုက္ခရောက်ကြရတယ်။ရေပေးဝေမှုစနစ်တွေရပ်ဆိုင်းကုန်တယ်။ချက်ပြုတ်ဖို့အတွက်ဂတ်စ်၊ကျောက်မီးသွေး၊ထင်းတို့ကိုအသုံးပြုနေရတာပါ။
ယူကရိန်းကတော့ပက်ထရီယော့လေကြောင်းကာကွယ်ရေးလက်နက်စနစ် ၇ ခုအရေးပေါ် ပံ့ပိုးဖို့အနောက်မဟာမိတ်တွေကိုတောင်းဆိုထားပေမဲ့အခုထိမရသေးပါဘူး။ဥရောပမှာပက်ထရီယော့ဒုံးစနစ်ပေါင်း ၁၀၀ ကျော်ရှိပေမဲ့ယူကရိန်းတောင်းတဲ့ ၇ လက်ကိုမပေးကြတာဟာစဥ်းစားစရာပါ။ပက်ထရီယော့ဒုံးစနစ်မှာပစ်ခတ်ရတဲ့မစ်ဇိုင်းဒုံးကျည်တခုဟာအမေရိကန်ဒေါ်လာ ၄ သန်းတန်ဖိုးရှိတာကြောင့်ရုရှကပစ်ခတ်တဲ့ဒုံးကျည်တွေကိုရေရှည်ဟန့်တားပစ်ချဖို့အတွက်ကုန်ကျစရိတ်အလွန်များပြားပါလိမ့်မယ်။မဟာမိတ်တွေဘက်ကဒီအချက်ကိုထည့်သွင်းစဥ်းစားကြဟန်တူပါတယ်။
NATO အဖွဲ့ရဲ့ဥရောပဆိုင်ရာတပ်မှူးကြီး Christopher Cavoli က"ရုရှစစ်တပ်ရဲ့စစ်သည်အင်အားဟာယူကရိန်းစစ်ပွဲနောက်ပိုင်း ၁၅% ပိုမိုများပြားလာကြောင်း၊ယူကရိန်းရှေ့တန်းစစ်မျက်နှာမှာရုရှစစ်သည်ပေါင်း ၄၇၀၀၀၀ ရှိကြောင်း"သတိပေးပြောကြားတယ်။ယူကရိန်းပါလီမန်ကလည်းစစ်သားစုဆောင်းရေးဥပဒေမူကြမ်းကိုဒီနေ့(၁၁-၄-၂၄)အတည်ပြုလိုက်တယ်။ယူကရိန်းဘက်ကလည်းစစ်သည်ဦးရေများစွာထပ်တိုးလာပါတော့မယ်။ယူကရိန်းစစ်ပွဲဟာ Attrition warfare ဖြစ်နေပါပြီ။ယူကရိန်းဘက်ကလည်းရုရှရဲ့ရေနံချက်စက်ရုံတွေကိုဒရုန်းနဲ့တိုက်ခိုက်ဖျက်ဆီးနေလို့အခုဆိုရင်ရုရှရဲ့ရေနံထုတ်လုပ်မှု ၂၀% ခန့်လျော့ကျသွားခဲ့တယ်။ကမ္ဘာ့ရေနံစျေးနှုန်းကိုမြင့်တက်စေပါတော့မယ်။ယူကရိန်းစစ်ပွဲကိုဘယ်လိုအဆုံးသတ်ကြမလဲ။
"သူသာရွေးကောက်ပွဲမှာအနိုင်ရခဲ့ရင်ယူကရိန်းစစ်ပွဲကို ၂၄ နာရီအတွင်းပြီးဆုံးအောင်လုပ်မယ်"လို့ထရမ့်ပ်ကပြောခဲ့တယ်။ဘယ်လိုလုပ်မယ်ဆိုတာကိုတော့မပြောခဲ့ပါဘူး။အခုတော့ထရမ့်ပ်ရဲ့စိတ်ကူးအစီအစဥ်ကိုဝါရှင်တန်ပို့စ်သတင်းစာကဖောက်ချလိုက်ပါပြီ။ Crimea နဲ့ Donbas ဒေသ ၂ ခုကိုယူကရိန်းဘက်ကစွန့်လွှတ်အောင်ဖိအားပေးရမယ်လို့ပြောကြောင်းအမည်မဖော်လိုတဲ့ထရမ့်ပ်ရဲ့အနီးကပ်လူယုံတယောက်ကဝါရှင်တန်ပို့သတင်းစာကိုဖွင့်ချခဲ့တာပါ။ထရမ့်ပ်ကတော့သူသာအနိုင်ရခဲ့ရင်သမတရာထူးတရားဝင်မရယူမီမှာပင်ယူကရိန်းစစ်ပွဲကိုအဆုံးသတ်စေမယ်လို့အာမခံပြောကြားခဲ့ကြောင်းဖော်ပြထားတယ်။ဒါပေမဲ့ထရမ့်ပ်ရဲ့အစီအစဥ်ကိုယူကရိန်းပြည်သူတွေလက်ခံမယ်မထင်ပါဘူး။
ရုရှစကားပြောဆိုသူအများစုနေထိုင်တဲ့အဆိုပါနယ်တွေကိုရုရှလက်ထဲပေးလိုက်ပြီဆိုပါစို့။ရုရှကလောဘသတ်ပါ့မလား။ပူတင်ဟာယခင်ဆိုဗီယက်ပြည်ထောင်စုအဖွဲ့ဝင်နိုင်ငံအားလုံးကိုပြန်စုစည်းချင်နေတာပါ။ဒါ့အပြင်ဘောလ်တစ်ကမ်းခြေမှာတသီးတခြားဖြစ်နေတဲ့ရုရှအစိတ်အပိုင်းကာလီနင်ဂရက်(Kaliningrad)နဲ့ရုရှပြည်မကြီးအကြားနယ်မြေတဆက်တစပ်တည်းရှိစေချင်နေတာပါ။ဒါ့ကြောင့်ဘောလ်တစ်နိုင်ငံငယ်လေးတွေရဲ့လုံခြုံရေးအတွက်အာမခံချက်ကင်းမဲ့စေတယ်။ပူတင်ရဲ့လုပ်ရပ်တွေဟာဒုတိယကမ္ဘာစစ်မတိုင်မီဟစ်တလာရဲ့လုပ်ရပ်တွေနဲ့တူနေပြီလို့သုံးသပ်ကြတယ်။ဥရောပထောက်လှမ်းရေးသတင်းတွေအရပူတင်ဟာဥရောပကိုတိုက်ခိုက်ဖို့ဆုံးဖြတ်ထားတယ်လို့ဆိုတယ်။
ဆွီဇာလန်နိုင်ငံကနိုင်ငံပေါင်း ၁၀၀ ကျော်ဖိတ်ကြားပြီးယူကရိန်းငြိမ်းချမ်းရေးအတွက်ဆွေးနွေးဖို့ပြင်ဆင်နေတယ်။ဒါပေမဲ့ရုရှကိုဖိတ်ကြားထားခြင်းမရှိပါဘူး။အဲဒီဆွေးနွေးပွဲကရရှိတဲ့သဘောတူညီချက်တခုကိုမှအသိအမှတ်ပြုမှာမဟုတ်ဘူးလို့ရုရှကကြိုကာထားတယ်။တရုပ်ကရုရှကိုပေါ်တင်ကူညီနေပါပြီ။အမေရိကန်ကတရုပ်ကိုအကျိုးဆက်ခံစားရမယ်လို့ပြင်းပြင်းထန်ထန်သတိပေးပေမဲ့"တရုပ်-ရုရှဆက်ဆံရေးကိုအမေရိကန်စွက်ဖက်ခွင့်မရှိဘူး"လို့တရုပ်ဘက်ကတုန့်ပြန်တယ်။တရုပ်-ရုရှ-အီရန်-မြောက်ကိုးရီးယား ၄ နိုင်ငံမဟာမိတ်ဖွဲ့စည်းမှုဟာဒုတိယကမ္ဘာစစ်ကြိုကာလတုန်းကမိစ္ဆာဝင်ရိုးတန်းမဟာမိတ်အဖွဲ့(ဂျာမနီ-အီတလီ-သြစတြီးယား-ဂျပန်)ကိုသတိရစေတယ်။ဥရောပနိုင်ငံအသီးသီးကလည်းလက်နက်စက်ရုံတွေအလျင်အမြန်ပြန်လည်တည်ဆောက်နေကြတယ်။ကမ္ဘာကြီးဟာသမိုင်းသင်ရိုးထဲကလက်နက်အပြိုင်တပ်ဆင်ခြင်းအဆင့်ကိုပြန်ရောက်နေပါပြီ။

