Filipino Headline News (2024)

01/03/2023

Inilibing sa Imus
NAWAWALANG ADAMSON U
STUDENT NAMATAY SA HAZING?

Karahasan sa hazing ang hinihinalang maaaring dahilan ng pagkamatay ng 24 anyos na Adamson University student na naunang iniulat na nawawala noon pang Pebrero 18 makaraang matagpuan itong patay na at inilibing sa Imus, Cavite.

Sa pahayag ng Imus police kahapon, natagpuan ang labi ng estudyante na si John Matthew Salilig malapit sa Barangay Malagasang.

Nabanggit din ng kapulisan ang isinagawang paunang imbestigasyon ng Biñan police na nung araw na iniulat na nawawala si Salilig ay dumalo umano ito sa initiation rites ng Tau Gamma Phi fraternity sa Laguna.

Sa hindi pa alam na dahilan ay namatay nga ang biktima saka itinapon at inilibing sa Imus.

Nasa 15 katao na umano sa kinabibilangang fraternity ang kinilala ng Biñan police na maaaring sangkot sa pagkawala at pagkamatay ni Salilig. Isa umano sa mga ito ay umamin na sa pulisya na kasama s'ya sa paglilibing sa biktima sa Imus. (JESSE DIAMANTE)

31/01/2023

REX GATCHALIAN BAGONG DSWD SEC

Itinalaga ni Pangulong Bongbong Marcos Jr. si Valenzuela City Representative Rex Gatchalian bilang bagong kalihim ng Department of Social Welfare and Development (DSWD).

Pinangunahan ni Pangulong Marcos ang pagpapanumpa sa tungkulin ni Gatchalian bilang kalihim sa isang simpleng seremonya sa Malacañang ngayong Martes, Enero 31 mismong ika-72 anibersaryo ng pagkakatatag ng ahensya.

Ang DSWD ay may 2 buwan munang sumailalim sa pamumuno ni officer-in-charge Undersecretary Eduardo Punay simula noong Disyembre 2022 hanggang ngayong Enero 2023 matapos na i-bypass ng Commission on Appointments ang ad interim appointment ni dating Social Welfare Secretary Erwin Tulfo.

Si Gatchalian ay dati nang naglingkod na congressman ng unang distrito ng Valenzuela City sa 14th ay 15th Congress at naging mayor din ito ng nasabing lungsod.

Nagtapos ito ng may Latin honor bilang Cum Laude sa George Washington University sa kursong political science, na may secondary fields of study sa marketing at psychology. (Jesse Diamante)

Screenshot mula sa tanggapan ng Presidential Comunications

31/01/2023

IPUPUSLIT NA P18.6M NA SIBUYAS NASABAT SA KARAGATAN

Nasabat ng Bureau of Customs Port of Zamboanga (BOC POZ) ang P18.6 milyong halaga ng sibuyas na ipupuslit sana lulan ng isang barko sa karagatan sa Brgy. Ayala, Zamboanga City.

Sa ulat ng BOC nangyari ang pagkasabat noong Enero 25 lamang.

Nagsasagawa umano ang Water Patrol Division ng POZ ng patrol operation nang masabat ang 5,611 mesh bag na puno lahat ng imported na pulang sibuyas na nagkakahalaga ng P8.5 milyon at 2,249 mesh bag ng imported na puting sibuyas na papalo naman sa halagang P10.1 milyon.

Sakay ang mga kontrabando ng MV Princess Nurdisza na sinasabing nanggaling sa Taganak, Tawi-Tawi patungong Brgy. Baliwasan, Z.C.

Nang hingan ng mga kaukulang papeles ay walanv maipakita ang mga crew ng barko na Sanitary and Phytosanitary Import Clearance mula sa Department of Agriculture (DA)-Bureau of Plant Industry para sa mga ibinabyaheng sibuyas bagay na paglabag sa Section 1401 ng Republic Act (R.A.) 10863, kilalang "Customs Modernization and Tariff Act of 2016", alinsunod sa R.A. 10845 o ang "Anti-Agricultural Smuggling Act of 2016."

Ang nakumpiskang kontrabando ay agad na dinala sa Research Center ng DA sa Barangay Talisayan, Zamboanga City para sa safekeeping. (Jesse Diamante)

30/01/2023

MGA ESTUDYANTE SUGATAN
SA SUMABOG NA LAUNDRY SHOP

Sugatan ang tinatayang 15 katao kabilang ang mga estudyante na kumakain ng hapunan kagabi matapos sumabog at masunog ang isang laundry shop malapit sa De La Salle University sa Malate.

Sa ulat ng Malate – Manila Police District Station 9 ay naganap ang pagsabog at pagkasunog ng 360 Wash Laundry Shop sa Mac Torre Residence sa F. Reyes St., Malate dakong alas-7:20 ng gabi.

