Siklab ng Katagalugan

24/06/2024

𝐏𝐀𝐓𝐔𝐋𝐎𝐘 𝐍𝐀 𝐌𝐀𝐆-𝐀𝐋𝐀𝐁, 𝐌𝐆𝐀 𝐃𝐀𝐖𝐀𝐍𝐈 𝐍𝐆 𝐒𝐈𝐊𝐋𝐀𝐁 𝐍𝐆 𝐊𝐀𝐓𝐀𝐆𝐀𝐋𝐔𝐆𝐀𝐍!

Lubos na pasasalamat ang handog ng buong samahang SNK sa mga miyembro nito mula sa Batch 2024 - Dawani para sa sipag at tiyaga na kanilang inilaan sa kanilang paglilingkod bilang mga mamamahayag sa Pisay CALABARZON!

Binabati ng Siklab ng Katagalugan ang aming founding Editor-in-Chief na si Caryl Angela Opulenica, unang Tagapangasiwang Patnugot na si Princess Jasmine Gonda, at Tagapangasiwa ng Pag-uulo at Pagwawasto ng Balita na si Emmanuel Ceribo.

Buong pusong pasasalamat din ang handog ng SNK kina Sophie Arago (Pagsulat ng Balita), James Gatchalian at Karl Cueto (Paglalarawang Tudling), at Ella Joy Dilan (Pag-uulo at Pagwawasto ng Balita) para sa kanilang tulong sa pagtataguyod ng Siklab ng Katagalugan.

Kaya kahit san pa kayo magtungo, nananalig ang Siklab ng Katagalugan na patuloy na mag-aalab ang inyong mga puso para sa malaya at makatotohanang pamamahayag sa patuloy ninyong paglaot sa dagat ng buhay!

Padayon, Batch 2024 Dawani!

🎨 Disenyo at Kapsyon ni: Nash Ontua

24/06/2024

Ipinagmamalaki ka ng buong samahan, Caryl!

Ehemplo ka para sa kanila. At patuloy na mag-alab patungo sa dakilang minimithi!

Pagbati sa iyo Punong Patnugot Caryl Angela Opulencia!

24/06/2024

| 𝐏𝐚𝐠𝐛𝐚𝐭𝐢 𝐬𝐚 𝐦𝐠𝐚 𝐁𝐚𝐠𝐨𝐧𝐠 𝐈𝐬𝐤𝐨𝐥𝐚𝐫-𝐌𝐚𝐦𝐚𝐦𝐚𝐡𝐚𝐲𝐚𝐠 𝐧𝐠 𝐏𝐢𝐬𝐚𝐲 𝐂𝐀𝐋𝐀𝐁𝐀𝐑𝐙𝐎𝐍!

Matapos ang mahigit isang buwan ng aplikasyon, pagsasanay, eksaminasyon, at pagtatasa, tuluyan nang nagtatapos ang Tawag ng Aplikasyon - Mayo 2024!

Binabati ng Siklab ng Katagalugan ang 29 na bagong miyembro nito na magsisilbi sa komunidad ng Pisay CALABARZON bilang mga tagapagpatuloy ng nag-aalab, makatotohanan, at malayang pamamahayag sa wikang Filipino!

Muli, mula sa pamunuan at sa mga manunulat ng SNK, pagbati mga bagong iskolar-mamamahayag ng Pisay CALABARZON!

🎨 Disenyo ni: Yasmine Mariano
✍️ Kapsyon ni: Nash Ontua

14/06/2024

𝐇𝐈𝐑𝐀𝐘𝐀 𝐌𝐀𝐍𝐀𝐖𝐀𝐑𝐈, 𝐂𝐀𝐑𝐘𝐋 𝐀𝐓 𝐊𝐀𝐒𝐒𝐘!

Taos pusong suporta ang alay ng buong komunidad ng Pisay CALABARZON para sa inyong paglahok sa National Schools Press Conference (NSPC) 2024 na gaganapin sa Carcar City, Cebu ngayong July 8-12, 2024! Sa inyong pagkamit ng dakilang minimithi, makasisigurado kayong nasa puso't isipan ng bawat estudyante, g**o, at magulang hindi lamang sa Pisay, ngunit ng buong CALABARZON na rin, ang panalangin para sa inyong tagumpay!

Padayon, Caryl at Kassy!

12/06/2024

| 𝐋𝐔𝐌𝐀𝐍𝐆 𝐌𝐔𝐊𝐇𝐀

Panulat ng: Siklab ng Katagalugan

Mas lalo pang humapdi ang mga hindi mahilom-hilom na sugat na buhat ng panahon ng batas militar nang nilagdaan ni Pangulong Ferdinand “Bongbong” Marcos Jr. ang Memorandum Circular No. 52 o ang pagpapaigting ng mga prinsipyo ng “Bagong Pilipinas” na tatak ng kaniyang administrasyon. Ngunit ngayong araw ng kalayaan, hindi pa rin sapat ang pangako ng isang malaya at “Bagong” Pilipinas kung hindi naman tatalikuran ng pangulo ang pagkakahalintulad nito sa lumang “Bagong Lipunan” na tatak ng kaniyang amaing diktador.