11/04/2024

- Myanmar troops retreat to Thai border bridge after days of fighting.
- Junta troops withdraw from border town.
- Myanmar troops withdraw from border town following clashes.
- Ethnic Karen Rebels Complete Capture of Strategic Myanmar Border Crossing.

"မနေ့ည ၁၀ နာရီကမြဝတီကိုသိမ်းပိုက်လိုက်ပြီ"လို့ဖဒိုစောတောနီးက AFP သတင်းဌာနကိုပြောကြားလိုက်တာကိုကိုးကားပြီးနိုင်ငံတကာသတင်းဌာနများစွာကဖော်ပြနေကြတယ်။မြဝတီကိုစွန့်လွှတ်လိုက်ရတာဟာဖက်ဆစ်တပ်အတွက်နိုင်ငံရေးအရအကြီးအကျယ်အထိနာသွားတာပါ။တရုပ်နယ်စပ်ကုန်သွယ်ရေးဂိတ်တွေစွန့်လွှတ်ရတုန်းကထက်မြဝတီကိုစွန့်လွှတ်လိုက်ရတာကစစ်ကောင်စီအတွက်နိုင်ငံရေးသိက္ခာပိုကျစေခဲ့တယ်။ထိုင်းကသတင်းလွတ်လပ်ခွင့်ရှိတော့သတင်းဌာနတွေကဘက်မလိုက်ဘဲဝေဖန်သုံးသပ်ဖော်ပြကြတယ်။ပြီးတော့ထိုင်းမှာနိုင်ငံတကာသတင်းဌာနများစွာအခြေစိုက်ထားတော့သတင်းထောက်တွေနယ်စပ်အထိဆင်းပြီးမြဝတီသတင်းကိုအနီးကပ်စောင့်ကြည့်ကြတယ်။
နိုင်ငံတကာသတင်းထောက်တွေက"စစ်ကောင်စီဟာစစ်ပန်းနေပြီးတိုင်းပြည်ကိုထိန်းချုပ်နိုင်လောက်တဲ့အင်အားမရှိတော့ဘူး၊စစ်သည်တွေဟာဗိုလ်ချုပ်တွေအပေါ်အယုံအကြည်ကင်းမဲ့သွားကြပြီးတိုက်ပွဲဝင်စိတ်မရှိကြတော့ဘူး၊စိတ်ဓါတ်ကျနေကြပြီးအလွယ်တကူလက်နက်ချကြတယ်"လို့သုံးသပ်ဖော်ပြကြတယ်။နွေဦးတော်လှန်ရေးကို Tipping point ရောက်သွားပြီလို့ပညာရှင်တွေသုံးသပ်တာတနှစ်လောက်ရှိသွားပါပြီ။အခုတော့ Ending point ကိုကူးပြောင်းနေပါပြီ။ဗိုလ်ချုပ်ထွန်းမြတ်နိုင်က"အဆုံးအဖြတ်တိုက်ပွဲအတွက်ပြင်ဆင်ကြ"လို့ရခိုင်ပြည်သူတွေကိုတပ်လှန့်လိုက်တာကြည့်ခြင်းအားဖြင့် Ending point ဟာထင်သာမြင်သာရှိနေပါပြီ။

