Zrumbesh Broadcasting Corporation is an autonomous body of BNM (Baloch National Movement : https://
سبی ٹی پاکستانی لشکر نا لاری آ بمب جلہو
*جمعہ، 24 نومبر 2023 ریڈیو زرمبش براہوئی*
سبی ٹی نا درست بندغ آک زوراک آ پاکستانی لشکر نا دیر دروکا لاری ئے شورہ تیٹ نشانہ کریر۔
حوالکار نا رد ئٹ بمب جلہو سبی نا ہند لہڑی ٹی مس، جلہو ئٹی پاکستانی لشکر ئے جانی نسخان رسینگ نا حال ارے۔
جلہو آن پد پولیس و ایلو لشکری کارندہ آک ہیب کھیب ئنا کسر تے تفِسا پٹ ءَ پول کننگ ءُ۔
جلہو نا ذمہ واری ئے داسکان ہچو تنظیم ئس ہرفتنے۔
سی ٹی ڈی نا دروغ ئنا مقابلہ ٹی خلّنگوک چارمی بندغ نا پجار مس
*جمعہ ، 24 نومبر 2023 ، ریڈیو زرمبش براہوئی*
https://zrumbesh.com/barahouee/post/entry/Fake-encounter.-24-11-2023
سی ٹی ڈی نا دروغ ئنا مقابلہ ٹی خلّنگوک چارمی بندغ نا پجار مس۔
چار می جون ئنا پجار پَنجگُور نا تولوک ودود ولد مبارک نا پن ئٹ مسُنے ہرانا جون پنجگور آ دننگ مننگ ءِ۔
یاتی مرے کہ دروغ ئنا مقابلہ ٹی خلنگوک کھل بندغ آتا پجار مسُنے ہرافتے جتا جتا وخت آتیٹی بیگواہ کننگانے۔
تربت: سی ٹی ڈی نا دروغ ئنا مقابلہ ٹی خلنگوک اسِہ پین جون ئسے نا پجار مس
*جمعہ، 24 نومبر 2023 ریڈیو زرمبش براہوئی*
https://zrumbesh.com/barahouee/post/entry/Fake-encounter-24-11-2023
سی ڈی ٹی نا دروغ ئنا مقابلہ ٹی خلنگوک پین اسہ بندغ ئس شکور بلوچ نا پن ئٹ چاننگا۔
شکور بلوچ ئے 25 جون آ تمپ آن پاکستانی لشکر بیگواہ کریس ئس۔
یاتی مرے کہ سی ٹی ڈی درو چار بندغ نا جون آتے ٹیچنگ اسپتال تربت آ ہیس و دعویٰ کرے کہ دا بندغ آک بانک چڑھائی پسنی کسر آ شام ئنا مقابلہ ئسیٹی خلنگانو۔
یاتی مرے کہ داکان مُست اِرا جون ئنا پجار مس ئس ہرافتے جتا جتا وخت آتیٹی بیگواہ کننگاس ئس۔
ہیرونک ئٹی پاکستانی لشکر نا کیمپ آ جلہو
*جمعہ، 24 نومبر 2023 ریڈیو زرمبش براہوئی*
بلوچستان نا ضلع کیچ ئٹی نا درست سلاہ بند بندغ آک پاکستانی لشکر نا کیمپ ئے جلہو ئٹی نشانہ کریر۔
حوال آتا رد ئٹ نا دُرست سلاہ بند بندغ آک ہیرونک ئٹی پاکستانی لشکر نا کیمپ آ جتا جتا سلاہ تیٹ جلہو کریر، ہندُن گُمان ءِ کہ پاکستانی لشکر ئے جانی و مالی نسخان ہرفوئی تمانے۔
لشکری کالخواہ آک دا رد ئٹ داسکان ہچ پاتنو۔
یاتی مرے کہ بلوچستان ئٹی پاکستانی لشکر و اونا کُمکار آتا زی آ مروکا جلہو تا ذمہ واری تے بلوچ آجوئی خواہوک سلاہ بند تنظیم آک ہرفسا بسنو ولے دا جلہو نا بارو ئٹ دائسکان ہچو تنظیم ئسینا درشان ئس مونا بتنے۔
نوشکی : پولیس نا دُو آن زالبول نا کوش ، برانزیک بھلا کسر ئے تفیر
جمعہ ، 24 نومبر 2023 ، ریڈیو زرمبش براہوئی
حوال آتا رد ئٹ درو کلی قادر آباد ئٹی اسہ اشتہاری ملزم ئسینا دزگیری نا وخت سُمکاری آن اسہ زالبول ئس بیران مس، ہرانا خاوت جون ئے آر سی ڈی کسر آ تِخِسا شال تفتان بھلا کسر ئے برانز کرِسا بند کریر۔
بلوچستان نیشنل پارٹی نا ضلعی صدر حاجی میر بہادر خان مینگل ، سینٹرل کمیٹی نا باسک میر خورشید جمالدینی و ایلو باسک آک برانز ئٹی تُد اسُر۔
خلِنگوکا بالاچ ئے 21 نومبر آ بارودی مواد نا مقدمہ ٹی عدالت نا مونا ہتنگاسَس، وکیل
*جمعہ، 24 نومبر 2023 ریڈیو زرمبش براہوئی*
سی ٹی ڈی نا دروغ ئنا مقابلہ ٹی خلنگوکا بالاچ ولد مولا بخش و ایلو مُسہ ورنا نا خلنگ نا دعویٰ ئے دروغ ئس پارِسا کیچ بار ایسوسی ایشن نا صدر رستم جان گچکی و ایڈوکیٹ جاڑین بلوچ دا تدینی ئے سخت انگا لوز آتیٹی شیف خلکُر و پولیس آ خاؤت نا خواست ئے ہرفنگ کن زور شاغار۔
ایڈوکیٹ جاڑین بلوچ پارے کہ 29 اکتوبر آ دزگیر مروکا بالاچ بلوچ نا زی آ 20 نومبر آ 5000 گرام بارودی مواد نا مقدمہ خلنگا و 21 نومبر آ اودے اینٹی ٹیررسٹ کورٹ جج ئنا مونا ہتیسا سی ٹی ڈی دہ دے ئنا ریمانڈ ہلک۔