Kabilang sa naturang memorandum na inilabas ng pangulo nitong Hunyo 4, 2024 ang pagrerecite ng Bagong Pilipinas hymn at pledge sa lahat ng mga pampublikong paaralan, kolehiyo, at maging unibersidad sa bansa. Binubuo ang hymn na pinamagatang “Panahon na ng Pagbabago” ng sampung (10) saknong habang siyam (9) na saknong naman ang “Panata sa Bagong Pilipinas” pledge. Matatagpuan sa pledge at hymn ang mga pariralang “makikilahok ako sa mga adhikain ng pamamahalaan” at ang konsepto ng “Bagong Pilipino at Bagong Pilipinas.” Sa harap ng hatol ng kasaysayan at ng konstitusyon sa pamilyang Marcos, naisisiwalat ang lumang mukha sa likod ng bagong Pilipinas.

Ayon sa opinyon ng mga eksperto at abogado na kinalap ng Congress of Teachers/Educators for Nationalism and Democracy o CONTEND, nakapailalim sa RA 8491 o ang Flag Law na ang Office of the President (OP) ay walang “authority to create and require a new hymn…or pledge to recite during flag ceremonies in the country.” Wala sa mandato ng OP ang pagpapatupad ng bagong mga hymn at pledge sa mga flag ceremony sa buong bansa – ito ay labag sa batas.

Hindi rin maipagkakait ang pagkakahalintulad ng Bagong Pilipinas sa “Bagong Lipunan” na tatak ni dating diktador Ferdinand Marcos Sr. noong dekada ‘70. Ayon naman kay Alliance of Concerned Teachers o ACT Teachers party-list Rep. France Castro, mayroong “political motive, [ang] pagpapakanta at pagpapa-recite nitong [Bagong Pilipinas] hymn and pledge” at nakababahala rin ang “precedent” na ito sa mga susunod na administrasyong “gagawa ng mga ganitong gimik.”

Binatikos din ni Rep. France Castro ang patuloy pang pagpapahaba ng nakatakdang 40 minutong Flag Ceremony at Flag Retreat na nakapaloob sa seksyon 18 ng Flag Code. Sa Pisay pa nga lamang, kinakailangan na ng mga iskolar at empleyadong daanan ang Lupang Hinirang, Panatang Makabayan, Panunumpa sa Watawat, PSHSS Hymn, DOST Hymn, Quality Policy at Mission and Vision ng PSHSS, Panunumpa ng Lingkod Bayan, at marami pang ibang anunsyo tuwing lunes nang umaga.

Kung kaya’t kahit paniwalaan pa ng taumbayan si Marcos sa kaniyang mga nagbabalatkayong propaganda, hindi pa rin mawawala sa isipan ng mga Pilipino ang nakaririndi at paulit-ulit na mga panata at awit na siyang hindi naman nauunawaan ng karamihan sa kanila.

Nararapat lamang at hindi nakabibiglang niluluwa ng mga Pilipino ang kasinungalingan at pagpapanggap na pagiging “makabayan” ng lahing-diktador na mga Marcos. Walang lugar ang mga lumang mukha sa isang “bagong” Pilipinas.

Gayunpaman, hangad pa rin ng karamihan ang isang progresibo at maunlad na bansa. Kung pagbabago ang hangad ng mga Pilipino, nararapat lamang na sila ay maging aktibo sa politikal at panlipunang aspeto ng Pilipinas. Hindi lamang sa mga eleksyon natatapos ang “civic duty” ng isang Pilipino, bagkus dapat ay sinisiyasat niya ang kaniyang lipunang kinagagalawan sa pamamagitan ng paglahok sa politikal na proseso ng republika. Maraming mga legal na organisasyon sa loob at labas ng pamahalaan mula sa Sangguniang Kabataan (SK) hanggang sa mga unyong pangmanggagawa ang maaaring salihan ng kahit sino pa mang Pilipino. Tanging ang paggalaw ng bawat isa ang siyang magdadala ng matiwasay na hinaharap sa gitna ng patuloy na nagbabagong panahon.

Lahat tayo ay naghahangad na umunlad ang Pilipinas at gayundin ang ating mga buhay, ngunit panahon nang tanggapin na hindi ito maaabot sa ilalim ng pamamalakad ng isang tusong Marcos. Makararating lamang tayo sa isang Bagong Pilipinas sa pamamagitan ng progresibo at aktibo na sambayanang Pilipino, hindi ng mga naglulumaang mukha ng pamilyang Marcos.

06/06/2024

𝐓𝐈𝐍𝐆𝐍𝐀𝐍: SNK, naghandog ng Campus Journalism workshop para sa mga iskolar

Ginanap kahapon sa AVR ang Balik-Iskolar 2024, isang workshop na inorganisa ng pamunuan ng SnK para sa kanilang mga miyembro at mga nais mapabilang sa nasabing pahayagan.

Pinangunahan ng mga patnugot ng bawat seksyon ang mga inihandang talakayan at pagsasanay sa pagsulat ng balita, lathalain, opinyon, at isports.

Bagaman hindi natapos ang naturang workshop dahil sa problema sa iskedyul, asahan namang ipagpapatuloy online ang mga workshops para sa agham, pagwawasto at pag-uulo ng balita, disenyo, larawang pampahayagan, at paglalarawang tudling.

Mangyaring umantabay sa mga anunsyong ilalabas ng SnK ukol sa mga gaganaping workshops sa mga susunod na araw.