10/04/2024

“စစ်တပ်ဟာအချိန်နဲ့အမျှအရှက်တကွဲဆုံးရှုံးမှုတွေကြုံနေရတယ်၊ရှင်းရှင်းလေးပါ၊စစ်တပ်ရဲ့ဗဟိုချက်မမှာအကြီးအကျယ်ပုပ်သိုးဆွေးမြေ့နေပြီးအာဏာကိုထိန်းချုပ်နိုင်စွမ်းမရှိတော့ဘူး၊လောလောဆယ်တော့စစ်တပ်တခုလုံးဟာအာဖဂန်နစ္စတန်လိုလုံးလုံးကြီးပြိုကျသွားတာတော့မဟုတ်သေးဘူးပေါ့၊ဒါပေမဲ့ရှေ့လျှောက်ဘယ်အတိုင်းအတာအထိဆုံးရှုံးမလဲဆိုတာခန့်မှန်းလို့တောင်မရတော့ပါဘူး၊တပ်တွင်းမှာစိတ်ဓါတ်ကျကုန်ကြပြီ၊တပ်စခန်းတွေကျဆုံးမှုကြောင့်နေပြည်တော်ကိုနိုင်ငံရေးအရသက်ရောက်မှုများစွာရှိစေတယ်"လို့ကမ္ဘာတဝှမ်းရှိပဋိပက္ခများကိုခွဲခြမ်းစိတ်ဖြာမှုပြုလုပ်နေတဲ့ Crisis Group ရဲ့အကြံပေး Richard Horsey ကပြောတယ်။တပ်တွင်းအာဏာသိမ်းမှု၊မင်းအောင်လှိုင်ကိုလုပ်ကြံသတ်ဖြတ်မှုတွေဖြစ်လာနိုင်တယ်လို့သုံးသပ်ထားတယ်။

09/04/2024

"less hope and more fear"
မျက်မှောက်ခေတ်ကမ္ဘာ့အခြေအနေဟာမျှော်လင့်ချက်နည်းပါးပြီးကြောက်စရာပိုကောင်းနေပြီလို့ BlackRock ရင်းနှီးမြှပ်နှံမှုကုမ္ပဏီရဲ့စီအီးအို Larry Fink ကပြောခဲ့တယ်။ယူကရိန်းစစ်ပွဲအပြင်အစ္စရေး-ဟာမတ်စ်ပဋိပက္ခပါထပ်ဖြစ်လာတော့တောင်တရုပ်ပင်လယ်ကတရုပ်-ထိုင်ဝမ်အရေးဟာလည်းအချိန်မရွေးထပေါက်ကွဲနိုင်တယ်။ပီကင်းအိုလံပစ်နောက်ပိုင်းဖြစ်ရပ်အားလုံးဟာအစီအစဥ်တကျဖြစ်လာခဲ့တာပါ။
JPMorgen Chase ရဲ့အမှုဆောင်အရာရှိ Jamie Dimon (ပုံ)ကလည်းကမ္ဘာ့လက်ရှိအခြေအနေကိုစိုးရိမ်တကြီးသတိပေးလိုက်ပါတယ်။ကမ္ဘာကြီးဟာနှစ်ပေါင်းများစွာပိုမိုကောင်းမွန်တဲ့အနေအထားနဲ့ရွေ့လျားနေရာကနေပဋိပက္ခတွေ၊အကြပ်အတည်းတွေ၊ရန်စောင်နေတာနဲ့လက်တွေ့တိုက်နေတဲ့စစ်ပွဲ(cold and hot wars)တွေကြောင့်တကမ္ဘာလုံးရဲ့စီးပွါးရေးဟာအင်မတန်ဆိုးရွားတဲ့အခြေအနေတရပ်ဆီရောက်ရှိသွားတော့မယ်လို့သတိပေးလိုက်ပါတယ်။ဒီအမှုဆောင်အရာရှိကြီး ၂ ဦးစလုံးဟာဂုဏ်သိက္ခာအရအလွန်သြဇာကြီးမားသူတွေပါ။
သယံဇာတပေါကြွယ်ဝတဲ့ရုရှ၊အလွန်အမင်းစီးပွါးတိုးတက်လာတဲ့တရုပ်နဲ့အိန္ဒိယတို့ဟာအမေရိကန်ကြီးစိုးတဲ့လက်ရှိကမ္ဘာ့ဖြစ်စဥ်(World Order)ကိုလက်မခံချင်ကြတော့ပါဘူး။ကမ္ဘာ့အစီအစဥ်သစ်(New World Order)ကိုပြဌာန်းချင်ကြတယ်။လူအိုကြီး ၂ ယောက်ခွက်စောင်းခုတ်နေတဲ့အမေရိကန်နိုင်ငံရေးကိုဥရောပကလည်းစိတ်ကုန်နေပါပြီ။ထရမ့်ပ်သမတပြန်ဖြစ်လာမှာကိုတော့မဟာမိတ်အများစုကမလိုလားကြဘူး။ NATO ကနုတ်ထွက်မယ်လို့အကြိမ်ကြိမ်ခြိမ်းခြောက်ထားတဲ့ထရမ့်ပ်သာသမတပြန်ဖြစ်လာခဲ့ရင်အနောက်မဟာမိတ်တွေရဲ့လုံခြုံရေးစည်းပေါက်သွားနိုင်တယ်။အမေရိကန်တနိုင်ငံတည်းရပ်တည်ဖို့မဖြစ်နိုင်ဘူးလို့ပညာရှင်တွေသတိပေးနေပေမဲ့ထရမ့်ပ်ဘက်ကအကြိမ်ကြိမ်နှုတ်ကျွံခဲ့တယ်။
“လတ်တလောဖြစ်ရပ်တွေဟာဒုတိယကမ္ဘာစစ်ကတည်းကမတွေ့ရတော့တဲ့စွန့်စားခန်းတွေကိုဖန်တီးနိုင်ဖွယ်ရှိပါတယ်၊အဲဒါတွေကိုပေါ့ပေါ့တန်တန်သဘောမထားသင့်ပါဘူး၊ကျုပ်တို့ရဲ့အနာဂတ်လုံခြုံရေးဘယ်လိုဘယ်ပုံဖြစ်လာမယ်ဆိုတာမရေမရာတဲ့သမိုင်းအခိုက်အတန့်တခုကိုရောက်နေကြပါပြီ"လို့ Jamie Dimon ကစိုးရိမ်တကြီးသတိပေးတယ်။