Mabilis namang naisugod ang mga biktima sa Adventist Medical Center Manila sa Pasay City.

Kabilang sa mga nasugatan sina Reuben Bergonio at Kurt Bucad na pawang college student na kumakain sa kalapit na kainan nang masapol ng pagsabog.

Nauna umanong nakarinig sila ng malakas na pagsingaw na huminto rin naman subalit kalaunan at biglang sumambulat ang malakas na pagsabog.

Nasapol ang ilang biktima nang matatalim na bagay na dahilan ng pagkasugat sa mukha at iba pang bahagi ng kanilang katawan.

Ilang estudyante naman ang tinamaan ng humagis na mga piraso ng tabla mula sa nagibang dingding nang hindi makatakbo sa bilis ng pangyayari.

Gas leak mula sa bagong deliver na tangke ng LPG ang sinasabing sanhi ng insidente.

Agad namang naapula rin ang apoy sa maagap na pagsaklolo ng mga alagad ng pamatay sunog makalipas ang ilang sandali. (Jesse Diamante)

29/01/2023

VOTER REGISTRATION
HANGGANG BUKAS NA LANG

Hanggang bukas na lang, Enero 31 maaaring magparehistro ang mga nais na makalahok sa barangay at Sangguniang Kabataan (SK) elections sa Oktubre 2023.

Ayon kay Commission on Elections (Comelec) Chairman George Garcia madali lamang magparehistro, katunayan ay maaaring bisitahin ang mga registration sites na sakop ng kanilang local Comelec office at maaari rin pumunta sa mga satellite registration sa mga piling shopping mall.

Kwalipikadong magparehistro ang sinomang mamamayang Pilipino na 18 anyos sa araw o bago ang araw ng eleksyon; nakatira sa Pilipinas ng hanggat maaari ay isang taon at residente sa lugar kung saan magpaparehistro ng hindi bababa sa anim na buwan bago o sa araw ng halalan.

Para sa SK voters, maaaring magparehistro ay Filipino citizen; may edad na mula 15 at hindi lalagpas sa 30 anyos; may anim na buwan nang nakatira sa barangay bago o sa araw ng SK elections.

Para patunayan na kwalipikadong magparehistro ay magdala lamang ng Philippine Identification Card (PhilID); Employee’s identification card (ID) na may lagda ng employer o sinomang otorisadong kinatawan; Postal ID; PWD Discount ID; Student’s ID o library card na may lagda ng otorisadong opisyal sa paaralan; Senior Citizen’s ID; Driver’s license; NBI clearance; Passport; SSS/GSIS ID; Integrated Bar of the Philippine (IBP) ID; Lisensya na inisyu ng Professional Regulatory Commission (PRC); Certificate of Confirmation na inisyu National Commission on Indigenous Peoples (NCIP) kung miyembro ng ICCs o IPs; at anomang valid na ID. (Jesse Diamante)

28/01/2023

DINA SA WAITER: HINDI KITA PAPAHIRAN NG CAKE. MAGPAPASALAMAT AKO SA 'YO

"Hindi kita papahiran ng cake. Magpapasalamat ako sa 'yo. Thank you po, thank you so much."

Ito ang sinabi ng aktres na si Dina Bonnevie sa waiter na naghawak ng kanyang birthday cake matapos hipan ang nga kandila sa pagdiriwang kanyang ika-61 kaarawan kamakailan.

"Cakes are to be eaten, and not to be pasted on other people's faces," dagdag ng aktres na ikinatuwa at pinalakpakan ng kanyang mga bisita.

Ang tila pasaring na ito ng seasoned actress sa host-vlogger na si Alex Gonzaga ay mabilis naman na nag-trending sa social media.

Matatandaan na minsang naging laman ng mga batikos sa social media si Alex dahil sa ginawa nitong pagpahid ng chocolate icing sa mukha ng waiter na humawak ng kanyang birthday cake.

Bukod pa rito ang viral din na mga pahayag nina Dina at Alex dahil sa isang blind-item ng una tungkol sa ‘unprofessional artist’ umano na hindi niya pinangalanan.

Dati nang nagkasama ang mga ito sa TV5 series na P.S. I Love You?

Samantala, nakitang nakisaya sa birthday celebration kamakalawa ni Dina ang anak na si Oyo Boy Sotto at asawa nitong si Kristine Hermosa, kanyang manugang na si Marc Pingris sa anak na si Danica. (JDiamante)

Video credit to the owner movie actress and media personality Ms. Dina Bonnevie.

28/01/2023

TOTAL DEPLOYMENT BAN SA KUWAIT ISINULONG NI IDOL RAFFY

Isinulong ni Senator Raffy Tulfo ang total deployment ban sa Kuwait matapos ang malagim na pagpatay sa 35 anyos na overseas Filipino worker (OFW) na si Jullebee Ranara sa Kuwait.