✍️ Panulat ni: Kassy Cueto
📸 Larawan ni: Ash Damot

06/06/2024

06/06/2024

𝐊𝐈𝐍𝐀𝐏𝐎𝐒 𝐏𝐄𝐑𝐎 '𝐃𝐈 𝐍𝐀𝐆𝐏𝐀𝐓𝐀𝐏𝐎𝐒: Blue Knights nasilat ang natutulog na depensa ng Gray Wolves

Sa kabila ng kakulangan sa manlalaro, nanatili pa ring matatag ang Blue Knights sa pamumuno ni Timothy Tavita na kumana ng 6 na puntos upang maiuwi ang ikatlong pwesto sa Iskolaro Basketball 2024 na ginanap sa loob ng gynasium, na may iskor na 17-14.

✍️ Panulat ni: Timothy Eudela
📸 Larawan ni: Karelle Malabanan
🎨 Disenyo ni: Yasmine Mariano

05/06/2024

| 4N1, Lumanay, itinanghal na mga kampeon ng Battle of the Bands 2024

Naiuwi ng mga bandang 4N1 at Lumanay ang kampeonato sa isinagawang Battle of the Bands (BOTB) 2024 matapos mapatunayan ng mga ito ang kanilang kahusayan sa musika at pagtatanghal.

Nahati sa dalawang kategorya ang nasabing patimpalak: Junior (Grades 7-9) na siyang pinagwagian ng Lumanay at Senior (Grades 10-12) ng 4N1.

Ginawaran din ng mga special award sina Solange Gualberto (Best Vocalist), Kyle Dizon (Best Bassist), Vince Ilagan (Best Lead Guitarist), Gillienne Urrea (Best Keyboardist), Arianne Borlasa (Best Drummer), Charles Diokno (Best Rhythm Guitarist), 4N1 (Best Arrangement), at Sleepyheads (Showmanship Award).

Nagwagi naman sa kabuuang patimpalak ang mga bandang Add Option sa ikatlong puwesto, Lumanay sa ikalawang puwesto, at 4N1 bilang mga kampeon.

Samantalang nagkaroon din ng special performance ang nagbabalik-Pisay na bandang "Rio" na binubuo ng mga alumni mula batch 2023.

Naglaban-laban ang mga bandang Sonnets of Paranoia, Skolarium, 4N1, Ten Minutes Grace Period, Sleepyheads, Alas dos, Lumanay, You I Love, at Add Option para sa kampeonato ng BOTB 2024 sa Multi-purpose Gymnasium ng Pisay CALABARZON.

✍️ Panulat nina: Kassy Cueto at Nash Ontua
📸 Larawan nina: Alexa Pujol at Boeing Cabautan
🎨 Disenyo ni: Nash Ontua

04/06/2024

𝐇𝐔𝐋𝐈𝐍𝐆 𝐇𝐀𝐊𝐁𝐀𝐍𝐆 𝐒𝐀 𝐊𝐀𝐌𝐏𝐄𝐎𝐍𝐀𝐓𝐎: Retrievers, Tigers maghaharap sa basketball finals

Pinangunahan muli ni Rovin Tolentino ang Golden Retrievers upang muling itaas ang bandilang dilaw sa Finals ng Iskolaro Basketball 2024, matapos malusutan ang matibay na depensa ng Blue Knights sa iskor na 18-17.

Habang pinatunayan naman ng Orange Roaring Tigers ang kanilang dominasyon sa basketball court matapos nilang pigilan ang 15-point run ng Grey Wolves, 34-27 kahapon.

✍️ Panulat ni: Kurdt Quinto
📸 Larawan nina: Karelle Malabanan at Alexa Pujol
🎨 Disenyo ni: Yasmine Mariano

04/06/2024

𝐓𝐀𝐏𝐎𝐒 𝐀𝐍𝐆 𝐋𝐀𝐁𝐀𝐍: Hollow Purple, nandurog sa men’s doubles

Tinambakan ng Hollow Purple duo na sina Kristian Argañosa at Xerxes Luna ang mga manlalaro ng Blue Knights na sina Bryon Lauren Salamanca at Mark Yzac Rubang sa Table Tennis Men's Doubles Eliminations sa mga iskor na, 11-1, 11-5, na isinagawa sa dance room ng Multi-purpose Gymnasium.

✍️ Panulat ni: Nathan Gondra
📸 Larawan ni: Jodi Maulion
🎨 Disenyo ni: Yasmine Mariano

04/06/2024

𝐖𝐀𝐋𝐀𝐍𝐆 𝐏𝐀𝐓𝐔𝐌𝐏𝐈𝐊-𝐓𝐔𝐌𝐏𝐈𝐊: Swans, winasiwas ang Retrievers sa Table Tennis, 2-0

Lalaban sina Zoey Cabalu at Johann Quinto ng Black Swans sa semi-finals ng Women’s Doubles Table Tennis pagkatapos nilang durugin ang duo ng Golden Retrievers na sina Ysa Coronel at Erinn Pineda, 11-5, 11-6, na ginanap kanina.

