16/11/2020
ਦੇਸ਼ ਦੇ ਮਹਾਨ ਸਪੂਤ, ਸਰਦਾਰ ਕਰਤਾਰ ਸਿੰਘ ਸਰਾਭਾ ਜੀ ਦਾ 16 ਨਵੰਬਰ ਨੂੰ ਸ਼ਹੀਦੀ ਦਿਵਸ ਹੈ । ਪੰਜਾਬੀ ਮਾਂ ਦਾ ਜਾਇਆ, ਕਰਤਾਰ ਸਿੰਘ ਸਰਾਭਾ ਹੋਰ ਪੜ੍ਹਾਈ ਕਰਨ ਲਈ ਅਮਰੀਕਾ ਗਏ ਅਤੇ ਉਥੇ 1913 ਵਿਚ ਗਦਰ ਲਹਿਰ ਦੇ ਸੰਪਰਕ ਵਿਚ ਆਏ। ਉਹ ਅਜਾਦੀ ਸਰਗਰਮੀਆਂ ਵਿਚ ਵਧ ਚੜਕੇ ਹਿੱਸਾ ਲੈਣ ਲੱਗੇ, ਅਤੇ ਪਹਿਲਾ ਵਿਸ਼ਵ ਯੁੱਧ ਛਿੜਨ ਤੇ ਉਹ 15 ਸਤੰਬਰ 1914 ਨੂੰ ਭਾਰਤ ਪਰਤੇ। ਇਥੇ ਵੀ ਆ ਕੇ ਉਹਨਾਂ ਨੇ ਅੰਗ੍ਰੇਜ਼ ਵਿਰੁੱਧ ਜਹਾਦ ਜਾਰੀ ਰੱਖਿਆ ਅਤੇ 2 ਮਾਰਚ 1915 ਨੂੰ ਹੋਰਨਾਂ ਬਾਗੀਆਂ ਸਮੇਤ ਸਰਗੋਧਾ ਵਿਖੇ ਪਕੜੇ ਗਏ। 16 ਨਵੰਬਰ 1915 ਨੂੰ ਸੈਂਟ੍ਰਲ ਜੇਲ ਲਾਹੌਰ ਵਿਖੇ ਸਵੇਰ ਵੇਲੇ ਉਹਨਾਂ ਨੂੰ ਉਹਨਾਂ ਦੇ ਸਾਥੀਆਂ ਸਹਿਤ ਫਾਂਸੀ ਲਗਾ ਦਿਤਾ ਗਿਆ। ਸ. ਕਰਤਾਰ ਸਿੰਘ ਸਰਾਭਾ ਨੇ 20 ਸਾਲ ਤੋਂ ਕੁਝ ਘੱਟ ਉਮਰੇ ਹੀ ਅਜਿਹਾ ਮਹਾਨ ਸਾਕਾ ਕੀਤਾ ਕਿ ਕੌਮ ਉਹਨਾਂ ਨੂੰ ਹਮੇਸ਼ਾ ਯਾਦ ਰਖੇਗੀ। ਉਹ ਸ਼ਹੀਦੇ-ਆਜ਼ਮ ਸ. ਭਗਤ ਸਿੰਘ ਦੇ ਰੋਲ ਮਾਡਲ ਵੀ ਸਨ। ਚੜਦੀ ਉਮਰੇ ਦੇਸ਼ ਤੋਂ ਆਪਾ ਵਾਰਨ ਵਾਲੇ ਇਸ ਮਹਾਨ ਯੋਧੇ ਨੂੰ, 'ਤੂਫਾਨਾਂ ਦੇ ਸ਼ਾਹ-ਅਸਵਾਰ ਨੂੰ', ਉਹਨਾਂ ਦੀ ਮਹਾਨ ਕੁਰਬਾਨੀ ਤੇ ਕੋਟਿ ਕੋਟਿ ਪ੍ਰਣਾਮ ਹੈ।