23/10/2022
လက်ယက်ကုန်းရွာဖြစ်စဥ်က ဒဏ်ရာရထိန်းသိမ်းခံကလေးအချို့ပြန်လည်လွတ်မြောက်လာ
စစ်ကောင်စီတပ်ရဲ့ လေကြောင်း တိုက်ခိုက်မှုခံခဲ့ရတဲ့ စစ်ကိုင်းတိုင်း၊ ဒီပဲယင်းမြို့နယ်၊ လက်ယက်ကုန်းကျေးရွာဖြစ်စဥ်က ဒဏ်ရာရကလေးငယ်အချို့ နဲ့ ဆရာ၊ဆရာမအချို့ ပြန်လည်လွတ်မြောက်လာတယ်လို့ ဒီပဲယင်းမြို့နယ် ဒေသခံတွေကပြောပါတယ်။
ပြန်လည်လွတ်မြောက်လာတဲ့ကလေးငယ် ၄ဦး ရှိပြီး ကျန်တဲ့ ကလေးငယ် ၂ယောက်ကတေ့ဆေးကုသမှုခံယူနေရတုန်းလို့ လက်ယက်ကုန်းဒေသခံတွေကပြောပါတယ်။ ပြန်လည်လွတ်မြောက်လာတဲ့ ကလေးငယ်တွေဟာ ဒဏ်ရာတွေအရှင်းမပျောက်သေးလို့ ဆေးကုသမှုတွေကို ဆက်လက်ခံယူနေရ သလို စိတ်ပိုင်းဆိုင်ရာထိခိုက်မှုတွေလည်းရှိနေတယ်လို့ အခြေအနေသိရှိသူတစ်ဦးကပြောပါတယ်။
''ကလေးတွေက လက်နက်ကြီးစမှန်တယ်ပြောရမယ်။ပေါင်တွေ ကျောကုန်းတွေ မှာဒဏ်ရာတွေရတယ်။ အခုရွာကိုပြန်ရောက်ပေမဲ့ ဓါတ်မှန်ရိုက်တာတွေဘာတွေဆက်လုပ်နေကြတယ်။ အသံကျယ်ကျယ်ကြားရင် လန့်နေကြတယ်'' လို့ မြေပြင်အခြေအနေသိရှိသူတစ်ဦးက ဘီဘီစီကိုပြောပါတယ်။
ပြီးခဲ့တဲ့ စက်တင်ဘာ ၁၆ ရက်က စစ်ကောင်စီက လေယာဉ်နဲ့ လက်ယက်ကုန်းကျေးရွာကို တစ်နာရီနီးပါး လက်နက်ကြီးတွေနဲ့ပစ်ခတ်ခဲ့ပြီး အဲဒီပစ်ခတ်မှု ဖြစ်စဉ်မှာဒဏ်ရာရ ကလေးငယ်တွေ ၊ဆရာ၊ ဆရာမတွေနဲ့ဒေသခံ အပါအဝင် စုစုပေါင်း ၁၇ ဦး ဖမ်းဆီးခံခဲ့ရတာပါ။
ယာဥ်မောင်းဖို့ခေါ်ဆောင်သွားခံရတဲ့ အမျိုးသား၂ဦးနဲ့ ကလေး ၁ဦး တို့အောက်တိုဘာပထပတ်ကပြန်လွတ်မြောက်ပြီးနောက် နောက်ထပ် ကလေး ၄ဦးနဲ့ဆရာ၊ဆရာမ ၃ဦး စုစုပေါင်း ၇ ဦးထပ်မံလွတ်မြောက်လာတာပါ။ လက်ရှိမှာတော့ ကျန်နေတဲ့ ကလေး ၂ဦးက မေမြို့ စစ်ဆေးရုံနဲ့ ရန်ကုန်တို့မှာဆေးကုမှုခံယူနေရင်းထိန်းသိမ်းခံထားရတာပါ။
လက်ရှိမှာတော့ ဆရာတစ်ဦးကိုလည်း ဒေသကာကွယ်ရေးတပ်ဖွဲ့ဝင်လို့ယူဆချက်နဲ့ဆက်လက်ဖမ်းဆီးထားသလိုနောက်ထပ်ပြည်သူတစ်ဦးလည်းမလွတ်သေးဘူးလို့ ဆိုပါတယ်။ဒေသခံတွေကတော့ ဆက်လက်ဖမ်းဆီးခံထားရသူတွေဟာ ကျောင်းဆရာနဲ့သာမန်ပြည်သူတွေသာဖြစ်ပြီးလက်ယက်ကုန်းမှာ ဒေသကာကွယ်ရေးတပ်တွေမရှိဘူးလို့ပြောကြပါတယ်။
စက်တင်ဘာ ၁၆ရက်မှာဖြစ်ခဲ့တဲ့ လက်ယက်ကုန်းရွာကိုလေကြောင်းနဲ့တိုက်ခိုက်တဲ့ဖြစ်စဉ်မှာမြေပြင်မှာတင် ကလေးငယ် ၇ ဦးအထိ သေဆုံးခဲ့တယ်လို့ ကနဦးသိထားရသလို ဒီဖြစ်စဉ်နဲ့ ပတ်သက်ပြီး ပြည်တွင်းရော နိုင်ငံတကာကပါ စစ်ကောင်စီကို အပြင်းအထန်ရှုတ်ချထားကြပါတယ်။
စစ်ကောင်စီဘက်ကတော့ ဒါဟာ ကာကွယ်ရေးအဖွဲ့တွေရှိတယ်လို့ သတင်းရတာကြောင့်တိုက်ခိုက်တာဖြစ်တယ်လို့ ထုတ်ပြန်ထားပြီး ကာကွယ်ရေးအဖွဲ့တွေက ကလေးငယ်တွေကိုလူသားဒိုင်းအဖြစ်အသုံးပြုခဲ့တာလို့ စွပ်စွဲထားတာပါ။
ပုံစာ - ပြီးခဲ့တဲ့ စက်တင်ဘာ ၁၆ ရက်က လေယာဉ်နဲ့ ပစ်ခတ်ခံရပြီးနောက် လက်ယက်ကုန်းကျေးရွာဘုန်းကြီးကျောင်းတွင်း အခြေအနေ