ایڈوکیٹ نا رد ئٹ بالاچ بلوچ نا ضمانت ئے ہم تیار کریسُن ولے حال تننگا کہ اودے ایلو ورنا تیتون اوار شہید کرینو۔
کیچ بار ایسوسی ایشن نا صدر رستم جان گچکی پارے کہ دا تدینی قابل مذمت ءِ، او پولیس آ زور شاغا کہ خاؤت نا خواست ئے ہرفسا سی ٹی ڈی نا بر خلاف ایف آئی آر نوشتہ کے۔
او کیچ بار ایسوسی ایشن نا نیمہ آن خاؤت ئے تیبہ کُمک نا باور کریفے۔
سبدان و تربت جلہو تا ذمہ واری ئے ہرفنہ۔ بی ایل اے
*جمعہ 24 نومبر 2023 ریڈیو زرمبش براہوئی*
https://zrumbesh.com/barahouee/post/entry/BLA-%E2%80%A6.24-11-2023
بلوچ لبریشن آرمی نا سرمچار آک سبدان و تربت ئٹی جلہو کرِسہ قوضہ گیر لشکر نا پنچ کارندہ ٹپی کریر۔
بلوچ لبریشن آرمی نا سرمچار آک سبدان ئٹی قوضہ گیر پاکستانی لشکر نا کیمپ آ گرنیڈ لانچر ئٹ بھاز گولہ خلکُر ، ہرافتا ترخنگ آن کم آن کم مسہ دشمن کارندہ ٹپی مسُر۔
اسہ پین کاروائی سیٹی سرمچار آک تربت نا عیلاقہ سلالہ بازار ئٹی غلام نبی پمپ نا ہند آ منہ دے مھالو جوڑ مروک پاکستانی لشکر نا اسہ چیک پوسٹ ئسے چغلی بمب ئٹ ٹک کریر، دا جلہو ئٹی کم آن کم ارا دشمن کارندہ ٹپی مس۔
بلوچ لبریشن آرمی دا تومکا جلہو تا ذمہ واری ئے ہرفک و دا جلہو آک قوضہ گیر لشکر نا تیبہ بلوچستان آن پیشتمنگ اسکان برجاء مرور ۔
جیئند بلوچ
جارکش بلوچ لبریشن آرمی
تربت پولیس سی ٹی ڈی نا برخلاف بالاچ نا خلنگ نا مقدمہ ئے درج کننگ آن نمَنّ کرے
*جمعہ 24 نومبر 2023 ریڈیو زرمبش براہوئی*
بلوچستان نا ضلع کیچ ئنا بھلا شار تربت ئٹی دَرو سی ٹی ڈی نا دروغ ئنا مقابلہ ٹی مسہ پین بندغ تون اوار خلنگوکا بالاچ بلوچ نا خلنگ نا مقدمہ ئے پولیس درج کننگ آن نمن کرے۔
بالاچ نا خاہوت میت تون اوار شہیدا فدا احمد چوک آ توسُنے ہراڑے سیاسی و چاگڑدی تنظیم آتا کیہی باسک آک بسُنو ساڑی ءُ۔
مند گوک ئٹی قوضہ گیر دشمن آ جلہو نا زمہ واری ئے ہرفنہ ۔ بی ایل ایف
*جمعہ، 24 نومبر 2023 ریڈیو زرمبش براہوئی*
بلوچستان لبریشن فرنٹ نا سرمچار آک مند ئنا عیلاقہ گوک ئٹی پنچ شمبے نا شام ہفت بجہ آ قوضہ گیر آ ریاستی فورسز ئے جلہو ئٹی ٹک کریر ۔
سرمچار آک دشمن فورسز نا گوک ئٹی داد محمد نا مشین آ جوڑ مروک آ چوکی نا خڑک آ ہنِسہ پوسکنا و بھلا سلاہ تیٹ جلہو کریر ۔ جلہو ہرُے اسکان برجاء مس و دشمن نا اسہ کارندہ ئس کھسک و ارٹ ٹپی مس ۔
جلہو آن پد بھیم ئنا گواچی مروک آ فورسز لس آبادی آ تینا مون سُمکاری کرے و گولہ خلک ۔
بلوچستان لبریشن فرنٹ دا جلہو نا زمہ واری ئے ہرفک ۔ بلوچستان نا آجوئی اسکان قوضہ گیر آ لشکر و اونا کمک کار آتے آ جلہوک برجاء مرور ۔
میجر گہرام بلوچ
جارکش بلوچستان لبریشن فرنٹ
https://zrumbesh.com/barahouee/post/entry/BLF..24-11-2023
ہرنائی نا ہند گنداکین ئٹی پاکستانی لشکر آ جلہو کرسا مُسہ کارندہ خلکُن و مُسٹ ٹپی کرین۔ بی ایل اے
*جمعہ، 24 نومبر 2023 ریڈیو زرمبش براہوئی*
بی ایل اے نا جارکش آزاد بلوچ تینا شنگ کروک درشان ئٹی پارے کہ 22 نومبر شام ئنا پنچ بجہ آ ننا سرمچار آک ہرنائی نا ہند گنداگین ئٹی ٹرین پٹری نا جوڑ مننگ نا وخت آ سیکیورٹی تِروکا پاکستانی لشکر آ جلہو کریر۔
جلہو ئٹی پاکستانی لشکر نا مُسہ کارندہ خلنگار و مُسٹ ٹپی مسُر۔
او مونی پارے کہ ہندا ہند آ 05 نومبر آ ننا سرمچار آک ہرنائی آن سبی آ ہنوکا ٹرین ئے ریموٹ کنٹرول بمب جلہو ئٹی نشانہ کریسُر ہراٹی ٹرین نا اِرا بوگی پٹری تون اوار بھُس مس ئس۔ ہندا ریلوے لائن دشمن لشکر کن ٹرانسپورٹ ئسینا حساب ئٹ کارمرز مریک۔ ٹرین آ جلہو آن پد قوضہ گیر لشکر نا بھلُّنی ٹی دا پٹری ئے جوڑ کننگ اسُر کہ ہمو وخت ننا سرمچار آک لشکر ئے ٹک کریر۔
