24/04/2021
നെടുമങ്ങാട്നെ വിറപ്പിച്ചു കൊവിഡ് . അരുവിക്കരയിലും ഉഴമലയ്ക്കലും 144 പ്രഖ്യാപിച്ചു.
നെടുമങ്ങാട് ജില്ലാ ആശുപത്രിയില് ഇന്നലെ മാത്രം 148 പോസിറ്റിവ് കേസുകള് റിപ്പോര്ട്ട് ചെയ്തു. അടിയന്തര സാഹചര്യം പരിഗണിച്ച് നിറുത്തിവച്ചിരുന്ന കൊവിഷീല്ഡ് വാക്സിനേഷന് ഇന്നലെ പുനരാംരംഭിച്ചു. മുന്കൂട്ടി രജിസ്റ്റര് ചെയ്തിട്ടുള്ളവര് ഉള്പ്പെടെ 150 പേര്ക്കാണ് ഒരുദിവസം പരമാവധി വാക്സിന് കുത്തിവയ്ക്കാന് കഴിയുന്നത്. മേയ് രണ്ടു വരെയുള്ള രജിസ്ട്രേഷന് പൂര്ത്തിയായി. ഒ.പിയില് ടോക്കണ് സംവിധാനം കൂടുതല് കാര്യക്ഷമമാക്കാന് നിര്ദേശം നല്കിയതായി സൂപ്രണ്ട് ഇന്-ചാര്ജ് ഡോ.മുഹമ്മദ് അഷ്റഫ് പറഞ്ഞു
ജില്ലാ ആശുപത്രിയുടെ കീഴില് നഗരസഭയിലും ഇതര തദ്ദേശ സെന്ററുകളിലും കൂടുതല് വാക്സിനേഷന് സെന്ററുകള് തുടങ്ങാനും നടപടി സ്വീകരിച്ചിട്ടുണ്ട്. രണ്ടു ദിവസത്തിനകം പുതിയ സെന്ററുകള് പ്രവര്ത്തനസജ്ജമാകും. മലയോര മേഖലയില് ഇതുവരെ റിപ്പോര്ട്ട് ചെയ്യപ്പെട്ട പോസിറ്റീവ് കേസുകള് രണ്ടായിരത്തിലധികമാണ്. കൂടുതല് രോഗികളുള്ള അരുവിക്കര, ഉഴമലയ്ക്കല് ഗ്രാമപഞ്ചായത്തുകളില് 144 പ്രഖ്യാപിച്ചു. പൊതുസ്ഥലങ്ങളില് അഞ്ച് പേരില് കൂടുതല് കൂട്ടം കൂടരുതെന്ന് നെടുമങ്ങാട് ഡിവൈ.എസ്.പി ഉമേഷ്കുമാര് അറിയിച്ചു. നെടുമങ്ങാട് സ്റ്റേഷന് പരിധിയിലെ പഴകുറ്റി, മാര്ക്കറ്റ് ജംഗ്ഷന്, വാളിക്കോട്, പനവൂര്, ആനാട് തുടങ്ങിയ കേന്ദ്രങ്ങളില് പൊലീസ് പിക്കറ്റിംഗ് ഏര്പ്പെടുത്തി. പ്രോട്ടോക്കോള് ലംഘനവുമായി ബന്ധപ്പെട്ട് 100 പേര്ക്കെതിരെ കേസെടുത്ത് അഞ്ഞൂറോളം പേരില് നിന്ന് പിഴ ഈടാക്കി. അനാവശ്യമായി വീടിന് പുറത്തിറങ്ങുന്നവര്ക്കെതിരെ ക്രിമിനല് കേസ് ചുമത്തുമെന്നും നെടുമങ്ങാട് പൊലീസ് ഇന്സ്പെക്ടര് വിനോദ്കുമാര് അറിയിച്ചു. നെടുമങ്ങാട് നഗരസഭ കാര്യാലയത്തിലും സന്ദര്ശകര്ക്ക് പ്രവേശനം ഉണ്ടായിരിക്കില്ലെന്ന് അധികൃതര് അറിയിച്ചു.