05/04/2024

" NATO နဲ့ရုရှဟာစစ်အေးခေတ်ကိုပြန်ရောက်သွားပြီ"လို့ရုရှအစိုးရပြောခွင့်ရပုဂ္ဂိုလ် Dmitry Peskov ကပြောကြားခဲ့တဲ့စကားကိုခြိမ်းခြောက်မှုတခုအဖြစ်သုံးသပ်ကြတယ်။အထူးသဖြင့်အမေရိကန်နဲ့အနောက်နိုင်ငံတွေကယူကရိန်းကိုလက်နက်ခဲယမ်းကူညီနေတာတွေလက်တွန့်သွားစေချင်တာဖြစ်ပါလိမ့်မယ်။ရုရှဟာစစ်ပွဲကြီးတခုဆင်နွှဲဖို့ပြင်ဆင်နေပြီလို့အမေရိကန်တွေးခေါ်ပညာရှင်အဖွဲ့ (ISW) ကသတိပေးထားပါတယ်။ဒိန်းမတ်ကာကွယ်ရေးဝန်ကြီးကရုရှဟာဥရောပကိုလာမယ့် ၃ နှစ်နဲ့ ၅ နှစ်အတွင်းကျူးကျော်တိုက်ခိုက်လိမ့်မယ်လို့ပြောကြားခဲ့သလိုဂျာမနီကာကွယ်ရေးဝန်ကြီးကလည်းလာမယ့် ၅ နှစ်နဲ့ ၈ နှစ်အတွင်းတိုက်ခိုက်လာနိုင်ကြောင်းသတိပေးခဲ့တယ်။ပိုလန်သမတဒူဒါကတော့ ၂၀၂၆ ခုနှစ်ကျရင်ရုရှကဥရောပနိုင်ငံတွေကိုကျူးကျော်တိုက်ခိုက်လာလိမ့်မယ်လို့ဟောကိန်းထုတ်ထားတယ်။ဥရောပနိုင်ငံတွေဘာ့ကြောင့်ဒီလောက်စိုးရိမ်နေကြတာလဲ။
ဥရောပခေါင်းဆောင်တွေရဲ့အကဲဖြတ်ချက်နောက်ကွယ်မှာအမှန်တကယ်စိုးရိမ်လောက်တဲ့အခြေခံအကြောင်းတရားများစွာရှိနေတာပါ။ရုရှရဲ့ခြိမ်းခြောက်မှုပုံသဏ္ဍန်တွေဟာအချိန်နဲ့အမျှပိုမိုဆိုးရွားလာနေတာအမှန်ပါ။
၁။ ရုရှဟာစစ်အင်အားအကြီးအကျယ်တိုးချဲ့နေပြီးစစ်အသုံးစရိတ်ကို GDP ရဲ့ ၆% အထိသုံးစွဲနေတယ်။
၂။ တိုင်းပြည်ရဲ့စီးပွါးရေးကိုစစ်အတွင်းစီးပွါးရေးအသွင်ပြုပြင်ပြောင်းလဲခဲ့ပြီးအရပ်ဘက်ကုန်ထုတ်စက်ရုံတွေကိုစစ်လက်နက်ထုတ်လုပ်ရေးစက်ရုံတွေအဖြစ်ပြောင်းလဲ့ခဲ့တယ်။အခုဆိုရင်ရုရှရဲ့လက်နက်ခဲယမ်းထုတ်လုပ်နိုင်မှုဟာဥရောပထက်အဆပေါင်းများစွာသာလွန်သွားပါပြီ။အမြောက်ကျည်ထုတ်လုပ်မှုမှာဥရောပထက် ၅ ဆခန့်ပိုများပြီးအခြားလက်နက်ထုတ်လုပ်မှုများမှာလည်းအလားတူပိုများနေပါပြီ။ဥရောပရဲ့ကာကွယ်ရေးစက်မှုထုတ်ကုန်စွမ်းရည်ဟာပြတ်ကျန်နေခဲ့ပါပြီ။
၃။ ရုရှမီဒီယာတွေက NATO ကိုတိုင်းပြည်ရဲ့ရန်သူအဖြစ်အကြီးအကျယ်ပုံဖော်ဝါဒဖြန့်ပြီးရုရှပြည်သူတွေကိုအမုန်းတရားတွေစနစ်တကျရိုက်သွင်းထားတယ်။ဘော်လ်တစ်နိုင်ငံတွေကိုလည်းယူကရိန်းအရေးမှာတို့မီးရှို့မီးလုပ်နေသူတွေအဖြစ်ဝါဒဖြန့်ထားတယ်။ရုရှဟာယူကရိန်းစစ်ပွဲမှာအကြီးအကျယ်အကျအဆုံးများနေပေမဲ့စစ်သားစုဆောင်းရာမှာရုရှပြည်သူတွေရဲ့ပြင်းထန်တဲ့ဆန့်ကျင်မှုမျိုးမတွေ့ရသေးဘူး။
၄။ ယူကရိန်းစစ်ပွဲအပေါ်အမေရိကန်ရဲ့ထောက်ခံမှုမရေမရာဖြစ်နေတာကလည်းရုရှကိုပိုမိုအတင့်ရဲလာစေတယ်။သောကြာနေ့(၅-၄-၂၄)ကယူကရိန်းအတွက်အကူအညီပေးရေးအစီအစဉ်အပေါ် မဲပေးမှုရွှေ့ဆိုင်းလိုက်ကြောင်းရီပတ်ဘလီကန်အောက်လွှတ်တော်ဥက္ကဋ္ဌ Mike Johnson ကထပ်မံပြောကြားခဲ့တယ်။အမေရိကန်ရဲ့ယူကရိန်းအကူအညီဟာမသေချာမရေရာတော့ပါဘူး။ယူကရိန်းကိုဥရောပကပဲတာဝန်ယူရပါတော့မယ်။ယူကရိန်းကိုသာရုရှကနိုင်သွားခဲ့ရင်ရုရှကိုစိတ်ဓါတ်ခွန်အားမြှင့်တင်ပေးရာကျမှာဖြစ်ပြီးပိုမိုဆိုးရွားတဲ့ခြိမ်းခြောက်မှုအသစ်တွေရင်ဆိုင်ကြရပါတော့မယ်။
၅။ အမေရိကန်ဟာဥရောပရဲ့အရေးအရာတွေမှာဆက်လက်ပါဝင်ပတ်သက်ဖို့မသေချာတော့ပါဘူး။စစ်ဖြစ်လာခဲ့ရင်တောင်ဥရောပကိုအမေရိကန်စစ်သားတွေစေလွှတ်ဖို့မသေချာတော့ပါဘူး။ထရမ့်ပ်သာသမတပြန်ဖြစ်လာခဲ့ရင်အဖွဲ့ဝင်နိုင်ငံတိုင်းရဲ့မြေတလက်မချင်းကိုကာကွယ်ရမယ်လို့ပြဌာန်းထားတဲ့ NATO ရဲ့ Article 5 ကိုလေးစားလိုက်နာဖို့အာမခံချက်မရှိပါဘူး။ NATO စစ်မဟာမိတ်အဖွဲ့ရဲ့ကျောရိုးဖြစ်တဲ့အဆိုပါပြဌာန်းချက်ကိုမလိုက်နာတော့ဘူးဆိုရင်အဖွဲ့အစည်းလည်းဖရိုဖရဲဖြစ်သွားပါလိမ့်မယ်။အမေရိကန်သမတတယောက်ရဲ့ဆုံးဖြတ်ချက်ကိုအဖွဲ့ဝင်နိုင်ငံတွေကသံသယဖြစ်လာလို့ရှိရင်အဖွဲ့အစည်းပြိုကွဲပါလိမ့်မယ်။ဒီလိုအချိန်အခါကိုပူတင်ကစောင့်ဆိုင်းနေခဲ့တာပါ။ထရမ့်ပ်သာနိုင်ခဲ့ရင်ပူတင်မျှော်မှန်းတဲ့အနေအထားကိုရောက်သွားနိုင်တယ်။
ရုရှစစ်တပ်ဟာယူကရိန်းစစ်ပွဲ ၂ နှစ်တာအတွင်းမြေပြင်တိုက်ခိုက်ရေးအတွေ့အကြုံကောင်းကောင်းရရှိခဲ့တယ်။အနောက်နိုင်ငံတွေဘက်ကယူကရိန်းကိုထောက်ပံ့တာ‌လျော့ကျသွားလေလေ၊ရုရှရဲ့ခြိမ်းခြောက်မှုပိုတိုးလာလေလေဖြစ်ပါတော့မယ်။အမေရိကန်ရွေးကောက်ပွဲအပြီးပူတင်ရဲ့တွက်ချက်မှုအပြောင်းအလဲကိုမြင်ရပါလိမ့်မယ်။ဥရောပဟာမိမိရဲ့ကာကွယ်ရေးစွမ်းရည်ကိုမိမိကိုယ်တိုင်မြှင့်တင်မှရတော့မယ်လို့ Think Tank Europe ရဲ့အကြီးတန်းသုတေသီ Jacob Kaarsbo ကသုံးသပ်သတိပေးတယ်။ဥရောပဟာမရေရာတဲ့စစ်ကြိုခေတ်ကိုရောက်ရှိနေပါပြီ။