او ایسر ئٹ پارے کہ ننا دا جلہو آک قوضہ مروک بلوچستان نا آجوئی اسکان برجاء مرور۔
https://zrumbesh.com/barahouee/post/entry/BLA-24-11-2023
بلوچ مسنگ پرسنز آتے دہُن دروغ نا مقابلہ آتیٹی خلنگ بھلو ویل ئسے۔ وائس فار مسنگ پرسنز آف سندھ
*پنچ شمبے 23 نومبر 2023 ریڈیو زرمبش براہوئی*
کراچی : وائس فار مسنگ پرسنز آف سندھ ئنا چیئرپرسن سورٹھ لوہار اسہ درشان ئسے ٹی پارے کہ پاکستانی لشکر نا نیمہ غان بلوچستان ئٹی بلوچ مسنز پرسنز آتے دروغ نا مقابلہ آتیٹی خلِسہ بٹنگ ویل ئسے ۔ ہندا تو ئٹی جتا جتائنگا جاگہ غاتا 12 آن زیات زوراکی ئٹ بےگواہ او بلوچ خلنگ و بٹنگ مسُنے۔
چیئرپرسن پارے کہ پاکستانی لشکر سندھ و بلوچستان ئٹی بلوچ و سندھی تا نسل کشی ئے کننگے ۔
اقوامِ متحدہ تون اوار عالمی جہان نا کُل انسانی حق آتا ادارہ تے آن خواست کینہ کہ او بلوچستان ئٹی پاکستانی فورسز نا نیمہ غان بلوچ مسنگ پرسنز آتا برجاء قتل و کوش آ سختی ئٹ نوٹس ہلِسہ رد عمل نشان ایتر ۔
او اعلان کرینے کہ نن بلوچ آتا قتل و کوش آ برانز کرون۔
سیف اللہ رودینی نا زوراکی ئٹ بیگوائی نا برخلاف سوشل میڈیا آ کیمپین ئس اڈ تننگا
پنچ شمبے ، 23 نومبر 2023 ، ریڈیو زرمبش براہوئی
بلوچ وائس فار جسٹس و زوراکی ئٹ بیگواہ سیف اللہ رودینی نا خاوت نا نیمہ آن سوشل میڈیا ایکس آ اسہ کیمپین ئس اڈ تننگا ۔ دا کیمپین سوراب بلوچستان نا تولوک سیف اللہ رودینی نا زوراکی ئٹ بیگوائی ئے دہ سال مننگ آ اڈ تننگا ۔
سیف اللہ رودینی ئے 22 نومبر 2013 ٹی زوراکی ئٹ بیگواہ کننگاس ئس ، ہرا محکمہ پولیس نا ملازم ئس اسّک۔
کیمپین ئٹی بھاز آ سیاسی و سماجی گَل و پارٹی تا رہنما و کارکُن ، انسانی حق آتا کارکُن ، سوشل میڈیا ایکٹیوسٹ آتون اوار وکیل و صحافیک بخش ارفیر۔
و اوفک زوراکی ئٹ بیگواہ آ سیف اللہ رودینی تون اوار کُل بیگواہ آ بندغ تا آجوئی نا خواست و بیگواہ آ بندغ آتا دروغ ئنا مقابلہ آتیٹی خلنّگ نا سلسلہ ئے بند کننگ نا خواست کریر۔
تربت ئٹی پاکستانی لشکر نا چوکی آ دستی بمب جلہو
*پنچ شمبے، 23 نومبر 2023 ریڈیو زرمبش براہوئی*
ضلع کیچ ئنا ہند تربت ئٹی پاکستانی لشکر نا چوکی آ نادُرست بندغ آک دستی بمب ئٹ جلہو کریر۔
حوال آتا رد ئٹ استو تربت نا ہند سلالہ آباد، غلام نبی بازار ئٹی نادُرست بندغ آک پاکستانی لشکر ایف سی نا پوسکُن جوڑ مروکا چوکی آ دستی بمب ئٹ جلہو کریر۔
جلہو ئٹی پاکستانی لشکر ئے جانی نسخان رسینگ نا حوال ارے۔
یاتی مرے کہ بلوچستان ئٹی پاکستانی لشکر آ مروکا جلہو تا ذمہ واری تے بلوچ آجوئی خواہوک سلاہ بند تنظیم آک ہرفسا بسنو ولہ دا جلہو نا ذمہ واری ئے داسکان ہچو تنظیم ئس ہرفتنے۔
تربت ئٹی سی ٹی ڈی نا دروغ ئنا مقابلہ ٹی خلنگوک پین بندغ ئسینا ہم پجار مس
*پنچ شمبے، 23 نومبر 2023 ریڈیو زرمبش براہوئی*
کیچ: تربت ئٹی سی ٹی ڈی نا دروغ ئنا مقابلہ ٹی خلنگوکا چار بندغ آن پین اسٹ نا ہم پجار مسُنے۔
حوالکار نا رد ئٹ خلنگوکا بندغ نا پجار سیف ولد امیت تربت آپسر نا ہندی نا پن ئٹ مس، ہرادے زوراک آ پاکستانی لشکر 01 اگست آ آپسر ئٹی دُکان آن دزگیر کرسا بیگواہ کریس ئس۔
استو سی ٹی نا دو آن خلنگوکا چار انگا بندغ آتیٹی ایلو نا پجار بالاچ ولد مولا بخش نا پن ئٹ مس ئس، اونا خاؤت جون ئے شہید فدا چوک آ تِخِسہ برانز کننگ ءِ۔
گیشکور ئٹی پاکستانی لشکر اِرا بندغ ئے بیگواہ کرینے
*پنچ شمبے، 23 نومبر 2023 ریڈیو زرمبش براہوئی*
آواران نا ہند گیشکور ئٹی زوراک آ پاکستانی لشکر جلہو کرسا اِرا بندغ ئے دزگیر کننگ آن پد بیگواہی نا گواچی کرینے۔