✍️ Panulat ni: Gabbi Garcia
📸 Larawan ni: Jodi Maulion
🎨 Disenyo ni: Yasmine Mariano

04/06/2024

𝐍𝐀𝐆-𝐀𝐀𝐋𝐀𝐁: Green Flags, wagi sa madikit na laban

Nasulot ng Green Flags duo na sina Rene Timothy Eudela at John Benedict Lapitan ang puwesto sa semi-finals matapos patumbahin ang Roaring Tigers na sina Noah Guinto at Jeff Bryan Valle sa Elimination Round ng Table Tennis Men’s Doubles na ginanap sa loob ng Dance Room, matapos malamangan sa unang set, 6 -11, at makabawi sa ikalawa at ikatlong set, 11-7, 12-10.

✍️ Panulat ni: Nathan Gondra
📸 Larawan ni: Jhet Claveria
🎨 Disenyo ni: Yasmine Mariano

04/06/2024

𝐓𝐈𝐍𝐆𝐍𝐀𝐍: Roaring Tigers, namayani sa Mixed Doubles, 2-1

Susulong sa semi-finals ang duo nina Charles Diokno at Janea Rosales ng Orange Roaring Tigers matapos nila patumbahin sina Josue Miguel Maramo at Julliana Rebullido ng Green Flags sa Mixed Double Table Tennis Eliminations, 11-8, 6-11, 11-7, na ginaganap sa Dance Room.

✍️ Panulat ni: Gabbi Garcia
📸 Larawan ni: Ash Damot
🎨 Disenyo ni: Yasmine Mariano

03/06/2024

| Roaring Tigers, Wolves, nangibabaw sa Basketball Court

Pinangunahan ni Raniel Josef Jugno, na nagtala ng 10 puntos, ang Grey Wolves upang itaboy ang Black Swans sa isang overtime na laro, 21-18.

Habang nanaig naman sa tagisan ng galing at lakas ng loob ang Orange Roaring Tigers kontra sa Blazing Red Dragons upang isara ang Elimination Rounds ng Iskolaro Basketball 2024 sa malapit na iskor na 23-22.

Isinagawa ang mga naturang patimpalak kahapon, Hunyo 3 sa Multi-purpose Gymnasium ng PSHS-CALABARZONRC.

✍️ Panulat ni: Kurdt Quinto
📸 Larawan nina: Karelle Malabanan at Alexa Pujol
🎨 Disenyo ni: Angelique Abayari

03/06/2024

| Student Alliance Officers para sa A.Y. 2024 - 2025, opisyal nang kinilala

Ipinroklama na sa puwesto ang mga bagong pinunong bubuo sa Student Alliance o SA para sa pang-akademikong taon 2024 - 2025 matapos ianunsyo kanina ng Campus Electoral Board ang opisyal na resulta ng eleksyon.

Inihalal na bagong SA President si Geomad Paolo Galang, isang mag-aaral mula ika-11 baitang, na may adbokasiyang ‘TAP’ - transparency, advancing communication both internally and externally, at promoting service to the community.

“We all know that there are issues, there will be issues, pero as your running president, I hope na you’ll come to see this challenge with me and our future set of officers next school year,” wika ng A.Y. 2024-2025 SA President.

Kaakibat din niyang manunungkulan sa SA sina Samantha Grace Andan (Internal Vice President), Hannah Gabrielle Garcia (External Vice President), Venisse Sta. Ana (Secretary), Andres Araos (Assistant Secretary), Franchesca Mia Hernandez (Treasurer), Ma. Francheska De Dios (Auditor), Mariella Francheska Nami Icao (P.R.O.), at sina Ira Matthew Cailles at Carmela Halili (Peace Officer).

Matatandaan ding ginanap noong Biyernes, Mayo 31 nang umaga ang Miting de Avance para sa mga kumakandidato sa SA kung saan nagpakilala at nagtagisan ang bawat isa ng kani-kanilang mga proyekto at plataporma.

Nagsilbi namang mga presinto ng pagbobotohan ng mga iskolar mula ika-7 hanggang ika-11 baitang ang mga klasrum.

Kabilang sa mga tumakbo sa Halalan 2024 ang partidong SULIT, TALA partylist, at iilang mga independent na kandidato.

✍️ Panulat ni: Kassy Cueto
📷 Larawan ni: Jhet Claveria
🎨 Disenyo ni: Angelique Abayari

03/06/2024

𝐊𝐀𝐏𝐀𝐏𝐀𝐒𝐎𝐊 𝐋𝐀𝐌𝐀𝐍𝐆: Blue Knights at Green Flags, sinungkit ang kampeonato sa Mr. and Ms. Iskolaro 2024

Waging nasungkit ng mga kalahok mula Blue Knights na sina Eloisa Joy Ayoso at Albeen Xymone Macaraig mula Green Flags ang kauna-unahang titulo ng Mr. & Ms. Iskolaro kaninang umaga.

Nakuha naman nina Margareth Karelle Malabanan (Green Flags) at Joaquin Angelo Dela Cruz (Golden Retrievers) ang ikalawang puwesto habang nakamit naman ng mga pambato ng Orange Roaring Tigers na sina Amaya Dimapilis at Emmanuel Ceribo ang ikatlong puwesto.

✍️: Kassandra Cueto
📸: Jhet Claveria, Ash Damot, Jodi Maulion

31/05/2024

| PISAY-CALABARZONRC, nakiisa sa pagdiriwang ng International Day for Biological Diversity 2024

Masiglang ipinagdiwang ng buong komunidad ng PISAY-CALABARZON ang International Day for Biological Diversity (IDB) 2024 na pinangunahan ng Biology & Agriculture Unit o BAU.