05/04/2024

ရုရှနိုင်ငံအရှေ့ပိုင်း Khabarovsk မြို့အနီးကမဟာဓါတ်အားပေးဓါတ်တိုင်တခုမှာဓါတ်ရောင်ခြည်သင့်တဲ့အရိပ်လက္ခဏာတွေ့ရှိခဲ့လို့နိုင်ငံတော်အရေးပေါ်အခြေအနေထုတ်ပြန်ကျေညာလိုက်ပါတယ်။အကြောင်းရင်းခံအသေးစိတ်မသိရသေးပါ။

05/04/2024

ရုရှနိုင်ငံ၊ Rostov ဒေသရှိ Morozovsk လေတပ်အခြေစိုက်စခန်းကိုယူကရိန်းကဒရုန်းအများအပြားနဲ့တပြိုင်နက်ဝင်ရောက်စီးနင်းတိုက်ခိုက်ခဲ့ပါတယ်။ Sukhoi (ပုံ)အမျိုးအစားဖိုက်တာဂျက် ၆ စင်းပေါက်ကွဲပျက်စီးသွားပြီး ၈ စင်းကတော့အသုံးပြုလို့မရတော့လောက်အောင်ထိခိုက်ပျက်စီးသွားကြောင်းမီဒီယာများစွာကဖော်ပြကြတယ်။အခုပျက်စီးသွားတဲ့ Sukhoi အမျိုးအစားဖိုက်တာဂျက်တွေဟာတစင်းကိုအမေရိကန်ဒေါ်လာ ၃၅ သန်းခန့်တန်ကြေးရှိတယ်။
အခုနောက်ပိုင်းယူကရိန်းစစ်တပ်ဟာရုရှပစ်မှတ်တွေကိုဒရုန်းအရေအတွက်အများအပြားနဲ့ဟန်ချက်ညီညီတပြိုင်နက်စုပြုံတိုက်ခိုက်နေတာပါ။အေအိုင်နည်းပညာသုံးဒရုန်းတွေဖြစ်လိမ့်မယ်လို့သုံးသပ်ကြတယ်။အနောက်နိုင်ငံတွေရဲ့နည်းပညာအကူအညီရရှိထားတဲ့ယူကရိန်းဟာကီလိုမီတာထောင်ချီပျံသန်းပြီးတိုက်ပွဲဝင်နိုင်တဲ့ဒရုန်းတွေကိုကိုယ်တိုင်ထုတ်လုပ်နိုင်နေပါပြီ။