زوراکی ئٹ بیگواہ مروکا بندغ آتا پجار شاہ نواز ولد ناگمان و ساجد ولد زباد زیک گیشکور نا ہندی نا پِن تے ئٹ مس ہرافتے پاکستانی لشکر اوفتا اُرا تا چھاپہ خلنگ آن پد بیگواہ کرینے۔
سی ٹی ڈی نا دو آن خلنگوکا بالاچ نا خاؤت شہید فدا چوک تربت آ بالاچ نا جون ئے تِخِسہ برانز کننگ ءِ
*پنچ شمبے، 23 نومبر 2023 ریڈیو زرمبش براہوئی*
کیچ ئنا بھلا شہر تربت ئٹی اینو سی ٹی ڈی چار جون ئے ہسپتال آ ہیس و پارے کہ مون پہ مونی جنگ ئٹی خلنگانو ولہ ہندا جون تیان اسٹ نا پجار مسُنے ہرا پاکستانی لشکر نا دو آن بیگواہ مروکا بالاچ ولد مولا بخش نا پن ئٹ چاننگانے۔ بالاچ نا خاؤت بالاچ نا جون ئے درُست کننگ آن پد جون ئے شہید فدا چوک تربت تِخِسہ برانز کننگ ءِ۔
خاؤت نا رد ئٹ بالاچ ئے سی ٹی ڈی اِرا دے مُست عدالت نا مونا ہتیسا اِرا دے پٹ ءَ پول نا خواست کریس ئس ولے اینو چار بندغ تون اوار اودے خلکُنے۔
بالاچ نا خاوت پاننگ ءِ تانکہ ننے انصاف تننگتنے نن برانز آ تولوکُن۔
تجابان: پاکستانی لشکر نا دو آن اسہ بندغ ئس بیگواہ
*پنچ شمبے، 23 نومبر 2023 ریڈیو زرمبش براہوئی*
کیچ: تجابان ئٹی زوراک آ پاکستانی لشکر وقار پنی او بندغ ئسے دزگیری آن پد بیگواہ کرے۔
حوال آتا رد ئٹ وقار ولد نصیب کیچ ئنا ہند گورکوپ نا ہندی ئسے۔
پاننگ مننگ ءِ کہ وقار پاکستانی لشکر نا لشکر کشی تے آن 2018 ٹی ہمپنگ آ مجبور مس ئس۔
وقار ئے زوراک آ پاکستانی لشکر و ڈھکوک ادارہ آتا کارندہ آک درو ویگ ئنا تجابان آن دزگیر کرسا بیگواہی نا گواچی کریسُر ہرا داسکا ہچو حال ئس اف۔
تربت: سی ٹی ڈی نا دروغ ئنا مقابلہ، چار بندغ نا جون آتے اسپتال آ ہیس، اسٹ نا پجار مسّ
*پنچ شمبے، 23 نومبر 2023 ریڈیو زرمبش براہوئی*
تربت پولیس نا رد ئٹ سی ٹی ڈی اینو سہب ئنا چار بندغ نا جون آتے ٹیچنگ اسپتال تربت آ ہیس و دا دعویٰ کرے کہ دا بندغ آک بانک چڑھائی پسنی آ مقابلہ سیٹی خلنگانو۔
چار جون آتیان اسٹ نا پجار مُست آن بیگواہ مروک بندغ ئسینا دروشم ئٹ مس ہرانا پِن بالاچ ولد مولا بخش ءِ و او تربت آبسر نا ہندی ئسے۔
دا ورنا ئے 29 اکتوبر 2023 نا شام ئنا یک بجہ آ پاکستانی لشکر و اونا ڈھکوک ادارہ آتا کارندہ آک زوراکی ئٹ بیگواہ کریسُر۔
بالاچ بھاز غریب او خاؤت ئسیان تعلق تخک و اسٹار پلس مارکیٹ تربت ئٹی کشیدہ کاری نا کاریم کرسا تینا اُرا ئے سمبھالاکہ۔ 21 نومبر آ جوڈیشل مجسٹریٹ نا مونا اونا زی آ خلنگوکا دوبہ آتا رد ئٹ پیشی اسک و اودے عدالت دہ دے ئنا جسمانی ریمانڈ تس ئس، سینئیر وکیل جاڈین دشتی اونا وکیل اسک۔
سی ٹی ڈی نا نیمہ آن دا ہم دعویٰ کننگانے کہ خلنگوکا بندغ آک سلاہ بند اسُر اوفتے خلنگ آن پد اوفتے آن بھلو کچ ئسیٹی سلاہ و شورہ دو تمّانے۔
یاتی مرے کہ بلوچستان ئٹی سی ٹی ڈی نا نیمہ آن جتا جتا وخت آتیٹی دروغ ئنا مقابلہ تیٹی سلاہ بند بندغ آتے خلنگ نا دعویٰ کننگِک ولے پدا خلنگوکا بندغ آتا پجار مُست آن بیگواہ آ بندغ آتیان مریک، 19 نومبر آ بالگتر ئٹی مُست آن بیگواہ مروکو مُسہ بندغ ئے تراک ئسیٹی شہید کننگ آن پد دادے پاکستانی لشکر مقابلہ نا پن تِس ئس۔
مرید بلوچ نا لمہ نا کزیت آ ننے بھاز ڈُکھ ءِ۔ استاد واحد کمبر
چار شمبے، 22 نومبر 2023 *ریڈیو زرمبش براہوئی*
آشوبی شاعر مرید بلوچ نا لمُہ نا کزیت آ تینا ڈُکھ و غم ئنا درشانی ئے کرسہ آجوئی دوست رہشون استاد واحد کمبر تینا اسِہ تعزیتی درشان ئسیٹی پارے کہ مرید بلوچ نا لُمہ آشوب سوچ تخوک و تحریک نا خیرخواہ ئس اسّک۔
او پارے کہ اونا کزیت آ ننے باز ڈُکھ ءِ و نن اوفتا غم ئٹی شریک اُن۔
کیچ: پاکستانی لشکر نا کیمپ آ جلہو
*چار شمبے، 22 نومبر 2023 ریڈیو زرمبش براہوئی*
ضلع کیچ ئنا ہند دشت ئٹی نا دُرست بندغ آک پاکستانی لشکر نا کیمپ آ جلہو کریر۔