Nagkaroon ng tatlong mahahalagang aktibidad ang selebrasyon: Lens of Nature: Photo Essay Competition, Biodiversity Exhibit kung saan tinalakay at ipinakita ng Biology 3 students ang kahalagahan ng biodiversity, at ang Biology 4 Informercials Mini Film Festival na nagbigay daan naman sa mga mag-aaral mula Biology 4 na maging malikhain sa pagtatalakay ng iba’t ibang isyu at paksa ukol sa naturang tema.

“Matagumpay nating naisagawa ‘yung mga aktibidad na pinlano natin and at the same time, ito nga ‘yung unang pagkakataon na sinelebrate natin ‘yung IBD. […] ‘Yung tema ngayong taon ay isang hamon sa atin na maging bahagi ng aksyon at solusyon sa pagpigil at pag-reverse ng ating biodiversity loss,” wika ni John Joshua Azucena, isa sa mga g**o ng BAU.

Hinihikayat din nila ang lahat na makiisa sa pangangalaga ng samu't saring saribuhay sa pamamagitan ng iba't ibang conservation efforts.

Matatandaang sumusunod sa temang "Be Part of the PLAN" ang IBD ngayong taon na siyang nagsisilbi bilang isang 'call to action' sa mga mamamayan na suportahan ang Biodiversity Plan na nakapokus sa pagpoprotekta at pagpapahalaga ng biodiversity.

Panulat nina: Kassandra Cueto at Kate Ngitit
Disenyo ni: Yasmine Mariano
Larawan nina: Jhet Claveria at Karelle Malabanan

31/05/2024

𝐍𝐀𝐍𝐆𝐘𝐀𝐘𝐀𝐑𝐈 𝐍𝐆𝐀𝐘𝐎𝐍:
Sinimulan na ang 2024 Student Alliance Elections na nilahukan ng mga mag-aaral mula Baitang 7 hanggang Baitang 11 sa bawat klasrum ngayong umaga. Inaasahang matatapos ang bilangan ng boto bago maganap ang flag retreat.

24/05/2024

| PSHS-CALABARZONRC, nagtamo ng 68% na passing rate sa UPCAT 2024

Nagkamit ng 68% na passing rate ang Batch Dawani ng PSHS-CALABARZONRC, sa University of the Philippines - College Admission Test o UPCAT 2024 na mas mataas kumpara sa kinalabasang 62.5% passing rate ng paaralan noong nakaraang taon sa UPCA.

Ito ang unang pagkakataong kumuha ang isang graduating batch ng naturang paaralan ng isang entrance test upang makapasok sa UP at nagtagumpay na matamo ang ikalawang puwesto sa pinakamaraming UPCAT passers sa buong bansa.

Bilang paghahanda naman sa nasabing entrance exam, iba’t ibang hakbang ang ginawa ng Pisay admin upang matulungan ang mga mag-aaral sa kanilang pagre-review.

“Some of the measures undertaken by the Pisay admin for UPCAT are intensifying the PANDAYAN review, college fair, career counseling, and linkage/s with external review center, which is free of charge, for incoming Grade 12 students,” pagbabahagi ni Bb. Benita Laurena, isa sa mga Guidance Counselor ng kampus.

Opisyal na ipinadala ng UP Office of Admissions ang mga resulta ng UPCAT 2024 sa mga aplikante noong ika-19 ng Abril kung saan tinatayang 77 na estudyante ang pumasa sa nasabing eksaminasyon.

Kasama sa mga pinagpilian ng mga mag-aaral ang UP Los Baños, UP Diliman, UP Manila, UP Baguio, at UP Visayas.

Pinuri naman ni Curriculum & Instruction Division Chief Mabelle Furto itong natatanging tagumpay ng Batch Dawani.

“Ang inyong pagsusumikap at dedikasyon ay nagbunga ng isang malaking tagumpay na hindi lamang para sa inyong mga sarili, kundi pati na rin sa ating buong paaralan. Nawa’y magsilbing inspirasyon ang inyong tagumpay sa inyong mga kapwa mag-aaral at patuloy kayong magsikap para sa mas mataas na mga pangarap. Asahan ninyo ang aming patuloy na suporta sa inyong paglalakbay tungo sa mas maliwanag na kinabukasan."

Samantala, ibinahagi ni Ysa Casayuran, isa sa mga UPCAT passer ng batch, ang pagiging 'challenging' ng UPCAT ngayong taon dahil na rin sa dami ng sumubok sa nabanggit na pagsusulit.

Nag-iwan din siya ng ilang paalala para sa mga iskolar na kukuha ng UPCAT at iba pang mga college entrance test sa mga susunod na taon.

“Wag kayong kabahan, lalo na kapag exam day na mismo, mahihirapan lang kayong mag-concentrate and magsagot. During the days leading up to the exam, be consistent with studying and trying practice tests para masanay na, lalo na sa time management,” wika niya.

Mapapansin namang tumaas ang passing rate ng graduating batch ng PSHS-CALABARZONRC sa naturang pagtatasa na magbibigay daan na maipagpatuloy ng mga iskolar ang kanilang pag-aaral sa pinakaprestihiyosong unibersidad sa Pilipinas.