04/04/2024

NATO တည်ထောင်ခြင်း ၇၅ နှစ်မြောက်နှစ်ပတ်လည်အခမ်းအနားကိုဘရပ်ဆဲလ်မှာကျင်းပနေတယ်။ယူကရိန်းစစ်ပွဲအပေါ်အမေရိကန်ပြည်ထောင်စုရဲ့ရပ်တည်ချက်ယိုင်နဲ့သွားပြီလို့အဖွဲ့ဝင်နိုင်ငံအများစုကယူဆကြတယ်။ NATO အထွေထွေအတွင်းရေးမှူးချုပ် Jens Stoltenberg က"ဥရောပဟာအမေရိကန်ပြည်ထောင်စုရဲ့လုံခြုံရေးအတွက်လိုအပ်ချက်တခုပါ၊ကျုပ်တို့အတူတကွရှိနေခြင်းကသာလုံခြုံမှုပိုရှိစေပါလိမ့်မယ်၊ဥရောပမဟာမိတ်များရဲ့ကမ္ဘာ့အဆင့်မီစစ်ရေး၊ထောက်လှမ်းရေးနဲ့သံတမန်ရေးသြဇာလွှမ်းမိုးမှုများကြောင့်အမေရိကန်ကိုတန်ခိုးသြဇာပိုမိုတိုးပွားစေပါတယ်"လို့သတိပေးပြောကြားသွားတယ်။အမေရိကန်ရွေးကောက်ပွဲမှာထရမ့်ပ်သာအနိုင်ရခဲ့ရင် NATO အဖွဲ့ဝင်ဥရောပနိုင်ငံတွေနဲ့အမေရိကန်အကြားသဘောထားကွဲလွဲမှုများစွာဖြစ်လာနိုင်ချေရှိလို့ကြိုတင်သတိပေးနေတာပါ။
အခုအခမ်းအနားမှာအက်စတိုးနီးယားနိုင်ငံခြားရေးဝန်ကြီးတင်သွင်းတဲ့အဆိုကိုသာအတည်ပြုနိုင်ခဲ့ရင်ရုရှအတွက်သတင်းကောင်းမဖြစ်လောက်ဘူး။အက်စတိုးနီးယားနိုင်ငံခြားရေးဝန်ကြီး Margus Tsahkna က" NATO အဖွဲ့ဝင်နိုင်ငံတိုင်းယူကရိန်းစစ်ပွဲအတွက်တိုင်းပြည် GDP ရဲ့ ၀.၂၅% ထည့်ဝင်ရမယ်"လို့အဆိုတင်သွင်းခဲ့တယ်။အဲဒီအဆိုသာလက်တွေ့ဖြစ်လာခဲ့ရင် NATO အဖွဲ့ဟာယူကရိန်းကိုအမေရိကန်ဒေါ်လာသန်းပေါင်း ၁၂၀ ဘီလီယံနှစ်စဥ်(ယူကရိန်းစစ်ပွဲမပြီးမချင်း)ထောက်ပံ့နိုင်ပါလိမ့်မယ်။ဒီငွေကြေးပမာဏနဲ့ဆိုရုရှကိုကောင်းကောင်းအံတုနိုင်ပါပြီ။မိတ်ဘက်ဧည့်သည်အဖြစ်တက်ရောက်လာတဲ့ယူကရိန်းနိုင်ငံခြားရေးဝန်ကြီးကတော့ပက်ထရော့လေကြောင်းကာဒုံးစနစ်လက်နက်နောက်ထပ် ၇ ခုလောက်အမြန်ဆုံးတပ်ဆင်ပေးဖို့တောင်းဆိုသွားတယ်။

03/04/2024

ရုရှလေတပ်မှာ Su-34 ဗုံးကြဲလေယာဥ် ၁၀၀ စင်း၊ Su-35 ဘက်စုံသုံးဖိုက်တာဂျက် ၁၀၀ စင်း၊ဝေဟင်ကြိုတင်သတိပေးခြင်းနဲ့လေကြောင်းပျံသန်းမှုထိန်းချုပ်ရေးရေဒါထောက်လှမ်းရေးယာဥ် (A-50U) ၇ စင်းရှိကြောင်းယူကရိန်းထောက်လှမ်းရေးဌာနရဲ့ ၂၀၂၄ ခုနှစ်၊မတ်လအစီရင်ခံစာမှာဖော်ပြထားတယ်။ A-50U ရေဒါထောက်လှမ်းရေးယာဥ် ၃ စင်းကတော့ပြုပြင်နေဆဲလို့မှတ်ချက်ပေးထားတယ်။