حوال آتا رد ئٹ سبدان ئٹی پاکستانی لشکر نا کیمپ آ سلاہ بند بندغ آک بھلا سلاہ تیٹ جلہو کریر۔
ہند ئٹی تراک و سُمکاری نا توار بننگار۔
دا بارَو ئٹ داسکان لشکری کالخواہ تا ہچو درشان ئس مونی بتنے۔
یاتی مرے کہ بلوچستان ئٹی پاکستانی لشکر و اونا کُمکار آتا زی آ مروکا جلہو تا ذمہ واری تے بلوچ آجوئی خواہوک سلاہ بند تنظیم آک ہرفسا بسنو ولے دا جلہو نا بارَو ئٹ دائسکان ہچو تنظیم ئسینا درشان ئس مونی بتنے۔
آواران: پاکستانی لشکر نا دو آن بیگواہ مروکو بندغ ئس آجو مسُنے
*چار شمبے 22 نومبر 2023 ریڈیو زرمبش براہوئی*
آواران: پاکستانی لشکر نا ڈھکوک ادارہ آتا دو آن بیگواہ مروکو بندغ ئس آجو مسُنے۔
حوال آتا رد ئٹ آجو مروکا بندغ نا پجار حافظ محمد عظیم ولد بیان در ءِ ہرا دراجکور نا ہندی ئسے۔
پاکستانی لشکر و اونا ڈھکوک ادارہ آتا کارندہ آک 7 نومبر 2023 آ آواران نا ہند بیدی ٹی لشکرکشی کرسا حافظ محمد عظیم ئے دزگیر کریسُر۔
حافظ محمد عظیم چھانڑدہ دے نا بیگواہی آن پد اینو آجو مسُّنے۔
تربت ئٹی پاکستانی لشکر ورنا ئس دزگیر کننگ آن پد بیگواہ کرینے
*سئے شمبے 21 نومبر 2023 ریڈیو زرمبش براہوئی*
تربت ئٹی زوراک آ پاکستانی لشکر و ڈیتھ اسکواڈ نا کارندہ آک چھاپہ خلِسہ احمد پنی او ورنا ئس دزگیر کننگ آن پد بیگواہ کرینو ـ
حوال آتا رد ئٹ زوراکی ئٹ بیگواہ مروک ورنا احمد ولد محمد ابراہیم تربت ، آپسر ڈاکی بازار نا تولوک ئسے ـ
زوراک آ پاکستانی لشکر و ڈیتھ اسکوڈ نا کارندہ آک استو یک بجہ آ اونا اُرا غا چھاپہ خلیسہ اودے بیگواہ کرینو۔
پاکستان و ایران اوغان پناہ ہلوک آتا کشنگ ئے بند کیر۔ اقوام متحدہ
چار شمبے ، 22 نومبر 2023 ، ریڈیو زرمبش براہوئی
اقوام متحدہ و ایلو ادارہ آک سئے شمبے نا دے اسِہ وار پدا ہمو ملک آتے ہرا اوغان شاری تے واپس اوغانستان آ مون تیرہ، اوفتان خواست کرے کہ او اوغانستان نا خراب حالیت نا سوب آن اوغان شاری تا کشنگ ئے زوت بند کیر۔
دا خواست ہمو وخت کننگا کہ ایران و پاکستان گدرینگوکا اِرا تو ئٹی پنچ لکھ آن زیات افغان پناہ ہلوک آتے واپس ہِننگ کن بیوس کریر۔
پاکستان ئٹی زوراکی ئٹ بےگواہی و اظہارِ آجوئی آ رکھ، یورپی کمیشن نا رپورٹ
*چار شمبے 22 نومبر 2023 ریڈیو زرمبش براہوئی*
پاکستان ئٹی زوراکی ئٹ بےگواہی و اظہارِ آجوئی آ رکھ خلنگ آ یورپی کمیشن ٹی ترجیحی بنیات آتے آ رپورٹ مس۔
یورپی کمیشن و یورپی ایکسٹرنل ایکشن سروس نا سئے شمبے آ شنگ مروک اواری نا رپورٹ ئٹی پاکستان نا ترجیحی تجارتی حیثیت نا جائزہ نا وخت آ زوراکی ئٹ بےگواہ مروک و میڈیا نا آجوئی نا مسئلہ آتے درشان کریر ۔
جی ایس پی پلس جائزہ ٹی زوراکی ئٹ بےگواہ ، میڈیا غا رکھ آتا معاملہ مرکزی حیثیت اختیار کرے۔
رپورٹ نا ردئٹ پاکستان نا جی ایس پی پلس اسٹیٹس نا اِرا سالی آ جائزہ غان ظاہر مریک کہ سول سوسائٹی کن گنجائش ، تقریر و میڈیا نا آجوئی تون مسئلہ آتا ردئٹ صورتحال بھلو حد ئس ئسکان ہمو مسُنے ہراکہ 2020 ٹی اسک ۔
“فورتھ جی ایس پی رپورٹ “ ئٹی زوراکی نا معاملات ٹی اوار بندغ آتے سزا وے تننگ نا مسئلہ غا نظر شاغنگا ، ہندُن چُنا ، زالبول آتا حق ، خواجہ سرا آتا رکھ ، چاگڑدی رکھ و گڈ تورننس آ مثبت پیش رفت نا اعتراف ہم کننگا ۔
دا جائزہ دا خاطر آن بھاز اہم ءِ کہ داٹی جی ایس پی اسکیم آن فائدہ ہرفوک آ ڈیھ تا نیمہ غان 27 دران ڈیھہی قانود آتے آ پیش رفت نا سما تمک۔
بیست ءُ ہفت 27 کنونشنز ئٹی انسانی حق ، مزدور آتا حق چاگڑدی معیار و گڈ گورننس اوار ءُ۔
میر گل خان نصیر نا ایڑ ئنا چُنا بلوچ راجی جہدکار مرید بلوچ نا لُمہ کذیت کرے
*چار شمبے، 22 نومبر 2023 ریڈیو زرمبش براہوئی*