ജില്ലാ ആശുപത്രിയില് സന്ദര്ശകര്ക്ക് പ്രവേശനമില്ല
ജില്ലാ ആശുപത്രിയില് ഇനിയൊരു അറിയിപ്പ് ഉണ്ടാകുന്നതുവരെ സന്ദര്ശക പാസ് അനുവദിക്കില്ല. കൊവിഡ് വ്യാപനം മുന് നിറുത്തിയാണ് നടപടി. വാക്സിന് കുത്തിവയ്പിനും ആര്.ടി.പി.സി.ആര് ടെസ്റ്റിനുമല്ലാതെ സന്ദര്ശകര് ഒ.പിയില് വരേണ്ടതില്ലെന്ന് ഹോസ്പിറ്റല് മാനേജ്മെന്റ് കമ്മിറ്റി അറിയിച്ചു. ചികിത്സാ സംബന്ധമായ സംശയങ്ങള്ക്ക് ഡോക്ടര്മാരെ ഫോണില് ബന്ധപ്പെട്ടാല് മതിയാവും. പേ വാര്ഡിനു മുകളിലത്തെ നിലയിലാണ് കൊവിഡ് ഐസൊലേഷന് വാര്ഡ് സജ്ജീകരിച്ചിട്ടുള്ളത്. ഡോക്ടര്മാരെയും ജീവനക്കാരെയും നാല് ഷിഫ്റ്റുകളായാണ് നിയോഗിച്ചിട്ടുള്ളത്. ഒരു ജീവനക്കാരനെ നാല് മണിക്കൂറില് കൂടുതല് കൊവിഡ് ഡ്യൂട്ടിക്ക് നിയോഗിക്കാന് കഴിയില്ലെന്നും കൂടുതല് നഴ്സുമാരുടെ സേവനം ആവശ്യമാണെന്നും ആശുപത്രി അധികൃതര് വെളിപ്പെടുത്തി. വട്ടപ്പാറ മെഡിക്കല് കോളേജ് സെക്കന്ഡ് ലെവല് ട്രീറ്റ്മെന്റ് സെന്ററിലേക്കും വാളിക്കോട് റിംസ് ആശുപത്രിയിലെ ഫസ്റ്റ് ലെവല് സെന്ററിലേക്കും ഡോക്ടര്മാരും നഴ്സുമാരും അടങ്ങുന്ന സംഘത്തെ ജില്ലാ ആശുപത്രി നിയോഗിച്ചിട്ടുണ്ട്. എന്.ആര്.എച്ച്.എം മുഖേനെ അധിക ഡോക്ടര്മാരെയും മറ്റു ജീവനക്കാരെയും പ്രൈമറി, കമ്മ്യൂണിറ്റി സെന്ററുകളിലും ജില്ലാ ആശുപത്രിയിലും നിയമിക്കണമെന്നാണ് ആരോഗ്യ പ്രവര്ത്തകരുടെ ആവശ്യം.
ദീര്ഘദൂര ബസ് സര്വീസുകള് റദ്ദാക്കി
ഇന്നും നാളെയും കെ.എസ്.ആര്.ടി.സി നെടുമങ്ങാട് ഡിപ്പോയില് നിന്ന് ദീര്ഘദൂര സര്വീസുകള് ഉണ്ടായിരിക്കില്ല. സുല്ത്താന്ബത്തേരി, പാലക്കാട്, തൃശൂര്, അമൃത സൂപ്പര് ഫാസ്റ്റുകളാണ് റദ്ദാക്കിയത്. ബൈ റൂട്ടുകളില് 48 സര്വീസുകള് ഉണ്ടായിരുന്ന സ്ഥാനത്ത് 25 സര്വീസുകളേ ഉണ്ടാവു. ഇതര ബൈറൂട്ടുകളില് യാത്രക്കാരുടെ എണ്ണത്തിന്റെ അടിസ്ഥാനത്തിലായിരിക്കും ബസ് സര്വീസ് നടത്തുകയെന്ന് ഡിപ്പോ അധികൃതര് അറിയിച്ചു.
ഹെല്ത്ത് എന്ഫോഴ്സ്മെന്റ് സേഫ്ടി സ്ക്വാഡും ആര്.ടി.ഓയും നെടുമങ്ങാട് നഗരത്തിലെ വ്യാപാര സ്ഥാപനങ്ങളിലും യാത്രാബസുകളിലും ഇന്നലെയും പരിശോധന നടത്തി. ബസുകളില് യാത്രക്കാര്ക്ക് ബോധവത്കരണ ക്ളാസുകളും സംഘടിപ്പിച്ചു. ഓട്ടോറിക്ഷാ സ്റ്റാന്ഡുകളില് മാസ്ക്, സാനിറ്റൈസര് പരിശോധന ഊര്ജിതപ്പെടുത്തി. സ്ക്വാഡ് ഇന്സ്പെക്ടര് കിരണ് പരിശോധനയ്ക്ക് മേല്നോട്ടം വഹിച്ചു.
നഗരസഭയില് ഹെല്പ്പ്ഡെസ്ക്
കൊവിഡ് പ്രതിരോധ പ്രവര്ത്തനങ്ങള് ഏകോപിപ്പിക്കാന് നെടുമങ്ങാട് നഗരസഭയില് ഹെല്പ്പ് ഡെസ്ക് പ്രവര്ത്തനം തുടങ്ങി. അടിയന്തര നഗരസഭാ കൗണ്സില് യോഗം ചേര്ന്നാണ് നടപടികള് സ്വീകരിച്ചത്. ഫോണ്: 9207891592, 8921548289, 7025334815, 9745350424.