03/04/2024

NATO အဖွဲ့ရဲ့ ၇၅ နှစ်မြောက်အခမ်းအနားကိုမနက်ဖြန်(၄-၄-၂၄)ကျင်းပပါမယ်။ ၄-၄ ၁၉၄၉ ခုနှစ်မှာစတင်ဖွဲ့စည်းခဲ့တဲ့ NATO ဟာအခုဆိုရင်အဖွဲ့ဝင် ၃၂ နိုင်ငံရှိနေပါပြီ။ဒီအခမ်းအနားမှာယူကရိန်းကိုစစ်ရေးအကူအညီအမေရိကန်ဒေါ်လာသန်းပေါင်း ၁၀၀ ဘီလီယံပေးအပ်ဖို့ဆွေးနွေးကြပါလိမ့်မယ်။ဝါရှင်တန်မှာကျင်းပမယ့် NATO ညီလာခံမတိုင်မီကြိုတင်သဘောတူညီမှုရရှိအောင်လုပ်ကြပါလိမ့်မယ်။ NATO အထွေထွေအတွင်းရေးမှူးချုပ် Stoltenberg ကတော့ယူကရိန်းဟာအနာဂတ်မှာ NATO အဖွဲ့ဝင်နိုင်ငံဖြစ်လာဖို့သေချာပြီးလိုအပ်သမျှအကူအညီပေးရမယ်လို့ပြောသွားတယ်။
ယူကရိန်းကိုသန်းပေါင်း ၁၀၀ ဘီလီယံပေးမယ်သတင်းထွက်လာတာနဲ့ရုရှနိုင်ငံခြားရေးဌာနပြောခွင့်ရအမျိုးသမီး Maria Zakharova ကရုရှနဲ့ NATO အကြားစစ်အေးခေတ်ပြန်ရောက်သွားပြီလို့ဆိုတယ်။အမေရိကန်ရွေးကောက်ပွဲမှာထရမ့်ပ်အနိုင်ရရှိသွားခဲ့ရင်ယူကရိန်းကိုအကူအညီပေးရေးအခက်ကြုံလာနိုင်တာကို NATO အဖွဲ့ဝင်နိုင်ငံတွေကစိုးရိမ်ကြတယ်။ဒါ့ကြောင့်အမေရိကန်ရွေးကောက်ပွဲမတိုင်မီအမေရိကန်ဒေါ်လာသန်းပေါင်း ၁၀၀ ဘီလီယံကိုအတည်ပြုကြပါလိမ့်မယ်။

02/04/2024

ပြီးခဲ့တဲ့တော်လှန်ရေးနေ့စစ်ရေးပြအခမ်းအနားကိုရုရှလက်ထောက်ကာကွယ်ရေးဝန်ကြီး Alexander Fomin တက်ရောက်ခဲ့ပြီးရုရှကာကွယ်ရေးဝန်ကြီး Sergei Shoigu (ပုံ)ပေးပို့တဲ့အမိန့်ပြန်တမ်းအမှတ် ၇၇ ကိုဖတ်ကြားခဲ့တယ်။အဆိုပါအမိန့်ပြန်တမ်းအရမြန်မာအရာရှိအများအပြားကို"အပြည်ပြည်ဆိုင်ရာစစ်ရေးပူးပေါင်းဆောင်ရွက်မှုဖွံ့ဖြိုးတိုးတက်ရေးနဲ့တိုက်ပွဲဝင်ညီရင်းအကို"ဆုတံဆိပ်များပေးအပ်ခဲ့ပါတယ်။မြန်မာဘက်ကလည်းရုရှအရာရှိတွေကိုဆုတံဆိပ်များပေးအပ်ခဲ့တယ်။
ရုရှရဲ့အခုလိုပြုမူချက်ဟာမေးခွန်းထုတ်စရာဖြစ်လာနေကြောင်းတရုပ်အင်တာနက်နည်းပညာကုမ္ပဏီရဲ့အီးမေးလ်မှာမေးခွန်းထုတ်ဖော်ပြခဲ့တယ်။မြန်မာနိုင်ငံရဲ့လက်ရှိဝရုန်းသုန်းကားအခြေအနေကြောင့်စစ်ကောင်စီဟာတရုပ်နိုင်ငံအပါအဝင်နိုင်ငံများစွာနဲ့ဆက်ဆံရေးတင်းမာနေကြောင်း၊အခုလိုရုရှရဲ့ကြားဝင်လာမှုကြောင့်တရုပ်ကိုစိုးရိမ်ပူပန်မှုဖြစ်စေကြောင်းဖော်ပြထားတယ်။တဘက်နဲ့တဘက်ဆုတံဆိပ်တွေပေးအပ်ဖလှယ်ကြတဲ့အထိဆက်ဆံရေးတိုးမြှင့်ရလောက်အောင်ရုရှရဲ့ဒေသတွင်းကြားဝင်လာမှုဟာမေးခွန်းများစွာဖြစ်စေကြောင်းဖော်ပြထားတယ်။
နိုင်ငံတကာကပစ်ပယ်ထားတဲ့မြန်မာနဲ့နီးကပ်တဲ့ဆက်ဆံရေးတည်ဆောက်နေတာရုရှတနိုင်ငံတည်းသာရှိကြောင်း၊ဒါဟာတရုပ်အတွက်အံ့အားသင့်စရာဖြစ်ကြောင်းတရုပ်မီဒီယာတွေကလည်းဖော်ပြကြတယ်။ရုရှရဲ့အခုလိုအပြုအမူဟာတရုပ်-ရုရှ ၂ နိုင်ငံရဲ့ကျယ်ပြန့်တဲ့ပထဝီနိုင်ငံရေးအကျိုးစီးပွါးအတွက်ပြန်လည်သုံးသပ်စရာဖြစ်လာလိမ့်မယ်လို့ NetEase ကသုံးသပ်ဖော်ပြခဲ့တယ်။
ရုရှစစ်တပ်နဲ့မြန်မာအကြမ်းဖက်စစ်တပ်တို့ဟာယခုနှစ်အတွင်းပူးတွဲစစ်ဆင်ရေးပေါင်း(joint military cooperation activities) ၅၀ ကျော်ပြုလုပ်ဖို့စီစဉ်ထားကြောင်းရုရှကာကွယ်ရေးဝန်ကြီးဌာနကကျေညာခဲ့ပြီးသားပါ။အခုနောက်ပိုင်းမအလရဲ့ဒရုန်းစွမ်းရည်အလျင်အမြန်တိုးတက်လာနေတာကိုသတိပြုမိကြပါလိမ့်မယ်။ရုရှကနည်းပညာနဲ့လေ့ကျင့်မှုအကူအညီတွေပေးအပ်နေပြီလို့ယူဆရတယ်။မြန်မာစစ်ကောင်စီနဲ့ရုရှရဲ့နီးကပ်တဲ့ဆက်ဆံရေးကိုတရုပ်ဘက်ကလုံးဝမလိုလားကြောင်းထင်ရှားပါတယ်။တရုပ်မြန်မာနယ်စပ်မှာတရုပ်စစ်တပ်ကကျည်အစစ်နဲ့စစ်ရေးလေ့ကျင့်မှုမကြာခဏလုပ်လာနေတာဟာလည်းအကြောင်းမဲ့တော့မဟုတ်တန်ရာဘူး။
အခုလိုတရုပ်မီဒီယာတွေကပေါ်ပေါ်ထင်ထင်ဝေဖန်လာကြတာကြောင့်ရုရှဘက်ကအရှိန်သတ်သွားနိုင်ချေရှိပါတယ်။ယူကရိန်းစစ်ပွဲမှာတရုပ်ရဲ့ရပ်တည်မှုဟာရုရှအတွက်သေရေးရှင်ရေးပါ။