بلوچ جہد آجوئی نا معتبر آ پن میر لونگ خان مینگل و پنی آ نوشتہ کار شاعر و سیاستدان میر گل خان نصیر مینگل نا ایڑ ئنا چُنا، مُسکوہی گورنر و چیف جسٹس بلوچستان ہائی کورٹ امیر الملک مینگل نا نشار بلوچستان نا پنی آ شاعر و جہدکار استاد مرید بلوچ نا لُمہ کذیت کرے۔
خدامرزی بلوچ جہدکار آتا کُمکار اسک۔ او 1973 ئٹی بلوچ جہد کار آتے کمک دننگ ئٹی اول اول اسک و ہندا وخت تینا چنا تا تربیت ئے راجی جُہد ئکن کننگ ئس۔
بلوچ سیاسی و سماجی آ بندغ آتون اوار جتا جتا آ فکر ئنا بندغ آک تعزیت کرسا اونا مغفرت کن دعا کریر۔
گوادر آن پاکستانی لشکر اِرا ورنا بیگواہ کرینے
سئے شمبے، 21 نومبر 2023 *ریڈیو زرمبش براہوئی*
گوادر آن زوراک آ پاکستانی لشکر و ڈھکوکا ادارہ آتا کارندہ آک اِرا ورنا بیگواہ کرینو۔
حوال آتا رِد ئٹ بیگواہ مروکا ورناک علی ولد جمعہ و بلال ولد احمد نا پِن تے ئٹ چائنگانو، ہرافک گوادر نا ہند چب ریکانی نا ہندی ءُ۔
زوراک آ لشکر درو دیگر آ ورنا تے گوادر پدی زِر آن بیگواہ کرینے۔
بلال احمد نا بیگواہی نا حوال ئے بلوچ بیگواہ تا توار ( وی بی ایم پی) پک کرِسہ ایکس آ اونا عکس ئس شنگ کرینے۔
زوراکی ئٹ بیگواہ آ راشد حسین نا آجوئی کن اسلام آباد ئٹی برانزی گِدان ئس اڈ تننگو، بشخ ہرفِرے
فریدہ بلوچ
سئے شمبے 21 نومبر 2023 ، ریڈیو زرمبش براہوئی
شال : 2018 ٹی عرب امارات آن زوراکی ئٹ بیگواہ مروک بندغی حق آتا کارکن راشد حسین نا ایڑ فریدہ بلوچ تینا ویڈیو ئسے ٹی اسلام آباد ئٹی برانز کننگ نا خواست کرے و بندغی حق آتا ادارہ آتان توار بڑز کننگ نا خواست کرے ۔
او پارے کہ بیست ءُ ہفت نومبر آ راشد حسین نا خاوت تینا ایلم نا آجوئی کن اسلام آباد ئٹی ساڑی آ بلوچ آتون اوار پین بندغی حق آتا کارکُن و رسانکدری کارکُن آتان خواست کرے کہ ننا برانز ئٹی بخش ہرفِر و ننا توار مریر تانکہ ننا بے میار آ ایلم آزار جہہ تان آجو مرے ۔
خاران: پاکستانی لشکر نا دو آن بیگواہ مروک چُناک دائسکان آجو متنو
*سئے شمبے 21 نومبر 2023 ریڈیو زرمبش براہوئی*
بلوچستان نا ضلع خاران ئٹی تدوکا دے تیٹ پاکستانی ریاستی لشکر ایف سی وڈھ ٹی چھاپہ خلِسہ یلانزئی خاندان نا اِرا چُنا ئے بیگواہ کریسس، ہرا دائسکان آجو متنو۔
بیگواہ کننگوک چُنا تا خاؤت چاگڑدی حوالکاری میڈیا غا تینا بیان ئٹی پاریسس کہ ننا چُناک جتا ناجوڑی تا گواچی ءُ، اوفتے ایف سی زوراکی ئٹ ننا مونا بیگواہ کرینے۔ اسہ کنڈ آن پاکستان کون آ ریاست ئٹی کرپٹ انتظامیہ نا سوب آن نرخ ئنا ودکی ہر مسکین آ خاؤت ئنا مُخ ئے پرغانے و ایلو کنڈ آن ایف سی چھاپہ نا وختا ننا اُرا نا غٹ مڈی تے دُزِسہ درینے۔
خاؤت نا پاننگ ءِ کہ ہرا وخت آن ننا چُناک بیگواہ کننگانو ہمو وختان اوفتا لمہ باوہ باز ذہنی ڈکھیا ءُ کہ اَراتم ننا ناجوڑ آ چُنا تے آجو کننگو۔
حوال تروکا تا پاننگ ءِ کہ خاران تون اوار تیبہ بلوچستان ئٹی زوراکی نا بیگواہی تتون اوار اُرا تا ارزشتی آ مڈی تے دُزنگ ئٹی پاکستانی لشکر تُد ءِ۔
قلعہ سیف اللہ کسر آ مُسہ لاری نا ڈکّ لگنگ آن اِرا بندغ ہُشنگِسا بیران مسُر
سئے شمبے ، 21 نومبر 2023 ، ریڈیو زرمبش براہوئی
بلوچستان نا عیلاقہ کان مہترزئی ٹی شال قلعہ سیف اللہ کسر آ مُسہ لاری نا ڈک لگّنگ آن اِرا بندغ ہُشنگِسا بیران مسُر۔
حوال آتا رِد ئٹ ویل ئٹی پنچ بندغ ٹپی ہم مسُنو ہرافتے ہسپتال آ دننگانے۔
لیویز زرائع نا پاننگ ءِ کہ ایرانی ڈیزل دروکو کار ئس تیزی نا سوب آن اِرا لاری تون ڈک لگّانے ہراڑان اِرا لاری خاخر ہلکُنو و اسٹ کھڈ ئسیٹی تمانے۔
پنجگور: دستی بمب جلہو ئٹی مُسہ بندغ ٹپی مس
*سئے شمبے، 21 نومبر 2023 ریڈیو زرمبش براہوئی*
