06/05/2023
#រោគផ្លូវចិត្តរបស់យុវជនជំនាន់យើង!
តាមកត្តាជីវសាស្ត្រ រូបកាយ និងចិត្ត ជាធម្មជាតិមានចំណែកផ្សេងគ្នា តែអាស្រ័យគ្នាជានិច្ច បែកគ្នាមិនបាន ហើយរួមសុខ រួមទុក្ខជាមួយគ្នា។ គ្រាខ្លះ រូបកាយមានរោគកើតឡើង ចិត្តក៏ឈឺចាប់ ឯគ្រាខ្លះទៀត ចិត្តមានវិបត្តិ(រោគកើតឡើង) កាយក៏រសាប់រសល់ញ័រខ្លួន បញ្ចេញអាការៈច្រឡោមខាម ខឹងស្អប់ជាដើម។ ចិត្តមានរោគ គឺជាចិត្តមានវិបត្តិ ឬចិត្តមានសេចក្ដីក្ដៅក្រហាស្ដាយក្រោយច្រើន ព្រោះចិត្តនៅក្មេង ជាចិត្តដែលម្ចាស់វាទូន្មានបានតិចតួច ឬឆ្លងកាត់ការលត់ដំបានតិចតួច ទោះបីម្ចាស់វាមានអាយុច្រើនយ៉ាងណាក៏ដោយ។
នៅក្នុងទីនេះ យើងគួរតែបានដកឃ្លាបន្តិចមកនិយាយអំពីបញ្ហាផ្លូវចិត្តរបស់យុវជន។ ក្នុងចំណោមដ៏ច្រើននៃយុវជន បានកើតមាននូវរោគផ្លូវចិត្តទាំងពួកគេមិនដែលគិត ឬមិនបានដឹងខ្លួនសោះ។ ពួកគេងាយខឹង ងាយស្អប់ ងាយស្រឡាញ់ ហើយឆាប់វិនិច្ឆយអ្វីៗទៅតាមការនិយមរបស់អ្នកដទៃ ដោយគ្មានគោលជំហរច្បាស់លាស់ជារបស់ផងខ្លួនសោះឡើយ។ បញ្ហាដូចបានរៀបរាប់ខាងដើមនេះជារោគយ៉ាងប្រាកដ តែពិបាកឱ្យគេមើលដឹងថារោគនេះ គឺជាបញ្ហាខ្លាំងណាស់។
រោគផ្លូវចិត្ត ក៏អាចឆ្លងរីករាលដាលដូចជារោគផ្លូវកាយដែរ។ ជាពិសេសនៅក្នុងសង្គមដែលស្រុតចុះសីលធម៌ នោះរោគផ្លូវចិត្តនឹងបង្ហាញមកជាហូហែរ ហើយវាមានឥទ្ធិពលទៅលើអ្នកទាំងឡាយណាដែលមានផ្លូវចិត្តទន់ខ្សោយ។ រោគផ្លូវចិត្ត បានដឹកដៃយុវជនដ៏ច្រើនឱ្យចេះប្រព្រឹត្តអំពើអបាយមុខ ដែលជាការបង្កើនចំនួនបញ្ហាឱ្យកាន់តែច្រើនចូលទៅក្នុងសង្គម។ ការស្រុតចុះផ្នែកសីលធម៌នៅក្នុងសង្គម បានក្លាយជាបញ្ហាធម្មតានៅក្នុងក្រសែភ្នែករបស់មនុស្សដែលមានរោគផ្លូវចិត្ត។ ការណ៍ដែលគេមើលឃើញបញ្ហាត្រឹមកម្រិតធម្មតា តែងនាំគេឱ្យគេចចេញពីការទទួលខុសត្រូវ និងបណ្ដែតបណ្ដោយឱ្យបញ្ហានោះកាន់តែរីកធំឡើងជាលំដាប់។
នៅក្នុងសង្គមរបស់យើងពេលនេះ មានអ្នកចេះនិយាយសុំទោសកាលណាខ្លួនបានប្រព្រឹត្តខុស តែមិនប្រាកដថាគេទទួលកំហុសនោះទេ។ មួយទៀត ធ្វើខុស តែមិនដឹងថាជាកំហុស ថែមទាំងរីករាយ ហើយប្រកាន់មាំចំពោះអំពើនោះទៀត វាជាបញ្ហាធំណាស់ និងពិបាកដោះស្រាយជាងបញ្ហាមុននោះរាប់រយដង។ វាជាអំពើខាងទិដ្ឋិ ដែលត្រូវរុំព័ទ្ធដោយអវិជ្ជា និងសេចក្ដីមានះ ហើយបានជះឥទ្ធិពលយ៉ាងអាក្រក់ចូលទៅក្នុងសង្គម។ ជាដំណោះស្រាយ បុគ្គលម្នាក់ៗត្រូវតែទទួលខុសត្រូវចំពោះរាល់ទង្វើរបស់ខ្លួន ដោយការសង្កេតពិនិត្យលើគំនិត ពាក្យសម្ដី និងទង្វើផ្ទាល់ខ្លួន ដោយឈរលើមូលដ្ឋានគុណប្រយោជន៍ និងមិននាំការលំបាកដល់មនុស្សល្អ។
--------- មុំ រដ្ឋា