02/04/2024

ယူကရိန်းနယ်စပ်ကနေ ၁၂၀၀ ကီလိုမီတာအကွာအဝေးမှာရှိတဲ့ရုရှအရှေ့ပိုင်း Tatarstan ပြည်နယ်၊ Nizhnekamsk နဲ့ Yelabuga ရှိရေနံချက်စက်ရုံတွေကိုယူကရိန်းကဒရုန်းနဲ့တိုက်ခိုက်ခဲ့လို့အပျက်အစီးအဆုံးအရှုံးကြီးမားပြီးထိခိုက်ဒဏ်ရာရရှိသူများပြားကြောင်းသိရတယ်။အဆိုပါရေနံချက်စက်ရုံတွေကနေတနေ့ကိုရေနံစည်ပေါင်း ၃ သိန်း ၆ သောင်းကျော်ထုတ်လုပ်နေတာပါ။ကီလိုမီတာ ၁၂၀၀ ကျော်အကွာအဝေးအထိထိန်းချုပ်ပျံသန်းနိုင်တဲ့မောင်းသူမဲ့ဒရုန်းယာဥ်တွေကိုယူကရိန်းတို့ထုတ်လုပ်နိုင်ပြီဆိုတာသက်သေပြလိုက်တဲ့တိုက်ခိုက်မှုပါပဲ။
များမကြာမီကာလအတွင်းဒီဒရုန်းတွေနဲ့ရုရှရဲ့အရပ်ဘက်၊စစ်ဘက်ပစ်မှတ်တွေကိုတိုက်ခိုက်လာနိုင်ဖွယ်ရှိကြောင်းရုရှစစ်လော်ဘီတွေကစိုးရိမ်တကြီးသုံးသပ်ရေးသားကြတယ်။ကီလိုမီတာ ၁၂၀၀ ကျော်ပျံသန်းလာတာကိုကြားဖြတ်ဟန့်တားနိုင်ခြင်းမရှိတဲ့ရုရှရဲ့လေကြောင်းရန်ကာကွယ်ရေးစနစ်ကိုလည်းပြစ်တင်ဝေဖန်ကြတယ်။

https://twitter.com/i/status/1775060220038758796

02/04/2024

ဆီးရီးယားနိုင်ငံ၊ဒမတ်စကတ်ကအီရန်ကောင်စစ်ဝန်ရုံးဗုံးကြဲတိုက်ခိုက်ခံရပြီးအီရန်တော်လှန်ရေးအစောင့်တပ်မှူးဗိုလ်ချုပ်ကြီး Mohammed Reza Zahedi နဲ့ဗိုလ်မှူးချုပ် Mohammad Hadi Rahimi တို့သေဆုံးသွားတယ်။အစ္စရေးက F-35 တိုက်လေယာဥ်နဲ့ဗုံးကြဲတိုက်ခိုက်ခဲ့တာလို့အီရန်ကစွပ်စွဲလိုက်ပါတယ်။ဒီတိုက်ခိုက်မှုအတွက်အနောက်နိုင်ငံတွေမှာရှိတဲ့အစ္စရေးသံရုံးတွေကိုလက်တုန့်ပြန်တိုက်ခိုက်သွားမယ်လို့အီရန်ကကျေညာပါတယ်။အနောက်နိုင်ငံတွေရဲ့ထောက်ခံမှုကျဆင်းနေတဲ့အစ္စရေးဟာအီရန်ကိုစစ်ပွဲထဲဆွဲခေါ် ဖို့လုပ်နေပြီလားလို့သုံးသပ်ကြတယ်။
"ဆီးရီးယားနိုင်ငံရှိကောင်စစ်ဝန်ရုံးတိုက်ခိုက်မှုကိုတုံ့ပြန်သည့်အနေဖြင့်အီရန်ကအစ္စရေးကိုတိုက်ခိုက်ရန်ရွေးချယ်ပါကအမေရိကန်နှင့်အနောက်အုပ်စုတို့သည်ပဋိပက္ခတွင်ပါဝင်လာနိုင်သည့်အန္တရာယ်ရှိသည်၊အရှေ့အလယ်ပိုင်းသည်ထိန်းချုပ်၍မရနိုင်သောအခြေအနေသို့ရောက်ရှိသွားနိုင်သည်၊အရှေ့အလယ်ပိုင်းတွင်စစ်ပွဲကြီး(major war)စတင်လာနိုင်ပြီးထိန်းမနိုင်သိမ်းမရဖြစ်သွားနိုင်သည်"လို့ဒိန်းမတ်စစ်ရေးသုတေသီ Kristian Mouritzen ကလူမှုကွန်ယက်ပေါ်သတိပေးရေးသားထားတယ်။

Revolution News - Mindat

13/08/2024

12/04/2024

12/04/2024

11/04/2024

11/04/2024

11/04/2024

11/04/2024

10/04/2024

09/04/2024

05/04/2024

05/04/2024

05/04/2024

04/04/2024

03/04/2024

03/04/2024

02/04/2024

02/04/2024

02/04/2024

Address

Website

Alerts

Videos

အောက်ချင်းသွေး(CDF Mindatဂုဏ်ပြုတေး)

Shortcuts

Share