بلوچستان نا ضلع پنجگور تسپ پولیس اسٹیشن نا خڑک پنچی نا عیلاقہ ٹی اسہ اُرا ئسے آ دستی بمب جلہو کننگا۔ ہراٹی مُسہ بندغ ٹپی مس ہرافتا پجار روف، محب اللہ و عبیداللہ نا پن ئٹ مس۔
ٹپی مروکا تے المی علاج کن ٹپچنگ اسپتال آ دننگا، دا دستی بمب جلہو اُرائی جیڑہ ئسے نا سوب آن کننگانے۔
ہندی پولیس دا بارو ئٹ پٹ ءَ پول کننگ ءِ۔
گودار ئٹی شہید جعفر نا قبر آ بلوچستان نا بیرک جِھکّ کننگانے
*سئے شمبے 21 نومبر 2023 ریڈیو زرمبش براہوئی*
سیکنڈ لیفٹینینٹ شہید جعفر عرف ثناء نا قبر ئنا زی آ بلوچستان نا بیرک جِھکّ کننگانے ـ
حوال آتا رد ئٹ شمبے اسمائیل قبرستان ئٹی استو شہید جعفر نا قبر آ بلوچستان نا بیرک جِھک کننگانے ولہ اینو پولیس بیرک ئے مُرّ کرینےـ
یاتی مرے کہ سیکنڈ لیفٹینینٹ شہید جعفر عرف ثناء یانزدہ اگست آ لیفٹینینٹ کامران عرف نودی تون اوار پاکستانی لشکر تون مون پہ مون جنگ ئٹی شہید مسّ ئس ـ
سبی: پاکستانی لشکر نا دُو آن اسہ بندغ ئس بیگواہ
سئے شمبے ، 21 نومبر 2023 ، ریڈیو زرمبش براہوئی
بلوچستان نا ضلع سبی آن پاکستانی لشکر اسہ بندغ ئسے دزگیر کننگ آن پد بیگواہ کرے ۔
حوال آتا رِد ئٹ سبی نا ہند لہڑی گھوڑی ٹی دَرو پاکستانی لشکر اُراسے آ چھاپہ خلِسا اسہ بندغ ئسے بیگواہ کرے ۔
بیگواہ مروکا بندغ نا پِن اتوار ولد ہزار خان و دا بندغ اسہ دُو ئسے آن منڈ ءِ۔
یاتی مرے کہ ہندا بندغ نا اسہ ایلم ئسے مُست پاکستانی لشکر شہید کرینے۔
دہ سال آن زوراکی ئٹ بےگواہ مروک ایلم کن آگاہی مہم ئٹی بشخ ہرفبو ۔ ایڑ، بےگواہ سیف اللہ رودینی
*دو شمبے 20 نومبر 2023 ریڈیو زرمبش براہوئی*
https://zrumbesh.com/barahouee/post/entry/Missing-saifullah..-20-11-2023
زوراکی ئٹ بےگواہ آ سیف اللہ رودینی نا ایڑ فرزانہ چاگڑدی رسانکدر سائٹ ایکس آ اسہ ویڈیو کلہو ئس شنگ کرِسہ چاگڑدی رسانکدر نا بندغ آتے آن خواست کرے کہ 22 نومبر آ اڈ ہلوک آگاہی مہم نا بشخ مریر و کنا ایلم نا آجوئی کن توار ہرفِر ۔
او پارے کہ کنا ایلم ئے 22 نومبر 2013 آ زوراکی ئٹ بےگواہ کننگا ، 22 نومبر آ اودے دہ سال پورو مننگ ءِ۔ دا 10 سال ننکے قیامت نا وڑ گدرینگانو ،کنا باوہ لمہ کنا ایلم نا جتائی ئے برداشت وے سگھِسہ دا جہان آن رخصت مسُر ۔ ایلم نا بھلو وخت ئسے آن جتائی آن نن ہم سختی ٹی وخت گدریفنگ اُن۔
او پارے کہ 22 نومبر 2023 نن بلوچ وائس فار جسٹس نا اواری ئٹ کنا ایلم نا آجوئی کن ایکس آ اسہ آگاہی مہم ئس اڈ ایتون ۔ چاگڑدی رسانکدر کارمرز کروک کُل باسک آتان خواست کینہ کہ او ننا کمک مریسہ کنا ایلم نا آجوئی کن توار ہرفِر۔
مشکے: اسہ جلہو ئسے ٹی مُسِہ لشکری کارندہ خلنگانے۔ بی ایل ایف
*دو شمبے، 20 نومبر 2023 ریڈیو زرمبش براہوئی*
https://zrumbesh.com/barahouee/post/entry/BLF..20-11-2023
بلوچستان لبریشن فرنٹ نا ترجمان تینا شنگ کروک بیان ئٹی پارے کہ بی ایل ایف نا سرمچار آک مشکے ٹی دشمن لشکر نا مسہ کارندہ ئے خلکُر۔ سرمچار آک یک شمبے 19 نومبر نا سہب 9 بجہ غا پاکستانی لشکر نا چھار کارندہ ئے ہمو وخت آ بھلّا سلاہ تیٹ ٹک کریر ہراوخت اوفک مشکے نا عیلاقہ منگولی کیمپ آن پند آ پیشتمِسہ مورچہ نا نیمہ غا ہِننگ اسُر۔
ترجمان پارے کہ سرمچار آک ہمو وختا جلہو کرِسہ مسہ کارندہ ئے خلکُر و اسٹ ٹپی کریر۔ جلہو آن پد دشمن لشکر نا ہیلی کاپٹر آک گشت کریر۔
او پارے کہ قوضہ مروک بلوچستان نا آجوئی اسکان قوضہ گیر لشکر آ ننا جلہو آک برجاء مرور۔
ہوشاب ویل غیر قانودی ویل ئسے نن دانا مذمت ئے کینہ۔ وی بی ایم پی
دو شمبے ، 20 نومبر 2023 ، ریڈیو زرمبش براہوئی
شال : بیگواہ آ بلوچ آتا توار ”وی بی ایم پی“ چاگڑدی رسانکدر آ ہوشاب ویل ئنا بارَو ئٹ نوشتہ کرِے کہ کیچ پولیس نا پاننگ ءِ کہ ہوشاب ئٹی کسر نا کرّک آ بمب تراک ئٹی مُسہ بندغ بیران مسُنے بلکہ دا دروغ او ہیت ءُ ۔ دا زور ئٹ بیگواہ مروک او بندغ ءُ ہرافتے خلکُنو۔
