13/03/2026
ਵਿਹੜੇ ਦੇ ਬੁੱਝਦੇ ਚਿਰਾਗਾਂ ਵਿੱਚੋਂ ਇੱਕ ਹੋਰ ਚਿਰਾਗ
ਮੇਰੀ ਪਿਆਰੀ ਭੈਣ ਰਾਜ ਮੇਰੇ ਤਾਇਆ ਜੀ ਤੇ ਸਾਡੇ ਪਰਿਵਾਰ ਦੀ ਸਭ ਤੋਂ ਵੱਡੀ ਬੇਟੀ ਦਾ ਵਿਛੋੜੇ ਦੀ ਖ਼ਬਰ ਨੇ ਪਰਿਵਾਰ ਨੂੰ ਇੱਕ ਹੋਰ ਦੁੱਖ ਦਾ ਸਾਨੀ ਬਣਾ ਦਿੱਤਾ। 31 ਜਨਵਰੀ ਨੂੰ ਤਾਇਆ ਜੀ ਦੀ ਨੂੰਹ ਸਾਡੀ ਵੱਡੀ ਭਾਬੀ ਵੀ ਇਸ ਫ਼ਾਨੀ ਸੰਸਾਰ ਨੂੰ ਛੋਟੀ ਉਮਰੇ ਅਲਵਿਦਾ ਕਹਿ ਗਈ।
ਕੁਝ ਵਿਛੋੜੇ ਐਸੇ ਹੁੰਦੇ ਹਨ ਜੋ ਸਮੇਂ ਨਾਲ ਘੱਟ ਨਹੀਂ ਹੁੰਦੇ, ਸਗੋਂ ਯਾਦਾਂ ਦੇ ਰੂਪ ਵਿੱਚ ਹੋਰ ਡੂੰਘੇ ਹੋ ਜਾਂਦੇ ਹਨ। ਭੈਣ, ਤੇਰੀ ਹਾਸੀ, ਤੇਰਾ ਪਿਆਰ ਤੇ ਤੇਰੀ ਮਮਤਾ ਅੱਜ ਵੀ ਵਿਹੜੇ ਦੀਆਂ ਕੰਧਾਂ ਨਾਲ ਗੱਲਾਂ ਕਰਦੇ ਮਹਿਸੂਸ ਹੁੰਦੇ ਹਨ।
ਦੋ ਸਾਲ ਤਿੰਨ ਮਹੀਨਿਆਂ ਵਿੱਚ ਵੇਲੇ ਨੇ ਸਾਡੇ ਘਰ ਦੇ ਕਈ ਚਿਰਾਗ ਬੁਝਾ ਦਿੱਤੇ, ਪਰ ਸਭ ਦੀਆਂ ਯਾਦਾਂ ਅੱਜ ਵੀ ਸਾਡੇ ਦਿਲਾਂ ਦੇ ਅੰਦਰ ਇਕ ਰੌਸ਼ਨੀ ਵਾਂਗ ਜਗਦੀਆਂ ਹਨ।
ਵਾਹਿਗੁਰੂ ਅੱਗੇ ਇਹੀ ਅਰਦਾਸ ਹੈ ਕਿ ਵਾਹਿਗੁਰੂ ਤੈਨੂੰ ਆਪਣੇ ਚਰਨਾਂ ਵਿੱਚ ਨਿਵਾਸ ਬਖ਼ਸ਼ੇ ਅਤੇ ਸਮੁੱਚੇ ਪਰਿਵਾਰ ਨੂੰ ਤੇਰੇ ਵਿਛੋੜੇ ਦਾ ਦੁੱਖ ਸਹਿਣ ਦੀ ਹਿੰਮਤ ਬਖਸ਼ੇ।
ਵਿਹੜੇ ਦੇ ਬੁੱਝਦੇ ਚਿਰਾਗ
ਕਿਸਾਨ ਦਾ ਪੁੱਤ ਜਦ ਸ਼ਹੀਦ ਹੋਇਆ,
ਧਰਤੀ ਕੰਬੀ, ਅਸਮਾਨ ਵੀ ਰੋਇਆ ਹੋਣਾ।
“ਜੈ ਕਿਸਾਨ, ਜੈ ਜਵਾਨ” ਦੇ ਨਾਅਰੇ
ਪਿੰਡ ਦੀਆਂ ਗਲੀਆਂ ਵਿੱਚ ਆਪੇ ਗੂੰਜੇ ਹੋਣੇ।
ਨਾ ਕੋਈ ਸਲਾਮੀ, ਨਾ ਸਰੀਰ ਮਿਲਿਆ,
ਟਰੰਕਾਂ ਨੇ ਬਸ ਘਰ ਆ ਖਲੋਇਆ।
ਬਾਬਾ ਤੇ ਤਾਇਆ ਜਦ ਸ਼ਹੀਦ ਹੋਏ,
ਫ਼ਖ਼ਰ ਨਾਲ ਸੀਨੇ ਚੌੜੇ ਹੋ ਗਏ।
ਕਿਸਾਨ ਦੇ ਪੁੱਤ ਦੇਸ਼ ਲਈ ਕੁਰਬਾਨ ਹੋ ਗਏ,
ਖੇਤੀ ਕਰਨ ਵਾਲੇ ਉਹੀ ਪੁੱਤ
ਧਰਤੀ ਦੇ ਅਸਲ ਮਾਲਕ ਹੋ ਗਏ।
ਪਰ ਵਕਤ ਦਾ ਚੱਕਰ
ਕਈ ਵਾਰੀ ਐਸਾ ਵੀ ਘੁੰਮਦਾ
ਕਿ ਖੁਸ਼ੀਆਂ ਦੀ ਫ਼ਸਲ ਉੱਤੇ