Ayon kay Tulfo, chairman ng Senate committee on migrant Workers, maaari namang magkaroon ng bilateral talks sa pagitan ng Pilipinas at Kuwait pagkatapos ng deployment ban ngunit kailangan ikonsidera ang mga term at condition ng Pilipinas.

Kabilang dito ang mahigpit na proseso ng screening at psychiatric exams sa employers at miyembro ng pamilya nito upang matiyak na angkop sila na kumuha ng manggagawang Pilipino para sa kanilang pamilya.

Magugunitang ang sinunog na bangkay ni Ranara at inabandona sa disyerto ng Kuwait. Naiulat ding ito ay ginahasa at nabuntis ng 17 anyos na suspek na anak ng employer ng biktima. (Jesse Diamante)

27/01/2023

GUIUAN, E. SAMAR NIYUGYOG
NG 5.5 MAGNITUDE NA LINDOL

Niyanig ng 5.5-magnitude na lindol ang hilagang kanluran ng Homonhon Island sa Guiuan, Eastern Samar kaninang madaling araw.

Sa ulat ng Philippine Institute of Volcanology and Seismology (PHIVOLCS) nangyari ang paglindol ng alas-4:25 na may lalim na 80 kilometro at ito ay tectonic.

Naramdaman ang pagyanig hanggang sa mga lugar ng Guiuan, Lawaan, Salcedo at Mercedes Eastern Samar; Abuyog, Alangalang, Dulag, Javier, La Paz, Palo, Santa Fe, Tabontabon, Baybay City, Tanauan, at Tolosa, Leyte; San Francisco, Southern Leyte na may intensity IV.

Nasa intensity III naman ang mga lugar ng General MacArthur, Eastern Samar; Tunga, Leyte; City of Tacloban, Babatngon, Barugo, Leyte, at Pastrana.

Umabot naman sa intensity II ang mga lugar ng Maydolong, Eastern Samar; Ormoc City at Albuera, Leyte.
Habang nasa intensity I lamang sa Cebu City.

Wala mang iniulat na pagkasira o pagguho ay inaasahan naman ang mga aftershocks. (Jesse Diamante)

27/01/2023

BANGKAY NG SINUNOG NA OFW DUMATING NA SA BANSA

Dumating na sa bansa kagabi ang labi ng pinatay na overseas Filipino worker (OFW) sa Kuwait na si Jullebee Ranara.

Sa pahayag ng Department of Migrant Workers (DMW), lulan ng flight EK 334, lumapag ang labi ni Ranara sa PAIR PAGS Cargo sa Pasay City dakong alas-9:40.

Sa inilabas na autopsy report ng Gulf state kamakailan ay sinabi na si Ranara, 35 anyos ay ginahasa at nabuntis. Ginulpi umano muna ito bago dalawang ulit na sinagasaan saka sinunog hanggang sa mamatay at iniwan sa disyerto ng Kuwait ng 17 anyos na anak na lalaki ng amo nito.

Ang binatilyong suspek ay nasa kustodya na ng gobyerno ng Kuwait.

Nakatakda namang magsagawa ng hiwalay na awtopsiya ang National Bureau of Investigation (NBI) sa bangkay ni Ranara.

Samantala, tiniyak ni Musaed Saleh Althwaikh, ambassador ng Kuwait sa Pilipinas na makakamit ng mga naulila ng biktima ang hustisya.

Kasalukuyan ng naka-blacklist sa Pilipinas ang employer ni Ranara. (Jesse Diamante)

22/01/2023

Wishing you wealth and prosperity. Happy New Year!

25/05/2022

MARCOS AT DUTERTE-CARPIO IPINROKLAMA NA NG KONGRESO
Ni Jesse Diamante

Opisyal nang ipinroklama ng Kongreso sina Ferdinand "Bongbong" Marcos Jr. at Sara Duterte-Carpio ngayon bilang mga nanalong pangulo at pangalawang pangulo sa katatapos na May 9 national elections.

“I proclaim Ferdinand Romualdez Marcos Jr. as the duly elected President of the Republic of the Philippines and Sara Zimmerman Duterte as the duly elected Vice President of the Republic of the Philippines,” pahayag ni Senate President Vicente Sotto III at House Speaker Lord Allan Velasco sa idinaos na joint session ng Kongreso.

Sa ilalim ng Saligang Batas, sina Marcos at Duterte-Carpio ay mauupo sa kanilang tungkulin sa Hunyo 30.

Naupong National Board of Canvassers, sinabi ng Kongreso na tumanggap si Marcos ng may 31,629,783 boto, habang 15,035,773 lamang sa mahigpit nitong katunggali na si Vice President Leni Robredo.

Nasa 32,208,417 boto naman ang natanggap ni Duterte-Carpio habang pumangalawa si Sen. Francis "Kiko" Pangilinan na may 9,329,207 boto.