Panulat nina: Sophie Arago at Kassandra Cueto
Larawan ni: Ashtanna Damot
Disenyo ni: Angelique Abayari

19/05/2024

𝗜𝗦𝗞𝗢𝗟𝗔𝗥 𝗡𝗚 𝗕𝗔𝗬𝗔𝗡, 𝗦𝗨𝗠𝗔𝗟𝗜 𝗦𝗔 𝗦𝗜𝗞𝗟𝗔𝗕 𝗡𝗚 𝗞𝗔𝗧𝗔𝗚𝗔𝗟𝗨𝗚𝗔𝗡!

Mga iskolar-mamahayag ng hinaharap, bukas na ang mga pintuan ng Siklab ng Katagalugan sa mga bagong talentong mayroong kakayahan at pag-aalab na magsulat, kumuha ng mga larawan, magdisenyo, magdibuho, o 'di kaya'y kumalap ng chismis sa loob at labas ng kampus!

Ngayon Taong Pampaaralang 2024-2025 papasok na ang Siklab ng Katagalugan sa ika-3 taon nito bilang pangunahing tagapagsulong ng malayang pamamahayag sa wikang Filipino sa PSHS-CALABARZONRC, kung kaya’t swak ang panahong ito para sa lahat ng mga iskolar na nais maglingkod sa komunidad ng Pisay bilang mamamahayag!

May pag-aalinlangan ka pa ba? 'Wag kang mag-alala! Magbubukas ang Siklab ng Katagalugan ng mga workshop at pagsasanay sa susunod na dalawang linggo para sa lahat ng mga iskolar mula ika-7 hanggang ika-12 baitang. Umantabay na lamang sa susunod pang mga post ng Siklab ng Katagalugan.

I-click ang sumusunod na link upang ma-access ang Google Forms link na magiging basehan ng iyong aplikasyon at interes na sumali sa SNK: https://bit.ly/SNKAplikasyonMayo2024

17/05/2024

𝐘𝐨𝐮𝐫 𝐇𝐨𝐧𝐨𝐫, 𝐡𝐢𝐧𝐝𝐢 𝐤𝐨 𝐩𝐨 𝐚𝐥𝐚𝐦 𝐧𝐚 𝐦𝐚𝐠𝐛𝐮𝐛𝐮𝐤𝐚𝐬 𝐧𝐚 𝐩𝐚𝐥𝐚 𝐧𝐠 𝐚𝐩𝐥𝐢𝐤𝐚𝐬𝐲𝐨𝐧 𝐚𝐧𝐠 𝐒𝐢𝐤𝐥𝐚𝐛 𝐧𝐠 𝐊𝐚𝐭𝐚𝐠𝐚𝐥𝐮𝐠𝐚𝐧...

Ngayong Mayo 20, 2024, Lunes, ay magsisimula na ang aplikasyon ng Siklab ng Katagalugan para sa mga future iskolar-mamamahayag ng Pisay CALABARZON sa taong pampaaralan 2024-2025.

Magsasagawa rin ang Siklab ng Katagalugan ng mga workshop at pagsasanay sa susunod na dalawang linggo para sa lahat ng mga iskolar mula ika-7 hanggang ika-12 baitang ukol sa pamamahayag pangkampus.

Maging bahagi ng opisyal na pahayagan sa Filipino ng PSHS-CALABARZONRC, sumali sa Siklab ng Katagalugan!

🎨: Angelique Abayari
✍️: Nash Ontua

20/04/2024

𝗚𝗿𝗮𝗱𝗲𝘀 𝟳-𝟵, 𝗯𝗮𝗹𝗶𝗸 𝗿𝗲𝗺𝗼𝘁𝗲 𝗹𝗲𝗮𝗿𝗻𝗶𝗻𝗴 𝗱𝘂𝗹𝗼𝘁 𝗻𝗴 𝗺𝗮𝘁𝗮𝗮𝘀 𝗻𝗮 𝗵𝗲𝗮𝘁 𝗶𝗻𝗱𝗲𝘅

Inanunsyo ng Office of the Campus Director (OCD) na pansamantalang babalik sa remote learning ang mga mag-aaral mula Grade 7 hanggang 9 habang patuloy naman ang face-to-face setup ng Grades 10-12 sa susunod na linggo, Abril 22-26.

Sa kalalabas lamang na Memorandum No. 2024-007, naging pangunahing dahilan ng half-half learning set-up ang inaasahang pagtaas pa ng heat index sa mga darating na araw sa Batangas City.

Matatandaang nagkaroon ng pagpupulong ang Student Alliance, General Parents and Teachers Association, Employees' Association, at Management Committee kahapon ng umaga hinggil sa magiging setup ng mga klase sa susunod na linggo.

Samantala, ipagagamit ng paaralan ang mga air-conditioned rooms sa Grade 10, kabilang na ang Computer Laboratory 1, Computer Laboratory 2, SSD Office, at Training Room para sa kanilang mga klase.

Para naman sa mga Grade 11 at 12, isasagawa ang Homeroom, Social Science, English, Filipino, Scale, at Research sa AVR at Activity Center habang ang mga Math, Core, at Elective classes naman ay gaganapin pa rin sa mga klasrum.