او پارے کہ دا تراک ئٹی بیران مروکا عادل و شاہ جان ئے 22 اگست آ پاکستانی لشکر بالگتر آن بیگواہ کریس ئس، ہرافتا کیس تنظیم تون ارے۔
وی بی ایم پی پارے کہ ہوشاب ویل غیر قانودی ویل ئسے نن دانا مذمت ئے کینہ و ویل ئنا بارو ئٹ پٹ ءَ پول کننگ نا خواست کینہ۔
ضلع آواران ئٹی پاکستانی لشکر نا فضائی آپریشن برجاء ءِ
*دو شمبے 20 نومبر 2023 ریڈیو زرمبش براہوئی*
ضلع آواران نا ہند گواش ، دراسکی و مشکے کور ئتون اوار ہیب کھیب ئنا ہند آتیٹی اینو سہب آن پاکستانی لشکر نا جنگی جہاز آک ہِن ءُ بر کننگ ءُـ
حوال آتا رد ئٹ بھاز جاگہ آتیا شیلنگ ہم کرینوـ
ہندی حوال آتا رد ئٹ دراسکی جھل اَرا ضلع آواران ئے ضلع واشک و ضلع پنچگور ئے ملَّفوکا اسٹ اِنگا کسر ءِ ہراڑا بھاز مسافر لاریک کارہ بریرہ ـ
گُڈی حوال اسکاں جنگی جہاز آتا شیلنگ آن کسر آک بند ءُ نُسخان نا بارو ئٹ ہچو حال حوال رسینگتنے۔
مشکے ٹی سلاہ بند بندغ آک پاکستانی لشکر آ جلہو کریر
*دو شمبے، 20 نومبر 2023 ریڈیو زرمبش براہوئی*
آواران نا ہند مشکے ٹی نا درست سلاہ بند بندغ آک زوراک آ پاکستانی لشکر آ جلہو کریر۔
حوال آتا رد ئٹ درو سُہب ئنا نوہ بجہ آ مشکے نا ہند منگلی ٹی سلاہ بند بندغ آک پاکستانی لشکر نا کارندہ آتے آ ہمو وخت جلہو کریر ہراتم اوفک تینا کیمپ آن پیشتمِسا سنگر آتا مونا ہِننگ مسُنو۔
جلہو ہُرے اسکان برجاء مسُنے ہراٹی پاکستانی لشکر ئے جانی نسخان رسینگ نا حوال ارے۔
یاتی مرے کہ بلوچستان ئٹی پاکستانی لشکر و اونا کُمکار آتا زی آ مروکا جلہو تا ذمہ واری تے بلوچ آجوئی خواہوک سلاہ بند تنظیم آک ہرفسا بسنو ولے دا جلہو نا ذمہ واری ئے دائسکان ہچو تنظیم ئس ہرفتنے۔
پنجگور: لشکری کارندہ آتا دو آن ورنا ئس زوراکی ئٹ بیگواہ
*دو شمبے، 20 نومبر 2023 ریڈیو زرمبش براہوئی*
بلوچستان نا ضلع پنجگور نا ہند تسپ آن شیردل بلوچ ولد ڈاکٹر صمد پنی او ورنا ئسے پاکستانی لشکر اُونا اُرا غا چھاپہ خلِسا بیگواہ کرے۔
ہندی حوال آتا رد ئٹ اِستو دو بجہ آ پاکستانی لشکر بھلو کچ ئسے ئٹ شیردل نا ُارا ئے گھیرہ کرِسا چھاپہ خلک، دا وخت سادہ پُچ بینوک کارندہ آک ہم تُد اسُر۔
پاننگ مننگ ءِ کہ بیگواہ آ خوانندہ نیشنل ڈیفینس یونیورسٹی آن انٹرنیشنل ریلیشنز ئٹی ماسٹرز کرینے۔
کوئٹہ: سُمکاری آن پولیس کارندہ تون اوار اِرا بندغ خلنگا
*دو شمبے، 20 نومبر 2023 ریڈیو زرمبش براہوئی*
بلوچستان نا پائتخت کوئٹہ ٹی سُمکاری آن پولیس کارندہ ئس خلنگا۔
حوال آتا رد ئٹ اینو سلاہ بند بندغ آک ہنہ بائی پاس نا خُڑک سُمکاری کرسا پولیس کارندہ کانسٹیبل غلام مرتضیٰ ئے خلکُر۔
تدینی آن پد پولیس جون ئے المی کاروائی کن اسپتال آ درے۔
ایلو نیمہ آ برما ہوٹل نا خُڑک سُمکاری نا تدینی ٹی جمعہ گل خان ولد محمد خان کاکڑ پنی او بندغ ئس خلنگانے۔
گوادر: پاکستانی لشکر و ڈھکوکا ادارہ آتا کارندہ آک ورنا ئسے بیگواہ کریر
یک شمبے، 19 نومبر 2023 *ریڈیو زرمبش براہوئی*
گوادر: پاکستانی لشکر و ڈھکوکا ادارہ آتا کارندہ آک سمیر پِنی او ورنا ئسے زوراکی ئٹ بیگواہ کریر۔
حوال آتا رِد ئٹ زوراکی ئٹ بیگواہ مروکا ورنا سمیر ولد حمزہ نا پِن ئٹ چائنگانے ہرا سربندن نا ہندی ئسے۔
سمیر نا بارَو ئٹ پاننگک کہ اودے 2022 ئٹی بیگواہ کننگ آن پد یلہ کننگانے۔
Be the first to know and let us send you an email when Zrumbesh Brahvi posts news and promotions. Your email address will not be used for any other purpose, and you can unsubscribe at any time.
Want your business to be the top-listed Media Company?