Ang 64 anyos na si Marcos na anak nang pinatalsik na diktador sa 1986 sa People Power Revolution ay magiging pang-17 pangulo ng Pilipinas kahalili ni Pangulong Rodrigo Duterte na nakatakdang bumaba sa tungkulin sa Hunyo.

Si Duterte-Carpio, 43 anyos at anak ni Pangulong Duterte ang siya namang magiging pang-15 pangalawang pangulo ng bansa.

21/05/2022

QUEEN SUSAN ROCES PUMANAW NA
Ni Jesse Diamante

Pumanaw na ang beteranang aktres ng pelikulang Pilipino na si Susan Roces kahapon, Biyernes, Mayo 20 sa edad na 80.

Ang pagpanaw ng aktres na Jesusa Sonora Poe sa tunay na buhay ay kinumpirma kagabi ng nag-iisa nitong anak na si Senator Grace Poe, sa mga mamamahayag.

“With great sadness, we announce the loss of our beloved Jesusa Sonora Poe, whom many of you know as Susan Roces. She passed away peacefully on a Friday evening, May 20, 2022, surrounded by love and warmth, with her daughter Grace, her nephews Joseph and Jeffrey, and many of her family and close friends,” ani Poe.

“She lived life fully and gracefully. Remember her in her beauty, warmth and kindess,” pagpapatuloy ng senadora.

“She is now with the Lord and her beloved Ronnie – FPJ. We will miss her sorely but we celebrate a life well lived. Susan Roces – daughter, mother, grandmother, a true Filipina, and a national treasure,” dagdag nito.

Nabyuda si Roces noong taong 2004 nang pumanaw ang asawa nito na tinaguriang “Hari ng Pelikulang Pilipino” na si Fernando Poe, Jr. kilala sa tawag na FPJ.

Si Roces, ay isinilang noong Hulyo 28, 1941 ng mga magulang nitong sina Dr. Jesus Sonora at Purificacion Levy.

Nag-umpisa itong sumabak sa showbiz sa edad na 10 noong 1952 sa pelikulang “Mga Bituin ng Kinabukasan” na may screen name na Maria Levy.

Taong 1956 nang gampanan nito ang title role sa pelikulang “Boksingera” kapareha ng aktor na si Luis Gonzales at co-star ang namayapa na ring komedyante na si Dolphy.

Kilala sa natatanging ganda, si Roces ay nasa 4 na dekada mula dekada 50 hanggang 80 gumawa ng pelikula sa daigdig ng showbiz.

Sa panahon na ito rin kinilala ang kanyang husay bilang aktres ng Filipino Academy of Movie Arts and Sciences (FAMAS) Awards sa pelikulang “Maligno” noong 1977 at “Gumising Ka, Maruja” noong 1978.
Tumanggap din ito ng nominasyon sa nabanggit na award giving body sa mga pelikulang “Divina Gracia” noong 1970, “Bilanggong Puso” noong 1972, at “Ang Lahat ng Ito Pati na ang Langit” noong 1989.

Bilang beteranang aktres ay patuloy itong napanood sa bilang Lola Flora sa long-running primetime series na “FPJ’s Ang Probinsyano.”

30/04/2022

CELESTE CORTESI TINAGHAL NA MISS UNIVERSE PHILIPPINES 2022

Ang 24 anyos na dilag mula sa Pasay City na si Celeste Cortesi ang kinoronahan na Miss Universe Philippines 2022 sa ginanap na live coronation kagabi, Sabado, Abril 30 sa Mall of Asia Arena.
Si Costesi ay kinoronahan ni 2021 Miss Universe Philippines Beatrice Luigi Gomez, na napabilang sa Top 5 sa Miss Universe 2021 pageant.
Nakuha naman ng 27 anyos at dating Miss World Philippines 2019 na si Michelle Marquez Dee na kumatawan sa Makati City ang pangalawang puwesto na Miss Universe Philippines Tourism.
Ang dating Miss Universe Philippines 2020 3rd runner up at mula sa Bohol na si Pauline Cucharo Amelinckx ang tinanghal na Miss Universe Philippines Charity 2022.
Miss Universe Philippines 1st runner-up naman si Annabelle McDonnell ng Misamis Oriental at Miss Universe Philippines 2nd runner-up si Ma. Katrina Llegado ng Taquig City na dating 2019 Reina Hispanoamericana Filipinas at 5th runner up sa 2019 Reina Hispanoamericana.
Dumalo sa live coronation night sina
2021 Miss Universe Harnaaz Sandhu ng India at Miss Universe 2018 Catriona Gray bilang mga special guests. Habang nagsilbing mga host sina Miss Universe 2015 Pia Wurtzbach, Miss Universe 2016 Iris Mittenaere, at Miss Universe 2017 Demi-Leigh Tebow. (JESSE DIAMANTE)

15/03/2022

Tangi daw solusyon sa korapsyon
PARLADE AT 100 SUPPORTER IGINIIT ANG PAGTATATAG NG REVOLUTIONARY GOVERNMENT

Nagtipun-tipon ngayong Martes sina retired military general Antonio Parlade Jr. at humigit kumulang sa 100 tagasuporta nito sa EDSA People Power Monument upang imungkahi ang pagtatatag revolutionary government na siya umanong sagot sa nangyayaring korapsyon sa pamahalaan.