Asahan namang patuloy ang pagmomonitor ng paaralan sa heat index sa mga susunod na araw.

Mangyaring umantabay sa mga iba pang mga detalye mula sa pamunuan.

Panulat ni: Kassandra Cueto

17/04/2024

𝐏𝐈𝐒𝐀𝐘-𝐂𝐀𝐋𝐀𝐁𝐀𝐑𝐙𝐎𝐍𝐑𝐂, 𝐝𝐢𝐧𝐨𝐦𝐢𝐧𝐚 𝐚𝐧𝐠 𝐋𝐢𝐤𝐧𝐚𝐲𝐚𝐧 𝟐𝟎𝟐𝟒 𝐛𝐢𝐥𝐚𝐧𝐠 𝐩𝐚𝐧𝐠𝐤𝐚𝐥𝐚𝐡𝐚𝐭𝐚𝐧𝐠 𝐤𝐚𝐦𝐩𝐞𝐨𝐧

Namayagpag ang dalawang koponan ng Pisay CALABARZONRC sa LIKNAYAN 2024 matapos makamit ng Team 1 ang Overall Champion Award at makuha naman ng Team 2 ang Overall First Runner-up.

Ginanap ang nasabing paligsahan sa larangan ng pisika mula ika-13 hanggang ika-14 ng Abril 2024 sa Unibersidad ng Pilipinas - Los Baños sa pangangasiwa ng University of the Philippines - Applied Physics Society.

Binubuo ng iba't-ibang mga patimpalak ang nasabing paligsahan tulad ng Feature Writing, Amazing Race, Physics Communication Challenge, Battle of the Brains, Poster Making, at S.Ai.Phy o Science Investigatory Project.

“This is, in fact, the first in-person edition of Liknayan since 2019 and it felt good to be back as a participant again in the events,” banggit ni G. Francis Emralino, isa sa mga coach ng Pisay CALABARZON sa nasabing paligsahan kasama si Gng. Hazel Abareta.

Sa kategorya ng Feature Writing, nakuha ni Gilliene Nicole Urrea ng Team 1 ang unang pwesto samantalang nakuha naman ni Jacob Keanne Lontoc ng Team 2 ang ikatlong pwesto kung saan inatasan silang magsulat ng lathalain tungkol sa 2023 Nobel Prize award sa larangan ng pisika.

Nagpakitang-gilas din ang dalawang grupo ng Pisay CALABARZON sa Amazing Race kung saan itinuring na kampeon ang mga representatibo ng Team 1 na binubuo nina Rovin Matthews Tolentino, Adrian Joren Lantin, Charles Gerard Diokno, Reynaldo Dave Medina, at Gadriel Symone Dalangin samantalang nakamit nina Alfonso Vicente Perez, Caryl Angela Opulencia, Jacob Keane Lontoc, Nathaniel A. Contreras, Randall Maurice Cabautan at Lorenz Christen Gonzaga ang ikalawang pwesto.

“Overall, [the Amazing race was] thrilling, kasi first time [ko] with other campuses, tapos thrilling working with groupmates and yung feeling na paunahan… Actually, oo, [it made me more interested in physics] kasi yung methods nila is very special in a way na hindi puro words but more on practical applications,” sabi ni Randall Maurice Cabautan, isa sa mga kalahok ng Amazing Race.

Husay naman sa presentasyon ng kanilang mga pananaliksik ang ipinamalas ng mga mag-aaral sa S.Ai.Phy o Science Investigatory Project (SIP) kung saan nasungkit nina Lorenz Christen Gonzaga at Luiz Miguel Santos ng Team 2 ang unang pwesto habang nakuha naman nina Adrian Joren Lantin at Rovin Matthews Tolentino ng Team 1 ang ikalawang puwesto para sa kanilang mga pag-aaral tungkol sa pagtuklas ng coefficient of thermal expansion ng bakal at refractive indices ng mga liquid gamit ang mga katangian ng liwanag.

“I was able to focus more on the preparation for the SIP and it was quite a surprise to see Physics 4 output requirements get national recognition. I saw how this accomplishment created a deep sense of ownership and pride in the two groups’ outputs,” kuwento ni G. Emralino.

Talino at galing naman sa larangan ng pisika ang ipinakita nina Alfonso Vicente Perez, Caryl Angela Opulencia, at Francis Ian Corachea ng Team 2 sa Battle of the Brains kung saan nakuha nila ang ikalawang pwesto.

Ipinakita naman nina Mark Cielo Mitra, Randall Maurice Cabautan, Nathaniel Contreras ng Team 2 ang husay at pagkamalikhain sa Physics Communication Challenge kung saan ipinaliwanag nila ang kalikasan ng liwanag bilang parehong particle at wave sa pamamagitan ng malikhaing video.

“The awards we garnered from Liknayan are a big confidence booster to our students and I hope that this will serve as inspiration to our younger batches to pursue physics,” dagdag pa ni G. Emralino.

Sa kabuuan, maraming medalya ang nakamit ng mga kalahok ng kampus kasama ang tatlong tropeyo, dalawa para sa pagiging Overall Champion ng Team 1 at isa para sa pagiging Overall 1st Runner-up ng Team 2.