ਗ਼ਮਾਂ ਦਾ ਹਨੇਰਾ ਆ ਪੈਂਦਾ।
ਦੋ ਸਾਲ ਤੇ ਤਿੰਨ ਮਹੀਨਿਆਂ ਵਿੱਚ
ਕਿਸਮਤ ਨੇ ਐਸਾ ਪਾਸਾ ਪਲਟਿਆ
ਕਿ ਘਰ ਦੇ ਚਾਰ ਜੀਅ
ਇੱਕ-ਇੱਕ ਕਰਕੇ ਜਹਾਨੋਂ ਤੁਰ ਗਏ।
ਘਰ ਦੇ ਚਿਰਾਗ
ਚੁੱਪਚਾਪ ਬੁੱਝਦੇ ਗਏ
ਨਾ ਕੋਈ ਰੋਲਾ ਪਿਆ ,
ਨਾ ਕੋਈ ਰੋਸ ਹੋਇਆ।
ਤਾਇਆ ਤੇ ਬੀਬੀ ਗਏ
ਵਿਹੜੇ ਦੀ ਰੌਣਕ ਨਾਲ ਲੈ ਗਏ।
ਘਰ ਦਾ ਵੱਡਾ ਬਣਿਆ ਵੀਰ
ਤੇ ਬਾਪੂ…
ਚਾਰ ਮਹੀਨਿਆਂ ਵਿੱਚ ਹੀ
ਸਾਡੇ ਸਿਰੋਂ ਸਾਇਆ ਚੁੱਕ ਲੈ ਗਏ।
ਚਾਚਾ ਤੇ ਭਤੀਜਾ
ਘਰ ਦਾ ਸਹਾਰਾ
ਘਰ ਦਾ ਸਾਇਆ
ਇੱਕੋ ਵਾਰ
ਵਿਹੜਾ ਸੁੰਨਾ ਕਰ ਗਏ।
ਸੰਨ ਛੱਬੀ ਜਦ ਚੜਿਆ,
ਵੱਡੀ ਭਾਬੀ ਵੀ
ਵੀਰ ਦੇ ਪਿੱਛੇ ਪਿੱਛੇ ਚੱਲ ਪਈ।
ਮਾਂ ਵਰਗੀ ਮਮਤਾ ਦੀ ਠੰਢਕ
ਘਰੋਂ ਹੌਲੀ ਹੌਲੀ
ਅਲੋਪ ਹੋ ਗਈ
ਜਿਵੇਂ ਸਵੇਰੇ ਦੀ ਓਸ
ਸੂਰਜ ਚੜ੍ਹਦੇ ਹੀ ਗਾਇਬ ਹੋ ਜਾਂਦੀ ਹੈ।
ਭਾਬੀ ਦੇ ਜਾਣ ਨਾਲ
ਪ੍ਰਹੁਣੇ ਲਈ ਵੀ
ਦੁੱਖ ਦਾ ਪਹਾੜ ਟੁੱਟ ਪਿਆ
ਸਹੁਰਿਆਂ ਦਾ ਉਹ ਘਰ
ਹੁਣ ਉਨ੍ਹਾਂ ਲਈ
ਸਦਾ ਲਈ ਸੁੰਨਾ ਹੋ ਗਿਆ।
ਡੇਢ ਮਹੀਨੇ ਬਾਅਦ
ਘਰ ਦੀ ਵੱਡੀ ਬੇਟੀ
ਭੈਣ ਰਾਜ ਵੀ
ਅਲਵਿਦਾ ਕਹਿ ਗਈ।
ਵਿਹੜੇ ਦੀ ਰੌਣਕ
ਨਾਲ ਹੀ ਲੈ ਗਈ
ਹੁਣ ਉਹ ਵਿਹੜਾ
ਸਿਰਫ਼ ਯਾਦਾਂ ਨਾਲ ਗੱਲਾਂ ਕਰਦਾ ਹੈ।
ਸਾਬੀ ਤਾਂ ਛੋਟਾ ਸੀ, ਜਲਾਵਤਨੀ ਹੋਇਆ
ਸਭ ਲਈ ਪਿਆਰਾ ਸੀ।
ਅੱਜ ਵੱਡਾ ਹੋ ਗਿਆ ਵੀਰ,
ਪਰ ਵੇਲੇ ਦੀ ਐਸੀ ਮਾਰ ਪਈ
ਕਿ ਉਹ ਆਪਣਿਆਂ ਨੂੰ
ਮੋਢਾ ਦੇਣੋਂ ਵੀ ਰਹਿ ਗਿਆ।
ਦੋ ਸਾਲ ਤਿੰਨ ਮਹੀਨਿਆਂ ਵਿੱਚ
ਚਾਰ ਮੌਤਾਂ ਨੇ ਪਰਿਵਾਰ ਆਣ ਘੇਰਿਆ
ਹੁਣ ਦਿਲ ਦੇ ਅੰਦਰੋਂ
ਇੱਕੋ ਅਰਦਾਸ ਨਿਕਲਦੀ ਹੈ
ਵਾਹਿਗੁਰੂ…
ਥੋੜ੍ਹਾ ਰੁਕ ਜਾ।
ਹੁਣ ਸਾਡੇ ਸਬਰ ਦੀ ਵੀ ਹੱਦ ਹੈ।
ਅਸੀਂ ਤੇਰੇ ਭਾਣੇ ਨੂੰ ਮੰਨ ਲਿਆ,
ਪਰ ਹੁਣ
ਸਾਡੇ ਦਿਲਾਂ ਉੱਤੇ ਵੀ
ਥੋੜ੍ਹਾ ਰਹਿਮ ਕਰ।
- ਸਾਬੀ ਬਨੂੜ 13 ਮਾਰਚ 2026