Partikular na nanawagn ng suporta
Parlade at kanyang mga supporter laban sa umano’y korapsyon sa Commission on Elections (Comelec) at iba pang ahensya ng gobyerno.

Ayon kay Parlade, dating commanding general ng Southern Luzon Command, tanging ang revolutionary government lamang ang solusyon sa nasabing problema.

Ipinagkibit-balikat lamang naman ng Malacañang ang panawagang ito ni Parlade.

“As Defense Secretary Delfin Lorenzana directed the Armed Forces of the Philippines, the retired general’s call is better left ignored,” ani Presidential Communications secretary at acting presidential spokesperson Martin Andanar.

Ang panawagang revolutionary government ni Parlade ay bahagi umano ng freedom of speech and expression nito, ayon pa kay Andanar sa kanyang statement. (JESSE DIAMANTE)

14/02/2022

Wishing you all the love in the world this Valentine’s Day.

05/02/2022

QUIBOLOY, 2 PA NASA LISTAHAN NG ‘MOST WANTED’ SA FBI

Itinuturing na ngayon na “most wanted” ng Federal Bureau of Investigation (FBI) si Pastor Apollo Quiboloy ang spiritual leader ng Kingdom of Jesus Christ (KOJC), The Name Above Every Name.

Ngayong umaga (oras sa Pilipinas) nang ilbas ang larawan at profile ni Quiboloy sa website ng FBI at nakasaad na ito ay pinaghahanap na ng batas dahil sa umano’y patung-patong na kaso.

“Quiboloy was indicted by a federal grand jury in the United States District for the Central Dustrict if California, Santa Ana, California for
conspiracy to engage in s*x trafficking by force, fraud and coercion, and s*x trafficking of children; s*x trafficking by force, fraud and coercion; conspiracy, bulk cash smuggling,” nakasaad sa FBI website.

Si Quiboloy na tinataguriang “Appointed Son of God” ay wanted dahil sa umano’y partisipasyon nito ss labor trafficking scheme na nagdadala ng mga miyembro ng simbahan sa Amerika gamit ang dinaya umanong visa at pinupuwersa ang mga miyembro na manghingi ng dinasyon para sa umano’y pekeng charity, ngunit ang donasyon ay ginagamit umanong panggastos sa pagpapatakbo ng simbahan at sa marangyang panumuhay ng mga lider nito, ayon sa FBI.

"Members who proved successful at soliciting for the church allegedly were forced to enter into sham marriages or obtain fraudulent student visas to continue soliciting in the United States year-round.

"Furthermore, it is alleged that females were recruited to work as personal assistants, or 'pastorals,' for Quiboloy and that victims prepared his meals, cleaned his residences, gave him massages and were required to have s*x with Quiboloy in what the pastorals called 'night duty,'" ayon pa sa FBI.

Bukod kay Quiboloy ay wanted din ang 2 pang opisyal ng simbahan na sina Teresita Tolibas Dandan at Helen Panilag base sa parehong akusasyon.

Ngunit ayon sa Department of Justice (DOJ) gayon ay wala pa silang natatanggap na anumang liham o request mula sa gobyerno ng Amerika
para i-extradite o papuntahin doon si Quiboloy at harapin ang kaso.

“We have not received any official communication from the US government. Extradition cannot be done motu proprio, especially if the subject is our own citizen. Any communication will be coursed through diplomatic channels,” ayon sa ipinadalang mensahe ni Justice Secretary Menardo Guevarra sa mga mamamahayag. (JESSE DIAMANTE)

02/02/2022

EDUKADOR AT AKTRES NA SI DR. RUSTICA CARPIO PUMANAW NA

Pumanaw na ang batikang manunulat, artista, edukador at public servant na si Dr. Rustica Carpio kahapon, Pebrero 1, 2022.

Sa Facebook post ng kanyang pamangkin na si Nessea Carpio ay kinumpirma nito ang pagpanaw ng kanyang tiyahin sa edad na 91.

“We wish you farewell in your journey to eternity. You’d never be forgotten. Rest in peace, Tita Rustica Carpio,” ani Nessea sa kanyang Facebook post.