𝘗𝘢𝘯𝘶𝘭𝘢𝘵 𝘯𝘪: 𝘑𝘰𝘩𝘯 𝘋𝘦𝘯𝘷𝘦𝘳 𝘉𝘦𝘤𝘩𝘢𝘺𝘥𝘢
𝘋𝘪𝘴𝘦𝘯𝘺𝘰 𝘯𝘪: 𝘓𝘰𝘶𝘪𝘴𝘦 𝘎𝘢𝘭𝘪𝘻𝘢
𝘓𝘢𝘳𝘢𝘸𝘢𝘯 𝘯𝘪: 𝘔𝘢'𝘢𝘮 𝘏𝘢𝘻𝘦𝘭 𝘈𝘣𝘢𝘳𝘦𝘵𝘢

17/04/2024

𝐓𝐞𝐚𝐦 𝐏𝐈𝐒𝐀𝐘-𝐂𝐀𝐋𝐀𝐁𝐀𝐑𝐙𝐎𝐍𝐑𝐂, 𝐢𝐭𝐢𝐧𝐚𝐧𝐠𝐡𝐚𝐥 𝐧𝐚 𝐤𝐚𝐦𝐩𝐞𝐨𝐧 𝐬𝐚 𝐒𝐈𝐇𝐀𝐘 𝐍𝐁𝐎 𝟐𝟎𝟐𝟒

Humakot ng mga parangal ang mga iskolar mula PISAY-CALABARZON sa SIHAY National Biology Olympiad (NBO) 2024 dahilan upang makamit nila ang kauna-unahang kampeonato ng paaralan mula sa unang naging paglahok nito noong 2017.

Pinangasiwaan ito ng UP Cell Biological Society (UP CELLS), isa sa mga student-organization ng Institute of Biological Sciences, University of the Philippines Los Baños, noong Abril 13-14.

Hinahasa at sinusubok ng patimpalak ang galing at talino ng mga mag-aaral sa larangan ng Biology sa pamamagitan ng iba't ibang workshops at aktibidad.

Nahati sa pito ang nasabing kompetisyon: On-the-Spot Poster Making, Science Feature Writing, Biology Quiz Olympiad, Impromptu Speaking, Amazing Race, Junior Life Sciences Research Olympiad, at Biotechniques Workshop.

Nagwagi bilang 3rd Runner Up sina Arabella Clarissa Sayat, Samantha Grace Andan, at James Daniel Marasigan sa kategoryang Biology Quiz Olympiad at si Wilber Sean Anterola sa Impromptu Speaking.

Nakuha naman nina Aliyah Mariam Latip ng On-the-Spot Poster Making Contest at Bea Therese Suguitan ng Science Feature Writing ang 1st Runner Up.

Samantala, nasungkit nina Edabuen Darielle Untalan, Joana Eliza Estillero, at Ella Joy Dilan ang 2nd Runner Up sa Junior Life Sciences Research Olympiad, kung saan nabigyan sila ng pagkakataong ibahagi ang kanilang pananaliksik na naglalayong tumugon sa paglutas ng problema at pinsalang dala ng synthetic chemicals gaya ng insecticides at pesticides.

Nabanggit ni Untalan na hindi naging madali ang kanilang preparasyon para sa kompetisyon dahil na rin sa kakulangan sa oras para sa pagpapraktis at pagsasaayos ng mga dokumento at slides na kailangan.

"Hindi kami actually masyado nakapag-prepare since sumabay siya sa STEM week then biglang nag-online class. [...] The night before the contest, nagka-cram pa rin kami and hindi ako mapakali talaga since hindi ako masyado nakapag-prepare," aniya.

Bagaman humarap sa mga nabanggit na pagsubok, ikinagalak naman nila na isa sila sa mga nanalo laban sa humigit-kumulang na 38 na grupong sumali sa patimpalak.

Ipinahayag din ni Ma’am Avril Ley Ann Llave, isa sa mga naging tagapagsanay, ang kaniyang tuwa sa kanilang nakamit na tagumpay kahit na naging maikli ang panahon ng kanilang preparasyon.

"Kaniya-kaniyang train 'yung coaches, mapa-synchronous at asynchronous, dahil nagkaroon ng challenges sa pagte-train kasi nga sunod-sunod 'yung naging activities. [...] As much as possible rin, we want the kids to enjoy the experience rather than give them the pressure of winning. Luckily, nakuha namin 'yung championship," sabi ni Llave.

𝘗𝘢𝘯𝘶𝘭𝘢𝘵 𝘯𝘪: 𝘒𝘢𝘴𝘴𝘢𝘯𝘥𝘳𝘢 𝘊𝘶𝘦𝘵𝘰
𝘋𝘪𝘴𝘦𝘯𝘺𝘰 𝘯𝘪: 𝘠𝘢𝘴𝘮𝘪𝘯𝘦 𝘔𝘢𝘳𝘪𝘢𝘯𝘰 𝘢𝘵 𝘓𝘰𝘶𝘪𝘴𝘦 𝘎𝘢𝘭𝘪𝘻𝘢
𝘓𝘢𝘳𝘢𝘸𝘢𝘯 𝘯𝘪: 𝘔𝘢’𝘢𝘮 𝘔𝘪𝘤𝘩𝘦𝘭𝘭𝘦 𝘔𝘢𝘯𝘨𝘭𝘪𝘤𝘮𝘰𝘵