Bukod sa pagiging aktres, manunulat at edukador, si Rustica ay isa ring awtor, direktor, mandudula (playwright), iskolar, kritiko sa panitikan, at patnugot ng libro (book editor).

Naglingkod din siyang dean ng dating College of Languages and Mass Communication na kilala ngayon bilang College of Communication sa Polytechnic University of the Philippines (PUP) sa Manila.

Gumanap din siya ng mahahalagang papel sa teatro at pelikula tulad ng bilang “Lady Macbeth”, “Sisa”, “Teodora Alonzo”, “Leonor Rivera” at iba pang karakter at nakatrabaho ang mahuhusay na artista,direktor at national artist na tulad nina yumaong Fernado Poe Jr., Direktor Ismael Bernal, National Artists Lamberto Avellana, Rolando Tinio at marami pang mga batikan sa kani-kanilang larangan.

Kinilala na rin ang husay bilang aktres ni Rustica kabilang ang 33rd Gawad Urian na nagtanghal sa kanya bilang Best Actress noong taong 2010 sa pelikulang “Lola” ni Director Brillante Mendoza, gayundin sa Crystal Simorgh para sa Best International Actress sa Fajr International Film Festival sa Iran, at ang Las Palmas International Film Festival Best Actress award sa Spain.

Isinilang si Rustica noong Agosto 9, 1930, sa Paombong, Bulacan.

Nag-umpisa siyang umawit sa operetta noong siya ay 10 taong gulang lamang.

Nag-aral sa Philippine College of Commerce sa Manila, na ngayon ay Polytechnic University of the Philippines (PUP) at nagtapos ng associate degree in commercial science ng may karangalan. Nag-aral din siya ng Bachelor of Arts, major in English sa Manuel L. Quezon University (MLQU) at nagtapos bilang magna cm laude.

Makaraang makakuha ng Fulbright at International House scholarships ay pinili ni Rustica ang New York University (NYU) sa bansang United States para sa kanyang graduate work, hanggang sa nagtapos ito ng Master of Arts in education, major in speech education noong 1956 sa Steinhardt School of Culture, Education and Human Development ng NYU.

Nagtapos naman ito ng PhD sa literature, meritissimus noong 1979 sa University of Santo Tomas (UST) sa Manila.

Isa rin siyang UNESCO fellow in Dramatic Arts sa National School of Drama and Asian Theatre Institute sa New Delhi, India.

Lumasap ng unang papel sa pelikula si Rustica sa pelikulang “Nunal sa Tubig” noong 1975 na idinirehe ni Ismael Bernal. Nasundan ito ng marami pang pelikula kabilang ang iba pang pelikulang “Captive”, “Aparisyon” at “Ano ang Kulay ng Nakalimutang Pangarap”.

Si Rustica ay isa ring Palanca Award-winning essayist, at naging awardee at hurado rin ng Timpalak Talaang Ginto Gantimpalang Collantes ng Surian ng Wikang Pambansa (SWP) na ngayon ay Komisyon sa Wikang Filipino (KWF).

Bilang dating public servant, natalaga rin si Rustica sa iba’t ibang tungkulin sa gobyerno tulad sa Movie and Television Review and Classification Board (MTRCB) bilang board member simula 1996 hanggang 1998; Videogram Regulatory Board simula 1998 hanggang 2000 kung saan miyembro siya ng Movie Committee on Appeals. (JESS GALANG)

31/01/2022

2019 MISS UNIVERSE USA TUMALON SA KAMATAYAN

Tumalon sa kanyang sariling kamatayan mula sa gusaling may 60 palapag si dating Miss Universe USA Cheslie Kryst sa New York City, USA.

Si Kryst, 30 anyos na isang abogada at correspondent sa entertainment news program na “Extra,” ay nakatira sa ika-9 na palapag ng Orion building sa 350 W. 42nd, at huling nakitang buhay sa 29th-floor terrace kung saan ito hinihinalang nagmula nang tumalon dakong alas-7:15 ng umaga ng araw ng Linggo, ayon sa pulisya.

Nakita naman ang nalasog nitong katawan sa kinabulusukang kalsada kung saan din ito idineklarang patay ng pulisya.

Ilang oras bago ang pagppatiwakal ay nag-post pa ang beauty queen sa kanyang Instagram page ng: “May this day bring you rest and peace ❤️.”

Isang su***de note din ang iniwan nito kung saan nakasaad na nais niyang iwanan ang lahat sa kanyang ina, ayon sa ilang source.

Ganunpaman ay hindi na umano binanggit ni Kryst sa kanyang “su***de note” ang dahilan o motibo ng kanyang pagpapatiwakal.

Sa inilabas na statement ay kinumpirma ng kanyang pamilya ang kamatayan ng beauty queen.

“In devastation and great sorrow, we share the passing of our beloved Cheslie,” nakasaad sa statement.

“Her great light was one that inspired others around the world with her beauty and strength. She cared, she loved, she laughed and she shined. Cheslie embodied love and served others, whether through her work as an attorney fighting for social justice, as Miss USA and as a host on EXTRA. But most importantly, as a daughter, sister, friend, mentor and colleague – we know her impact will live on," ayon pa sa kanyang pamilya.

Unang sumabak si Kryst sa 2019 Miss North Carolina at 2019 Miss USA beauty pageant at nakuha ang korona bilang kinatawan ng kanyang bansa sa 2019 Miss Universe.

Si Kryst kasama sina Nia Imani Franklin na nagwaging 2019 Miss America, Kaliegh Garris na naging 2019 Miss Teen USA at Zozibini Tunzi na tinaggal na 2019 Miss Universe ang unang grupo ng “black woman” na pawang nakuha ang titolo at korona sa timpalak pangkagandahan sa loob ng 1 taon. (JESSE DIAMANTE)

28/01/2022

SENADOR NASA LIKOD NG DELAY NA HATOL SA DISQUALIFICATION CASE NI MARCOS?

Senador ang bali-balitang nasa likod ng pag-antala sa kasong diskwalipikasyon ni presidential aspirant Bongbong Marcos, Jr. sa 2022 elections.

“Hindi ko alam kung [galing PDP-Laban], pero malamang senador," banggit ni Commission on Elections (Comelec) commissioner Rowena Guanzon sa panayam ng "Mangahas Interviews," nitong Biyernes.

Nitong nakaraang Huwebes nang kapanayamin si Guanzon sa GMA news at ianunsyo nitong bumoto na siya pabor sa petisyon na i-disqualify si Marcos, Jr. kahit hindi pa binabasa ang pinal na hatol, na "unreasonable delay" na umano.

Nitong nakalipas na Enero 17 pa kasi dapat ang promulgation.

“Iniipit nila diyan kay Commissioner Aimee Ferolino. Pulitiko ito, malaking poderoso ito, kasi hindi naman gagawin ito ni Commissioner Aimee na hindi siya nakasandal sa taong malakas,” ayon pa kay Guanzon sa panayam ng nasabing programa.

Sina Guanzon, Ferolino na dating election supervisor ng Davao del Norte na itinalagang commissioner ni Pangulong Rodrigo Duterte noong Nobyembre 2020 kasama si Marlon Casquejo na dating election officer naman ng 1st District sa Davao City na hinirang ni Pangulong Duterte noong Hunyo 2018 ang 3 miyembro na bumubuo sa First Division ng Comelec.

Una nang pinangalanan ni Guanzon si Ferolino bilang ponente ng kaso, na tumigil na umano sa ngayon sa pagsagot sa mga tawag at mensahe.

Labis namang ikinababahala ng ilang sektor ang sinasabing "iniimpluwensyahan" ng mga makapangyarihang tao ang desisyon sa disqualification case ni Marcos dahilan kung bakit hindi pa rin daw mailabas ang hatol. (JESSE DIAMANTE)

28/01/2022

BBM AT ISKO MAY BAHID AT ISYU NG KORAPSYON — PACQUIAO

May isyu at bahid umano ng korapsyon sina dating senador Bongbong Marcos at Manila Mayor Isko Mireno kaya hindi ito dapat iboto bilang pangulo ng bansa sa Mayo 9.

“May corruption issue.” Iyan ang binitiwang sagot ni presidential aspirant at senador Manny Pacquiao nang tanungin ni television host Boy Abunda ngayong Biyernes kung bakit hindi dapat iboto si Moreno.

Sa parehong tanong tungkol kay Marcos, Jr. ay sinabi ni Pacquiao na may bahid at isyu ng corruption ang dating senador.

“May bahid ng corruption, may issue ng corruption, alam mo naman ang corruption sa ating bansa eh talagang 'yan ang dahilan kung bakit kami naghirap,” ani Pacquiao patungkol kay Marcos.

Tanging mga katagang “Hindi ko alam” naman ang naisagot ng dating world boxing champion nang ibato ang parehong tanong patungkol kina Vice President Leni Robredo at Senador Panfilo Lacson.

Nang tanungin naman ito kung bakit siya ang dapat na ibotong pangulo ng bansa sa eleksyon ay sinabi ni Pacquiao na karapat-dapat syang iboto ng taumbayan dahil bilang dating mahirap ay alam niya kung paano solusyunan ang problema ng mga mamamayan.

“Dumanas kami sa hirap, nagutom kami, tubig lang inumin namin para makasurvive sa isang araw. ‘Yan yung desire ko sa puso ko na gusto kong tulungan ang mahihirap na tao dahil dumanas ako ng walang pagkain sa isang araw,” maluha-luhang pahayag nito.

Nakikita umano ni Pacquiao kung ano ang realidad at ano ang problema ng bansa na masosolusyunan umano niya kapag nagwagi siyang pangulo sa eleksyon sa Mayo 9, 2022. (JESSE DIAMANTE)

27/01/2022

BOTO NI COMMISSIONER GUANZON:
I-DISQUALIFY SI MARCOS, JR.

Inilabas na ni Commission on Elections (Comelec) Commissioner Rowena Guanzon kahapon ang kanyang boto para i-disqualify si presidential aspirant Ferdinand “Bongbong” Marcos Jr. sa eleksyon sa Mayo 9.

Aniya sa panayam kagabi ng programang 24 Oras sa GMA sa tingin niya ay mayroon talagang moral torpitude dahil sa kabiguang magbayad ng mga income tax nooong dekada 80 ni Marcos.

“Ang boto ko is-DQ si Marcos Jr. Sa tingin ko may moral torpitude talaga based on evidences and the law,” pahayag ni Guanzon.

Ginawa nito ang pag-anunsyo bago ang promulgasyon ng paghatol ng dibisyon ng poll body sa mga petisyon laban kay Marcos.

Kung susundin ang timeline ni Guanzon ang hatol ay dapat na ilabas noong pang Enero 17. Ito ay naantala makaraang dapuan umano ng sakit na COVID-19 ang ponente (writer) na si Commissioner Aimee Ferolino na dating election supervisor ng Davao del Norte na itinalagang commissioner ni Pangulong Rodrigo Duterte noong Nobyembre 2020.

Sina Guanzon, Ferolino at Marlon Casquejo, dating election officer ng 1st District sa Davao City na hinirang ni Pangulong Duterte noong Hunyo 2018 ang 3 miyembro na bumubuo sa sa First Division ng Comelec na humahawak sa 3 disqualification case ni Marcos Jr. na isinampa ng Akbayan Party, paksyon ng Pardito Federal ng Pilipinas (PFP) at isang nagngangalang Bonifacio Ilagan.

Naniniwala si Guanzon na tila umano sinasadya ang pagpapatagal sa pagpapalabas ng boto ng 1st Division hanggang sa magretiro na siya.

May natanggap umano siyang impormasyon na sadyang may nakikialam umano sa kaso.

Samantala, ang 1 pang kaso na diskwalipikasyon kay Marcos na nasa 2nd Division naman ay ibinasura na noong Enero 17.

Ganunpaman ay maaari itong iapela sa Comelec en banc, at maaaring umabot hanggang sa Supreme Court (SC).

Nakatakda umanong iapela sa Comelec en banc ng mga civi leader na kinakatawan ni dating Supreme Court spokesperson Ted Te ang naging desisyon ng 2nd Division. (JESSE DIAMANTE)

25/01/2022

TALLANO GOLD ‘DI TOTOO, ITINANGGI NI BBM

Itinanggi ni presidential bet Ferdinand “Bongbong” Marcos Jr. ang Tallano gold kumakalat sa mga social media platform na ipamimigay nito sa mga Filipino kung manalo sa eleksyon sa Mayo.

“Hindi pa ako nakakita ng gold na ganyan,” ani Marcos.

“Marami akong kilala na naghuhukay pero ako wala pa akong nakikita na kahit anong klaseng gold na sinasabi nila. Baka may alam sila, sabihan ako, kailangan ko yung gold. Wala pa akong nakikitang gold,” wika pa nito sa panayam ng One News PH..

Inihayag ni Marcos ito sa panayam upang itanggi ang kinakalat ng kanyang mga tagasuporta sa social media na nagbayad ang royal Tallano family sa yumao nitong ama na si Ferdinand Marcos Sr. ng daan-daang toneladang ginto bilang kabayaran sa kanyang paglilingkod bilang abogado.

Kahit ang website ng partidong itinatag ng pamilya Marcos na Kilusang Bagong Lipunan ay may kuwento ng Tallano gold.

Nauna nang tinanggi Atty. Victor Rodriguez na spokesman ng pamilya marcos na mayroon siyang alam sa Tallano gold.

“To be candid with you, I have always been candid with all of you. Hindi ko alam,” wika ni Rodriguez.

Para naman kay Senadora Imee Marcos ay urban legend ang Tallano gold.

“I think its fun to think of all the gold, and it continues to be urban legend,” pahayag ng senadora sa isang panayam sa telebisyon. (JESSE DIAMANTE)

Filipino Headline News

01/03/2023

31/01/2023

31/01/2023

30/01/2023

29/01/2023

28/01/2023

28/01/2023

27/01/2023

27/01/2023

22/01/2023

25/05/2022

21/05/2022

30/04/2022

15/03/2022

14/02/2022

05/02/2022

02/02/2022

31/01/2022

28/01/2022

28/01/2022

27/01/2022

25/01/2022

Address

Website

Alerts

Videos

Shortcuts

Share